AN COIMISIÚN EORPACH
An Bhruiséil,27.1.2021
COM(2020) 835 final/2
COM(2020) 835 final of 10.12.2020 downgraded on 27.1.2021
Togra le haghaidh
CINNEADH ÓN gCOMHAIRLE
de bhun Airteagal 218(9) CFAE maidir leis an seasamh atá le glacadh thar ceann an Aontais Eorpaigh sa Chomhchoiste arna bhunú le hAirteagal 164 den Chomhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach a mhéid a bhaineann le fordheontais talmhaíochta
MEABHRÁN MÍNIÚCHÁIN
1.Ábhar an togra
Molann an Coimisiún go bhformheasfaidh an Chomhairle an seasamh atá le glacadh thar ceann an Aontais sa Chomhchoiste a bunaíodh leis an gComhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (“an Comhaontú um Tharraingt Siar”) maidir le cinneadh ón gComhchoiste i ndáil le fóirdheontais talmhaíochta a dhíolmhú, lena n‑áirítear bearta lena dtacaítear le trádáil i dtáirgí iascaigh, ó chur i bhfeidhm rialacha an Aontais maidir le státchabhair, arna ndéanamh infheidhme maidir leis an Ríocht Aontaithe agus sa Ríocht Aontaithe i ndáil le Tuaisceart Éireann i gcomhréir le hAirteagal 10 (1) den Phrótacal maidir le hÉirinn agus Tuaisceart Éireann a ghabhann leis an gComhaontú um Tharraingt Siar (an Prótacal), dá bhforáiltear in Airteagal 10 (2) den Phrótacal. De réir Airteagal 10(2), arna léamh i gcomhar le hIarscríbhinn 6 den Phrótacal, ba cheart go gcinnfí leis an gcinneadh sin (i) an t‑uasleibhéal foriomlán tacaíochta agus (ii) an céatadán íosta atá comhoiriúnach le EDT (Bosca Glas) dá bhforáiltear in Airteagal 10 den Phrótacal maidir le hÉirinn/Tuaisceart Éireann (an Prótacal).
2.Comhthéacs an togra
Le hAirteagal 10 den Phrótacal cuirtear aon bhearta de chuid na Ríochta Aontaithe a thacaíonn le táirgeadh agus trádáil táirgí talmhaíochta i dTuaisceart Éireann faoi réir chur i bhfeidhm rialacha an Aontais maidir le Státchabhair a liostaítear in Iarscríbhinn 5 a ghabhann leis an bPrótacal má dhéanann na bearta sin difear don trádáil sin idir Tuaisceart Éireann agus an tAontas. Ag an am céanna, foráiltear ann do dhíolúine ó chur i bhfeidhm dhlí an Aontais suas le huasleibhéal bliantúil foriomlán arna chinneadh, ar choinníoll go bhfuil céatadán íosta arna chinneadh den tacaíocht dhíolmhaithe sin i gcomhréir le forálacha Iarscríbhinn 2 a ghabhann le Comhaontú na hEagraíochta Domhanda Trádála ar Thalmhaíocht.
Cinnfidh an Comhchoiste uasleibhéal bliantúil foriomlán tosaigh díolmhaithe na tacaíochta agus an céatadán íosta tosaigh, agus an fhaisnéis is déanaí atá ar fáil á cur san áireamh, i gcomhréir le hIarscríbhinn 6 a ghabhann leis an bPrótacal.
Agus an t‑uasleibhéal tosaigh bliantúil díolmhaithe iomlán d’earnáil na talmhaíochta á chinneadh, foráiltear leis an bPrótacal go ndéanfar breithniú, inter alia, ar dhearadh na scéime tacaíochta talmhaíochta a bheidh ag an Ríocht Aontaithe sa todhchaí agus meán bliantúil mhéid iomlán an chaiteachais a thabhaítear i dTuaisceart Éireann faoin gComhbheartas Talmhaíochta faoin gCreat Airgeadais Ilbhliantúil reatha (CAI) 2014‑2020.
