AN COIMISIÚN EORPACH

An Bhruiséil,6.5.2026

COM(2026) 539 final

TEACHTAIREACHT ÓN gCOIMISIÚN CHUIG PARLAIMINT NA hEORPA, CHUIG AN gCOMHAIRLE, CHUIG COISTE EACNAMAÍOCH AGUS SÓISIALTA NA hEORPA AGUS CHUIG COISTE NA RÉIGIÚN

Deireadh a chur le timthriall na bochtaineachta - an Ráthaíocht Eorpach do Leanaí a neartú

{SWD(2026) 772 final}

Tá bochtaineacht leanaí san Aontas ard i gcónaí. Níl aon dul chun cinn déanta i dtreo chuspóir 2030 maidir le líon na leanaí atá i mbaol bochtaineachta nó eisiaimh shóisialta a laghdú faoi 5 mhilliún ar a laghad. Tá rioscaí den sórt sin roimh bheagnach leanbh amháin as gach ceathrar ( 1 ). Ag an am céanna, tá an costas maireachtála atá ag dul i méid fós ag cur brú ar bhuiséid teaghlaigh. Ní ioncam indiúscartha amháin atá i gceist le bochtaineacht leanaí; cuimsítear léi freisin cé acu a chomhlíontar nó nach gcomhlíontar bunriachtanais leanaí, amhail bia nó tithíocht, agus cé acu atá nó nach bhfuil rochtain acu ar sheirbhísí fíor-riachtanacha ar mhaithe lena bhfolláine agus lena bhforbairt (oideachas, cúram sláinte, gníomhaíochtaí seach-churaclaim).

Tá na hiarmhairtí a bhaineann le fás aníos i mbochtaineacht dian agus fadtéarmach – is beag nach ionann é sin agus dóchúlacht ( 2 ) na bochtaineachta san aosacht a mhéadú faoi dhó. D’fhéadfadh bacainní a bheith roimh leanaí bochta amhail rochtain theoranta ar chothú leordhóthanach ( 3 ), ar chúram sláinte, nó ar thithíocht leordhóthanach, chomh maith le nochtadh méadaithe d’fhoréigean agus do rioscaí ar líne. Baineann na míbhuntáistí sin an bonn de chearta leanaí, d’fholláine fhoriomlán, de ghnóthachtáil oideachais agus de rannpháirtíocht sa tsochaí, agus cuireann siad srian le hionchais saoil agus fostaíochta amach anseo. Tá gné chríochach ag baint le bochtaineacht leanaí freisin - tá éagothromaíochtaí réigiúnacha agus críochacha fós ann, rud a léiríonn difríochtaí loma taobh thiar de mheáin náisiúnta.

Tá gá le gníomhaíochtaí misniúla agus infheistíochtaí láidre gan mhoill. Tá costais easpa gníomhaíochta ard: meastar go gcosnaíonn míbhuntáistí leanaí agus a n‑éifeachtaí ar feadh an tsaoil 3,4 % den OTI ( 4 ) ar an Eoraip gach bliain. Os a choinne sin, má dhéantar infheistíocht i leanaí ón aois is luaithe ar aghaidh, bíonn ráta ard torthaí dearfacha ( 5 ) ann do na leanaí agus dá bhforbairt amach anseo, agus dár ngeilleagar, dár gcomhtháthú sóisialta agus dár ndaonlathas. I bhfianaise srianta dochta buiséadacha, tá sé ríthábhachtach, dá bhrí sin, measúnú a dhéanamh ar an gcaoi a leithdháiltear caiteachas sóisialta agus poiblí ar fud aoisghrúpaí agus, i gcás inar gá, é a athchothromú chun bochtaineacht leanaí a laghdú agus cothroime idirghlúine a chur chun cinn.

Tá beartais á gcur chun feidhme ag an Aontas agus ag na Ballstáit chun bochtaineacht leanaí a chomhrac, le tacaíocht ó chistiú ón Aontas freisin. Is uirlis beartais lárnach í an Ráthaíocht Eorpach do Leanaí ( 6 ). Chuir an Ráthaíocht feabhas ar rochtain ar sheirbhísí do leanaí atá i mbaol bochtaineachta nó eisiaimh shóisialta. Ó glacadh í, tá gnóthachain thábhachtacha bainte amach ag an Ráthaíocht: tá méadú 2 phointe céatadáin tagtha ar rannpháirtíocht in oideachas agus cúram na luath-óige i measc leanaí atá i mbochtaineacht; tá cláir béilí scoile leathnaithe ag seacht mBallstát ar a laghad; agus tá rochtain faighte ag 850,000 leanbh eile, 80 % díobh i mbaol bochtaineachta, ar ghníomhaíochtaí scoilbhunaithe. Ní mór na gnóthachain sin a mhéadú trí na bacainní rochtana atá fós ann i ngach ceann de na réimsí sin a dhíchóimeáil.

Mar sin féin, ní féidir leis imeacht ón mbochtaineacht as féin. Tá go leor bearnaí fós sa chur chun feidhme, go háirithe san fhor-rochtain ar na daoine is soghontaí agus i gcomhtháthú seirbhísí (aonair) i gcórais tacaíochta chomhleanúnacha agus chomhsheasmhacha níos leithne lena dtugtar aghaidh ar bhunchúiseanna na bochtaineachta leanaí agus atá in ann na leanaí sin a thabhairt amach as a staid shoghonta. Cuireann cistiú neamhleor atá ar fáil don Ráthaíocht agus a infheistítear inti teorainn freisin le tionchar dearfach na mbeart sin.

Féachtar sa Teachtaireacht seo ar na cúiseanna a bhaineann go sonrach le bochtaineacht leanaí, agus ar na freagairtí beartais atá i bhfeidhm — an méid a d’oibrigh agus an méid nár éirigh leis sa socrú beartais atá ann faoi láthair, conas is féidir an Ráthaíocht Eorpach do Leanaí a neartú agus cad iad na gníomhaíochtaí beartais eile is féidir a dhéanamh ar leibhéal an Aontais chun sáinn bhochtaineachta na leanaí atá fós ann sa lá atá inniu ann a shárú. Chun é sin a bhaint amach, cuireann an Teachtaireacht le trí cholún:

Díríonn an chéad cholún ar an tacaíocht a thugtar do na teaghlaigh ina bhfuil leanaí i ngátar ina gcónaí. Chun rochtain teaghlach ar acmhainní leordhóthanacha a áirithiú, is gá, ar an gcéad dul síos, deireadh a chur le bacainní a chuireann bac ar bhaill fásta na dteaghlach rochtain a fháil ar phoist ardcháilíochta agus ar sheirbhísí ardcháilíochta, chomh maith le líontáin sábhála shóisialta láidre a áirithiú lena gcuirtear cosc ar dhíth nuair nach leor an tuilleamh.

Féachtar sa dara colún ar an Ráthaíocht Eorpach do Leanaí. Is é sin an uirlis lárnach a chuirtear chun feidhme ar fud an Aontais chun rochtain ar sheirbhísí a chur ar fáil do leanaí atá i ngátar. Tugann rochtain ar sheirbhísí fíor-riachtanacha tús cóir sa saol do leanaí atá i ngátar, rud a laghdaíonn dóchúlacht na bochtaineachta san aosacht. Leis an Ráthaíocht Eorpach do Leanaí, rinneadh dul chun cinn maidir le bochtaineacht leanaí a chomhrac agus a chosc, ach is féidir tuilleadh a dhéanamh agus feabhas a chur uirthi. Ní mór a chur chun feidhme a neartú. Ní mór dúshláin atá ag teacht chun cinn a chur san áireamh ina raon feidhme, dúshláin atá nasctha, mar shampla, le brúnna meabhairshláinte atá roimh leanaí agus le bagairtí ar líne agus as líne ar a slándáil agus ar a bhfolláine. Tá gá le for-rochtain níos láidre do leanaí atá i ngátar, in éineacht le meantóireacht, chun a áirithiú nach dtitfidh aon leanbh trí scoilteanna na gcóras ilroinnte. Ina theannta sin, tá leanúnachas tacaíochta ón óige go dtí an luath-aosacht ríthábhachtach chun an bealach a réiteach i dtreo aistriú slán chuig saol an duine fhásta.

Leis an tríú colún den Teachtaireacht seo, tugtar aghaidh ar rialachas, ar fhaireachán agus ar chistiú, rud atá ríthábhachtach chun tionchar na ngníomhaíochtaí lena dtéitear i ngleic le bochtaineacht leanaí ar fud an Aontais a mhéadú. Ní mór dlús cinntitheach a chur leis an gcur i gcrích. Ní mór don Aontas agus do na Ballstáit leas a bhaint as an gcistiú uile atá ar fáil chun a chinntiú nach gcuirfidh an brú costais maireachtála níos mó teaghlach a bhfuil leanaí acu i mbaol na bochtaineachta, agus go gcuideofar go práinneach leo siúd atá i ngátar sa lá atá inniu ann. Ní mór na hinfheistíochtaí sin a choinneáil ar bun san fhadtéarma; ní bheidh tionchair bhuana ag tionscadail aonuaire agus neamh-chomhtháite. Chuige sin, tá gá le rialachas níos láidre ar gach leibhéal agus le faireachán láidir chun freagairt thráthúil bheartais a cheadú san áit cheart ag an am ceart.

Sa Doiciméad Inmheánach Oibre a ghabhann leis an Teachtaireacht seo, tugtar anailís ar chur chun feidhme na Ráthaíochta Eorpaí do Leanaí go dtí seo ( 7 ).

