(1)

Le Rialachán Cur Chun Feidhme (AE) 2022/2389 ón gCoimisiún (2), bunaítear rialacha maidir le cur i bhfeidhm aonfhoirmeach rátaí minicíochta le haghaidh seiceálacha céannachta agus seiceálacha fisiceacha ar choinsíneachtaí plandaí, táirgí plandaí agus réad eile dá dtagraítear in Airteagal 47(1), pointe (c), de Rialachán (AE) 2017/625 a thagann isteach san Aontas agus atá faoi réir rialuithe oifigiúla ag poist rialaithe teorann an chéad teacht isteach san Aontas. Le hIarscríbhinn I a ghabhann le Rialachán Cur Chun Feidhme (AE) 2022/2389 leagtar amach an liosta plandaí, táirgí plandaí agus réad eile atá faoi réir seiceálacha céannachta agus seiceálacha fisiceacha ag rátaí minicíochta áirithe.

(2)

I gcomhréir le hAirteagal 4(4) de Rialachán Cur Chun Feidhme (AE) 2022/2389, aon phlanda, táirge planda nó réad eile atá faoi réir beart dá bhforáiltear i ngníomhartha arna nglacadh i gcomhréir le hAirteagail 28(1), 30(1) agus 49(1) de Rialachán (AE) 2016/2031 ó Pharlaimint na hEorpa agus ón gComhairle (3), níl sé faoi réir na rátaí minicíochta laghdaithe dá dtagraítear i mír 3; dá bhrí sin, tá sé faoi réir ráta minicíochta 100 % le haghaidh seiceálacha céannachta agus seiceálacha fisiceacha ar theacht isteach san Aontas dó.

(3)

Leagtar amach go minic sna gníomhartha sin, inter alia, bearta nach gcuireann allmhairiú plandaí faoi réir ceanglas sonrach ach nach bhforchuireann ach ceanglais a bhaineann le plandaí atá lonnaithe laistigh de chríoch an Aontais, amhail suirbhéanna ar phlandaí óstacha lotnaidí sonracha. Mar is léir ón taithí a fuarthas le cur i bhfeidhm Rialachán Cur Chun Feidhme (AE) 2022/2389, ní iomchuí ráta minicíochta 100 % a chur i bhfeidhm go córasach maidir le hallmhairiú na bplandaí sin isteach san Aontas, nuair nach bhfuil a dtabhairt isteach i gcríoch an Aontais faoi réir aon cheanglas sonrach de bhun na ngníomhartha sin.

(4)

Dá bhrí sin, ar mhaithe le soiléireacht dhlíthiúil, is iomchuí Airteagal 4(4) de Rialachán Cur Chun Feidhme (AE) 2022/2389 a leasú ionas nach mbeidh feidhm ag na rátaí minicíochta laghdaithe le haghaidh seiceálacha céannachta agus seiceálacha fisiceacha maidir le plandaí, táirgí plandaí agus réada eile atá faoi réir bearta sonracha a bhaineann lena dtabhairt isteach san Aontas, dá bhforáiltear i ngníomhartha arna nglacadh i gcomhréir le hAirteagail 28(1), 30(1) agus 49(1) de Rialachán (AE) 2016/2031.

(5)

I gcomhréir le hAirteagal 6(1) de Rialachán Cur Chun Feidhme (AE) 2022/2389, tá na rátaí minicíochta a leagtar amach in Iarscríbhinn I a ghabhann leis an Rialachán Cur Chun Feidhme sin le modhnú ag féachaint do na critéir a leagtar amach i bpointí (i), (ii), (iv), (v) agus (vi) d’Airteagal 54(3), pointe (a), de Rialachán (AE) 2017/625, do na critéir a leagtar amach in Iarscríbhinn II agus, i gcás inarb iomchuí, ag féachaint don fhaisnéis a leagtar amach in Iarscríbhinn III a ghabhann leis an Rialachán Cur Chun Feidhme sin. I gcomhréir le hAirteagal 6(2) den Rialachán Cur Chun Feidhme sin, déanfar na rátaí minicíochta le haghaidh seiceálacha céannachta agus seiceálacha fisiceacha ar phlandaí, táirgí plandaí agus réada eile, nó catagóirí díobh, a athbhreithniú ar bhonn bliantúil ar a laghad, chun faisnéis nua a bhaileofar trí CBFRO nó a sholáthróidh na Ballstáit a chur san áireamh, agus déanfar iad a mhodhnú dá réir.

