—

ag féachaint don Chonradh ar an Aontas Eorpach, go háirithe Airteagal 3(3) de,

—

ag féachaint don Chonradh ar Fheidhmiú an Aontais Eorpaigh, go háirithe Airteagail 114(151) agus 156 de,

—

ag féachaint do Threoir 2014/24/AE ó Pharlaimint na hEorpa agus ón gComhairle an 26 Feabhra 2014 maidir le soláthar poiblí agus lena n-aisghairtear Treoir 2004/18/CE (1),

—

ag féachaint do Threoir 2014/25/AE ó Pharlaimint na hEorpa agus ón gComhairle an 26 Feabhra 2014 maidir le soláthar a dhéanann eintitis a oibríonn in earnálacha an uisce, an fhuinnimh, an iompair agus na seirbhísí poist agus lena n-aisghairtear Treoir 2004/17/CE (2).

—

ag féachaint do Threoir 2007/66/CE ó Pharlaimint na hEorpa agus ón gComhairle an 11 Nollaig 2007 lena leasaítear Treoir 89/665/CEE agus Treoir 92/13/CEE ón gComhairle maidir le feabhas a chur ar éifeachtacht na nósanna imeachta athbhreithnithe a bhaineann le conarthaí poiblí a dhámhachtain (3) (an Treoir maidir le Leigheasanna),

—

ag féachaint do Rialachán (AE) 2022/1031 ó Pharlaimint na hEorpa agus ón gComhairle an 23 Meitheamh 2022 maidir le rochtain oibreoirí eacnamaíocha, earraí agus seirbhísí tríú tíortha ar mhargaí soláthair phoiblí agus lamháltais an Aontais agus maidir le nósanna imeachta a thacaíonn leis an gcaibidlíocht maidir le rochtain oibreoirí eacnamaíocha, earraí agus seirbhísí an Aontais ar mhargaí soláthair phoiblí agus lamháltais tríú tíortha (Ionstraim Soláthair Phoiblí Idirnáisiúnta — IPI) (4),

—

ag féachaint do Threoir (AE) 2019/882 ó Pharlaimint na hEorpa agus ón gComhairle an 17 Aibreán 2019 i ndáil leis na ceanglais inrochtaineachta le haghaidh táirgí agus seirbhísí (an Ionstraim Eorpach um Inrochtaineacht) (5) agus do Threoir (AE) 2016/2102 ó Pharlaimint na hEorpa agus ón gComhairle an 26 Deireadh Fómhair 2016 maidir le hinrochtaineacht na suíomhanna gréasáin agus na bhfeidhmchlár móibíleach de chuid comhlachtaí san earnáil phoiblí (an Treoir maidir le hInrochtaineacht Gréasáin) (6),

—

ag féachaint do bhreithiúnas Chúirt Bhreithiúnais an Aontais Eorpaigh (CBAE) an 30 Eanáir 2020 i gCás C-395/18, Tim SpA – Direzione e coordinamento Vivendi SA v Consip SpA, Ministero dell’Economia e delle Finanze  (7),

—

ag féachaint do bhreithiúnais CBAE le déanaí maidir le rannpháirtíocht tairgeoirí eachtracha i nósanna imeachta soláthair phoiblí AE, eadhon breithiúnais an 22 Deireadh Fómhair 2024 i gCás C-652/22, Kolin Inşaat Turizm Sanayi ve Ticaret AȘ v Državna komisija za kontrolu postupaka javne nabave  (8)agus an 13 Márta 2025 i gCás C-266/22, CRRC Qingdao Sifang Co. Ltd, Astra Vagoane Călători SA v Autoritatea pentru Reformă Feroviară, Alstom Ferroviaria SpA  (9),

—

ag féachaint do Chomhaontú na hEagraíochta Domhanda Trádála maidir le Soláthar Rialtais 2012,

—

ag féachaint do chlár oibre 2025 ón gCoimisiún an 11 Feabhra 2025 dar teideal ‘Dul ar aghaidh le chéile: Aontas níos dána, níos simplí agus níos tapúla (COM(2025)0045),

—

ag féachaint do theachtaireacht ón gCoimisiún an 26 Feabhra 2025 dar teideal ‘An Comhaontú maidir le Tionsclaíocht Ghlan: Treochlár comhpháirteach don iomaíochas agus don dícharbónú’ (COM(2025)0085),