1.An Bhochtaineacht i Measc Teaghlach a Chosc agus a Laghdú

Tá gá le bearta láithreacha chun cabhrú le teaghlaigh soghonta freastal ar riachtanais a leanaí. Tugtar aghaidh ar dhúshláin inacmhainneachta leathana, amhail costais tithíochta, i Straitéis AE i gcoinne na Bochtaineachta ( 8 ) agus sa togra le haghaidh Moladh ón gComhairle maidir le heisiamh tithíochta a chomhrac ( 9 ). Féachtar sa chaibidil seo ar bhearta comhlántacha breise.

Tacú le rochtain tuismitheoirí ar fhostaíocht

Is í an fhostaíocht ar ardchaighdeán an bealach is éifeachtaí chun deireadh a chur leis an mbochtaineacht. Le poist chobhsaí ar phá maith, laghdaítear go mór rioscaí na bochtaineachta agus na héiginnteachta: dá mbainfí amach na spriocanna náisiúnta ( 10 ) a leag na Ballstáit síos leis na rátaí fostaíochta, d’fhéadfaí thart ar 1,7 milliún leanbh a thógáil amach as an mbochtaineacht ( 11 ). Mar sin féin, i gcás go leor tuismitheoirí ar ioncam íseal, go háirithe máithreacha, cuirtear bac ar rochtain ar phoist mar gheall ar bhacainní a bhaineann le freagrachtaí cúraim, rud a chuireann teorainn lena gcumas dul i mbun fostaíochta, uaireanta leordhóthanacha oibre, nó dul chun cinn ina ngairmeacha beatha. Cé go bhfuil céimeanna tábhachtacha glactha ag Treoir an Aontais maidir le Cothromaíocht Oibre agus Saoil ( 12 ) chun tacú le tuismitheoirí an chothromaíocht idir freagrachtaí cúraim agus oibre a bhaint amach, tá bearnaí suntasacha fós ann.

Tagraíonn ceann de na bacainní ar ghníomhachtú agus ar fhostaíocht níos airde tuismitheoirí d’easpa rochtana nó do rochtain neamhleor ar oideachas agus ar chúram na luath-óige. Sa lá atá inniu ann, luann 75 % de mháithreacha a bhfuil leanaí óga acu oibleagáidí teaghlaigh agus cúraim fós mar an phríomhchúis nach bhfuil siad in ann páirt a ghlacadh i margadh an tsaothair ( 13 ). Le rannpháirteachas níos airde in oideachas agus i gcúram na luath-óige, is féidir fostaíocht tuismitheoirí a mhéadú suas le 10 bpointe céatadáin ( 14 ). San fhadtéarma, tá fianaise ann go bhfeidhmíonn leanaí atá i mbaol bochtaineachta nó eisiaimh shóisialta a fhreastalaíonn ar oideachas agus cúram luath-óige níos fearr go hacadúil, go bhfuil sláinte níos fearr acu agus go bhfuil ionchais fostaíochta níos láidre acu. Cuireann an tAontas leathnú oideachais agus cúram luath-óige chun cinn cheana féin, agus tá spriocanna gaolmhara leagtha síos ( 15 ).

Príomhbhacainn atá fágtha ar rannpháirtíocht fostaíochta níos airde tuismitheoirí is ea an ‘bhearna cúraim leanaí’ mar a thugtar uirthi. Chun go mbeidh oideachas agus cúram na luath-óige éifeachtach, ní mór dó a bheith inrochtana, inacmhainne agus ar cháilíocht leordhóthanach. Ó thaobh inrochtaineachta de, ní hamháin gur gá áiteanna a bheith ar fáil, ach tá ról ag tosca eile freisin - lena n‑áirítear an aois íosta ag ar féidir leanaí a chlárú in oideachas agus cúram na luath-óige. Tagraíonn an bhearna cúraim leanaí don tréimhse idir deireadh na saoire a bhaineann leis an teaghlach agus an pointe ag ar féidir le leanaí rochtain éifeachtach a fháil ar oideachas agus cúram luath-óige nó ar fhreastal scoile éigeantach. I roinnt Ballstát, is féidir leis an mbearna sin maireachtáil ar feadh roinnt blianta, rud a fhágann teaghlaigh gan cúram leanaí iontaofa agus a chuireann teorainn le cumas tuismitheoirí dul i mbun fostaíochta nó fanacht i bhfostaíocht. Ní áirithíonn ach líon teoranta Ballstát ( 16 ) cumhdach gan uaim. Dá bhrí sin, ba cheart é a bheith ina thosaíocht an bhearna sin a dhúnadh, agus béim ar leith á leagan ar rannpháirtíocht leanaí soghonta, agus aghaidh a thabhairt ar éagothromaíochtaí críochacha.

I ndáil leis an méid sin, mar a fógraíodh i Straitéis AE i gcoinne na Bochtaineachta agus i gcomhréir le hAirteagal 154(2) CFAE, seolfaidh an Coimisiún an chéad chéim de chomhairliúchán leis na comhpháirtithe sóisialta Eorpacha chun a dtuairimí a fháil maidir leis an treo a d’fhéadfadh gníomhaíocht an Aontais a dhíriú chun tacú le gníomhachtú daoine atá eisiata ó mhargadh an tsaothair, lena n‑áirítear trí rochtain ar chúram leanaí.

Tá níos mó i gceist le tacaíocht a thabhairt d’fhostaíocht tuismitheoirí ná oideachas agus cúram na luath-óige, áfach. Ba cheart do na Ballstáit bearta a chur chun feidhme freisin chun socruithe oibre solúbtha atá fabhrach do theaghlaigh a chur ar fáil (e.g. cianobair, uaireanta intuartha) agus chun a áirithiú go n‑íocfar an obair, trí dhul i ngleic leis na dídhreasachtaí sonracha a bhíonn roimh thuismitheoirí agus iad ag dul isteach i margadh an tsaothair, ag fanacht ann nó ag dul chun cinn ann, lena n‑áirítear iad siúd a bhaineann le dearadh agus idirghníomhú na gcóras cánach agus sochar.

Líontáin sábhála láidre do theaghlaigh ina bhfuil leanaí atá i mbaol bochtaineachta

Tá sé fíor-riachtanach tacaíocht fostaíochta a chomhcheangal le líontáin sábhála láidre chun teaghlaigh a bhfuil leanaí acu a thabhairt slán as an mbochtaineacht agus chun iad a chosc ó dhíth. Tá ról lárnach ag ioncam agus tacaíocht chomhchineáil chun a áirithiú gur féidir le teaghlaigh a mbunriachtanais a chomhlíonadh nuair a bhíonn tuilleamh neamhleor nó éagobhsaí ann. Ina measc sin, tá ról ríthábhachtach ag sochair in airgead tirim (amhail liúntais leanaí, creidmheasanna cánach leanaí nó breisithe ioncaim do theaghlaigh a bhfuil leanaí acu). Ní mór na tairbhí sin a úsáid ar mhaithe le leanaí agus ba cheart feabhas a theacht ar a leas mar thoradh orthu, agus tacú le lánpháirtiú tuismitheoirí sa mhargadh saothair. Cuireann na Ballstáit uile sochair leanaí nó teaghlaigh de chineál éigin ar fáil. Leis na haistrithe sin, laghdaítear bochtaineacht leanaí 10,6 pointe céatadáin ar an meán san Aontas, rud a chuidíonn freisin le costais fhíor-riachtanacha a chumhdach agus le tionchar turraingí eacnamaíocha a mhaolú. Tá sé ríthábhachtach go ndéanfaidh na Ballstáit cur chun feidhme éifeachtach agus dlúthfhaireachán, chun calaois a sheachaint agus chun mí-úsáid fhéideartha sochar linbh le haghaidh cuspóirí eile seachas a n‑aidhmeanna a bhrath, chun an tionchar dearfach is láidre a áirithiú.

Tá éagsúlacht shuntasach idir tionchar laghdaithe bochtaineachta na sochar sin ar fud na mBallstát, idir 4 agus 16 phointe céatadáin. Léiríonn sé sin difríochtaí sa chaoi a ndírítear ar thairbhí, a leordhóthanacht, agus a ndearadh foriomlán. I 10 mBallstát, faigheann na teaghlaigh is boichte a bhfuil leanaí acu níos lú i ndearbhthéarmaí ná teaghlaigh níos saibhre, go minic mar gheall ar struchtúir sochair chúlchéimnitheacha, nó neamhghlacadh, ar féidir leo suas le 30 % a bhaint amach ( 17 ). I measc na ndea-chleachtas tá dearadh níos comhtháite sochar, deonú uathoibríoch sochar chun bacainní riaracháin a laghdú, chomh maith le dearbháin thiomnaithe le haghaidh earraí agus seirbhísí sonracha, chun mí-úsáid a sheachaint agus chun a ráthú go dtabharfaidh tairbhí aghaidh go díreach ar riachtanais leanaí. Chun a dtionchar a fheabhsú, tacóidh an Coimisiún go gníomhach leis na Ballstáit chun a gcórais sochair leanaí a athchóiriú.

Glacfaidh an Coimisiún Moladh ón gCoimisiún maidir le Treoir chun feabhas a chur ar éifeachtúlacht na gcóras sochair a bhaineann le leanaí chun aghaidh a thabhairt ar bhochtaineacht leanaí, agus béim ar leith á leagan ar a leordhóthanacht, a gcumhdach, a n‑úsáid agus a nglacadh. Tabharfar aghaidh freisin ar bhealaí chun a áirithiú go n‑úsáidfear tairbhí go héifeachtúil chun freastal ar riachtanais na leanaí a bhfuil siad beartaithe dóibh chun an tionchar is mó is féidir a imirt ar a bhfolláine.

