AN COIMISIÚN EORPACH

An Bhruiséil,7.7.2020

COM(2020) 295 final

Togra le haghaidh

CINNEADH ÓN gCOMHAIRLE

maidir leis an seasamh a ghlacfar thar ceann an Aontais Eorpaigh sa Choiste um Thrádáil arna bhunú faoin gComhaontú Comhpháirtíochta Eatramhach idir an Comhphobal Eorpach, de pháirt, agus na Stáit san Aigéan Ciúin, den pháirt eile a mhéid a bhaineann le forálacha áirithe de Phrótacal II a leasú maidir le sainmhíniú an choincheapa 'táirgí tionscnaimh' agus modhanna comhair riaracháin

MEABHRÁN MÍNIÚCHÁIN

1.Ábhar an togra

Baineann an togra seo leis an gcinneadh lena mbunaítear an seasamh a ghlacfar thar ceann an Aontais Eorpaigh sa Choiste um Thrádáil  arna bhunú leis an gComhaontú Comhpháirtíochta Eatramhach idir an Comhphobal Eorpach, de pháirt, agus na Stáit san Aigéan Ciúin, den pháirt eile (an “Comhaontú”), a mhéid a bhaineann le glacadh an chinnidh atá beartaithe maidir le forálacha áirithe de Phrótacal II an Chomhaontaithe a leasú.

2.Comhthéacs an togra

2.1.An Comhaontú Comhpháirtíochta idir an Comhphobal Eorpach, de pháirt, agus na Stáit san Aigéan Ciúin, den pháirt eile.

Tá sé d'aidhm ag an gComhaontú Comhpháirtíochta idir an Comhphobal Eorpach, de pháirt, agus na Stáit san Aigéan Ciúin, den pháirt eile (‘an Chomhaontú’), (a) chun cur ar chumas na Stát san Aigéan Ciúin tairbhe a bhaint as rochtain níos fearr ar mhargaí an Aontais Eorpaigh (‘An tAontas’); (b) chun forbairt eacnamaíoch inbhuanaithe Stát san Aigéan Ciúin agus comhtháthú na stát sin sa gheilleagar domhanda de réir a chéile a chur chun cinn; (c) limistéir shaorthrádála a bhunú idir an tAontas Eorpach agus na Stáit san Aigéan Ciúin atá bunaithe ar chomhleas, trí léirscaoileadh forchéimnitheach trádála ar bhealach atá i gcomhréir le rialacha EDT is infheidhme agus le prionsabal na neamhshiméadrachta, lena gcuirtear san áireamh riachtanais speisialta agus srianta acmhainneachta na Stát san Aigéan Ciúin maidir le leibhéil agus uainiú gealltanas; (d) chun socruithe iomchuí um réiteach díospóide a bhunú; agus (e) chun na socruithe institiúideacha iomchuí a bhunú.

An 13 Iúil 2009 shínigh an tAontas an Comhaontú 1 , tá sé á chur i bhfeidhm go sealadach ag Nua-Ghuine Phapua agus Poblacht Fhidsí ón 20 Nollaig 2009 i leith agus ón 28 Iúil 2014 i leith, faoi seach. Tar éis aontachas Stát Neamhspleách Shamó agus Oileáin Sholomón leis an gComhaontú, tá an Comhaontú á chur i bhfeidhm go sealadach acu ón 31 Nollaig i leith agus ón 17 Bealtaine 2020 i leith faoi seach.

2.2.An Coiste um Thrádáil

Is comhlacht é an Coiste um Thrádáil a bunaíodh i gcomhréir le hAirteagal 68 den Chomhaontú. Tá ionadaithe an Aontais agus na Stát san Aigéan Ciúin ann (Nua-Ghuine Phapua, Fidsí, Samó agus Oileáin Sholomón). Glacann an Coiste um Thrádáil a rialacha nós imeachta agus bíonn ionadaí den Aontas agus ionadaí de na Stáit san Aigéan ina gcomhchathaoirligh ar an gcoiste.

Déileálann an Coiste um Thrádáil le gach ábhar is gá chun an Comhaontú a chur chun feidhme, lena n‑áirítear comhar um fhorbairt. Agus a fheidhmeanna á gcomhlíonadh aige, féadfaidh an Coiste um Thrádáil (a) aon choiste speisialta nó aon chomhlacht speisialta is gá a bhunú agus formhaoirseacht a dhéanamh air chun an Comhaontú a chur chun feidhme, (b) teacht le chéile tráth ar bith a shocraíonn na Páirtithe, (c) aon ábhar maidir leis an gComhaontú a phlé agus gníomhaíocht iomchuí a dhéanamh i bhfeidhmiú a fheidhmeanna, agus (d) cinntí a ghlacadh nó moltaí a dhéanamh sna cásanna dá bhforáiltear leis an gComhaontú.

Tarmligfidh an Coiste um Thrádáil cumhachtaí sonracha cinnteoireachta cur chun feidhme chuig na Coistí Speisialta dá bhforáiltear faoi fhorálacha ábhartha an chomhaontaithe, go háirithe an Coiste Speisialta maidir le Comhar Custaim agus Rialacha Tionscnaimh.

2.3.An gníomh den Choiste um Thrádáil atá beartaithe

An *Meán Fómhair 2020*, le linn an ochtú cruinniú a bheidh ag an gCoiste um Thrádáil, tá Cinneadh le glacadh aige maidir le leasú ar fhorálacha áirithe Phrótacal II maidir le sainmhíniú an choincheapa ‘táirgí tionscnaimh’ agus modhanna comhair riaracháin (‘an gníomh atá beartaithe’).

Is iad cuspóirí don ghníomh atá beartaithe:

–forálacha maidir le rialacha tionscnaimh a nuashonrú i ndáil leis na forbairtí is déanaí, rialacha tionscnaimh simplithe agus níos solúbtha a chur ar fáil trí na leasuithe a leanas a ghlacadh:

(a)na forálacha seo a leanas, nach bhfuil ábhartha a thuilleadh, a scriosadh:

–mír 7 d’Airteagal 3: níl sé ábhartha a thuilleadh a shonrú gur cuireadh carnadh i bhfeidhm tar éis an 1 Eanáir 2010 agus an 1 Deireadh Fómhair 2015;

–níl Airteagal 4 bis agus Iarscríbhinn VIII A ábhartha a thuilleadh ós rud é nár sainaithníodh aon tír chomharsanachta i mbéal forbartha;

–an dara habairt i mír 8 d’Airteagal 4, agus Iarscríbhinn XII: táirgí de thionscnamh na hAfraice Theas ar cuireadh carnadh i bhfeidhm tar éis an 31 Nollaig 2009 maidir leo, níl sé ábhartha a thuilleadh iad a liostú.

(b)Teideal Airteagal 7 a chomhoiriúnú leis an teideal san innéacs.

(c)Airteagal 12 nua dar teideal "Deighilt chuntasaíochta” a thabhairt isteach i dTeideal II, lena gcuirfear ar chumas oibreoirí eacnamaíocha costais a laghdú tríd an modh seo a úsáid chun stoic a bhainistiú.

(d)Airteagal 13 de Theideal III a scriosadh agus Airteagal 14 nua a chur isteach ina ionad dar teideal "Neamhathrú", chun níos mó solúbthachta a cheadú d'oibreoirí eacnamaíocha maidir leis an bhfianaise a chuirfear ar fáil d'údaráis chustaim na tíre allmhairiúcháin nuair a dhéantar trasloingsiú nó stórasú custaim ar earraí tionscnaimh i dtríú tír.

(e)Airteagal 14 maidir le “Taispeántais” agus Airteagal 38 maidir le “Saorchriosanna” a scriosadh, níl gá leo a thuilleadh tar éis foráil maidir le “neamhathrú” a thabhairt isteach.

(f)Airteagal 15 de Theideal IV a leasú chun níos mó solúbthachta a cheadú d'oibreoirí eacnamaíocha maidir leis na riachtanais i ndáil le cruthúnas ar thionscnamh a chomhlíonadh.

(g)Airteagal 39 nua a chur isteach lena ndéantar achoimre ar fheidhmeanna agus freagrachtaí an choiste speisialta maidir le comhar custaim agus rialacha tionscnaimh dá dtagraítear le forálacha éagsúla Phrótacail II, agus Airteagal 41 a nuashonrú dá réir.

–Iarscríbhinn II a ghabhann le Prótacal II den Chomhaontú a nuashonrú lena hailíniú le leagan 2017 d'Ainmníocht CC.

Tá Iarscríbhinn II a ghabhann le Prótacal II bunaithe ar leagan 2007 den Chóras Comhchuibhithe (CC) atá i gceangal le Coinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí ag an Eagraíocht Dhomhanda Chustaim (WCO). D'eisigh WCO Ainmníocht CC 2017 nua a tháinig i bhfeidhm an 1 Eanáir 2017. Mar sin féin, ba cheart an status quo maidir le rialacha tionscnaimh a chaomhnú mar nach aidhm d'athruithe ar Ainmníocht CC difear a dhéanamh don riail tionscnaimh is infheidhme maidir le táirge áirithe.

–Téacs Iarscríbhinn IV a ghabhann le Prótacal II den Chomhaontú a leasú chun leagan Cróitise an dearbhaithe sonraisc a chur san áireamh.

Síníodh an conradh i dtaobh Aontachas Phoblacht na Cróite leis an Aontas Eorpach an 9 Nollaig 2011 agus tá feidhm leis ón 1 Iúil 2013 i leith. Tá feidhm ag an gComhaontú seo, ar thaobh amháin, maidir leis na críocha ina bhfuil feidhm ag an gConradh ar Fheidhmiú an Aontais Eorpaigh maidir leo, faoi na coinníollacha a leagtar síos sa Chonradh sin agus, ar an taobh eile, maidir le críocha Stáit Shínithe an Aigéin Chiúin.

–Liosta tíortha agus críocha thar lear in Iarscríbhinn VIII a ghabhann le Prótacal II den Chomhaontú a nuashonrú chun an liosta a ailíniú le liosta an Chonartha ar Fheidhmiú an Aontais Eorpaigh.

Liostaítear in Iarscríbhinn VIII a ghabhann le Prótacal II de Chomhaontú Tíortha agus Críocha thar lear an Aontais. Athraíodh an stádas a bhí ar chuid de na críocha le déanaí: Tá Saint‑Barthélemy (FR) agus Beirmiúda (UK) i measc tíortha agus críocha thar lear i gcomhlachas leis an Aontas ón 1 Eanáir 2012 i leith agus ón 1 Eanáir 2014 i leith faoi seach, tá Mayotte (FR) ar cheann de na Réigiúin is Forimeallaí de chuid an Aontais ón 1 Eanáir 2014 i leith.

–Tar éis aontachas Shamó agus Oileáin Sholomón leis an gComhaontú, an dá Stát sin a bhaint de bhrí “Stáit ACC eile” dá dtagraítear in Iarscríbhinn X a ghabhann le Prótacal II.

I bhfianaise an líon athruithe le déanamh ar Phrótacal II den Chomhaontú agus ar na hiarscríbhinní a ghabhann leis, d'fhonn na soiléire is gá Prótacal nua iomlán a chur ina ionad.

3.An seasamh atá le glacadh thar ceann an Aontais

Prótacal II maidir le sainmhíniú an choincheapa “táirgí tionscnaimh” agus modhanna comhair riaracháin, tugadh i gcrích é in 2009. Níl forálacha áirithe Phrótacal II nuashonraithe i ndáil leis na forbairtí is déanaí maidir leis na rialacha tionscnaimh agus dá dheasca sin tá baic ar thairbhiú na córa fabhraí dá bhforáiltear leis an gComhaontú.

Leis na leasuithe atá beartaithe déanfar comhlíonadh na riachtanas agus nósanna imeachta i ndáil le rialacha tionscnaimh a shimpliú agus níos solúbtha. Mar shampla:

–leis an deighilt chuntasaíochta cuirfear ar chumas oibreoirí eacnamaíocha costais a laghdú chun stoic a bhainistiú;

–tugtar níos mó solúbthachta d'oibreoirí eacnamaíocha maidir leis an bhfianaise a chuirfear ar fáil d'údaráis chustaim na tíre allmhairiúcháin nuair a dhéantar trasloingsiú nó stórasú custaim ar earraí tionscnaimh i dtríú tír;

–agus onnmhaireoir cláraithe in ann dearbhú sonraisc amháin a úsáid mar chruthúnas bailí tionscnaimh, is simplithe a bheidh na nósanna imeachta tionscnaimh agus is laghdaithe a bheidh an caiteachas riaracháin maidir leis na deimhnithe gluaiseachta EUR.1 a eisiúint lena gceadaítear d'oibreoirí lántairbhe a bhaint as cóir fhabhrach taraife a d'fhéadfadh tionchar dearfach a bheith aige ar thrádáil.

A bhuí leis an simpliú sin déanfar an trádáil a éascú agus an fhorbairt eacnamaíoch a fheabhsú i Réigiún an Aigéin Chiúin trí chur ar chumas oibreoirí eacnamaíocha lántairbhe a bhaint as an gcóir fhabhrach faoin gComhaontú Comhpháirtíochta Eacnamaíoch Eatramhach.

Leis na leasuithe atá beartaithe déanfar comhlíonadh na riachtanas agus nósanna imeachta i ndáil le rialacha tionscnaimh a shimpliú agus níos solúbtha. Leis an simpliú sin déanfar trádáil a éascú agus úsáid na córa fabhraí a bharrfheabhsú le haghaidh oibreoirí eacnamaíocha. Ina theannta sin, spreagfar leis na leasuithe atá beartaithe comhtháthú réigiúnach agus forbairt eacnamaíoch sna Stáit san Aigéan Ciúin trí níos mó deiseanna a thabhairt d'oibreoirí rialacha tionscnaimh a chomhlíonadh.