—

ag féachaint do theachtaireacht ón gCoimisiún an 29 Eanáir 2025 dar teideal ‘Compás Iomaíochais don Aontas Eorpach’ (COM(2025)0030),

—

ag féachaint do theachtaireacht ón gCoimisiún an 19 Meitheamh 2024 dar teideal ‘ 2024 European Semester - Spring Package’ [Seimeastar Eorpach 2024 - Pacáiste an Earraigh] (COM(2024)0600),

—

ag féachaint don tuarascáil ón gCoimisiún dar teideal ‘ FBM needs analysis in Public Procurement’ [Anailís ar riachtanais FBManna sa Soláthar Poiblí] (2021), (10)

—

ag féachaint do theachtaireacht ón gCoimisiún an 9 Nollaig 2021 dar teideal ‘ Building an economy that works for people: an action plan for the social economy’ [Geilleagar a thógáil a fhóireann do dhaoine: plean gníomhaíochta maidir leis an ngeilleagar sóisialta] (COM(2021)0778),

—

ag féachaint do choinbhinsiún C94 na hEagraíochta Idirnáisiúnta Saothair de 1949 maidir le Clásail Saothair (Conarthaí Poiblí),

—

ag féachaint do theachtaireacht ón gCoimisiún an 3 Deireadh Fómhair 2017 dar teideal ‘ Making Public Procurement work in and for Europe’ [An soláthar poiblí a chur ag obair san Eoraip agus don Eoraip] (COM(2017)0572),

—

ag féachaint do thuairim ó Choiste Eorpach na Réigiún an 4 Nollaig 2024 dar teideal ‘Réigiúin na hEorpa a dhíon ar thurraingí: an athléimneacht eacnamaíoch áitiúil agus réigiúnach a neartú i bhforbairt straitéiseach an Mhargaidh Aonair’  (11),

—

ag féachaint do thuarascáil speisialta 28/2023 ó Chúirt Iniúchóirí na hEorpa an 4 Nollaig 2023 dar teideal ‘Soláthar poiblí san Aontas Eorpach – Níos lú iomaíochta maidir le conarthaí a dámhadh le haghaidh oibreacha, earraí agus seirbhisí sna 10 mbliana roimh 2021’ (Tuarascáil speisialta CIE),

—

ag féachaint do chonclúidí ón gComhairle an 24 Bealtaine 2024 maidir le Tuarascáil Speisialta Uimh. 28/2023 ó Chúirt Iniúchóirí na hEorpa dar teideal ‘Feabhas a chur ar iomaíocht chothrom éifeachtach le haghaidh conarthaí soláthair phoiblí de chuid an Aontais a dámhadh le haghaidh oibreacha, earraí agus seirbhísí’  (12),

—

ag féachaint do rún uaithi an 16 Nollaig 2020 maidir le straitéis nua do FBManna Eorpacha (13),

—

ag féachaint do rún uaithi an 13 Iúil 2023 maidir le staid FBManna an Aontais (14),

—

ag féachaint do thuarascáil ón gCoimisiún an 20 Bealtaine 2021 dar teideal ‘ Implementation and best practices of national procurement policies in the Internal Market’ [Cur chun feidhme agus dea-chleachtais na mbeartas náisiúnta um sholáthar sa Mhargadh Inmheánach] (COM(2021)0245),

—

ag féachaint do staidéar ón bParlaimint an 24 Deireadh Fómhair 2023 dar teideal ‘ The social impact of public procurement’ – Can the EU do more? ’ [Tionchar sóisialta an tsoláthair phoiblí — An féidir leis an Aontas níos mó a dhéanamh?] (15),

—

ag féachaint do thuarascáil ón Údarás Eorpach Saothair i mí na Bealtaine 2024: ‘ Evaluating policy responses to prevent undeclared work in public procurement contracts’ [Meastóireacht ar fhreagairtí beartais chun cosc a chur ar obair neamhdhearbhaithe sa soláthar poiblí],

—

ag féachaint do na tuarascálacha ó Mario Draghi an 9 Meán Fómhair 2024 dar teideal ‘ The future of European competitiveness’ [Todhchaí iomaíochas na hEorpa] (tuarascáil Draghi) agus ó Enrico Letta an 17 Aibreán 2024 dar teideal ‘ Much more than a market’ [I bhfad níos mó ná margadh] (tuarascáil Letta),

