(1)

Is feithid dhúchasach don Afraic fho-Shahárach í an Aethina tumida (ciaróg choirceoige bheag), feithid atá scaipthe ar fud an domhain le blianta beaga anuas agus is féidir léi í féin a iolrú go tapa go háirithe i láthair ál beach, pailine nó mile i gcíor mheala. Is féidir le heiseamail fásta eitilt suas le roinnt ciliméadar chun ionradh a dhéanamh ar áiteanna eile. Liostaítear inmhíolú le ciaróg choirceoige bheag in Iarscríbhinn II a ghabhann le Rialachán (AE) 2016/429 agus in Iarscríbhinn a ghabhann le Rialachán Cur Chun Feidhme (AE) 2018/1882 ón gCoimisiún (2).

(2)

Tá an Aethina tumida (ciaróg choirceoige bheag) in easnamh san Aontas den chuid is mó, ach tá inmhíoluithe tarlaithe i limistéir áirithe san Iodáil ó mhí Mheán Fómhair 2014 i leith. Le Cinneadh Cur Chun Feidhme 2014/909/AE (3) ón gCoimisiún, leagadh síos bearta cosanta sláinte ainmhithe a mhéid a bhaineann le hinmhíoluithe leis an Aethina tumida (ciaróg choirceoige bheag) atá deimhnithe san Iodáil. Glacadh na bearta sin ar láimh le Cinneadh Cur Chun Feidhme (AE) 2021/597 ón gCoimisiún (4). Faoi láthair, ní liostaítear ach Réigiún Calabria san Iarscríbhinn a ghabhann leis an gCinneadh Cur Chun Feidhme sin mar limistéar atá faoi réir na mbeart cosanta sin.

(3)

Thug an Fhrainc fógra don Choimisiún le déanaí faoin inmhíolú leis an Aethina tumida (ciaróg choirceoige bheag) a aimsíodh sa Roinn Fhrancach, La Réunion, agus faoi na bearta a cuireadh i bhfeidhm. D’fhéadfadh scaipeadh an Aethina tumida (ciaróg choirceoige bheag) ón limistéar sin atá buailte sa Fhrainc a bheith ina ghuais thromchúiseach do bheacha meala agus do bhumbóga in áiteanna eile san Aontas. Tá na bearta a rinne an Fhrainc i gcomhréir leo siúd a rinne an Iodáil agus a leagadh síos i gCinneadh Cur Chun Feidhme (AE) 2021/597 agus meastar gur bearta sásúla iad chun srian a chur le scaipeadh na ciaróige coirceoige bige.

(4)

Chun aon suaitheadh nach bhfuil gá leis ar thrádáil laistigh den Aontas a chosc, chun nach bhforchuirfidh tríú tíortha bacainní gan údar ar thrádáil agus chun scaipeadh an inmhíolaithe leis an Aethina tumida (ciaróg choirceoige bheag) ar limistéir eile den Aontas, is iomchuí an Roinn Fhrancach, La Réunion, a chur leis an liosta de Bhallstáit nó dá limistéir atá faoi réir srianadh mar gheall ar láithreacht an inmhíoluithe leis an Aethina tumida (ciaróg choirceoige bheag).

(5)

I bhfianaise na ndeacrachtaí a bhí ag an údarás inniúil le blianta beaga anuas agus an chiaróg choirceoige bheag á díothú sna Ballstáit a bhí buailte léi, ba cheart feidhm a bheith ag na bearta sin go dtí an 31 Nollaig 2024.

(6)

Chun go mbeidh téacs soiléir agus comhleanúnach ann, is iomchuí Cinneadh Cur Chun Feidhme (AE) 2021/597 a aisghairm agus an Cinneadh seo a chur ina ionad.

(7)

Na bearta dá bhforáiltear sa Chinneadh seo, is bearta iad atá i gcomhréir leis an tuairim ón mBuanchoiste um Plandaí, Ainmhithe, Bia agus Beatha,

(a)

ciallaíonn “coirceog beach” an t-aonad a úsáidtear chun beacha meala agus bumbóga a choimeád;

(b)

ciallaíonn “beachlann” bunaíocht ina gcoimeádtar beacha meala agus bumbóga;

(c)

ciallaíonn “seachtháirgí beachadóireachta neamhphróiseáilte” mil, céir bheach, glóthach ríoga, gliú beach nó pailin nach bhfuil ceaptha mar bhia don duine mar a shainmhínítear i bpointe 10 d’Iarscríbhinn I a ghabhann le Rialachán (AE) Uimh. 142/2011 (5) ón gCoimisiún, ar seachtháirgí iad nár cuireadh faoi aon nós imeachta próiseála dá dtagraítear i gCaibidil II, Roinn 1, Tábla 2, ró 10 den cheathrú colún d’Iarscríbhinn XIV a ghabhann leis an Rialachán sin;

(d)

ciallaíonn “trealamh beachaireachta” coirceoga beach athláimhe, codanna de choirceoga beach agus uirlisí a úsáidtear i mbeachlann.