Tá níos mó i gceist le líontáin sábhála láidre ná tacaíocht ioncaim. Chun an bhochtaineacht a chosc go héifeachtach, tá gá freisin le cúnamh teaghlaigh níos leithne, lena n‑áirítear comhairleoireacht fiachais, tacaíocht idir piaraí agus seirbhísí comhairleacha airgeadais. Chun tionchar níos láidre a áirithiú, ba cheart do na Ballstáit príomhsheirbhísí comhlántacha a sholáthar, amhail tacaíocht tuismitheoireachta, lena gcuimsítear acmhainní, treoir agus cúnamh atá dírithe ar chabhrú le tuismitheoirí folláine agus forbairt a leanaí a chothú.

2.Tionchar na Ráthaíochta Eorpaí do Leanaí a neartú

Cumhdaítear leis an Ráthaíocht Eorpach do Leanaí na croísheirbhísí is gá do leanbh ar bith a bheith in ann fás, gan beann ar leochaileacht a theaghlaigh — lena n‑áirítear tithíocht, bia, oideachas, cúram. Mar sin féin, agus dúshláin nua ag teacht chun cinn, ní féidir leis an Ráthaíocht amháin, agus leis an gcruth atá uirthi faoi láthair, dul i ngleic le cúiseanna uile na bochtaineachta agus leis na himpleachtaí a bhaineann leo. Ar an gcéad dul síos, tá difríocht mhór idir na seirbhísí agus na bearta a áirítear faoin Ráthaíocht Eorpach do Leanaí ó thaobh raon feidhme agus cur chun feidhme de, agus tá sé níos éasca cuid acu a chur chun feidhme ná a chéile. Mar shampla, is beart sách simplí é rochtain ar bhéilí scoile sláintiúla agus cothaitheacha a áirithiú, rud a bhraitheann go minic ar chreat cur chun feidhme atá bunaithe ar sholáthar bia do scoileanna. Ar an taobh eile, chun rochtain ar oideachas agus ar chúram na luath-óige a áirithiú, go háirithe san aois is óige, tá gá le hathchóirithe i bhfad níos casta agus le hinfheistíochtaí níos mó do Bhallstáit áirithe.

Ar an dara dul síos, ní dócha go dtiocfaidh athrú buan ar staid na leanaí atá i ngátar mar thoradh ar idirghabhálacha aonuaire amháin, gan bearta beartais nasctha agus dea-chomhordaithe, agus gan cur chun feidhme inbhuanaithe a áirithiú in am. Tá creat beartais níos láidre agus níos comhtháite, inar féidir éabhlóid gach linbh atá i ngátar agus a thairbhíonn den Ráthaíocht a rianú, ríthábhachtach chun torthaí agus tionchar a fheabhsú. Ar an tríú dul síos, ó glacadh an Ráthaíocht in 2021, tá dúshláin nua tagtha chun cinn do leanaí, amhail brúnna meabhairshláinte nó riosca níos airde mí-úsáide agus nochtadh d’fhoréigean ar líne agus as líne, rud a léiríonn go bhfuil gá le creat neartaithe ar leibhéal an Aontais chun aghaidh a thabhairt ar na hábhair imní sin.

Ar deireadh, tá gá leis an nasc idir an Ráthaíocht Eorpach do Leanaí agus beartais níos leithne chun a áirithiú go n‑éireoidh le déagóirí agus le haosaigh óga, i gcás inar féidir, aistriú chuig an margadh saothair. Is é an sprioc atá ann iad a chumhachtú chun fostaíocht chobhsaí a áirithiú agus saol neamhspleách díniteach a thógáil. Tá sé ríthábhachtach aghaidh a thabhairt go héifeachtach ar an aistriú sin chun deireadh a chur le tarchur na bochtaineachta ó ghlúin go glúin. Éilíonn na dúshláin sin gníomhaíochtaí a théann thar raon feidhme na Ráthaíochta Eorpaí do Leanaí, a chomhordaítear go dlúth léi, chun cosaint agus tacaíocht leanbhlárnach a áirithiú, agus urraim chuí á tabhairt do chearta leanaí.

Rochtain ar sheirbhísí a mhéadú

Spreag an Ráthaíocht Eorpach do Leanaí athrú, arna slógadh ag na Ballstáit chun feabhas a chur ar rochtain do leanaí atá i ngátar ar phríomhsheirbhísí agus ar phríomhearraí. 

A mhéid a bhaineann le hoideachas agus cúram na luath-óige, tá bearna chlárúcháin 15 phointe céatadáin fós roimh leanaí faoi bhochtaineacht i gcomparáid lena bpiaraí. Chun an bhearna sin a dhúnadh, ceanglaítear ar na Ballstáit infheistíocht a dhéanamh in acmhainneacht oideachais agus cúraim luath-óige agus i gcáilíochtaí lucht saothair agus teagmháil a dhéanamh le teaghlaigh imeallaithe. Tacóidh an Coimisiún leis na hiarrachtaí sin trí ghlao Fís Eorpach ar réitigh nuálacha in oideachas agus cúram na luath-óige ( 18 ) agus cuirfidh sé na Treoirlínte maidir le curaclam agus forbairt oideolaíoch in oideachas agus cúram na luath-óige i láthair. 

Cé gur chuir méaduithe ar bhéilí scoile feabhas ar shlándáil an tsoláthair bia, níl rochtain laethúil fós ag os cionn milliún leanbh san Aontas ar thorthaí agus glasraí úra. Cuirfidh an Coimisiún soláthar béilí scoile chun cinn do leanaí atá i ngátar, ag obair i gcomhar leis an gComhghuaillíocht Béil Scoile  19 , trí fhoghlaim fhrithpháirteach agus cúnamh teicniúil. Déanfaidh sé Scéim Scoile an Aontais chun Torthaí, Glasraí agus Bainne a Sholáthar agus CSE+ a ghiaráil freisin chun tacaíocht cothaithe ardcháilíochta a leathnú, faoin gCreat Airgeadais Ilbhliantúil nua.

Chomh maith le rochtain ar bhéilí, bíonn rochtain ar ghníomhaíochtaí seach-churaclaim i gceist le forbairt shláintiúil freisin. Tá suas le 22,7 % de leanaí bochta eisiata fós ó ghníomhaíochtaí rialta seach-churaclaim (i gcomparáid le 2,9 % dá bpiaraí faoi bhuntáiste), go minic mar gheall ar chostais, bacainní iompair, nó steiréitíopaí cultúrtha. Chun aghaidh a thabhairt ar an tsaincheist sin, tá gá le hinfheistíochtaí agus comhpháirtíochtaí spriocdhírithe, arb é is aidhm don Choimisiún tacú leo le glao tiomnaithe CSE+ ar thionscadail ina n‑úsáidtear an cultúr agus an spórt mar uirlisí don chuimsiú sóisialta. Leis an nuashonrú ar an Moladh ón gComhairle maidir le gníomhaíocht choirp ar mhaithe le feabhsú sláinte, is féidir aghaidh a thabhairt freisin ar ról na gníomhaíochta coirp i mbeartais cuimsithe shóisialta.

Cé go bhfuil seirbhísí aonair a chumhdaítear leis an Ráthaíocht ag leathnú i gcónaí, tá gá le freagairt níos comhtháite chun aghaidh a thabhairt ar bhacainní a chuireann bac ar chomhionannas deiseanna do leanaí, go háirithe san oideachas. De réir na bhfigiúirí PISA is déanaí, ní éiríonn go maith le 28,8 % de leanaí ( 20 ) faoi mhíbhuntáiste sa léitheoireacht, sa mhatamaitic ná san eolaíocht, i gcomparáid le 4,7 % dá bpiaraí a bhfuil buntáiste níos mó ag baint leo — bearna atá leathnaithe ó phaindéim COVID. Tá sé cruthaithe go bhfuil tionchar dearfach ag uas-scálú na rochtana ar oideachas agus cúram luath-óige, béilí scoile agus gníomhaíochtaí seach-churaclaim ar fhorbairt chognaíoch, ar rannpháirtíocht scoile agus ar ghnóthachtáil acadúil. Chun an bhearna éachta a dhúnadh, áfach, tá gá le freagairt níos leithne a théann níos faide ná soláthar seirbhísí. Dá bhrí sin, ba cheart do na Ballstáit tacaíocht chuimsitheach oideachais a chur chun feidhme do leanaí atá i ngátar, lena n‑áirítear cúnamh oibre baile, teagasc spriocdhírithe agus cláir foghlama aonair, chun a áirithiú go bhfaighidh leanaí atá i mbochtaineacht cabhair atá oiriúnaithe i ndáiríre do riachtanais agus do chúinsí gach linbh.