Maidir le leasuithe ar tháirgí (ceannteidil agus tuairiscithe) dá dtagraítear in Iarscríbhinn II a ghabhann le Prótacal II den Chomhaontú, is gá na leasuithe sin chun iad a ailíniú lena nuashonraigh WCO in leagan 2012 agus leagan 2017 den Ainmníocht CC agus chun tuairiscithe táirgí agus aicmiúchán CC a bheith comhsheasmhach leis an gcóras comhchuibhithe.

Liostaítear in Iarscríbhinn VIII a ghabhann le Prótacal II den Chomhaontú tíortha agus críocha thar lear an Aontais. De réir bhrí Phrótacal II, ciallóidh “tíortha agus críocha thar lear” na tíortha agus críocha dá dtagraítear i gCuid a Ceathair den Chonradh ag bunú an Chomhphobail Eorpaigh. Ba cheart an liosta sin a thabhairt cothrom le dáta chun athruithe stádais chuid na tíortha agus críocha thar lear a tharla le déanaí a chur san áireamh.

Ba cheart a thabhairt ar aire gur bunaíodh le Cinneadh (AE) 2019/2143 ón gComhairle an 11 Samhain 2019 an seasamh a ghlacfar thar ceann an Aontais sa Choiste um Thrádáil arna bhunú faoin gComhaontú idir an Comhphobal Eorpach, de pháirt, agus na Stáit san Aigéan Ciúin, den pháirt eile, a mhéid a bhaineann le leasú ar Iarscríbhinní II agus VIII a ghabhann le Prótacal II den Chomhaontú (OIAE L 331, 20.12.2019, lch. 1). D'fhonn na soiléire, tá an seasamh athmhúnlaithe (gan athrú) sa togra reatha.

Comhlíontar oibleagáidí an Aontais faoi fhorálacha an Chomhaontaithe leis an gcinneadh atá beartaithe.

4.Bunús dlí

4.1.Bunús dlí nós imeachta

4.1.1.Prionsabail

In Airteagal 218(9) den Chonradh ar Fheidhmiú an Aontais Eorpaigh (CFAE) déantar foráil maidir le cinntí lena mbunaítear ‘na seasaimh a ghlacfar thar ceann an Aontais i gcomhlacht arna chur ar bun le comhaontú nuair a iarrtar ar an gcomhlacht sin gníomhartha a ghlacadh a bhfuil éifeachtaí dlíthiúla leo, seachas gníomhartha lena bhforlíonfar nó lena leasófar creat institiúideach an chomhaontaithe.’

Áirítear ar na ‘gníomhartha a bhfuil éifeachtaí dlíthiúla leo’ gníomhartha a bhfuil éifeachtaí dlíthiúla leo de bhua rialacha an dlí idirnáisiúnta lena rialaítear an comhlacht i gceist. Áirítear air freisin ionstraimí nach bhfuil éifeacht cheangailteach leo faoin dlí idirnáisiúnta, ach a ‘d'fhéadfadh tionchar cinntitheach a imirt ar ábhar na reachtaíochta a ghlacfaidh reachtóir an Aontais Eorpaigh’ 2 .

4.1.2.Cur i bhfeidhm maidir leis an gcás seo

Is gníomh a bhfuil éifeachtaí dlíthiúla leis é an gníomh a iarrtar ar an gCoiste um Thrádáil a ghlacadh agus beidh sé ceangailteach faoi dhlí idirnáisiúnta i gcomhréir le Airteagail 8, 68 agus 78 den Chomhaontú. 

Leis an ngníomh atá beartaithe ní fhorlíontar ná ní leasaítear creat institiúideach an Chomhaontaithe.

Dá bhrí sin, is é Airteagal 218(9) CFAE bunús dlí nós imeachta an chinnidh atá beartaithe.

4.2.Bunús substainteach dlí

4.2.1.Prionsabail

An bunús dlí substainteach atá le cinneadh faoi Airteagal 218(9) CFAE, braitheann sé go príomha ar chuspóir agus ábhar an ghnímh atá beartaithe agus a bhfuiltear ag glacadh seasamh thar ceann an Aontais ina leith. Má shaothraítear dhá aidhm leis an ngníomh atá beartaithe nó má tá dhá chomhpháirt ann agus más féidir ceann de na haidhmeanna nó de na comhpháirteanna sin a shainaithint mar phríomhaidhm nó mar phríomh‑chomhpháirt agus an ceann eile mar aidhm nó comhpháirt theagmhasach, ní mór an cinneadh faoi Airteagal 218(9) CFAE a bhunú ar bhunús substainteach dlí aonair, is é sin an bunús dlí a éilítear de réir na príomhaidhme nó na príomh‑chomhpháirte.

4.2.2.Cur i bhfeidhm maidir leis an gcás seo

Baineann príomhchuspóir agus príomhábhar an ghnímh atá beartaithe leis an gcomhbheartas tráchtála.

Dá bhrí sin, ba cheart an chéad fhomhír d’Airteagal 207(4) CFAE a bheith ina bunús substainteach dlí leis an gcinneadh atá beartaithe.

4.3.Conclúid

Is é Airteagal 207 ba cheart a bheith ina bhunús dlí don chinneadh atá beartaithe, i gcomhar le hAirteagal 218(9) CFAE.

4.4.Foilsiú an ghnímh atá beartaithe

Ós rud é go leasófar le gníomh an Choiste um Thrádáil an Comhaontú Comhpháirtíochta Eatramhach idir an Comhphobal Eorpach, de pháirt, agus na Stáit san Aigéan Ciúin, den pháirt eile, is iomchuí é a fhoilsiú in Iris Oifigiúil an Aontais Eorpaigh tar éis a ghlactha.

Togra le haghaidh

CINNEADH ÓN gCOMHAIRLE

maidir leis an seasamh a ghlacfar thar ceann an Aontais Eorpaigh sa Choiste um Thrádáil arna bhunú faoin gComhaontú Comhpháirtíochta Eatramhach idir an Comhphobal Eorpach, de pháirt, agus na Stáit san Aigéan Ciúin, den pháirt eile a mhéid a bhaineann le forálacha áirithe de Phrótacal II a leasú maidir le sainmhíniú an choincheapa 'táirgí tionscnaimh' agus modhanna comhair riaracháin

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe an chéad fhomhír d’Airteagal 207(4) de, i gcomhar le hAirteagal 218(9) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)Maidir leis an gComhaontú Comhpháirtíochta Eatramhach idir an Comhphobal Eorpach, de pháirt, agus na Stáit san Aigéan Ciúin, den pháirt eile 3 (an 'Comhaontú'), lena mbunaítear creat maidir le Comhaontú Comhpháirtíochta Eacnamaíche, tá sé á chur i bhfeidhm go sealadach ag Nua-Ghuine Phapua agus ag Poblacht Fhidsí ón 20 Nollaig 2009 i leith agus an 28 Iúil 2014 i leith, faoi seach. Tar éis aontachas Stát Neamhspleách Shamó agus Oileáin Sholomón leis an gComhaontú, tá an Comhaontú á chur i bhfeidhm acu go sealadach ón 31 Nollaig i leith agus ón 17 Bealtaine 2020 i leith faoi seach.

(2)De bhun Airteagal 13 agus Airteagal 68 den Chomhaontú agus Airteagal 41 de Phrótacal II den Chomhaontú, féadfaidh Coiste um Thrádáil an Chomhaontaithe um Chomhpháirtíocht Eacnamaíoch (EPA) leasuithe ar Phrótacal II den Chomhaontú a ghlacadh.

(3)Tá an Coiste um Thrádáil, le linn an ochtú cruinniú dá chuid an *Meán Fómhair 2020*, chun glacadh le cinneadh lena leasófar forálacha áirithe de Phrótacal II maidir le sainmhíniú an choincheapa 'táirgí tionscnaimh' agus modhanna comhair riaracháin.

(4)Is iomchuí an seasamh a ghlacfar thar ceann an Aontais sa Choiste um Thrádáil a bhunú, a mhéid a bheidh an cinneadh atá beartaithe ceangailteach ar an Aontas.

(5)Ceanglaítear le Prótacal II maidir le sainmhíniú an choincheapa “táirgí tionscnaimh” agus modhanna comhair riaracháin, a tugadh i gcrích in 2009, leasuithe ar fhorálacha áirithe chun na rialacha tionscnaimh a nuashonrú i ndáil leis na forbairtí is déanaí maidir leis na rialacha tionscnaimh, chun rialacha tionscnaimh níos simplí agus níos solúbtha a chur ar fáil arb aidhm dóibh trádáil a éascú le haghaidh oibreoirí eacnamaíocha agus ráta úsáide na córa fabhraí a bharrfheabhsú.

(6)Maidir le leasuithe ar tháirgí (ceannteidil agus tuairiscithe) dá dtagraítear in Iarscríbhinn II a ghabhann le Prótacal II den Chomhaontú, is gá na leasuithe sin chun iad a ailíniú lena nuashonraigh WCO in leagan 2012 agus leagan 2017 den Ainmníocht CC agus chun tuairiscithe táirgí agus aicmiúchán CC a bheith comhsheasmhach leis an gcóras comhchuibhithe.

(7)Síníodh an conradh i dtaobh Aontachas Phoblacht na Cróite leis an Aontas Eorpach an 9 Nollaig 2011 agus tá feidhm leis ón 1 Iúil 2013 i leith. Tá feidhm ag an gComhaontú seo, ar thaobh amháin, maidir leis na críocha ina bhfuil feidhm ag an gConradh ar Fheidhmiú an Aontais Eorpaigh maidir leo, faoi na coinníollacha a leagtar síos sa Chonradh sin agus, ar an taobh eile, maidir le críocha Stáit Shínithe an Aigéin Chiúin. Ba cheart téacs Iarscríbhinn IV a ghabhann le Prótacal II den Chomhaontú a leasú dá réir chun leagan Cróitise an dearbhaithe sonraisc a chur san áireamh.

(8)Liostaítear in Iarscríbhinn VIII a ghabhann le Prótacal II den Chomhaontú tíortha agus críocha thar lear an Aontais. De réir bhrí an Phrótacail seo ciallóidh “tíortha agus críocha thar lear” na tíortha agus críocha dá dtagraítear i gCuid a Ceathair den Chonradh ag bunú an Chomhphobail Eorpaigh. Ba cheart an liosta sin a thabhairt cothrom le dáta chun athruithe stádais chuid na tíortha agus críocha thar lear a tharla le déanaí a chur san áireamh.

(9)De thairbhe aontachas Shamó agus Oileáin Sholomón leis an gComhaontú, ba cheart an dá Stát sin a bhaint de bhrí “Stáit ACC eile” dá dtagraítear in Iarscríbhinn X a ghabhann le Prótacal II.

TAR ÉIS AN CINNEADH SEO A GHLACADH:

Airteagal 1

Beidh an seasamh a ghlacfar thar ceann an Aontais san ochtú cruinniú den Choiste um Thrádáil bunaithe ar an dréachtghníomh a ghabhann leis an gCinneadh seo.

Airteagal 2

Dírítear an Cinneadh seo chuig an gCoimisiún.

Arna dhéanamh sa Bhruiséil,

(1)    Cinneadh 2009/729/CE ón gComhairle an 13 Iúil 2009 maidir le síniú agus cur i bhfeidhm sealadach an Chomhaontaithe Comhpháirtíochta Eatramhaigh idir an Comhphobal Eorpach, de pháirt, agus na Stáit san Aigéan Ciúin, den pháirt eile (IO L 272, 16.10.2009, lch. 1)

(2)    Breithiúnas ó Chúirt Bhreithiúnais an Aontais Eorpaigh an 7 Deireadh Fómhair 2014, an Ghearmáin v an Chomhairle, C-399/12, ECLI:EU:C:2014:2258, míreanna 61 go 64.

(3)    Cinneadh 2009/729/CE ón gComhairle an 13 Iúil 2009 maidir le síniú agus cur i bhfeidhm sealadach an Chomhaontaithe Comhpháirtíochta Eatramhaigh idir an Comhphobal Eorpach, de pháirt, agus na Stáit san Aigéan Ciúin, den pháirt eile (IO L 272, 16.10.2009, lch. 1)

AN COIMISIÚN EORPACH

An Bhruiséil,7.7.2020

COM(2020) 295 final

IARSCRÍBHINN

a ghabhann leis an

Togra le haghaidh Cinneadh ón gComhairle

maidir leis an seasamh a ghlacfar thar ceann an Aontais Eorpaigh sa Choiste um Thrádáil arna bhunú faoin gComhaontú Comhpháirtíochta Eatramhach idir an Comhphobal Eorpach, de pháirt, agus na Stáit san Aigéan Ciúin, den pháirt eile a mhéid a bhaineann le forálacha áirithe de Phrótacal II a leasú maidir le sainmhíniú an choincheapa 'táirgí tionscnaimh' agus modhanna comhair riaracháin

IARSCRÍBHINN

DRÉACHT

CINNEADH Uimh. ... / 2020
ÓN gCOISTE UM THRÁDÁIL

ARNA BHUNÚ FAOIN gCOMHAONTÚ COMHPHÁIRTÍOCHTA EATRAMHACH IDIR AN COMHPHOBAL EORPACH, DE PHÁIRT, AGUS STÁIT AN AIGÉIN CHIÚIN, DEN PHÁIRT EILE,

de …

lena leasaítear forálacha áirithe de Phrótacal II maidir le sainmhíniú an choincheap ‘táirgí tionscnaimh’ agus modhanna comhair riaracháin

TÁ AN COISTE UM THRÁDÁIL,

Ag féachaint don Chomhaontú Comhpháirtíochta Eatramhach idir an Comhphobal Eorpach, de pháirt, agus Stáit an Aigéin Chiúin den pháirt eile 1 (an 'Comhaontú'), lena mbunaítear creat le haghaidh Comhaontú Comhpháirtíochta Eacnamaíoch, arna shíniú i Londain an 30 Iúil 2009, agus go háirithe Airteagal 8, Airteagal 68(3) agus Airteagal 78, i gcomhar le hAirteagal 41 de Phrótacal II de,

De bharr an mhéid seo a leanas:

(1)Tá an Comhaontú á chur i bhfeidhm go sealadach ag Nua-Ghuine Phapua agus Poblacht Fhidsí ó bhí an 20 Nollaig 2009 agus an 28 Iúil 2014 ann, faoi seach. Tar éis a n‑aontachais, tá an Comhaontú á chur i bhfeidhm go sealadach ag Stát Neamhspleách Shamó agus ag Oileáin Sholomón ó bhí an 31 Nollaig 2018 agus an 17 Bealtaine 2020 ann, faoi seach.

