(1)

I gcomhréir le Cinneadh (AE) 2019/1915 ón gComhairle (2), síníodh an Comhaontú idir an tAontas Eorpach agus Poblacht na Bealarúise i ndáil le heisiúint víosaí a éascú (“Comhaontú an Aontais” anseo feasta) an 8 Eanáir 2020, faoi réir a thabhairt i gcrích ar dháta is déanaí.

(2)

I nDearbhú Chruinniú Mullaigh Chomhpháirtíocht an Oirthir an 7 Bealtaine 2009, chuir an tAontas agus na tíortha comhpháirtíochta in iúl go dtacaíonn siad go polaitiúil le léirscaoileadh an chórais víosaí i dtimpeallacht shábháilte shlán agus d’athdhearbhaigh siad a rún céimeanna a ghlacadh, diaidh ar ndiaidh, chun córas taistil gan víosa a thabhairt i gcrích, in am trátha, dá saoránaigh.

(3)

Is é cuspóir an Chomhaontaithe éascú a dhéanamh, ar bhonn na cómhalartachta, ar eisiúint víosaí chuig saoránaigh an Aontais agus na Bealarúise, do chuairt bheartaithe do thréimhse nach faide ná 90 lá in aon tréimhse 180 lá.

(4)

Is é atá sa Chinneadh seo forbairt ar fhorálacha acquis Schengen nach bhfuil Éire rannpháirteach iontu, i gcomhréir le Cinneadh 2002/192/CE ón gComhairle (3); dá bhrí sin, níl Éire rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(5)

I gcomhréir le hAirteagail 1 agus 2 de Phrótacal Uimh. 22 maidir le seasamh na Danmhairge, atá i gceangal leis an gConradh ar an Aontas Eorpach agus leis an gConradh ar Fheidhmiú an Aontais Eorpaigh, níl an Danmhairg rannpháirteach i nglacadh an Chinnidh seo agus níl sí faoi cheangal aige ná faoi réir a chur i bhfeidhm.

(6)

Rinne an Coimisiún measúnú ar shlándáil agus ar shláine chóras eisiúna pasanna taidhleoireachta bithmhéadracha na Bealarúise agus ar na sonraíochtaí teicniúla a ghabhann leis sin.

(7)

Ba cheart an Comhaontú a fhormheas,