AN COIMISIÚN EORPACH

Strasbourg, 14.3.2023

COM(2023) 146 final

TEACHTAIREACHT ÓN gCOIMISIÚN CHUIG PARLAIMINT NA hEORPA AGUS CHUIG AN gCOMHAIRLE

lena mbunaítear an beartas straitéiseach ilbhliantúil le haghaidh bainistiú comhtháite teorainneacha san Eoraip

Ag an gcruinniú urghnách den Chomhairle Eorpach an 9 Feabhra 2023, d’athdhearbhaigh an Chomhairle a thábhachtaí atá sé go n‑áiritheofar an rialú éifeachtach ar theorainneacha seachtracha talún agus farraige an Aontais mar chuid de chur chuige cuimsitheach i leith na himirce. Sa chomhthéacs sin, d’iarr sé ar an gCoimisiún Eorpach an Straitéis Eorpach um Bainistiú Comhtháite Teorainneacha (EIBM) a thabhairt chun críche go tapa.

Is freagairt í an Teachtaireacht seo ar an nglao sin, lena mbunaítear an chéad bheartas straitéiseach ilbhliantúil (‘beartas straitéiseach EIBM’), chun creat beartais comhroinnte agus treoraíocht a sholáthar chun bainistiú comhtháite teorainneacha éifeachtach san Eoraip 1 a chur chun feidhme le haghaidh na tréimhse 2023 go 2027.

Na tosaíochtaí beartais agus na treoirlínte straitéiseacha le haghaidh na 15 ghné de bhainistiú comhtháite teorainneacha a leagtar amach in Iarscríbhinn I, cuireann siad le doiciméad beartais an 24 Bealtaine 2022 2 lenar seoladh an chéad timthriall beartais straitéisigh cúig bliana don bhainistiú comhtháite teorainneacha, ina n‑ionchorpraítear an t‑ionchur a fuarthas ó pháirtithe leasmhara sa phróiseas comhairliúcháin Go sonrach, bhí mar thoradh ar na díospóireachtaí idirinstitiúideacha go bhfuarthas ionchur luachmhar ón gCoiste um Shaoirsí Sibhialta, um Cheartas agus um Ghnóthaí Baile (LIBE) 3 agus conclúidí ón gComhairle 4 a cuireadh san áireamh sa Teachtaireacht seo agus sna hiarscríbhinní a ghabhann léi ina leagtar amach, dá bhrí sin, an fhís Eorpach choiteann maidir le bainistiú teorainneacha comhtháite san Eoraip le himeacht na 5 bliana seo chugainn.

Bunaithe ar an Rialachán lena mbunaítear an Garda Teorann agus Cósta Eorpach (‘Rialachán EBCG’) 5 , stiúrfaidh an straitéis EIBM seo obair údaráis náisiúnta na mBallstát atá freagrach as bainistiú teorainneacha 6 agus obair na Gníomhaireachta Eorpaí um an nGarda Teorann agus Cósta (‘an Ghníomhaireacht’ nó ‘Frontex’), arb iad i dteannta a chéile a chomhdhéanann an Garda Teorann agus Cósta Eorpach. Ar an leibhéal oibríochtúil, is é an straitéis seo an creat coiteann a threoraíonn an obair laethúil a dhéanann breis agus 120 000 oifigeach den Gharda Teorann agus Cósta Eorpach ó údaráis náisiúnta na mBallstát agus ó Frontex, d’fhonn bainistiú comhtháite teorainneacha éifeachtach éifeachtúil san Eoraip a bhaint amach.

Comhthéacs Straitéiseach

Leis an Anailís Riosca Straitéiseach (SRA) 7 a d’fhorbair Frontex, sainaithnítear roinnt treochtaí a dhéanann difear don chomhthéacs ina n‑oibríonn EIBM. Áirítear orthu sin meigithreochtaí, amhail neamhionannais dhomhanda níos leithne, athrú aeráide, fás déimeagrafach agus paindéimí a d’fhéadfadh a bheith ann amach anseo, agus staideanna geopholaitiúla agus oibríochtúla sa ghearrthéarma freisin. Tá coinne leis go mbeidh tionchar suntasach ag na dúshláin sin ar bhainistiú imirce agus ar an bhfilleadh, agus ar an mbealach nach mór teorainneacha seachtracha an Aontais a chosaint, á chur san áireamh freisin go bhfuil bearta éagsúla ag teastáil le haghaidh cineálacha éagsúla teorainneacha (talún, farraige agus aeir) agus go ndéanfar difear ar bhealaí éagsúla do na codanna éagsúla den teorainn, ag brath ní hamháin ar mhéid na sreabh imirce ach ar a dtreo chomh maith.

Tá teagmhais gheopholaitiúla le déanaí tar éis tionchar as cuimse a imirt ar theorainneacha seachtracha an Aontais agus leanfaidh siad orthu á imirt. D’athdheimhnigh cogadh foghach na Rúise i gcoinne na hÚcráine fírinne an chomhthéacs gheopholaitiúil naimhdigh ag teorainneacha thoir na hEorpa. I dteannta a róil thraidisiúnta sa rialú ag teorainneacha agus i bhfaireachas ar theorainneacha, bhí ról ríthábhachtach ag gardaí teorann EBCG ag éascú trasnuithe teorann ag daoine a bhí ag teitheadh ó chogadh foghach na Rúise, agus ag cosaint sláine agus slándáil theorainneacha seachtracha an Aontais an tráth céanna.

Tá an tAontas ag dul i ngleic freisin le réaltacht nua an ionstraimithe imirceach chun críoch polaitiúil, treocht nua a thugann dúshlán na gcineálacha traidisiúnta cur chuige i leith bainistiú teorainneacha seachtracha agus a bhfuil baol ann go dtabharfaidh sé dúshláin bhreise amach anseo. Anuas ar ghníomhaithe stáit a bheith ag ionstraimiú imirceach d’aon ghnó, is saintréith freisin den staid ag na teorainneacha seachtracha talún agus farraige go leanann líonraí coiriúla dea‑eagraithe a bhfuil forbairt tagtha ar a gcumas agus a sofaisticiúlacht de bheith ag oibriú, rud a chruthaíonn dúshláin bhreise don bhainistiú éifeachtach ar theorainneacha seachtracha.

Beidh gá ag beartas an Aontais um fhilleadh le gníomhaíocht leanúnach, sa ghné inmheánach agus sa ghné sheachtrach de araon. Cuireann an easpa comhordaithe idir údaráis laistigh den Aontas Eorpach chomh maith le comhar teoranta tríú tíortha isteach ar a éifeachtacht agus a éifeachtúlacht.De réir Eurostat, as na 340 515 chinneadh um fhilleadh a eisíodh in 2021, níor cuireadh ach 21 % díobh i gcrích go héifeachtach. Ina theannta sin, níl ach cúig Bhallstát freagrach as 80 % de na fillteacha a éascaíonn Frontex. Baineann an éifeachtacht theoranta sin den tacaíocht fhadtéarmach agus den iontaoibh atá ag saoránaigh na hEorpa i sláine an chórais bainistithe imirce agus teorainneacha san Eoraip.

Ar an leibhéal domhanda, caitheann gníomhaithe stáit agus gníomhaithe nach gníomhaithe stáit iad amhras ar an urraim do chearta an duine agus ar oibleagáidí idirnáisiúnta ar bhonn tráthrialta, rud a chruthaíonn brúnna fadtéarmacha ar an gcóras cosanta domhanda. Sa chomhthéacs sin, ní mór don Aontas a ghealltanas a athdhearbhú go saothrófar bainistiú éifeachtúil sábháilte ár dteorainneacha seachtracha, i gcomhréir iomlán le dlí an Aontais agus leis an dlí idirnáisiúnta, lena n‑áirítear cearta bunúsacha mar a chumhdaítear sa Chairt um Chearta Bunúsacha an Aontais Eorpaigh iad.

Beidh ar an Aontas Eorpach leanúint de bheith tarraingteach do thallann, gnólachtaí agus turasóirí a rannchuidíonn lenár bhfás agus lenár rath fadtéarmach. I gcomhthéacs iomaíochta eacnamaíche méadaithe, is gá breis forbartha a dhéanamh ar ról na dteorainneacha seachtracha agus an bhonneagair TF chomhfhreagraigh chun aistir na milliún taistealaithe bona fide a éascú, agus rioscaí slándála féideartha á sainaithint, chun rannchuidiú le fás eacnamaíoch agus slándáil fhadtéarmach na hEorpa.

Ar deireadh - ar leibhéal níos oibríochtúla - mar gheall ar bhainistiú comhtháite teorainneacha a bheith ag éirí níos casta agus níos sofaisticiúla, tá an baol ann freisin go mbeidh an cur chuige ilroinnte neamhchomhordaithe agus go mbeidh an iomarca gníomhaithe ann ag dúbláil iarrachtaí agus ag cruthú bealaí éalaithe ar féidir le líonraí coiriúla teacht i dtír orthu. Beidh gá le comhordú idir na gníomhaithe uile faoi chuimsiú EIBM ionas nach dtarlóidh sin, agus chun leas a bhaint as na deiseanna atá ann de bharr líon méadaithe córas agus gníomhaithe a bheith ag oibriú sa spás sin.

Bainistiú comhtháite teorainneacha san Eoraip – Beartas straitéiseach ilbhliantúil

Tá freagairt straitéiseach ón Aontas ag teastáil le haghaidh na ndúshlán straitéiseach sin. Is é EIBM an uirlis lena dtabharfar aghaidh ar na dúshláin sin trína áirithiú go ndéanfar teorainneacha seachtracha an Aontais a bhainistiú go héifeachtach, rud a chruthóidh sineirgí idir leibhéal an Aontais agus na leibhéil náisiúnta.

Chuige sin, saothraíonn EIBM spriocanna éagsúla i gcomhthráth le chéile: chun trasnuithe teorann dlisteanacha a éascú agus éifeachtúlacht bheartas an Aontais um fhilleadh a mhéadú; chun cosc éifeachtach ar thrasnuithe neamhúdaraithe ag na teorainneacha seachtracha a áirithiú; chun coireacht thromchúiseach a bhfuil gné thrasteorann ag gabháil léi, amhail smuigleáil imirceach, sceimhlitheoireacht, gáinneáil ar dhaoine, gáinneáil ar airm agus gáinneáil ar dhrugaí, a chosc agus a bhrath; chun comhar éifeachtach le tríú tíortha a bhaint amach; agus chun a áirithiú go gclárófar agus go soláthrófar cúram go tapa do dhaoine a bhfuil cosaint idirnáisiúnta de dhíth orthu nó atá ag déanamh iarratas ar chosaint idirnáisiúnta. Go hachomair, ní mór don bhainistiú comhtháite teorainneacha san Eoraip rannchuidiú le hardleibhéal slándála laistigh den Aontas, ar bhealach ina n‑urramófar cearta bunúsacha go hiomlán agus ina gcosnófar saorghluaiseacht daoine laistigh den Aontas.

Prionsabail EIBM

Léirítear na spriocanna sin i roinnt príomhphrionsabal a eascraíonn go díreach as Rialachán EBCG agus a thacaíonn leis na treoirlínte beartais agus na tosaíochtaí straitéiseacha le haghaidh bainistiú comhtháite teorainneacha san Eoraip a leagtar amach in Iarscríbhinn I a ghabhann leis an Teachtaireacht seo:

De réir Rialachán EBCG, is freagracht é EIBM a chur chun feidhme atá comhroinnte idir údaráis na mBallstát atá freagrach as bainistiú na dteorainneacha agus as an bhfilleadh, agus Frontex, arb iad i dteannta a chéile a chomhdhéanann an Garda Teorann agus Cósta Eorpach. Cé gurb iad na húdaráis náisiúnta um bainistiú teorainneacha a bheidh freagrach go príomha as a gcodanna de na teorainneacha seachtracha a bhainistiú, tá comhaltaí den Gharda Teorann agus Cósta Eorpach faoi dhualgas maidir le comhoibriú de mheon macánta agus maidir le faisnéis a mhalartú laistigh de chomhphobal EBCG.

Ar an dara dul síos, tá EIBM bunaithe ar an tsamhail rialaithe rochtana ceithre chiseal 8 , lena gcuimsítear bearta a dhéantar i dtríú tíortha, bearta a dhéantar le tríú tíortha comharsanachta, bearta um rialú ag teorainneacha a dhéantar ag na teorainneacha seachtracha, agus bearta a dhéantar laistigh de limistéar Schengen agus bearta um fhilleadh. Ba cheart do Frontex agus do na Ballstáit bearta a dhéanamh agus a choigeartú i ngach ciseal bunaithe ar anailís riosca.

Ar an tríú dul síos, is fíor‑riachtanach feasacht staide chuimsitheach ar bhonn fíorama nó neas‑fhíorama a bheith ann chun go bhfreagróidh an Garda Teorann agus Cósta Eorpach i gceart agus go tráthúil ar bhagairtí atá ag teacht chun cinn. Chuige sin, is gá léiriú staide Eorpach cuimsitheach a bhíonn á fhorbairt agus á thabhairt cothrom le dáta an t‑am ar fad ag Frontex ar leibhéal an Aontais Eorpaigh agus ag na Ballstáit ar an leibhéal náisiúnta. Mar phríomhbhonn don léiriú staide ag teorainneacha seachtracha an Aontais, ba cheart EUROSUR a chur chun feidhme go héifeachtach agus a fhorbairt a thuilleadh agus ba cheart feidhmchláir nua ghnó a fhorbairt in éineacht le caighdeáin choiteanna maidir le bainistiú faisnéise a d’fhorbair Frontex, na Ballstáit agus an Coimisiún go comhpháirteach 9 .

Ar an gceathrú dul síos, tá cur chun feidhme EIBM bunaithe ar ullmhacht sheasmhach chun freagairt do bhagairtí atá ag teacht chun cinn agus chun na huirlisí is gá a sholáthar chun freagairt d’aon bhagairt den sórt sin ag na teorainneacha seachtracha agus iad a bhainistiú. Chun feidhmiú rathúil an Gharda Teorann agus Cósta Eorpaigh a áirithiú is gá córas comhtháite seanbhunaithe comhordúcháin, cumarsáide agus pleanála idir Frontex agus na húdaráis náisiúnta atá freagrach as bainistiú comhtháite teorainneacha. Dá bhrí sin, áirítear sa chur chuige idirghníomhaireachta sa Teachtaireacht seo treoirlínte straitéiseacha chun a áirithiú go mbeidh comhordú náisiúnta éifeachtúil ann idir údaráis bainistithe teorainneacha agus údaráis inniúla eile ag na teorainneacha seachtracha, údaráis chustaim ina measc, ionas go mbeifear in ann bainistíocht a dhéanamh ar an tsreabh daoine agus earraí ag na teorainneacha seachtracha.

Ar deireadh, tá ardleibhéal speisialtóireachta agus gairmiúlachta ag teastáil le haghaidh bainistiú comhtháite teorainneacha san Eoraip. Ba cheart don Gharda Teorann agus Cósta Eorpach cultúr coiteann do ghardaí teorann agus ardleibhéal gairmiúlachta a fhorbairt ina mbeidh ardluachanna eiticiúla agus ionracas. Ba cheart cúrsaí oiliúna a dhearadh freisin chun a áirithiú go n‑urramófar cearta bunúsacha go hiomlán sna gníomhaíochtaí bainistithe teorainneacha uile trí chláir bhunoiliúna agus cúrsaí spriocdhírithe chomh maith.

Ó phrionsabail go cleachtas: gnéithe EIBM

Bunaithe ar Chonclúidí na Comhairle Eorpaí, ar Chonclúidí na Comhairle agus ar an ionchur luachmhar ó Pharlaimint na hEorpa mar bheart leantach i ndáil le doiciméad beartais an Choimisiúin, sainaithnítear leis an Teachtaireacht seo na gnéithe seo a leanas den bhainistiú comhtháite teorainneacha a bhfuil tábhacht ar leith leo:

Rialú teorann

Is é an ghné bhunúsach de EIBM é na teorainneacha seachtracha a rialú trí bhíthin faireachas ar na teorainneacha glasa agus farraige agus seiceálacha ag pointí trasnaithe teorann, lena n‑éilítear bearta beartais agus eagraíochtúla chun an rialachas imirce agus an ullmhacht i gcomhair géarchéimeanna a fheabhsú agus chun rannchuidiú le háirithiú na slándála inmheánaí san Aontas. Is é an Garda Teorann agus Cósta Eorpach, ina dtéann údaráis inniúla na mBallstát i gcomhar le Frontex, an uirlis lárnach chun an sprioc sin a bhaint amach. Is gá dlúthchomhar saoráideach a bheith idir na gníomhaithe uile lena mbaineann chun go mbeidh sé sin éifeachtach.

Éilítear, le haghaidh faireachas ar theorainneacha, bearta oibríochtúla éifeachtacha údaráis náisiúnta na mBallstát atá freagrach as bainistiú teorainneacha agus láithreacht fheabhsaithe Bhuanchór an Gharda Teorann agus Cósta Eorpaigh i limistéir réamhtheorann, chomh maith le cumais agus bonneagar cosanta teorann treisithe, modhanna faireachais, lena n‑áirítear faireachas aeir, agus trealamh. Ní mór léirithe staide náisiúnta agus Eorpacha atá comhleanúnach cuimsitheach, cur chun feidhme éifeachtúil EUROSUR agus anailís riosca iontaofa a bheith mar thaca leis an bhfaireachas ar theorainneacha. I gcás ina mbíonn ionstraimiú á dhéanamh ar imircigh, is gá do na Ballstáit lena mbaineann, i gcomhréir leis na rialacha is infheidhme i gCód Teorainneacha Schengen, tuilleadh airde a thabhairt ar na codanna den teorainn dá ndéantar difear agus iarrachtaí méadaithe a dhéanamh chun iad a dhaingniú. 10 .

I gcomhthéacs seiceálacha teorann, is é is cuspóir don togra le déanaí maidir le leasú ar Chód Teorainneacha Schengen sainmhíniú ar ionstraimiú imirceach agus rialacha soiléire a thabhairt isteach ba cheart a chomhlíonadh nuair a bheifear ag freagairt ar chásanna ionstraimithe. Is é is aidhm don togra le haghaidh Rialachán maidir le Scagadh 11 a áirithiú go dtabharfar forléargas níos fearr ar cé a thagann isteach ar an gcríoch náisiúnta agus go ndéanfar na rialuithe teorann a nascadh níos fearr le nósanna imeachta um fhilleadh agus tearmann. An tráth céanna, ba cheart an tsreabh rianúil taistealaithe bona fide a bheith ina ábhar tosaíochta ó thaobh slándála agus pleanála teagmhasachta araon de.

I ndáil leis sin, leis na Córais Faisnéise AE a úsáidtear chun bainistíocht a dhéanamh ar na teorainneacha seachtracha (SIS, EES, an Córas Faisnéise Víosaí (VIS), agus an Córas Eorpach um Fhaisnéis agus Údarú Taistil (ETIAS)) agus lena n‑idir‑inoibritheacht, áiritheofar sreabha rianúla sábháilte ag pointí trasnaithe teorann, agus ní hé amháin go mbeidh níos mó faisnéise mar thoradh air sin ach dearadh agus trealamh oiriúnach le haghaidh pointí trasnaithe teorann, comhchuibhiú nósanna imeachta oibríochta teorann agus éifeachtacht mhéadaithe freisin.

Córas coiteann an Aontais maidir le fillteacha 

Ar an gcaoi chéanna le bainistiú teorainneacha seachtracha, braitheann beartas an Aontais um fhilleadh ar dhlúthchomhar idir an Aontas agus na Ballstáit. Tá an sainordú agus na huirlisí riachtanach ag Frontex chun a bheith ina heite oibríochtúil de chóras den sórt sin.

Ní mór do na Ballstáit, agus é mar aidhm fhoriomlán acu filleadh éifeachtach a mhéadú, an tacaíocht atá ar fáil ón nGníomhaireacht a iarraidh agus leas iomlán a bhaint aisti le haghaidh gach céim den phróiseas um fhilleadh agus go háirithe: maidir leis an bhféidearthacht tacaíocht Frontex a eagrú i gcóir oibríochtaí um fhilleadh; tacaíocht Frontex chun córais náisiúnta bainistithe cásanna um fhilleadh a dhigitiú bunaithe ar an gcóras a d’fhorbair Frontex; tacaíocht a thabhairt chun speisialtóirí Frontex um fhilleadh a oiliúint agus a imscaradh; agus rannpháirtíocht i Seirbhísí Comhpháirteacha Ath-imeasctha Frontex.

Chuige sin, ba cheart do na Ballstáit a áirithiú go leagfar amach go mionsonrach ina straitéisí náisiúnta maidir le bainistiú comhtháite teorainneacha conas an comhar sin a chur chun feidhme go praiticiúil. Chomh maith leis sin, ba cheart do na Ballstáit úsáid a bhaint as na huirlisí nua atá ar fáil dóibh, amhail an ghné nua de Chóras Faisnéise Schengen lena gceanglaítear foláirimh a chruthú maidir le daoine atá faoi réir cinntí um fhilleadh.

Sa doiciméad beartais i dtreo straitéis oibríochtúil le haghaidh filleadh níos éifeachtaí, a ghlac an Coimisiún an 24 Eanáir 2023 12 , sainaithnítear réimsí agus gníomhaíochtaí nithiúla chun próiseas fillte saoráideach agus idirnasctha a éascú, agus é mar chuspóir foriomlán filleadh éifeachtach ón Aontas a mhéadú. Ní mór don Líonra Ardleibhéil um Fhilleadh an straitéis oibríochtúil a thabhairt chun críche go gasta agus déanfaidh an Comhordaitheoir um Fhilleadh agus an Líonra Ardleibhéil comhordú ar chur chun feidhme na straitéise.

Céim thábhachtach i dtreo Córas coiteann Aontais maidir le fillteacha is ea an Moladh ón gCoimisiún maidir le haitheantas frithpháirteach a thabhairt do chinntí um fhilleadh agus maidir le dlús a chur le filleadh a glacadh i gcomhthráth leis an Teachtaireacht 13 seo. Is é is aidhm dó cur leis an gcóineasú idir na Ballstáit maidir leis an imirce a bhainistiú, d’fhonn fillteacha a éascú agus a bhrostú.