(2)I gcomhréir le hAirteagal 8 den Chomhaontú, athbhreithneoidh an Coiste Trádála forálacha Phrótacal II maidir le sainmhíniú an choincheapa ‘táirgí tionscnaimh’ agus modhanna comhair riaracháin d'fhonn iad a shimpliú a thuilleadh.

(3) Rinne na Páirtithe an t‑athbhreithniú sin agus chomhaontaigh siad na leasuithe seo a leanas ar Phrótacal II:

(i) Na forálacha seo a leanas, nach bhfuil ábhartha a thuilleadh, a scriosadh:

- Mír 7 d’Airteagal 3;

- Airteagal 4 bis;

- Iarscríbhinn VIII A agus XII.

(ii) Ceartúchán a dhéanamh ar na forálacha seo a leanas:

- Mír 8 d’Airteagal 4, tríd an dara habairt, nach bhfuil infheidhme a thuilleadh, a scriosadh;

- Teideal Airteagal 7 a bheith comhoiriúnach leis an teideal san innéacs.

(iii) Airteagal 12 nua dar teideal "Deighilt chuntasaíochta” a thabhairt isteach i dTeideal II, lena gcuirfear ar chumas oibreoirí eacnamaíocha costais a laghdú tríd an modh seo a úsáid chun stoic a bhainistiú;

(iv) Airteagal 13 de Theideal III a scriosadh agus Airteagal 14 nua dar teideal "Neamhathrú" a chur isteach ina ionad, chun níos mó solúbthachta a bheith ann d'oibreoirí eacnamaíocha maidir leis an bhfianaise a sholáthrófar d'údaráis chustaim na tíre allmhairiúcháin nuair a dhéantar trasloingsiú nó stórasú custaim ar earraí tionscnaimh i dtríú tír;

           (v) Airteagal 14 maidir le “Taispeántais” agus Airteagal 38 maidir le “Saorchriosanna” a scriosadh, níl gá leo a thuilleadh tar éis foráil maidir le “neamhathrú” a thabhairt isteach;

           (vi) Airteagal 15 de Theideal IV a leasú chun níos mó solúbthachta a bheith ann d'oibreoirí eacnamaíocha na riachtanais i ndáil leis na ceanglais maidir le cruthúnas ar thionscnamh a chomhlíonadh;

           (vii) Airteagal 39 nua a chur isteach lena ndéantar achoimre ar fheidhmeanna agus ar fhreagrachtaí an Choiste Speisialta maidir le Comhar Custaim agus Rialacha Tionscnaimh dá dtagraítear i bhforálacha éagsúla de Phrótacal II, agus Airteagal 41 a thabhairt cothrom le dáta dá réir.

(4)    Tá Iarscríbhinn II a ghabhann le Prótacal II bunaithe ar leagan 2007 d'ainmníocht an Chórais Chomhchuibhithe (CC) atá i gceangal le Coinbhinsiún Idirnáisiúnta ar an gCóras Comhchuibhithe um Thuairisciú agus um Chódú Tráchtearraí ag an Eagraíocht Dhomhanda Chustaim (WCO). D'eisigh WCO Ainmníocht CC 2017 nua a tháinig i bhfeidhm an 1 Eanáir 2017. Is gá Iarscríbhinn II a ghabhann le Prótacal II den Chomhaontú a thabhairt cothrom le dáta lena hailíniú le leagan 2017 d'Ainmníocht an Chórais Chomhchuibhithe. Mar sin féin, ba cheart an status quo maidir le rialacha tionscnaimh a chaomhnú toisc nach aidhm d'athruithe ar Ainmníocht an Chórais Chomhchuibhithe difear a dhéanamh don riail tionscnaimh is infheidhme maidir le táirge áirithe.

(5)    Síníodh an conradh i dtaobh aontachas Phoblacht na Cróite leis an Aontas Eorpach an 9 Nollaig 2011 agus tá feidhm leis ó bhí an 1 Iúil 2013 ann. Tá feidhm ag an gComhaontú seo, ar thaobh, maidir leis na críocha ina bhfuil feidhm ag an gConradh ar Fheidhmiú an Aontais Eorpaigh maidir leo, agus faoi na coinníollacha a leagtar síos sa Chonradh sin agus, ar an taobh eile, maidir le críocha Stáit an Aigéin Chiúin a shínigh é. Ba cheart téacs Iarscríbhinn IV a ghabhann le Prótacal II den Chomhaontú a leasú dá réir chun leagan Cróitise an dearbhaithe sonraisc a chur san áireamh.

(6)    Le hIarscríbhinn VIII a ghabhann le Prótacal II den Chomhaontú liostaítear na Tíortha agus na Críocha thar lear de chuid an Aontais. Athraíodh an stádas a bhí ar chuid de na críocha le déanaí: Tá Saint‑Barthélemy (FR) agus Beirmiúda (RA) i measc tíortha agus críocha thar lear i gcomhlachas leis an Aontas ón 1 Eanáir 2012 i leith agus ón 1 Eanáir 2014 i leith faoi seach, tá Mayotte (FR) ar cheann de na Réigiúin is Forimeallaí de chuid an Aontais ón 1 Eanáir 2014 i leith. Is gá an liosta tíortha agus críocha thar lear in Iarscríbhinn VIII a ghabhann le Prótacal II den Chomhaontú a thabhairt cothrom le dáta chun an liosta a ailíniú le liosta an Chonartha ar Fheidhmiú an Aontais Eorpaigh.

(7)    De thairbhe aontachas Shamó agus Oileáin Sholomón leis an gComhaontú, ba cheart an dá Stát sin a bhaint de bhrí “Stáit ACC eile” dá dtagraítear in Iarscríbhinn X a ghabhann le Prótacal II.

(8)        I bhfianaise an líon athruithe atá le déanamh, agus ar mhaithe leis an tsoiléire, ba cheart téacs nua a chur ionad Phrótacal II leis an gComhaontú ina iomláine,

TAR ÉIS AN CINNEADH SEO A GHLACADH:

Airteagal 1

An téacs a leagtar amach san Iarscríbhinn a ghabhann leis an gCinneadh seo cuirtear é in ionad Phrótacal II a ghabhann leis an gComhaontú.

Airteagal 2

Tiocfaidh an Cinneadh seo i bhfeidhm an dáta a ghlacfar é.

Arna dhéanamh in/sa … an …

Thar ceann an Aontais            Thar ceann Stáit an Aigéin Chiúin

IARSCRÍBHINN

PRÓTACAL II

Maidir le sainmhíniú an choincheapa ‘táirgí tionscnaimh’ agus modhanna comhair riaracháin

INNÉACS

TEIDEAL I

FORÁLACHA GINEARÁLTA

Airteagal

1.    Sainmhínithe

TEIDEAL II

SAINMHÍNIÚ AN CHOINCHEAPA 'TÁIRGÍ TIONSCNAIMH'

Airteagail

2.    Ceanglais ghinearálta

3.    Carnadh sa Chomhphobal Eorpach

4.    Carnadh i Stáit an Aigéin Chiúin

5.    Táirgí a fuarthas go hiomlán

6.    Táirgí a ndearnadh leoroibriú nó leorphróiseáil orthu 

7.    Oibríochtaí easpacha oibrithe nó próiseála

8.    Aonad incháilitheachta

9.    Gabhálais, páirteanna breise agus uirlisí

10.    Tacair

11.    Eilimintí neodracha

12.    Deighilt chuntasaíochta

TEIDEAL III

CEANGLAIS CHRÍCHE

Airteagail

13.    Prionsabal an chríochachais

14.    Neamhathrú

TEIDEAL IV

CRUTHÚNAS AR THIONSCNAMH

Airteagail

15.    Ceanglais ghinearálta

16.    Nós imeachta maidir le deimhniú gluaiseachta EUR.1 a eisiúint

17.    Deimhnithe gluaiseachta EUR.1 a eisítear go cúlghabhálach

18.    Dúblach de dheimhniú gluaiseachta EUR.1 a eisiúint

19.        Deimhnithe gluaiseachta EUR.1 a eisiúint ar bhonn cruthúnais ar thionscnamh a eisíodh nó a tarraingíodh suas roimhe sin

20.    Coinníollacha maidir le dearbhú sonraisc a tharraingt suas

21.    Onnmhaireoir formheasta

22.    Bailíocht an chruthúnais ar thionscnamh

23.    Cruthúnas ar thionscnamh a chur isteach

24.    Allmhairiú i dtráthchodanna

25.    Díolúintí ó chruthúnas ar thionscnamh

26.    Nós imeachta faisnéise um charnadh

27.    Doiciméid tacaíochta

28.    An cruthúnas ar thionscnamh agus na doiciméid tacaíochta a chaomhnú

29.    Neamhréireachtaí agus earráidí foirmiúla

30.    Suimeanna arna sloinneadh in euro

TEIDEAL V

SOCRUITHE MAIDIR LE COMHAR RIARACHÁIN

Airteagail

31.    Coinníollacha riaracháin maidir le táirgí a thairbheoidh den Chomhaontú

32.    Fógairt faisnéise maidir leis na húdaráis chustaim

33.    Cúnamh frithpháirteach

34.    Cruthúnas ar thionscnamh a fhíorú

35.    Na dearbhuithe soláthraí a fhíorú

36.    Díospóidí a réiteach

37.    Pionóis

38.    Maoluithe

39.    Coiste Speisialta maidir le Comhar Custaim agus Rialacha Tionscnaimh

TEIDEAL VI

   CEUTA AGUS MELILLA

Airteagal

40.    Coinníollacha speisialta

TEIDEAL VII

FORÁLACHA CRÍOCHNAITHEACHA

Airteagail

41.    Na rialacha tionscnaimh a athbhreithniú agus a chur i bhfeidhm

42.    Iarscríbhinní

43.    Cur chun feidhme an Phrótacail

IARSCRÍBHINNÍ

IARSCRÍBHINN I a ghabhann le PRÓTACAL II:    Réamhnótaí a ghabhann leis an liosta in Iarscríbhinn II

IARSCRÍBHINN II a ghabhann le PRÓTACAL II:    Liosta den oibriú nó den phróiseáil is gá a dhéanamh ar ábhair neamhthionscnaimh chun go dtabharfar stádas tionscnaimh dóibh

IARSCRÍBHINN II(a) a ghabhann le PRÓTACAL II:    Maoluithe ar an liosta den oibriú nó den phróiseáil is gá a dhéanamh ar ábhair neamhthionscnaimh chun go dtabharfar stádas tionscnaimh don táirge arna dhéanamh

IARSCRÍBHINN III a ghabhann le PRÓTACAL II:    Foirm i gcomhair deimhniú gluaiseachta

IARSCRÍBHINN IV a ghabhann le PRÓTACAL II:        Dearbhú sonraisc

IARSCRÍBHINN V A a ghabhann le PRÓTACAL II:    Dearbhú soláthraí do tháirgí a bhfuil stádas tionscnaimh fhabhraigh acu

IARSCRÍBHINN V B a ghabhann le PRÓTACAL II:    Dearbhú soláthraí maidir le táirgí nach bhfuil stádas tionscnaimh fhabhraigh acu

IARSCRÍBHINN VI a ghabhann le PRÓTACAL II:        Deimhniú faisnéise

IARSCRÍBHINN VII a ghabhann le PRÓTACAL II:    Foirm iarratais ar mhaolú

IARSCRÍBHINN VIII a ghabhann le PRÓTACAL II:    Tíortha agus críocha thar lear

IARSCRÍBHINN IX a ghabhann le PRÓTACAL II:    Táirgí a mbeidh feidhm ag na forálacha carntha dá dtagraítear in Airteagail 3 agus 4 maidir leo tar éis an 1 Deireadh Fómhair 2015 

IARSCRÍBHINN X a ghabhann le PRÓTACAL II:        STÁIT ACC eile

IARSCRÍBHINN XI a ghabhann le PRÓTACAL II:    Táirgí de thionscnamh na hAfraice Theas arna n‑eisiamh ó charnadh dá bhforáiltear in Airteagal 4

DEARBHÚ COMHPHÁIRTEACH maidir le Prionsacht Andóra

DEARBHÚ COMHPHÁIRTEACH maidir le Poblacht San Mairíne

TEIDEAL I

FORÁLACHA GINEARÁLTA

Airteagal 1

Sainmhínithe

Chun críocha an Phrótacail seo:

