Airteagal 1

Leasaítear an Iarscríbhinn a ghabhann le Rialachán (CE) Uimh. 1126/2008 mar a leanas:

(a)	Leasaítear Caighdeán Idirnáisiúnta Cuntasaíochta (IAS) 1 Cur i Láthair Ráiteas Airgeadais mar a leagtar amach san Iarscríbhinn a ghabhann leis an Rialachán seo;

(b)	Leasaítear IAS 8 Beartais Chuntasaíochta, Athruithe i Meastacháin Chuntasaíochta agus in Earráidí Cuntasaíochta mar a leagtar amach san Iarscríbhinn a ghabhann leis an Rialachán seo.

Airteagal 2

Cuirfidh gach cuideachta na leasuithe dá dtagraítear in Airteagal 1 i bhfeidhm ó dháta tosaithe a céad bhliain airgeadais dar tús an 1 Eanáir 2023, nó dá éis, ar a dhéanaí.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

IARSCRÍBHINN

Leasuithe ar IAS 1

Cur i láthair Ráiteas Airgeadais

Leasaítear míreanna 7, 10, 114, 117 agus 122. Cuirtear míreanna 117A–117E agus 139V leis. Scriostar míreanna 118, 119 agus 121.

SAINMHÍNITHE

7

Úsáidtear na téarmaí seo a leanas sa Chaighdeán seo in éineacht leis na bríonna shonraítear: Sainmhínítear beartais chuntasaíochta i mír 5 de IAS 8 Beartais Chuntasaíochta, Athruithe ar Mheastacháin agus Earráidí Cuntasaíochta, agus úsáidtear an téarma sa Chaighdeán seo leis an mbrí chéanna. …

RÁITIS AIRGEADAIS

...

Tacar iomlán de ráitis airgeadais

10

Cuimsítear an méid seo a leanas i dtacar iomlán de ráitis airgeadais: … (e) nótaí, ina bhfuil faisnéis ábhartha maidir le beartas cuntasaíochta agus faisnéis eile mhíniúcháin; …

STRUCHTÚR AGUS ÁBHAR

...

Nótaí

Struchtúr

...

114

Áirítear an méid seo a leanas ar shamplaí d’ordú nó grúpáil chórasach na nótaí: … (c) ord na míreanna líne sa ráiteas/sna ráitis maidir le brabús nó caillteanas agus ioncam cuimsitheach eile agus sa ráiteas maidir le staid airgeadais a leanúint, amhail an méid seo a leanas: … (ii) faisnéis ábhartha maidir le beartas cuntasaíochta (féach mír 117); …

Faisnéis a nochtadh maidir le beartas cuntasaíochta

117

Déanfaidh eintiteas faisnéis ábhartha maidir le beartas cuntasaíochta (féach mír 7) a nochtadh. Tá faisnéis maidir le beartas cuntasaíochta ábhartha más féidir coinne a bheith leis go réasúnta, nuair a bhreithnítear an fhaisnéis in éineacht le faisnéis eile atá san áireamh i ráitis airgeadais eintitis, go bhféadfaidh sí tionchar a imirt ar chinntí a dhéanann príomhúsáideoirí ráiteas airgeadais ilchuspóireach ar bhonn na ráiteas airgeadais sin.

117A

Is faisnéis neamhábhartha faisnéis maidir le beartas cuntasaíochta a bhaineann le hidirbhearta neamhábhartha nó le himeachtaí nó coinníollacha eile agus ní gá an fhaisnéis sin a nochtadh. D’fhéadfadh faisnéis maidir le beartas cuntasaíochta a bheith ábhartha mar sin féin i ngeall ar chineál na n-idirbheart gaolmhar nó ar imeachtaí nó coinníollacha eile, fiú más méideanna neamhábhartha iad na méideanna. Ní faisnéis ábhartha í an fhaisnéis uile maidir le beartas cuntasaíochta a bhaineann le hidirbhearta ábhartha le himeachtaí nó coinníollacha eile, áfach.

