(1)

Déantar idirbhearta a bhaineann le cripteashócmhainní, lena n-áirítear a n-eisiúint, a bhailíochtú agus a thaifeadadh trí shásraí comhthola, is é sin na rialacha agus na nósanna imeachta chun teacht ar chomhaontú maidir le hidirbheart a bhailíochtú i measc nóid líonra teicneolaíochta mórleabhar dáilte (DLT), atá freagrach freisin as taifid a choinneáil de na hidirbhearta uile ar mhórleabhar dáilte. Comhthoil a bhaint amach, lena n-éilítear úsáid ábhar agus ríomhchumhachta, bíonn tionchair aige sin ar an aeráid agus ar an gcomhshaol, rud atá éagsúil ar fud DLTanna ag brath ar a ngnéithe sonracha.

(2)

Dá bhrí sin, tá sainaithint agus nochtadh leordhóthanach na ndrochthionchar aeráide agus na ndrochthionchar eile a bhaineann leis an gcomhshaol a bhaineann le sásraí comhthola a úsáid chun cripteashócmhainní a eisiúint ríthábhachtach do chinnteoireacht na ndaoine sin a infheistíonn i gcripteashócmhainní.

(3)

Tá sé tábhachtach go bhfaigheadh infheisteoirí faisnéis chruinn, chothrom, shoiléir, nach bhfuil míthreorach, shimplí, bheacht agus inchomparáide maidir le tionchair na dteicneolaíochtaí atá mar bhonn taca faoi eisiúint cripteashócmhainní ar an aeráid agus ar an gcomhshaol. San am céanna, i bhfianaise chineál dáilte na teicneolaíochta atá idir lámha, d’fhéadfadh sé a bheith deacair faisnéis chruinn agus iontaofa a fháil agus a nochtadh ina leith sin. Is gá, dá bhrí sin, liosta táscairí a fhorbairt lena meastar na srianta sin chun faisnéis intuigthe agus inchomparáide a chur ar fáil d’infheisteoirí maidir le drochthionchair na sásraí comhthola, bunaithe ar shonraí inrochtana agus iontaofa, lena n-áirítear meastacháin i gcás inar gá agus i gcás ina bhfuil údar cuí leo.

(4)

An fhaisnéis dá dtagraítear in Airteagal 6(1), an chéad fhomhír, pointe (j), Airteagal 19(1), an chéad fhomhír, pointe (h), Airteagal 51(1), pointe (g), agus Airteagal 66(5) de Rialachán (AE) 2023/1114 atá le cur san áireamh sna páipéir bhána maidir le cripteashócmhainní agus ar shuíomhanna gréasáin soláthraithe seirbhísí cripteashócmhainní maidir leis an aeráid agus tionchair eile a bhaineann leis an gcomhshaol atá ag sásraí comhthola agus, dá bhrí sin, tá dlúthnasc eatarthu. Chun comhsheasmhacht, comhleanúnachas agus inchomparáideacht na faisnéise sin a áirithiú, is iomchuí í a rialáil trí bhíthin Rialachán aonair.

(5)

Chun comhsheasmhacht a áirithiú idir an fhaisnéis a fhaightear sna páipéir bhána maidir le cripteashócmhainní a eisítear tríd an sásra comhthola céanna, chomh maith le comhréireacht i gcomhlíonadh an Rialacháin seo, ba cheart é a bheith indéanta, gan dochar d’oibleagáidí dlíthiúla na n-eintiteas faoi seach, faisnéis a athúsáid maidir leis an sásra comhthola atá ábhartha do chripteashócmhainn dá n-ullmhaítear páipéar bán maidir le cripteashócmhainní, i gcás inar foilsíodh an fhaisnéis sin cheana féin i gcomhthéacs páipéar bán eile maidir le cripteashócmhainní.