Comhar le tríú tíortha

Leis an mbainistiú comhtháite teorainneacha san Eoraip, ceanglaítear ar na Ballstáit agus ar an nGníomhaireacht an comhar le tríú tíortha a threisiú, chun rannchuidiú le hacmhainneachtaí oibríochtúla agus comhair tríú tíortha a fhorbairt i réimsí an rialaithe teorann, anailíse riosca, filleadh agus athligean isteach.

Sa chomhthéacs sin, rannchuidíonn comhaontuithe stádais agus socruithe oibre lena gcumasaítear comhar Frontex le tríú tíortha, i gcomhréir le dlí an Aontais, le bainistiú éifeachtach comhtháite teorainneacha san Eoraip. Ceadaíonn comhaontuithe stádais gardaí teorann Frontex a imscaradh chun oibriú i gcomhar le gardaí teorann ó thríú tíortha, rud a chuidíonn le cosc a chur ar imirce neamhrialta agus le smuigleáil agus gníomhaíochtaí coiriúla a chomhrac.

Tá ceithre chomhaontú stádais caibidlithe ag an gCoimisiún Eorpach 14 laistigh de thréimhse níos lú ná 12 mhí, rud a fhágann gur féidir le Frontex foirne bainistithe teorainneacha a imscaradh go hoibríochtúil chuig na tríú tíortha is faighteoirí. Tá sainordú ag an gComhairle comhaontuithe comhchosúla a chaibidliú le ceithre thír eile.

Ina theannta sin, ó glacadh múnla an Choimisiúin maidir le socruithe oibre Frontex le húdaráis bainistithe teorainneacha tríú tíortha 15 , sheol an Ghníomhaireacht caibidlíocht maidir le deich socrú oibre 16 den sórt sin, agus táthar ag súil go dtabharfar i gcrích iad go léir i mbliana.

Ina theannta sin, leathnaigh Frontex a líonra oifigeach idirchaidrimh i dtríú tíortha, lena n‑áirítear oifigeach idirchaidreamh chuig Réigiún Chomhpháirtíocht an Oirthir (an ceann is déanaí). Mhol sé freisin go ndéanfaí oifigeach idirchaidreamh a imscaradh lena gcumhdófaí trí thír san Afraic Thiar, a ndearna an Coimisiún measúnú dearfach air.

Ar an iomlán, d’fhéadfadh forbairt beart nithiúil i dtríú tíortha, amhail oifigigh idirchaidrimh na hEorpa um imirce agus um fhilleadh agus tacaíocht airgeadais oibríochtúil maidir le bainistiú teorainneacha, lena n‑áirítear i dtríú tíortha comharsanachta, a bheith ina uirlis éifeachtach chun dul i ngleic le sreabha imirce neamhrialta i dtreo AE, i gcomhréir le cur chuige cuimsitheach AE maidir leis an imirce. I ndáil leis an méid sin, ní mór aird ar leith a thabhairt ar chomharsanacht an Oirthir agus an Deiscirt, mar aon leis na tríú tíortha óna dtéann na príomhbhealaí imirce i dtreo an Aontais agus trína dtéann siad ar aghaidh.

Comhar idirghníomhaireachta

Gné ríthábhachtach de bhainistiú comhtháite teorainneacha éifeachtach is ea comhar agus malartú faisnéise níos fearr i measc na n‑údarás ábhartha uile ar an leibhéal náisiúnta agus ar leibhéal an Aontais Eorpaigh a mhéadú chun tuiscint níos fearr a fháil ar na bagairtí do theorainneacha seachtracha an Aontais, iad a bhrath agus freagairt dóibh.

I ndáil leis an méid sin, áirítear leis na príomhghníomhaireachtaí ar leibhéal an Aontais Eorpaigh: Frontex, Gníomhaireacht an Aontais Eorpaigh i ndáil le Comhar i bhForfheidhmiú an Dlí (Europol), Gníomhaireacht an Aontais Eorpaigh um Thearmann (EUAA), agus Gníomhaireacht an Aontais Eorpaigh chun Bainistiú Oibríochtúil a dhéanamh ar Chórais Mhórscála TF sa Limistéar Saoirse, Slándála agus Ceartais (eu-LISA).

Ina theannta sin, ba cheart bealaí soiléire cumarsáide a bheith ann agus comhar neartaithe idir údaráis bainistithe teorann agus údaráis inniúla eile ar an leibhéal náisiúnta, amhail údaráis chustaim, sna Ballstáit, lena mbaineann roinnt struchtúir oibre agus struchtúir chomhair fheidhmiúla dea‑shainithe.

Teicneolaíocht úrscothach a úsáid, lena n‑áirítear córais faisnéise ar mhórscála

Ar fud an Aontais, ní mór bearta a neartú chun faireachán cruinn comhsheasmhach a dhéanamh ar ghluaiseacht paisinéirí agus earraí isteach san Aontas nó tríd an tAontas, lena n‑áirítear trí ghníomhaíochtaí faisnéisbhunaithe (i.e. bunaithe ar mheasúnú riosca).

Ina theannta sin, ní mór do na Ballstáit a áirithiú go gcuirfear chun feidhme go rathúil Córais Faisnéise AE nua agus athnuaite le haghaidh teorainneacha agus slándála (SIS, VIS, EES agus ETIAS), sin agus a n‑idir‑inoibritheacht a áirithiú, i gcomhréir leis na hamlínte a comhaontaíodh. Nuair a chuirfear tús le feidhmiú córas faisnéise AE nua agus athbhreithnithe, neartófar an bainistiú teorainneacha agus cuirfear feabhas ar chumas an Aontais faireachán a dhéanamh ar a theorainneacha seachtracha. Thairis sin, ba cheart gnéithe nua arna soláthar ag an Stór Coiteann um Thuairisciú agus Staidreamh, atá le bunú ag eu-LISA in 2024, a úsáid chun tacú leis an bhfeasacht staide agus chun treochtaí gluaiseachtaí a shainaithint.

Cearta bunúsacha a urramú, a chosaint agus a chur chun cinn

Ceanglaítear ar an nGarda Teorann agus Cósta Eorpach cosaint na gceart bunúsach a ráthú i bhfeidhmiú cúraimí bainistithe teorainneacha mar ghné uileghabhálach. Ba cheart gníomhaíochtaí AE agus gníomhaithe náisiúnta laistigh den Gharda Teorann agus Cósta Eorpach a cur i gcrích, le tríú tíortha san áireamh, i gcomhréir iomlán le dlí ábhartha AE, lena n‑áirítear Cairt um Chearta Bunúsacha an Aontais Eorpaigh agus dlí idirnáisiúnta.

Ba cheart do Frontex agus do na Ballstáit cultúr bainistiú comhtháite teorainneacha a chothú arb é is príomhthréith dó dlí an Aontais agus dlí idirnáisiúnta a chomhlíonadh, lena n‑áirítear prionsabal an non‑refoulement, trí lánurraim a thabhairt do chearta bunúsacha, agus ba cheart dóibh coimircí maidir le cearta bunúsacha a chomhtháthú ar fud a ngníomhaíochtaí uile.

Tá lucht faireacháin ar chearta bunúsacha chun urraim do chearta bunúsacha a chosaint agus a chur chun cinn mar eilimint lárnach de ghníomhaíochtaí uile an Gharda Teorann agus Cósta Eorpaigh, faoi gach gné de bhainistiú comhtháite teorainneacha. Ina theannta sin, is féidir le sásraí faireacháin náisiúnta um chearta bunúsacha, mar a mhol an Coimisiún chun scagadh a dhéanamh ar náisiúnaigh tríú tír 17 , rannchuidiú go mór leis an trédhearcacht agus leis an gcuntasacht a fheabhsú maidir le cúrsaí ag teorainneacha seachtracha an Aontais.

Córas rialaithe cáilíochta atá comhleanúnach agus cuimsitheach

Trí mheasúnú a dhéanamh ar chur chun feidhme acquis Schengen ar an leibhéal náisiúnta agus ar leibhéal an Aontais Eorpaigh, rannchuideofar le bainistiú na dteorainneacha seachtracha a neartú agus leis na bearta a chur chun feidhme lena gcúiteofar an easpa rialuithe teorann laistigh de limistéar Schengen agus a chumhdaítear faoi bainistiú comhtháite teorainneacha ar bhealach éifeachtúil.

Tá an mheicníocht rialaithe cáilíochta comhdhéanta go háirithe de Mheicníocht Meastóireachta agus Faireacháin Schengen agus de mheasúnú leochaileachta Frontex. Is bonn riachtanach é rialú cáilíochta do Thimthriall Rialachais Schengen chun foráil a dhéanamh d’fheasacht chuimsitheach staide ar an leibhéal náisiúnta agus ar leibhéal an Aontais Eorpaigh agus chun fónamh mar bhonn d’idirphlé maidir le feidhmiú limistéar Schengen.

Ionstraimí cistiúcháin de chuid an Aontais 

Tá ról ríthábhachtach ag ionstraimí cistiúcháin an Aontais i gcur chun feidhme éifeachtach straitéis EIBM, go háirithe an Ionstraim um Bainistiú Teorainneacha agus um Beartas Víosaí (IBTV) agus an Ciste um Thearmann, Imirce agus Lánpháirtíocht (CTIL). Tacóidh cistí AE le gníomhaíochtaí bainistiú comhtháite teorainneacha ar leibhéal an Aontais agus ar an leibhéal náisiúnta.

Agus ionstraimí cistiúcháin an Aontais á n‑úsáid acu, tá sé ríthábhachtach go bhfuil sé mar aidhm ag na Ballstáit a dtosaíochtaí a leagan síos i gcomhréir le spriocanna bainistiú comhtháite teorainneacha, d’fhonn an breisluach AE is mó a bhaint amach. Ina theannta sin, tacaíonn buiséad tiomnaithe na Gníomhaireachta a eascraíonn as buiséad foriomlán an Aontais le gníomhaíochtaí Frontex.

Soláthrófar tacaíocht do thríú tíortha tríd an Ionstraim um Chomharsanacht, Forbairt agus Comhar Idirnáisiúnta — An Eoraip Dhomhanda (NDICI-GE) agus tríd an Ionstraim um Chúnamh Réamhaontachais (IPA III), i gcomhlántacht le gníomhaíochtaí ábhartha faoi IBTV agus faoi CTIL.

Ina theannta sin, ní mór príomhtheorainneacha seachtracha áirithe a neartú trí bhearta spriocdhírithe Aontais, lena n‑áirítear cistí AE a shlógadh chun tacú leis na Ballstáit cumais agus bonneagar rialaithe teorann, modhanna faireachais agus trealaimh agus cistiú déthaobhach a threisiú.

Ar deireadh, leis an Ionstraim um Thacaíocht Theicniúil 18 , cuirtear ar chumas na mBallstát tacaíocht a iarraidh chun gnéithe ábhartha de straitéisí náisiúnta bainistiú comhtháite teorainneacha a chur chun feidhme.

Na chéad chéimeanna eile

Cuireann an Teachtaireacht seo stiúradh beartais ar fáil maidir le cur chun feidhme bainistiú comhtháite teorainneacha ag an nGarda Teorann agus Cósta Eorpach sna cúig bliana amach romhainn. Mar an chéad chéim eile, ní mór don Ghníomhaireacht agus do na Ballstáit é a aistriú go héifeachtach ina chuspóirí oibríochtúla agus ina ghníomhaíochtaí oibríochtúla, mar a cheanglaítear le Rialachán an Garda Teorann agus Cósta Eorpach.

Ní mór don Ghníomhaireacht, i ndlúthchomhar leis na Ballstáit agus leis an gCoimisiún, straitéis theicniúil agus oibríochtúil nua a bhunú le haghaidh bainistiú comhtháite teorainneacha 19 . Ba cheart do Bhord Bainistíochta Frontex an straitéis theicniúil agus oibríochtúil a ghlacadh laistigh de shé mhí tar éis ghlacadh na Teachtaireachta seo. Ba cheart go mbeadh an straitéis i gcomhréir leis an treoir pholaitiúil a thugann institiúidí an Aontais Eorpaigh agus, go sonrach, leis na ceanglais a leagtar amach in Iarscríbhinn II a ghabhann leis an Teachtaireacht seo, agus ba cheart í a chur chun feidhme.

Ar an dara dul síos, chun bainistiú comhtháite teorainneacha a chur chun feidhme, éilítear freisin go ndéanfar an straitéis arna bunú ar leibhéal an Aontais Eorpaigh a aistriú go héifeachtach sna straitéisí náisiúnta i gcóir bainistiú comhtháite teorainneacha arna dtarraingt suas ag na Ballstáit. 20 Ba cheart do na Ballstáit a straitéisí náisiúnta i gcóir bainistiú comhtháite teorainneacha a ailíniú le beartas straitéiseach ilbhliantúil bainistiú comhtháite teorainneacha laistigh de 12 mhí tar éis ghlacadh na Teachtaireachta seo. Chun na torthaí is fearr a bhaint amach laistigh den Gharda Teorann agus Cósta Eorpach, ba cheart é a bheith mar aidhm ag na Ballstáit na ceanglais a leagtar síos in Iarscríbhinn II a ghabhann leis an Teachtaireacht seo a urramú.

Ag an am céanna, in ainneoin go bhfuil gá le pleanáil straitéiseach fhadtéarmach do bainistiú comhtháite teorainneacha, éilíonn an timpeallacht oibríochtúil dhinimiciúil íogair faireachán leanúnach ar fhorbairtí, agus oiriúnú solúbtha do na riachtanais athraitheacha. Le timthriall Schengen beifear in ann an faireachán sin a dhéanamh agus áiritheofar leis gur féidir na dúshláin atá ag teacht chun cinn i gcur chun feidhme bainistiú comhtháite teorainneacha a chur san áireamh go hiomchuí, agus gur féidir, i gcás inar gá, tosaíochtaí a chur in oiriúint do na riachtanais athraitheacha, ionas gur féidir timthriall bainistiú comhtháite teorainneacha a chur chun feidhme go rathúil ar fud an Aontais.

I dteannta thimthriall Schengen, féadfaidh Parlaimint na hEorpa agus an Chomhairle treoraíocht straitéiseach agus dearcadh straitéiseach a chur ar fáil do Frontex freisin gach bliain trí dhul i gcomhairle le doiciméad clársceidealaithe na Gníomhaireachta. Is uirlis thábhachtach iad an comhar idirpharlaiminteach dá bhforáiltear in Airteagal 112 den Rialachán maidir leis an nGarda Teorann agus Cósta Eorpach, agus na cruinnithe a reáchtáiltear mar chuid den chomhar sin, chun a áirithiú go ndéantar feidhmeanna grinnscrúdaithe Pharlaimint na hEorpa ar an nGníomhaireacht agus feidhmeanna grinnscrúdaithe na bparlaimintí náisiúnta ar a n‑údaráis náisiúnta féin i gcur chun feidhme an bhainistithe chomhtháite teorainneacha san Eoraip a fheidhmiú go héifeachtach.

Seolfaidh an Coimisiún an mheastóireacht ar bheartas straitéiseach bainistiú comhtháite teorainneacha ceithre bliana tar éis ghlacadh na Teachtaireachta seo 21 . Cuirfear torthaí na meastóireachta sin san áireamh agus an timthriall beartais ilbhliantúil ina dhiaidh sin á ullmhú. Roimhe sin, leis an meastóireacht atá ar siúl faoi láthair ar Rialachán an Garda Teorann agus Cósta Eorpach agus a chuirfear i gcrích roimh dheireadh na bliana 22 , tabharfar an chéad deis chun an próiseas sin a mheas.

Ag bogadh ar aghaidh, leanfaidh an Coimisiún de bheith ag cinntiú go gcuirfear guth na ngeallsealbhóirí ábhartha uile san áireamh agus cur chuige comhchoiteann Eorpach á shainiú maidir le bainistiú na dteorainneacha seachtracha. I gcás limistéar láidir gan rialuithe ag teorainneacha inmheánacha, is freagracht chomhchoiteann é na teorainneacha seachtracha a bhainistiú, freagracht a éilíonn tiomantas agus tacaíocht dúinn go léir.

(1)

Airteagal 8(4) de Rialachán (AE) 2019/1896 ó Pharlaimint na hEorpa agus ón gComhairle an 13 Samhain 2019 maidir leis an nGarda Teorann agus Cósta Eorpach agus lena n‑aisghairtear Rialacháin (AE) Uimh. 1052/2013 agus (AE) 2016/1624 (Rialachán EBCG), 14.11.2019, IO L295, lch. 1.

(2)

Doiciméad beartais chun beartas straitéiseach ilbhliantúil a cheapadh maidir le bainistiú comhtháite teorainneacha san Eoraip i gcomhréir le hAirteagal 8(4) de Rialachán (AE) 2019/1896, COM(2022) 303 final.

(3)

Litir ó Chathaoirleach an Choiste um Shaoirsí Sibhialta, um Cheartas agus um Ghnóthaí Baile, coiste de chuid Pharlaimint na hEorpa, 17 Eanáir 2023, POL-COM-LIBE D(2023) 1361.

(4)

Timthriall an bheartais ilbhliantúil straitéisigh le haghaidh bainistiú comhtháite teorainneacha san Eoraip (EIBM) – Conclúidí ón gComhairle (14 Deireadh Fómhair 2022) 13585/22.

(5)

Féach fonóta 1.

(6)

Lena n‑áirítear gardaí cósta a mhéid a dhéanann siad cúraimí rialaithe ag teorainneacha, chomh maith leis na húdaráis náisiúnta atá freagrach as an bhfilleadh (Airteagal 4 de Rialachán EBCG).

(7)

https://prd.frontex.europa.eu/document/strategic-risk-analysis-2022/.

(8)

 Aithris (11) de Rialachán EBCG.

(9)

Leis na caighdeán theicniúla maidir le malartú faisnéise, déanfar nascadh líonraí cumarsáide éagsúla agus forbairt comhéadan idir córais malartaithe faisnéise na Gníomhaireachta agus na mBallstát a éascú. Cuirfidh sé sin leis na féidearthachtaí a bheidh ann a léirithe staide féin a chraoladh laistigh de EBCG agus chuig tríú tíortha, i gcás comhar oibríochtúil den sórt sin, agus suíomh acmhainní na Gníomhaireachta féin sa léiriú staide Eorpach a thuairisciú trí úsáid a bhaint as an gcóras loingseoireachta satailíte a bhunaítear faoi chlár Galileo. Dá thoradh sin, beidh sonraí neas‑fhíorama agus féidearthachtaí níos fearr ar fáil do na Ballstáit agus don Ghníomhaireacht chun sreabha imirce a thuar.

(10)

Féach Airteagal 13(2) de Rialachán (AE) Uimh. 2016/399 ó Pharlaimint na hEorpa agus ón gComhairle an 9 Márta 2016 maidir le Cód an Aontais maidir leis na rialacha lena rialaítear gluaiseacht daoine thar theorainneacha (Cód Teorainneacha Schengen) (IO L 77, 23.3.2016, lch. 1).

(11)

Togra le haghaidh Rialachán ó Pharlaimint na hEorpa agus ón gComhairle lena dtugtar isteach scagadh ar náisiúnaigh tríú tír ag na teorainneacha seachtracha agus lena leasaítear Rialachán (CE) Uimh. 767/2008, (AE) 2017/2226, (AE) 2018/1240 agus (AE) 2019/817, COM(2020)612 final.

(12)

Doiciméad beartais i dtreo straitéis oibríochtúil le haghaidh fillteacha níos éifeachtaí an 24 Eanáir 2023, COM(2023) 45 final.

(13)

Moladh ón gCoimisiún maidir le haitheantas frithpháirteach do chinntí um fhilleadh agus maidir le dlús a chur le filleadh agus Treoir 2008/115/CE ó Pharlaimint na hEorpa agus ón gComhairle, C(2023) 1763 á cur chun feidhme.

(14)

An Mholdóiv, an Mhacadóin Thuaidh, an Albáin agus Montainéagró.

(15)

Teachtaireacht ón gCoimisiún chuig Parlaimint na hEorpa agus chuig an gComhairle: Samhail-chomhaontú stádais dá dtagraítear in Airteagal 54(5) de Rialachán (AE) 2016/1624 ó Pharlaimint na hEorpa agus ón gComhairle an 14 Meán Fómhair 2016 maidir leis an nGarda Teorann agus Cósta Eorpach, COM(2021)747final.

(16)

An Albáin, an Bhoisnia agus an Heirseagaivéin, an Chosaiv [tá an t-ainmniú seo gan dochar do sheasaimh maidir le stádas, agus tá sé ag teacht le Rún 1244/1999 ó Chomhairle Slándála na Náisiún Aontaithe agus le tuairim CBI maidir le dearbhú neamhspleáchais na Cosaive], an Mholdóiv, Montainéagró, an Mhacadóin Thuaidh, an tSeirbia, an Mháratáin, an Nígir agus an tSeineagáil.

(17)

Togra ón gCoimisiún le haghaidh Rialachán ó Pharlaimint na hEorpa agus ón gComhairle lena dtugtar isteach scagadh ar náisiúnaigh tríú tír ag na teorainneacha seachtracha agus lena leasaítear Rialachán (CE) Uimh. 767/2008, (AE) 2017/2226, (AE) 2018/1240 agus (AE) 2019/817, COM(2020)612 final.

(18)

Rialachán (AE) 2021/240 ó Pharlaimint na hEorpa agus ón gComhairle an 10 Feabhra 2021 lena mbunaítear Ionstraim um Thacaíocht Theicniúil, IO L 57, 18.2.2021, lch. 1.

(19)

Airteagal 8(5) den Rialachán maidir leis an nGarda Teorann agus Cósta Eorpach.

(20)

Airteagal 8(6) den Rialachán maidir leis an nGarda Teorann agus Cósta Eorpach.

(21)

Airteagal 8(7) den Rialachán maidir leis an nGarda Teorann agus Cósta Eorpach.