(a)    ciallaíonn “monarú” aon chineál oibrithe nó próiseála lena n‑áirítear cur le chéile nó oibríochtaí sonracha;

(b)    ciallaíonn “ábhar” aon chomhábhar, aon amhábhar, aon chomhpháirt nó aon pháirt etc. a úsáidtear le linn mhonarú an táirge;

(c)    ciallaíonn “táirge” an táirge atáthar a mhonarú, fiú má tá sé ceaptha lena úsáid ina dhiaidh sin in oibríocht mhonaraíochta eile;

(d)    ciallaíonn “earraí” ábhair agus táirgí araon;

(e)    ciallaíonn "luach custaim" an luach arna chinneadh i gcomhréir le Comhaontú 1994 maidir le cur chun feidhme Airteagal VII den Chomhaontú Ginearálta ar Tharaifí agus Thrádáil (Comhaontú na hEagraíochta Domhanda Trádála maidir le luacháil chustaim);

(f)    ciallaíonn “praghas díreach ón monarcha” an praghas a íoctar as an táirge díreach ón monarcha leis an monaróir sa Chomhphobal Eorpach nó i Stát san Aigéan Ciúin a ndéantar an t‑oibriú deireanach nó an phróiseáil dheireanach ina ghnóthas, ar choinníoll go bhfuil luach na n‑ábhar uile arna n‑úsáid cuimsithe sa phraghas sin, lúide aon cháin inmheánach a aisíoctar, nó is féidir a aisíoc, nuair a onnmhairítear an táirge sin a fuarthas;

(g)    ciallaíonn “luach na n‑ábhar” an luach custaim tráth a allmhairítear na hábhair neamhthionscnaimh arna n‑úsáid, nó, murab eol sin agus nach féidir é a fháil amach, ciallaíonn sé an chéad phraghas infhíoraithe a íocadh as na hábhair sa Chomhphobal Eorpach nó i Stát san Aigéan Ciúin;

(h)    ciallaíonn “luach na n‑ábhar tionscnaimh” luach na n‑ábhar sin a shainítear i bpointe (g) arna chur i bhfeidhm mutatis mutandis;

(i)    measfar gurb é an “breisluach” praghas an táirge díreach ón monarcha lúide luach custaim gach ceann de na hábhair a ionchorpraítear, arb ábhair iad de thionscnamh na dtíortha nó na gcríoch eile dá dtagraítear in Airteagail 3 agus 4 lena bhfuil an carnadh infheidhme, nó i gcás nach eol an luach custaim nó nach féidir é a fháil amach, measfar gurb é an chéad phraghas infhíoraithe é a íocadh as na hábhair sa Chomhphobal Eorpach nó i Stát san Aigéan Ciúin;

(j)    ciallaíonn “caibidlí” agus “ceannteidil” na caibidlí agus na ceannteidil ceithre dhigit a úsáidtear san ainmníocht arb í an Córas Tuairiscithe agus Códaithe Tráchtearraí Comhchuibhithe í, dá ngairtear “an Córas Comhchuibhithe” nó “CC” sa Phrótacal seo;

(k)    tagraíonn “aicmithe” d'aicmiú táirge nó ábhair atá faoi cheannteideal áirithe;

(l)    ciallaíonn “coinsíneacht” táirgí a chuirtear go comhuaineach ó aon onnmhaireoir amháin chuig aon choinsíní amháin nó atá cumhdaithe ag aon doiciméad iompair amháin lena gcumhdaítear seoladh na dtáirgí sin ón onnmhaireoir chuig an gcoinsíní nó, de cheal doiciméad den sórt sin, atá cumhdaithe ag aon sonrasc amháin;

(m)    cuimsíonn “críocha” uiscí teorann;

(n)    ciallaíonn “TCTL” na tíortha agus na críocha thar lear mar shainítear in Iarscríbhinn VIII;

(o)    ciallaíonn “Stáit ACC eile” na Stáit ACC uile seachas Stáit an Aigéin Chiúin.

TEIDEAL II

SAINMHÍNIÚ AN CHOINCHEAPA “TÁIRGÍ TIONSCNAIMH”

Airteagal 2

Ceanglais ghinearálta

1.    Chun críoch an Chomhaontaithe Comhpháirtíochta Eatramhaigh, dá ngairtear “an Comhaontú” anseo feasta, measfar gur de thionscnamh an Chomhphobail Eorpaigh iad na táirgí seo a leanas:

(a)    táirgí a fuarthas go hiomlán sa Chomhphobal Eorpach de réir bhrí Airteagal 5 den Phrótacal seo;

(b)    táirgí a fuarthas sa Chomhphobal Eorpach ina bhfuil ábhair nach bhfuarthas go hiomlán ann, ar choinníoll go ndearnadh leoroibriú nó leorphróiseáil ar na hábhair sin sa Chomhphobal Eorpach de réir bhrí Airteagal 6 den Phrótacal seo.

2.    Chun críoch an Chomhaontaithe, measfar gur de thionscnamh Stát san Aigéan Ciúin na táirgí seo a leanas:

(a)    táirgí a fuarthas go hiomlán i Stát san Aigéan Ciúin de réir bhrí Airteagal 5 den Phrótacal seo;

(b)    táirgí a fuarthas i Stát san Aigéan Ciúin a bhfuil ábhair iontu nach bhfuarthas go hiomlán ann, ar choinníoll go ndearnadh leoroibriú nó leorphróiseáil ar na hábhair sin sa Stát sin san Aigéan Ciúin de réir bhrí Airteagal 6 den Phrótacal seo.

Airteagal 3

Carnadh sa Chomhphobal Eorpach

1.    Gan dochar d’fhorálacha Airteagal 2(1), measfar táirgí a bheith de thionscnamh an Chomhphobail Eorpaigh más ansin a fuarthas iad, lena n‑ionchorpraítear ábhair de thionscnamh Stát san Aigéan Ciúin, i Stáit ACC eile nó sna TCTLanna, ar choinníoll gur mó an t‑oibriú nó an phróiseáil a dhéanfar sa Chomhphobal Eorpach ná na hoibríochtaí dá dtagraítear in Airteagal 7. Ní bheidh sé riachtanach leoroibriú ná leorphróiseáil a bheith déanta ar na hábhair sin.

2.    I gcás nach mó an t‑oibriú ná an phróiseáil a dhéantar sa Chomhphobal Eorpach ná na hoibríochtaí dá dtagraítear in Airteagal 7, ní mheasfar an táirge a fuarthas a bheith de thionscnamh an Chomhphobail Eorpaigh ach amháin i gcás inar mó an breisluach a chuirtear leis ná luach na n‑ábhar, ar de thionscnamh ceann de na tíortha nó de na críocha eile dá dtagraítear i mír 1, a úsáideadh. Murab amhlaidh sin, measfar an táirge a fuarthas a bheith de thionscnamh na tíre nó na críche lena mbaineann an luach is airde ábhar tionscnaimh a úsáideadh le linn na monaraíochta sa Chomhphobal Eorpach.

3.    Táirgí de thionscnamh aon cheann de na tíortha nó de na críocha dá dtagraítear i míreanna 1 agus 2, nach ndearnadh aon oibriú ná aon phróiseáil orthu sa Chomhphobal Eorpach, coinneoidh siad a stádas tionscnaimh má onnmhairítear iad chuig ceann de na tíortha nó de na críocha sin.

4.    Chun Airteagal 2(1)(b) a chur chun feidhme, oibriú nó próiseáil a dhéantar i Stát san Aigéan Ciúin, i Stáit ACC eile nó in TCTL, measfar é a bheith déanta sa Chomhphobal Eorpach nuair a dhéantar oibriú nó próiseáil dá éis sin sa Chomhphobal Eorpach ar na táirgí a fuarthas. I gcás ina bhfaightear, de bhun na forála seo, na táirgí tionscnaimh in dhá cheann nó níos mó de na tíortha nó críocha lena mbaineann, ní mheasfar iad a bheith de thionscnamh an Chomhphobail Eorpaigh ach amháin más mó an t‑oibriú nó an phróiseáil a rinneadh ná na hoibríochtaí dá dtagraítear in Airteagal 7.

5.    I gcás nach mó an t‑oibriú ná an phróiseáil a dhéantar sa Chomhphobal Eorpach ná na hoibríochtaí dá dtagraítear in Airteagal 7, ní mheasfar an táirge a fuarthas a bheith de thionscnamh an Chomhphobail Eorpaigh ach amháin i gcás inar mó an breisluach a chuirtear leis ná luach na n‑ábhar a úsáideadh ar de thionscnamh aon cheann de na tíortha nó de na críocha eile dá dtagraítear i mír 4 iad. Murab amhlaidh sin, measfar an táirge a fuarthas a bheith de thionscnamh na tíre nó na críche lena mbaineann an luach is airde ábhar a úsáideadh le linn na monaraíochta.

6.    An carnadh dá bhforáiltear san Airteagal seo féadfar é a chur i bhfeidhm ar choinníoll:

(a)    go ndearna na tíortha a bhaineann le gnóthú an stádais tionscnaimh agus an tír ceann scríbe comhaontú a thabhairt i gcrích maidir le comhar riaracháin lena n‑áirítear cur chun feidhme cuí an Airteagail seo;

(b)    gur tugadh stádas tionscnaimh d’ábhair agus do tháirgí trí rialacha tionscnaimh a chur i bhfeidhm arb ionann iad agus na rialacha a leagtar amach sa Phrótacal seo;

(c)    go soláthróidh an Comhphobal Eorpach, trí bhíthin an Choimisiúin Eorpaigh, sonraí comhaontuithe do Stáit an Aigéin Chiúin maidir le comhar riaracháin leis na tíortha nó leis na críocha eile dá dtagraítear san Airteagal seo. Go bhfoilseoidh an Coimisiún Eorpach in Iris Oifigiúil an Aontais Eorpaigh (sraith C) agus go bhfoilseoidh Stáit an Aigéin Chiúin de réir a nósanna imeachta féin, an dáta is féidir an carnadh dá bhforáiltear san Airteagal seo a fheidhmiú i leith na dtíortha nó na gcríoch sin a liostaítear san Airteagal seo a bhfuil na ceanglais riachtanacha comhlíonta acu.

Airteagal 4

Carnadh i Stáit an Aigéin Chiúin

1.    Gan dochar d’fhorálacha Airteagal 2(2), measfar táirgí a bheith de thionscnamh Stát san Aigéan Ciúin más ansin a fuarthas iad, lena n‑ionchorpraítear ábhair de thionscnamh an Chomhphobail Eorpaigh, i Stáit ACC eile, sna TCTLanna nó i Stáit eile an Aigéin Chiúin, ar choinníoll gur mó an t‑oibriú nó an phróiseáil a dhéanfar sa Stát sin san Aigéan Ciúin ná na hoibríochtaí dá dtagraítear in Airteagal 7. Ní bheidh sé riachtanach leoroibriú ná leorphróiseáil a bheith déanta ar na hábhair sin.

2.    I gcás nach mó an t‑oibriú ná an phróiseáil a dhéantar sa Stát san Aigéan Ciúin ná na hoibríochtaí dá dtagraítear in Airteagal 7, ní mheasfar an táirge a fuarthas a bheith de thionscnamh an Stáit sin san Aigéan Ciúin ach amháin i gcás inar mó an breisluach a chuirtear leis ná luach na n‑ábhar a úsáideadh ar tionscnamh aon cheann de na tíortha nó de na críocha eile dá dtagraítear i mír 1 iad. Murab amhlaidh sin, measfar an táirge a fuarthas a bheith de thionscnamh na tíre nó na críche lena mbaineann an luach is airde ábhar tionscnaimh a úsáideadh le linn na monaraíochta sa Stát san Aigéan Ciúin.

3.    Táirgí de thionscnamh aon cheann de na tíortha nó de na críocha dá dtagraítear i míreanna 1 agus 2 den Airteagal seo, nach ndearnadh aon oibriú ná aon phróiseáil orthu sa Stát san Aigéan Ciúin, coinneoidh siad a stádas tionscnaimh má onnmhairítear iad chuig ceann de na tíortha nó de na críocha sin.

4.    Chun Airteagal 2(2)(b) a chur chun feidhme, measfar an t‑oibriú nó an phróiseáil a dhéantar sa Chomhphobal Eorpach, i Stáit ACC eile nó in TCTL a bheith déanta i Stát san Aigéan Ciúin i gcás ina ndéantar oibriú nó próiseáil dá éis sin ar na táirgí a fuarthas sa Stát sin san Aigéan Ciúin. I gcás ina bhfaightear, de bhun na forála seo, na táirgí tionscnaimh in dhá cheann nó níos mó de na tíortha nó na críocha lena mbaineann, ní mheasfar iad a bheith de thionscnamh an Stáit sin san Aigéan Ciúin ach amháin más mó an t‑oibriú nó an phróiseáil a rinneadh ná na hoibríochtaí dá dtagraítear in Airteagal 7.

5.    I gcás nach mó an t‑oibriú ná an phróiseáil a dhéantar sa Stát san Aigéan Ciúin ná na hoibríochtaí dá dtagraítear in Airteagal 7, ní mheasfar an táirge a fuarthas a bheith de thionscnamh an Chomhphobail Eorpaigh ach amháin i gcás inar mó an breisluach a chuirtear leis ná luach na n‑ábhar ar de thionscnamh aon cheann de na tíortha nó de na críocha eile dá dtagraítear i mír 4 a úsáideadh. Murab amhlaidh sin, measfar an táirge a fuarthas a bheith de thionscnamh na tíre nó na críche lena mbaineann an luach is airde ábhar a úsáideadh le linn na monaraíochta.