Tá sé chomh práinneach céanna freagairt chomhtháite a thabhairt ar bhrúnna meabhairshláinte, rud a dhéanann difear díréireach do leanaí atá i mbochtaineacht. Ó bhí 2021 ann, tá laghdú 5 phointe céatadáin tagtha ar sciar na leanaí sa bhochtaineacht a thuairiscíonn ‘sláinte an‑mhaith’, agus tá an mheabhairshláinte ag dul in olcas níos tapúla i measc na ndaoine is soghontaí. Tá siomptóim an dúlagair agus an uaignis ag dul i méid. Cé go dtabharfaidh fiosrúchán uile-Aontais léargas ar thionchair na meán sóisialta agus amanna scáileáin iomarcacha ar na treochtaí sin, chun aghaidh a thabhairt orthu, tá gá cheana féin le gníomhaíocht ar go leor réimsí: cúram coisctheach, luath-idirghabháil agus comhar trasearnála. Ba cheart do na Ballstáit aghaidh a thabhairt freisin ar ghanntanais foirne speisialaithe meabhairshláinte agus ar chostais neamh-in‑aisíoctha do theaghlaigh atá i ngátar, agus for-rochtain a neartú trí chomhar níos dlúithe idir scoileanna, oibrithe sóisialta agus soláthraithe cúraim sláinte. Chun na hiarrachtaí sin a chothú, tacaíonn an Coimisiún le UNICEF chun Sraith Straitéisí a phíolótú le haghaidh sláinte leanaí agus déagóirí agus chun an fholláine mheabhrach a chur chun cinn, agus béim ar leith á leagan ar rochtain ar na leanaí is soghontaí. Cuideoidh an Coimisiún leis na Ballstáit agus leis na húdaráis áitiúla an tSraith Straitéisí a chur chun feidhme tríd an bhfoghlaim fhrithpháirteach agus trí cheardlanna tiomnaithe.

Cur chun feidhme a neartú chun tacaíocht dhea-spriocdhírithe a mbeidh tionchar aici a áirithiú go dtí an luath-aosacht

Chun a áirithiú go n‑eascróidh athrú marthanach as an Ráthaíocht Eorpach do Leanaí, ní mór a cur chun feidhme a fhorbairt ó sholáthar seirbhíse ilroinnte go córas comhtháite leanbhlárnach lena gcumhdaítear tacaíocht shaincheaptha maidir le gach leanbh atá i ngátar, ón luath-óige go dtí an t‑aistriú criticiúil go dtí an aosacht. Tá trí phríomhathrú ag teastáil chuige sin: ar an gcéad dul síos, tacaíocht agus meantóireacht aonair chun aghaidh a thabhairt ar na bacainní uathúla atá roimh gach leanbh; ar an dara dul síos, réitigh dhigiteacha nua chun gearradh trí shadhlanna maorlathacha agus chun a áirithiú gur féidir le leanaí tairbhe a bhaint go héasca as tacaíocht; agus ar an tríú dul síos, conairí leathnaithe isteach sa luath aosacht, rud a chuireann cosc ar dhaoine óga soghonta titim trí bhearnaí idir scéimeanna tacaíochta do leanaí agus don óige.

Tá tacaíocht chomhtháite phearsantaithe de dhíth ar leanaí atá i ngátar. Le hionchur ó leanaí a ndeachthas i gcomhairle leo faoi Ardán Rannpháirtíochta Leanaí an Aontais ( 21 ), cuireadh i dtábhacht an méid a dhéanann difríocht: duine fásta iontaofa a bheith ann - tuismitheoir, múinteoir, oibrí sóisialta, nó ceannaire pobail - ar féidir leis cobhsaíocht, tacaíocht mhothúchánach, spreagadh agus comhairle phraiticiúil a chur ar fáil, agus comharthaí anacra a bhrath. Tá sé sin ríthábhachtach go háirithe nuair a bhíonn cobhsaíocht den sórt sin in easnamh sa bhaile. Chun a áirithiú gur féidir le gach leanbh atá i ngátar bealach amach as an mbochtaineacht a thógáil, ba cheart cláir mheantóireachta agus idirghabhálacha comhairleoireachta a leathnú chun leanaí atá i ngátar a threorú trí thráthanna dúshlánacha ina saol.

Tacóidh an Coimisiún le cláir mheantóireachta do leanaí soghonta a leathnú trí naisc níos dlúithe idir scoileanna, oibrithe sóisialta agus gníomhaithe pobail áitiúla. Beidh sé sin ina dhlúthchuid de Chlár Oibre na Múinteoirí atá ar na bacáin freisin. Ina theannta sin, oibreoidh an Coimisiún i gcomhpháirt le Coiste Eorpach na Réigiún, trí bhíthin Plean Gníomhaíochta Comhpháirteach, chun a chur ar chumas na n‑údarás áitiúil, i measc nithe eile, a áirithiú go bhfaighidh gach leanbh atá i ngátar comhairleoireacht shaincheaptha den sórt sin.

Ní mór aird a thabhairt ar leanaí a bhfuil cineálacha trasnacha míbhuntáiste os a gcomhair. I gcás leanaí faoi mhíchumas, tá sé sin ag teacht leis an Teachtaireacht maidir leis an straitéis um chearta daoine faoi mhíchumas a fheabhsú suas go dtí 2030. Breithneofar gach catagóir leanaí atá i ngátar, lena n‑áirítear iad siúd atá faoi chúram malartach. Maidir le leanaí Romacha, a gcuireann an bhochtaineacht, an t‑idirdhealú agus an leithscaradh teorainn rómhinic lena rochtain éifeachtach ar sheirbhísí, ullmhóidh an Coimisiún, i gcomhar le páirtithe leasmhara, Treoir a bheidh dírithe ar bhearta comhtháite lena dtabharfar le chéile for-rochtain, idirghabháil, oideachas cuimsitheach, tacaíocht teaghlaigh agus idirghabhálacha pobalbhunaithe. Tá níos mó ná 700,000 leanbh i gcúram malartach san Aontas, agus tá beagnach 40 % de na leanaí sin, go háirithe faoi mhíchumas, fós i bhforais chónaithe. I gcás daoine óga a fhágann cúram malartach, leanaí gan dídean agus teaghlaigh a bhfuil leanaí acu i staideanna tithíochta forbhásacha, tacóidh an moladh ón gComhairle atá beartaithe maidir le heisiamh tithíochta a chomhrac le freagairtí coisctheacha agus comhtháite, lena n‑áirítear le linn an aistrithe chuig an aosacht.

Bíonn leanaí atá i ngátar agus a dtuismitheoirí ag streachailt go rómhinic chun nascleanúint a dhéanamh ar na córais atá deartha chun cabhrú leo. Léiríonn sé sin córais seachadta ilroinnte, agus freagrachtaí scaipthe ar fud údaráis éagsúla, leibhéil éagsúla rialtais agus soláthraithe seirbhíse, ag feidhmiú trí nósanna imeachta agus pointí rochtana ar leithligh. Sa chleachtas, is minic a bhíonn ar theaghlaigh córais iomadúla a nascleanúint chun a dteidlíochtaí a thuiscint, an t‑údarás inniúil a shainaithint agus rochtain ar an tacaíocht a ghníomhachtú ( 22 ).

Le claochlú digiteach na seirbhísí poiblí, cruthaítear deiseanna nua chun aghaidh a thabhairt ar na dúshláin sin. Leis an gCreat um Chéannacht Dhigiteach Eorpach, cuirtear uirlisí slána, idir-inoibritheacha agus caomhnaithe príobháideachais ar fáil chun cur chun feidhme beartais níos éifeachtúla a bhfuil tionchar níos mó aige a éascú. Is féidir leo sin faisnéis ábhartha a fhíorú agus a chomhroinnt, agus a áirithiú ag an am céanna go mbeidh roghanna malartacha neamhdhigiteacha inrochtana fós ar fáil i gcás inar gá. Ba cheart an digitiú a dhearadh bunaithe ar riachtanais leanaí agus teaghlach, le coimircí iomchuí do chearta leanaí, cosaint sonraí pearsanta, neamh-idirdhealú, inrochtaineacht agus stiogmatú agus eisiamh digiteach a chosc. Tá bearta déanta ag roinnt Ballstát cheana féin chun réitigh nuálacha a chur ar fáil maidir leis an ábhar sin.

Cuirfidh an Coimisiún clár píolótach ar aghaidh chun creat digiteach nua a thástáil agus a fhorbairt le haghaidh Cárta Eorpach um Ráthaíocht Leanaí. Beidh sé de chuspóir ag an gCárta rochtain ar sheirbhísí agus tacaíocht chomhleanúnach do leanaí atá i ngátar a éascú, agus dianchoimircí an Aontais maidir le cearta leanaí, cosaint sonraí pearsanta, neamh-idirdhealú agus caighdeáin inrochtaineachta á gcoinneáil ar bun ag an am céanna. Cuirfidh an treoirthionscadal leis an Tiachóg Eorpach Céannachta Digití, mar chéad chéim i dtreo uirlis phraiticiúil chun feabhas a chur ar sheachadadh agus ar chomhordú idir teidlíochtaí éagsúla ábhartha, chun rochtain agus úsáid seirbhísí tacaíochta ag leanaí atá i ngátar a éascú, chun infheictheacht a mhéadú agus chun trédhearcacht agus faireachán na n‑údarás inniúil a fheabhsú. Is céim thábhachtach é an treoirthionscadal chun timpeallacht dhigiteach na hEorpa atá fabhrach don nuálaíocht agus don simpliú a neartú, agus é mar aidhm leis cabhrú leis na húdaráis ábhartha, le soláthraithe seirbhíse agus le gairmithe tacaíochta áitiúla réitigh dhigiteacha den chineál sin a dhearadh agus a thástáil, lena n‑áiritheofar go sroichfidh an tacaíocht leanaí atá i ngátar ar bhealach tráthúil, inrochtana, cuimsitheach agus neamhstiogmataithe. Mar chuid den treoirthionscadal, na Ballstáit a dhéanfadh dearadh na gcóras sin a thástáil ( 23 ) bainfidh siad tairbhe as tacaíocht fheabhsaithe trí chúnamh teicniúil.