(22)

Airteagal 121 den Rialachán maidir leis an nGarda Teorann agus Cósta Eorpach.

AN COIMISIÚN EORPACH

Strasbourg, 14.3.2023

COM(2023) 146 final

IARSCRÍBHINNÍ

a ghabhann leis an

TEACHTAIREACHT ÓN gCOIMISIÚN CHUIG PARLIAMINT NA hEORPA AGUS CHUIG AN gCOMHAIRLE

lena mbunaítear an beartas straitéiseach ilbhliantúil le haghaidh bainistiú comhtháite teorainneacha san Eoraip

IARSCRÍBHINN I 
GNÉITHE EIBM

Tosaíochtaí beartais agus treoirlínte straitéiseacha le haghaidh gnéithe den bhainistiú comhtháite teorainneacha san Eoraip

I Rialachán (AE) 2019/1896 liostaítear 15 ghné 1 chun bainistiú comhtháite teorainneacha san Eoraip (EIBM) a bhunú. I gcomhréir le Airteagal 8(2) den Rialachán, shainaithin an Coimisiún na tosaíochtaí beartais agus na treoirlínte straitéiseacha seo a leanas i ndáil leis na 15 ghné sin 2 , agus Anailís Riosca Straitéiseach 2022 á cur san áireamh aige agus torthaí na meastóireachta téamaí ar na straitéisí náisiúnta um bainistiú comhtháite teorainneacha in 2019 agus 2020 3 á bhforbairt aige, agus tar éis dó dul i gcomhairle le Parlaimint na hEorpa agus leis an gComhairle, .  

Tosaíochtaí beartais

Is gné lárnach ríthábhachtach de bhainistiú comhtháite teorainneacha san Eoraip é rialú ag teorainneacha (seiceálacha teorann ag pointí trasnaithe teorann agus faireachas ar theorainneacha idir pointí trasnaithe teorann) ar bhonn anailís riosca. Ba cheart an acmhainneacht dhlíthiúil, institiúideach, riaracháin agus oibríochtúil a bheith ag Frontex agus ag údaráis bainistithe teorainneacha na mBallstát, arb iad i dteannta a chéile a chomhdhéanann an Garda Teorann agus Cósta Eorpach, mar aon leis na hacmhainní is gá chun rialú teorann éifeachtach éifeachtúil a dhéanamh beag beann ar na himthosca 5 .

Tá cuspóirí iomadúla ag an rialú ag teorainneacha. Ar an gcéad dul síos, déanann seiceálacha teorann ag pointí trasnaithe teorann ainmnithe éascaíocht do thrasnuithe teorann dlisteanacha ag daoine agus don trácht trasteorann. An tráth céanna, le faireachas ar theorainneacha a dhéantar sna limistéir teorann idir pointí trasnaithe teorann cuirtear cosc ar thrasnuithe neamhúdaraithe teorainneacha seachtracha. Neartaíonn sé slándáil inmheánach an Aontais trína bheith ag rannchuidiú le cineálacha éagsúla coireachta trasteorann a chosc, a bhrath agus a chomhrac, amhail sceimhlitheoireacht, gáinneáil ar airm thine nó gáinneáil ar dhaoine, agus táthar in ann bearta a dhéanamh dá thairbhe i leith daoine a thrasnaigh an teorainn go neamhdhleathach.

Amach anseo, ba cheart a áirithiú leis an Rialachán maidir le Scagadh 6 , nuair a bheidh sé glactha, go gcumhdófar freisin le rialú ag teorainneacha an réamhscagadh is infheidhme maidir leis na náisiúnaigh tríú tír uile atá i láthair ag na teorainneacha seachtracha nach gcomhlíonann na coinníollacha maidir le dul isteach nó a cuireadh ó bhord tar éis oibríocht cuardaigh agus tarrthála. Dá réir sin, na daoine uile a thrasnaíonn na teorainneacha seachtracha gan na coinníollacha maidir le dul isteach a chomhlíonadh, beidh siad faoi réir sásra atreoraithe (i.e. bearta scagtha agus faisnéisithe, sainaithint, tógáil méarlorg).

Ba cheart do Frontex tacú leis na Ballstáit, agus iad ag déanamh a gcúraimí de réir riachtanais an Gharda Teorann agus Cósta Eorpaigh, mar a chomhaontaítear go leithleach leis na Ballstáit.

Ceanglaítear le dlí an Aontais go ndéanfar rialú ag teorainneacha ar bhealach ina n‑urramaítear cearta bunúsacha gach duine, bídís ag lorg cosaint idirnáisiúnta nó ná bídís. Ní mór rochtain éifeachtach a sholáthar do dhaoine aonair a bhfuil cosaint idirnáisiúnta á lorg acu ar na nósanna imeachta chun an chosaint sin a dheonú, lena n‑áirítear ag na teorainneacha seachtracha nó i limistéir idirthurais na mBallstát. Daoine aonair nach bhfuil cosaint á lorg acu, tagann siad mar sin féin faoi chosaint dhlí an Aontais agus an dlí idirnáisiúnta is infheidhme, lena n‑áirítear prionsabal annon‑refoulement.

Treoirlínte straitéiseacha

1.Mar phointe tosaigh, ní mór an acmhainneacht dhlíthiúil, struchtúrach, riaracháin agus theicniúil a bheith ag na Ballstáit chun seiceálacha teorann a dhéanamh i gcomhréir le Cód Teorainneacha Schengen (SBC) 7 agus chun trasnuithe dlisteanacha teorann ag daoine agus ag feithiclí a éascú. An líon pointí trasnaithe teorann ag na teorainneacha seachtracha, ba cheart acmhainneachtaí (acmhainní agus bonneagar), cineálacha teorann (talún, farraige agus aeir) agus dúshláin chothrománacha (amhail sreabh paisinéirí, coireacht trasteorann, nó ionstraimiú imirceach) a chur san áireamh leo.

2.Ba cheart do na Ballstáit trasnuithe teorann atá slán saoráideach a ráthú do phaisinéirí agus d’fheithiclí ag na pointí trasnaithe teorann.

3.Ba cheart an réamhbhailiú faisnéise don fheidhm seiceála teorann (faisnéis réamhtheachta mar eilimint lárnach den fheidhm seiceála teorann) a úsáid go córasach agus a fhorbairt a thuilleadh trí úsáid éifeachtach a bhaint as an gcóras Réamhfhaisnéise faoi Phaisinéirí (API).

4.Ba cheart an nós imeachta um sheiceálacha teorann a dhéanamh go héifeachtach i gcomhréir le Cód Teorainneacha Schengen; agus ba cheart feabhas a chur air agus é a bharrfheabhsú trí chórais faisnéise AE le haghaidh imirce, teorainneacha agus slándála (EES, ETIAS, VIS, Eurodac, Córas Faisnéise Schengen agus ECRIS‑TCN) agus a n‑idir‑inoibritheacht a chur chun feidhme go cuimsitheach. Méadóidh sé sin an méid faisnéise agus cáilíocht na faisnéise atá ar fáil chun críocha seiceálacha teorann. Thairis sin, cuirfear tuilleadh feabhais ar an bpróiseas le haghaidh trasnuithe teorann seachtraí má dhéanfar doiciméid taistil a dhigitiú amach anseo. Ba cheart do na Ballstáit a áirithiú go gcuirfear na córais faisnéise nua agus athnuaite chun feidhme go tráthúil agus i gceart ag a dteorainneacha. Ba cheart rochtain ar Chóras Faisnéise Schengen a bheith ag foireann an Bhuanchóir fad a bheidh siad imscartha chun oibríochta.

5.Ba cheart feasacht staide iontaofa chuimsitheach ag na teorainneacha a choinneáil ar bun ar gach leibhéal chun ardchumas a ráthú chun na bearta is gá a dhéanamh ar leibhéal an Aontais agus ar an leibhéal náisiúnta. Ba cheart léirithe staide náisiúnta agus Eorpacha neas‑fhíorama cuimsitheacha a choinneáil ar bun, a roinnt agus a fhorbairt a thuilleadh ar an leibhéal náisiúnta agus ar leibhéal an Aontais, i gcomhréir leis an gcreat dlíthiúil agus leis na riachtanais oibríochtúla.

6.Ba cheart feasacht staide leanúnach (24/7) a bheith mar bhonn do chumas freagartha iomchuí chun caoi a thabhairt don fhreagairt éifeachtach ar gach teagmhas teorann, lena n‑áirítear athruithe gan choinne ag na teorainneacha seachtracha agus staideanna inimirce neamhrialta ar mhórscála. Ba cheart an cumas sin a áirithiú i ngach cás ar leibhéal an Aontais agus ar an leibhéal náisiúnta. Ba cheart cumas náisiúnta agus cumas Aontais a fhorbairt chun an rialú teorann a neartú go tapa, i gcás inar gá sin, ag aon phointe trasnaithe teorann agus ag aon chuid de na teorainneacha seachtracha. Ba cheart tástáil thráthrialta a dhéanamh ar chumas freagartha agus ar an bpleanáil teagmhasachta agus ba cheart iad a oiriúnú a thuilleadh don chás, go háirithe má bhíonn ionstraimiú á dhéanamh ar imircigh. Ba cheart athbhreithniú leanúnach a dhéanamh dá réir ar Frontex a bheith i láthair ag na teorainneacha seachtracha agus á chur in úsáid.

7.Ba cheart do Frontex a áirithiú go dtógfar an córas do Dhoiciméid Bhréagacha agus Doiciméid Bharántúla ar Líne (FADO) ar lámh ó Ardrúnaíocht na Comhairle go luath amach anseo. Ba cheart d’údaráis inniúla na mBallstát, mar chuid de EBCG, tacaíocht iomlán a thabhairt do Frontex san iarracht sin agus rannchuidiú le tuilleadh forbartha a dhéanamh ar an gcóras agus ar an Ionad Barr Feabhais um Chalaois Doiciméad a Chomhrac, trí fhaisnéis maidir le hearraí góchumtha agus doiciméid bhrionnaithe a braitheadh a mhalartú leis an Ionad ar bhonn níos gníomhaí. Ba cheart do Frontex a shainordú iomlán sa spás slándála doiciméad a oibríochtú freisin trína bheith ag cur lena chumais tacú leis an gCoimisiún agus leis na Ballstáit measúnuithe agus tástálacha comhlíontachta a dhéanamh ar dhoiciméid taistil arna n‑eisiúint ag na Ballstáit.

8.Ba cheart acmhainneacht chobhsaí (eagraíochtúil, riaracháin agus theicniúil) a bheith ag córais chomhtháite náisiúnta um fhaireachas ar theorainneacha a bhfuil anailís riosca mar bhonn leo agus ba cheart dóibh a bheith i staid leanúnach foláirimh. Is gá sin chun trasnuithe teorann neamhúdaraithe a chosc agus a bhrath, chun daoine a thrasnaigh an teorainn go neamhdhleathach a ghabháil agus chun a áirithiú go mbeidh na daoine sin faoi réir nósanna imeachta atreoraithe comhleanúnacha cuimsitheacha (i.e. nósanna imeachta um scagadh) lena n‑urramaítear dá gcearta bunúsacha, chun modhanna iompair a thascradh, amhail soithí a úsáideadh chun an teorainn a thrasnú go neamhdhleathach, chun an choireacht trasteorann a chomhrac, amhail an smuigleáil, an gháinneáil ar dhaoine agus an sceimhlitheoireacht, agus chun freagairt do bhagairtí de chineál hibrideach.

9.Gníomhaíochtaí faireachais fheabhsaithe ag gach cuid den teorainn sheachtrach talún agus farraige, lena n‑áirítear limistéir réamhtheorann, ba cheart iad a bheith comhfhreagrach don leibhéal tionchair a shanntar dóibh trí chórais chomhtháite faireachais, trealamh soghluaiste agus patróil (aonaid) shoghluaiste a úsáid agus trí fhorbairt a dhéanamh ar thorthaí na hanailíse riosca. Ba cheart na leibhéil tionchair a shainaithint ar bhealach comhchuibhithe ar fud an Aontais.

10.Ba cheart faireachán seasmhach (24/7) a dhéanamh ar an teorainn sheachtrach. Ba cheart gníomhaíochtaí faireachais ag na teorainneacha agus i limistéir réamhtheorann a dhéanamh, ag úsáid uirlisí éagsúla, agus é mar aidhm acu sásra luathrabhaidh a bhunú, faisnéis inghníomhaithe a roinnt agus feabhas a chur ar an gcumas freagartha, lena n‑áirítear trí acmhainní a leithdháileadh ar bhealach inscálaithe.

11.Ba cheart go mbeadh cumais faireachais choiteanna idir‑inoibritheacha Eorpacha ann chun tacú leis na córais náisiúnta faireachais chomhtháite. Ba cheart an faireachas teorann (lena n‑áirítear i limistéir réamhtheorann) a eagrú i gcomhréir le Rialachán EBCG agus le Cód Teorainneacha Schengen. I gcás ina bhfuil níos mó ná seirbhís amháin páirteach san fhaireachas teorann ar an leibhéal náisiúnta, ba cheart do na Ballstáit lena mbaineann an t‑údarás inniúil náisiúnta atá i gceannas ar an maoirseacht ghinearálta agus ar na sásraí ceannais, comhair agus comhordaithe is gá a shainaithint, agus ba cheart dóibh a áirithiú go bhfuil freagrachtaí na gcomhlachtaí agus na ngníomhaireachtaí éagsúla á rialú le reachtaíocht nó le comhaontuithe comhair. Ba cheart go mbeadh na cumais faireachais náisiúnta ar faoi úinéireacht údarás éagsúil iad ag feidhmiú i gcomhréir le Rialachán EBCG agus le Lámhleabhar nuashonraithe EUROSUR.

12.Ar leibhéal an Aontais agus ar an leibhéal náisiúnta, ba cheart sonraí arna mbailiú ag údaráis éagsúla, má theastaíonn siad ó údaráis Ballstát eile, a roinnt trí na lárionaid náisiúnta comhordúcháin.

13.Ní mór don chóras faireachais teorann farraige a bheith in ann gach soitheach a thagann isteach sna huiscí teorann a bhrath, a shainaithint agus, más gá, a rianú agus a thascradh agus ní mór don chóras cuidiú lena áirithiú go ndéanfar beatha daoine a chosaint agus a shábháil ar muir beag beann ar na dálaí aimsire agus le líon na ndaoine atá ag teacht go neamhrialta chuig an Aontas a laghdú. Ba cheart do na Ballstáit úsáid a bhaint as na cumais faireachais a chuireann Frontex ar fáil chun acmhainneachtaí náisiúnta agus an fheasacht staide fhoriomlán a mhéadú. Tá dlúthchomhar idirghníomhaireachta idir údaráis náisiúnta inniúla EBCG, Frontex, an Ghníomhaireacht Eorpach um Shábháilteacht Mhuirí (EMSA) agus an Ghníomhaireacht Eorpach um Rialú ar Iascach (EFCA), chomh maith le comhar le Lárionaid Comhordúcháin Tarrthála Muirí, ríthábhachtach chun comhar feabhsaithe a áirithiú ina leith sin.

14.Ní mór don chóras faireachais teorann talún a bheith in ann gach trasnú teorann neamhúdaraithe a nochtadh agus gach duine a thrasnaíonn an teorainn go neamhdhleathach i limistéir ardriosca a thascradh i gcúinsí ar bith. D’fhéadfaí cumais agus bonneagar soghluaiste nó do‑aistrithe, agus foireann oilte speisialaithe, a áireamh i gcórais faireachais ar theorainneacha talún. Ba cheart tús áite a thabhairt do theicneolaíochtaí úrscothacha agus do threalamh agus réitigh theicniúla éagsúla (i.e. ladrainn a úsáid). Sonraí pearsanta a bhailiú agus a phróiseáil ar bhealach eile trí bhíthin teicneolaíochtaí den sórt sin, ní mór foráil maidir leis sin a dhéanamh le dlí, agus ní mór é a fheidhmiú i gcomhréir le dlí an Aontais agus leis an dlí náisiúnta, lena n‑áirítear maidir le cosaint sonraí pearsanta.

15.Ba cheart scagadh a dhéanamh go córasach ar na daoine sin a thrasnaigh an teorainn sheachtrach gan bheith faoi réir seiceálacha teorann. Tá sé de chuspóirí ag an scagadh inter alia daoine a shainaithint, seiceálacha slándála agus sláinte a dhéanamh agus na daoine a ndearnadh scagadh orthu a atreorú chuig na nósanna imeachta iomchuí.

16.Ba cheart an acmhainneacht chun coireacht trasteorann agus sceimhlitheoireacht a chosc nó a bhrath ag na teorainneacha seachtracha a neartú ar leibhéal an Aontais agus ar an leibhéal náisiúnta. Is féidir leis na húdaráis inniúla rialaithe ag teorainneacha, i gcomhar le húdaráis ábhartha eile forfheidhmithe dlí agus gníomhaireachtaí Aontais forfheidhmithe dlí, amhail Europol agus Frontex, rannchuidiú leis an gcoireacht trasteorann a bhrath agus a chosc ag na teorainneacha seachtracha, agus go háirithe le trodaithe eachtracha sceimhlitheoireachta nó lucht coireachta trasteorann, amhail smuigléirí agus gáinneálaithe ar airm thine, a bhrath.

17.Lámhleabhar Frontex maidir le hairm thine a bhrath, is príomhuirlis é chun gardaí teorann agus údaráis chustaim a oiliúint san Aontas agus i dtíortha comharsanachta.

18.Ba cheart do ghardaí teorann a bheith réidh freisin chun íospartaigh na coireachta a shainaithint agus chun céadchúnamh a thabhairt dóibh, go háirithe íospartaigh gáinneála ar dhaoine, agus iad a tharchur chuig seirbhísí iomchuí.

19.Ba cheart acmhainneacht, sásraí agus nósanna imeachta leordhóthanacha a bheith i bhfeidhm ag na gardaí teorann chun daoine leochaileacha agus mionaoisigh neamhthionlactha a shainaithint, agus chun daoine a bhfuil cosaint idirnáisiúnta de dhíth orthu nó ar mian leo iarratas a dhéanamh ar chosaint den sórt sin a shainaithint, ionas gur féidir na daoine sin a tharchur chuig na nósanna imeachta agus na húdaráis ábhartha.

20.I gcás bagairt thromchúiseach ar bheartas poiblí nó ar shlándáil inmheánach i mBallstát, tugann Cód Teorainneacha Schengen cead don Bhallstát lena mbaineann rialuithe a thabhairt isteach an athuair go sealadach ag na teorainneacha inmheánacha mar rogha dheiridh. Ceanglaítear ar na Ballstáit ar dtús, áfach, an gá atá leis na bearta sin agus a gcomhréireacht a áirithiú, lena n‑áirítear, sa chéad chás, scrúdú a dhéanamh ar bhearta malartacha a d’fhéadfaí a dhéanamh, amhail seiceálacha póilíneachta a dhéanamh i gcomhréir le cásdlí Chúirt Bhreithiúnais an Aontais Eorpaigh. I gcás inar gá rialú ag teorainneacha a thabhairt isteach an athuair go sealadach, ba cheart do na Ballstáit bearta maolaithe a dhéanamh chun éifeachtaí díobhálacha ar thaisteal laistigh de limistéar Schengen a íoslaghdú.

Tosaíochtaí beartais

Príomhthosaíocht den bhainistiú comhtháite teorainneacha san Eoraip is ea beatha daoine a chosaint agus a shábháil ag na teorainneacha seachtracha. Ba cheart an acmhainneacht agus an ullmhacht oibríochtúil chun oibríochtaí cuardaigh agus tarrthála a dhéanamh, mar aon leis an gcomhar eatarthu siúd uile atá páirteach iontu, a bheith ina gcuid thábhachtach lárnach d’oibríochtaí faireachais ar na teorainneacha farraige seachtracha, chun oibleagáidí cuardaigh agus tarrthála na mBallstát a eascraíonn as dlí an Aontais agus an dlí idirnáisiúnta a chomhlíonadh 9 .

Treoirlínte straitéiseacha

1.Ba cheart feabhas a chur ar an gcomhar idir údaráis chuardaigh agus tarrthála na mBallstát, agus le húdaráis eile a d’fhéadfadh baint a bheith acu le hoibríochtaí cuardaigh agus tarrthála, lena n‑áirítear trí idirphlé leis na gníomhaithe ábhartha uile sa réimse sin a chothú. Tá sé sin d’fhonn básanna ar muir a laghdú, sábháilteacht na loingseoireachta a chothú agus bainistíocht éifeachtach na himirce a áirithiú, i gcomhréir leis na hoibleagáidí dlíthiúla ábhartha agus le Moladh (AE) 2020/1365 ón gCoimisiún 10 .

2.Ba cheart cur chuige níos comhordaithe a ghlacadh i leith cuardaigh agus tarrthála, inar cheart don Ghrúpa Eorpach Teagmhála um Chuardach agus Tarrtháil feabhas a chur ar an modh comhair agus comhordúcháin idir na stáit bhrataí agus na stáit chósta agus dea‑chleachtas a fhorbairt maidir le faisnéis a chomhroinnt go tráthúil agus go hiomlán 11 .

3.Ba cheart d’údaráis an Aontais agus na mBallstát a gcomhar le tríú tíortha tosaíochta agus le heagraíochtaí idirnáisiúnta a neartú, lena n‑áirítear tríd an gcomhar oibríochtúil idir údaráis tríú tíortha agus gníomhaireachtaí Aontais a fheabhsú.