(6)

Ós rud é go leanann na heintitis nochta uile de bheith freagrach as a nochtaí féin, lena n-áirítear i gcás ina bhfoinsíonn siad faisnéis ó pháipéir bhána maidir le cripteashócmhainní atá ann cheana, ba cheart athbhreithniú a dhéanamh ar bhonn tráthrialta ar fhaisnéis a áirítear sna páipéir bhána agus ar fhaisnéis a chuirtear ar fáil ar shuíomhanna gréasáin soláthraithe seirbhísí cripteashócmhainní agus í a thabhairt cothrom le dáta dá réir sin. Ós rud é go bhféadfaidh eintitis nochta úsáid a bhaint as tríú páirtithe neamhspleácha chun faisnéis atá le nochtadh a fháil nó a fhíorú, ba cheart úsáid na tríú páirtithe neamhspleácha sin chun na gcríoch sin a nochtadh agus ba cheart an tríú páirtí neamhspleách ábhartha a shainaithint.

(7)

Chun cumas infheisteoirí comparáid a dhéanamh idir drochthionchair na sásraí comhthola ar a n-eisítear cripteashócmhainní éagsúla, leis an bhfaisnéis ar shuíomhanna gréasáin soláthraithe seirbhísí cripteashócmhainní ba cheart é a bheith ar a gcumas don phobal comparáid a dhéanamh idir na drochthionchair ar an aeráid agus drochthionchair eile a bhaineann leis an gcomhshaol atá ag na sásraí comhthola agus a struchtúir dreasachta ar fud na gcripteashócmhainní go léir a soláthraíonn an soláthraí seirbhísí cripteashócmhainní seirbhísí cripteashócmhainní ina leith.

(8)

Chun measúnú a dhéanamh ar thionchar an tsásra comhthola a úsáidtear chun gach cripteashócmhainn a eisiúint ar an aeráid agus ar thionchair eile a bhaineann leis an gcomhshaol, is iomchuí bailíochtú gach idirbhirt sa chripteashócmhainn ábhartha a chur san áireamh, agus nóid líonra DLT a bhfuil baint ghníomhach acu le bailíochtú á gcur san áireamh, agus cothabháil shláine DLT ag gach nód líonra DLT a chur san áireamh chomh maith.

(9)

Ba cheart príomhtháscairí a úsáid chun tuiscint éasca a fháil ar na tionchair ar an aeráid agus ar na tionchair eile a bhaineann leis an gcomhshaol atá ag na sásraí comhthola. Chun úsáid sásraí comhthola atá níos neamhdhíobhálaí don aeráid agus don chomhshaol a dhreasú agus chun cleachtais ghlas-snasaithe a chosc, tá sé ríthábhachtach brath a mhéid is féidir ar mhéadracht chainníochtúil. Ba cheart olltomhaltas fuinnimh agus astaíochtaí a léiriú sa mhéadracht chainníochtúil, gan sásraí fritháirimh a d’fhéadfadh a bheith ann a chuimsiú.

(10)

Ba cheart tomhaltas fuinnimh bliantúil a úsáid mar phríomhtháscaire sainordaitheach toisc go meastar gurb é sin an ceann is fabhraí le haghaidh fheasacht na n-infheisteoirí maidir le tionchar na sásraí comhthola. I bhfianaise phríomhról an leictreachais in oibriú líonraí DLT, ba cheart tomhaltas leictreachais a mheas mar athróg ionadach oiriúnach le haghaidh tomhaltas fuinnimh.

(11)

Chun cur chuige comhréireach i leith faisnéis inbhuanaitheachta a áirithiú, is iomchuí faisnéis bhreise a iarraidh maidir le sásraí comhthola ag a bhfuil drochthionchair aeráide níos mó agus drochthionchair níos mó eile a bhaineann leis an gcomhshaol, go háirithe i gcás ina sáraíonn siad leibhéal áirithe tomhaltais fuinnimh. Dá bhrí sin, ba cheart príomhtháscairí forlíontacha maidir le hastaíochtaí fuinnimh agus gás ceaptha teasa (GCT) a úsáid le haghaidh cripteashócmhainní a eisítear trí shásraí comhthola ina bhfuil leibhéil níos airde tomhaltais fuinnimh bhliantúil chun tuiscint níos doimhne a thabhairt d’infheisteoirí ar dhrochthionchair na sásraí comhthola sin.

