1.

An bhfuil na critéir le haghaidh Gobharnóir a chur as oifig agus an nós imeachta chun cur ina choinne a leagtar síos in Airteagal 14.2 de Phrótacal (Uimh. 4) maidir le Reacht an Chórais Eorpaigh Banc Ceannais agus an Bhainc Cheannais Eorpaigh le léiriú sa chaoi go bhfuil feidhm acu maidir le gach comhalta de chomhlachtaí cinnteoireachta de chuid banc ceannais naisiúnta?

2.

Más freagra diúltach a thabharfar ar Cheist 1: An gceadaítear le hAirteagal 14.2 de Phrótacal (Uimh. 4) de Reacht [CEBC agus BCE] reachtaíocht náisiúnta lena dtugtar isteach na critéir chéanna le haghaidh comhaltaí de chomhlachtaí bainc ceannais náisiúnta a chur as oifig leo siúd arna leagan síos ag an bhforáil reachtach sin don Ghobharnóir?

3.

An gceadaítear le hAirteagal 14.2 de Phrótacal (Uimh. 4) de Reacht [CEBC agus BCE] go mbeidh sealbhú oifige Gobharnóra bainc ceannais náisiúnta ag luí le bheith ina scairshealbhóir i gcuideachta chaipitil atá i dteideal cuid de bhrabúis na cuideachta i dtaca lena scairsheilbh?

4.

An gceadaítear le hAirteagal 14.2 de Phrótacal (Uimh. 4) de Reacht [CEBC agus BCE] go mbeidh sealbhú oifige Gobharnóra bainc ceannais náisiúnta ag luí le bheith ina chomhalta de chomhlacht bainistíochta eintitis dlí neamhbhrabúsaigh a fhéadfaidh, de réir a reachtanna, tabhairt faoi ghníomhaíocht eacnamaíoch, gan cinneadh d’aon toil ó bhord stiúrthóirí bainc ceannais náisiúnta a bheith glactha, mar a éilítear faoin dlí náisiúnta chun dul i mbun gníomhaíocht nach ngabhann luach saothair léi?

5.

An gceadaítear le hAirteagal 131 den Chonradh ar Fheidhmiú an Aontais Eorpaigh agus Airteagal 7 de Phrótacal (Uimh. 4) maidir le Reacht [CEBC agus BCE] reachtaíocht náisiúnta lena gceanglaítear ar chomhaltaí de chomhlachtaí cinnteoireachta bainc ceannais náisiúnta, ina gcáil mar dhaoine atá i seilbh oifig phoiblí mar a shainítear leis an dlí náisiúnta, a dhearbhú leis an údarás poiblí náisiúnta, laistigh de thréimhse ama ó dhul i mbun oifige, a rannpháirtíocht mar scairsealbhóirí i gcuideachtaí chaipitil agus a rannpháirtíocht i mbainistíocht eintiteas dlí neamhbhrabúsacha?

6.

An gceadaítear le hAirteagal 131 [CFAE] agus Airteagal 14.2 de Phrótacal (Uimh. 4) de Reacht [CEBC agus BCE] reachtaíocht náisiúnta lena n-éilítear ar Ghobharnóir bainc ceannais náisiúnta, ina cháil mar dhuine atá i seilbh oifig phoiblí mar a shainítear leis an dlí náisiúnta, bearta a ghlacadh, laistigh de thréimhse ama shonraithe ó dul i mbun oifige, lena gcuirtear deireadh lena rannpháirtíocht mar scairshealbhóir i gcuideachta chaipitil agus a rannpháirtíocht mar chomhalta de chomhlachtaí bainistíochta d’eintitis dlí neamhbhrabúsacha?

7.

An gceadaítear le hAirteagal 14.2 de Phrótacal (Uimh. 4) maidir le Reacht [CEBC agus BCE] léiriú ionas gur cheart caitheamh le Gobharnóir bainc ceannais náisiúnta, a bhfuil deireadh curtha le neamhréireacht le sealbhú oifige lasmuigh den tréimhse ama reachtach, ionas nach gcomhlíonann sé na coinníollacha riachtanacha chun a chuid dualgas a fheidhmiú?

8.

An gceadaítear le hAirteagal 131 [CFAE] agus Airteagail 7 agus 14.2 de Phrótacal (Uimh. 4) maidir le Reacht [CEBC agus BCE] reachtaíocht náisiúnta lena gceadaítear don údarás atá freagrach as na forais maidir le cur as oifig measúnú a dhéanamh, chun críocha an nós imeachta sin agus i gcomhthéacs an nós imeachta sin, i dtaobh an bhfuil an duine sin ciontach i mí-iompar tromchúiseach de réir bhrí Airteagal 14.2 de Reacht [CEBC agus BCE]?