(1)

Tá coincheap an ‘idirbhirt’ in Airteagal 22(1) de Rialachán (AE) 2023/1114 neafaiseach ar an gcineál tiachóg a úsáideann an t-íocóir nó an t-íocaí chun idirbheart a thionscnamh nó a fháil, is idirbheart a bhaineann le húsáid comhartha sócmhainn-tagartha mar mhodh malartaithe. Dá réir sin, chun an mhodheolaíocht dá dtagraítear in Airteagal 22(6) de Rialachán (AE) 2023/1114 a shonrú, is gá a mheas gur cheart a áireamh sa tuairisciú in Airteagal 22(1), pointe (d), den Rialachán sinidirbhearta idir tiachóga coinneála chomh maith le hidirbhearta idir tiachóg choinneála, ar thaobh amháin, agus tiachóg neamhchoinneála nó cineálacha eile seoltaí mórleabhair dháilte nach bhfuil á rialú ag sealbhóir comhartha sócmhainn-tagartha nó ag soláthraí seirbhísí cripteashócmhainní, ar an taobh eile. Maidir le hidirbhearta idir tiachóga neamhchoinneála, nó idir tiachóga neamhchoinneála agus cineálacha eile seoltaí mórleabhair dháilte nach bhfuil á rialú ag sealbhóir comhartha sócmhainn-tagartha nó ag soláthraí seirbhísí cripteashócmhainní, níor cheart iad a áireamh i raon feidhme an tuairiscithe in Airteagal 22(1), pointe (d), de Rialachán (AE) 2023/1114, agus é á chur san áireamh go bhféadfadh sé nach mbeadh an fhaisnéis is gá ag eisitheoirí chun idirbhearta den sórt sin a thuairisciú faoi na forálacha sin. Ba cheart nár dhochar an méid sin d’oibleagáidí tuairiscithe eisitheoirí i leith na n-idirbheart sin faoi Airteagal 22(1), pointe (c), de Rialachán (AE) 2023/1114 ón gCoimisiún agus Rialachán Cur Chun Feidhme (AE) 2024/2902 (2).

(2)

De réir Airteagal 22(1), an dara fomhír, de Rialachán (AE) 2023/1114, níl in idirbhearta a bhaineann le húsáidí mar mhodh malartaithe ach idirbhearta as a n-eascraíonn athrú ar an duine nádúrtha nó dlítheanach atá i dteideal an chomhartha sócmhainn-tagartha. Tá feidhm aige sin fiú i gcás nach dtagann athrú ar an úinéir tairbhiúil de réir bhrí Airteagal 3, pointe (6), de Threoir (AE) 2015/849 ó Pharlaimint na hEorpa agus ón gComhairle (3), agus gan beann ar na hidirbhearta sin a bheith socraithe ar an mórleabhar dáilte (‘ar an slabhra’) nó lasmuigh den mhórleabhar dáilte (‘seachshlabhra’). Dá réir sin, chun críoch an tuairiscithe faoi Airteagal 22(1), pointe (d), de Rialachán (AE) 2023/1114,níor cheart a áireamh sna sonraí atá le tuairisciú ag an eisitheoir don údarás inniúil aistrithe comhartha sócmhainne-tagartha idir seoltaí nó cuntais éagsúla de chuid an duine chéanna.

(3)

Foráiltear le hAirteagal 22(1), an tríú fomhír, de Rialachán (AE) 2023/1114 nach measfar go bhfuil baint ag idirbhearta áirithe le húsáidí comharthaí sócmhainn-tagartha mar mhodh malartaithe. Go háirithe, mar a shoiléirítear in aithris 61 den Rialachán sin, is éard atá in idirbhearta a bhaineann le húsáidí comharthaí sócmhainn-tagartha mar mhodh malartaithe na hidirbhearta sin a bhaineann le híocaíochtaí fiachas lena n-áirítear i gcomhthéacs idirbheart le ceannaithe agus níor cheart idirbhearta a bhaineann le feidhmeanna agus seirbhísí infheistíochta a áireamh iontu, amhail modh malartaithe le haghaidh cistí nó cripteashócmhainní eile, mura bhfuil fianaise ann go n-úsáidtear an comhartha sócmhainn-tagartha chun idirbhearta i gcripteashócmhainní eile a shocrú. Dá bhrí sin, is gá sonrú breise a dhéanamh ar an gcineál idirbheart atá le tuairisciú faoi Airteagal 22(1), pointe (d), de Rialachán (AE) 2023/1114.

