a)

go neartóimid an creat daonlathach le haghaidh claochlú digiteach a rachaidh chun tairbhe do chách agus a chuirfidh feabhas ar shaol gach duine a bhfuil cónaí air nó uirthi san Aontas;

b)

go ndéanfaimid na bearta is gá chun a áirithiú go n-urramófar luachanna an Aontais agus cearta daoine aonair i gcomhréir le dlí an Aontais, ar líne agus as líne;

c)

go gcothóimid agus go n-áiritheoimid gníomhaíocht fhreagrach dhícheallach ó gach gníomhaí - poiblí agus príobháideach - sa timpeallacht dhigiteach;

d)

go gcuirfimid fís seo an chlaochlaithe dhigitigh chun cinn go gníomhach, agus inár gcaidrimh idirnáisiúnta freisin.

a)

go n-áiritheoimid, i ndáil le dearadh, forbairt, feidhmiú agus úsáid na réiteach teicneolaíoch, go n-urramófar na cearta bunúsacha, go bhféachfar go mbeifear in ann iad a fheidhmiú agus go ndéanfar an dlúthpháirtíocht agus an cuimsiú a chur chun cinn;

b)

gur claochlú digiteach a bheidh ann nach bhfágfaidh aon duine ar lár. Ba cheart go rachadh sé chun tairbhe do chách, go mbeadh an chothromaíocht inscne ann, agus go háirithe go gcuimseofaí ann daoine scothaosta, daoine atá ina gcónaí i gceantair thuaithe, daoine faoi mhíchumas, nó daoine imeallaithe, leochaileacha nó díchumhachtaithe, chomh maith leis na daoine sin a ghníomhaíonn thar a gceann. Ba cheart freisin go ndéanfaí an éagsúlacht chultúrtha agus teanga a chur chun cinn leis;

c)

go bhforbróimid creataí leordhóthanacha ionas go nglacfaidh gach gníomhaí margaidh a thairbhíonn den chlaochlú digiteach lena chuid freagrachtaí sóisialta agus go rannchuideoidh sé nó sí ar bhealach cothrom comhréireach le costais na n-earraí, na seirbhísí agus na mbonneagar poiblí, ar mhaithe leis an uile dhuine a bhfuil cónaí air nó uirthi san Eoraip.

a)

go bhféachfaimid chuige go mbeidh rochtain ar nascacht ardcháilíochta, agus rochtain ar an idirlíon, ag an uile dhuine is cuma cá háit san Aontas a bhfuil siad, lena n-áirítear dóibh siúd atá ar ísealioncam;

b)

go gcosnóimid agus go gcuirfimid chun cinn Idirlíon atá neodrach agus oscailte nach mblocáiltear nó nach ndíghrádaítear ábhar, seirbhísí agus feidhmchláir air gan chúis mhaith.

a)

go ndéanfaimid oideachas agus oiliúint dhigiteach ardcháilíochta a chur chun cinn, lena n-áirítear d’fhonn an bhearna dhigiteach idir na hinscní a laghdú;

b)

go dtacóimid le hiarrachtaí lena gceadaítear d’fhoghlaimeoirí agus do mhúinteoirí na scileanna agus na hinniúlachtaí digiteacha is gá a ghnóthú, lena n-áirítear litearthacht sna meáin agus smaointeoireacht chriticiúil, chun páirt ghníomhach a ghlacadh sa gheilleagar, sa tsochaí agus i bpróisis dhaonlathacha;

c)

go gcuirfimid chun cinn na hiarrachtaí chun nascacht dhigiteach, bonneagar digiteach agus uirlisí digiteacha a thabhairt do gach institiúid oideachais agus oiliúna, agus go dtacóimid leis na hiarrachtaí sin;

d)

go dtabharfaimid an fhéidearthacht do gach duine teacht isteach ar athruithe a bhaineann le digiteáil na hoibre trí uas-sciliú agus athsciliú.

a)

go n-áiritheoimid go bhféadfaidh gach duine dícheangal agus tairbhiú de choimircí maidir le cothromaíocht oibre is saoil i dtimpeallacht dhigiteach;

b)

go n-áiritheoimid, i gcás na timpeallachta oibre, nach gcuirfidh uirlisí digiteacha sláinte fhisiciúil agus mheabhrach na n-oibrithe i mbaol ar bhealach ar bith;

c)

go n-áiritheoimid go n-urramófar cearta bunúsacha oibrithe sa timpeallacht dhigiteach, lena n-áirítear a gceart chun príobháideachais agus an ceart chun comhlachú, an ceart chun cómhargála agus chun caingne, chomh maith le cosaint ar fhaireachas neamhdhleathach gan údar;

d)

go n-áiritheoimid go mbeidh úsáid na hintleachta saorga san ionad oibre trédhearcach agus go leanfaidh sí cur chuige rioscabhunaithe agus go ndéanfar bearta coisctheacha comhfhreagracha chun timpeallacht oibre shábháilte agus shláintiúil a chothabháil;

e)

go n-áiritheoimid go háirithe go ráthófar formhaoirseacht dhaonna i gcinntí tábhachtacha adhéanann difear d’oibrithe, agus go gcuirfear oibrithe ar an eolas i gcoitinne gur ag idirghníomhú le córais intleachta saorga atá siad.