Agus an céatadán íosta tosaigh is infheidhme maidir leis uasleibhéal tosaigh bliantúil díolmhaithe iomlán d’earnáil na talmhaíochta á chinneadh, foráiltear leis an bPrótacal, inter alia, maidir le breithniú ar dhearadh scéim tacaíochta talmhaíochta na Ríochta Aontaithe agus ar an gcéatadán lena raibh an caiteachas foriomlán faoin gComhbheartas Talmhaíochta san Aontas ag comhlíonadh fhorálacha Iarscríbhinn 2 de Chomhaontú na hEagraíochta Domhanda Trádála (EDT) ar Thalmhaíocht de réir mar a fógraíodh don tréimhse lena mbaineann.
3.Seasamh atá le glacadh thar ceann an Aontais
Cinneadh ar an uasleibhéal foriomlán tacaíochta agus ar an íoschéatadán atá i gcomhréir leis na forálacha in Iarscríbhinn 2 a ghabhann le Comhaontú EDT ar Thalmhaíocht.
Cinntear uasleibhéal foriomlán bliantúil na tacaíochta ar bhonn na leithdháiltí do chaiteachas le haghaidh Cholún I agus Cholún II araon faoin gComhbheartas Talmhaíochta (CBT).
I gcás Cholún I (an Ciste Eorpach um Ráthaíocht Talmhaíochta – CERT), ríomhadh an leibhéal ábhartha caiteachais ar bhonn dhá phríomhghné: leithdháiltí caiteachais na Ríochta Aontaithe maidir le hÍocaíochtaí Díreacha chomh maith leis an gcaiteachas a bhaineann le bearta tacaíochta margaidh, ar bhonn dearbhuithe bliantúla imréitigh cuntas do na blianta airgeadais 2014‑19. Áirítear sa mhéid sin caiteachas arna thabhú ag gníomhaireacht íocaíochta na Ríochta Aontaithe le haghaidh Thuaisceart Éireann faoi Chomheagraíocht na Margaí (CEM). In éagmais sonraí cuntas a imréitíodh cheana i leith na bliana airgeadais 2020, ríomhadh an meánmhéid bliantúil de réir na tréimhse 2014‑2019, agus dá bhrí sin rinneadh an méid foriomlán ina iomláine a roinnt ar líon 6 bliana.
Maidir le Colún II (an Ciste Eorpach Talmhaíochta um Fhorbairt Tuaithe – EARD), tá an méid a mheastar bunaithe ar an meán‑leithdháileadh 7 mbliana sa chlár forbartha tuaithe formheasta (lena n‑áirítear maoiniú náisiúnta breise agus maoiniú breise lasmuigh de raon feidhme Airteagal 42 den Chonradh ar Fheidhmiú an Aontais Eorpaigh).
I mbliain ina mbeadh géarchéim thromchúiseach gan choinne ann, ba cheart go dtiocfadh méadú ar an uasleibhéal foriomlán tacaíochta bliantúil.
Bunaítear leibhéal uasta na tacaíochta díolmhaithe d’iascaigh ar an meánchaiteachas faoin gCreat Airgeadais Ilbhliantúil Eorpach (2014 – 2020) Leagtar amach é dá réir sin mar uasleibhéal tacaíochta thar thréimhse cúig bliana, agus uasteorainn bhliantúil leis.
D’fhonn a áirithiú nach mbaineann díolúine chainníochtúil ar leibhéal áirithe tacaíochta ó chur i bhfeidhm rialacha an Aontais maidir le Státchabhair an bonn go cáilíochtúil de na ceanglais shubstainteacha maidir le tacaíocht in earnáil an iascaigh a leagtar síos i ndlí an Aontais, léirítear sa Chinneadh Comhpháirteach na critéir incháilitheachta maidir leis na cineálacha oibríochtaí a dtugtar tacaíocht dóibh dá bhforáiltear i ndlí an Aontais trí oibríochtaí áirithe a bheidh le maoiniú a eisiamh ón méid díolmhaithe.
Tá céatadán íosta na tacaíochta díolmhaithe nach mór a bheith i gcomhréir le forálacha Iarscríbhinn 2 a ghabhann le Comhaontú na hEagraíochta Domhanda Trádála maidir le Talmhaíocht bunaithe ar mheánráta thacaíocht chomhlíontach an Aontais. Ríomhadh an ráta ar bhonn fhógraí tacaíochta intíre an Aontais chuig EDT le haghaidh bhlianta buiséid an Aontais 2014 go 2018, na blianta is déanaí laistigh den CAI reatha a bhfuil fógraí ar fáil ina leith (meán 5 bliana).