(4)

Ba cheart don eisitheoir meastachán a dhéanamh ar líon agus luach na n-idirbheart a bhaineann le húsáidí comhartha sócmhainn-tagartha mar mhodh malartaithe, dá dtagraítear in Airteagal 22(1), pointe (d), de Rialachán (AE) 2023/1114, trí idirbhearta a asbhaint ó líon agus luach iomlán na n-idirbheart a shocraítear sa chomhartha sócmhainn-tagartha, le linn na ráithe ábhartha, i gcás ina malartaítear an comhartha sócmhainn-tagartha le haghaidh cistí nó cripteashócmhainní eile leis an eisitheoir nó le soláthraí seirbhísí cripteashócmhainní, nó i gcás ina n-úsáidtear an comhartha sócmhainn-tagartha mar chomhthaobhacht chun idirbhearta a sheoladh le hionstraimí airgeadais agus i gcás ina n-úsáidtear an comhartha sócmhainn-tagartha chun conradh díorthach a shocrú. Ina theannta sin, féadfaidh an t-eisitheoir idirbhearta eile leis an gcomhartha sócmhainn-tagartha a asbhaint freisin i gcás ina bhfuil forais réasúnacha ag an eisitheoir glacadh leis nach é cuspóir na n-idirbheart faoi seach íoc as earraí nó seirbhísí, ar choinníoll go bhféadfaidh an t-eisitheoir a léiriú don údarás inniúil, ar é a iarraidh, go raibh forais réasúnacha aige glacadh leis nach mbaineann na hidirbhearta sin le húsáid an chomhartha sócmhainn-tagartha chun íoc as earraí nó seirbhísí.

(5)

Ba cheart a áireamh freisin ar idirbhearta a bhaineann le húsáidí comhartha sócmhainn-tagartha mar mhodh malartaithe idirbhearta ina n-úsáidtear cripteashócmhainn amháin nó roinnt cripteashócmhainní atá éagsúil leis an gcomhartha sócmhainn-tagartha chun íoc as earraí agus seirbhísí, ar choinníoll go socraítear na hidirbhearta sin sa chomhartha sócmhainn-tagartha. Féadfar a áireamh air sin, mar shampla, cásanna ina n-úsáidtear comhartha sócmhainn-tagartha mar shócmhainn idirlinne chun idirbhearta a shocrú le cripteashócmhainn atá éagsúil leis an gcomhartha sócmhainn-tagartha, i gcás inarb é cuspóir an idirbhirt sin íoc as earraí nó seirbhísí, agus cásanna ina n-úsáidtear comhartha sócmhainn-tagartha mar shócmhainn idirlinne chun idirbheart a shocrú ina bhfuil dhá chripteashócmhainn atá éagsúil leis an gcomhartha sócmhainn-tagartha, i gcás inarb é cuspóir an idirbhirt sin íoc as earraí nó seirbhísí. I gcodarsnacht leis sin, maidir le hidirbhearta inar mian leis na páirtithe dhá chripteashócmhainn ar leith atá éagsúil leis an gcomhartha sócmhainn-tagartha a thrádáil nó a mhalartú agus ina gcomhaontaíonn siad an t-idirbheart a shocrú trí chomhartha sócmhainn-tagartha a úsáid, gan é a bheith de chuspóir ag an idirbheart foluiteach íoc as earraí nó seirbhísí, níor cheart go dtiocfaidís faoi raon feidhme an tuairiscithe in Airteagal 22(1), pointe (d), de Rialachán (AE) 2023/1114.