117B

Meastar gur faisnéis ábhartha atá san fhaisnéis maidir le beartas cuntasaíochta más rud é go mbeadh gá ag úsáideoirí ráiteas airgeadais de chuid eintitis léi chun faisnéis ábhartha eile sna ráitis airgeadais a thuiscint. Mar shampla, is dócha go mbreithneoidh eintiteas go bhfuil faisnéis maidir le beartas cuntasaíochta ábhartha dá ráitis airgeadais má bhaineann an fhaisnéis sin le hidirbhearta ábhartha nó le himeachtaí nó coinníollacha eile agus sna cásanna seo a leanas: (a) gur athraigh an t-eintiteas a bheartas cuntasaíochta le linn na tréimhse tuairiscithe agus gur tháinig athrú ábhartha ar an bhfaisnéis sna ráitis airgeadais mar thoradh ar an athrú sin; (b) gur roghnaigh an t-eintiteas an beartas cuntasaíochta ó rogha amháin nó níos mó a cheadaítear le IFRSanna—d’fhéadfadh cás den sórt sin teacht chun cinn dá roghnódh an t-eintiteas réadmhaoin infheistíochta a thomhas ar chostas stairiúil seachas ar luach cóir; (c) gur forbraíodh an beartas cuntasaíochta i gcomhréir le IAS 8 in éagmais IFRS a bhfuil feidhm shonrach aige; (d) go mbaineann an beartas cuntasaíochta le réimse a bhfuil gá le heintiteas ina leith chun breithiúnais nó toimhdí suntasacha a dhéanamh maidir le beartas cuntasaíochta a chur i bhfeidhm, agus go nochtann an t-eintiteas na breithiúnais nó na toimhdí sin i gcomhréir le míreanna 122 agus 125; nó (e) go bhfuil an chuntasaíocht a bhfuil gá léi ina leith casta agus nach dtuigfeadh úsáideoirí ráitis airgeadais an eintitis na hidirbhearta ábhartha sin ná na himeachtaí ná na coinníollacha eile sin—d’fhéadfadh cás den sórt sin teacht chun cinn dá gcuirfeadh eintiteas níos mó ná IFRS amháin i bhfeidhm maidir le haicme idirbheart ábhartha.

117C

Le faisnéis maidir le beartas cuntasaíochta lena ndírítear ar an gcaoi ar chuir eintiteas ceanglais IFRSanna i bhfeidhm ar a chúinsí féin, soláthraítear faisnéis eintiteas-shonrach atá níos úsáidí d’úsáideoirí ráiteas airgeadais ná faisnéis chaighdeánaithe, nó faisnéis nach ndéanann ach ceanglais IFRSanna a dhúbailt nó a achoimriú.

117D

Má nochtann eintiteas faisnéis neamhábhartha maidir le beartas cuntasaíochta, ní dhéanfar faisnéis ábhartha maidir le beartas cuntasaíochta a theimhliú leis an bhfaisnéis sin.

117E

Le conclúid ó eintiteas gur faisnéis neamhábhartha atá i bhfaisnéis maidir le beartas cuntasaíochta ní dhéanfar difear do na ceanglais ghaolmhara maidir le nochtadh a leagtar amach in IFRSanna eile.

118

[Scriosta]

119

[Scriosta]

120

[Scriosta]

121

[Scriosta]

122

Nochtfaidh eintiteas, in éineacht le faisnéis ábhartha maidir le beartas cuntasaíochta nó nótaí eile, na breithiúnais, seachas iad sin a mbaineann meastacháin leo (féach mír 125), atá déanta ag an lucht bainistíochta agus beartais chuntasaíochta an eintitis á gcur i bhfeidhm acu, agus a bhfuil an tionchar is suntasaí acu ar na méideanna a aithnítear sna ráitis airgeadais. ...

DÁTA TRASDULA AGUS DÁTA ÉIFEACHTACH

...

139V

Le Nochtadh Beartas Cuntasaíochta, a eisíodh i mí Feabhra 2021, leasaíodh míreanna 7, 10, 114, 117 agus 122, cuireadh míreanna 117A-117E isteach agus scriosadh míreanna 118, 119 agus 121. Leasaíodh Ráiteas Cleachtais 2 de chuid IFRS Breithiúnais Ábharthachta a Thabhairt freisin. Cuirfidh eintiteas na leasuithe ar IAS 1 i bhfeidhm le haghaidh na dtréimhsí bliantúla tuairiscithe dar tús an 1 Eanáir 2023 nó ina dhiaidh sin. Ceadaítear cur i bhfeidhm níos luaithe. Má chuireann an t-eintiteas na leasuithe sin i bhfeidhm le haghaidh tréimhse níos luaithe, nochtfaidh sé an méid sin.