4.Ba cheart freagracht na mBallstát maidir le cuardach agus tarrtháil a chur san áireamh go hiomlán i ngach céim den phleanáil oibríochtúil agus de chur chun feidhme na n‑oibríochtaí faireachais teorann farraige ag an nGníomhaireacht agus ag na Ballstáit. Ba cheart socruithe caighdeánaithe agus nósanna imeachta oibríochta caighdeánacha le húdaráis chuardaigh agus tarrthála na mBallstát (Ionad Comhordaithe Tarrthála Muirí), leis an Ionad Comhordaithe Náisiúnta (NCC) agus leis an Ionad Comhordaithe Idirnáisiúnta a bhunú agus a thástáil go rialta. Ba cheart roghanna i dtaobh sásraí comhordúcháin comhchosúla a bhunú idir na Ballstáit agus tíortha comhpháirtíochta a fhiosrú freisin. Ba cheart gach patról agus gach acmhainn theicniúil atá rannpháirteach san fhaireachas ar theorainneacha muirí, lena n‑áirítear oibríochtaí comhpháirteacha nó mear-idirghabhálacha teorann ar muir a gcomhordaíonn Frontex iad, a bheith oilte go hiomchuí agus ba cheart iad a bheith feistithe mar is ceart le haghaidh idirghabhálacha cuardaigh agus tarrthála a d’fhéadfadh a bheith ann, lena n‑áirítear an cumas a bheith acu gníomhú mar chomhordaitheoirí ar an láthair más gá.

5.Ba cheart an acmhainneacht chun tacú le hidirghabhálacha cuardaigh agus tarrthála a fheabhsú a thuilleadh tríd an oiliúint is gá a sholáthar don phearsanra a ghlacann páirt in oibríochtaí faireachais ar theorainneacha farraige ar leibhéal an Aontais agus ar an leibhéal náisiúnta. Ba cheart don Ghníomhaireacht measúnú ar riachtanais a dhéanamh agus tacaíocht oibríochtúil agus theicniúil mhéadaithe a sholáthar do na Ballstáit, i gcomhréir lena sainordú, lena n‑áirítear acmhainní a chur á n‑úsáid, chun feabhas a chur ar a gcumais agus, dá réir sin, rannchuidiú le beatha daoine a shábháil ar muir.

6.Ba cheart acmhainneacht EUROSUR chun tacú le hoibríochtaí cuardaigh agus tarrthála agus le beatha daoine a shábháil ar muir i gcásanna a d’fhéadfadh teacht chun cinn le linn oibríochtaí faireachais ar theorainneacha ar muir a chur chun feidhme agus a chur i bhfeidhm go hiomlán i gcomhréir le Rialachán EBCG agus le Rialachán Cur Chun Feidhme (AE) 2021/581 ón gCoimisiún 12 .

Tosaíochtaí beartais

Ba cheart bhainistiú comhtháite na dteorainneacha san Eoraip a bheith ar bonn anailís riosca. Ba cheart anailísí riosca atá iontaofa, cuimsitheach agus comhtháite a bheith ar fáil ar leibhéal an Aontais agus ar an leibhéal náisiúnta ba cheart iad a úsáid le haghaidh pleanáil agus cinnteoireacht pholaitiúil, straitéiseach agus oibríochtúil. Ba cheart torthaí anailíseacha agus moltaí le haghaidh coincheapa agus gníomhaíochtaí coincréiteacha (idir dhlíthiúil, theicniúil, agus oibríochtúil) a bheith le fáil ó anailís riosca chun maolú a dhéanamh in am trátha ar rioscaí agus leochaileachtaí atá ann faoi láthair agus a d’fhéadfadh a bheith ann amach anseo a bhaineann le raon feidhme iomlán an bhainistithe chomhtháite teorainneacha san Eoraip ar leibhéal an Aontais agus ar an leibhéal náisiúnta.

Treoirlínte straitéiseacha

1.Ní mór do na Ballstáit uile an chomhshamhail Eorpach le haghaidh anailís chomhtháite riosca, arna glacadh ag Bord Bainistíochta Frontex 14 , a thabhairt cothrom le dáta go tráthrialta agus ní mór í a chur i bhfeidhm ar leibhéal an Aontais agus ar an leibhéal náisiúnta.

2.Chun tacú le gníomhaíocht chomhbheartaithe an Aontais chun feabhas a chur ar bhainistiú teorainneacha seachtracha agus chun an tslándáil inmheánach a choinneáil ar bun, ba cheart do na Ballstáit an acmhainneacht náisiúnta is gá (idir acmhainneacht eagraíochtúil, riaracháin agus theicniúil) a bhunú chun anailísí riosca aontaithe, pleanáil teagmhasachta agus measúnuithe leochaileachta a dhéanamh. Ba cheart na táirgí agus nósanna imeachta anailíse riosca a sholáthraíonn Frontex a chomhtháthú sa phróiseas náisiúnta chun anailís riosca a thiomsú le haghaidh bhainistiú comhtháite na dteorainneacha, lena gcumhdófaí gach ciseal den tsamhail rialaithe rochtana ceithre chiseal.

3.Ba cheart struchtúir speisialaithe anailíse riosca, a mbeidh sé de chumhacht acu sonraí ábhartha ó na hinstitiúidí náisiúnta uile a bhfuil baint acu le bainistiú comhtháite na dteorainneacha a bhailiú agus a thiomsú, a bhunú agus ba cheart go n‑oibreodh líon leordhóthanach foirne speisialaithe oilte iad.

4.Cé gur cheart measúnuithe riosca a dhéanamh i gcónaí roimh chomhghníomhaíochtaí oibríochtúla a chomhordaíonn Frontex agus le linn na ngníomhaíochtaí sin, ba cheart don Ghníomhaireacht tuilleadh forbartha a dhéanamh ar a cumas chun táirgí anailíse riosca ad hoc a eisiúint, táirgí lena gcumhdófar bagairtí atá ag teacht chun cinn agus lena dtacófaí le próisis bainistithe géarchéime.

5.Comhar idir comhlachtaí ábhartha Aontais agus comhlachtaí ábhartha náisiúnta, amhail údaráis chustaim, go háirithe comhar le Frontex, Europol, Gníomhaireacht an Aontais Eorpaigh chun Bainistiú Oibríochtúil a dhéanamh ar Chórais Mhórscála TF sa Limistéar Saoirse, Slándála agus Ceartais (eu-LISA), Gníomhaireacht an Aontais Eorpaigh um Chearta Bunúsacha (FRA), Gníomhaireacht an Aontais Eorpaigh um Thearmann agus an Coimisiún (lena n‑áirítear OLAF i gcás inarb iomchuí), agus comhar idir na comhlachtaí sin, ba cheart é a neartú a thuilleadh i réimse na hanailíse riosca. Is é is aidhm don mhéid sin anailís níos cuimsithí ar na rioscaí ar shláine na dteorainneacha seachtracha a ráthú, agus ar mhaithe leis an tslándáil inmheánach, lena n‑áirítear dea‑fheidhmiú limistéar Schengen. Ba cheart comhar níos dlúithe idir Europol agus Frontex a chur i bhfeidhm agus Measúnú an Aontais Eorpaigh ar Bhagairt na Coireachta Tromchúisí Eagraithe (SOCTA AE) 15 agus tuarascálacha eile á n‑ullmhú, i bhfianaise an luacha bhreise a fhéadann anailís riosca Frontex a sholáthar i ndáil leis an gcoireacht trasteorann a shainaithint agus a imscrúdú ag na teorainneacha seachtracha. Le Plean Gníomhaíochta an Aontais Eorpaigh in aghaidh gáinneáil ar airm thine 2020‑2025, fógraíodh an leasú ar Rialachán (AE) 258/2012 16 . Ghlac an Chomhairle togra i mí Dheireadh Fómhair 2022 maidir le hathmhúnlú an Rialacháin sin chun aghaidh níos fearr a thabhairt ar allmhairiú, onnmhairiú agus idirthuras arm tine sibhialtach. I measc nithe eile, leis an togra maidir le hathmhúnlú, dírítear ar anailís riosca níos fearr trí fhaisnéis a mhalartú i measc údaráis éagsúla a bhfuil baint acu le hallmhairiú, onnmhairiú agus idirthuras arm tine sibhialtach, comhpháirteanna riachtanacha agus armlóin. Le Plean Gníomhaíochta agus Straitéis an Aontais Eorpaigh um Dhrugaí 2021‑2025, glactar cur chuige fianaisebhunaithe comhtháite cothromaithe ildisciplíneach i leith fheiniméan na ndrugaí ar an leibhéal náisiúnta agus idirnáisiúnta agus ar leibhéal an Aontais, agus cuirtear bearta láidre laghdaithe soláthair chun cinn, lena n‑áirítear chun an mhórgháinneáil aindleathach ar dhrugaí agus réamhtheachtaithe drugaí a bhrath níos fearr ag pointí dul isteach san Aontas agus pointí imeachta uaidh, agus chun aghaidh a thabhairt ar naisc le bagairtí slándála eile.

6.Ba cheart don Ghníomhaireacht a cumas réamhaisnéise a neartú tuilleadh trí úsáid a bhaint as na foinsí is leithne is féidir d’fhaisnéis iontaofa, ábhartha, agus riachtanach.

7.I gcomhthéacs níos straitéisí, is uirlis fhíor-riachtanach í an anailís dhébhliantúil riosca straitéisigh lenar cheart go mbeadh an Ghníomhaireacht in ann tuiscint fhadtéarmach a fhorbairt ar shreabha imirce i dtreo an Aontais agus laistigh de ó thaobh threochtaí, líonta agus bhealaí na himirce de. Cuideoidh sé freisin le dúshláin a shainaithint ag na teorainneacha seachtracha agus laistigh de limistéar Schengen, lena n‑áirítear úsáid a bheith á baint as doiciméid taistil chalaoiseacha agus ghóchumtha, agus dúshláin a bhaineann leis an bhfilleadh, agus tacóidh sé dá bhrí sin le cinnteoireacht pholaitiúil agus le forbairt cumas fadtéarmach. Leis na dúshláin a shainaithnítear ba cheart díriú ar fheiniméin ar bheagán dóchúlachta ach mórán tionchair, amhail paindéimí agus na bagairtí sláinte a thagann astu. Ba cheart an anailís is déanaí atá ar fáil a léiriú i gcónaí i gcur chun feidhme thimthriall an bheartais straitéisigh ilbhliantúil don bhainistiú comhtháite teorainneacha san Eoraip, atá le cur san áireamh ag an nGníomhaireacht sa Straitéis Theicniúil agus Oibríochtúil um bainistiú comhtháite teorainneacha agus ag na Ballstáit ina straitéisí náisiúnta.

8.Tar éis fhoilsiú gach anailíse riosca straitéisí, ba cheart don Ghníomhaireacht plé a dhéanamh leis na Ballstáit agus leis an gCoimisiún maidir le conas is féidir feabhas a chur ar cháilíocht agus feidhmiúlacht na hanailíse débhliantúla sin.

9.Ba cheart sásra foirmiúil a bhunú chun eolas agus faisnéis a mhalartú le tríú tíortha, go háirithe le tíortha a d’fhéadfadh a bheith ina dtíortha tionscnaimh agus le tíortha idirthurais ábhartha, i gcomhréir le Rialachán EBCG agus lánurraim á tabhairt do cheanglais dhlí an Aontais maidir le cosaint sonraí pearsanta. Ba cheart do na Ballstáit agus do Frontex é a choinneáil ar bun agus a fhorbairt a thuilleadh chun an anailís riosca agus gníomhaíochtaí oibríochtúla a bheidh níos spriocdhírithe a fheabhsú.

Tosaíochtaí beartais

Ba cheart cumais Eorpacha agus náisiúnta a chur ar bun, a úsáid agus a fhorbairt ar bhealach comhordaithe comhtháite chun cur chun feidhme éifeachtach agus aontaithe gach gné de bhainistiú comhtháite teorainneacha san Eoraip a ráthú i ngach cúinse agus ar gach ciseal den tsamhail rialaithe rochtana ceithre chiseal. Ba cheart ullmhacht sheasmhach thástáilte a bheith ag an nGarda Teorann agus Cósta Eorpach, atá comhdhéanta den Ghníomhaireacht agus d’údaráis na mBallstát um an ngarda teorann agus um fhilleadh, chun freagairt do gach teagmhas a d‘fhéadfadh tarlú ag an teorainneacha seachtracha agus d’aon fheiniméan nua a dhéanann difear d’fheidhmiú an rialaithe teorann agus an fhillte. Ba cheart go mbeadh acmhainneacht mhearfhreagartha ann mar aon leis na cumais riachtanacha chun cineálacha éagsúla comhoibríochtaí a sheoladh go héifeachtach ag gach cuid de na teorainneacha seachtracha. Ba cheart an malartú faisnéise, de réir na brí atá leis faoin ngné seo, a dhéanamh go tráthúil.

Treoirlínte straitéiseacha

1.Ba cheart do na Ballstáit sásra comhordúcháin náisiúnta éifeachtach agus próisis oibre éifeachtacha a bhunú le haghaidh fheidhmeanna agus ghníomhaíochtaí uile an Gharda Teorann agus Cósta Eorpaigh, chun éifeachtúlacht ar an leibhéal náisiúnta agus éifeachtúlacht an chomhair le Frontex a áirithiú. Ba cheart pointe teagmhála náisiúnta freagrach a bheith ag na Ballstáit (24/7) le haghaidh gach ábhair a bhaineann le gníomhaíochtaí na Gníomhaireachta, mar a shonraítear in Airteagal 13(1) de Rialachán EBCG. Ba cheart don phointe teagmhála náisiúnta ionadaíocht a dhéanamh ar na húdaráis náisiúnta ar fad atá rannpháirteach i mbainistiú na dteorainneacha agus san filleadh. Ba cheart an pointe teagmhála náisiúnta a bheith ar leithligh ón Lárionad Náisiúnta Comhordúcháin atá freagrach as faisnéis a mhalartú in EUROSUR.

2.Ba cheart feasacht staide, cumas freagartha agus ról an lárionaid náisiúnta comhordúcháin (LNC) a neartú a thuilleadh agus a chomhtháthú i gcomhréir le Rialachán EBCG agus le Rialachán Cur Chun Feidhme (AE) 2021/581 ón gCoimisiún. Ní mór do gach Ballstát Lárionad Náisiúnta Comhordúcháin lánfheidhmiúil a bheith i bhfeidhm aige, i gcomhréir le hAirteagal 21 de Rialachán EBCG.

3.Ba cheart an fhaisnéis a bhailítear le huirlisí faireachais, agus í tiomsaithe agus dáilte a thuilleadh ag na LNCanna, a úsáid chun cur leis an gcumas freagartha fíor-ama (e.g. tascradh) agus chun anailís riosca a dhéanamh.

4.Ba cheart úsáid iomlán a bhaint as na huirlisí malartaithe faisnéise atá ann cheana agus a bheidh ann amach anseo, go háirithe EUROSUR. Sa chomhthéacs sin, ba cheart comhar agus comhordú éifeachtach a áirithiú idir na húdaráis náisiúnta atá rannpháirteach i ngníomhaíochtaí an Gharda Teorann agus Cósta Eorpaigh agus le Frontex é féin. Ba cheart an comhar agus an comhordú sin a dhéanamh faoi chuimsiú EUROSUR, go háirithe i ngach Lárionad Náisiúnta Comhordúcháin.

5.Ba cheart do na Ballstáit an fhaisnéis uile is gá maidir leis an staid atá ann, na treochtaí agus na bagairtí a d’fhéadfadh teacht chun cinn ag na teorainneacha seachtracha agus maidir le filleadh a roinnt go tráthrialta leis an nGníomhaireacht. Níor cheart an fhaisnéis sin a dhúbláil. Dá bhrí sin, ba cheart sásra a bheith i bhfeidhm lena n‑áiritheofar idir‑inoibritheacht bealaí faisnéise éagsúla chun malartú faisnéise a éascú agus chun feabhas a chur ar an bhfeasacht staide.

6.Ba cheart do na Ballstáit na hacmhainní daonna agus airgeadais is gá a leithdháileadh agus ullmhacht oibríochtúil leanúnach a bheith acu chun go gcomhlíonfaidh siad a n‑oibleagáid dhlíthiúil chun rannchuidithe éigeantacha a sholáthar, agus chun rannchuidithe deonacha a sholáthar do na cumais chomhchoiteanna Eorpacha a ndéanann Frontex comhordú orthu, go háirithe do bhuanchór an Gharda Teorann agus Cósta Eorpaigh agus don chomhthiomsú de threalamh teicniúil.

7.Ba cheart do na Ballstáit agus don Ghníomhaireacht a áirithiú go dtiocfaidh fás de réir a chéile ar an mbuanchór chun a lánacmhainneacht, eadhon 10 000 oifigeach, a bhaint amach faoi 2027. Tá foireann oiriúnach agus acmhainneacht freagartha ina dtosca fíor‑riachtanacha chun aghaidh a thabhairt go héifeachtach ar an imirce neamhrialta agus ar bhagairtí slándála teorann, chun caoi a thabhairt do fhreagairt thapa agus d’acmhainneacht bhreise ag na codanna den teorainn lena mbaineann.

8.Ba cheart don Ghníomhaireacht coincheap oibríochtúil cuimsitheach a fhorbairt inar cheart a áireamh, ar a laghad, coincheap imscaradh an bhuanchóir, a fheidhmíocht oibríochtúil agus a cheanglais chumais i leith bagairtí agus timpeallachtaí oibríochtúla éagsúla, struchtúir shoiléire cheannais agus bhainistíochta, tacaíocht lóistíochta agus sásra rialaithe cáilíochta inmheánach i gcomhréir le hAirteagal 62(10) de Rialachán EBCG.

9.Chun éifeachtúlacht bhreise na Gníomhaireachta a áirithiú, ba cheart do Bhord Bainistíochta Frontex an coincheap oibríochtúil don bhuanchór a ghlacadh agus a athbhreithniú go tráthrialta. Beifear in ann cur chun feidhme chúraimí oibríochtúla agus teicniúla na Gníomhaireachta a stiúradh níos fearr dá thairbhe sin, go háirithe maidir le mear‑idirghabhálacha teorann a sheoladh i gcásanna géarchéime sonracha, lena n‑áirítear cásanna ionstraimithe, agus chun a áirithiú go n‑imscarfar an buanchór agus trealamh in am trátha aon am a tharlaíonn géarchéim den sórt sin. 

10.Ba cheart acmhainneacht óstála tástáilte a bheith ag na Ballstáit chun tacaíocht a fháil trí bhuanchór an Gharda Teorann agus Cósta Eorpaigh a imscaradh, más gá.

11.Ba cheart acmhainneacht éifeachtach pleanála, comhordaithe agus cur chun feidhme a bheith ag na Ballstáit agus ag an nGníomhaireacht chun oibríochtaí a eagrú, ar bhonn anailíse riosca, ag na teorainneacha seachtracha agus/nó i dtríú tíortha, i gcomhréir leis na coinníollacha a leagtar síos i Rialachán EBCG. Ba cheart an próiseas pleanála faisnéis-bhunaithe a chomhordú agus a shioncrónú idir an Ghníomhaireacht agus na Ballstáit ionas go n‑áiritheofar úsáid éifeachtach na n‑acmhainní.

12.Ba cheart don Ghníomhaireacht coincheap na n‑oibríochtaí comhpháirteacha a fhorbairt a thuilleadh ionas go n‑áiritheofar solúbthacht leordhóthanach agus an acmhainn samhlacha éagsúla a chur i bhfeidhm, ag brath ar an gcás oibríochtúil sonrach.

13.Ba cheart do FRONTEX tuilleadh feabhais a chur ar chomhtháthú thorthaí na measúnuithe leochaileachta sa mheasúnú ar ullmhacht, pleanáil theagmhasach agus riachtanais. Áiritheofar leis sin go mbeidh sé d’acmhainn ag na Ballstáit ní hamháin a dteorainneacha seachtracha a dhaingniú ach a gcion féin a chur leis an mbuanchór, lena n‑áirítear rannchuidithe le mear-idirghabhálacha agus leis an gcomhthiomsú de threalamh teicniúil. Sa phróiseas sin, ba cheart don Ghníomhaireacht na sineirgí idir sásra meastóireachta Schengen agus measúnú leochaileachta a chur san áireamh.

14.Tá malartú na faisnéise ar cheann de na príomhghnéithe den chomhar oibríochtúil idir na Ballstáit agus idir na Ballstáit agus Frontex. Ní mór é a dhéanamh ar bhealach slán tríd an líonra cumarsáide tiomnaithe, go háirithe i gcás ina gcumhdófar leis an malartú sin faisnéis rúnaicmithe suas le leibhéal CONFIDENTIEL UE/EU CONFIDENTIAL agus ní mór do na Ballstáit agus do Frontex ceanglais reachtaíocht an Aontais maidir le cosaint sonraí agus slándáil faisnéise ina n‑iomláine a chomhlíonadh i gcónaí i gcomhréir leis na rialacha slándála a leagann an Ghníomhaireacht síos.

15.Ní mór don Ghníomhaireacht faireachán agus feasacht staide leanúnach a áirithiú agus an fhaisnéis sin a roinnt leis na LNCanna trí EUROSUR, go háirithe chun tuairisciú fíor-ama a sholáthar faoin limistéar teorann agus faoin limistéar réamhtheorann comhfhreagrach a mbaineann an ghéarchéim leo.

16.Ba cheart go bhfeidhmeodh an straitéis ilbhliantúil maidir le cumais theicniúla na Gníomhaireachta a fháil agus a fhorbairt, chomh maith leis an bplean cur chun feidhme gaolmhar, mar uirlis sholúbtha chun réitigh fhadtéarmacha a sholáthar chun acmhainní teicniúla a chur ar fáil don bhuanchór, lena n‑áirítear an fhéidearthacht roghanna malartacha a ghníomhachtú do na riachtanais is criticiúla (i.e. aerfhaireachas).

17.Ba cheart coincheap na bpointí fócasacha a fhorbairt a thuilleadh trí dhíriú ar fhreagairt oibríochtúil éifeachtach a áirithiú, go háirithe i dteophointí ag na teorainneacha seachtracha agus na pointí trasnaithe teorann, lena n‑áirítear eilimint fothaithe acmhainní.

18.Ba cheart do phobal uile EBCG caighdeáin theicniúla na Gníomhaireachta maidir le trealamh agus malartú faisnéise, lena n‑áirítear maidir le hidirnascadh córas agus líonraí, a chur i bhfeidhm ar bhealach aonfhoirmeach. Ba cheart do EBCG oibriú le chéile ar phróiseas caighdeánaithe chun idir-inoibritheacht agus comhoiriúnacht an trealaimh a úsáidtear leis na córais ábhartha faisnéise agus cumarsáide, agus le EUROSUR, a áirithiú.