—

ag féachaint do Riail 55 dá Rialacha Nós Imeachta,

—

ag féachaint do na tuairimí ón gCoiste um Thrádáil Idirnáisiúnta agus ón gCoiste um Fhostaíocht agus um Ghnóthaí Sóisialta,

—

ag féachaint don tuarascáil ón gCoiste um an Margadh Inmheánach agus um Chosaint an Tomhaltóra (A10-0147/2025),

A.

de bhrí gurb ionann an soláthar poiblí agus thart ar 14 % d’olltáirgeacht intíre AE agus go bhfeidhmíonn sé mar ionstraim thábhachtach don fhás eacnamaíoch, go háirithe d’fhiontair bheaga agus mheánmhéide (FBManna), don nuálaíocht, don inbhuanaitheacht agus don chomhtháthú sóisialta, agus chun tionscal áitiúil agus poist ardcháilíochta a chur chun cinn in AE agus chun tacú leis an aistriú i dtreo slabhraí soláthair agus samhlacha gnó athléimneacha, lena n-áirítear i slabhraí fochonraitheoireachta;

B.

de bhrí go bhfuil rialtais áitiúla agus réigiúnacha, agus iad ar na hinfheisteoirí agus na húdaráis chonarthacha is mó in AE, ag éirí níos srianta de réir a chéile de dheasca rialacha diana AE agus náisiúnta, ceanglais agus nósanna imeachta dlíthiúla casta agus ualaí riaracháin díréireacha, agus, ag an am céanna, go bhfuil ganntanas leanúnach acmhainní airgeadais, pearsanra cáilithe agus saineolais theicniúil rompu – go háirithe ar leibhéal na mbardas agus na réigiún beag – rud is minic a fhágann gur gá príomhchúraimí a sheachfhoinsiú chuig eintitis sheachtracha, rud is cúis le brú airgeadais breise agus moilleanna nós imeachta;

C.

de bhrí gur féidir le soláthar poiblí éifeachtaí seach-iarmhartha a spreagadh a mhéadaíonn an t-éileamh ar earraí agus seirbhísí inbhuanaithe ar fud an mhargaidh ina iomláine, agus gur féidir leis tacú le príomhmhargadh a chruthú;

D.

de bhrí go raibh sé d’aidhm ag athchóiriú 2014 nósanna imeachta a shimpliú, trédhearcacht agus an comhrac i gcoinne an éillithe a fheabhsú, rannpháirtíocht FBManna agus gnólachtaí nuathionscanta nuálacha a chur chun cinn agus cuspóirí straitéiseacha soláthair a chomhtháthú trí chur chuige deonach, ach go bhfuil dúshláin fós ann maidir le trédhearcacht, éifeachtúlacht, úsáid agus ailíniú níos leithne critéar neamhphraghais, rochtain ar shonraí agus cuíchóiriú an fhorfheidhmithe, chomh maith le calaois agus éilliú a chosc;

E.

de bhrí gur tugadh isteach le hathchóiriú 2014 critéir na tairisceana is buntáistí go heacnamaíoch (MEAT) chun úsáid critéar cáilíochtúil amhail breithnithe comhshaoil agus sóisialta a dhreasú agus conarthaí poiblí á ndámhachtain; de bhrí gur tugadh le fios i dTuarascáil Speisialta CIE go raibh sciar mór de chonarthaí fós á ndámhachtain ar bhonn chritéar na tairisceana is ísle in 2021, agus ar an mbonn sin amháin; de bhrí gur dhámh 20 Ballstát níos mó ná 50 % dá dtairiscintí poiblí bunaithe ar phraghas amháin in 2023, agus níos mó ná 80 % dá dtairiscintí poiblí dáfa ag 10 mBallstát bunaithe ar phraghas amháin;

F.

de bhrí gur thángthas ar an gconclúid i dTuarascáil Speisialta CIE go raibh laghdú tagtha ar an leibhéal iomaíochta le haghaidh conarthaí poiblí ó 2014 i leith, agus i bhformhór na mBallstát gur tháinig méadú fiú ar mhinicíocht an chritéir dámhachtana sin bunaithe ar an tairiscint is ísle le linn na tréimhse faoi athbhreithniú;