6.    An carnadh dá bhforáiltear san Airteagal féadfar é a chur i bhfeidhm ar choinníoll:

(a)    go ndearna na tíortha a bhaineann le gnóthú an stádais tionscnaimh agus an tír ceann scríbe comhaontú a thabhairt i gcrích maidir le comhar riaracháin lena n‑áirítear cur chun feidhme cuí an Airteagail seo;

(b)    gur tugadh stádas tionscnaimh d’ábhair agus do tháirgí trí rialacha tionscnaimh a chur i bhfeidhm arb ionann iad agus na rialacha a leagtar amach sa Phrótacal seo;

(c)    go soláthróidh Stáit an Aigéin Chiúin, trí bhíthin an Choimisiúin Eorpaigh, sonraí comhaontuithe don Chomhphobal Eorpach, maidir le comhar riaracháin le tíortha nó le críocha eile dá dtagraítear san Airteagal seo. go bhfoilseoidh an Coimisiún Eorpach in Iris Oifigiúil an Aontais Eorpaigh (sraith C) agus go bhfoilseoidh Stáit an Aigéin Chiúin de réir a nósanna imeachta féin, an dáta is féidir an carnadh dá bhforáiltear san Airteagal seo a fheidhmiú i leith na dtíortha nó na gcríoch sin a liostaítear san Airteagal seo a bhfuil na ceanglais riachtanacha comhlíonta acu.

7.    Ní bheidh feidhm ag an gcarnadh dá bhforáiltear san Airteagal seo maidir leis na táirgí a liostaítear in Iarscríbhinn IX. Dá ainneoin sin, ní féidir an carnadh dá bhforáiltear san Airteagal seo a fheidhmiú ach amháin tar éis an 1 Deireadh Fómhair 2015 i gcás na dtáirgí a liostaítear in Iarscríbhinn IX agus tar éis an 1 Eanáir 2010 i gcás rís faoi cheannteideal taraife 1006 faoi seach, nuair is de thionscnamh Stát san Aigéan Ciúin nó Stát ACC eile ar comhalta é den Chomhaontú Comhpháirtíochta Eacnamaíche na hábhair a úsáidfear i monarú na dtáirgí sin, nó nuair a dhéanfar an t‑oibriú nó an phróiseáil i gceann de na Stáit sin.

8.    Ní bheidh feidhm ag an Airteagal seo maidir le táirgí Iarscríbhinn XI ar de thionscnamh na hAfraice Theas iad.

Airteagal 5

Táirgí a fuarthas go hiomlán

1.    Measfar go bhfuarthas na táirgí seo a leanas go hiomlán i Stát san Aigéan Ciúin nó sa Chomhphobal Eorpach:

(a)    táirgí mianracha a eastóscadh as ithir nó as grinneall na farraige na gcríoch sin;

(b)    táirgí ó thorthaí agus ó ghlasraí a bhuaintear sna críocha sin;

(c)    ainmhithe beo a rugadh agus a tógadh sna críocha sin;

(d)    táirgí a fuarthas ó ainmhithe beo a tógadh sna críocha sin;

(e)    (i)    táirgí a fuarthas de thoradh fiach nó iascaireacht a rinneadh sna críocha sin;

   (ii)    táirgí dobharshaothraithe, lena n‑áirítear táirgí muirshaothraithe, i gcás inar rugadh agus inar tógadh na héisc sna críocha sin;

(f)    táirgí iascaireachta mara agus táirgí eile a bhain soithí an Chomhphobail Eorpaigh nó Stáit san Aigéan Ciúin as an bhfarraige lasmuigh d’uiscí teorann na gcríoch sin;

(g)    táirgí a rinneadh ar bord longa próiseála na gcríoch sin as na táirgí dá dtagraítear i bhfomhír (f) agus as na táirgí sin amháin;

(h)    earraí athláimhe a bailíodh sna críocha sin agus nach bhfuil oiriúnach ach d'aisghabháil amhábhar lena n‑áirítear boinn réchaite nach bhfuil oiriúnach ach d'atráchtadh nó lena n‑úsáid mar dhramhaíl;

(i)    dramhaíl agus fuíoll a tháinig as oibríochtaí monaraithe a rinneadh sna críocha sin;

(j)    táirgí a eastóscadh as ithir mhuirí nó as fo-ithir mhuirí lasmuigh d'uiscí teorann na gcríoch sin ar choinníoll gurb acusan amháin atá na cearta an ithir sin nó an fho-ithir sin a oibriú;

(k)    earraí a táirgeadh sna críocha sin as na táirgí a luaitear go sonrach i bhfomhíreanna (a) go (j) agus as na táirgí sin amháin.

2.    Ní bheidh feidhm ag na téarmaí “soithí na gcríoch sin” agus “longa próiseála na gcríoch sin” i mír 1(f) agus (g) ach amháin maidir le soithí agus longa próiseála:

(a)    atá cláraithe i mBallstát den Chomhphobal Eorpach nó i Stát san Aigéan Ciúin;

(b)    a bhfuil bratach de Bhallstát an Chomhphobail Eorpaigh nó bratach de Stát san Aigéan Ciúin in airde acu;

(c)    a chomhlíonann ceann de na coinníollacha seo a leanas:

   (i)    gur le náisiúnaigh Ballstáit den Chomhphobal Eorpach nó náisiúnaigh de Stáit san Aigéan Ciúin 50 faoin gcéad, ar a laghad, iad;

   nó

   (ii)    gur le cuideachtaí iad

   –    a bhfuil a bpríomhoifig agus a bpríomhionad gnó i mBallstát an Chomhphobail Eorpaigh nó i Stát san Aigéan Ciúin; agus

   –    gur le Ballstát an Chomhphobail Eorpaigh nó le Stát san Aigéan Ciúin, nó le heintitis phoiblí nó le náisiúnaigh an Stáit sin 50 faoin gcéad, ar a laghad, iad.

3.    D'ainneoin fhorálacha mhír 2, aithneoidh an Comhphobal Eorpach, arna iarraidh sin ag Stát san Aigéan Ciúin, go láimhseálfar soithí a chairtfhostófar nó a thabharfar ar léas ag Stát san Aigéan Ciúin amhail “soithí na gcríoch sin” chun tabhairt faoi ghníomhaíochtaí iascaigh ina chrios eacnamaíoch eisiach ar choinníoll go nglacfaidh an Coiste Speisialta maidir le Comhar Custaim agus Rialacha Tionscnaimh gur leordhóthanach atá an chairt nó an comhaontú léasa, a mbeidh ceart an chéad diúltú tugtha don Chomhphobal Eorpach ina leith, maidir le deiseanna a thabhairt chun cur le hacmhainn an Stáit san Aigéan Ciúin iascaireacht a dhéanamh ar mhaithe leis féin agus go háirithe go gcuirfidh an chairt nó an comhaontú léasa sin de fhreagracht ar an Stát sin san Aigéan Ciúin an soitheach a bheidh ar fáil dó ar feadh tréimhse ama nach beag a bhainistiú ó thaobh muirí agus tráchtála de.

4.    Is féidir coinníollacha mhír 2 a chomhlíonadh i Stáit éagsúla chomh fada agus gur Stáit san Aigéan Ciúin iad. Sa chás sin, measfar táirgí a bheith de thionscnamh an Stáit lena mbaineann na náisiúnaigh nó an chuideachta ar leo an soitheach nó an long phróiseála i gcomhréir le mír 2(c). I gcás soitheach nó long próiseála ar le náisiúnaigh nó cuideachtaí iad, ar náisiúnaigh nó cuideachtaí iad de Stáit a bhfuil baint acu le Comhaontuithe Comhpháirtíochta Eacnamaíche éagsúla, measfar na táirgí sin a bheith de thionscnamh an Stáit a n‑íocann a náisiúnaigh nó a chuideachtaí as an scair is airde i gcomhréir le forálacha mhír 2(c).

Airteagal 6

Táirgí a ndearnadh leoroibriú nó leorphróiseáil orthu

1.    Chun críocha Airteagal 2, measfar go ndearnadh leoroibriú nó leorphróiseáil ar tháirgí nach bhfuarthas go hiomlán, i gcás ina bhfuil na coinníollacha a leagtar amach sa Liosta in Iarscríbhinn II comhlíonta.

2.    D'ainneoin mhír 1, is féidir a mheas go ndearnadh leoroibriú nó leorphróiseáil ar na táirgí a liostaítear in Iarscríbhinn II(a), chun críocha Airteagal 2, ach na coinníollacha a leagtar amach san Iarscríbhinn sin a bheith comhlíonta.

3.    Léirítear leis na coinníollacha dá dtagraítear i míreanna 1 agus 2 thuas, i gcás gach táirge a chumhdaítear faoin gComhaontú seo, an t‑oibriú nó an phróiseáil is gá a dhéanamh ar ábhair neamhthionscnaimh a úsáidtear le linn na monaraíochta agus ní bheidh feidhm ag na coinníollacha sin ach amháin maidir leis na hábhair sin. Dá bhrí sin, má úsáidtear táirge le linn monarú táirge eile, ar táirge é a fuair stádas tionscnaimh de thoradh chomhlíonadh na gcoinníollacha a leagtar amach i gceann amháin de na liostaí, ní bheidh feidhm ag na coinníollacha is infheidhme maidir leis an táirge lena n‑ionchorpraítear é, agus ní thabharfar san áireamh na hábhair neamhthionscnaimh a d'fhéadfaí a úsáid le linn a mhonaraithe.

4.    D'ainneoin mhíreanna 1 agus 2, féadfar úsáid a bhaint as ábhair neamhthionscnaimh nár cheart, de réir na gcoinníollacha a leagtar amach in Iarscríbhinn II agus in Iarscríbhinn II(a), a úsáid le linn monarú táirge áirithe, ar choinníoll:

(a)    nach mó a luach iomlán ná 15 % de phraghas an táirge díreach ón monarcha;

(b)    nach sárófar aon cheann de na céatadáin atá leagtha síos sa liosta i gcomhair uasluach ábhar neamhthionscnaimh de thoradh an mhír seo a chur i bhfeidhm.

5.    Ní bheidh feidhm ag forálacha mhír 4 maidir le táirgí ó Chaibidil 50 go Caibidil 63 den Chóras Comhchuibhithe.

6.    (a)    Aithníonn na Páirtithe nach raibh na Stáit san Aigéan Ciúin, ón uair a síníodh Coinbhinsiún Lomé in 1976, in ann flít náisiúnta leordhóthanach a fhorbairt lena n‑urramaítear coinníollacha soithigh Airteagal 5.2 de Phrótacal II. Aithníonn na Páirtithe freisin imthosca speisialta Stáit an Aigéin Chiúin, mar atá, a easnamhaí atá éisc a mbeirtear orthu ina n‑iomláine leis an éileamh ar thalamh a shásamh, an acmhainn iascaireachta an‑teoranta atá ag cabhlach iascaireachta Stáit an Aigéin Chiúin, an cumas próiseála laghdaithe de thoradh cúinsí fisiceacha agus eacnamaíocha, an riosca íseal go mbainfí an bonn de mhargadh an Aontais mar gheall ar insreabhadh mór táirgí iascaigh ó Stáit an Aigéin Chiúin, iargúltacht thíreolaíoch Stáit an Aigéin Chiúin chomh maith leis an bhfad ó mhargadh an Aontais. An sprioc deiridh amháin atá ag na Páirtithe go léir, eadhon forbairt bhreise i Stáit an Aigéin Chiúin a chur chun cinn agus iascach inbhuanaithe agus dea-rialachas iascaigh á chur chun cinn ag an am céanna.

   (b)    Aithníonn na Páirtithe a ríthábhachtaí atá iascaigh do mhuintir Stáit an Aigéin Chiúin agus go bhfuil na héisc - an tuinnín san Aigéan Ciúin Iartharach agus san Aigéan Ciúin Láir mar shampla - ar an gcomhacmhainn nádúrtha is tábhachtaí chun ioncam fadtéarmach agus fostaíocht fhadtéarmach a ghiniúint do Stáit an Aigéin Chiúin. Tá an chomhacmhainn iascaigh in uiscí Stáit an Aigéin Chiúin faoi réir ag réimeanna bainistíochta éagsúla ar leibhéil réigiúnacha, fhoréigiúnacha agus náisiúnta, lena n‑áirítear an Scéim Laethanta Soithigh atá dírithe ar iascach réigiúnach inbhuanaithe peas‑saighne tuinnín. Tá na gníomhaíochtaí sin faoi réir faireachán laistigh de Chreat an Choimisiúin Iascaigh don Aigéan Ciúin Iartharach agus don Aigéan Ciúin Láir, lena n‑áirítear an Córas um Fhaireachán Soithí agus Cláir Breathnóirí. Sa chomhthéacs sin, aontaíonn na Páirtithe d'ainneoin mhír 1, nuair nach féidir, de réir na n‑imthosca atá ann, táirgí a fuarthas go hiomlán faoi mar a shainmhínítear i mír 1(f) agus mír 1(g) d’Airteagal 5 a úsáid go leordhóthanach chun an t‑éileamh ar thalamh a shásamh agus tar éis do Stát san Aigéan Ciúin réamhfhógra a thabhairt don Choimisiún Eorpach, measfar táirgí próiseáilte iascaigh atá faoi cheannteidil 1604 agus 1605 a monaraíodh in áitreabh ar talamh sa Stát sin as ábhair neamhthionscnaimh atá faoi Chaibidil 03 agus a thugtar i dtír i gcalafort an Stáit sin, measfar leoroibriú nó leorphróiseáil a bheith déanta orthu chun críocha Airteagal 2. Léireofar san fhógra a thabharfar don Choimisiún Eorpach na cúiseanna a spreagfar forbairt na hearnála iascaigh sa Stát sin le cur i bhfeidhm na míre seo, agus áireofar ann an fhaisnéis riachtanach faoi na speicis lena mbaineann, faoi na táirgí a bheidh le monarú maille le tuairisc ar na cainníochtaí éagsúla a bheidh i gceist.