19.Laistigh dá n‑inniúlachtaí faoi seach, ba cheart do Frontex agus do na Ballstáit, le cúnamh eu‑LISA, modhanna iomchuí a fhorbairt (staidreamh, próifílí, malartú modus operandi) chun mí‑úsáid bealaí dlíthiúla a chosc agus faireachán a dhéanamh ar iar‑léirscaoileadh víosaí, lena n‑áirítear trí úsáid éifeachtach a bhaint as uirlisí ábhartha sna córais nua faisnéise (VIS, ETIAS, EES, etc.).

Tosaíochtaí beartais

Ba cheart bainistiú comhtháite na dteorainneacha san Eoraip a bheith bunaithe ar an gcomhar. Ba cheart comhar idirghníomhaireachta a bheith seanbhunaithe ar an leibhéal náisiúnta chun cur chun feidhme cuimsitheach trasearnálach comhleanúnach costéifeachtach an bhainistithe chomhtháite teorainneacha a ráthú, lena n‑áirítear i measc na gcomhlachtaí náisiúnta a bhfuil sé de chúram orthu cearta bunúsacha a chosaint, amhail Institiúidí Náisiúnta um Chearta an Duine, institiúidí Ombudsman, Sásraí Náisiúnta Coisctheacha agus, i gcás inarb infheidhme, sásraí náisiúnta faireacháin. Ba cheart roinnt na hoibre, na struchtúir chomhair, úsáid chomhroinnte na n‑acmhainní, bealaí cumarsáide agus nósanna imeachta oibre sioncrónaithe a shainiú go soiléir agus a chomhdhlúthú.

Treoirlínte straitéiseacha

1.Comhar idirghníomhaireachta idir na húdaráis náisiúnta ábhartha uile a bhfuil baint acu le bainistiú teorainneacha, ba cheart é a dhéanamh i gcomhréir le rialacha agus próisis arna sainiú go soiléir. Ba cheart sainiúlachtaí institiúideacha agus riaracháin na mBallstát faoi seach a chur san áireamh sa chreat lena rialaítear an comhar sin. Ba cheart é a chur i bhfeidhm trí bhíthin comhaontuithe comhair lena leagtar síos cineálacha coincréiteacha comhair chomh maith le gníomhaíochtaí coincréiteacha.

2.Ba cheart a áireamh ar na príomhréimsí comhair malartú éifeachtach faisnéise, anailís riosca chomhpháirteach, oibríochtaí comhpháirteacha agus úsáid chomhroinnte na gcumas Eorpach agus náisiúnta i gcomhréir lena n‑inniúlachtaí, oiliúint, chomh maith le cosaint agus cur chun cinn na gceart bunúsach ar fud na ngníomhaíochtaí agus na n‑oibríochtaí bainistithe teorainneacha uile. I ndáil le teorainneacha muirí, tá bunú CISE oibríochtúil (Timpeallacht Chomónta um Chomhroinnt Faisnéise) le haghaidh 2024 ábhartha freisin chun feasacht ar réimsí muirí a choinneáil ar bun. Le CISE tabharfar caoi don mhalartú slán faisnéise, trasearnálach agus trasteorann, idir údaráis éagsúla faireachais mhuirí de chuid an Aontais agus Ballstáit CSTE, amhail gardaí cósta, gardaí teorann, údaráis chustaim, údaráis ghinearálta forfheidhmithe dlí, údaráis rialaithe iascaigh, etc.

3.Ba cheart an sásra láraithe a chur ar bun le gach straitéis náisiúnta IBM chun comhordú éifeachtúil a áirithiú idir an t‑údarás náisiúnta atá i gceannas ar an bhformhaoirseacht ghinearálta ar bhainistiú comhtháite teorainneacha agus na húdaráis náisiúnta uile a bhfuil freagrachtaí orthu i mbainistiú na dteorainneacha agus a macasamhla i mBallstáit eile.

Ba cheart tuilleadh forbartha a dhéanamh ar an gcomhar oibríochtúil déthaobhach agus iltaobhach idir na Ballstáit i gcás ina mbeidh comhar den sórt sin comhoiriúnach le cúraimí na Gníomhaireachta. Ba cheart tacaíocht na Gníomhaireachta agus acmhainní agus ionstraimí coiteanna Eorpacha (e.g. EUROSUR) a úsáid ina n‑iomláine.

4.Ní cuid de acquis Schengen é an rialú custaim agus ní comhaltaí den Aontas Custaim iad gach ceann de Thíortha Comhlachaithe Schengen. Dá bhrí sin, níl an rialú custaim go díreach ina chuid de choincheap EIBM. Tá baint ag cúraimí custaim i réimse na slándála inmheánaí agus ag údaráis eile a oibríonn ag na teorainneacha seachtracha, áfach, le bainistiú comhtháite teorainneacha san Eoraip trí ghné an comhair idirghníomhaireachta. Ba cheart tuilleadh forbartha a dhéanamh ar an gcomhar idir gardaí teorann agus lucht custaim mar chomhpháirtithe straitéiseacha ar gach leibhéal chun rialú na ndaoine agus na n‑earraí a chomhtháthú ar bhealach níos fearr agus chun trasnuithe teorann sreabhacha agus slána a ráthú. I dtéarmaí nithiúla, ciallaíonn sé sin gur cheart creat dlíthiúil soiléir a bheith ann le haghaidh an chomhair idir gardaí teorann agus údaráis chustaim, creat a mbeadh roinnt oibre dhea-shainithe, struchtúir chomhair fheidhmiúla, agus timpeallacht theicniúil idir-inoibritheach i gceist leis, agus lena n‑áiritheofaí an dlúthchomhar praiticiúil ar gach leibhéal.

5.Ba cheart tuilleadh forbartha a dhéanamh ar an leibhéal náisiúnta ar an gcomhar maidir le forfheidhmiú an dlí agus ar an gcomhar míleata a bhaineann le tacú le bainistiú na dteorainneacha agus leis an gcoireacht trasteorann a chomhrac. Áiritheofar leis sin comhordú níos fearr agus úsáid éifeachtach chostéifeachtach na faisnéise, na gcumas agus na gcóras. Tá gá leis sin chun an choireacht trasteorann, an sceimhlitheoireacht agus an inimirce neamhrialta a chosc agus a bhrath agus chun rannchuidiú le beatha imirceach a shábháil. Ba cheart bunús dlí soiléir a bheith leis an gcomhar sin, trí shocruithe nó comhaontuithe comhair agus buan‑nósanna imeachta oibríochta. Is é an t‑údarás náisiúnta inniúil ba cheart cúraimí rialaithe ag teorainneacha a dhéanamh i gcónaí.

6.Ba cheart comhar a éascú agus a fhorbairt freisin laistigh den Ardán Eorpach Ildisciplíneach i gCoinne Bagairtí Coiriúla (EMPACT) 19 , ar ionstraim bhuan agus creat stóinseach é lena dtugtar údaráis forfheidhmithe dlí na mBallstát, institiúidí, comhlachtaí agus gníomhaireachtaí an Aontais agus raon leathan comhpháirtithe ildisciplíneacha le chéile chun an choireacht thromchúiseach eagraithe a chomhrac.

Tosaíochtaí beartais

Ba cheart bainistiú comhtháite na dteorainneacha san Eoraip a bheith bunaithe ar an gcomhar. Ba cheart comhar idirghníomhaireachta seanbhunaithe a bheith ag an nGarda Teorann agus Cósta Eorpach le páirtithe leasmhara Eorpacha eile chun a áirithiú go gcuirfear bainistiú comhtháite teorainneacha chun feidhme ar bhealach cuimsitheach trasearnálach comhleanúnach costéifeachtach.

Treoirlínte straitéiseacha

1.Mar thús, tá an comhar idirghníomhaireachta ar leibhéal an Aontais Eorpaigh le hoibríochtú trí shocruithe comhair, agus go háirithe trí shocruithe oibre arna dtabhairt i gcrích ag Frontex le hinstitiúidí, comhlachtaí, oifigí agus gníomhaireachtaí ábhartha an Aontais dá dtagraítear in Airteagal 68 de Rialachán EBCG. Baineann na príomhréimsí comhair le malartú éifeachtach faisnéise, anailís riosca chomhpháirteach, oibríochtaí comhpháirteacha agus úsáid chomhroinnte na gcumas Eorpach i gcomhréir lena n‑inniúlacht. Ba cheart coincheap na n‑oibríochtaí ilchuspóireacha ar leibhéal an Aontais Eorpaigh, bunaithe ar anailís riosca, a fhorbairt a thuilleadh , agus príomhchúraimí agus príomhfhreagrachtaí na ngníomhaithe ar leibhéal an Aontais a bhfuil baint acu leis na hoibríochtaí sin á n‑urramú ina n‑iomláine.

2.Ba cheart acmhainneacht iomlán na n‑uirlisí malartaithe faisnéise atá ann cheana agus a bheidh ann amach anseo, go háirithe EUROSUR, a bheith in úsáid oibríochtúil ar leibhéal an Aontais Eorpaigh. Ba cheart bailiú na faisnéise ag seirbhísí cumaisc EUROSUR a fhorbairt a thuilleadh trí bhíthin socruithe oibre arna dtabhairt i gcrích idir Frontex agus institiúidí, comhlachtaí, oifigí agus gníomhaireachtaí an Aontais faoi seach a chur i bhfeidhm, d’fhonn seirbhísí faisnéise breisluacha a bhaineann le EIBM a chur ar fáil do na Ballstáit agus do Frontex.

3.Ba cheart an comhar Eorpach maidir le feidhmeanna garda cósta a fhorbairt a thuilleadh chun an fheasacht staide ar muir a mhéadú chomh maith leis an gcumas freagartha, agus chun tacú le gníomhaíocht chomhleanúnach chost‑éifeachtúil ar leibhéal an Aontais agus ar an leibhéal náisiúnta. Ba cheart lámhleabhar praiticiúil faoin gcomhar Eorpach maidir le feidhmeanna garda cósta a chur i bhfeidhm go forleathan chun cur chun feidhme comhchuibhithe an chomhair sin a chur chun cinn ar leibhéal an Aontais agus ar an leibhéal náisiúnta 21 .

4.Ba cheart an idir‑inoibritheacht idir córais faisnéise ábhartha uile‑Aontais (EES, ETIAS, SIS, VIS, Eurodac agus ECRIS-TCN), a chur chun feidhme go tráthúil agus, más gá, a fhorbairt a thuilleadh chun úsáid níos éifeachtaí ionstraimí éagsúla a ráthú. Déanfaidh ceithre ghné nua idir‑inoibritheachta − an tairseach chuardaigh Eorpach (ESP), an tseirbhís chomhroinnte meaitseála sonraí bithmhéadracha (sBMS), an stóras coiteann sonraí céannachta (CIR) agus an brathadóir ilchéannachtaí (MID) − an t‑ollstruchtúr córais a chomhtháthú chun tacú lena n‑oibríochtaí agus a áirithiú an tráth céanna go sainaithneofar daoine i gceart, go ndéanfar an chalaois chéannachta a chomhrac agus go gcuíchóireofar na coinníollacha rochtana d’údaráis ainmnithe.

5.Ba cheart coincheap an teophointe, lena n‑áirítear nósanna imeachta oibriúcháin caighdeánacha, a chur i bhfeidhm nuair is ábhartha. Ba cheart do na gníomhaireachtaí ábhartha uile (Frontex, Gníomhaireacht an Aontais Eorpaigh um Thearmann, Europol agus FRA) a bheith réidh i gcónaí chun tacú le teophointí i gcomhréir leis an gcoincheap a ghlactar 22 . Ba cheart go mbeadh ullmhacht dhlíthiúil agus oibríochtúil ag na Ballstáit chun óstáil a dhéanamh ar theophointí Eorpacha nó chun tacú leo.  I gcás inar féidir agus ina ndéantar Foirne Tacaíochta don Bhainistiú Imirce a bhunú i gcomhréir le hAirteagal 40 de Rialachán EBCG, comhordóidh an Coimisiún na foirne mar a fhoráiltear sa Rialachán.

6.Ba cheart comhordú agus comhar idir Europol, Eurojust, Frontex agus na húdaráis náisiúnta inniúla, faoi chuimsiú EMPACT, an tArdán Eorpach Ildisciplíneach i gCoinne Bagairtí Coiriúla 23 , a fheabhsú ag gach céim den phróiseas. Leis an gcomhar idir Frontex agus Europol, ba cheart féachaint le sainaithint daoine a bhfuil amhras orthu i leith coireacht trasteorann a éascú, agus lánurraim á tabhairt do na rialacha lena sainítear cúraimí an dá Ghníomhaireacht agus do reachtaíocht an Aontais maidir le cosaint sonraí pearsanta.

7.Is ar na réimsí tosaíochta straitéisí sin a bhaineann go díreach le teorainneacha seachtracha agus le cúraimí rialaithe ag teorainneacha ba cheart rannpháirtíocht ghníomhach Frontex agus na n‑údarás garda teorann náisiúnta a bheith dírithe go príomha, agus sin i gcomhréir i gcónaí lena sainorduithe faoi seach agus leis na rialacháin lena rialaítear iad.

8.Ba cheart do FRONTEX dul i mbun comhair leis an gCoimisiún (lena n‑áirítear OLAF) freisin, go háirithe chun comhairle a thabhairt maidir le gníomhaíochtaí bainistithe teorainneacha a fhorbairt i dtríú tíortha agus, i gcás inarb ábhartha, leis na Ballstáit agus leis an tSeirbhís Eorpach Gníomhaíochta Seachtraí i ngníomhaíochtaí a bhaineann le réimse an chustaim, lena n‑áirítear bainistíocht an riosca agus comhrac na calaoise, i gcás ina gcomhlánaíonn na gníomhaíochtaí sin a chéile.

Tosaíochtaí beartais

Ba cheart do na Ballstáit agus don Ghníomhaireacht dul i gcomhar le tríú tíortha chun críoch an bhainistithe chomhtháite teorainneacha agus bheartas imirce an Aontais. An comhar praiticiúil i réimse an bhainistithe chomhtháite teorainneacha le tríú tíortha ar leibhéal an Aontais agus ar an leibhéal náisiúnta, ba cheart é a bheith i gcomhréir leis an gcomhbheartas eachtrach agus slándála (CFSP) agus ní mór dó dlí an Aontais agus an dlí idirnáisiúnta a chomhlíonadh, lena n‑áirítear cearta bunúsacha agus prionsabal an non‑refoulement, chun an inimirce neamhrialta a chosc agus a chomhrac, filleadh éifeachtach a fheabhsú, an choireacht trasteorann a chosc, agus taisteal dlisteanach a éascú.

An comhar le tríú tíortha maidir le bainistiú comhtháite teorainneacha a chur chun cinn, fónann sé go háirithe chun a n‑acmhainneachtaí straitéiseacha, oibríochtúla agus comhair a fhorbairt i réimsí an rialaithe ag teorainneacha, na hanailíse riosca, agus an fhillte agus an athligin isteach, agus caidrimh fhoriomlána an Aontais leis na tíortha sin á gcur san áireamh. Sa chomhthéacs sin, tá sé ríthábhachtach luachanna agus caighdeáin na hEorpa a chur chun cinn i dtríú tíortha. Ba cheart tús áite a thabhairt do thíortha comharsanachta an Aontais, agus do thíortha tionscnaimh agus idirthurais na hinimirce neamhrialta. Cumas agus toilteanas na dtíortha sin an imirce neamhrialta a chosc, bainistiú teorainneacha éifeachtach a choinneáil ar bun agus rialú éifeachtach a dhéanamh ar shreabha imirce i dtreo an Aontais, tá siad sin fíor‑riachtanach chun aghaidh a thabhairt ar an imirce ar bhealach éifeachtach. Rannchuidíonn sé sin le forbairt comhpháirtíochtaí imirce frithpháirteacha cuimsitheacha le tíortha tionscnaimh agus idirthurais.

Treoirlínte straitéiseacha

1.Ba cheart an comhar le tríú tíortha i réimse an bhainistithe chomhtháite teorainneacha san Eoraip a bheith bunaithe ar shocruithe agus/nó comhaontuithe agus ní mór dó a bheith i gcomhréir go hiomlán le dlí an Aontais, lena n‑áirítear an dlí maidir le cosaint sonraí pearsanta, leis an urraim do chearta bunúsacha, agus leis an dlí idirnáisiúnta, lena n‑áirítear prionsabal an non‑refoulement. Leis na comhaontuithe sin (lena n‑áirítear comhaontuithe stádais agus socruithe oibre), ba cheart na húdaráis inniúla, na struchtúir chomhair agus raon feidhme an chomhair a shainaithint agus rialacha a leagan síos maidir le leithdháileadh freagrachtaí.

2.Spreagtar an comhar oibríochtúil idir na Ballstáit agus tríú tíortha, cibé cás ina bhfuil comhar den sórt sin comhoiriúnach le sainordú agus feidhmiú Frontex agus le baint amach a chuspóirí, agus le caidrimh fhoriomlána an Aontais leis na tíortha sin.

3.Ba cheart malartú faisnéise, go háirithe maidir le EUROSUR, idir na Ballstáit agus tríú tíortha a sholáthar faoi chuimsiú comhaontuithe déthaobhacha nó iltaobhacha. Chun na críche sin, ba cheart do na Ballstáit an Moladh ón gCoimisiún maidir leis na forálacha múnla le haghaidh malartú faisnéise faoi chuimsiú EUROSUR i gcomhréir le hAirteagal 76(2) de Rialachán EBCG a leanúint 25 .

4.Chun an trédhearcacht a fheabhsú, ba cheart do Frontex forléargas ar leibhéal an Aontais a tharraingt suas i gcónaí maidir leis an gcomhar oibríochtúil atá ann cheana le tríú tíortha i réimse an bhainistithe teorainneacha agus an fhillte, i gcomhréir le straitéis comhair idirnáisiúnta na Gníomhaireachta. Ba cheart é sin a bheith bunaithe ar fhaisnéis a fhaightear go háirithe ó na Ballstáit, ón gCoimisiún agus ó ghníomhaireachtaí Aontais.

5.Agus léiriú staide sonrach á bhunú le tríú páirtithe in EUROSUR, ba cheart do na Ballstáit agus do Frontex na caighdeáin theicniúla agus oibríochtúla maidir le malartú faisnéise arna bhforbairt ag Frontex a chomhlíonadh agus a chur chun cinn.

6.Tá gníomhaíochtaí oibríochtúla a dhéanann Frontex i dtríú tíortha le pleanáil agus le cur chun feidhme i gcomhréir le comhaontuithe stádais arna dtabhairt i gcrích idir an tAontas agus an tríú tír ábhartha agus/nó i gcomhréir le socruithe oibre arna dtabhairt i gcrích ag Frontex agus ag údaráis inniúla na dtríú tíortha. Ba cheart go mbeadh na comhaontuithe stádais agus na socruithe oibre araon bunaithe ar na samhlacha faoi seach arna nglacadh ag an gCoimisiún 26 .

7.Ní mór dlí an Aontais agus an dlí idirnáisiúnta, lena n‑áirítear noirm agus caighdeáin ar cuid de dhlí an Aontais iad, a chomhlíonadh agus comhar á dhéanamh le tríú tíortha agus nuair a dhéantar comhar le tríú tíortha lasmuigh de chríoch an Aontais Eorpaigh. Ní mór ceanglais dhlí an Aontais maidir le cosaint sonraí pearsanta a chomhlíonadh agus sonraí pearsanta á malartú le tríú tíortha.

8.Ba cheart an comhar iltaobhach agus réigiúnach le tríú tíortha a neartú. Ba cheart lárionaid náisiúnta chomhordúcháin na mBallstát a úsáid mar phointí teagmhála chun faisnéis a mhalartú le tíortha comharsanachta agus le tíortha ábhartha eile.

9.I gcomhréir le Plean Gníomhaíochta athnuaite an Aontais Eorpaigh in aghaidh Smuigleáil Imirceach 27 , ba cheart an comhar le tríú tíortha príomha a neartú chun smuigleáil imirceach a chosc agus a bhrath, lena n‑áirítear trína bheith ag seoladh Comhpháirtíochtaí Oibríochtúla in aghaidh Smuigleála 28 . Tacaíonn gníomhaireachtaí Aontais leis an gcomhar sin, go háirithe Frontex, Europol, Eurojust agus Gníomhaireacht an Aontais Eorpaigh um Oiliúint i bhForfheidhmiú an Dlí (CEPOL), i gcomhréir lena sainorduithe, chomh maith le comhar oibríochtúil a dtacaíonn cúnamh airgeadais an Aontais leis.

10.I gcás ina bhfuil acmhainneacht inaitheanta ag líonraí oifigeach idirchaidrimh (OInna) chun rannchuidiú le feidhmeanna éagsúla a bhaineann le IBM ar leibhéal an Aontais agus ar an leibhéal náisiúnta, ba cheart iad a chomhordú go héifeachtach agus tacaíocht mhaith a thabhairt dóibh chun a gcumais oibríochtúla agus a n‑éifeachtacht oibríochtúil a uasmhéadú. Ba cheart go mbeadh na bealaí agus foirmeacha comhair agus tuairiscithe soiléir ar gach leibhéal. Ba cheart go mbeadh acmhainn bhuan sholúbtha ann chun foirne saineolaithe, nó oifigigh idirchaidrimh a bhfuil na scileanna ábhartha acu, a imscaradh chuig áiteanna éagsúla i gcás ina mbeidh riachtanais oibríochtúla ann. Ba cheart go mbeadh léiriú staide iomlán ag Frontex de chineálacha éagsúla na n‑oifigeach idirchaidrimh Eorpach (OInna Frontex, OInna Imirce na hEorpa, OInna na hEorpa um Fhilleadh, OInna gníomhaireachtaí eile) agus OInna inimirce náisiúnta, bunaithe ar fhaisnéis arna soláthar ag na Ballstáit agus ag comhlachtaí Eorpacha ábhartha eile. Ba cheart go gcuirfeadh an fhaisnéis a bhaileofar leis an anailís riosca agus leis an bhfeasacht staide ar leibhéal an Aontais agus ar an leibhéal náisiúnta, lena n‑áirítear an léiriú ar an bhfaisnéis réamhtheorann. Ba cheart d’oifigigh idirchaidrimh Frontex gach faisnéis ábhartha a mhalartú le Toscaireacht an Aontais ina dtír imlonnaithe, faoi chuimsiú chomhordú foriomlán bheartas an Aontais sa tír sin. Ba cheart úsáid iomlán a bhaint as an líonra Oifigeach Idirchaidrimh Inimirce (ILO) chun comhar agus comhordú i measc oifigigh idirchaidrimh inimirce i dtríú tíortha a fheabhsú.