G.

de bhrí go bhfuil tairseacha soláthair AE do sholáthairtí, do sheirbhísí agus d’oibreacha foirgníochta fós beagnach gan athrú ó 1994 i leith; de bhrí go bhfuil na tairseacha sin, a choigeartaítear do phraghsanna an mhargaidh, ag laghdú go leanúnach i dtéarmaí réadacha; de bhrí, mar thoradh air sin, nach mór líon méadaitheach conarthaí níos lú a thairiscint anois ar leibhéal AE trí nósanna imeachta is minic ar nósanna imeachta fada agus casta iad;

H.

de bhrí gur chinn an tÚdarás Eorpach Saothair (ELA) ‘nuair a úsáidtear an tairiscint is ísle mar an t-aon chritéar roghnúcháin amháin, go mbíonn méadú ar an riosca go ndéanfar obair neamhdhearbhaithe mar gheall ar an mbrú ar chostais saothair’; de bhrí gur thug ELA dá aire freisin go ‘[n]Aithnítear go forleathan, má thugtar tosaíocht do chritéar na tairisceana is ísle sa soláthar poiblí, go bhféadfaí timpeallacht a chruthú inar dóchúla go dtarlódh sáruithe ar dhlí an tsaothair mar gheall ar bhrú chun costas a chiorrú agus maoirseacht neamhleor a dhéanamh; d’fhéadfadh sé go mbeadh critéar an phraghais is ísle ina spreagadh do chonraitheoirí oibriú sa gheilleagar neamhdhearbhaithe chun costais a laghdú, agus rialacháin saothair a sheachaint’;

I.

de bhrí go léirítear sa tuarascáil chríochnaitheach ón gCoimisiún dar teideal ‘FBM needs analysis in public procurement’  (16) [Anailís ar riachtanais FBManna sa soláthar poiblí] gur gá fós cleachtais soláthair phoiblí a shoiléiriú, a shimpliú agus a chaighdeánú, agus sainiúlachtaí agus córais riaracháin éagsúla na mBallstát á gcur san áireamh ag an am céanna;

J.

de bhrí go bhfuil soláthairtí díreacha trasteorann fós teoranta do 5 % (17) de na conarthaí soláthair uile, rud a léiríonn gurb ann fós do bhacainní ar iomaíocht trasteorann agus ar rochtain ar an margadh agus nósanna imeachta casta; de bhrí nach gcuirtear san áireamh leis an bhfigiúr sin rannpháirtíocht fochuideachtaí eile de chuid na mBallstát sa tír ina dtarlaíonn an nós imeachta soláthair;

K.

de bhrí go dtugann an Coimisiún chun suntais roinnt éiginnteachtaí dlíthiúla maidir le soláthar poiblí nuálaíoch atá freagrach go sóisialta a chur chun cinn (18); de bhrí go n-áirítear leis na héiginnteachtaí dlíthiúla sin, i measc nithe eile, deacrachtaí maidir le breithnithe sóisialta a nascadh le hábhar conartha;

L.

de bhrí go bhfuil gealltanas tugtha ag Uachtarán an Choimisiúin athbhreithniú a dhéanamh ar an gcreat soláthair phoiblí d’fhonn a bheith in ann ‘tús áite a thabhairt do tháirgí Eorpacha sa soláthar poiblí le haghaidh earnálacha straitéiseacha ar leith’ (19);

M.

de bhrí gur cheart go ndíreodh an t-athbhreithniú ar threoracha soláthair phoiblí ar chritéir cháilíochtúla a spreagadh, nósanna imeachta soláthair a chuíchóiriú agus an luach is fearr ar airgead na gcáiníocóirí a áirithiú; de bhrí, mar sin féin, nach mór cineál sonrach earnálacha agus tionscal éagsúil agus spriocanna sonracha na n-údarás conarthach a chur san áireamh i rialacha soláthair phoiblí, ag aithint go bhféadfadh sé nach mbeadh cur chuige aonfhoirmeach maidir le bearta rialála, amhail téarmaí íocaíochta, oiriúnach do gach earnáil, agus go bhfuil gá le forálacha saincheaptha i rialacháin earnáilsonracha chun a áirithiú go mbeidh na creataí foriomlána soláthair ailínithe le réaltachtaí oibríochtúla agus airgeadais tionscalsonracha; de bhrí gur cheart tairiscintí rathúla a roghnú i gcomhréir leis na cinn a mheasann an t-údarás conarthach aonair a bheith ar an réiteach is fearr ó thaobh an gheilleagair de i measc na dtairiscintí a chuirtear isteach chun díriú ar cháilíocht agus solúbthacht níos fearr sa soláthar poiblí a spreagadh;

