(1)

Bunaithe ar an sainmhíniú ar choigeartú ar phriacal creidmheasa a leagtar síos in Airteagal 4(1), pointe (95), de Rialachán (AE) Uimh. 575/2013, ní féidir ach na caillteanais chreidmheasa ionchasacha a léirítear sna coigeartuithe sonracha ar phriacal creidmheasa arna ndéanamh ag an institiúid ag a bhfuil seilbh ar an risíocht ar mhainneachtain a chur san áireamh i sannadh ualaithe priacail chun críocha Airteagal 127(1) den Rialachán sin. Mar sin féin, na caillteanais chreidmheasa a chuirtear san áireamh i bpraghas idirbhirt na risíochta ar mhainneachtain, arna gcoimeád ag na hinstitiúidí díola mar chaillteanas réadaithe, ní féidir iad a aithint tar éis an díolacháin ag an institiúid ceannaigh. Mar thoradh air sin, féadfaidh athrú teacht ar an ualú priacail is infheidhme a chuirtear i bhfeidhm ar an risíocht ar mhainneachtain tar éis dhíolachán na risíochta sin, cé go n-ionchorpraítear leis an bpraghas idirbhirt lascaine ar mhéid arb ionann é agus méid na gcoigeartuithe sonracha ar phriacal creidmheasa le haghaidh caillteanais chreidmheasa ionchasacha a chláraigh an institiúid díola roimh an díolachán. Leis an staid sin, cruthaítear bac rialála maidir le cruthú margaí tánaisteacha le haghaidh risíochtaí ar mhainneachtain, ós rud é go bhféadfadh sé nach mbeadh an t-idirbheart chomh tarraingteach céanna don institiúid ceannaigh mar gheall ar an mí-ailíniú a d’fhéadfadh a bheith ann idir na hualuithe priacail a chuireann an institiúid díola agus an institiúid ceannaigh faoi seach i bhfeidhm ar an risíocht ar mhainneachtain agus, dá bhrí sin, chruthódh sé constaicí míchuí le haghaidh institiúidí creidmheasa maidir lena risíochtaí ar mhainneachtain a bhaint dá gcláir chomhardaithe.

(2)

Ina theannta sin, chun an fhéidearthacht go mbeadh méadú ar leibhéil na risíochtaí ar mhainneachtain ar fud institiúidí creidmheasa mar thoradh ar phaindéim COVID-19 a chur san áireamh, is inmhianaithe go mbainfear aon bhac rialála maidir le cruthú margaí tánaisteacha le haghaidh risíochtaí ar mhainneachtain. Is gá, dá bhrí sin, a áirithiú go n-ionchorprófar leis na coigeartuithe sonracha ar phriacal creidmheasa a aithníodh chun críocha Airteagal 127(1) de Rialachán (AE) Uimh. 575/2013 aon lascaine i bpraghas idirbhirt risíochta ar mhainneachtain nár aithin an institiúid ceannaigh trí chaipiteal Ghnáthchothromas Leibhéal 1 a mhéadú. Go háirithe, chun aon aitheantas dúbailte míchuí a sheachaint maidir leis an méadú a d’fhéadfadh a bheith ann i leibhéal an chaillteanais ionchasaigh ag an institiúid ceannaigh tar éis don institiúid sin caipiteal Ghnáthchothromas Leibhéal 1 a cheannach agus chun an t-ualú priacail i gcomhréir le hAirteagal 127(1) de Rialachán (AE) Uimh. 575/2013 a chinneadh, i gcás ina ndéanfaí athluacháil ar an risíocht ar mhainneachtain a tharlódh tar éis a ceannaigh, leis an lascaine níor cheart an chuid de mhéid athluachála na risíochta ar mhainneachtain atá aitheanta mar risíocht lena méadaítear caipiteal Ghnáthchothromas Leibhéal 1 na hinstitiúide a ionchorprú a thuilleadh.

(3)

Ba cheart, dá bhrí sin, Rialachán Tarmligthe (AE) Uimh. 183/2014 ón gCoimisiún (2) a leasú dá réir sin.

(4)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Baincéireachta Eorpach faoi bhráid an Choimisiúin.

(5)

Tá comhairliúcháin phoiblí oscailte déanta ag an Údarás Baincéireachta Eorpach maidir leis na dréachtchaighdeáin theicniúla rialála ar a bhfuil an Rialachán seo bunaithe, tá anailís déanta aige ar na costais agus ar na tairbhí a d’fhéadfadh a bheith ag baint leo agus d’iarr sé comhairle ón nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 (3),