Ní féidir le tacaíocht chuimsitheach agus phearsantaithe, i gcás inar gá, stopadh le deireadh na hóige. Is minic a bhíonn rioscaí ardaithe ag baint le leanaí a fhásann aníos faoi bhochtaineacht ag tairseach na haosachta: luathfhágáil na scoile, teacht chun bheith ina NEETanna (daoine nach bhfuil i mbun oideachais, fostaíochta ná oiliúna) agus titim trí scoilteanna san oideachas, san fhostaíocht agus sna seirbhísí sóisialta ilroinnte. Treisítear rioscaí den sórt sin le forbairtí struchtúracha i margadh an tsaothair agus le héiginnteacht eacnamaíoch atá ag dul i méid, rud a fhágann go bhfuil sé fíor-riachtanach an bhearna idir córais tacaíochta leanaí agus córais tacaíochta don óige a dhúnadh. Le blianta beaga anuas, díríodh níos mó agus níos mó ar dhaoine óga soghonta leis an gcoireacht eagraithe agus leis an sceimhlitheoireacht, agus bhí beagnach aon trian d’amhrastaigh sceimhlitheoireachta san Aontas faoi bhun 20 bliain d’aois in 2024 ( 24 ).

Tá sé tábhachtach a áirithiú go bhfaighidh gach leanbh atá i ngátar na bearta tionlacain is gá chun aistriú chuig aosaigh chumhachtaithe, a bheidh in ann a mbeatha a thuilleamh agus saol cuibhiúil a chaitheamh. Chuige sin, ní mór iad siúd atá i mbaol a shainaithint níos luaithe, comhordú níos láidre idir seirbhísí, agus sásraí atreoraithe gan uaim ar fud na seirbhísí oideachais, fostaíochta agus cosanta sóisialta. Ar leibhéal an Aontais, rannchuidíonn cláir amhail Erasmus+ le tacaíocht a thabhairt do dhaoine óga soghonta trí rochtain ar eispéiris foghlama chuimsitheacha a éascú. Cuireann an Ráthaíocht don Aos Óg tacaíocht ar fáil do NEETanna a bhfuil rochtain acu ar bhreisoideachas nó ar mhargadh an tsaothair.

Bainfear leas as sineirgí níos láidre idir an Ráthaíocht Eorpach do Leanaí agus an Ráthaíocht don Aos Óg chun leanúnachas níos fearr tacaíochta a áirithiú do leanaí atá i ngátar, ón óige go dtí an luath-aosacht, go dtí go socrófar iad i saol neamhspleách. Cé go ndíríonn an Ráthaíocht Eorpach do Leanaí ar rochtain ar phríomhsheirbhísí a áirithiú do leanaí atá i ngátar suas go dtí 18 mbliana d’aois, is é is aidhm don Ráthaíocht don Aos Óg tacú le daoine óga idir 15 agus 29 mbliana d’aois, lena n‑áirítear NEETanna, le tairiscint mhaith fostaíochta, oideachais, tréimhse oiliúna nó printíseachta laistigh de thréimhse ceithre mhí tar éis dóibh a bheith dífhostaithe nó an t‑oideachas a fhágáil. Mar sin féin, tá raon feidhme na n‑ionstraimí sin fós míchothrom: tá bearnaí cumhdaigh fós ann, go háirithe i gcás daoine óga a bhfuil míbhuntáistí iomadúla ag bagairt orthu, agus leanann ilroinnt riaracháin idir seirbhísí náisiúnta agus ar fud na leibhéal rialachais de theorainn a chur lena n‑éifeachtacht.

Forbróidh an Coimisiún Sraith Straitéisí chun cabhrú leis na Ballstáit na naisc idir an Ráthaíocht Eorpach do Leanaí agus an Ráthaíocht don Aos Óg a neartú, d’fhonn tacaíocht aonair leanúnach a áirithiú ón óige go dtí an luath-aosacht. Leagfar amach ann bealaí praiticiúla do na Ballstáit chun úsáid a bhaint as cistiú, meantóireacht, for-rochtain agus bearta tacaíochta eile ón Aontas, agus chun conairí comhtháite a fhorbairt do leanaí agus do dhaoine óga atá i ngátar. Ba cheart do na conairí sin tacú lena n‑aistriú chuig oideachas, oiliúint nó fostaíocht, agus an baol díscoir agus titim i staid NEET á laghdú ag an am céanna.

Ina theannta sin, chun an cur chuige sin a thaispeáint, cuideoidh an Coimisiún a thuilleadh leis na Ballstáit aghaidh a thabhairt ar na míbhuntáistí a bhíonn ag Romaigh óga agus iad ag dul isteach sa mhargadh saothair laistigh de ghlao tiomnaithe CSE+ ar thionscadail.

Leanaí soghonta a chosaint ar bhagairtí méadaithe ar an tsábháilteacht

Tá sábháilteacht leanaí, ar líne agus as líne araon, faoi bhagairt mhéadaitheach, rud a dhéanann difear díréireach do leanaí soghonta. Cé go dtéann aghaidh chuimsitheach a thabhairt ar bhagairt den sórt sin thar raon feidhme an Mholta aonair ón gComhairle maidir leis an Ráthaíocht Eorpach do Leanaí, ní mór a chur chun feidhme a ailíniú go dlúth leis na tionscnaimh uaillmhianacha atá á gcur chun cinn ag an gCoimisiún chun gach leanbh atá i ngátar a chosaint. Is gá aghaidh a thabhairt ar na bagairtí sin.

Tá ról níos lárnaí ag an saol digiteach i saol leanaí. Múnlaíonn sé a gcuid foghlama, idirghníomhaíochtaí agus deiseanna amach anseo. Mar sin féin, tá leanaí ó chúlraí faoi mhíbhuntáiste níos neamhchosanta ar dheighilt dhigiteach ( 25 ): is lú seans go mbeidh na scileanna, na hacmhainní nó an tacaíocht is gá acu chun nascleanúint a dhéanamh go sábháilte ar thimpeallachtaí ar líne agus chun tairbhe a bhaint as a ndeiseanna. Tá siad neamhchosanta go díréireach freisin ar rioscaí ar líne, lena n‑áirítear cibearbhulaíocht, ábhar díobhálach agus cleachtais dhigiteacha ionramhálacha, radacú agus mí-úsáid ghnéasach leanaí.

Tá an Coimisiún ag freagairt cheana féin le bosca uirlisí cuimsitheach maidir le sábháilteacht leanaí. Ag a chroílár tá an Gníomh um Sheirbhísí Digiteacha agus a threoirlínte maidir le cosaint mionaoiseach lena gceanglaítear ar gach ardán a bhfuil rochtain ag mionaoisigh orthu ardleibhéal príobháideachais, sábháilteachta agus slándála a áirithiú dóibh. Le cur chun feidhme agus forfheidhmiú an Ghnímh um Sheirbhísí Digiteacha, tugtar deis thábhachtach feabhas a chur ar shábháilteacht leanaí ar ardáin ar líne, lena n‑áirítear feabhas trí bhearta níos láidre chun mionaoisigh a chosaint, bearta measúnaithe riosca agus maolaithe riosca agus bearta chun trédhearcacht agus oibleagáidí eile a chomhlíonadh. Ina theannta sin, tá tograí curtha ar aghaidh ag an gCoimisiún chun creat an dlí choiriúil maidir le mí-úsáid ghnéasach leanaí a neartú agus chun freagrachtaí soláthraithe seirbhíse ar líne a shoiléiriú.

Comhlánaítear an creat sin leis an bPlean Gníomhaíochta in aghaidh na Cibearbhulaíochta, lena ndírítear ar leanaí agus ar dhaoine óga, lena n‑áirítear leanaí soghonta. Cé go bhfuil tús curtha ag roinnt Ballstát le cláir a chur i bhfeidhm faoin Ráthaíocht Eorpach do Leanaí chun litearthacht dhigiteach agus rochtain ar uirlisí digiteacha a fheabhsú do leanaí atá i ngátar, tá na hiarrachtaí sin fós míchothrom agus ní leor iad chun an t‑athrú sistéamach is gá a bhaint amach. Chun freagairt láidir a thabhairt, cuirfidh an Coimisiún tograí uaillmhianacha dlí ar aghaidh.

Leis an nGníomh um Chothroime Dhigiteach atá ar na bacáin, rannchuideofar le cosaint ar líne leanaí, ós rud é go bhfuil sé beartaithe leis aghaidh a thabhairt, ó thaobh chosaint an tomhaltóra de, ar chleachtais tráchtála éagóracha, lena n‑áirítear patrúin dhorcha, margaíocht éagórach tionchairí, agus gnéithe deartha andúile a spreagann am iomarcach scáileáin agus caiteachas iomarcach.

Leis an athbhreithniú a dhéanfar go luath ar Threoir Sheirbhísí na Meán Closamhairc, cuirfear cosaintí feabhsaithe ar fáil freisin do lucht féachana níos óige, agus rochtain á fáil acu ar ábhar closamhairc ar líne, in éineacht leis an straitéis maidir le hIdirlíon Níos Fearr do Leanaí, arb é is aidhm di timpeallacht dhigiteach níos sábháilte, oiriúnach ó thaobh aoise de agus cumhachtaithe a áirithiú do leanaí ar fud an Aontais Eorpaigh. Bunaithe ar an moladh ón bpainéal speisialta maidir le sábháilteacht leanaí ar líneagus srianta aoise ar na meáin shóisialta san Eoraip ( 26 ), d’fhéadfadh tionscnaimh bhreise teacht ina dhiaidh sin chun a áirithiú go leanfaidh an Eoraip de bheith chun tosaigh maidir le leanaí a chosaint agus a chumhachtú ar líne.