N.

de bhrí go leanann an soláthar poiblí de bheith ina uirlis neodrach agus nós imeachta, lena rialaítear an chaoi a gceannaíonn údaráis phoiblí earraí agus seirbhísí, seachas na cinn a cheannaíonn siad;

O.

de bhrí, i bhfianaise na ndúshlán a bhaineann le ceannasacht thionsclaíoch na hEorpa agus an gá atá le poist agus fios gnó Eorpach a chaomhnú agus a neartú, gur cheart an soláthar poiblí a úsáid mar mhórluamhán straitéiseach chun cruthú breisluacha laistigh den Aontas a chur chun cinn, agus ar an gcaoi sin athléimneacht thionsclaíoch agus inbhuanaitheacht shlabhraí soláthair na hEorpa a fheabhsú;

P.

de bhrí gur cheart cead a bheith ag údaráis chonarthacha san Aontas tosaíocht a thabhairt do thairiscintí lena n-áirítear cion suntasach den bhreisluach a tháirgtear laistigh den Aontas;

Q.

de bhrí gur féidir le húsáid critéar inbhuanaitheachta rannchuidiú le spriocanna comhshaoil AE a bhaint amach, ar choinníoll go bhfuil na critéir sin sainithe go soiléir, go bhfuil siad comhréireach, agus nach gcuireann siad srian ar údaráis chonarthacha agus a riachtanais soláthair iarbhír á gcomhlíonadh acu;

R.

de bhrí go bhfeidhmíonn údaráis chonarthacha i gcomhthéacsanna éagsúla áitiúla agus margaidh agus nach mór dóibh an tsaoirse a choinneáil chun ábhar, raon feidhme agus tosaíochtaí straitéiseacha an tsoláthair a shainiú i gcomhréir lena riachtanais agus lena n-acmhainneachtaí iarbhír; de bhrí nach mór prionsabal na comhréireachta agus na coimhdeachta a choimirciú in aon chur chuige ar leibhéal AE maidir le soláthar inbhuanaithe;

S.

de bhrí gur gá muinín sa soláthar poiblí a threisiú; de bhrí go mbaineann easpa trédhearcachta agus cothroime i nósanna imeachta soláthair, lena n-áirítear ábhair imní maidir le fabhraíocht, critéir roghnúcháin dhoiléire, sásraí formhaoirseachta neamhleora agus eisiamh agus smachtbhannaí neamhleora, an bonn ón muinín as conraitheoireacht phoiblí agus go gcruthaíonn sé deiseanna don éilliú; de bhrí go bhféadfadh an róspleáchas ar chritéar na tairisceana is ísle brú anuas a chur ar cháilíocht na seirbhísí agus ar shábháilteacht agus ar dhálaí oibre i gcásanna áirithe agus go bhféadfadh tionchar díobhálach eacnamaíoch fadtéarmach a bheith aige ar údaráis soláthair; de bhrí go raibh cásanna ann inar dámhadh conarthaí in éagmais iomaíocht iarbhír agus le teimhneacht agus easpa rialaithe sheachtraigh éifeachtaigh ar na critéir roghnúcháin, rud lena leagtar béim ar an ngá práinneach atá le prionsabail na trédhearcachta, an chomhionannais agus na dlíthiúlachta a neartú ag gach céim de nósanna imeachta soláthair phoiblí;

T.

de bhrí go mbíonn deacrachtaí suntasacha ag gnólachtaí Eorpacha, go háirithe FBManna, maidir le rochtain a fháil ar mhargaí soláthair phoiblí idirnáisiúnta mar gheall ar bheartais chaomhnaitheacha i dtíortha nach de chuid an Aontais iad, agus go bhfuil ceann de na margaí soláthair is oscailte ar domhain á choinneáil ag an Aontas, rud a fhágann go bhfuil míbhuntáistí iomaíochta éagóracha ann do chuideachtaí AE; de bhrí, sa bhreis ar bheartais chaomhnaitheacha, gur minic a dhéantar iomaíocht chóir a shaobhadh trí fhóirdheonú táirgí ó rialtais tíortha nach de chuid an Aontais iad, trí bhearta idirdhealaitheacha agus trí easpa cómhalartachta agus deimhneachta dlíthiúla;