11.Ba cheart don Aontas fothú acmhainneachta a bhaineann le bainistiú comhtháite teorainneacha, cuairteanna oibre ar thríú tíortha, comhairle theicniúil, oiliúint nó tacaíocht le trealamh teicniúil a chomhordú agus faireachán a dhéanamh orthu sin. Ba cheart do Frontex leanúint de thionscadail fothaithe acmhainneachta agus cláir a bhaineann le bainistiú comhtháite teorainneacha arna gcistiú ag an Aontas a chur chun feidhme i dtíortha is iarrthóirí Aontais iad agus i dtríú tíortha tosaíochta eile, agus leanúint den Choimisiún a chur ar an eolas fúthu, go háirithe i gcás ina bhfónann na cláir sin chun acmhainneachtaí na dtríú tíortha a fhorbairt i réimsí an rialaithe ag teorainneacha, na hanailíse riosca, agus an fhillte 29 agus an athligin isteach. Ba cheart do Frontex comhoibriú go dlúth freisin le comhpháirtithe cur chun feidhme eile de chuid an Choimisiúin chun comhairle a thabhairt agus gníomhaíochtaí bainistithe teorainneacha á gcur chun feidhme sa chomharsanacht agus i dtríú tíortha tosaíochta eile; agus moltar do chomhpháirtithe cur chun feidhme an Choimisiúin comhairliúchán a lorg leis an nGníomhaireacht maidir leis na hábhair sin ar fud an tionscadail ina iomláine. Ba cheart tionscadail atá faoi stiúir na mBallstát a chur chun feidhme i ndlúthchomhar le Frontex; ba cheart lánacmhainneacht shaineolas na Gníomhaireachta a úsáid i ngach céim de na tionscadail. Ba cheart don Ghníomhaireacht forbhreathnú cuimsitheach a fhorbairt freisin ar thionscadail fothaithe acmhainneachta agus ar chuairteanna oibre a bhaineann le IBM atá ar siúl agus atá beartaithe i dtríú tíortha.

12.Ba cheart comhar agus comhlántacht idir misin shibhialtacha de chuid an Chomhbheartais Slándála agus Cosanta a bhfuil gné bainistithe teorainneacha acu agus Frontex a fhorbairt a thuilleadh chun feasacht staide a áirithiú agus chun tacú le hanailís riosca agus le cur chun cinn caighdeán bainistithe chomhtháite teorainneacha, agus bearta á ndéanamh chun gníomhaíochtaí forluiteacha a sheachaint. Ba cheart a áirithiú leis sin freisin malartú tráthrialta faisnéise agus comhordú a bhaineann leis an gcistiú arna soláthar ag na gníomhaithe uile atá páirteach ann, amhail an Coimisiún, Frontex, an tSeirbhís Eorpach Gníomhaíochta Seachtraí agus ag gníomhaithe sibhialtacha an Chomhbheartais Slándála agus Cosanta ar an talamh.

Tosaíochtaí beartais

Ba cheart an leanúnachas agus idir-inoibritheacht oibríochtúil idir an rialú ag teorainneacha seachtracha agus bearta teicniúla agus oibríochtúla laistigh de limistéar Schengen a bheith deabhunaithe chun freagairt éifeachtach a ráthú ar ghluaiseachtaí tánaisteacha neamhúdaraithe, ar an imirce neamhrialta agus ar an gcoireacht trasteorann a bhaineann le teorainneacha seachtracha.

Ba cheart acmhainneacht náisiúnta a chur i bhfeidhm (ullmhacht) chun dlús a chur le seiceálacha póilíneachta a bhaineann le himirce neamhrialta laistigh den chríoch, lena n‑áirítear i limistéir teorann intíre, le tacaíocht ó bhearta malartacha eile atá ar fáil do na Ballstáit, rud a chuireann srian ar an ngá atá le rialuithe ag na teorainneacha inmheánacha a thabhairt isteach an athuair.

Treoirlínte straitéiseacha

1.Ar leibhéal an Aontais agus ar an leibhéal náisiúnta araon, ba cheart léiriú staide cuimsitheach agus anailís riosca a dhéanamh ar an teacht isteach neamhrialta agus ar ghluaiseachtaí tánaisteacha náisiúnach tríú tír laistigh den Aontas, mar bhonn do bhearta spriocdhírithe comhréireacha a bheidh le glacadh. Ba cheart do Frontex léiriú staide Eorpach a ullmhú le tacaíocht iomlán ó na Ballstáit agus i gcomhar le gníomhaireachtaí ábhartha eile de chuid an Aontais. Ba cheart EUROSUR a úsáid mar phríomhardán don fheidhm sin, in éineacht le córais bailithe sonraí éifeachtacha agus aontaithe eile. Ba cheart comhar, amhail an comhar idir Frontex, Europol agus Gníomhaireacht an Aontais Eorpaigh um Thearmann chun tuarascálacha tráthrialta a ullmhú, agus comhordú feabhsaithe a fhorbairt a thuilleadh, lena n‑áirítear anailís riosca chomhpháirteach, cleachtais oibríochtúla agus malartú líofa faisnéise idir gardaí teorann agus údaráis eile a oibríonn ag an teorainn sheachtrach, i gcomhréir lena sainorduithe faoi seach agus lánurraim á tabhairt don reachtaíocht maidir le cosaint sonraí. Áirítear orthu sin na LNCanna, na húdaráis atá ag obair laistigh de limistéar Schengen, agus lárionaid um chomhar póilíneachta agus custaim agus lárionaid ábhartha eile. Ba cheart córais faisnéise éagsúla uile‑Aontais a bheith in úsáid go héifeachtach ag na húdaráis fhreagracha uile dár deonaíodh rochtain ar na córais sin go dlíthiúil.

2.Ba cheart an comhar oibríochtúil idir oibríochtaí comhpháirteacha a chomhordaíonn Frontex agus na lárionaid ábhartha um chomhar póilíneachta agus custaim a fhorbairt agus a chomhdhlúthú a thuilleadh.

3.Ba cheart acmhainneacht leordhóthanach a bheith ann ar an leibhéal náisiúnta chun seiceálacha póilíneachta a bhaineann leis an inimirce neamhdhleathach ar fud na críche ar fad a threisiú agus chun seiceálacha póilíneachta agus rialú imirce a dhéanamh ar na príomhbhóithre iompair, lena n‑áirítear limistéir teorann bunaithe ar anailís riosca.

Tosaíochtaí beartais

Cur chun feidhme éifeachtach na bhfilltí i gcás náisiúnaigh tríú tír atá faoi réir cinneadh um fhilleadh, ba cheart go n‑áiritheofaí leis go bhfágfaidh gach duine nach bhfuil an ceart aige fanacht san Aontas an tAontas Eorpach. Ba cheart a áirithiú freisin le bainistiú comhtháite teorainneacha san Eoraip gurb iad saineolaithe a bhfuil oiliúint chuí orthu a dhéanfaidh an nós imeachta um fhilleadh ar bhealach daonnachtúil díniteach inbhuanaithe, a chomhlíonfaidh go hiomlán cearta bunúsacha fillithe agus go háirithe prionsabal an non‑refoulement, i gcomhréir leis an gCeart um Chearta agus Saoirsí Bunúsacha, leis an dlí idirnáisiúnta agus le dlí an Aontais.

Ba cheart acmhainneacht riaracháin, theicniúil agus oibríochtúil a bheith ann ar leibhéal an Aontais agus ar an leibhéal náisiúnta chun próisis um fhilleadh a chur chun feidhme, lena n‑áirítear fillteacha éigeantais agus deonacha, go héifeachtach agus ar bhealach aontaithe a rannchuidíonn le córas coiteann AE um fhilleadh mar a leagtar amach sa Chomhshocrú maidir le hImirce agus Tearmann 32 . Tá struchtúir níos láidre laistigh den Aontas le comhcheangal le comhar níos éifeachtaí le tríú tíortha. Áirítear leis sin freisin an treoir a leanúint agus na gníomhaíochtaí a chur chun feidhme mar a leagtar amach i Straitéis an Aontais Eorpaigh um fhilleadh deonach agus ath‑lánpháirtiú ó mhí Aibreáin 2021 33 iad, lena gcuirtear filleadh deonach agus ath‑lánpháirtiú chun cinn mar dhlúthchuid den chóras um fhilleadh.

Ba cheart do na Ballstáit úsáid iomlán a bhaint as an tacaíocht oibríochtúil, theicniúil agus phraiticiúil is féidir le Frontex a sholáthar i réimse an fhillte, go háirithe úsáid a bhaint as Iarratas Frontex ar Fhilleadh (FAR) le haghaidh eitiltí sceidealaithe agus cairteitiltí, uirlis dhigiteach an chórais bainistithe cásanna fillte (RECAMAS), Seirbhísí Ath‑Lánpháirtithe Comhpháirteacha Frontex (JRS) agus tacaíocht Frontex maidir le comhairleoireacht um fhilleadh agus ath‑lánpháirtiú.

Treoirlínte straitéiseacha

1.Ba cheart acmhainneacht agus ról Frontex, mar an ghéag oibríochtúil a thacaíonn leis na Ballstáit i ngach céim den phróiseas fillte, a neartú a thuilleadh sa chleachtas agus ba cheart do na Ballstáit an úsáid a bhaineann siad as seirbhísí Frontex a mhéadú.

2.Cumas na mBallstát náisiúnaigh tríú tír atá ag fanacht go neamhdhleathach a fhilleadh go haontaobhach nó go comhpháirteach, ba cheart é a mhéadú trí chóras náisiúnta comhtháite comhordaithe um fhilleadh a fhorbairt, córas a bheidh bunaithe ar shamhail an chórais bainistithe cásanna fillte arna forbairt ag an nGníomhaireacht agus a bheidh comhoiriúnach don bheartas Eorpach um fhilleadh. Ba cheart aghaidh a thabhairt ar na dúshláin comhtháthaithe agus idir‑inoibritheachta atá fós ann mar gheall ar na teicneolaíochtaí éagsúla a úsáideann córais náisiúnta um fhilleadh agus ba cheart naisc le huirlisí digiteacha ar leibhéal an Aontais a chumasú.

3.Ba cheart tuilleadh forbartha a dhéanamh ar an bhFeidhmchlár Bainistíochta Comhtháite maidir le Filleadh (IRMA) chun feabhas a chur ar bhailiú sonraí maidir le hoibríochtaí fillte agus maidir le hathligean isteach. Éascófar leis sin an phleanáil, malartú na faisnéise oibríochtúla ábhartha, an t‑eagrú agus an cur chun feidhme a dhéanann na Ballstáit maidir le gníomhaíochtaí fillte, athligin isteach agus ath-lánpháirtithe. Cuirfidh sé ar a chumas do Frontex ról níos réamhghníomhaí a ghlacadh agus é ag tacú le pleanáil agus eagrú oibríochtaí fillte, lena n‑áirítear cúnamh roimh fhilleadh agus an t‑ath‑lánpháirtiú.

4.Ba cheart tuilleadh forbartha a dhéanamh ar an bhFeidhmchlár Bainistíochta Comhtháite maidir le Filleadh (IRMA) atá ag Frontex sa chaoi go mbeidh sé idir‑inoibritheach leis na córais TF um fhilleadh atá ag na Ballstáit agus le huirlisí TF ábhartha eile le haghaidh filleadh, athligean isteach agus ath‑imeascadh a chur chun feidhme.

5.Ba cheart do na páirtithe leasmhara uile (an Coimisiún, Frontex, na Ballstáit) obair a dhéanamh chun feabhas a chur ar bhailiú sonraí a bhaineann le filleadh, ath‑imeascadh agus athligean isteach agus chun anailísíocht, anailís agus táirgí feasachta staide maidir le feidhmiú an fhillte a fhorbairt, cinn atá oiriúnach dá gcuspóirí, chun gur féidir filleadh agus athligean isteach a phleanáil go réamhghníomhach.

6.Ba cheart do na Ballstáit infheistíocht a dhéanamh i struchtúir chomhairleoireachta um fhilleadh agus ath‑lánpháirtiú, agus iad ag áirithiú go mbíonn an chomhairleoireacht ar fáil ar gach céim den phróiseas um fhilleadh agus go bhfuil an oiliúint iomchuí ar na comhairleoirí. Ba cheart comhairleoireacht, i gcomhréir le creat an Aontais um chomhairleoireacht maidir le filleadh, a chur ar fáil le linn nósanna imeachta um fhilleadh deonach agus éigeantach (lena n‑áirítear duine faoi choinneáil) chun an filleadh a spreagadh agus a eagrú. Tá plean oibre forbartha ag Frontex chun tacú leis na Ballstáit i réimse na comhairleoireachta maidir le filleadh agus ath‑lánpháirtiú, atá le cur chun feidhme i ndlúthchomhar leis na Ballstáit.

7.Maidir le filleadh deonach agus ath‑lánpháirtiú a chur chun cinn, agus úsáid níos mó a bhaint as, is cuid lárnach de chóras coiteann an Aontais um fhilleadh é sin, i gcomhréir le straitéis an Aontais maidir le filleadh deonach agus ath‑lánpháirtiú 34 . Leis an tacaíocht le haghaidh ath‑lánpháirtiú, spreagfar comhar na bhfillithe agus cuirfear chun cinn comhar le tríú tíortha, lena gcothófar an úinéireacht atá acu i ndáil le filleadh, athligean isteach agus ath‑lánpháirtiú a náisiúnach.

8.Tá na Seirbhísí Ath‑Lánpháirtithe Comhpháirteacha (JRS) forbartha ag Frontex, lena soláthraítear seirbhísí um fhilleadh agus ath‑lánpháirtiú do na Ballstáit. Ba cheart líon na dtíortha a chumhdaítear leis na Seirbhísí Ath‑Lánpháirtithe a leathnú chun riachtanais na mBallstát a chomhlíonadh agus ba cheart do na Ballstáit lánúsáid a bhaint as na seirbhísí agus iad a chur ar fáil d’fhillithe deonacha agus éigeantacha araon. Ba cheart sineirgí agus leanúnachas a lorg idir na seirbhísí um ath‑lánpháirtiú a sholáthraíonn Seirbhísí Ath‑Lánpháirtithe Comhpháirteacha Frontex agus struchtúir agus sásraí náisiúnta tríú tíortha ábhartha, i gcás ina mbíonn siad ar fáil.

9.Ba cheart do na Ballstáit a áirithiú go hiomlán go bhfuil acmhainneacht acu chun rannchuidiú le hoibríochtaí fillte Eorpacha a chomhordaíonn nó a eagraíonn Frontex, lena n‑áirítear i réimse an fhaireacháin ar fhilleadh. Ba cheart do na Ballstáit agus Frontex a gcuid acmhainneachta, maidir le faireachán ar na hoibríochtaí uile um fhilleadh, a fhorbairt a thuilleadh.

10.Ní mór do na Ballstáit acmhainneacht leordhóthanach a áirithiú chun sonraí a bhailiú maidir leis an riosca éalaithe agus chun anailís riosca a fhorbairt chun coinneáil agus roghanna malartacha ar choinneáil a chur i bhfeidhm chun gluaiseachtaí tánaisteacha a laghdú chomh maith le hacmhainneacht theicniúil a fhorbairt le haghaidh coinneála agus roghanna malartacha ar choinneáil. Ba cheart coinníollacha coinneála a bheith i gcomhréir leis an dlí idirnáisiúnta agus dlí an Aontais. D’fhonn an próiseas um fhilleadh a éascú agus a bhrostú, moltar do na Ballstáit a áirithiú go n‑aithneofar cinntí um fhilleadh a chéile 35 .

11.Anuas ar an doiciméad beartais i dtreo straitéis oibríochtúil i gcomhair fillteacha níos éifeachtacha arna ghlacadh ag an gCoimisiún an 24 Eanáir 2023 36 , ba cheart do na páirtithe leasmhara ábhartha uile lán úsáid a bhaint as an gComhordaitheoir um Fhilleadh agus an Líonra Ardleibhéil um Fhilleadh chun comhar praiticiúil idir na Ballstáit, an Coimisiún agus Frontex a chothú agus a chur chun cinn.

12.I gCóras Faisnéise Schengen athnuaite beidh foláirimh maidir le náisiúnaigh tríú tír atá faoi réir cinntí um fhilleadh, ar uirlis thábhachtach nua í a bheidh ar fáil do na Ballstáit gur féidir leo faireachán a dhéanamh ar chinntí um fhilleadh agus iad a fhorfheidhmiú, rud a réiteoidh an bealach le haghaidh comhar níos mó, lena n‑áirítear maidir le haitheantas frithpháirteach do chinntí um fhilleadh, agus gluaiseacht thánaisteach neamhrialta in Schengen a dhíspreagadh. Ba cheart do na Ballstáit a áirithiú go gcuirtear an beart sin chun feidhme go hiomchuí i gcomhréir leis an Moladh ón gCoimisiún.

Tosaíochtaí beartais

Ba cheart tacaíocht a bheith ag bainistiú comhtháite na dteorainneacha san Eoraip, agus go háirithe ag seiceálacha teorann agus faireachas teorann, ó chórais theicniúla agus réitigh theicniúla Eorpacha, córais a bheidh sofaisticiúil soghluaiste idir‑inoibrithe agus a bheidh comhoiriúnach do chórais mhórscála TF de chuid an Aontais. Is é is aidhm don mhéid sin rialú teorann níos éifeachtúla agus níos iontaofa a chinntiú. Ba cheart go mbeadh sé d’acmhainn ag an nGarda Teorann agus Cósta Eorpach an úsáid is fearr a bhaint as teicneolaíochtaí úrscothacha, lena n‑áirítear sásraí chun sonraí a dhaingniú.

Treoirlínte straitéiseacha

1.Ba cheart cáilíocht na faisnéise a úsáidtear i gcomhair seiceálacha teorann sna córais atá ann cheana a fheabhsú trí bhearta praiticiúla a ghlacadh chun cruinneas na sonraí a áirithiú, lena n‑áirítear meastóireacht thréimhsiúil a dhéanamh orthu agus teicneolaíocht úrscothach a chur chun feidhme.

2.Mar a deirtear i dtreoirlíne straitéiseach 5 den ghné maidir le comhar ar leibhéal an Aontais, ba cheart idir‑inoibritheacht na gcóras mórscála TF atá ann cheana agus na gcóras mórscála TF nua (EES, VIS, ETIAS, Córas Faisnéise Schengen athnuaite) a áirithiú, agus go háirithe cur chun feidhme iomlán agus cuimsitheach na gcóras sin a athnuadh le déanaí.

3.Is é príomhchuspóir eu-LISA, Gníomhaireacht an Aontais Eorpaigh chun Bainistiú Oibríochtúil a dhéanamh ar Chórais Mhórscála TF sa Limistéar Saoirse, Slándála agus Ceartais, na comhpháirteanna lárnacha de chórais faisnéise mhórscála a fhorbairt, a choinneáil ar bun agus a oibriú.

4.Ba cheart acmhainneacht na réiteach teicniúil cliste nua (e.g. geataí seiceálacha teorann uathoibrithe) agus leas a bhaint as idir‑inoibritheacht na gcóras faisnéise éagsúla (e.g. FADO agus Córais Doiciméid Leabharlann Leictreonach Interpol Frontex) a bhaineann leis na teorainneacha agus leis an tslándáil chun feabhas a chur ar shlándáil na saoránach, chun seiceálacha teorann agus trasnuithe teorainneacha seachtracha a éascú, agus chun an choireacht agus an sceimhlitheoireacht trasteorann a chomhrac, ar bhealach a n‑áirithíonn urramú iomlán chearta na saoránach agus na náisiúnach tríú tír araon.

5.Ba cheart lánacmhainneacht na teicneolaíochta nua‑aimseartha a úsáid chun cumas faireachais agus freagartha na hEorpa a mhéadú ag na teorainneacha seachtracha. Ba cheart an úsáid a bhaintear as acmhainní faireachais Eorpacha (e.g. seirbhísí satailíte) a fhorbairt a thuilleadh chun léiriú staide cuimsitheach a chruthú.

6.Ba cheart acmhainneacht faireachais na gcóras faireachais teicniúil (do-aistrithe agus soghluaiste) a úsáidtear ag na teorainneacha muirí agus talún a fhorbairt a thuilleadh. Ba cheart go gcumhdódh sin réitigh theicniúla agus próisis oibre a úsáidtear i lárionaid oibríochtúla éagsúla (LNS, Lárionaid Chomhordúcháin Tarrthála agus Lárionaid Chomhordúcháin Áitiúla) agus in aonaid mhóibíleacha.

7.Maidir leis an rannchuidiú a dhéanann an Garda Teorann agus Cósta Eorpach le neamhspleáchas Eorpach sa teicneolaíocht chriticiúil 38 , tá an Garda Teorann agus Cósta Eorpach le háirithiú go gcuirfear san áireamh ina phleanáil forbartha cumais an cuspóir maidir le spleáchas ar theicneolaíochtaí criticiúla ó thríú tíortha a laghdú, lena n‑áirítear leas a bhaint as torthaí taighde agus nuálaíocht na hEorpa maidir le bainistiú teorainneacha.