Leasuithe ar chaighdeáin agus ar fhoilseacháin eile IFRS

Leasuithe ar IFRS 7 Ionstraimí Airgeadais: Nochtaí

Leasaítear míreanna 21 agus B5. Cuirtear mír 44II isteach.

SUNTASACHT IONSTRAIMÍ AIRGEADAIS MAIDIR LE STAID AGUS FEIDHMÍOCHT AIRGEADAIS

...

Nochtaí eile

Beartais chuntasaíochta

21

I gcomhréir le mír 117 de IAS 1 Cur i láthair Ráiteas Airgeadais (arna athbhreithniú in 2007), nochtann eintiteas faisnéis ábhartha maidir le beartas cuntasaíochta. An fhaisnéis maidir leis an mbonn (nó na boinn) tomhais le haghaidh ionstraimí airgeadais a úsáidtear chun na ráitis airgeadais a ullmhú, meastar gur faisnéis ábhartha maidir le beartas cuntasaíochta a bheidh inti. ...

DÁTA ÉIFEACHTACH AGUS AISTRIÚ

...

44II

Le Nochtadh Beartas Cuntasaíochta, lena leasaítear IAS 1 agus Ráiteas Cleachtais 2 de chuid IFRS Breithiúnais Ábharthachta a Thabhairt, agus a eisíodh i mí Feabhra 2021, leasaíodh míreanna 21 agus B5. Cuirfidh an t-eintiteas an leasú sin i bhfeidhm le haghaidh tréimhsí bliantúla tuairiscithe dar tús an 1 Eanáir 2023 nó ina dhiaidh sin. Ceadaítear cur i bhfeidhm níos luaithe. Má chuireann an t-eintiteas an leasú sin i bhfeidhm le haghaidh tréimhse níos luaithe, nochtfaidh sé an méid sin. ...

Leasuithe ar IAS 26 Cuntasaíocht agus Tuairisciú na bPleananna Sochair Scoir

Leasaítear mír 34 agus cuirtear mír 38 leis.

NA PLEANANNA UILE

Nochtadh

34

Beidh an fhaisnéis seo a leanas i ráitis airgeadais de chuid plean maidir le sochar scoir freisin, cibé acu plean sochair shainithe nó plean ranníocaíochtaí sainithe atá ann: … (b) faisnéis ábhartha maidir le beartas cuntasaíochta; agus …

AN DÁTA ÉIFEACHTACH

...

38.

Le Nochtadh Beartas Cuntasaíochta, lena leasaítear IAS 1 Cur i láthair Ráiteas Airgeadais agus Ráiteas Cleachtais 2 de chuid IFRS Breithiúnais Ábharthachta a Thabhairt, agus a eisíodh i mí Feabhra 2021, leasaíodh mír 34. Cuirfidh an t-eintiteas an leasú sin i bhfeidhm le haghaidh tréimhsí bliantúla tuairiscithe dar tús an 1 Eanáir 2023 nó ina dhiaidh sin. Ceadaítear cur i bhfeidhm níos luaithe. Má chuireann an t-eintiteas an leasú sin i bhfeidhm le haghaidh tréimhse níos luaithe, nochtfaidh sé an méid sin.

Leasuithe ar IAS 34 Tuairisciú Airgeadais Eatramhach

Leasaítear mír 5 agus cuirtear mír 60 leis.

INNEACHAR TUARASCÁLA AIRGEADAIS EATRAMHAÍ

5

Le IAS 1 sainítear tacar iomlán de ráitis airgeadais mar thacar a bhfuil na comhpháirteanna seo a leanas san áireamh ann: … (e) nótaí, ina bhfuil faisnéis ábhartha maidir le beartas cuntasaíochta agus faisnéis eile mhíniúcháin; …

AN DÁTA ÉIFEACHTACH

...

60.