(12)

De bhreis ar phríomhtháscairí sainordaitheacha agus forlíontacha, ba cheart go bhféadfaí a áireamh go deonach, i gcuid shonrach de na páipéir bhána nó de shuíomhanna gréasáin soláthraithe seirbhísí cripteashócmhainní faisnéis maidir leis an aeráid agus táscairí eile a bhaineann leis an gcomhshaol a bhféadfadh sé a bheith níos casta measúnú a dhéanamh orthu nó a bhféadfadh sé a bheith níos deacra sonraí ábhartha a aimsiú ina leith, mar shampla maidir le táirgeadh dramhaíola agus úsáid acmhainní nádúrtha, amhail uisce.

(13)

Chun glas-snasú a chosc agus chun inchomparáideacht na faisnéise atá le háireamh sna páipéir bhána maidir le cripteashócmhainní agus ar shuíomhanna gréasáin soláthraithe seirbhísí cripteashócmhainní a áirithiú, ba cheart faisnéis maidir le táscairí roghnacha a bheith faoi réir na rialacha comhchuibhithe céanna maidir le cur i láthair faisnéise agus maidir leis na modheolaíochtaí agus atá san fhaisnéis maidir le táscairí sainordaitheacha agus forlíontacha. Tá feidhm aige sin, mar shampla, maidir le hastaíochtaí GCT indíreacha, amhail astaíochtaí réamhtheachtacha atá nasctha leis an trealamh a cheannaíonn nóid líonra DLT nó astaíochtaí iartheachtacha a bhaineann le bainistiú dramhaíola.

(14)

Chun comhsheasmhacht na faisnéise nochta a chothú in éagmais comhthola maidir le tacar sonrach modheolaíochtaí iontaofa chun na táscairí sainaitheanta a ríomh ag an gcéim sin, ba cheart feidhm a bheith ag prionsabail chomhchuibhithe mar sin féin chun inchomparáideacht na faisnéise nochta a áirithiú, chun aon chlaontacht mhodheolaíoch a sheachaint, agus chun comhsheasmhacht na modheolaíochtaí a úsáidtear a áirithiú leo siúd dá dtagraítear faoi chuimsiú chur i bhfeidhm Threoir (AE) 2022/2464 ó Pharlaimint na hEorpa agus ón gComhairle (2). Mar thoradh air sin, ba cheart faisnéis maidir le tomhaltas fuinnimh agus astaíochtaí GCT a ailíniú leis an treoraíocht maidir le ríomh a leagtar síos i Rialachán Tarmligthe (AE) 2023/2772 ón gCoimisiún (3), agus ba cheart an mhodheolaíocht a úsáidtear chun ríomh a dhéanamh ar gach méadracht chainníochtúil agus aon diall ón treoraíocht sin maidir le ríomh a nochtadh.

(15)

I gcás nach bhfuil faisnéis a bhaineann le táscairí ar fáil laistigh de thréimhse ama réasúnta, ba cheart meastacháin a nochtadh in éineacht le toimhdí réasúnta a úsáidtear chun meastacháin den sórt sin a ríomh agus le mionsonraí faoi na hiarrachtaí is fearr a rinneadh chun an fhaisnéis a fháil. Dá bhrí sin, i gcás nach féidir suíomh nód a shainaithint mar shuíomh atá riachtanach le haghaidh nochtaí áirithe, ba cheart sonraí áitiúla, réigiúnacha nó domhanda a úsáid de réir mar is gá agus is iomchuí. Ba cheart na sonraí sin a nochtadh in éineacht le sonraí maidir leis na hiarrachtaí is fearr a úsáideadh chun an fhaisnéis a fháil.

(16)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Eorpach um Urrúis agus Margaí (‘ESMA’), i gcomhar leis an Údarás Baincéireachta Eorpach, faoi bhráid an Choimisiúin.