U.

de bhrí gur chuir an tAontas an Ionstraim Soláthair Phoiblí Idirnáisiúnta agus an Rialachán maidir le Fóirdheontais Eachtracha (20) lena bhosca uirlisí cosanta trádála le déanaí chun cómhalartacht a chur chun cinn maidir le rochtain ar mhargaí soláthair phoiblí idirnáisiúnta agus chun cothrom iomaíochta a áirithiú do chuideachtaí agus táirgí an Aontais; de bhrí go mbeadh feidhm ag ceanglais chomhshaoil, shóisialta, saothair agus díchill chuí maidir le hoibreoirí eacnamaíocha tíortha nach de chuid an Aontais iad i gcomhréir le Treoracha 2014/23/AE, (21)2014/24/AE, 2014/25/AE agus (AE) 2024/1760 (22) agus reachtaíocht eile de chuid an Aontais;

V.

de bhrí nár shínigh comhaltaí uile EDT Comhaontú 2012 na hEagraíochta Domhanda Trádála (EDT) maidir le Soláthar Rialtais go fóill agus nach n-áirítear sa leagan is déanaí de, i measc nithe eile, na caighdeáin saothair agus chomhshaoil dhomhanda a glacadh ó tugadh i gcrích é, ná sásra coigeartaithe boilscithe nuashonraithe;

W.

de bhrí go soiléirítear le breithiúnais CBAE maidir le rannpháirtíocht tairgeoirí eachtracha i nósanna imeachta soláthair phoiblí de chuid AE (Cás C-652/22 agus C-266/22) nach bhfuil rochtain shlán ar mhargadh soláthair AE ag tairgeoirí eachtracha ó thíortha nach bhfuil comhaontú iltaobhach, ilpháirtithe nó déthaobhach tugtha i gcrích acu; de bhrí gur athdhearbhaigh CBAE inniúlacht eisiach AE sa réimse sin agus gur dheimhnigh sé, in éagmais comhaontuithe den sórt sin, go bhféadfaidh údaráis chonarthacha, i gcomhréir le dlí AE, na tairgeoirí sin a theorannú nó a eisiamh – staid a bhféadfadh cleachtais náisiúnta éagsúla a bheith mar thoradh uirthi;

X.

de bhrí go bhfuil athrú ar thrádáil idirnáisiúnta agus ar dhinimic eacnamaíoch nua mar thoradh ar mhéadú ar theannas geopholaitiúil, rud a fhágann go bhfuil spleáchais straitéiseacha nua ag teacht chun cinn arna spreagadh ag comhchruinniú allmhairí agus ag inionadaitheacht theoranta allmhairí, agus go bhfuil rioscaí ag baint leis do chobhsaíocht na slabhraí soláthair; de bhrí go n-éilítear leis sin úsáid fheabhsaithe agus straitéiseach a bhaint as soláthar poiblí chun tacú le geilleagar AE agus lena acmhainneacht athléimneachta, spleáchais dhíobhálacha a laghdú agus a neamhspleáchas straitéiseach a neartú;

Y.

de bhrí gur cheart do bheartais soláthair phoiblí iomaíochas agus nuálaíocht na hEorpa a chur chun cinn;

Z.