Le Nochtadh Beartas Cuntasaíochta, lena leasaítear IAS 1 agus Ráiteas Cleachtais 2 de chuid IFRS Breithiúnais Ábharthachta a Thabhairt, agus a eisíodh i mí Feabhra 2021, leasaíodh mír 5. Cuirfidh an t-eintiteas an leasú sin i bhfeidhm le haghaidh tréimhsí bliantúla tuairiscithe dar tús an 1 Eanáir 2023 nó ina dhiaidh sin. Ceadaítear cur i bhfeidhm níos luaithe. Má chuireann an t-eintiteas an leasú sin i bhfeidhm le haghaidh tréimhse níos luaithe, nochtfaidh sé an méid sin.

Leasuithe ar IAS 8

Beartais Chuntasaíochta, Athruithe ar Mheastacháin agus Earráidí Cuntasaíochta

Leasaítear míreanna 5, 32, 34, 38 agus 48 agus an ceannteideal os cionn mhír 32. Cuirtear míreanna 32A–32B, 34A agus 54I agus na ceannteidil os cionn mhíreanna 34 agus 36 leis. Leasaítear an ceannteideal os cionn mhír 39 le bheith ina fho-cheannteideal faoin gceannteideal a chuirtear isteach os cionn mhír 34.

SAINMHÍNITHE

5

Úsáidtear na téarmaí seo a leanas sa Chaighdeán seo in éineacht leis na bríonna shonraítear: … Is é atá i meastacháin chuntasaíochta méideanna airgeadaíochta i ráitis airgeadais atá faoi réir neamhchinnteacht tomhais. …

MEASTACHÁIN CHUNTASAÍOCHTA

32

D’fhéadfaí a cheangal le beartas cuntasaíochta míreanna i ráitis airgeadais a thomhas ar bhealach lena mbaineann neamhchinnteacht tomhais—is é sin, d’fhéadfaí a cheangal leis an mbeartas cuntasaíochta míreanna den sórt sin a thomhas ag méideanna airgeadaíochta nach féidir a bhreathnú go díreach agus nach mór meastachán a dhéanamh ina leith ina ionad sin. I gcás den sórt sin, forbraíonn eintiteas meastachán cuntasaíochta chun an cuspóir a leagadh amach leis an mbeartas cuntasaíochta a bhaint amach. Úsáidtear breithiúnais nó toimhdí atá bunaithe ar an bhfaisnéis iontaofa is déanaí atá ar fáil chun meastacháin chuntasaíochta a fhorbairt. Is samplaí de mheastacháin chuntasaíochta iad na nithe seo a leanas: (a) lamháltas caillteanais le haghaidh caillteanais chreidmheasa ionchasacha, trína gcuirtear i bhfeidhm IFRS 9 Ionstraimí Airgeadais; (b) glanluach inréadaithe míre fardail, trína gcuirtear i bhfeidhm IAS 2 Fardail; (c) luach cóir sócmhainne nó dliteanais, trína gcuirtear i bhfeidhm IFRS 13 Tomhas ar Luach Cóir; (d) an costas dímheasa le haghaidh mír réadmhaoine, gléasra agus trealaimh, trína gcuirtear i bhfeidhm IAS 16; agus (e) foráil maidir le hoibleagáidí baránta, trína gcuirtear i bhfeidhm IAS 37 Forálacha, Dliteanais Theagmhasacha agus Sócmhainní Teagmhasacha.

32A

Úsáideann eintiteas teicnící tomhais agus ionchuir chun meastachán cuntasaíochta a fhorbairt. Áirítear ar theicnící tomhais teicnící meastacháin (mar shampla, teicnící a úsáidtear chun lamháltas caillteanais le haghaidh caillteanais chreidmheasa ionchasacha a thomhas trína gcuirtear IFRS 9 i bhfeidhm) agus teicnící luachála (mar shampla, teicnící a úsáidtear chun luach cóir sócmhainne nó dliteanais a thomhas trína gcuirtear IFRS 13 i bhfeidhm).