   (c)    Tarraingeofar suas tuarascáil maidir le cur chun feidhme fhomhír (b) tráth nach déanaí ná trí bliana tar éis an fhógra.

   (d)    Ar bhonn na tuarascála sin, reáchtálfaidh an Comhphobal Eorpach agus an Stát iarrthach san Aigéan Ciúin comhairliúcháin maidir le fomhír (b) a úsáid, agus na héifeachtaí forbartha lena mbaineann agus caomhnú éifeachtach agus bainistiú inbhuanaithe na n‑acmhainní á gcur san áireamh go háirithe agus déanfaidh sé leasú uirthi más iomchuí.    

   (e)    Beidh feidhm ag fomhír (b) gan dochar do bhearta sláintíochta agus fíteashláintíochta atá i bhfeidhm san Aontas, do chaomhnú éifeachtach ná do bhainistiú inbhuanaithe acmhainní iascaigh ná don tacaíocht a thugtar don chomhrac in aghaidh gníomhaíochtaí iascaireachta mídhleathacha, neamhthuairiscithe agus neamhrialaithe sa réigiún.

   (f)    Beidh feidhm ag forálacha na míre seo maidir le hallmhairiúcháin ó Stát san Aigéan Ciúin ón gcéad lá tar éis fógra a bheith foilsithe in Iris Oifigiúil an Aontais Eorpaigh lena gcuirtear in iúl gur thug an Stát lena mbaineann fógra don Choimisiún Eorpach i gcomhréir le fomhír (b).

7.    Beidh feidhm ag míreanna 1 go dtí 6, ach amháin de réir fhorálacha Airteagal 7.

Airteagal 7

Oibríochtaí easpacha oibrithe nó próiseála

1.    Gan dochar do mhír 2, measfar nach leor an t‑oibriú ná an phróiseáil a dhéantar sna hoibríochtaí seo a leanas chun gur féidir stádas táirgí tionscnaimh a thabhairt, bíodh ceanglais Airteagal 6 comhlíonta nó ná bídís:

(a)    oibríochtaí caomhnaithe chun a áirithiú go mbeidh dea-bhail ar na táirgí le linn iompair agus stórála;

(b)    briseadh agus cóimeáil pacáistí;

(c)    ní, glanadh; deannach, ocsaíd, ola, péint nó cumhdaigh eile a bhaint;

(d)    iarnáil nó fáscadh teicstílí;

(e)    oibríochtaí simplí péinteála agus snasúcháin;

(f)    gránaigh agus rís a scileadh, a thuaradh i bpáirt nó ina n‑iomláine, a shnasú agus a ghlónrú;

(g)    oibríochtaí lena ndéantar siúcra a dhathú nó lena ndéantar cnapshiúcra; siúcra gránaithe a mheilt i bpáirt nó ina iomláine;

(h)    torthaí, cnónna agus glasraí a scamhadh, a scilligeadh agus na clocha a bhaint astu;

(i)    géarú, meilt shimplí nó gearradh simplí;

(j)    criathrú, scagadh, sórtáil, aicmiú, grádú, comhoiriúnú (lena n‑áirítear tacair earraí a dhéanamh);

(k)    an táirge a chur go simplí i mbuidéil, i gcannaí, i bhfleascáin, i málaí, i gcásanna, i mboscaí, a dhaingniú ar chartaí nó ar chláir, agus gach oibríocht pacáistithe shimplí eile;

(l)    marcanna, lipéid, suaitheantais agus comharthaí idirdhealaithe den chineál sin a ghreamú de tháirgí nó dá bpacáistíocht nó iad a phriontáil orthu;

(m)    táirgí, a mheascadh go simplí, bídís ina dtáirgí de chineálacha éagsúla nó ná bídís; siúcra a mheascadh le haon ábhar eile;

(n)    codanna d’earraí a chóimeáil go simplí chun earra iomlán a dhéanamh nó táirgí a dhíchóimeáil ina gcodanna;

(o)    teaglaim de dhá cheann nó níos mó de na hoibríochtaí a luaitear go sonrach i bpointí (a) go (n);

(p)    ainmhithe a mharú.

2.    Na hoibríochtaí uile a dhéantar sa Chomhphobal Eorpach nó i Stáit an Aigéin Chiúin ar tháirge áirithe, cuirfear san áireamh iad tráth a chinnfear an bhfuil an t‑oibriú nó an phróiseáil a rinneadh ar an táirge sin easpach de réir bhrí mhír 1.

Airteagal 8

Aonad incháilitheachta

1.    Is é a bheidh san aonad incháilitheachta le haghaidh chur i bhfeidhm fhorálacha an Phrótacail seo an táirge sonrach a meastar gurb é an bunaonad é agus an t‑aicmiú á chinneadh le hainmníocht an Chórais Chomhchuibhithe.

Dá réir sin, fágann sin:

(a)    nuair a dhéantar táirge, ar táirge é atá déanta as grúpa earraí nó as comhthiomsú earraí, a aicmiú faoi aon cheannteideal amháin de réir théarmaí an Chórais Chomhchuibhithe, is é an táirge ina iomláine atá san aonad incháilitheachta;

(b)    nuair is éard atá i gcoinsíneacht líon táirgí comhionanna atá aicmithe faoi aon cheannteideal amháin den Chóras Comhchuibhithe, pléifear le gach táirge ina aonar agus forálacha an Phrótacail seo á gcur i bhfeidhm.

2.    I gcás ina n‑áireofar, de réir Riail Ghinearálta 5 chun Córas Comhchuibhithe a léiriú, an phacáistíocht in éineacht leis an táirge chun críoch aicmithe, áireofar í chun an áit tionscnaimh a chinneadh.

Airteagal 9

Gabhálais, páirteanna breise agus uirlisí

Gabhálais, páirteanna breise agus uirlisí a sheoltar in éineacht le píosa trealaimh, meaisín, fearas nó feithicil, ar cuid den ghnáth‑threalamh iad agus atá ar áireamh i bpraghas an ghnáth‑threalaimh nó nach bhfuil sonrasc ar leith ag gabháil leo, measfar gur cuid den phíosa trealaimh, den inneall, den fhearas nó den fheithicil sin iad.

Airteagal 10

Tacair

Maidir le tacair, mar atá sainmhínithe i Riail Ghinearálta 3 chun an Córas Comhchuibhithe a léiriú, measfar gur tacair thionscnaimh iad más páirteanna tionscnaimh na páirteanna uile iontu. Dá ainneoin sin, nuair atá idir tháirgí tionscnaimh agus táirgí neamhthionscnaimh i dtacar, measfar gur tacar tionscnaimh an tacar ina iomláine, ar choinníoll nach mó luach na dtáirgí neamhthionscnaimh ná 15 % de phraghas an tacair díreach ón monarcha.

Airteagal 11

Eilimintí neodracha

Chun a chinneadh an táirge tionscnaimh é an táirge, ní bheidh sé riachtanach tionscnamh na nithe seo a leanas, ar féidir iad a úsáid le linn an mhonaraithe, a chinneadh:

(a)    fuinneamh agus breosla;

(b)    gléasra agus trealamh;

(c)    meaisíní agus uirlisí;

(d)    earraí nach dtéann isteach agus nach bhfuil ceaptha dul isteach i gcomhdhéanamh deiridh an táirge.

Airteagal 12

Deighilt chuntasaíochta

1.    I gcás ina mbíonn deacrachtaí suntasacha ó thaobh costais nó ábhair de chun stoic d’ábhair ar leithligh, idir ábhair thionscnaimh agus neamhthionscnaimh, a choimeád scartha ó chéile, féadfaidh na húdaráis chustaim, arna iarraidh sin i scríbhinn ag na páirtithe lena mbaineann, an modh ar a dtugtar ‘deighilt chuntasaíochta’ (dá ngairtear an ‘modh’ anseo feasta) a údarú lena úsáid chun na stoic sin a bhainistiú.

2.    Beidh feidhm ag an modh dá dtagraítear i mír 1 freisin maidir le siúcra amh, idir shiúcra amh tionscnaimh agus neamhthionscnaimh, nach bhfuil ábhar breise blaistithe ná dathúcháin curtha leis agus a ndéanfar tuilleadh mínphróiseála air, atá faoi fhotheidil 1701 12, 1701 13, 1701 14 den Chóras Comhchuibhithe, a chumasctar nó a mheasctar go fisiciúil le chéile i Stát san Aigéan Ciúin nó sa Chomhphobal Eorpach sula ndéantar é a onnmhairiú chuig an gComhphobal Eorpach nó chuig na Stáit san Aigéan Ciúin, faoi seach.

3. Áiritheofar leis an modh, tráth ar bith, i dtaca le líon nó cainníocht na dtáirgí a fhaightear a bhféadfaí a mheas gur de thionscnamh an Stáit/na Stát san Aigéan Ciúin nó de thionscnamh an Aontais iad, gurb é an líon nó an chainníocht chéanna é leis an méid a gheofaí dá mbeadh deighilt fhisiciúil idir na stoic.

4. Féadfaidh na húdaráis chustaim deonú an údaráis dá dtagraítear i mír 1 a chur faoi réir aon choinníoll a mheastar a bheith iomchuí.

5. Cuirfear an modh i bhfeidhm agus taifeadfar a chur i bhfeidhm ar bhonn na bprionsabal cuntasaíochta ginearálta is infheidhme sa tír ina monaraíodh an táirge.

6. Féadfaidh tairbhí an mhodha cruthúnas ar thionscnamh a leagan amach nó a iarraidh, de réir mar a bheidh, i dtaobh chainníocht na dtáirgí a measfar a bheith den tionscnamh sin. Soláthróidh an tairbhí ráiteas, arna iarraidh sin ag na húdaráis chustaim, faoin gcaoi ar bainistíodh na cainníochtaí.

7. Is iad na húdaráis chustaim a dhéanfaidh faireachán ar an úsáid a bhaintear as an údarú, agus féadfaidh siad é a tharraingt siar cibé uair a bhaineann an tairbhí úsáid mhíchuí as an údarú ar bhealach ar bith nó aon uair a mhainneoidh sé aon cheann de na coinníollacha eile a leagtar síos sa Phrótacal seo a chomhlíonadh.

8. Chun críocha mhír 1, ciallaíonn ábhair idirmhalartacha ábhair chomhchineáil

agus den cháilíocht tráchtála chéanna, ag a bhfuil na tréithe teicniúla agus fisiciúla céanna, agus nach féidir iad a idirdhealú ó chéile chun críoch tionscnaimh.

TEIDEAL III

CEANGLAIS CHRÍCHE

Airteagal 13

Prionsabal an chríochachais

1.    Ach amháin mar a fhoráiltear in Airteagail 3 agus 4, na coinníollacha a leagtar amach i dTeideal II maidir le stádas tionscnaimh a fháil ní mór iad a chomhlíonadh gan bhriseadh i Stáit an Aigéin Chiúin nó sa Chomhphobal Eorpach.

2.    Ach amháin mar a fhoráiltear in Airteagail 3 agus 4, i gcás ina ndéantar táirgí tionscnaimh a onnmhairíodh ó Stát san Aigéan Ciúin nó ón gComhphobal Eorpach a chur ar ais, ní mór iad a mheas mar tháirgí neamhthionscnaimh, mura féidir an méid seo a leanas a léiriú chun sástacht na n‑údarás custaim:

(a)    gurb iad na hearraí a cuireadh ar ais na hearraí a onnmhairíodh; agus

(b)    nach ndearnadh aon oibríocht orthu thar mar is gá chun bail mhaith a choimeád orthu le linn dóibh bheith sa tír sin nó le linn a n‑onnmhairithe.

Airteagal 14

Neamhathrú

1. Na táirgí tionscnaimh a dhearbhaítear le haghaidh úsáid sa stát i bPáirtí is iad na táirgí céanna iad a onnmhairíodh ón bPáirtí eile ina bhfuair siad stádas tionscnaimh. Ní bheidh athrú ná claochlú déanta ar na hearraí ar aon bhealach ná ní bheidh oibríochtaí déanta orthu ach amháin chun dea-bhail a choinneáil orthu nó chun marcanna, lipéid, séalaí nó aon doiciméad a chur leo nó a ghreamú díobh chun a áirithiú go gcomhlíonfar ceanglais intíre shonracha de chuid an Pháirtí allmhairiúcháin sula ndearbhaítear iad le haghaidh úsáid intíre.

2. Féadfar na táirgí nó na coinsíneachtaí a stóráil i neamh‑Pháirtí ar an gcoinníoll go bhfanfaidh siad faoi mhaoirseacht custaim sa neamh‑Pháirtí sin.

3. Gan dochar d'fhorálacha Theideal V, is féidir deighilt coinsíneachtaí a dhéanamh i gcríoch neamh‑Pháirtí i gcás inarb é t‑onnmhaireoir a dhéanann é nó má dhéantar é faoina fhreagracht chomh fada agus go leanfaidh siad de bheith faoi mhaoirseacht chustaim sa neamh‑Pháirtí.