4.Bunús dlí
4.1.Bunús dlí nós imeachta
In Airteagal 218(9) den Chonradh ar Fheidhmiú an Aontais Eorpaigh (CFAE) déantar foráil maidir le cinntí lena leagtar síos ‘na seasaimh a ghlacfar thar ceann an Aontais i gcomhlacht arna chur ar bun le comhaontú nuair a iarrtar ar an gcomhlacht sin gníomhartha a ghlacadh a bhfuil éifeachtaí dlíthiúla leo, seachas gníomhartha lena bhforlíonfar nó lena leasófar creat institiúideach an chomhaontaithe.’
Is éard atá sa chinneadh a iarrtar ar an gComhchoiste a ghlacadh gníomh a bhfuil éifeachtaí dlíthiúla leis. Beidh an gníomh atá beartaithe ina cheangal ar na Páirtithe i gcomhréir le hAirteagal 166 den Chomhaontú.
Leis an ngníomh atá beartaithe ní fhorlíonfar ná ní leasófar creat institiúideach an Chomhaontaithe.
Dá bhrí sin, is é Airteagal 218(9) CFAE an bunús dlí nós imeachta le haghaidh an chinnidh atá beartaithe.
4.2.Bunús dlí substainteach
Leis an gcinneadh maidir le ‘fordheontais talmhaíochta’ leagtar síos na coinníollacha maidir leis an gComhaontú um Tharraingt Siar a tugadh i gcrích ar bhonn Airteagal 50. Ós rud é gurb é atá sa Phrótacal maidir le Tuaisceart Éireann comhaontú trádála idir an tAontas Eorpach agus an Ríocht Aontaithe i ndáil le Tuaisceart Éireann is é Airteagal 207 CFAE an bunús dlí freisin.
Dá bhrí sin, is iad Airteagal 50 CAE agus Airteagal 207 CFAE bunús dlí substainteach an chinnidh atá beartaithe.
4.3.Conclúid
Ba cheart Airteagal 50 CAE agus Airteagal 207, i gcomhar le hAirteagal 207 CFAE agus Airteagal 218(9), a bheith ina mbunús dlí leis an gcinneadh atá beartaithe.
5.Foilsiú an ghnímh atá beartaithe
Ós rud é go gcuirtear forálacha áirithe den Chomhaontú um Tharraingt Siar chun feidhme leis an gcinneadh ón gComhchoiste, is iomchuí é a fhoilsiú in Iris Oifigiúil an Aontais Eorpaigh tar éis é a ghlactha.
Togra le haghaidh
CINNEADH ÓN gCOMHAIRLE
de bhun Airteagal 218(9) CFAE maidir leis an seasamh atá le glacadh thar ceann an Aontais Eorpaigh sa Chomhchoiste arna bhunú le hAirteagal 164 den Chomhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach a mhéid a bhaineann le fordheontais talmhaíochta
TÁ PARLAIMINT NA hEORPA AGUS COMHAIRLE AN AONTAIS EORPAIGH,
Ag féachaint don Chonradh ar an Aontas Eorpach, agus go háirithe Airteagal 50(2) de,
Ag féachaint don Chonradh ar Fheidhmiú an Aontais Eorpaigh, agus go háirithe Airteagail 207, i gcomhar le hAirteagal 218(9) de,
Ag féachaint don togra ón gCoimisiún Eorpach,
De bharr an mhéid seo a leanas:
(1)(1)Thug an tAontas an Comhaontú maidir le Ríocht Aontaithe na Breataine Móire agus Thuaisceart Éireann a bheith ag tarraingt siar as an Aontas Eorpach agus as an gComhphobal Eorpach do Fhuinneamh Adamhach (“an Comhaontú um Tharraingt Siar”) i gcrích le Cinneadh (AE) 2020/135ón gComhairle an 30 Eanáir 2020 agus tháinig sé i bhfeidhm an 1 Feabhra 2020.
(2)Le hAirteagal 166 den Chomhaontú um Tharraingt Siar tugtar de chumhacht don Chomhchoiste cinntí a ghlacadh maidir leis na hábhair uile dá bhforáiltear sa Chomhaontú. Is cuid dhílis den Chomhaontú sin é an Prótacal maidir le hÉirinn agus Tuaisceart Éireann a ghabhann leis an gComhaontú um Tharraingt Siar (“an Prótacal”).
