—

Cinneadh an Choimisiúin Eorpaigh arna shíniú an 18 Samhain 2025, le tagairt Ares (2025) 9972459, lena ndiúltaítear do ghearán an iarratasóra faoi Airteagal 90(2) de na Rialacháin Foirne, lena ndeimhnítear diúltú an chirt chun pinsin marthanóra, chomh maith leis an gcinneadh tosaigh ón Oifig um Riar agus Íoc Teidlíochtaí Indibhidiúla (PMO) an 28 Bealtaine 2025, a chur ar neamhní.

—

aitheantas a thabhairt do cheart an iarratasóra na suimeanna airgeadais a chomhfhreagraíonn do phinsean marthanóra a diúltaíodh go míchuí a fháil, in éineacht le hús reachtúil a charnaigh ón dáta a raibh an íocaíocht dlite go dtí dáta na híocaíochta iarbhír.

—

a ordú don Choimisiún Eorpach costais na n-imeachtaí a íoc, i gcomhréir le hAirteagal 134 de Rialacha Nós Imeachta na Cúirte Ginearálta.

1.

An chéad saincheist dlí, lena n-éilítear earráid dlí i léiriú agus i gcur i bhfeidhm Airteagail 18 agus 20 d’Iarscríbhinn VIII a ghabhann leis na Rialacháin Foirne.

Rinne an Coimisiún earráid dlí tríd an gceanglas maidir le híosfhad pósta a chur i bhfeidhm go huathoibríoch agus go docht go foirmiúil, gan cuspóir na forála sin ná a comhthéacs rialála ginearálta a chur san áireamh. Is é is aidhm don choinníoll ama cásanna calaoiseacha a chosc, go háirithe póstaí a thugtar i gcrích chun cearta eacnamaíocha a chruthú gan fíorchaidreamh cobhsaí a bheith ann. Sa chás seo, áfach, bhí an caidreamh idir an t-iarratasóir agus an t-oifigeach a d’éag fíor, fada agus bunaithe go hiomlán le roinnt tosca oibiachtúla, lena n-áirítear comhchónaí leanúnach ar feadh na mblianta, clárú comhpháirteach, deimhniú nótaire ar chomhpháirtíocht chobhsaí agus aitheantas frithpháirteach in uachtanna. Trí neamhaird a thabhairt ar na tosca sin, rinne an Coimisiún cuspóir cosanta an chórais faoi na Rialacháin Foirne a shaobhadh, tríd an gcoinníoll ama a chur i bhfeidhm mar choinníoll meicniúil amháin, i gcontrárthacht leis na prionsabail is bonn leis an gcóras cosanta sóisialta d’oifigigh an Aontais.

2.

An dara saincheist dlí, lena n-éilítear earráid fhollasach mheasúnaithe ar na fíorais agus measúnú mícheart ar an bhfianaise.

Tá an cinneadh atá faoi chonspóid bunaithe ar mheasúnú mícheart agus neamhiomlán ar na fíorais ábhartha, go háirithe maidir le staid dhlíthiúil an iarratasóra agus an tráth a bhí sí in ann pósadh go bailí. Bhí an Coimisiún den tuairim gur mhainnigh an t-iarratasóir gníomhú le dícheall cuí toisc nár lorg sí aitheantas sa Spáinn roimhe sin ar a colscaradh a fógraíodh sa Bheilg. Thairis sin, ní dhearna an Coimisiún measúnú cuí ar an bhfianaise a soláthraíodh lenar léiríodh buaine an chaidrimh. Is ionann an mhainneachtain sin agus earráid fhollasach mheasúnaithe ar na fíorais agus saobhadh na fianaise.

3.

An tríú saincheist dlí, lena n-éilítear cur i bhfeidhm mícheart an choincheapa ‘force majeure’.

Rinne an Coimisiún an coincheap ‘force majeure’ a chur i bhfeidhm go mícheart trí dhiúltú d’argóint an iarratasóra gan anailís iomlán, nithiúil agus indibhidiúlaithe a dhéanamh ar imthosca an cháis. Ní hé go raibh sé dodhéanta pósadh roimh 2021 mar thoradh ar easpa dúthrachta ar thaobh an iarratasóra, ach b’amhlaidh a bhí mar thoradh ar bhac dlíthiúil oibiachtúil mar gheall nár aithníodh a colscaradh sa Spáinn roimhe sin. Ina theannta sin, le linn na tréimhse sin, diagnóisíodh go raibh tinneas tromchúiseach ar an iarratasóir, imthoisc eisceachtúil a rinne difear dá staid phearsanta agus a bhí le cur san áireamh agus measúnú á dhéanamh ar an dícheall ba ghá. Trí mhainneachtain na tosca sin a chur san áireamh go cuí, rinne an Coimisiún earráid dlí agus earráid fhollasach mheasúnaithe.

