(1)

Bunaítear le Cinneadh Uimh. 573/2014/AE ó Pharlaimint na hEorpa agus ón gComhairle (3) líonra Eorpach na seirbhísí poiblí fostaíochta (“an Líonra”) don tréimhse ón 17 Meitheamh 2014 go dtí an 31 Nollaig 2020.

(2)

Tá sé d’aidhm ag an Líonra seirbhísí poiblí fostaíochta (SPFanna) a nuachóiriú agus a neartú, d’fhonn feabhas a chur ar a n-acmhainneacht, ar cháilíocht a gcuid seirbhísí, ar a n-éifeachtacht agus ar a n-éifeachtúlacht. Bhainfí an méid sin amach trí ardán a chur ar fáil chun comparáid a dhéanamh idir a bhfeidhmíocht ar leibhéal an Aontais, trí dhea-chleachtais a shainaithint agus trí chóras foghlama frithpháirtí a bhunú, d’fhonn rannchuidiú le hobair chuibhiúil agus le poist chuimsitheacha agus inbhuanaithe. Tá sé d’aidhm aige freisin tuilleadh deiseanna a thabhairt do SPFanna chun cuidiú leis na beartais nuálacha atá dírithe ar an todhchaí agus atá bunaithe ar fhianaise a fhorbairt i gcomhréir leis na tionscnaimh bheartais ábhartha de chuid an Aontais agus leis na cuspóirí eacnamaíocha, sóisialta agus fostaíochta a leagtar amach in Airteagal 3(3) den Chonradh ar an Aontas Eorpach.

(3)

Bhí ról tábhachtach ag an Líonra go dtí seo maidir le níos mó comhair idir na Ballstáit a spreagadh i réimsí freagrachta SPFanna agus maidir le rannchuidiú le SPFanna a nuachóiriú agus a neartú. Léirítear i meastóireacht a rinneadh ar chur chun feidhme Chinneadh Uimh. 573/2014/AE go raibh tionchar dearfach ag an Líonra agus sainaithnítear sa mheastóireacht sin na ceachtanna a foghlaimíodh ar bhonn na ngníomhaíochtaí éagsúla agus na taithí a fuarthas. Ina theannta sin, tá a chuid acmhainneachta méadaithe ag an Líonra agus tá bearta nuálacha atá bunaithe ar fhianaise forbartha aige chun beartais fostaíochta a chur chun feidhme.

(4)

Ba cheart tréimhse bhunaithe an Líonra a fhadú go dtí an 31 Nollaig 2027 chun tairbhe a bhaint as na torthaí a baineadh amach go dtí seo agus chun níos mó comhair a chothú idir SPFanna.

(5)

Ba cheart don Líonra an comhar idir a chuid ball a neartú agus tionscnaimh chomhpháirteacha a fhorbairt chun faisnéis agus dea-chleachtais a mhalartú i ngach réimse oibríochta de chuid SPFanna, trí anailísí comparáideacha agus comhairle a chur ar fáil agus tionscnaimh socrúcháin fostaíochta atá nuálach a chur chun cinn. Sa chomhthéacs sin, agus i gcás inarb iomchuí, ba cheart aird a thabhairt ar chomhar SPFanna chun an lánpháirtiú agus cúnamh a éascú do dhaoine a chumhdaítear le rialacha an Aontais maidir le comhordú na gcóras slándála sóisialta. Ba cheart a bheith in ann, trí obair an Líonra, comparáid chuimsitheach, atá bunaithe ar fhianaise agus atá dírithe ar fheidhmíocht a dhéanamh idir na SPFanna ar fad, chun gur féidir na dea-chleachtais ina gcuid réimsí gníomhaíochta a chinneadh, rud a rannchuideoidh le seirbhís fostaíochta níos fearr a cheapadh agus a sholáthar laistigh dá gcuid sainchúraimí sonracha. Le tionscnaimh an Líonra, ba cheart feabhas a chur ar éifeachtacht SPFanna agus cur le húsáid níos éifeachtúla na gcistí poiblí.

(6)

Ba cheart don Líonra leanúint de thacú le cur chun feidhme Cholún Eorpach na gCeart Sóisialta, colún a bhfuil sé de phrionsabal aige tacú go gníomhach leis an bhfostaíocht. Ba cheart dó freisin rannchuidiú le haistriú atá cóir go sóisialta i dtreo geilleagar glas agus le cur chun feidhme phrionsabail agus chuspóirí ábhartha na Spriocanna Forbartha Inbhuanaithe de chuid na Náisiún Aontaithe, trí fhás eacnamaíoch agus fostaíocht a bheidh cuimsitheach agus inbhuanaithe a fheabhsú mar aon le hobair chuibhiúil do chách.

(7)

Ba cheart don Líonra leanúint den chomhar córasach agus struchtúrtha a threisiú agus a neartú le geallsealbhóirí ábhartha eile i margadh an tsaothair, lena n-áirítear go háirithe gníomhaireachtaí de chuid an Aontais i réimsí na fostaíochta, an bheartais shóisialta, an chomhionannais inscne, an oideachais agus na hoiliúna, mar aon leis na comhpháirtithe sóisialta, soláthraithe seirbhíse i réimsí na fostaíochta agus na ngnóthaí sóisialta, eagraíochtaí a dhéanann ionadaíocht ar ghrúpaí leochaileacha, agus údaráis áitiúla agus réigiúnacha chun sineirgí a chur chun cinn, dea-chleachtais a mhalartú agus a creat beartais seasmhach a áirithiú i gcás inarb ábhartha.

(8)

Ba cheart tacaíocht leormhaith a thabhairt do ról SPFanna maidir le seirbhísí níos éifeachtaí a sholáthar do chuardaitheoirí poist agus gnóthais ar an leibhéal náisiúnta agus, i gcás inarb ábhartha, ar an leibhéal réigiúnach, agus ba cheart acmhainní daonna agus tacaíocht airgeadais leordhóthanach a thabhairt don oiliúint foirne agus do threalamh. Ba cheart do na Ballstáit na hacmhainní riachtanacha a chur ar fáil do SPFanna chun go mbeidh siad in ann aghaidh a thabhairt go rathúil ar dhigitiú an gheilleagair, ar phatrúin oibre atá ag athrú, lena n-áirítear geilleagair ardáin atá ag teacht chun cinn, agus forbairtí sochaíocha agus déimeagrafacha.

(9)

Ba cheart tacaíocht airgeadais ón Aontas a chur ar fáil don Líonra i gcomhréir leis an gcreat airgeadais ilbhliantúil, 2021-2027.

(10)

Ba cheart an Líonra agus a chuid tionscnamh a chistiú i gcomhréir le pleanáil airgeadais an Aontais agus laistigh de na leithreasuithe arna socrú ag Parlaimint na hEorpa agus ag an gComhairle.

(11)

Maidir le tionscadail arna bhforbairt ag an Líonra nó arna sainaithint sna gníomhaíochtaí foghlama frithpháirtí agus arna gcur chun feidhme in SPFanna aonair, ba cheart rochtain a bheith ag na Ballstáit ar chistiú ó na cláir ábhartha de chuid an Aontais.

(12)

Ba cheart feidhm a bheith ag an gCinneadh seo ón 1 Eanáir 2021 chun a áirithiú go leanfar go rianúil de ghníomhaíochtaí an Líonra.

(13)

Ba cheart, dá bhrí sin, Cinneadh Uimh. 573/2014/AE a leasú dá réir.