de bhrí gur critéar dámhachtana tábhachtach é critéar na tairisceana is ísle i bhformhór na dtairiscintí in AE – i roinnt Ballstát cuirtear i bhfeidhm é i suas le 95 % (23) de chásanna nó uaireanta is é an t-aon chritéar é fiú i gcéimeanna tairisceana agus dámhachtana nós imeachta soláthair araon; de bhrí go dtugann ELA le fios, i dtuarascáil uaidh ó mhí na Bealtaine 2024 – go háirithe in earnálacha diansaothair a bhfuil ról ceannasach ag costais foirne chun iontu – gur féidir le spleáchas ar chritéar na tairscinte is ísle cur le tarlú na hoibre neamhdhearbhaithe agus go bhféadfadh sé an bonn a bhaint ó cháilíocht seirbhíse nó táirgí, ó inbhuanaitheacht agus ó chaighdeáin shóisialta; (24) de bhrí go ndéanann ionadaithe FBManna agus daoine ó FBManna a chuirtear faoi agallamh a thuairisciú arís agus arís eile go ndéanann údaráis chonarthacha neamhaird den chlásal sóisialta cothrománach, agus iad ag tabhairt le fios nach ndéanann siad conarthaí a dhámhachtain ach ar bhonn na tairisceana is ísle amháin, rud a spreagann tairiscintí thar a bheith íseal agus a dhíspreagann rannpháirtíocht tairgeoirí a chomhlíonann dlíthe agus cleachtais saothair;

AA.

de bhrí go ndeimhnítear le breithiúnas CBAE i gCás C-395/18 gur prionsabal ceangailteach atá sna ceanglais in Airteagal 18(2) de Threoir 2014/24/AE lena leagtar síos nach mór d’oibreoirí eacnamaíocha oibleagáidí a bhaineann leis an dlí comhshaoil, sóisialta agus saothair a chomhlíonadh, i bhfeidhmiú conarthaí poiblí, ar an gcaoi chéanna leis na prionsabail eile dá dtagraítear i mír 1 den Airteagal sin, mar atá, cóir chomhionann, neamh-idirdhealú, trédhearcacht agus comhréireacht; de bhrí go soiléirítear sa bhreithiúnas freisin go bhféadfaidh na Ballstáit sáruithe ag fochonraitheoirí a chur san áireamh agus forais eisiaimh á gcinneadh acu, ar choinníoll go n-urramaítear prionsabal na comhréireachta go docht;

AB.

de bhrí gur príomhuirlis é an soláthar poiblí chun tacú go gníomhach leis an aistriú chuig geilleagar inbhuanaithe, cuimsitheach agus cothrom agus gur féidir é a úsáid chun ceartas sóisialta agus dálaí oibre cuibhiúla a chur chun cinn; de bhrí gur cheart a mholadh d’údaráis chonarthacha cuspóirí leas an phobail a shaothrú trí sholáthar, lena n-áirítear cuimsiú sóisialta, poist ardcháilíochta, comhdheiseanna, comhtháthú críochach agus tacaíocht do ghníomhaithe an gheilleagair shóisialta;

AC.

de bhrí gur gá aistriú ó chur chuige atá bunaithe ar chostas amháin go cur chuige lena ndéantar athléimneacht agus luach sóisialta agus comhshaoil a mheas freisin, lena n-áirítear trí urraim a thabhairt don chómhargáil agus do chearta bunúsacha saothair, chun leas iomlán a bhaint as acmhainneacht an tsoláthair phoiblí straitéisigh;

AD.

de bhrí go bhfuil fochonraitheoireacht ríthábhachtach d’iomaíocht chóir do FBManna agus dá gcumas brath ar shaineolas; de bhrí gur féidir leis éifeachtúlacht, nuálaíocht agus rannpháirtíocht FBManna sa soláthar poiblí a fheabhsú freisin; de bhrí, mar gheall ar dhébhríochtaí dlíthiúla agus forfheidhmiú lag, go bhféadfadh sraitheanna iomadúla fochonraitheoireachta cuntasacht a laghdú, rioscaí sáruithe ar dhlí an tsaothair a mhéadú agus bac a chur ar fhorfheidhmiú éifeachtach;

AE.

de bhrí nach mór bearta láidre cibearshlándála, réamhriachtanais idir-inoibritheachta agus ardáin dhigiteacha atá éasca le húsáid agus comhchuibhithe le haghaidh aighneachtaí soláthair a bheith ag gabháil le digitiú méadaitheach na bpróiseas soláthair, agus trédhearcacht agus meaisín-inléiteacht a áirithiú chun críoch anailíseach; de bhrí gur féidir leis an digitiú, thairis sin, rannchuidiú le rochtain ar sholáthar poiblí a shimpliú do ghnólachtaí, go háirithe micrifhiontair, fiontair bheaga agus fiontair mheánmhéide, chomh maith leis an ualach maorlathach ar údaráis chonarthacha bheaga a laghdú;

AF.

