Caingean arna tabhairt an 4 Feabhra 2026 – an Coimisiún Eorpach v Poblacht na Portaingéile

(Cás C-58/26)

(C/2026/1591)

Teanga an cháis: an Phortaingéilis

Páirtithe

Iarratasóir: an Coimisiún Eorpach (ionadaithe: M. Teles Romão agus O. Gariazzo, Gníomhairí)

Cosantóir: Poblacht na Portaingéile

An t-ordú atá á lorg

Iarrann an t-iarratasóir ar an gCúirt Bhreithiúnais:

Saincheisteanna dlí agus príomhargóintí

Le Rialachán (AE) 2022/2065 ó Pharlaimint na hEorpa agus ón gComhairle maidir le Margadh Aonair do Sheirbhísí Digiteacha agus lena leasaítear Treoir 2000/31/CE (an Gníomh um Sheirbhísí Digiteacha), leagtar síos rialacha faoina dtabharfaidh na Ballstáit na cumhachtaí is gá dá gComhordaitheoir Seirbhísí Digiteacha chun a chúraimí a dhéanamh faoin Rialachán sin agus leagtar síos rialacha maidir leis na pionóis is infheidhme maidir le sáruithe ar an Rialachán sin.

Tá ról lárnach ag na Ballstáit i gcur chun feidhme Rialachán (AE) 2022/2065 agus san fhaireachán air. Go háirithe, beidh an chumhacht eisiach ag an mBallstát ina bhfuil príomhbhunaíocht an tsoláthraí seirbhísí idirghabhálacha lonnaithe maoirseacht agus forfheidhmiú a dhéanamh ar na hoibleagáidí faoi Rialachán (AE) 2022/2065 i ndáil leis an soláthraí sin, seachas cumhachtaí eisiacha an Choimisiúin chun maoirseacht agus forfheidhmiú a dhéanamh ar Roinn 5 de Chaibidil III den Rialachán sin in aghaidh soláthraithe ardán an-mhór ar líne agus soláthraithe inneall cuardaigh an-mhór ar líne agus cumhachtaí an Choimisiúin, i gcás inar thionscain an Coimisiún imeachtaí mar gheall ar an sárú céanna, maoirseacht a dhéanamh ar na hoibleagáidí eile faoin Rialachán sin (is é sin le rá, na hoibleagáidí sin nach gcumhdaítear le Roinn 5 de Chaibidil III den Rialachán sin) agus iad a fhorfheidhmiú i leith na soláthraithe an-mhór sin.

I gcomhréir le hAirteagal 51(1) go [(3)] den Rialachán (AE) 2022/2065, beidh cumhachtaí fiosrúcháin, forfheidhmithe agus ghlactha na mbeart atá liostaithe sa fhoráil sin ag Comhordaithe Seirbhísí Digiteacha, chun a chur ar a gcumas a gcúraimí faoin Rialachán sin a chomhlíonadh. Ina theannta sin, de bhun Airteagal 51(6) de Rialachán (AE) 2022/2065, déanfaidh na Ballstáit, inter alia, rialacha agus nósanna imeachta sonracha a leagan síos maidir le feidhmiú na gcumhachtaí a liostaítear i míreanna 1 go 3 d’Airteagal 51 den Rialachán sin.

Faoi Airteagal 52 de Rialachán (AE) 2022/2065, déanfaidh na Ballstáit na rialacha a bhaineann leis na pionóis is infheidhme maidir le sáruithe soláthraithe seirbhísí idirghabhálacha faoina n-inniúlacht ar an Rialachán sin a leagan síos agus déanfaidh siad gach beart is gá lena áirithiú go gcuirfear chun feidhme iad i gcomhréir le hAirteagal 51 den Rialachán sin. Ina theannta sin, de bhun Airteagal 52(2) de Rialachán (AE) 2022/2065, tabharfaidh na Ballstáit fógra don Choimisiún gan mhoill maidir leis na rialacha sin agus na bearta sin agus tabharfaidh siad fógra don Choimisiún faoi aon leasuithe ina ndiaidh sin a dhéanfaidh difear dóibh. Sonraítear in Airteagal 52(3) agus [(4)] de Rialachán (AE) 2022/2065 na ceanglais atá le comhlíonadh ag na rialacha maidir le pionóis.

An 24 Aibreán 2024, sheol an Coimisiún litir fógra fhoirmiúil chuig Poblacht na Portaingéile. An 3 Deireadh Fómhair 2024, sheol an Coimisiún tuairim réasúnaithe chuig Poblacht na Portaingéile. Go dtí seo, áfach, ní dhearna Poblacht na Portaingéile na bearta is gá chun a hoibleagáidí faoi Airteagail 51 agus 52 de Rialachán (AE) 2022/2065 a chomhlíonadh, rud nach gcuireann údaráis na Portaingéile ina choinne. I gcomhréir le hAirteagal 258 CFAE agus i bhfianaise mhainneachtain Phoblacht na Portaingéile an tuairim réasúnaithe a chomhlíonadh, iarrann an Coimisiún a dhearbhú gur mhainnigh an Ballstát sin a oibleagáidí faoi Airteagail 51 agus 52 de Rialachán (AE) 2022/2065 a chomhlíonadh agus a ordú don Bhallstát sin na costais a íoc.

(1)  Rialachán (AE) 2022/2065 ó Pharlaimint na hEorpa agus ón gComhairle an 19 Deireadh Fómhair 2022 maidir le Margadh Aonair do Sheirbhísí Digiteacha agus lena leasaítear Treoir 2000/31/CE (IO 2022 L 277, lch. 1).