8.Maidir le próiseáil sonraí pearsanta trí úsáid a bhaint as teicneolaíochtaí nua, ní mór don phróiseáil sin ceanglais dhlí an Aontais maidir le cosaint sonraí a chomhlíonadh, lena n‑áirítear i ndáil le húsáid na teicneolaíochta úrscothaí, chun sonraí pearsanta a shlánú. Ba cheart don Choimisiún, i gcomhar le eu‑LISA, plean gníomhaíochta agus réitigh theicniúla a fhorbairt chun tacaíocht a thabhairt do na Ballstáit méideanna móra sonraí a láimhseáil agus a phróiseáil le cabhair ó theicneolaíochtaí nua úrscothacha.

Tosaíochtaí beartais

Ba cheart córas cuimsitheach Eorpach um rialú cáilíochta a bheith i bhfeidhm chun síorfheasacht a áirithiú maidir le cur chun feidhme agus cáilíocht bhainistiú comhtháite na dteorainneacha san Eoraip ar an leibhéal straitéiseach agus ar an leibhéal oibríochtúil. Ba cheart torthaí an rialaithe cáilíochta a úsáid mar bhonn agus córais agus feidhmeanna Eorpacha agus náisiúnta á bhforbairt a thuilleadh.

Treoirlínte straitéiseacha

1.Ba cheart sásra rialaithe cáilíochta Eorpach, a chomhdhéanfar, go háirithe, de shásra meastóireachta agus faireacháin Schengen, na measúnuithe leochaileachta arna ndéanamh ag Frontex, agus sásraí rialaithe cáilíochta náisiúnta a chur i ngníomh go hiomlán. Sa chreat sin, ba cheart do Frontex forbairt a dhéanamh ar na hacmhainneachtaí teicniúla chun measúnuithe agus seiceálacha a dhéanamh maidir le comhlíonadh ar dhoiciméid taistil arna n‑eisiúint ag na Ballstáit, chun a áirithiú go gcomhlíonann na gnéithe slándála na caighdeáin a bhunaítear ar leibhéal an Aontais.

2.Bunaithe ar mhalartú rialta faisnéise, ba cheart an leas is mó is féidir a bhaint as sineirgí idir an measúnú leochaileachta agus sásra meastóireachta Schengen d’fhonn léargas níos fearr a fháil ar fheidhmiú limistéar Schengen. Ba cheart go seachnófaí leis sin, a mhéid is féidir, dúbláil iarrachtaí ag na Ballstáit, agus go n‑áiritheofaí úsáid níos comhordaithe na n‑ionstraimí airgeadais AE ábhartha a thacaíonn le bainistiú na dteorainneacha seachtracha.

3.Ba cheart torthaí an tsásra rialaithe cáilíochta a úsáid nuair a bheidh an córas náisiúnta um bainistiú teorainneacha á fhorbairt agus nuair a bheidh tosaíochtaí á sannadh ar úsáid ionstraimí cistiúcháin ábhartha de chuid an Aontais (e.g. an Ciste um Thearmann, Imirce agus Lánpháirtíocht (CTIL), na cláir náisiúnta faoin Ionstraim um Bainistiú Teorainneacha agus um Víosaí (IBTV) an Chiste um Bainistiú Comhtháite Teorainneacha, nó saoráidí téamacha IBTV uaireanta), go háirithe agus measúnú á dhéanamh ar aon togra cistiúcháin a sholáthraíonn an Coimisiún.

4.Ba cheart do na Ballstáit sásra náisiúnta um rialú cáilíochta (‘meastóireacht Schengen’ náisiúnta) a bhunú, lena gcumhdófaí gach cuid agus gach feidhm den chóras náisiúnta bainistiú comhtháite teorainneacha agus lena n‑áireofaí na húdaráis uile a bhfuil baint acu le bainistiú comhtháite na dteorainneacha.

5.Ba cheart do na Ballstáit, i gcomhréir lena n‑oibleagáidí faoi rialacháin meastóireachta Schengen 40 agus Rialachán EBCG, páirt ghníomhach a ghlacadh i gcuairteanna meastóireachta Schengen a chomhordaíonn an Coimisiún agus sonraí ar ardcháilíocht a sholáthar go tráthúil do na measúnuithe leochaileachta a dhéanann Frontex.

6.I gcomhréir le rialachán meastóireachta Schengen, ba cheart a chuimsiú faoi mheastóireachtaí Schengen aschur oibríochtúil an Gharda Teorann agus Cósta Eorpaigh ar fad, lena gcumhdófaí freisin meastóireacht ghníomhaíochtaí oibríochtúla na Gníomhaireachta laistigh de na Ballstáit.

Tosaíochtaí beartais

Bainfear amach cur chun feidhme straitéis EIBM le tacaíocht ó chistiú tiomnaithe ón Aontas, go háirithe ón Ionstraim um Bainistiú Teorainneacha agus um Beartas Víosaí (IBTV) agus CTIL. Tacóidh cistí an Aontais le gníomhaíochtaí um bainistiú comhtháite na dteorainneacha san Eoraip ar leibhéal an Aontais agus ar an leibhéal náisiúnta, i gcomhréir le forálacha dlí an chiste áirithe de chuid an Aontais. Ba cheart é a bheith d’aidhm ag na Ballstáit a dtosaíochtaí cistiúcháin a shocrú chun a áirithiú go gcumhdaítear na heilimintí uile a bhaineann le bainistiú comhtháite na dteorainneacha san Eoraip a thagann ó dhlínse an Aontais agus a shainítear le dlí an Aontais d’fhonn an breisluach AE is mó is féidir a bhaint amach. Na gnéithe de bhainistiú comhtháite na dteorainneacha san Eoraip atá rialaithe leis an dlí náisiúnta, ba cheart go gcumhdófaí iad le hacmhainní náisiúnta, más féidir.

Faigheann gníomhaíochtaí Frontex tacaíocht ó bhuiséad tiomnaithe na Gníomhaireachta as buiséad foriomlán an Aontais. Féadfaidh an Ghníomhaireacht tairbhiú de chistiú ón Aontas freisin, cistiú le haghaidh tionscadail cúnaimh theicniúil i dtríú tíortha, i gcomhréir lena shainordú agus le forálacha na n‑ionstraimí cistiúcháin ábhartha (Ionstraim um Chomharsanacht, Forbairt agus Comhar Idirnáisiúnta – an Eoraip Domhanda, NDICI‑GE, agus an Ionstraim um Chúnamh Réamhaontachais, IPA III) a thacaíonn le cur chun feidhme bheartas seachtrach imirce an Aontais.

Treoirlínte straitéiseacha

1.Ba cheart an úsáid a bhaintear as ionstraimí cistiúcháin de chuid an Aontais (e.g. cláir náisiúnta faoi IBTV) a ailíniú le straitéisí IBM náisiúnta, le pleananna gníomhaíochta náisiúnta agus pleanáil náisiúnta cumais. Ba cheart tosaíochtaí náisiúnta soiléire mionsonraithe a bheith ann (e.g. EUROSUR, forbairt cumais), bunaithe ar thosaíochtaí an Aontais, ag uasmhéadú chomhlántacht agus bhreisluach chistí an Aontais.

2.Ba cheart torthaí shásra meastóireachta Schengen agus an mheasúnaithe leochaileachta a chur san áireamh chun tosaíochtaí a shannadh ar úsáid chistí an Aontais ar an leibhéal náisiúnta.

3.Le dlúthchomhar idir an Coimisiún agus Frontex, ba cheart sineirgí a áirithiú idir gníomhaíochtaí Frontex agus gníomhaíochtaí a mhaoinítear le hionstraimí cistiúcháin eile de chuid an Aontais agus an maoiniú dúbailte a sheachaint.

4.Le cistiú tiomnaithe ón Aontas faoin gCiste Slándála Inmheánaí (Teorainneacha) agus gníomhaíochtaí a bhaineann go sonrach le IBTV, ba cheart go dtacófaí leis na Ballstáit an trealamh is gá a fháil d’fhonn é a chur ar fáil do Frontex i gcomhréir le hAirteagal 64(14) de Rialachán EBCG. Leis sin, comhdhlúthófar cumas na Gníomhaireachta tacú leis na Ballstáit sin a bhfuil cúnamh de dhíth orthu.

Tosaíochtaí beartais

Tá urramú, cosaint agus cur chun cinn na gceart bunúsach ag croílár bhainistiú comhtháite na dteorainneacha san Eoraip. Ní mór don Gharda Teorann agus Cósta Eorpach a ráthú go gcosnófar na cearta bunúsacha agus a chúraimí á gcomhlíonadh aige mar oibleagáid dhlíthiúil uileghabhálach, i gcomhréir lena shainordú, agus bainistiú comhtháite na dteorainneacha san Eoraip á chur chun feidhme aige.

Ba cheart gníomhaíochtaí ghníomhaithe an Aontais agus gníomhaithe náisiúnta laistigh den Gharda Teorann agus Cósta Eorpach a dhéanamh i gcomhréir iomlán le dlí ábhartha an Aontais, lena n‑áirítear Cairt um Chearta Bunúsacha an Aontais Eorpaigh agus an dlí ábhartha idirnáisiúnta. Áirítear leis an méid sin Coinbhinsiún na Ginéive maidir le Stádas Dídeanaithe an 28 Iúil 1951 agus Prótacal 1967 a ghabhann leis agus an Coinbhinsiún um Chearta an Linbh. Na hoibleagáidí a bhaineann le rochtain ar an gcosaint idirnáisiúnta, agus go háirithe le prionsabal an non‑refoulement, ní mór lán‑urraim a thabhairt dóibh siúd freisin.

Ina thogra le haghaidh rialachán maidir le scagadh a náisiúnach tríú tír 43 , mhol an Coimisiún go mbunódh gach Ballstát sásra faireacháin neamhspleách chun a áirithiú go gcloítear le cearta bunúsacha i ndáil le is an scagadh ag na teorainneacha seachtracha agus go ndéanfaí imscrúdú ceart ar aon líomhaintí maidir le sárú ar chearta bunúsacha. Bheadh an sásra faireacháin sin mar chuid de rialachas agus d’fhaireachán staid na himirce dá bhforáiltear sa togra ón gCoimisiún le haghaidh rialachán nua maidir le tearmann agus bainistiú imirce 44 .

Treoirlínte straitéiseacha

1.Ba cheart cloí go docht leis an Straitéis um Chearta Bunúsacha 45  agus leis an bPlean Gníomhaíochta a ghabhann léi, 46 arna nglacadh ag Bord Bainistíochta Frontex, i ngníomhaíochtaí uile an Gharda Teorann agus Cósta Eorpaigh ar leibhéal an Aontais agus ar an leibhéal náisiúnta. Ar an leibhéal náisiúnta, féadfar é sin a bhaint amach le forbairt straitéise saincheaptha náisiúnta agus plean gníomhaíochta um chearta bunúsacha, nó lena gcuimsiú cuimsitheach sa straitéis náisiúnta le haghaidh EIBM.

2.Ba cheart do Frontex agus do na Ballstáit cultúr EIBM a chothú arb é atá i gceist leis oibleagáidí faoi dhlí an Aontais agus faoin dlí idirnáisiúnta a chomhlíonadh, lena n‑áirítear prionsabal an non‑refoulement, trí lánurraim a thabhairt do chearta bunúsacha, agus trí na prionsabail a bhaineann le comhionannas agus neamh‑idirdhealú, meas frithpháirteach, trédhearcacht agus dea‑riarachán, agus comhar frithpháirteach a chosaint agus a chur chun cinn. Ós rud é gur gné chothrománach nó thrasnach de bhainistiú comhtháite na dteorainneacha san Eoraip é urramú na gceart bunúsach, ba cheart do Frontex agus d’údaráis ábhartha na mBallstát coimircí na gceart bunúsach a chomhtháthú ar fud a ngníomhaíochtaí uile, lena n‑áirítear i ngníomhaíochtaí oibríochtúla, anailís agus measúnuithe riosca, gníomhaíochtaí pleanála, gníomhaíochtaí a bhaineann le filleadh, oiliúint agus forbairt, chomh maith le i gcomhar agus rannpháirtíocht le comhpháirtithe seachtracha. Thairis sin, ba cheart do Frontex agus do na Ballstáit gníomhú i gcomhréir iomlán leis na cearta bunúsacha le linn thimthriall iomlán oibríochtúil na ngníomhaíochtaí uile a bhaineann le bainistiú teorainneacha agus filleadh.

3.Ba cheart aird faoi leith a thabhairt do chearta agus riachtanais daoine leochaileacha nó grúpaí agus daoine ar leochaileach a gcásanna, lena n‑áirítear leanaí agus mionaoisigh neamhthionlactha. Ba cheart béim a chur ar fhorbairt na hacmhainneachta i ndáil le sainaithint luath, tacaíocht, idirghabháil chultúrtha, ateangaireacht agus atreorú leordhóthanach chuig sásamh nó sásraí cosanta de réir mar is ábhartha. I ndáil le leanaí, ba cheart leas an linbh a bheith i dtús áite ag Frontex agus ag na Ballstát agus aon chinnteoireacht á déanamh a dhéanfadh difear do leanaí. Ba cheart do na Ballstáit sásra náisiúnta faireacháin ar chearta bunúsacha a fhorbairt agus a choinneáil ar bun go hoibríochtúil i ndáil le bainistiú na dteorainneacha agus leis an bhfilleadh. Ba cheart an sásra sin a bheith feistithe le hacmhainní agus acmhainneacht le bheith in ann comhairle a sholáthar maidir le comhlíonadh ceart bunúsach, imscrúduithe a dhéanamh maidir le sáruithe líomhnaithe, oiliúint maidir le cearta bunúsacha a sholáthar, maoirseacht a dhéanamh ar mheicníochtaí comhshásaimh atá ann cheana nó cur leo (amhail tuairisciú teagmhais nó sásraí gearáin) agus comhlíontacht oibríochtúil fhoriomlán na ngníomhaíochtaí i ndáil le Cairt an Aontais Eorpaigh um Chearta Bunúsacha, dlí an Aontais agus dlí idirnáisiúnta, lena n‑áirítear cearta bunúsacha, a áirithiú. Ba cheart údaráis inniúla na mBallstát a spreagadh chun pointe fócasach le haghaidh cearta bunúsacha a cheapadh sna ranna uile chun éifeachtúlacht, comhordú agus comhchuibhiú na comhairle, na hoiliúna agus na formhaoirseachta i ndáil le cearta bunúsacha a áirithiú.

4.Tá lucht faireacháin ar chearta bunúsacha chun bheith rannpháirteach go gníomhach maidir le hurraim do chearta bunúsacha a chosaint agus a chur chun cinn mar eilimint lárnach de ghníomhaíochtaí uile EBCG, faoi gach gné de bhainistiú comhtháite teorainneacha san Eoraip. Ba cheart an rochtain chéanna ar limistéir oibríochtúla atá ag na baill foirne imscartha uile a dheonú don lucht faireacháin. Ba cheart don lucht faireacháin a bheith ar fáil agus ina fhoinse réamhghníomhach comhairle, aiseolais agus tacaíochta in iarracht chomhpháirteach EBCG chun an urraim do dhlí an Aontais agus don dlí idirnáisiúnta, lena n‑áirítear cearta bunúsacha, a dhearbhú.

5.Ba cheart na cearta bunúsacha a bheith ina gcuid ríthábhachtach den siollabas oiliúna ar leibhéal an Aontais agus ar an leibhéal náisiúnta le haghaidh gach duine a ghlacann páirt i ngníomhaíochtaí a bhaineann leis an rialú ag teorainneacha nó filleadh. Ba cheart díriú go sonrach leis na bearta oiliúna sin ar dhaoine leochaileacha, lena n‑áirítear leanaí agus mionaoisigh neamhthionlactha, a chosaint.

6.Le linn na meastóireachtaí a dhéantar faoi Shásra athbhreithnithe Faireacháin agus Meastóireachta Schengen, ba cheart aird ar leith a thabhairt ar an urraim do chearta bunúsacha a fhíorú agus acquis Schengen á chur i bhfeidhm.

Tosaíochtaí beartais

Ba cheart a áirithiú go mbeidh fáil ar líon leordhóthanach ball foirne inniúil a bhfuil oiliúint shonrach orthu i ngach réimse de bhainistiú comhtháite na dteorainneacha san Eoraip ar an leibhéal Eorpach agus ar an leibhéal náisiúnta, trí dhlúthchomhar idir acadaimh oiliúna sna Ballstáit agus Frontex.

Ba cheart an t‑oideachas agus an oiliúint a bhunú ar chomhchaighdeáin chomhchuibhithe deacháilíochta oiliúna don bhuanchór, agus na riachtanais oibríochtúla, na cúraimí agus an inniúlacht dhlíthiúil á gcur san áireamh agus béim á leagan ar thuiscint shoiléir ar na luachanna atá cumhdaithe sna Conarthaí. Ba cheart dóibh na caighdeáin is airde agus dea‑chleachtais a chur chun cinn i gcur chun feidhme dhlíthe an Aontais maidir le teorainneacha agus filleadh, agus béim ar leith á leagan ar fhaisnéis ábhartha maidir le cosaint idirnáisiúnta, daoine leochaileacha, lena n‑áirítear leanaí agus mionaoisigh neamhthionlactha, a chosaint agus ar an urraim do na cearta bunúsacha, agus ba cheart di cultúr coiteann a chruthú bunaithe ar an urraim do na cearta bunúsacha.

 Treoirlínte straitéiseacha

1.Ba cheart na lárchuraclaim choiteanna agus na huirlisí oiliúna is gá le haghaidh bainistiú teorann agus filleadh, lena n‑áirítear maidir le leanaí agus daoine eile ar leochaileach a gcás a chosaint, eolas na ngardaí teorann le linn seiceálacha teorann chun doiciméid bhréagacha agus doiciméid fhalsaithe, chomh maith le pasadóirí agus daoine ar cosúil an dealramh atá orthu, a fhorbairt a thuilleadh agus ba cheart iad a bhunú ar chreat tagartha foriomlán coiteann do cháilíochtaí arna bhforbairt don earnáil (creat earnálach cáilíochtaí don ghardáil teorann agus cósta). Ba cheart treochlár cumais an Gharda Teorann agus Cósta Eorpaigh, a fhormheasann an Bord Bainistíochta gach bliain, a chur san áireamh sna táirgí sin. Ina theannta sin, ba cheart dóibh cúrsaí breise oiliúna agus seimineáir a bhaineann le cúraimí comhtháite bainistithe teorann a chur ar fáil don bhuanchór agus d’oifigigh de chuid na n‑údarás inniúil náisiúnta araon.

2.Ba cheart do Frontex, lena n‑áirítear a Oifigeach um Chearta Bunúsacha, leanúint d’uirlis shonrach oiliúna don Gharda Teorann agus Cósta Eorpach a fhorbairt agus a shaibhriú, i ndlúthchomhar leis na Ballstáit, leis an gCoimisiún, le FRA, le gníomhaireachtaí ábhartha eile de chuid an Aontais agus le páirtithe leasmhara eile, agus torthaí ábhartha taighde agus dea‑chleachtais á gcur san áireamh.

3.Ba cheart bearta oiliúna speisialaithe a bhaineann le cúraimí agus le cumhachtaí bhaill an bhuanchóir, a fhorbairt a thuilleadh le haghaidh lucht faireacháin ar an bhfilleadh éigeantach agus ar chearta bunúsacha, chun aghaidh a thabhairt ar riachtanais oibríochtúla. Ba cheart freachnaimh a dhéanamh go tráthrialta leis na gardaí teorann sin agus le baill eile de na foirne, i gcomhréir leis an sceideal oiliúna speisialaithe.

4.Ba cheart leibhéal comhionann d’oiliúint a bhaineann le gardáil na dteorainneacha agus leis an bhfilleadh a sholáthar ar leibhéal an Aontais agus ar an leibhéal náisiúnta do gach ball den bhuanchór a imscarfar le haghaidh gníomhaíochtaí oibríochtúla, beag beann ar a gcatagóir. Ionas go n‑áiritheofar gur gairmithe iad gardaí teorann agus cósta uile na hEorpa agus oiliúint chuí orthu de réir a speisialtóireachta.

5.Ba cheart do Frontex sásra rialaithe cáilíochta inmheánach a chur chun feidhme, i gcomhréir le caighdeáin agus treoirlínte Eorpacha maidir le hoideachas agus oiliúint, chun ardleibhéal oiliúna, saineolais agus gairmiúlachta a áirithiú don fhoireann reachtúil a ghlacann páirt i ngníomhaíochtaí oibríochtúla na Gníomhaireachta. Ba cheart tuairisc a thabhairt sa tuarascáil mheastóireachta bhliantúil ar staid chur chun feidhme an tsásra sin agus ba cheart é a chur i gceangal leis an tuarascáil bhliantúil ar ghníomhaíochtaí.

6.Ba cheart a spreagadh go bhfaighfí eolas nó saineolas sonrach ó thaithí agus ó dhea‑chleachtais ar an gcoigríoch le linn misean, agus oibríochtaí a bhaineann leis an bhfilleadh, i mBallstát eile. Ba cheart, go háirithe, an deis sin a chur ar fáil trí chlár malartaithe do ghardaí teorann a ghlacann páirt in idirghabhálacha fillte de chuid Frontex.

7.Ba cheart don Ghníomhaireacht coincheap oiliúna inbhuanaithe cuimsitheach a fhorbairt, ceann lena gcuimhneofaí ar an bhféidearthacht i ndáil le hionad oiliúna a bhunú laistigh de Frontex, ag tógáil ar chomhar agus sineirgí níos fearr le hinstitiúidí oiliúna náisiúnta na mBallstát agus á gcur san áireamh mar is cuí. Is é an aidhm forbairt, soláthar agus deimhniú oideachais agus oiliúna gardaí teorann agus cósta a chomhordú agus a chuíchóiriú, bunaithe ar chaighdeáin Eorpacha maidir le dearbhú cáilíochta, agus cuimsiú cultúir choitinn Eorpaigh san oiliúint a chuirtear ar fáil a éascú tuilleadh.

Tosaíochtaí beartais

Tá taighde agus nuálaíocht ríthábhachtach chun tacú le bainistiú comhtháite teorainneacha le réitigh, teicneolaíocht agus eolas úrscothach.