(6)

Ba cheart don eisitheoir an limistéar airgeadra aonair ar cheart an t-idirbheart sin a thuairisciú ina leith a chinneadh le haghaidh gach idirbhirt faoi raon feidhme Airteagal 22(1), pointe (d), de Rialachán (AE) 2023/1114. Ba cheart a chumhdach leis na hidirbhearta dá dtagraítear in Airteagal 22(1), pointe (d), den Rialachán sin idirbhearta i gcás ina bhfuil an t-íocóir agus an t-íocaí araon lonnaithe sa limistéar airgeadra aonair céanna laistigh den Aontas.

(7)

Chun a áirithiú go ndéantar meánlíon ráithiúil agus meánluach comhiomlán ráithiúil na n-idirbheart in aghaidh an lae a mheas ar bhonn sonraí iontaofa fónta agus chun feabhas a chur ar cháilíocht an tuairiscithe, ba cheart don eisitheoir córais agus nósanna imeachta a bheith i bhfeidhm aige lena gceadaítear dó na sonraí arna bhfáil ó sholáthraí seirbhísí cripteashócmhainní an íocaí a réiteach nó, i gcás idirbheart ó thiachóg choinneála chuig tiachóg neamhchoinneála, na sonraí arna bhfáil ó sholáthraí seirbhísí cripteashócmhainní an íocóra de bhun Airteagal 22(3) de Rialachán (AE) 2023/1114 agus Rialachán Cur Chun Feidhme (AE) 2024/2902 leis na sonraí atá ar fáil don eisitheoir ó fhoinsí eile, lena n-áirítear, i gcás inarb infheidhme, sonraí idirbheartaíochta atá ar fáil ar an mórleabhar dáilte.

(8)

I gcomhréir le hAirteagal 58(3) de Rialachán (AE) 2023/1114, beidh feidhm ag forálacha Airteagail 22 agus 23, agus Airteagal 24(3) den Rialachán sin freisin maidir le comharthaí ríomh-airgid atá ainmnithe in airgeadra nach airgeadra oifigiúil de chuid Ballstáit é. Dá réir sin, ba cheart feidhm mutatis mutandis a bheith ag an Rialachán seo maidir le comharthaí ríomh-airgid den sórt sin.

(9)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Baincéireachta Eorpach.

(10)

Tá comhairliúcháin phoiblí oscailte déanta ag an Údarás Baincéireachta Eorpach maidir leis na dréachtchaighdeáin theicniúla rialála ar a bhfuil an Rialachán seo bunaithe, tá anailís déanta aige ar na costais agus ar na tairbhí a d’fhéadfadh a bheith ag baint leo agus d’iarr sé comhairle ón nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (4),

(1)

ciallaíonn ‘limistéar airgeadra aonair’ tír amháin nó roinnt tíortha a bhfuil an t-airgeadra oifigiúil céanna acu;

(2)

ciallaíonn ‘tiachóg choinneála’ seoladh tiachóige cripteashócmhainní i gcás ina n-áirithíonn soláthraí seirbhísí cripteashócmhainní go ndéantar cripteashócmhainní a choimeád slán nó a rialú, thar ceann a chliaint, nó go ndéantar na modhanna rochtana ar chripteashócmhainní den sórt sin a choimeád slán nó a rialú, i gcás inarb infheidhme i bhfoirm eochracha cripteagrafacha príobháideacha;

(3)

ciallaíonn ‘tiachóg neamhchoinneála’ seoladh tiachóige cripteashócmhainní ina rialaíonn an t-úsáideoir na modhanna rochtana ar na cripteashócmhainní, i gcás inarb infheidhme i bhfoirm eochracha cripteagrafacha príobháideacha.