Ní mór leanaí soghonta a chosaint freisin sa domhan as líne, áit a bhfuil siad neamhchosanta ar rioscaí níos mó mar gheall ar an mbochtaineacht agus ar an eisiamh sóisialta. Tá ról coisctheach lárnach ag an Ráthaíocht Eorpach do Leanaí agus ag a cur chun feidhme neartaithe trína áirithiú gur féidir le leanaí atá i ngátar rochtain a fháil ar phríomhsheirbhísí tacaíochta, amhail bearta cuimsithe shóisialta, cúnamh oideachais, agus gníomhaíochtaí iarscoile, agus ar an gcaoi sin a leochaileacht agus a nochtadh féideartha don choireacht a laghdú. Sa chomhthéacs sin, leis an bPlean Gníomhaíochta atá ar na bacáin maidir le leanaí a chosaint ar an gcoireacht, treiseofar cuir chuige choisctheacha lena dtabharfar aghaidh ar bhunchúiseanna leochaileacht leanaí i leith na coireachta, mar íospartaigh agus mar dhéantóirí coire araon, ar líne agus as líne. Ina theannta sin, forbrófar sraith straitéisí tiomnaithe chun radacú a chosc, ag díriú ar luathbhrath, ar thosca cosantacha a neartú, ar athléimneacht tríd an oideachas agus tríd an lánpháirtiú sóisialta ( 27 ).

3.Cistiú agus rialachas a threisiú

Chun deireadh a chur le timthriall na bochtaineachta leanaí, tá gá le roghanna straitéiseacha níos misniúla agus gníomhaíocht chomhordaithe ar gach leibhéal. Tá gá le hiarrachtaí comhpháirteacha ar an leibhéal Eorpach, ar an leibhéal náisiúnta, ar an leibhéal réigiúnach agus ar an leibhéal áitiúil, chun beartais éifeachtacha a cheapadh, chun acmhainní airgeadais a infheistiú go héifeachtúil agus chun rannpháirtíocht na bpáirtithe leasmhara ábhartha a fheabhsú, lena n‑áirítear gníomhaithe príobháideacha agus leanaí iad féin.

Cistiú leordhóthanach le haghaidh tionchair

Tá gá le cistiú níos láidre agus níos inbhuanaithe chun tionchar marthanach a imirt ar bhochtaineacht leanaí agus chun deireadh a chur le timthriall na bochtaineachta. Tá infheistíochtaí ríthábhachtacha slógtha cheana féin, ach ní thacaíonn cuid acu ach le tionscadail ghearrthéarmacha agus níl siad dírithe go leordhóthanach ar na daoine is mó atá i ngátar. Tá bearnaí fós sa mhaoiniúchán. Tá sé ríthábhachtach na bearnaí sin a dhúnadh, trí bhuiséid náisiúnta agus réigiúnacha/áitiúla, cistiú ón Aontas agus gach acmhainn eile atá ar fáil a ghiaráil.

Ó glacadh an Ráthaíocht, bhí ról lárnach ag cistiú ón Aontas ina cur chun feidhme. Faoi Chreat Airgeadais Ilbhliantúil 2021-2027 atá ann faoi láthair, tá EUR 9.6 billiún ar a laghad ó Chiste Sóisialta na hEorpa Plus curtha i leataobh chun dul i ngleic le bochtaineacht leanaí. Faoi dheireadh 2024, chuir an tSaoráid Téarnaimh agus Athléimneachta ar chumas na mBallstát infheistíocht san oideachas agus i gcúram leanaí a mhéadú, rud a chuaigh chun tairbhe do 2,7 milliún dalta agus mac léinn ( 28 ). Chuidigh Ciste Forbraíochta Réigiúnaí na hEorpa le haghaidh a thabhairt ar ghanntanais bonneagair chriticiúil, amhail cúram leanaí agus saoráidí scoile, ceaintíní scoile, agus tithíocht, atá fíor-riachtanach chun cuspóirí na Ráthaíochta a bhaint amach. Tá deiseanna soghluaisteachta do leanaí faoi mhíbhuntáiste curtha chun cinn ag Erasmus+, agus cuimsiú á chothú ag an am céanna tríd an spórt agus tríd an gcultúr. Ina theannta sin, chuidigh tacaíocht ón Ionstraim um Thacaíocht Theicniúil ( 29 ) le hathchóirithe deartha i 13 thír. Mar shampla, chuir tionscadal ilnáisiúnta feabhas ar chumas na n‑údarás sa Phortaingéil, san Iodáil agus sa Spáinn beartais chuimsitheacha oideachais a chur chun feidhme agus béim á leagan ar éagothromaíochtaí réigiúnacha a laghdú. Ar bhonn níos leithne, chuir cistiú ón Aontas ar chumas na mBallstát agus na n‑údarás áitiúil cineálacha cur chuige nuálacha a thástáil, tacú le tionscnaimh phíolótacha, agus bearta rathúla a leathnú a théann chun tairbhe do leanaí atá i ngátar. Spreagfaidh an Coimisiún freisin leas iomlán a bhaint as infheistíochtaí atá clársceidealaithe faoin tSaoráid Téarnaimh agus Athléimneachta.

Ag féachaint chun cinn, tá an Coimisiún tiomanta a chinntiú go leanfaidh cistiú ón Aontas de thacaíocht a thabhairt don Ráthaíocht. Ina thogra le haghaidh Chreat Airgeadais Ilbhliantúil 2028-2034, iarrtar ar na Ballstáit díriú ar cheithre phríomhchuspóir shóisialta ina bPleananna Comhpháirtíochta Náisiúnta agus Réigiúnaí ( 30 ). Ceann díobh sin is ea aghaidh a thabhairt ar bhochtaineacht leanaí agus an Ráthaíocht Eorpach do Leanaí a chur chun feidhme, ar cheart tacú léi le gníomhaíochtaí spriocdhírithe agus le hathchóirithe struchtúracha, go háirithe sna Ballstáit ina bhfuil rátaí arda bochtaineachta leanaí. Tugann sé sin deis leanúnach infheistíochta do na húdaráis náisiúnta agus réigiúnacha chun a n‑iarrachtaí a threisiú.

Chun an próiseas sin a threorú, cuirfidh an Coimisiún coimre dea-chleachtas i láthair chun tacú le húdaráis náisiúnta, réigiúnacha agus áitiúla athchóirithe agus infheistíochtaí a mhéadú. Ina theannta sin, déanfaidh an Coimisiún an Seimeastar Eorpach a ghiaráil chun bearnaí a shainaithint agus, i gcás inarb iomchuí, moltaí a chur ar aghaidh chun an comhrac i gcoinne bochtaineacht leanaí a leabú ar bhealach níos fearr i gcomhordú bheartais eacnamaíocha agus shóisialta na mBallstát.

Déanfar cineálacha eile infheistíochtaí a shlógadh freisin. Faoi Straitéis AE i gcoinne na Bochtaineachta, tá dlús á chur ag an gCoimisiún leis an gcomhar le hinstitiúidí idirnáisiúnta airgeadais amhail an Banc Eorpach Infheistíochta agus Banc Forbartha Chomhairle na hEorpa. Leanfaidh an Coimisiún de bheith i dteagmháil le Grúpa BEI maidir le tacú le hinfheistíochtaí lena léirítear raon feidhme Straitéis AE i gcoinne na Bochtaineachta chomh maith leis an Ráthaíocht Eorpach do Leanaí. Ag tógáil ar a phunann reatha, is féidir le Banc Forbartha Chomhairle na hEorpa thart ar EUR 1 bhilliún de chistiú in aghaidh na bliana a shlógadh chun tacú le cur chun feidhme na Ráthaíochta, laistigh dá imchlúdach foriomlán infheistíochta sóisialta dar luach EUR 4 bhilliún. Le creat comhair le Banc Forbartha Chomhairle na hEorpa atá ar na bacáin maidir le dul i ngleic leis an mbochtaineacht agus leis an eisiamh sóisialta, cuirfear béim láidir ar leanaí atá i staideanna soghonta, go háirithe trí infheistíochtaí san oideachas agus i réitigh tithíochta. Chun tuilleadh tacaíochta a thabhairt don Ráthaíocht Eorpach do Leanaí agus don Ráthaíocht don Aos Óg, rachaidh an Coimisiún i dteagmháil leis an earnáil phríobháideach tríd an gComhghuaillíocht i gcoinne na bochtaineachta, lena dtabharfar le chéile gnólachtaí atá freagrach go sóisialta agus eagraíochtaí daonchairdiúla.

Creataí rialachais náisiúnta neartaithe

Tá creat láidir rialachais bunaithe cheana féin ag an Ráthaíocht Eorpach do Leanaí, le pleananna gníomhaíochta náisiúnta agus comhordaitheoirí náisiúnta i ngach Ballstát. Breisluach tábhachtach a bhaineann leis na pleananna sin is ea an Ráthaíocht a aistriú ina gníomhaíochtaí nithiúla do leanaí atá i ngátar. Mar sin féin, i bhfianaise mhinicíocht ard na bochtaineachta leanaí atá fós ann agus na mbagairtí méadaitheacha ar fholláine leanaí, ba cheart do na Ballstáit athbhreithniú a dhéanamh ar a bpleananna agus dlús a chur lena n‑uaillmhian leanaí a chosaint ar an mbochtaineacht, agus iad a chosaint ar rioscaí sábháilteachta ar bhealach níos fearr, i gcomhréir leis an Teachtaireacht seo. Ag tógáil ar na prionsabail le haghaidh beartais éifeachtacha i gcoinne na bochtaineachta a chuirtear i láthair in éineacht le Straitéis AE i gcoinne na Bochtaineachta ( 31 ), ba cheart spriocanna soiléire faoi cheangal ama agus cistiú tiomnaithe a áireamh sna pleananna athbhreithnithe, agus béim níos láidre á leagan ar gach catagóir leanaí atá i ngátar, chomh maith le for-rochtain a threisiú agus glacadh seirbhísí a fheabhsú.