Le taighde agus nuálaíocht Eorpach a mhaoinítear ón mbraisle ‘an tSlándáil Shibhialta don tSochaí’ d’Fhís Eorpach, forbraíodh, agus forbraítear fós, acmhainneachtaí a thacaíonn leis an dá ghné théamacha déag de bhainistiú comhtháite na dteorainneacha san Eoraip, amhail an cumas seiceálacha sainaitheantais, sláinte agus slándála a dhéanamh ag teorainneacha, feidhmiú limistéar Schengen a chosaint fad a éascaítear taisteal taistealaithe bona fide, ag urramú ceart agus leochaileachtaí féideartha daoine 49 . Le taighde agus nuálaíocht forbraítear freisin acmhainneachtaí chun faireachas ar theorainneacha agus feasacht staide a sholáthar 50 ; chun calaois chéannachta agus calaois doiciméad a chomhrac 51 ; chun tacú le réitigh úrscothacha don Gharda Teorann agus Cósta Eorpach, idir‑inoibritheacht agus feidhmíocht malartú sonraí agus anailís an Aontais 52 ; chun feabhas a chur ar bhrath riosca, freagairt ar theagmhais agus cosc coireachta 53 ; chun feabhas a chur ar acmhainneachtaí sibhialta na hEorpa le haghaidh slándáil mhuirí, lena n‑áirítear cuardach agus tarrtháil 54 . Chomh maith leis sin, tá ról lárnach aige i gcomhrac grúpaí coireachta eagraithe agus sceimhlitheoirí, a bhíonn nuálach go minic agus a nglacann le teicneolaíocht nua go luath.

Tá taighde agus nuálaíocht le haghaidh bainistiú teorainneacha ábhartha ó thaobh neamhspleáchas oscailte straitéiseach na hEorpa de freisin, lena n‑áirítear i réimsí teicneolaíochtaí criticiúla mar a thuairiscítear i bPlean Gníomhaíochta an Aontais maidir le Sinéirgí idir Tionscail na Slándála Sibhialta, na Cosanta agus an Aeraspáis, agus arna measúnú ag Faireachlann an Aontais Eorpaigh um Theicneolaíochtaí Criticiúla.

Ba cheart infheistíocht thráthúil dhea‑chomhordaithe sa taighde agus sa nuálaíocht i ndáil le bainistiú teorainneacha a áirithiú ar leibhéal an Aontais agus ar na leibhéil náisiúnta. Go háirithe, baineann sé seo le Fís Eorpach; Ciste Forbraíochta Réigiúnaí na hEorpa; staidéir taighde agus tionscadail phíolótacha arna ndéanamh ag Frontex; agus cláir náisiúnta um thaighde agus nuálaíocht. Maidir le deiseanna sineirgí idir taighde agus nuálaíocht an Aontais maidir le bainistiú teorainneacha agus ionstraimí náisiúnta agus ionstraimí eile de chuid an Aontais a thacaíonn le soláthróirí agus úsáideoirí Eorpacha leas a bhaint as réitigh nuálacha le haghaidh bainistiú teorainneacha, ba cheart na deiseanna sin a thapú. An ní atá i gceist go príomha ansin is ea an Ionstraim um Bainistiú Teorainneacha agus um Víosaí (IBTV) ach áirítear ann freisin ionstraimí amhail an Ionstraim Tacaíochta Teicniúla nó Eoraip Dhigiteach.

Treoirlínte straitéiseacha

1.Ba cheart d’oibríochtaí um bainistiú teorainneacha tairbhiú den taighde agus nuálaíocht, agus a bheith páirteach ann, chun a bheith níos idir‑inoibrithí, níos éifeachtaí ó thaobh costais de agus níos inbhuanaithe. Ba cheart d’údaráis teorann na mBallstát, Frontex agus eu‑LISA faireachán a dhéanamh ar thaighde agus nuálaíocht (a dhéantar ar an leibhéal náisiúnta, leibhéal an Aontais agus leibhéal an tionscail chomh maith le taighde agus nuálaíocht tríú tíortha agus eagraíochtaí eile) sna réimsí a chumhdaítear faoi IBM, forbairtí teicneolaíochta agus dúshláin a bhfuil coinne leo, agus leas a bhaint as réitigh nuálacha atá ar fáil.

2.Ba cheart an comhar idir Gníomhaireachtaí an Aontais agus aonaid taighde agus nuálaíochta údaráis teorann na mBallstát a fhorbairt a thuilleadh i réimsí tosaíochta, lena n‑áirítear le hobair Mhol Nuálaíochta an Aontais maidir leis an tSlándáil Inmheánach, ar líonra comhair de shaotharlanna nuálaíochta é a thacaíonn le obair na ngníomhairí slándála inmheánaí san Aontas agus ina Bhallstáit.

3.Nuair a phleanálfar taighde agus nuálaíocht maidir le bainistiú teorainneacha, cuirfidh an Coimisiún agus na Ballstáit san áireamh gnéithe fadtéarmacha Threochlár Cumais an Gharda Teorann agus Cósta Eorpaigh.

4.Ba cheart do Frontex cúnamh a thabhairt do na Ballstáit agus don Choimisiún creatchláir ábhartha an Aontais a tharraingt suas agus a chur chun feidhme le haghaidh gníomhaíochtaí taighde agus nuálaíochta a bhaineann le IBM, i.e. ‘an tSlándáil Shibhialta don tSochaí’ d’Fhís Eorpach.

5.Ba cheart do Frontex cúnamh a thabhairt do na Ballstáit réitigh nuálacha a thagann ón taighde agus nuálaíocht a shainaithint, a mheasúnú, agus a n‑úsáid a chur chun cinn (bailíochtú, tástáil, aistriú, comhtháthú agus/nó imscaradh), lena n‑áirítear trí Bhallstáit a thabhairt isteach go líonraí maidir leis an nuálaíocht.

6.Cuirfidh an Coimisiún na torthaí maidir le taighde agus nuálaíocht an Aontais maidir le bainistiú teorainneacha chun cinn, lena n‑áirítear i gcomhthéacs Phobal Eorpach an Taighde agus na Nuálaíochta le haghaidh na Slándála (CERIS) agus an Imeachta bhliantúil le haghaidh Taighde Slándála (SRE).

7.Ba cheart d’Fhaireachlann an Aontais Eorpaigh um Theicneolaíochtaí Criticiúla faireachán agus anailís ar theicneolaíochtaí criticiúla a sholáthar do bhainistiú comhtháite na dteorainneacha san Eoraip, a bhfeidhmeanna féideartha, slabhraí luacha, bonneagar tástála a theastaíonn, bearnaí agus spleáchais atá ann cheana, agus ionchuir le haghaidh treochláir teicneolaíochta a sholáthar.

8.Ní mór do réitigh nuálacha le haghaidh bainistiú teorainneacha, a chuirtear i bhfeidhm tar éis taighde agus nuálaíochta, ceanglais dhlí an Aontais agus an dlí náisiúnta a chomhlíonadh; cearta bunúsacha taistealaithe (saoránaigh den Aontas agus náisiúnaigh tríú tír araon) a chur chun cinn agus a urramú, lena n‑áirítear cosaint sonraí pearsanta, eitic taighde, agus ní mór don tsochaí na réitigh a thuiscint agus glacadh leo.

9.Ba cheart deiseanna a thugann Intleacht Shaorga a thapú agus ba cheart réitigh agus dea‑chleachtais a mhalartú. D’fhéadfaí a mheas gur réitigh íogaire agus casta iad réitigh a úsáideann Intleacht Shaorga, nó go bhféadfaí riosca a bheith ag baint leo. Ba cheart eitic agus iontaofacht uirlisí Intleachta Saorga a bheith i dtús áite taighde agus nuálaíocht, a chistíonn an Aontais, maidir le bainistiú teorainneacha, agus ba cheart do réitigh le haghaidh bainistiú teorainneacha a úsáideann Intleacht Shaorga na coimircí uile is gá i bhfeidhm, lena n‑áirítear iad siúd a shainordaítear sa Ghníomh um an Intleacht Shaorga a mholtar, nuair a chomhaontóidh na comhreachtóirí.

IARSCRÍBHINN II
Cur chun feidhme an timthrialla beartais ilbhliantúil maidir le EIBM

Ní mór beartas straitéiseach EIBM a chur chun feidhme tríd an straitéis theicniúil agus oibríochtúil le haghaidh EIBM a ghlac Bord Bainistíochta Frontex chomh maith leis na straitéisí náisiúnta atá le suí ag na Ballstáit 55 . Léirítear i bhFíor 1 na céimeanna éagsúla i dtimthriall an bheartais straitéisigh ilbhliantúil le haghaidh EIBM.

Fíor 1: Timthriall an bheartais straitéisigh ilbhliantúil le haghaidh EIBM

a) Straitéis theicniúil agus oibríochtúil Frontex maidir le EIBM

I gcomhréir le hAirteagal 8(5) de Rialachán EBCG, cuirtear de chúram ar Frontex straitéis theicniúil agus oibríochtúil a bhunú le haghaidh bhainistiú comhtháite na dteorainneacha san Eoraip, le cinneadh óna Bhord Bainistíochta agus ar bhonn togra ó stiúrthóir feidhmiúcháin Frontex. Caithfear an straitéis sin a ullmhú i ndlúthchomhar leis na Ballstáit agus leis an gCoimisiún agus ní mó dó a bheith i gcomhréir le hAirteagal 3 de Rialachán EBCG. Cuirfidh an Ghníomhaireacht san áireamh, má tá údar maith leis, staid shonrach na mBallstát, go háirithe an suíomh geografach ina bhfuil siad. Ní mór don straitéis theicniúil agus oibríochtúil cur leis an Teachtaireacht seo ní hamháin, ach ní mór dó ceanglais ábhartha reachtaíocht Schengen atá i bhfeidhm cheana a chur san áireamh freisin.

b) straitéisí náisiúnta le haghaidh bhainistiú comhtháite na dteorainneacha san Eoraip

Is iad na Ballstáit a bheidh freagrach go príomha as bainistíocht a dteorainneacha seachtracha chun a leasa féin agus chun leasa na mBallstát uile. Dá dheasca sin, ní mór straitéisí a ghlactar ar leibhéal an Aontais Eorpaigh a aistriú go dtí an leibhéal náisiúnta chun bainistiú comhtháite na dteorainneacha san Eoraip a chur chun feidhme go héifeachtach. Dá bhrí sin, ceanglaítear le hAirteagal 8(6) de Rialachán ECGB go mbunóidh na Ballstáit straitéisí náisiúnta dá gcuid féin le haghaidh bhainistiú comhtháite na dteorainneacha san Eoraip.

c) Meastóireacht ar thimthriall BEIM

Ceithre bliana tar éis ghlacadh na Teachtaireachta seo, déanfaidh an Coimisiún meastóireacht chríochnúil ar chur chun feidhme an bheartais ag na páirtithe leasmhara uile ar leibhéal an Aontais agus ar an leibhéal náisiúnta, d’fhonn an chéad timthriall eile den bheartas straitéiseach ilbhliantúil a ullmhú. Déanfar measúnú leis an meastóireacht ar éifeachtacht an bhealaigh a chuireann an Ghníomhaireacht agus na Ballstáit an bheartais straitéisigh ilbhliantúil le haghaidh EIBM chun feidhme, agus urraim á tabhairt do chur chuige comhleanúnach, comhtháite, córasach agus breisluach AE á chur san áireamh. Nuair a dhéanfar amhlaidh, beidh méid an chóineasaithe le tosaíochtaí beartais agus treoirlínte straitéiseacha gnéithe EIBM thar a bheith tábhachtach. Cuirfidh an obair maidir le timthriall Schengen, lena n‑áirítear an tuarascáil ar Staid Schengen, leis an meastóireacht sin, a chomhlánófar le faisnéis a bheidh le soláthar ag na Ballstáit agus an Ghníomhaireacht.

(1)

Tá 12 díobh sin ina ngnéithe téamacha: 1) rialú ag teorainneacha, lena n‑áirítear an choireacht trasteorann, 2) cuardach agus tarrtháil i gcásanna a d’fhéadfadh teacht chun cinn le linn oibríochtaí faireachais ar theorainneacha muirí, 3) anailís riosca, 4) malartú faisnéise i measc na mBallstát agus idir na Ballstáit agus an Ghníomhaireacht Eorpach um an nGarda Teorann agus Cósta (Frontex), 5) comhar idirghníomhaireachta ar an leibhéal náisiúnta, 6) comhari measc institiúidí, chomhlachtaí, oifigí agus ghníomhaireachtaí ábhartha an Aontais, 7) comhar le tríú tíortha, 8) bearta laistigh de limistéar Schengen, 9) filleadh náisiúnach tríú tír nach bhfuil cead fanachta acu, 10) úsáid teicneolaíochta úrscothaí, 11) sásra rialaithe cáilíochta Schengen agus 12) sásraí dlúthpháirtíochta, go háirithe ionstraimí cistiúcháin AE. Ina theannta sin, sainaithnítear trí ghné uileghabhálacha: 13) cearta bunúsacha; 14) taighde agus nuálaíocht; agus 15) oideachas agus oiliúint.

(2)

I gcás inarb ábhartha do chur chun feidhme na ngnéithe, féadfar tacaíocht theicniúil a iarraidh faoin Ionstraim um Thacaíocht Theicniúil a bhunaítear le Rialachán (AE) 2021/240 ó Pharlaimint na hEorpa agus ón gComhairle an 10 Feabhra 2021 lena mbunaítear Ionstraim um Thacaíocht Theicniúil, IO L 57, 18.2.2021, lch. 1.

(3)

Meastóireacht arna déanamh ag an gCoimisiún agus ag na Ballstáit agus ar thacaigh Frontex agus Gníomhaireacht an Aontais Eorpaigh um Chearta Bunúsacha léi.

(4)

Airteagal 3(1)(a) de Rialachán (AE) 2019/1896.

(5)

Sonraítear le hAirteagal 15 de Chód Teorainneacha Schengen go[n‑úsáidfidh] na Ballstáit líon leordhóthanach foirne iomchuí agus acmhainní iomchuí le rialú teorann a dhéanamh ag na teorainneacha seachtracha [...] sa chaoi go n‑áiritheofar ardleibhéal éifeachtúil aonfhoirmeach rialaithe ag na teorainneacha seachtracha.

(6)

COM/2020/612 final.

(7)

Rialachán (AE) 2016/399 ó Pharlaimint na hEorpa agus ón gComhairle an 9 Márta 2016 lena mbunaítear Cód Aontais maidir leis na rialacha lena rialaítear gluaiseacht daoine thar theorainneacha (Cód Teorainneacha Schengen).

(8)

Airteagal 3 (1)(b) de Rialachán EBCG.

(9)

An Coinbhinsiún Idirnáisiúnta maidir le Cuardach agus Tarrtháil ar Muir (SAR), 1979

(10)

Moladh (AE) 2020/1365 ón gCoimisiún maidir le comhar idir na Ballstáit i ndáil le hoibríochtaí a dhéantar soithí ar le heintitis phríobháideacha iad nó atá á n-oibriú acu chun críche gníomhaíochtaí cuardaigh agus tarrthála.

(11)

Plean Gníomhaíochta an Aontais um an Meánmhuir Lár, togra ón gCoimisiún an 21 Samhain 2022.

(12)

Rialachán Cur Chun Feidhme (AE) 2021/581 ón gCoimisiún an 9 Aibreán 2021 maidir le léirithe staide sa Chóras Eorpach um Fhaireachas ar Theorainneacha (EUROSUR).

(13)

Airteagal 3(1)(c) de Rialachán EBCG.

(14)

    Cinneadh 50/2021 ó Bhord Bainistíochta Frontex an 21 Meán Fómhair 2021 lena nglactar an Chomhshamhail le haghaidh Anailís Chomhtháite Riosca.

(15)

  Measúnú ar Bhagairt na Coireachta Tromchúisí Eagraithe (SOCTA) | Europol (europa.eu)

(16)

Rialachán (AE) Uimh. 258/2012 ó Pharlaimint na hEorpa agus ón gComhairle an 14 Márta 2012 lena gcuirtear Airteagal 10 de Phrótacal na Náisiún Aontaithe i gcoinne monarú agus gáinneáil aindleathach arm tine, a bpáirteanna agus a gcomhpháirteanna agus a n‑armlóin, lena bhforlíontar Coinbhinsiún na Náisiún Aontaithe in aghaidh coireachta eagraithe trasnáisiúnta (Prótacal Arm Tine na Náisiún Aontaithe) chun feidhme, agus lena mbunaítear údarú onnmhairiúcháin agus bearta allmhairiúcháin agus gluaiseachta idirthurais le haghaidh arm tine, a bpáirteanna agus a gcomhpháirteanna agus a n‑armlóin IO L 94, 30.3.2012, lch. 1

(17)

Airteagal 3(1)(d) de Rialachán EBCG.

(18)

Airteagal 3 (1)(e) de Rialachán EBCG.

(19)

  https://www.consilium.europa.eu/en/policies/eu-fight‑against‑crime/  

(20)

Airteagal 3(1)(f) de Rialachán EBCG.

(21)

Moladh ón gCoimisiún lena mbunaítear ‘Lámhleabhar Praiticiúil’ faoin gcomhar Eorpach maidir le feidhmeanna garda cósta, C(2021) 5310 final.

(22)

Teachtaireacht ón gCoimisiún – Clár Oibre Eorpach maidir leis an Imirce, COM/2015/0240 final.

(23)

Conclúidí ón gComhairle maidir le leanúint bhuan de Thimthriall Beartais AE don choireacht idirnáisiúnta thromchúiseach eagraithe: EMPACT 2022 +, 6481/21.

(24)

Airteagal 3(1)(g) de Rialachán EBCG.

(25)

C(2022) 300 final.

(26)

COM(2021) 829 final agus COM(2021) 830 final.

(27)

COM(2021) 591 final.

(28)

Seoladh Comhpháirtíochtaí Oibríochtúla in aghaidh Smuigleála le Maracó, leis an Nígir agus leis na Balcáin Thiar go dtí seo.

(29)

Amhail Tionscadail Cúnaimh Theicniúil le haghaidh Tríú Tíortha i réimse an Fhillte, an Athligin Isteach agus an Ath‑lánpháirtithe – TAP4RRR

(30)

Airteagal 3 (1)(h) de Rialachán EBCG.

(31)

Airteagal 3(1)(i) de Rialachán EBCG.

(32)

COM(20220) 609 final 23.9.2020.

(33)

COM(2021) 120.

(34)

Teachtaireacht ón gCoimisiún chuig Parlaimint na hEorpa agus chuig an gComhairle, Straitéis an Aontais Eorpaigh maidir le filleadh deonach agus ath‑lánpháirtiú, COM(2021)120 final.

(35)

Moladh ón gCoimisiún maidir le haitheantas frithpháirteach do chinntí um fhilleadh agus maidir le dlús a chur le filleadh agus Treoir 200/115/CE ó Pharlaimint na hEorpa agus ón gComhairle, C(2023) 1763 á cur chun feidhme

(36)

Doiciméad beartais i dtreo straitéis oibríochtúil i gcomhair fillteacha níos éifeachtacha an 24 Eanáir 2023, COM(2023) 45 final.

(37)

Airteagal 3(1)(j) de Rialachán EBCG.

(38)

Ráiteas ó chomhaltaí na Comhairle Eorpaí, 25-26 Feabhra 2021 .

(39)

Airteagal 3(1)(k) de Rialachán EBCG.

(40)

Rialachán (AE) Uimh. 2022/922 ón gComhairle an 9 Meitheamh 2022 maidir le bunú agus oibriú sásra meastóireachta agus faireacháin chun cur i bhfeidhm acquis Schengen a fhíorú, agus lena n‑aisghairtear Rialachán (AE) Uimh. 1053/2013 (IO L 160, 15.6.2022, lch. 1).

(41)

Airteagal 3(1)(l) de Rialachán EBCG.

(42)

Airteagal 3(2) de Rialachán EBCG.

(43)

COM(2020) 612, 23.9.2020.

(44)

COM(2020) 610, 23.9.2020.

(45)

The European Border and Coast Guard Agency Fundamental Rights Strategy [Straitéis na Gníomhaireachta Eorpaí um an nGarda Teorann agus Cósta um Chearta Bunúsacha], 2021.

(46)

Cinneadh 61/2021 ón mBord Bainistíochta an 9 Samhain 2021 lena nglactar an Plean Gníomhaíochta um Chearta Bunúsacha le haghaidh chur chun feidhme na Straitéise um Chearta Bunúsacha.

(47)

Airteagal 3(2) de Rialachán EBCG.

(48)

Airteagal 3(2) de Rialachán EBCG.

(49)

Áirítear sna samplaí ABC4EU ( https://cordis.europa.eu/project/id/312797 ), BODEGA ( https://cordis.europa.eu/project/id/653676 ), D4FLY ( https://cordis.europa.eu/project/id/833704 ), FASTPASS ( https://cordis.europa.eu/project/id/312583 ), XP-DITE ( https://cordis.europa.eu/project/id/285311 )

(50)

Áirítear sna samplaí ALFA ( https://cordis.europa.eu/project/id/700002 ), EWISA ( https://cordis.europa.eu/project/id/608174 ), FOLDOUT ( https://cordis.europa.eu/project/id/787021 )

(51)

Áirítear sna samplaí FIDELITY ( https://cordis.europa.eu/project/id/284862 ), iMARS ( https://cordis.europa.eu/project/id/607379 )

(52)

 Áirítear sna samplaí ANDROMEDA ( https://cordis.europa.eu/project/id/833881 )

(53)

Áirítear sna samplaí TRESSPASS ( https://cordis.europa.eu/project/id/787120 )

(54)

Áirítear sna samplaí CLOSEYE ( https://cordis.europa.eu/project/id/313184 ), COMPASS2020 ( https://cordis.europa.eu/project/id/833650 ), EFFECTOR ( https://cordis.europa.eu/project/id/883374 ), EUCISE2020 ( https://cordis.europa.eu/project/id/883374 ), MARISA ( https://cordis.europa.eu/project/id/740698 ), SAFESHORE ( https://cordis.europa.eu/project/id/700643 ) 

(55)

Airteagal 8(5)-(6) de Rialachán EBCG