4.

An ceathrú saincheist dlí, lena n-éilítear sárú ar phrionsabal na comhréireachta (Airteagal 52(1) den Chairt um Chearta Bunúsacha an Aontais Eorpaigh).

Sáraítear leis an gcinneadh atá faoi chonspóid prionsabal na comhréireachta trí iarmhairt thar a bheith tromchúiseach a fhorchur – eisiamh iomlán ón gceart chun pinsin marthanóra – i gcás go raibh an caidreamh idir an t-iarratasóir agus an t-oifigeach a d’éag fíor, buan agus fadtéarmach. Ní gá an ceanglas ama a chur i bhfeidhm go huathoibríoch chun cuspóir frithchalaoise na rialach a bhaint amach, toisc go bhfuil fíorchineál an chaidrimh go hiomlán bunaithe. Dá bhrí sin, tá an beart a glacadh díréireach.

5.

An cúigiú saincheist dlí, lena n-éilítear sárú ar phrionsabal an chomhionannais agus an neamh-idirdhealaithe (Airteagail 20 agus 21 den Chairt).

Sáraítear leis an gcinneadh atá faoi chonspóid prionsabal an chomhionannais trí chaitheamh le cásanna atá éagsúil go substaintiúil ar an mbealach céanna. Caitear leis an iarratasóir, a raibh caidreamh buan agus fadtéarmach aici leis an oifigeach a d’éag, ar an mbealach céanna le duine a phós go gairid roimh an mbás gan caidreamh roimhe sin. Gineann an cur i bhfeidhm foirmiúil sin de na Rialacháin Foirne difríocht cóire neamhbhailí atá i gcontrárthacht le prionsabal na córa comhionainne.

6.

An séú saincheist dlí, lena n-éilítear sárú ar an gceart chun dea-riaracháin (Airteagal 41 den Chairt).

Níor chomhlíon an Coimisiún a oibleagáid gnéithe ábhartha uile an chomhaid a scrúdú go cúramach agus measúnú aonair a dhéanamh ar imthosca an cháis. Léirítear cur chuige meicniúil agus caighdeánaithe sa chinneadh atá faoi chonspóid, lena ndírítear go heisiach ar an gcoinníoll ama, gan anailís chuí a dhéanamh ar an bhfianaise a tugadh ar aird ná ar na himthosca eisceachtúla a líomhnaítear. Sáraítear leis sin an ceart chun dea-riaracháin.

7.

An seachtú saincheist dlí, lena n-éilítear mainneachtain réasúin a shonrú (Airteagal 296 CFAE).

Níl ráiteas leordhóthanach ar chúiseanna sa chinneadh atá faoi chonspóid chun go bhféadfar na cúiseanna leis an diúltú a thuiscint go hiomlán. Ní mhíníonn an Coimisiún go soiléir cén fáth nach ionann an bac dlíthiúil líomhnaithe agus force majeure ná cén fáth nach bhfuil an fhianaise a cuireadh ar fáil cinntitheach. Cuireann an easpa réasúnaíochta sin cosc ar athbhreithniú breithiúnach éifeachtach.

8.

An t-ochtú saincheist dlí, lena n-éilítear léiriú neamhréireach ar na Rialacháin Foirne agus sárú ar a gcuspóir cosantach.

Leis an léiriú arna ghlacadh ag an gCoimisiún, déantar neamhaird ar chuspóir cosantach na scéime faoi na Rialacháin Foirne, is é sin cosaint shóisialta oifigeach agus a dteaghlach a áirithiú.

Fágann cur i bhfeidhm choinníoll an ama go lánfhoirmiúil toradh a théann in aghaidh na cuspóra sin, tríd an duine arbh í fíorchéile marthanach an oifigigh a eisiamh ón gcosaint.

9.

An naoú saincheist dlí, lena n-éilítear sárú ar an gceart chun leigheas éifeachtach a fháil (Airteagal 47 den Chairt).

Sáraíonn mainneachtain réasúin a shonrú go leordhóthanach agus easpa scrúdaithe aonair ar imthosca an cháis ceart an iarratasóra chun leigheas éifeachtach a fháil trí chosc a chur uirthi na cúiseanna atá leis an gcinneadh a thuiscint go hiomlán agus trína dhéanamh deacair agóid a dhéanamh ina choinne.