(3)Le hAirteagal 10(1) den Phrótacal maidir le hÉirinn/Tuaisceart Éireann cuirtear na bearta arna nglacadh ag an Ríocht Aontaithe lena dtacaítear le táirgeadh agus trádáil táirgí talmhaíochta, lena n‑áirítear tacaíocht do tháirgí iascaigh, i dTuaisceart Éireann faoi réir rialacha an Aontais maidir le státchabhair a liostaítear in Iarscríbhinn 5 a ghabhann leis an bPrótacal i gcás ina ndéanfaidh na bearta sin difear don trádáil sin idir Tuaisceart Éireann agus an tAontas. Ag an am céanna, foráiltear le hAirteagal 10(2) do dhíolúine ó chur i bhfeidhm dhlí an Aontais suas le huasleibhéal bliantúil foriomlán arna chinneadh, ar choinníoll go bhfuil céatadán íosta arna chinneadh den tacaíocht dhíolmhaithe sin i gcomhréir le forálacha Iarscríbhinn 2 a ghabhann le Comhaontú na hEagraíochta Domhanda Trádála ar Thalmhaíocht.
(4)Ba cheart an t‑uasleibhéal foriomlán tacaíochta agus an t‑íoschéatadán a chinneadh agus na breithnithe a leagtar amach in Iarscríbhinn 6 a ghabhann leis an bPrótacal á gcur san áireamh.
(5)Chun críocha an t‑uasleibhéal foriomlán tacaíochta do tháirgí talmhaíochta seachas iascaigh agus dobharshaothrú, cuireadh san áireamh an meánchaiteachas a thabhaítear agus dá bhforáiltear i dTuaisceart Éireann faoin gComhbheartas Talmhaíochta (CBT) faoin CAI 2014‑2020 atá ann cheana.
(6)Chun críocha an t‑íoschéatadán a shocrú, cuireadh san áireamh an meánráta tacaíochta ón Aontas atá i gcomhréir le Forálacha Iarscríbhinn 2 a ghabhann le Comhaontú na hEagraíochta Domhanda Trádála ar Thalmhaíocht, de réir fhógraí tacaíochta iomlána an Aontais do EDT le cúig bliana anuas, an tréimhse ar ina leith a tugadh fógraí don Eagraíocht Dhomhanda Trádála laistigh den CAI atá i bhfeidhm faoi láthair.
(7)Ba cheart, dá bhrí sin, an t‑uasleibhéal bliantúil foriomlán tacaíochta a shocrú ag EUR 429 milliún le haghaidh fóirdheontas in earnáil na talmhaíochta.
(8)I gcás earnáil an iascaigh, ba cheart an t‑uasleibhéal tacaíochta a shocrú, i bhfianaise an mheán chaiteachais faoin gCreat Airgeadais Eorpach ilbhliantúil (2014 – 2020), ag EUR 19.5 milliún thar chúig bliana, agus uasteorainn EUR 4,5 milliún leis in aon bhliain ar leith.
(9)Ionas nach n‑úsáidfear an tacaíocht dhíolmhaithe chun maoiniú a dhéanamh ar oibríochtaí atá neamh‑incháilithe ar shlí eile chun tacaíocht a fháil in earnáil an iascaigh, ba cheart a léiriú sa Chinneadh ón gComhchoiste neamhcháilitheacht oibríochtaí áirithe dá bhforáiltear i ndlí an Aontais.
(10)Dá bharr sin is iomchuí an seasamh atá le tógáil thar ceann an Aontais sa Chomhchoiste a bhunú,
TAR ÉIS AN CINNEADH SEO A GHLACADH:
Airteagal 1
An seasamh atá le tógáil thar ceann an Aontais sa Chomhchoiste, arna bhunú le hAirteagal 164 den Chomhaontú um Tharraingt Siar, maidir le cinneadh atá le déanamh i gcomhréir le hAirteagal 10 den Phrótacal, beidh an seasamh sin bunaithe ar an dréachtchinneadh ón gComhchoiste atá i gceangal leis an gCinneadh seo.
Airteagal 2
Is chuig an gCoimisiún a dhírítear an Cinneadh seo.
Arna dhéanamh sa Bhruiséil,
Thar ceann na Comhairle
An tUachtarán