Chomh maith leis an Ráthaíocht a chur chun feidhme, ba cheart ról lárnach a bheith ag comhordaitheoirí náisiúnta na Ráthaíochta do Leanaí maidir le haghaidh a thabhairt ar na dúshláin níos leithne a bhaineann le bochtaineacht leanaí agus sábháilteacht leanaí ar bhealach comhtháite. Chuige sin, tá gá le comhar níos dlúithe idir aireachtaí agus gníomhaireachtaí rialtais, chomh maith le comhoibriú feabhsaithe le comhordaitheoirí na Ráthaíochta don Aos Óg agus le comhordaitheoirí i gcoinne na Bochtaineachta ( 32 ). Tá bearta déanta ag roinnt Ballstát sa treo sin, mar shampla trí chomhordaitheoir náisiúnta um an Ráthaíocht do Leanaí a bhunú laistigh d’oifig an Phríomh-Aire nó trí struchtúir idir-aireachta a chruthú. Chun tuilleadh tacaíochta a thabhairt do na hiarrachtaí sin, seolfaidh an Coimisiún glao CSE+ ar thionscadail lena neartófar creataí rialachais náisiúnta agus freagairtí comhtháite beartais.

Is minic a bhíonn na réigiúin agus na bardais freagrach go díreach as seirbhísí a sholáthar ar an láthair, agus tá ról ríthábhachtach ag an tsochaí shibhialta agus ag gníomhaithe an gheilleagair shóisialta maidir le teagmháil a dhéanamh le leanaí soghonta agus bearnaí sa soláthar sochar a líonadh. Tá a rannpháirtíocht cothaithe cheana féin ag roinnt Ballstát, mar shampla, trí aonaid áitiúla Ráthaíochta do Leanaí a bhunú ar an leibhéal an bhardais. Ba cheart do na Ballstáit dlús a chur le rannpháirtíocht na n‑údarás áitiúil agus eagraíochtaí na sochaí sibhialta ar leibhéal an phobail trí struchtúir áitiúla thiomnaithe, agus leas iomlán á bhaint as an tacaíocht atá ar fáil ón Aontas ( 33 ). Tabharfaidh an Coimisiún agus Coiste Eorpach na Réigiún Plean Gníomhaíochta Comhpháirteach i gcrích in 2026 agus oibreoidh siad i gcomhar chun ‘Gradam an Aontais don Chuimsiú Sóisialta’ a sheoladh do chathracha agus do bhardais. Díreoidh an chéad eagrán den ghradam ar leanaí agus daoine óga ó cheantair faoi mhíbhuntáiste a chumhachtú. Thairis sin, faoi dheireadh 2026, tabharfaidh an Coimisiún agus Coiste Eacnamaíoch agus Sóisialta na hEorpa comhaontú comhair i gcrích, lena gcuirfear leis an gcreat atá ann cheana le haghaidh tacaíocht chomhairleach ó shaineolaithe, agus lena gcomhroinnfear dea-chleachtais chun aghaidh a thabhairt ar an mbochtaineacht, lena n‑áirítear bochtaineacht leanaí. 

Tá sé tábhachtach freisin rannpháirtíocht na leanaí féin a neartú ionas go n‑éistfear lena nguth. Bhí baint ag formhór na mBallstát le leanaí i gcur chun feidhme na Ráthaíochta agus ba cheart dóibh an t‑idirphlé le leanaí agus le haosaigh óga a threisiú a thuilleadh, i gcomhréir le Conclúidí 2026 ón gComhairle maidir le hInfheistíocht a dhéanamh i leanaí. Ar leibhéal an Aontais, reáchtáil an Coimisiún comhairliúchán le 41,700 leanbh faoi Ardán Rannpháirtíochta Leanaí an Aontais chun bonn eolais a chur faoi ullmhú na Teachtaireachta seo agus déanfaidh sé idirphlé le leanaí a leabú a thuilleadh maidir leis an Ráthaíocht agus maidir leis an gcomhrac i gcoinne bhochtaineacht na leanaí i ngníomhaíochtaí an Ardáin sin. 

Ar leibhéal an Aontais, neartóidh an Coimisiún a chomhpháirtíochtaí le hinstitiúidí agus páirtithe leasmhara eile de chuid an Aontais freisin. Comhoibreoidh sé go gníomhach le Parlaimint na hEorpa (go háirithe lena Meitheal um an Ráthaíocht Eorpach do Leanaí agus leis an Idirghrúpa um an mBochtaineacht a Chomhrac, a chuireann fóram polaitiúil a bhfuil tionchar aige ar fáil chun aghaidh a thabhairt ar bhochtaineacht leanaí). Ba cheart don Choiste um Chosaint Shóisialta a áirithiú go léireofar tuilleadh an comhrac i gcoinne na bochtaineachta leanaí agus an eisiaimh leanaí ar fud bheartais na mBallstát. Neartóidh an Coimisiún a thuilleadh freisin an comhar le heagraíochtaí idirnáisiúnta (amhail UNICEF, a rannchuidigh go gníomhach le leathadh amach na Ráthaíochta san Aontas agus níos faide i gcéin) agus leanfaidh sé de pháirt a thabhairt d’eagraíochtaí na sochaí sibhialta i seachadadh na Ráthaíochta neartaithe.

Tá córais láidre faireacháin fíor-riachtanach chun dul chun cinn a rianú, bearnaí a shainaithint agus beartais a choigeartú dá réir. Ar leibhéal an Aontais, tá creat coiteann bunaithe ag an gCoiste um Chosaint Shóisialta ( 34 ) chun cur chun feidhme na Ráthaíochta Eorpaí do Leanaí a rianú, agus gealltanas tugtha aige aghaidh a thabhairt go leanúnach ar dhúshláin atá ag teacht chun cinn agus feabhas a chur ar thomhas na dtorthaí. Ba cheart é a athbhreithniú agus a thabhairt cothrom le dáta go rialta. Ba cheart faireachán ar leibhéal an Aontais a chomhlánú le rianú cuimsitheach ar an leibhéal náisiúnta, réigiúnach agus áitiúil. Ba cheart do na Ballstáit a gcreataí faireacháin a neartú agus athbhreithniú á dhéanamh acu ar a bpleananna gníomhaíochta náisiúnta, rud a chuirfidh bonn ar fáil d’obair chomhpháirteach bhreise laistigh den Choiste um Chosaint Shóisialta.

An Ráthaíocht do Leanaí lasmuigh den Aontas Eorpach

Tá an Ráthaíocht Eorpach do Leanaí á cur i bhfeidhm sna tíortha is iarrthóirí agus sna tíortha is iarrthóirí ionchasacha, agus tá pointí teagmhála náisiúnta ainmnithe ag gach ceann acu agus tá a bpleananna gníomhaíochta náisiúnta á n‑ullmhú acu. Tacaíonn an Coimisiún leis na hiarrachtaí sin trí chistiú a chuirtear ar fáil do UNICEF chun cabhrú le forbairt agus cur chun feidhme na bpleananna sin. Tacaíonn buiséad an Aontais freisin le tionscadail shonracha, amhail an t‑athchóiriú ‘Cúram níos fearr’ a chur i bhfeidhm san Úcráin, arb é is aidhm dó feabhas a chur ar chaighdeáin na cosanta leanaí agus na gcóras cúraim mhalartaigh. Chomh maith le cistiú, cuirfidh an Coimisiún dlús leis an gcomhar le comhordaitheoirí náisiúnta na Ráthaíochta do Leanaí chun an fhoghlaim fhrithpháirteach a neartú a thuilleadh agus chun comhar níos dlúithe a chothú, agus leathnóidh sé an rannpháirtíocht sin chuig tíortha is iarrthóirí agus chuig iarrthóirí ionchasacha freisin. Cuireadh an Ráthaíocht i láthair ar fud an domhain freisin mar uirlis a bhfuil gealladh fúithi chun deireadh a chur le timthriall an mhíbhuntáiste agus chun comhdheiseanna a chur chun cinn do leanaí faoi mhíbhuntáiste.

Conclúid

Ní mór an gealltanas a thabhairt go mbeidh Eoraip níos cothroime agus níos cuimsithí ann ina bhfásfaidh gach leanbh saor ó shrianta na bochtaineachta. Trí ghníomhú anois le diongbháilteacht agus le dlúthpháirtíocht, is féidir linn dlús a chur leis an dul chun cinn i dtreo sprioc 2030 5 mhilliún leanbh ar a laghad a thabhairt slán as an mbochtaineacht agus cuidiú leis an mbochtaineacht a dhíothú faoi 2050.

Tá an Coimisiún tiomanta go daingean do na cuspóirí sin agus do dheireadh a chur le timthriall an mhíbhuntáiste. Is riachtanas morálta é sin agus is infheistíocht é i dtodhchaí na hEorpa. Agus beagnach leanbh amháin as gach ceathrar i mbaol bochtaineachta nó eisiaimh shóisialta, tá géarghá le gníomhaíocht mhisniúil chomhchoiteann chun teaghlaigh shoghonta a chosaint, chun an Ráthaíocht Eorpach do Leanaí a neartú agus chun a áirithiú go mbeidh rath ar gach leanbh i dtimpeallacht shábháilte.

