(1)

Úsáideadh substaintí sárfhluarailcile (SPFAnna) go fairsing i bhfeidhmeanna tionsclaíocha agus tomhaltóra lena n-áirítear bratuithe smálfhriotaíocha le haghaidh fabraicí agus cairpéad, bratuithe olafhriotaíocha le haghaidh ábhair bhia-thadhaill déanta as páipéar agus cairtchlár, cúir comhraic dóiteáin, dromchlaghníomhaithe tobar ola, snasanna urlár agus ullmhóidí feithicídí. De dheasca na húsáide forleithne a bhaintear astu, mar aon lena marthanacht sa chomhshaol, tá éilliú comhshaoil forleathan ann. Tarlaíonn éilliú bia leis na substaintí sin go háirithe mar thoradh ar bhithbhailiú i slabhraí bia uisceacha agus talún, agus mar thoradh ar úsáid ábhair bia-thadhaill ina bhfuil SPFAnna. Is iad aigéad sulfónach sárfhluarochtáin (ASFOS) agus aigéad sárfhluarochtánóch (ASFO) agus a salainn na SPFAnna atá le fáil i mbia agus i ndaoine sna tiúchaintí is airde.

(2)

In 2020, arna iarraidh sin don Choimisiún, sa tuairim uaidh maidir leis an riosca do shláinte an duine a bhaineann le substaintí sárfhluarailcile (1), thug an tÚdarás Eorpach um Shábháilteacht Bia (an tÚdarás) a mheasúnú riosca ar ASFOS agus ASFO cothrom le dáta agus leathnaigh sé é chun aigéad sárfhluaranaonánóch (ASFN) agus aigéad sulfónach sárfhluaraiheacsáin (SFHxS) a chumhdach, agus an fhaisnéis eolaíoch is déanaí agus na sonraí minicíochta a bailíodh faoi Mholadh 2010/161/AE ón gCoimisiún (2) á gcur san áireamh aige. Tháinig an tÚdarás ar an gconclúid go sáraíonn codanna de dhaonra na hEorpa an iontógáil sheachtainiúil infhulaingthe. Is cosúil gurb iad uibheacha, iasc agus bia mara eile, feoil agus táirgí feola ar na nithe is mó a chuireann le nochtadh an duine do SPFAnna. Tháinig an tÚdarás ar an gconclúid go gcuireann bia de bhunadh ainmhíoch go mór le nochtadh an duine do SPFAnna. Tháinig an tÚdarás ar an gconclúid go n-aistrítear SPFAnna ó bheatha go bia a dhíorthaítear ó ainmhithe, agus go mbíonn difríochtaí soiléire idir na speicis agus idir na cineálacha SPFAnna. D’fhéadfadh aistriú SPFAnna den chineál sin teacht chun cinn freisin ó ithir a ionghabhann ainmhithe feirme ar thóir bia agus ó uisce óil le haghaidh ainmhithe.

(3)

Chun ardleibhéal cosanta do shláinte an duine a áirithiú, suíodh uasleibhéil le haghaidh substaintí sárfhluarailcile i mbianna áirithe de bhunadh ainmhíoch i Rialachán (AE) 2023/915 ón gCoimisiún (3).

(4)

Maidir le SPFAnna a bheith i mbeatha ainmhithe nó san ithir ar a mbíonn ainmhithe ar thóir foráiste, d'fhéadfadh sé sin a bheith ina chúis le neamhchomhlíonadh bia de bhunadh ainmhíoch leis na huasleibhéil le haghaidh bia de bhunadh ainmhíoch.

(5)

Níl ach sonraí teoranta maidir le láithreacht SPFAnna i mbeatha ar fáil faoi láthair chun gur féidir na rátaí tuliompair ó bheatha go bia de bhunadh ainmhíoch a chinneadh agus chun gur féidir plé a dhéanamh ar an ngá féideartha uasleibhéil le haghaidh SPFAnna i mbeatha a shuí. Dá bhrí sin, ba cheart sonraí minicíochta maidir le SPFAnna i mbeatha agus in ithir a bhailiú ar eagla go mbaineann láithreacht SPFAnna i mbia de bhunadh ainmhíoch le láithreacht SPFAnna in ithir. D’fhéadfadh láithreacht SPFAnna i mbia de bhunadh ainmhíoch a bheith mar thoradh ar láithreacht SPFAnna in uisce óil freisin ach tá sonraí faireacháin leordhóthanach maidir le láithreacht SPFAnna in uisce óil ar fáil.

(6)

D’fhonn tiúchaintí SPFAnna sna cainníochtaí ina mbíonn siad ann a chainníochtú, ba cheart modhanna atá sách íogair a úsáid. Ba cheart é sin a spreagadh trí sprioctheorainneacha cainníochtaithe a mholadh.

(7)

Chun a áirithiú gur samplaí ionadaíocha iad na samplaí ar an luchtóg shampláilte, ba cheart do na Ballstáit an nós imeachta samplála a leagtar síos i Rialachán (CE) Uimh. 152/2009 ón gCoimisiún (4) a leanúint,