(1)

Le Rialachán Tarmligthe (AE) 2021/2306 ón gCoimisiún (2) leagtar síos rialacha maidir leis na rialuithe oifigiúla i leith táirgí orgánacha agus táirgí atá á dtiontú a bheartaítear a allmhairiú isteach san Aontas agus maidir leis an deimhniú cigireachta.

(2)

I gcomhréir le hAirteagal 5(3), an chéad fhomhír, agus le hAirteagal 6(3), an dara fomhír, de Rialachán Tarmligthe (AE) 2021/2306, tá an deimhniú cigireachta le heisiúint agus le formhuiniú sa Chóras um Rialú Trádála agus um Shaineolaithe (TRACES) le ríomhshéala cáilithe. Foráiltear le hAirteagal 6(6) agus le hAirteagal 7(4) den Rialachán sin faoi seach maidir le cuid de choinsíneacht a fhormhuiniú mar choinsíneacht orgánach agus maidir le sleachta as deimhnithe cigireachta a fhormhúiniú in TRACES le ríomhshéala cáilithe.

(3)

Foráiltear cheana leis na forálacha idirthréimhseacha a leagtar síos in Airteagal 11, míreanna (1) agus (2), de Rialachán Tarmligthe (AE) 2021/2306, go bhféadfar an deimhniú cigireachta a eisiúint ar pháipéar go dtí an 30 Meitheamh 2022, tar éis é a bheith líonta isteach in TRACES agus priontáilte agus, má eisítear deimhniú ar pháipéar, ba cheart an deimhniú seo a fhormhuiniú ar pháipéar. I gcás ina n-eisítear an deimhniú cigireachta in TRACES agus ina bhfuil ríomhshéala cáilithe air, féadfar é a fhormhuiniú ar pháipéar.

(4)

Foráiltear leis na forálacha idirthréimhseacha a leagtar síos in Airteagal 11(5) de Rialachán Tarmligthe (AE) 2021/2306 go bhféadfar, go dtí an 30 Meitheamh 2022, an sliocht ón deimhniú cigireachta a fhormhuiniú ar pháipéar freisin tar éis é a bheith líonta isteach in TRACES agus priontáilte.

(5)

Tá an próiseas chun údaráis inniúla a chlárú sna Ballstáit agus i dtríú tíortha mar aon leis an bpróiseas chun údaráis rialaithe agus comhlachtaí rialaithe a chlárú le haghaidh an ríomhshéala cháilithe ar siúl faoi láthair. Thóg an próiseas clárúcháin níos faide ná mar a raibh coinne leis agus níor tugadh chun críche é roimh an 30 Meitheamh 2022.

(6)

Dá bhrí sin, is gá síneadh a chur leis na forálacha idirthréimhseacha maidir le deimhnithe cigireachta páipéir agus sleachta astu dá bhforáiltear in Airteagal 11 de Rialachán Tarmligthe (AE) 2021/2306 chun go mbeidh na gníomhaithe uile lena mbaineann in ann an clárúchán le haghaidh an ríomhshéala cháilithe a thabhairt chun críche.

(7)

Is é atá in ionradh na Rúise ar an Úcráin an 24 Feabhra 2022 dúshlán eisceachtúil do na húdaráis rialaithe agus do na comhlachtaí rialaithe a aithníodh chun táirgí orgánacha agus táirgí atá á dtiontú a onnmhairiú ón Úcráin chuig an Aontas, dúshlán nach bhfacthas a leithéid riamh roimhe. San Úcráin, tá cur isteach ar na seirbhísí poist freisin.

(8)

I gcomhréir le hAirteagal 11(1a) de Rialachán Tarmligthe (AE) 2021/2306, agus de mhaolú ar Airteagal 5(3), an chéad fhomhír, den Rialachán sin, go dtí an 30 Meitheamh 2022, duine údaraithe atá lonnaithe san Úcráin, duine de chuid údaráis rialaithe nó comhlachta rialaithe nach bhfuil ríomhshéala cáilithe aige, féadfaidh sé an deimhniú cigireachta a tháirgeadh agus a chur isteach in TRACES i bhformáid leictreonach gan ríomhshéala cáilithe a chur i bhfeidhm i mbosca 18 de. I bhfianaise a dhothuartha atá fad ionradh na Rúise ar an Úcráin, is gá síneadh a chur leis an maolú sin freisin.

(9)

Ba cheart, dá bhrí sin, Rialachán Tarmligthe (AE) 2021/2306 a leasú dá réir sin.

(10)

Ós rud é go dtéann an idirthréimhse le haghaidh deimhnithe páipéir agus an maolú is infheidhme maidir leis an Úcráin in éag an 30 Meitheamh 2022, ba cheart feidhm chúlghabhálach a bheith ag an Rialachán seo ón 1 Iúil 2022,