(1)

Le Rialachán (AE) 2019/1021, cuirtear chun feidhme gealltanais an Aontais faoi Choinbhinsiún Stócólm ar Thruailleáin Orgánacha Mharthanacha (2) (‘an Coinbhinsiún’) agus faoin bPrótacal a ghabhann le Coinbhinsiún 1979 ar Thruailliú Aeir Trasteorann Fadraoin maidir le Truailleáin Orgánacha Mharthanacha (3) (‘an Prótacal’).

(2)

Tá liosta ceimiceán in Iarscríbhinn A a ghabhann leis an gCoinbhinsiún. Ceanglaítear ar gach Páirtí sa Choinbhinsiún na ceimiceáin ar an liosta a thoirmeasc nó na bearta dlíthiúla agus riaracháin is gá a dhéanamh chun deireadh a chur lena dtáirgeadh, lena n-úsáid, lena n-allmhairiú agus lena n-onnmhairiú.

(3)

Le linn an 11ú cruinniú a bhí ag Comhdháil na bPáirtithe sa Choinbhinsiún ón 1 go dtí an 12 Bealtaine 2023, rinne sí cinneadh, de bhun Airteagal 8(9) den Choinbhinsiún, Iarscríbhinn A a ghabhann leis an gCoinbhinsiún a leasú chun meatocsaclór a áireamh san Iarscríbhinn sin gan aon díolúine shonrach. Thacaigh an tAontas le meatocsaclór a áireamh in Iarscríbhinn A gan díolúintí sonracha mar a shonraítear i gCinneadh (AE) 2023/1006 ón gComhairle (4). Dá bhrí sin, ba cheart Cuid A d’Iarscríbhinn I a ghabhann le Rialachán (AE) 2019/1021, ina bhfuil an liosta substaintí a liostaítear sa Choinbhinsiún agus sa Phrótacal chomh maith le substaintí nach liostaítear ach sa Choinbhinsiún, a leasú chun meatocsaclór a áireamh.

(4)

Chun cur i bhfeidhm agus forfheidhmiú Airteagal 3(1) de Rialachán (AE) 2019/1021 san Aontas a threisiú, ba cheart teorainnluach a shocrú i ndáil le meatocsaclór a bhíonn ann mar rian-éilleán neamhbheartaithe i substaintí, i meascáin agus in earraí. Ba cheart an teorainnluach sin a shocrú ag 0,01 mg/kg, rud a chomhfhreagraíonn don uasleibhéal iarmhar le haghaidh meatocsaclóir a leagtar síos i Rialachán (CE) Uimh. 396/2005 ó Pharlaimint na hEorpa agus ón gComhairle (5).

(5)

Ba cheart, dá bhrí sin, Rialachán (AE) 2019/1021 a leasú dá réir,