4. I gcás amhrais go gcomhlíontar na coinníollacha dá bhforáiltear i mír 1 go 3, d’fhéadfadh na húdaráis chustaim iarraidh ar an dearbhóir fianaise ar chomhlíonadh a sholáthar, fianaise is féidir a thabhairt trí mhodh ar bith, lena n‑áirítear doiciméid iompair chonarthacha amhail billí luchta nó fianaise fhíorasach nó nithiúil bunaithe ar mharcáil nó ar uimhriú pacáistí nó aon fhianaise a bhaineann leis na hearraí iad féin.

TEIDEAL IV

CRUTHÚNAS AR THIONSCNAMH

Airteagal 15

Ceanglais ghinearálta

1.    Beidh forálacha an Chomhaontaithe seo ina sochar ag táirgí de thionscnamh Stát san Aigéan Ciúin tráth a allmhaireofar isteach sa Chomhphobail Eorpach iad, agus ag táirgí de thionscnamh an Chomhphobail Eorpaigh tráth a allmhaireofar isteach i Stát san Aigéan Ciúin iad, má chuirtear isteach:

(a)    deimhniú gluaiseachta EUR.1, a bhfuil sampla de in Iarscríbhinn III; nó

(b)    sna cásanna atá sonraithe in Airteagal 20(1), dearbhú, dá ngairtear an "dearbhú sonraisc" anseo feasta, arna thabhairt ag an allmhaireoir ar shonrasc, ar nóta seachadta nó ar aon doiciméad trádála eile ina bhfuil tuairisc ar na táirgí lena mbaineann agus atá mionsonraithe go leor chun iad a shainaithint; tá téacs an dearbhaithe sonraisc in Iarscríbhinn IV.

2.    D'ainneoin mhír 1, beidh an Comhaontú ina sochar ag táirgí tionscnaimh de réir bhrí an Phrótacail seo sna cásanna atá sonraithe in Airteagal 25 gan é a bheith ina cheangal aon cheann de na doiciméid dá dtagraítear thuas a chur isteach.

3. Ar fhógra a fháil sa Choiste Speisialta maidir le Comhar Custaim agus Rialacha Tionscnaimh, beidh cóir fhabhrach taraife ina sochar ag táirgí de thionscnamh Páirtí amháin tráth a allmhaireofar isteach sa Pháirtí eile iad nuair a tharraingeoidh onnmhaireoir, a bheidh cláraithe i gcomhréir le reachtaíocht ábhartha na bPáirtithe, suas dearbhú sonraisc dá bhforáiltear in Airteagal 21. Sonrófar san fhógra nach mbeidh feidhm a thuilleadh ag míreanna 1(a) agus 1 (b).

4.    Chun forálacha an Teidil seo a chur i bhfeidhm, féachfaidh na honnmhaireoirí le teanga atá i gcoiteann ag na Stáit san Aigéan Ciúin agus ag an gComhphobal Eorpach.

Airteagal 16

Nós imeachta maidir le deimhniú gluaiseachta EUR.1 a eisiúint

1.    Eiseoidh údaráis chustaim na tíre allmhairiúcháin deimhniú gluaiseachta EUR.1 ar iarratas i scríbhinn ón allmhaireoir nó, faoi fhreagracht an allmhaireora, óna ionadaí údaraithe.

2.    Chun na críche sin, déanfaidh an t‑onnmhaireoir nó a ionadaí údaraithe an deimhniú gluaiseachta EUR.1 agus an fhoirm iarratais araon a líonadh, nithe a bhfuil samplaí díobh in Iarscríbhinn III. Comhlánófar na foirmeacha sin i gcomhréir le forálacha an Phrótacail seo. Má bhíonn na foirmeacha lámhscríofa, comhlánófar iad le dúch agus i gcarachtair chlóscríofa. Caithfear an tuairisc ar na táirgí a sholáthar sa bhosca atá curtha in áirithe chun na críche sin gan aon líne a fhágáil bán. Mura mbeidh an bosca líonta isteach ina iomláine, ní mór líne chothrománach a tharraingt faoi bhun líne dheireanach na tuairisce agus an spás bán a chrosáil.

3.    Déanfaidh an t‑onnmhaireoir a bhfuil eisiúint deimhniú gluaiseachta EUR.1 a iarraidh aige, aon tráth, ar iarraidh ó údaráis chustaim na tíre onnmhairiúcháin ina n‑eisítear an deimhniú gluaiseachta, na doiciméid iomchuí uile a chur ar fáil ina bhfuil cruthúnas go bhfuil stádas tionscnaimh ag na táirgí lena mbaineann agus gur comhlíonadh na ceanglas eile atá sa Phrótacal seo.

4.    Eiseoidh údaráis chustaim aon Bhallstát den Chomhphobail Eorpach nó aon Stát san Aigéan Ciúin deimhniú gluaiseachta EUR.1 más féidir a mheas gur táirgí de thionscnamh an Chomhphobail Eorpaigh nó aon Stát san Aigéan Ciúin nó de thionscnamh ceann de na tíortha nó na críocha eile dá dtagraítear in Airteagal 3 agus in Airteagal 4 iad na táirgí lena mbaineann agus go gcomhlíonann siad na ceanglais eile atá sa Phrótacal seo.

5.    Glacfaidh na húdaráis chustaim eisiúna aon bheart is gá chun stádas tionscnaimh na dtáirgí agus comhlíonadh cheanglais eile an Phrótacail seo a fhíorú. Chun na críche sin, beidh an ceart acu aon fhianaise a iarraidh agus aon imscrúdú a dhéanamh ar chuntais an onnmhaireora nó tabhairt faoi aon seiceáil eile a mheasfar a bheith iomchuí. Áiritheoidh na húdaráis chustaim a dhéanann an eisiúint gur comhlánaíodh go hiomchuí na foirmeacha dá dtagraítear i mír 2. Go háirithe, seiceálfaidh siad ar líonadh isteach an spás le haghaidh tuairisc ar na táirgí ar bhealach nach féidir cur leis go calaoiseach in aon chor.

6.    Beidh dáta eisiúna an deimhnithe gluaiseachta EUR.1 luaite ar an deimhniú i mBosca 11.

7.    Eiseoidh na húdaráis chustaim deimhniú gluaiseachta EUR.1 agus cuirfear ar fáil don onnmhaireoir é a luaithe a bheidh fíor-onnmhairiú déanta nó áirithithe.

Airteagal 17

Deimhnithe gluaiseachta EUR.1 a eisítear go cúlghabhálach

1.    D'ainneoin Airteagal 16(7), féadfar deimhniú gluaiseachta EUR.1 a eisiúint go heisceachtúil tar éis onnmhairiú na dtáirgí lena mbaineann sé i gcás:

(a)    nár eisíodh é tráth an onnmhairithe de dheasca earráidí nó easnaimh neamhdheonacha nó imthosca speisialta; nó

(b)    go léireofar chun sástacht na n‑údarás custaim gur eisíodh deimhniú gluaiseachta EUR.1 ach nár glacadh é tráth an allmhairithe ar chúiseanna teicniúla.

2.    Chun mír 1 a chur chun feidhme, ní mór don onnmhaireoir a lua ina iarratas áit agus dáta onnmhairiú na dtáirgí a mbaineann an deimhniú gluaiseachta EUR.1 leo agus na cúiseanna atá lena iarraidh.

3.    Ní fhéadfaidh na húdaráis chustaim deimhniú gluaiseachta EUR.1 a eisiúint go cúlghabhálach ach tar éis dóibh a fhíorú go bhfuil an fhaisnéis atá in iarratas an onnmhaireora ag teacht leis an bhfaisnéis sa chomhad a chomhfhreagraíonn don iarratas sin.

4.    Caithfear an friotal seo a leanas i mBéarla a fhormhuiniú le deimhnithe gluaiseachta EUR.1 a eisítear go cúlghabhálach:

"ISSUED RETROSPECTIVELY" [ARNA EISIÚINT GO CÚLGHABHÁLACH]

5.    Cuirfear an formhuiniú dá dtagraítear i mír 4 isteach i mbosca "Nótaí" an deimhnithe gluaiseachta EUR.1.

Airteagal 18

Dúblach de dheimhniú gluaiseachta EUR.1 a eisiúint

1.    I gcás go ngoidfear, go gcaillfear nó go scriosfar deimhniú gluaiseachta EUR.1, féadfaidh an t‑onnmhaireoir iarraidh ar dhúblach a chur isteach chuig na húdaráis chustaim a d'eisigh é, dúblach a tharraingeofar suas ar bhonn na ndoiciméad onnmhairiúcháin ina seilbh.

2.    Ní mór an focal seo a leanas a bheith scríofa i mBéarla mar fhormhuiniú ar an dúblach a eisíodh:

"DUPLICATE" [DÚBLACH]

3.    Cuirfear an formhuiniú dá dtagraítear i mír 2 isteach i mbosca 'Nótaí' an dúblaigh den deimhniú gluaiseachta EUR.1.

4.    Ní mór dáta eisiúna an bhundeimhnithe gluaiseachta EUR.1 a bheith scríofa ar an dúblach agus beidh feidhm aige ón dáta sin ar aghaidh.

Airteagal 19

Deimhnithe gluaiseachta EUR.1 a eisiúint ar bhonn cruthúnais ar thionscnamh a eisíodh nó a tarraingíodh suas roimhe sin

I gcás ina gcuirtear táirgí faoi rialú oifige custaim i Stát san Aigéan Ciúin nó sa Chomhphobal Eorpach, féadfar ceann amháin nó níos mó de dheimhnithe gluaiseachta EUR.1 a úsáid in ionad an bhunchruthúnais ar thionscnamh chun na táirgí sin uile, nó cuid acu, a sheoladh chuig áit eile laistigh de na Stáit san Aigéan Ciúin nó sa Chomhphobal Eorpach. Maidir leis an oifig chustaim a gcuirtear na táirgí faoina rialú, eiseoidh sí deimhniú (nó deimhnithe) gluaiseachta EUR.1 nua, déanfaidh an t‑údarás custaim, a gcuirtear na táirgí faoina rialú, an deimhniú (nó deimhnithe) gluaiseachta a fhormhuiniú.

Airteagal 20

Coinníollacha maidir le dearbhú sonraisc a tharraingt suas

1.    Féadfar leis na daoine seo a leanas dearbhú sonraisc dá dtagraítear in Airteagal 15(1)(b) a tharraingt suas:

(a)    onnmhaireoir ceadaithe de réir bhrí Airteagal 21, nó

(b)    aon onnmhaireoir i gcás aon choinsíneacht arb éard atá inti pacáiste amháin nó níos mó ina bhfuil táirgí tionscnaimh nach mó a luach iomlán ná EUR 6 000.

2.    Féadfar dearbhú sonraisc a tharraingt suas más féidir a mheas gur táirgí de thionscnamh Stát san Aigéan Ciúin nó de thionscnamh an Chomhphobail Eorpaigh nó de thionscnamh ceann de na tíortha nó na críocha eile dá dtagraítear in Airteagail 3 agus 4 iad na táirgí lena mbaineann agus go gcomhlíonann siad ceanglais eile an Phrótacail seo.

3.    Déanfaidh an t‑onnmhaireoir atá ag tarraingt suas dearbhú sonraisc, aon tráth, ar iarraidh ó údaráis chustaim na tíre onnmhairiúcháin, na doiciméid iomchuí uile a chur ar fáil ina bhfuil cruthúnas ar stádas tionscnaimh na dtáirgí lena mbaineann agus ar chomhlíonadh cheanglais eile an Phrótacail seo.

4.    Is é an t‑onnmhaireoir a tharraingeoidh an dearbhú sonraisc suas tríd an dearbhú, a bhfuil a théacs in Iarscríbhinn IV a ghabhann leis an bPrótacal seo, a chlóscríobh, a stampáil nó a phriontáil ar an sonrasc, ar an nóta seachadta nó ar aon doiciméad trádála eile, ag úsáid ceann de na leaganacha i dteanga atá leagtha amach san Iarscríbhinn sin i gcomhréir le forálacha dhlí náisiúnta na tíre onnmhairiúcháin. Má bhíonn an dearbhú lámhscríofa, is le dúch agus i gcarachtair chlóscríofa a dhéanfar sin.

5.    Beidh bunsíniú an onnmhaireora lámhscríofa ar dhearbhuithe sonraisc. Mar sin féin, ní bheidh ar onnmhaireoir atá ceadaithe de réir bhrí Airteagal 21 na dearbhuithe sin a shíniú ar choinníoll go dtugann sé gealltanas i scríbhinn d'údaráis chustaim na tíre onnmhairiúcháin go nglacann sé freagracht iomlán as aon dearbhú sonraisc ar a bhfuil sé aitheanta, mar a bheadh sé sínithe de láimh aige.

6.    Féadfaidh an t‑onnmhaireoir dearbhú sonraisc a tharraingt suas tráth a onnmhaireofar na táirgí a mbaineann sé leo, nó tar éis a n‑onnmhairithe ar choinníoll go dtíolacfar é sa tír onnmhairithe tráth nach déanaí ná dhá bhliain tar éis allmhairiú na dtáirgí a mbaineann sé leo.

Airteagal 21

Onnmhaireoir ceadaithe

1.    Féadfaidh údaráis chustaim na tíre onnmhairiúcháin údarú a thabhairt d'aon onnmhaireoir a sheolann táirgí go minic de réir fhorálacha comhair an Chomhaontaithe le dearbhuithe tionscnaimh a tharraingt suas gan beann ar luach na dtáirgí lena mbaineann. Ní mór d'aon onnmhaireoir a bhfuil údarú den sórt sin uaidh na ráthaíochtaí uile is gá a thabhairt, chun sástacht na n‑údarás custaim, chun a fhíorú go bhfuil stádas tionscnaimh ag na táirgí agus go gcomhlíonann siad na ceanglais eile atá san Iarscríbhinn seo.