Tá ról le himirt ag institiúidí uile an Aontais, ag na Ballstáit, ag údaráis áitiúla, ag an tsochaí shibhialta agus ag comhpháirtithe príobháideacha agus ba cheart dóibh dul i gcomhar le chéile, réitigh chruthaithe a mhéadú, bearnaí cur chun feidhme a dhúnadh agus cistiú marthanach a shlógadh chun deireadh a chur le timthriall an mhíbhuntáiste.

Iarscríbhinn: Liosta na dtionscnamh nua a áirítear sa Teachtaireacht seo maidir le deireadh a chur le timthriall na bochtaineachta leanaí - an Ráthaíocht Eorpach do Leanaí a neartú

(1) () In 2025, bhí 19,3 milliún leanbh i mbaol bochtaineachta nó eisiaimh shóisialta, is é sin 24,3 % de leanaí. Ó bhí 2019 ann, d’fhan líon na leanaí a raibh baol den sórt sin rompu cobhsaí den chuid is mó . I bPlean Gníomhaíochta Cholún Eorpach na gCeart Sóisialta , leagadh síos an sprioc laghdú 15 mhilliún ar a laghad a dhéanamh ar líon na ndaoine atá i mbaol bochtaineachta nó eisiaimh shóisialta.

(2) () Tarchur míbhuntáistí ó ghlúin go glúin - staitisticí .

(3) () Mar shampla, tá éileamh gan fasach ar bhainc bhia ar fud an Aontais, a breathnaíodh orthu mar fhreagróirí éigeandála tráth, agus tá siad ina bhfoinsí rialta tacaíochta do líon méadaitheach teaghlach atá ag obair. Tuairiscíonn siad borradh faoi úsáideoirí nua, lena n‑áirítear daoine nach raibh cabhair ag teastáil uathu riamh roimhe seo agus aosaigh óga.

(4) () Na costais eacnamaíocha a bhaineann le míbhuntáiste socheacnamaíoch leanaí i dtíortha Eorpacha ECFE | ECFE .

(5) () Doiciméad Inmheánach Oibre a ghabhann leis an Teachtaireacht seo - Doiciméad Inmheánach Oibre (2026) 772.

(6) () Is é is cuspóir don Ráthaíocht Eorpach do Leanaí eisiamh sóisialta a chosc agus a chomhrac trí rochtain éifeachtach a ráthú do leanaí atá i ngátar ar shraith príomhsheirbhísí: oideachas agus cúram luath-óige saor in aisce; oideachas saor in aisce (lena n‑áirítear gníomhaíochtaí scoilbhunaithe agus béile sláintiúil amháin ar a laghad gach lá scoile); cúram sláinte saor in aisce; cothú sláintiúil; tithíocht leormhaith.

(7) () Doiciméad Inmheánach Oibre a ghabhann leis an Teachtaireacht seo - Doiciméad Inmheánach Oibre (2026) 772.

(8) () Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún maidir le Straitéis AE i gcoinne na Bochtaineachta — COM (2026) 538.

(9) () Togra le haghaidh Moladh ón gComhairle maidir le heisiamh tithíochta a chomhrac - COM(2026) 540.

(10) () Spriocanna náisiúnta 2030 an Aontais .

(11) () Stóras Foilseachán JRC - IBBES a laghdú san Aontas: ioncam íosta, pá íosta agus borradh fostaíochta a chomhcheangal .

(12) () Treoir (AE) 2019/1158 ó Pharlaimint na hEorpa agus ón gComhairle an 20 Meitheamh 2019 maidir le cothromaíocht oibre agus saoil do thuismitheoirí agus do chúramóirí .

(13) () Fostaíocht agus forbairtí sóisialta san Eoraip 2025 — Oifig Foilseachán an Aontais Eorpaigh .

(14) () Stóras Foilseachán an Airmheáin Chomhpháirtigh Taighde - An tionchar atá ag beartais mhalartacha cúraim leanaí ar fhostaíocht máithreacha i dtíortha roghnaithe san Aontas .

(15) () Is é is aidhm don sprioc a bhunaítear sa Limistéar Eorpach Oideachais 96 % ar a laghad de leanaí idir 3 bliana d’aois agus aois éigeantach na bunscoile a bheith rannpháirteach in oideachas agus cúram na luath-óige faoi 2030. Luadh freisin i Moladh 2022 ón gComhairle maidir le spriocanna athbhreithnithe Barcelona do 2030 gur cheart do 45 % ar a laghad de leanaí faoi bhun trí bliana d’aois freastal ar oideachas agus cúram na luath-óige faoi 2030 (le maoluithe do Bhallstáit a bhfuil rátaí rannpháirtíochta an‑íseal acu) agus nár cheart aon bhearna rannpháirtíochta a bheith in oideachas agus cúram na luath-óige idir leanaí atá i mbaol bochtaineachta nó eisiaimh shóisialta agus an daonra foriomlán leanaí.

(16)

()An Danmhairg, an Eastóin, an Fhionlainn, an Ghearmáin, an tSlóivéin agus an tSualainn de réir an Choimisiúin Eorpaigh: An Ghníomhaireacht Feidhmiúcháin Eorpach um Oideachas agus Cultúr, Motiejūnaitė-Schulmeister, A., De Coster, I. agus Noorani, S., Key data on early childhood education and care in Europe 2025 — Eurydice report, Birch, P.(eagarthóir), Oifig Foilseachán an Aontais Eorpaigh, 2025.

(17) () Doiciméad Inmheánach Oibre a ghabhann leis an Teachtaireacht seo - Doiciméad Inmheánach Oibre (2026) 772.

(18) () Glao ón gclár Fís ‘Dul i ngleic le bochtaineacht leanaí agus rochtain leanaí faoi mhíbhuntáiste ar Oideachas agus Cúram na Luath-Óige a áirithiú ’.

(19) () https://schoolmealscoalition.org/ .

(20) () Creat faireacháin GCL .

(21) () Guthanna na Leanaí ar an mBochtaineacht agus ar an gCuimsiú Sóisialta .

(22) () De réir roinnt meastachán, ní ghlacann suas le haon trian de theaghlaigh agus de leanaí (agus níos mó fós i gcásanna eile) le tacaíocht riachtanach amhail cúram leanaí, cúnamh oideachais, seirbhísí cúraim sláinte agus tacaíocht ioncaim a bhfuil siad ina dteideal. SWD a ghabhann leis (2026) 772.

(23) () Déanfaidh na Ballstáit an cárta a thástáil ar bhonn deonach.

(24) () Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún - Straitéis Eorpach um an tSlándáil Inmheánach: Clár oibre chun an sceimhlitheoireacht a chosc agus a chomhrac -COM/2026/101 final .

(25) () Conas is féidir an Saol do Leanaí sa Ré Dhigiteach a bhaint amach? | ECFE .

(26) () Painéal speisialta maidir le sábháilteacht leanaí ar líne .

(27) () Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún - Straitéis Eorpach um an tSlándáil Inmheánach: Clár oibre chun an sceimhlitheoireacht a chosc agus a chomhrac -COM/2026/101 final .

(28) () Tuarascálacha ar Thorthaí Feidhmíochta CAI - Táblaí Sonraí Feidhmíochta .

(29) () Ionstraim um Thacaíocht Theicniúil .

(30) () Togra le haghaidh Rialachán ó Pharlaimint na hEorpa agus ón gComhairle lena mbunaítear an Ciste Eorpach um chomhtháthú eacnamaíoch, sóisialta agus críochach, um thalmhaíocht agus ceantair thuaithe, um iascach agus gnóthaí muirí, um rathúnas agus um shlándáil le haghaidh na tréimhse 2028-2034 agus lena leasaítear Rialachán (AE) 2023/955 agus Rialachán (AE, Euratom) 2024/2509 - COM/2025/565.

(31) () Doiciméad Inmheánach Oibre de chuid an Choimisiúin maidir le Prionsabail le haghaidh beartais éifeachtacha i gcoinne na bochtaineachta – Tacú le húdaráis náisiúnta, réigiúnacha agus áitiúla ina gcomhrac i gcoinne na bochtaineachta leanaí - SWD (2026) 771.

(32) () Teachtaireacht ón gCoimisiún chuig Parlaimint na hEorpa, chuig an gComhairle, chuig Coiste Eacnamaíoch agus Sóisialta na hEorpa agus chuig Coiste na Réigiún maidir le Straitéis AE i gcoinne na Bochtaineachta — COM (2026) 538.

(33) () Le cláir, tionscnaimh agus ardáin an Aontais, amhail URBACT, an Tionscnamh Uirbeach Eorpach, an Comhshocrú um an Tuath, agus Ardán Cathracha an Aontais atá ar na bacáin, féadfar tacú le réigiúin agus bardais an Ráthaíocht a chur chun feidhme agus bochtaineacht leanaí a chomhrac ar an leibhéal áitiúil trí chúnamh teicniúil agus foghlaim fhrithpháirteach. Tá comhar idir-rialtasach maidir le hábhair uirbeacha i bhfeidhm freisin tríd an gClár Oibre Uirbeach don Aontas agus trína Chomhpháirtíochtaí Téamacha a d’fhéadfadh tacú le gníomhaíochtaí áitiúla.

(34) () Creat faireacháin GCL .