32B

Uaireanta, tagraíonn an téarma ‘meastachán’ in IFRSanna do mheastachán nach bhfuil ina mheastachán cuntasaíochta mar a shainmhínítear sa Chaighdeán seo. Mar shampla, tagraíonn sé uaireanta d’ionchur a úsáidtear chun meastacháin chuntasaíochta a fhorbairt. …

Athruithe ar mheastacháin chuntasaíochta

34

D’fhéadfadh sé go mbeadh ar eintiteas meastachán cuntasaíochta a athrú má thagann athruithe ar na cúinsí a raibh an meastachán cuntasaíochta bunaithe orthu nó mar thoradh ar fhaisnéis nua, forbairtí nua nó níos mó taithí. De bharr a chineáil, níl baint ag athrú ar mheastachán cuntasaíochta le tréimhsí roimhe ná ní ceartú earráide atá ann.

34A

Mura n-eascraíonn siad as ceartú earráidí réamhthréimhse, athruithe ar mheastacháin chuntasaíochta atá sna héifeachtaí ar mheastachán cuntasaíochta a bhíonn ag athrú ionchuir nó athrú teicníce tomhais. …

Athruithe ar mheastacháin chuntasaíochta a chur i bhfeidhm

…

38

Ciallaíonn aitheantas ionchasach ar an éifeacht a bhíonn ag athrú ar mheastachán cuntasaíochta go gcuirtear an t-athrú i bhfeidhm ar idirbhearta agus ar imeachtaí agus coinníollacha eile ó dháta an athraithe sin. D’fhéadfadh athrú ar mheastachán cuntasaíochta difear a dhéanamh do bhrabús nó caillteanas na tréimhse reatha amháin, nó do bhrabús nó caillteanas na tréimhse reatha agus na dtréimhsí amach anseo araon. Mar shampla, ní dhéanann athrú ar lamháltas caillteanais le haghaidh caillteanais chreidmheasa ionchasacha difear ach do bhrabús nó caillteanas na tréimhse reatha agus dá bhrí sin ní aithnítear é sa tréimhse reatha. Mar sin féin, athrú ar shaolré ionchais úsáide, nó ar phatrún ionchasach tomhaltais na leasanna eacnamaíocha a bheidh ann amach anseo atá cuimsithe i sócmhainn in-dímheasa, déanann sé difear don chostas dímheasa le haghaidh na tréimhse reatha agus le haghaidh gach tréimhse a bheidh ann amach anseo le linn shaolré úsáide na sócmhainne atá fágtha. Sa dá chás, aithnítear mar ioncam nó mar chostas le linn na tréimhse reatha an difear a dhéanann an t-athrú a bhaineann leis an tréimhse reatha. Aithnítear an difear a dhéanfar do thréimhsí a bheidh ann amach anseo, má dhéanfar aon difear dóibh, mar ioncam nó costas sna tréimhsí sin a bheidh ann amach anseo.

Nochtadh

…

EARRÁIDÍ

…

48.

Déantar ceartú earráidí a idirdhealú ó athruithe ar mheastacháin chuntasaíochta. Neastacháin atá i meastacháin chuntasaíochta, de bharr a gcineáil, agus d’fhéadfadh sé go mbeadh gá iad a athrú de réir mar a bhíonn faisnéis bhreise ar eolas. Mar shampla, an gnóthachan nó an caillteanas a aithnítear ar thoradh teagmhais, ní ceartú earráide é sin. …

DÁTA ÉIFEACHTACH AGUS AISTRIÚ

…

54I

Le Sainmhíniú Meastachán Cuntasaíochta, a eisíodh i mí Feabhra 2021, leasaíodh míreanna 5, 32, 34, 38 agus 48 agus cuireadh isteach míreanna 32A, 32B agus 34A. Cuirfidh eintiteas na leasuithe sin i bhfeidhm le haghaidh tréimhsí tuairiscithe bliantúla dar tús an 1 Eanáir 2023 nó ina dhiaidh sin. Ceadaítear cur i bhfeidhm níos luaithe. Cuirfidh eintiteas na leasuithe i bhfeidhm ar athruithe ar mheastacháin chuntasaíochta agus ar athruithe ar bheartais chuntasaíochta a dhéanfar ag tús na chéad tréimhse tuairiscithe bliantúla ina gcuirfidh sé na leasuithe i bhfeidhm nó ina dhiaidh sin.