de bhrí, seachas seasamh ‘Eorpach amháin’ a ghlacadh, gur cheart do AE díriú ar an gcáilíocht is fearr is féidir, agus raon leathan dálaí á gcur i gcuntas, lena n-áirítear praghas, sábháilteacht, cáilíocht, inbhuanaitheacht, athléimneacht agus dálaí saothair; de bhrí gur cheart dó díriú freisin ar chomhpháirtíochtaí lena chomhghuaillithe daonlathacha a chur chun cinn;

AG.

de bhrí, in ainneoin chuspóir athchóiriú 2014, iarrachtaí chun rannpháirtíocht bhunriachtanach FBManna sa soláthar poiblí a chur chun cinn, go bhfuil a rannpháirtíocht teoranta go fóill mar gheall ar mhéideanna móra conarthaí, ceanglais dhíréireacha riaracháin, easpa sásraí tacaíochta saincheaptha a chuirfeadh ar a gcumas dul in iomaíocht go héifeachtach le heintitis níos mó, easpa soiléireachta i bhfógraí tairisceana agus moilleanna athfhillteacha íocaíochta;

AH.

de bhrí gur féidir le straitéisí soláthair timpeallacht eacnamaíoch a chur chun cinn atá fabhrach don fhás áitiúil, ag feabhsú rachmas pobail, cruthú post agus cobhsaíocht airgeadais fhadtéarmach, agus, ar an gcaoi sin, ag neartú, a mhéid is féidir, ról FBManna, lena n-áirítear gnólachtaí nuathionscanta agus eagraíochtaí an gheilleagair shóisialta, i dtairiscintí poiblí;

AI.

de bhrí go mbunaítear le hAirteagal 27 de Choinbhinsiún na Náisiún Aontaithe ar Chearta Daoine faoi Mhíchumas prionsabal na gcomhdheiseanna fostaíochta i margaí saothair inrochtana agus cuimsitheacha; de bhrí, le Treoir 2014/24/AE maidir le soláthar poiblí, gur féidir critéir shóisialta a ionchorprú i ndámhachtainí conartha, lena n-áirítear bearta lena dtacaítear le fostaíocht chuimsitheach agus lena dtugtar aghaidh ar eisiamh sóisialta; de bhrí, i straitéis 2021-2030 AE maidir le cearta daoine faoi mhíchumas, go n-aithnítear conarthaí forchoimeádta faoi Threoir 2014/24/AE mar uirlis amháin i measc uirlisí eile chun caighdeáin inrochtaineachta a áirithiú;

AJ.

de bhrí go bhféadfadh cur i bhfeidhm chritéir MEAT, agus saolré táirgí agus tionchar ar an gcomhshaol á gcur san áireamh, tacú le cinntí réasúnacha agus fadtéarmacha maidir le soláthar poiblí;

AK.

de bhrí go mbíonn trasuí rialacha Eorpacha maidir le soláthar poiblí sa dlí náisiúnta neamhéifeachtach uaireanta, agus neamhréireachtaí sa chur chun feidhme, éiginnteacht dhlíthiúil agus bacainní ar rochtain d’oibreoirí eacnamaíocha ann mar thoradh air; de bhrí, chun na bearnaí cur chun feidhme sin a chosc agus chun cur i bhfeidhm comhsheasmhach a áirithiú, gur cheart creataí treorach mionsonraithe a bhunú chun cabhrú leis na Ballstáit na rialacha a thrasuí go héifeachtach;

AL.

de bhrí gur féidir le cláir chórasacha feidhmíochta conarthaí feabhas a chur ar chumas na n-údarás conarthach gníomhaithe mí-oiriúnacha a eisiamh go tapa ó phróisis soláthair, lena n-áirítear gníomhaithe atá nasctha le líonraí coiriúla agus le trasnaíocht eachtrach, dúshaothrú saothair a chosc agus feidhmíocht iontaofa conartha a fheabhsú; de bhrí go bhfuil idir-inoibritheacht éifeachtach agus inrochtaineacht trasteorann na gclár sin ar fud na mBallstát tábhachtach chun trédhearcacht a neartú, cistí poiblí a choimirciú, tacú leis an margadh inmheánach agus slándáil agus sláine an bhonneagair phoiblí chriticiúil agus na seirbhísí poiblí criticiúla a threisiú;