(6)

Bhunaigh an Coimisiún meitheal saineolaithe a scrúdaigh allmhairiú plandaí, táirgí plandaí agus réad eile dá dtagraítear in Airteagal 47(1), pointe (c), de Rialachán (AE) 2017/625 in 2022, 2023 agus 2024, ar nithe iad atá faoi réir rialuithe oifigiúla ag poist rialaithe teorann an chéad teacht isteach san Aontas. Ar bhonn na gcritéar dá dtagraítear in Airteagal 6(1) de Rialachán Cur Chun Feidhme (AE) 2022/2389, thug an mheitheal le fios íosrátaí minicíochta na seiceálacha céannachta agus na seiceálacha fisiceacha a mheas sí a bheith iomchuí le haghaidh plandaí, táirgí plandaí agus reáda áirithe eile ó thríú tíortha tionscnaimh áirithe.

(7)

Úsáideadh modh a bhí bunaithe ar riosca agus ar staidreamh agus cuireadh sraith athróg san áireamh, lenan-áirítear: innéacs soghluaisteachta measta na lotnaidí coraintín de chuid an Aontais ag an gcéim is soghluaiste a fhéadfaidís a bhaint amach ar na plandaí ábhartha, na táirgí plandaí ábhartha nó réada ábhartha eile, nó catagóirí díobh; líon na gcoinsíneachtaí plandaí, táirgí plandaí agus réad eile, nó catagóirí díobh, a ndearnadh seiceálacha céannachta agus seiceálacha fisiceacha orthu le linn na bliana roimhe sin; maidir le coinsíneachtaí a allmhairíodh de bhun Rialachán Cur Chun Feidhme (AE) 2022/2389, líon iomlán na neamhchomhlíontachtaí mar gheall ar lotnaidí coraintín de chuid an Aontais a bheith ann, agus sonraí na neamhchomhlíontachtaí sin; líon iomlán na gcoinsíneachtaí earraí lena mbaineann ar tugadh fógra fúthu ar chúiseanna seachas lotnaidí coraintín de chuid an Aontais a bheith iontu, agus na sonraí a bhaineann leis sin; agus aon ghné ábhartha eile chun an riosca fíteashláintíochta a bhaineann leis an trádáil lena mbaineann a chinneadh.

(8)

Go háirithe, agus de bharr líon níos lú idircheaptha coinsíneachtaí dá ndéanann lotnaidí coraintín de chuid an Aontais difear go príomha, ba cheart íosrátaí minicíochta na seiceálacha céannachta agus fisiceacha a laghdú le haghaidh bláthanna gearrtha ó Dianthus agus Gypsophila ó Eacuadór, Gypsophila ón gCéinia, torthaí ó Malus, Prunus agus Pyrus ó thríú tíortha Eorpacha, Citrus ón Eigipt agus Iosrael, Citrus agus Prunus ón Tuirc, Pyrus ón tSín, glasraí ó Solanum lycopersicum ó na hOileáin Chanáracha agus innealra athláimhe ó gach tríú tír.

(9)

Thairis sin, chun a áirithiú go ndéanfar líon íosta seiceálacha céannachta agus seiceálacha fisiceacha i ngach cás, d’ainneoin líon níos lú coinsíneachtaí allmhairithe, i gcás torthaí Citrus de thionscnamh Mharacó agus na Stát Aontaithe, Malus de thionscnamh na hAirgintíne agus an Nua-Shéalainn, agus Prunus agus Vaccinium ón tSile, ba cheart íosrátaí minicíochta ábhartha na seiceálacha céannachta agus seiceálacha fisiceacha a mhéadú.

(10)

Ba cheart íosrátaí minicíochta na seiceálacha céannachta agus fisiceacha a mhéadú de thoradh idircheapadh coinsíneachtaí dá ndéanann lotnaidí coraintín de chuid an Aontais difear i gcás bláthanna gearrtha de Aster ón tSiombáib, Rosa ón tSaimbia, torthaí ó Fragaria ón Eigipt, Persea americana ó Chamarún, agus fréamhacha agus tiúbairíní ó Curcuma longa ón Téalainn.

(11)

I bhfianaise an mhéid sin thuas, measann an Coimisiún gur cheart na rátaí minicíochta le haghaidh seiceálacha céannachta agus seiceálacha fisiceacha a leagtar amach in Iarscríbhinn I a ghabhann le Rialachán Cur Chun Feidhme (AE) 2022/2389 a mhodhnú.

(12)

Ar mhaithe le soiléireacht, is iomchuí Iarscríbhinn I a ghabhann le Rialachán Cur Chun Feidhme (AE) 2022/2389 a ionadú.

(13)

Chun am leordhóthanach a thabhairt do na húdaráis inniúla iad féin a oiriúnú do na rátaí minicíochta nua, ba cheart feidhm a bheith ag an Rialachán seo ón 1 Márta 2025.

(14)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(a)

Cuirtear an méid seo a leanas in ionad Airteagal 4(4):

(b)

Cuirtear an téacs a leagtar amach san Iarscríbhinn a ghabhann leis an Rialachán seo in ionad Iarscríbhinn I.