(17)

Reáchtáil ESMA comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí gaolmhara féideartha agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (4),

(a)

ciallaíonn ‘struchtúr dreasachta’ an tacar dreasachtaí agus pionós a bhunaítear mar chuid de shásra comhthola chun nóid líonra teicneolaíochta mórleabhar dáilte (DLT) a dhreasú go heacnamaíoch chun comhoibriú ó thaobh rialacha agus nósanna imeachta an tsásra comhthola a chur i bhfeidhm chun idirbhearta i gcripteashócmhainní a bhailíochtú;

(b)

ciallaíonn ‘astaíochtaí gás ceaptha teasa (GCT)’ astaíochtaí gás a liostaítear i gCuid 2 d’Iarscríbhinn V a ghabhann le Rialachán (AE) 2018/1999 ó Pharlaimint na hEorpa agus ón gComhairle (5) arna sloinneadh i dtonaí de choibhéis CO2;

(c)

ciallaíonn ‘táscairí aeráide agus táscairí eile a bhaineann leis an gcomhshaol’ na táscairí a liostaítear sa roinn ‘Príomhtháscaire sainordaitheach maidir le tomhaltas fuinnimh’ de Thábla 2 den Iarscríbhinn, sa roinn ‘Príomhtháscairí forlíontacha maidir le fuinneamh agus astaíochtaí GCT’ de Thábla 3 den Iarscríbhinn, agus sa roinn ‘Táscairí roghnacha’ de Thábla 4 den Iarscríbhinn;

(d)

ciallaíonn ‘astaíochtaí GCT DLT scóip 1’ astaíochtaí gás ceaptha teasa (GCT) a ghintear ó fhoinsí atá á rialú ag nóid líonra na teicneolaíochta mórleabhar dáilte (DLT) agus úsáid á baint as an sásra comhthola;

(e)

ciallaíonn ‘astaíochtaí GCT DLT scóip 2’ astaíochtaí GCT ó thomhaltas leictreachais cheannaithe, gaile, nó foinsí eile fuinnimh a ghintear go réamhtheachtach ó nóid líonra DLT agus úsáid á baint as an sásra comhthola;

(f)

ciallaíonn ‘astaíochtaí GCT DLT scóip 3’ na hastaíochtaí GCT indíreacha, réamhtheachtacha agus iartheachtacha uile nach gcumhdaítear le pointí (d) agus (e) a tharlaíonn i slabhra luacha nóid líonra DLT agus úsáid á baint as an sásra comhthola;

(g)

ciallaíonn ‘fuinneamh ó fhoinsí inathnuaite’ nó ‘fuinneamh inathnuaite’ fuinneamh ó fhoinsí inathnuaite nó fuinneamh inathnuaite mar a shainmhínítear in Airteagal 2, pointe (1), de Threoir (AE) 2018/2001 ó Pharlaimint na hEorpa agus ón gComhairle (6);

(h)

ciallaíonn ‘dramhaíl’ dramhaíl mar a shainmhínítear in Airteagal 2, pointe (23), de Threoir (AE) 2018/2001;

(i)

ciallaíonn ‘dramhthrealamh leictreach agus leictreonach’ (DTLL) dramhthrealamh leictreach agus leictreonach mar a shainmhínítear in Airteagal 3(1), pointe (e), de Threoir 2012/19/AE ó Pharlaimint na hEorpa agus ón gComhairle (7);

(j)

ciallaíonn ‘dramhaíl neamh-athchúrsáilte’ aon dramhaíl nach n-athchúrsáiltear de réir bhrí ‘athchúrsáil’ in Airteagal 3, pointe 17, de Threoir 2008/98/CE ó Pharlaimint na hEorpa agus ón gComhairle (8);

(k)

ciallaíonn ‘dramhaíl ghuaiseach’ dramhaíl ghuaiseach mar a shainmhínítear in Airteagal 3, pointe (2), de Threoir 2008/98/CE;

(l)

ciallaíonn ‘acmhainní nádúrtha’ acmhainní nádúrtha mar a shainmhínítear i dTábla 2 d’Iarscríbhinn II a ghabhann le Rialachán Tarmligthe (AE) 2023/2772.