a)

go n-áiritheoimid go dtairgfear do dhaoine a bhfuil cónaí orthu san Aontas Eorpach an deis leas a bhaint as chéannacht dhigiteach atá inrochtana, saorálach, slán agus iontaofa agus lena dtabharfar rochtain ar raon leathan seirbhísí ar líne;

b)

go n-áiritheoimid rochtain fhorleathan ar fhaisnéis na hearnála poiblí, agus athúsáid na faisnéise sin;

c)

go n-éascóimid agus go dtacóimid le rochtain rianúil, shlán agus idir-inoibritheach ó cheann ceann an Aontais ar sheirbhísí poiblí digiteacha atá ceaptha le freastal ar riachtanais daoine ar bhealach éifeachtach, lena n-áirítear seirbhísí digiteacha sláinte agus cúraim agus iadsan go háirithe, eadhon rochtain ar ríomhthaifid sláinte.

a)

go gcuirfimid chun cinn córais intleachta saorga atá duinelárnach, iontaofa agus eiticiúil le linn dóibh a bheith á bhforbairt, á bhfeidhmiú agus á n-úsáid, i gcomhréir le luachanna an Aontais;

b)

go n-áiritheoimid leibhéal leordhóthanach trédhearcachta maidir le húsáid algartam agus na hintleachta saorga, agus go gcumhachtófar daoine lena n-úsáid agus go gcuirfear ar an eolas iad nuair is ag idirghníomhú le halgartaim nó leis an intleacht shaorga atá siad;

c)

go n-áiritheoimid go mbeidh córais algartamacha bunaithe ar thacair leordhóthanacha sonraí chun idirdhealú a sheachaint agus gur córais iad lena bhféadfar formhaoirseacht dhaonna a dhéanamh ar na torthaí uile a dhéanann difear do shábháilteacht daoine agus do chearta bunúsacha daoine;

d)

go n-áiritheoimid nach n-úsáidfear teicneolaíochtaí cosúil leis an intleacht shaorga, chun teacht roimh roghanna na ndaoine, mar shampla maidir leis an tsláinte, leis an oideachas, leis an bhfostaíocht agus lena saol príobháideach;

e)

go ndéanfaimid foráil do choimircí agus do ghníomhaíochtaí iomchuí, lena n-áirítear trí chaighdeáin iontaofa a chur chun cinn, chun a áirithiú go mbeidh an intleacht shaorga agus córais dhigiteacha sábháilte i gcónaí agus go n-úsáidfear iad agus lánurraim á tabhairt do na cearta bunúsacha;

f)

go ndéanfaimid bearta lena áirithiú go n-urramaíonn taighde san intleacht shaorga na caighdeáin eiticiúla is airde agus dlí ábhartha an Aontais.

a)

go n-áiritheoimid timpeallacht dhigiteach atá sábháilte agus slán, bunaithe ar iomaíocht chóir, ina ndéantar cearta bunúsacha a chosaint, ina ndéantar cearta úsáideoirí agus cosaint tomhaltóirí sa Mhargadh Aonair Digiteach a áirithiú, agus ina sainítear go soiléir freagrachtaí na n-ardán, go háirithe gníomhaithe móra agus geatóirí;

b)

go gcuirfimid chun cinn an idir-inoibritheacht, an trédhearcacht, teicneolaíochtaí agus caighdeáin oscailte mar bhealach chun muinín sa teicneolaíocht a neartú a thuilleadh chomh maith le cur le cumas na dtomhaltóirí roghanna neamhspleácha agus eolasacha a dhéanamh.

a)

go leanfaimid de na cearta bunúsacha uile a choimirciú ar líne, go sonrach an tsaoirse chun tuairimí agus faisnéis a nochtadh, lena n-áirítear saoirse agus iolrachas na meán;

b)

go dtacóimid le forbairt teicneolaíochtaí digiteacha agus leis an leas is fearr is féidir a bhaint astu chun rannpháirtíocht na ndaoine agus rannpháirtíocht dhaonlathach a spreagadh;

c)

go ndéanfaimid bearta comhréireacha chun dul i ngleic le gach cineál ábhair neamhdhleathaigh agus lánurraim á tabhairt do na cearta bunúsacha, lena n-áirítear an ceart maidir le saoirse chun tuairimí a nochtadh agus faisnéis a fháil, agus gan aon oibleagáid ghinearálta faireacháin ná cinsireachta a bhunú;

d)

go gcruthóimid timpeallacht dhigiteach ina gcosnaítear daoine ar bhréagaisnéis agus ar ionramháil faisnéise agus ar chineálacha eile inneachair dhíobhálaigh, lena n-áirítear ciapadh agus foréigean inscnebhunaithe;

e)

go dtacóimid le rochtain éifeachtach ar ábhar digiteach lena léirítear an éagsúlacht chultúrtha agus teanga san Aontas;

f)

go gcumhachtóimid daoine aonair chun roghanna sonracha, a thugtar faoi shaoirse, a dhéanamh agus go dteorannóimid teacht i dtír ar leochaileachtaí agus claontachtaí, eadhon trí fhógraíocht spriocdhírithe.

a)

go ndéanfaimid bearta breise chun inrianaitheacht táirgí a chur chun cinn agus chun a áirithiú nach dtairgfear ach na táirgí sin atá sábháilte agus i gcomhréir le reachtaíocht an Aontais maidir leis an Margadh Aonair Digiteach;

b)

go gcosnóimid leasanna na ndaoine, na ngnólachtaí agus na n-institiúidí poiblí in aghaidh rioscaí cibearshlándála agus na cibearchoireachta, lena n-áirítear sáruithe ar shonraí agus goid chéannachta nó ionramháil. Áirítear leis sin ceanglais chibearshlándála maidir le táirgí nasctha a chuirtear ar an margadh aonair;

c)

go gcuirfimid ina gcoinne siúd a fhéachann leis an mbonn a bhaint, laistigh den Aontas, den tslándáil ar líne agus de shláine na timpeallachta digití, nó a chuireann foréigean agus fuath chun cinn trí mheáin dhigiteacha.

a)

go n-áiritheoimid go bhfuil rialú éifeachtach ag gach duine ar a shonraí pearsanta agus neamhphearsanta i gcomhréir le rialacha an Aontais maidir le cosaint sonraí agus le dlí ábhartha an Aontais;

b)

go n-áiritheoimid ar bhealach éifeachtach go bhféadfaidh daoine aonair a sonraí pearsanta agus neamhphearsanta a aistriú go héasca idir seirbhísí digiteacha éagsúla i gcomhréir le cearta inaistritheachta;

c)

go gcosnóimid cumarsáid ar bhealach éifeachtach ar rochtain tríú páirtí neamhúdaraithe;

d)

go gcuifimid toirmeasc ar shainaithint neamhdhleathach agus ar choinneáil neamhdhleathach taifead gníomhaíochta.

a)

go gcuirfimid deiseanna ar fáil do gach leanbh agus duine óg na scileanna agus na hinniúlachtaí is gá a shealbhú, lena n-áirítear litearthacht sna meáin agus smaointeoireacht chriticiúil, chun a mbealach a dhéanamh sa timpeallacht dhigiteach agus páirt ghníomhach a ghlacadh inti go sábháilte agus chun roghanna eolasacha a dhéanamh;

b)

go gcuirfimid eispéiris dhearfacha chun cinn do leanaí agus do dhaoine óga i dtimpeallacht dhigiteach atá sábháilte agus oiriúnach don aois;

c)

go gcosnóimid gach leanbh agus duine óg ó ábhar díobhálach agus neamhdhleathach, dúshaothrú, ionramháil agus drochúsáid ar líne, agus go gcoiscfimid úsáid an spáis dhigitigh chun coireanna a dhéanamh nó a éascú;

d)

go gcosnóimid gach leanbh agus duine óg ar rianú, próifíliú agus spriocdhíriú neamhdhleathach, go háirithe chun críocha tráchtála;

e)

go mbeidh leanaí agus daoine óga rannpháirteach i bhforbairt beartas digiteach a bhaineann leo.

a)

go dtacóimid le forbairt agus le húsáid teicneolaíochtaí digiteacha inbhuanaithe ar beag an tionchar diúltach a bheidh acu ar an gcomhshaoil agus ar chúrsaí sóisialta;

b)

go ndreasóimid roghanna inbhuanaithe tomhaltóirí agus samhlacha inbhuanaithe gnó, agus go gcothóimid iompar corparáideach inbhuanaithe agus freagrach ar fud slabhraí luacha domhanda táirgí agus seirbhísí digiteacha, lena n-áirítear d’fhonn saothar éignithe a chomhrac;

c)

go gcuirfimid chun cinn forbairt, feidhmiú, agus úsáid ghníomhach teicneolaíochtaí digiteacha nuálacha, ar teicneolaíochtaí iad a bhfuil tionchar dearfach acu ar an gcomhshaol agus ar an aeráid, chun dlús a chur leis an aistriú glas;

d)

go gcuirfimid chun cinn caighdeáin agus lipéid inbhuanaitheachta le haghaidh táirgí agus seirbhísí digiteacha.