2.    Féadfaidh na húdaráis chustaim stádas onnmhaireora cheadaithe a thabhairt faoi réir aon choinníollacha a mheasann siad is iomchuí.

3.    Tabharfaidh na húdaráis chustaim uimhir údarúcháin don onnmhaireoir ceadaithe agus beidh sí le feiceáil ar an dearbhú sonraisc.

4.    Déanfaidh na húdaráis chustaim faireachán ar an úsáid a bhainfidh an t‑onnmhaireoir ceadaithe as an údarú.

5.    Féadfaidh na húdaráis chustaim an t‑údarú sin a aistarraingt aon tráth. Déanfaidh siad sin mura mbeidh an t‑onnmhaireoir ceadaithe ag tabhairt na ráthaíochtaí dá dtagraítear i mír 1 a thuilleadh, mura mbeidh sé ag comhlíonadh na gcoinníollacha dá dtagraítear i mír 2 nó má bhaineann sé úsáid mhícheart as an údarú ar bhealach eile.

Airteagal 22

Bailíocht an chruthúnais ar thionscnamh

1.    Beidh cruthúnas ar thionscnamh bailí go ceann deich mí tar éis dháta a eisiúna sa tír onnmhairiúcháin agus ní mór é a chur faoi bhráid údaráis chustaim na tíre allmhairiúcháin laistigh den tréimhse sin.

2.    Maidir le cruthúnas ar thionscnamh a chuirfear faoi bhráid údaráis chustaim na tíre allmhairiúcháin tar éis an dáta deiridh lena dtíolacadh mar atá sonraithe i mír 1, féadfar iad a ghlacadh chun cóir fhabhrach a thabhairt más de thoradh imthosca eisceachtúla nár cuireadh na doiciméid sin isteach faoin dáta deiridh a bhí socraithe.

3.    I gcásanna eile ina dtíolactar na doiciméid sin go déanach, féadfaidh údaráis chustaim na tíre allmhairiúcháin cruthúnais ar thionscnamh a ghlacadh i gcás inar cuireadh na táirgí isteach roimh an dáta deiridh sin.

Airteagal 23

Cruthúnas ar thionscnamh a chur isteach

Cuirfear cruthúnas ar thionscnamh faoi bhráid údaráis chustaim na tíre allmhairiúcháin i gcomhréir leis na nósanna imeachta is infheidhme sa tír sin. Féadfaidh na húdaráis sin aistriúchán ar chruthúnas ar thionscnamh a éileamh agus féadfaidh siad a éileamh freisin go mbeidh ráiteas ón allmhaireoir ag gabháil leis an dearbhú allmhairiúcháin ina bhfuil sé ráite go gcomhlíonann na táirgí na coinníollacha a éilítear chun an Comhaontú a chur chun feidhme.

Airteagal 24

Allmhairiú i dtráthchodanna

I gcás ina ndéanfar, ar iarraidh ón onnmhaireoir agus faoi na coinníollacha atá leagtha síos ag údaráis chustaim na tíre allmhairiúcháin, táirgí ar táirgí iad atá díchóimeáilte nó neamhchóimeáilte de réir bhrí Riail Ghinearálta 2(a) den Chóras Comhchuibhithe faoi chuimsiú Roinn XVI agus Roinn XVII nó cheannteideal 7308 agus cheannteideal 9406 den Chóras Comhchuibhithe, i gcás ina ndéanfar táirgí den sórt sin a allmhairiú i dtráthchodanna, cuirfear aon chruthúnas ar thionscnamh amháin faoi bhráid na n‑údarás custaim tráth a allmhaireofar an chéad tráthchuid.

Airteagal 25

Díolúintí ó chruthúnas ar thionscnamh

1.    Táirgí a sheolfar ina bpacáistí beaga ó dhaoine príobháideacha chuig daoine príobháideacha nó atá ina gcuid de bhagáiste pearsanta taistealaí, ligfear isteach i gcáil táirgí tionscnaimh iad gan cruthúnas ar thionscnamh a bheith curtha isteach, ar choinníoll nach bhfuil na táirgí sin á n‑allmhairiú lena dtrádáil agus gur dearbhaíodh go gcomhlíonann siad ceanglais an Phrótacail seo agus nach bhfuil aon amhras ann go bhfuil an dearbhú sin fíor. I gcás táirgí a sheoltar tríd an bpost, feadfar an dearbhú sin a dhéanamh ar dhearbhú custaim CN22/CN23 nó ar leathanach páipéir i gceangal leis an doiciméad sin.

2.    Allmhairí atá ócáideach agus nach bhfuil iontu ach táirgí lena n‑úsáid go pearsanta ag na faighteoirí nó na taistealaithe nó a dteaghlach, ní mheasfar gur allmhairí lena dtrádáil iad más léir ar chineál agus ar chainníocht na dtáirgí nach bhfuil aon chríoch thrádála beartaithe dóibh.

3.    Ina theannta sin, ní mó ná EUR 500 luach iomlán na dtáirgí sin i gcás pacáistí beaga, ná EUR 1 200 i gcás táirgí atá ina gcuid de bhagáiste pearsanta taistealaithe.

Airteagal 26

Nós imeachta faisnéise maidir le carnadh

1.    An tráth a chuirfear Airteagal 3(1) agus Airteagal 4(1) i bhfeidhm, beidh deimhniú gluaiseachta EUR.1 nó dearbhú ón soláthraí, a bhfuil sampla de in Iarscríbhinn V A a ghabhann leis an bPrótacal seo, ón onnmhaireoir sa Stát nó sa Chomhphobal Eorpach ónar tháinig na hábhair, ina fhianaise go bhfuil stádas tionscnaimh de réir bhrí an Phrótacail seo ag na hábhair atá ag teacht ó Stát san Aigéan Ciúin, ón gComhphobal Eorpach nó Stát ACC eile, nó ó thír agus críoch thar lear.

2.    An tráth a chuirfear Airteagal 3(4) agus Airteagal 4(4) i bhfeidhm, beidh dearbhú ón soláthraí, a bhfuil sampla de in Iarscríbhinn V B a ghabhann leis an bPrótacal seo, a thabharfaidh an t‑onnmhaireoir sa Stát sin, nó sa Chomhphobal Eorpach, ónar tháinig na hábhair, ina fhianaise ar an oibriú nó ar an bpróiseáil a rinneadh i Stát san Aigéan Ciúin, sa Chomhphobal Eorpach, i Stát eile in ACC nó i dtír agus críoch thar lear.

3.    Tarraingeoidh an soláthraí dearbhú soláthraí suas ar leithligh le haghaidh gach coinsíneacht earraí atá ar an sonrasc tráchtála a bhaineann leis an lastas sin nó in iarscríbhinn a ghabhann leis an sonrasc sin, nó ar nóta seachadta nó doiciméad tráchtála eile a bhaineann leis an lastas sin ina bhfuil tuairisc ar na hábhair lena mbaineann le dóthain mionsonraí inti chun gur féidir iad a shainaithint.

4.    Féadfar an dearbhú soláthraí a tharraingt suas ar fhoirm réamhchlóite.

5.    Beidh bunsíniú an onnmhaireora lámhscríofa ar a dhearbhuithe sonraisc. Mar sin féin, i gcás ina mbunaítear an sonrasc agus an dearbhú soláthraí trí mhodhanna próiseála sonraí leictreonacha, ní gá síniú lámhscríofa an tsoláthraí a bheith ar dhearbhú soláthraí ar choinníoll go mbeidh an t‑oifigeach freagrach sa chuideachta soláthraithe sainaitheanta chun sástacht na n‑údarás custaim sa Stát ina mbunaítear na dearbhuithe soláthraí. Féadfaidh na húdaráis chustaim sin coinníollacha a leagan síos maidir le cur chun feidhme na míre seo.

6.    Cuirfear na dearbhuithe soláthraí isteach chuig na húdaráis chustaim sa tír onnmhairiúcháin ina n‑iarrtar an deimhniú gluaiseachta EUR.1 a eisiúint.

7.    Ní mór don soláthraí a tharraingíonn suas dearbhú gach doiciméad iomchuí a chur isteach, tráth ar bith, ar iarraidh ó údaráis chustaim na tíre ina dtarraingítear suas an dearbhú, lena gcruthaítear go bhfuil an fhaisnéis a thugtar sa dearbhú sin ceart.

8.    Dearbhuithe soláthraí a dtarraingítear, agus deimhnithe faisnéise a eisítear, roimh dháta theacht i bhfeidhm an Phrótacail seo i gcomhréir le hAirteagal 26 de Phrótacal 1 le Comhaontú Cotonou, beidh siad fós bailí.

Airteagal 27

Doiciméid tacaíochta

Doiciméid dá dtagraítear in Airteagal 16(3) agus Airteagal 20(3) a úsáidtear chun a chruthú gur féidir a mheas gur táirgí de thionscnamh Stáit san Aigéan Ciúin, an Chomhphobail Eorpaigh nó de thionscnamh ceann de na tíortha nó na críocha eile dá dtagraítear in Airteagal 3 agus Airteagal 4 iad na táirgí a chumhdaítear le deimhniú gluaiseachta EUR.1 nó le dearbhú sonraisc, agus go gcomhlíonann na táirgí sin na ceanglais eile atá sa Phrótacal seo, féadfar na nithe seo a leanas, inter alia, a bheith i gceist leo:

(a)    fianaise dhíreach ar na próisis a rinne an t‑onnmhaireoir nó an soláthraí chun na hearraí lena mbaineann a fháil, a fhaightear mar shampla ina chuntais nó ina leabharchoimeád inmheánach;

(b)    doiciméid lena gcruthaítear stádas tionscnaimh na n‑ábhar a úsáideadh, a eisíodh nó a tarraingíodh suas i Stát san Aigéan Ciúin, sa Chomhphobal Eorpach nó i gceann de na tíortha nó na críocha eile dá dtagraítear in Airteagal 3 agus in Airteagal 4, i gcás ina n‑úsáidtear na doiciméid sin i gcomhréir leis an dlí náisiúnta;

(c)    doiciméid lena gcruthaítear oibriú nó próiseáil na n‑ábhar i Stát san Aigéan Ciúin, sa Chomhphobal Eorpach nó i gceann de na tíortha nó na críocha eile dá dtagraítear in Airteagal 3 agus in Airteagal 4, a eisítear nó a tharraingítear suas i Stát san Aigéan Ciúin, sa Chomhphobal Eorpach nó i gceann dtíortha nó críocha eile dá dtagraítear in Airteagal 3 agus in Airteagal 4 i gcás ina n‑úsáidtear na doiciméid sin i gcomhréir leis an dlí náisiúnta;

(d)    deimhnithe gluaiseachta EUR.1 nó dearbhuithe sonraisc lena gcruthaítear go bhfuil stádas tionscnaimh ag na hábhair a úsáideadh, a eisíodh nó a tarraingíodh suas i Stát san Aigéan Ciúin, sa Chomhphobal Eorpach nó i gceann de na tíortha nó na críocha eile dá dtagraítear in Airteagal 3 agus Airteagal 4; agus i gcomhréir leis an bPrótacal seo.

Airteagal 28

An cruthúnas ar thionscnamh agus na doiciméid tacaíochta a chaomhnú

1.    An t‑onnmhaireoir a dhéanfaidh iarratas ar dheimhniú gluaiseachta EUR.1, coimeádfaidh sé na doiciméid dá dtagraítear in Airteagal 16(3) ar feadh trí bliana ar a laghad.

2.    An t‑onnmhaireoir a tharraingeoidh suas dearbhú sonraisc, coimeádfaidh sé cóip den dearbhú sonraisc sin maille leis na doiciméid dá dtagraítear in Airteagal 20(3) ar feadh trí bliana ar a laghad.

3.    Coimeádfaidh an soláthraí a tharraingeoidh suas dearbhú soláthraí ar feadh trí bliana ar a laghad cóipeanna den dearbhú agus den sonrasc, nótaí seachadta nó doiciméad tráchtála eile dá gceanglaítear an dearbhú seo leo, chomh maith leis na doiciméid dá dtagraítear in Airteagal 26(7).

4.    Coimeádfaidh údaráis chustaim na tíre onnmhairiúcháin a eisíonn deimhniú gluaiseachta EUR.1 an fhoirm iarratais dá dtagraítear in Airteagal 16(2) ar feadh trí bliana ar a laghad.

5.    Coimeádfaidh údaráis chustaim na tíre allmhairiúcháin ar feadh trí bliana ar a laghad na deimhnithe gluaiseachta EUR.1 agus na dearbhuithe sonraisc a chuirtear isteach chucu.

Airteagal 29

Neamhréitigh agus earráidí foirmiúla

1.    I gcás ina dtiocfar ar neamhréitigh bheaga idir na ráitis a rinneadh sa chruthúnas ar thionscnamh agus na ráitis a rinneadh sna doiciméid a cuireadh isteach chuig an oifig chustaim chun na foirmiúlachtaí a chomhlíonadh maidir leis na táirgí sin a allmhairiú, ní chuirfidh sin an cruthúnas ar thionscnamh ar neamhní ar fad ipso facto má chruthaítear go hiomchuí go bhfreagraíonn an doiciméad sin do na táirgí a cuireadh isteach.

2.    Maidir le hearráidí ar léir gur earráidí foirmiúla iad mar atá earráidí cló ar chruthúnas ar thionscnamh, ní dhiúltófar don doiciméid sin dá ndeasca mura cúis amhrais iad maidir le cruinneas na ráiteas atá sa doiciméad sin.

Airteagal 30

Suimeanna arna sloinneadh in euro

1.    Chun forálacha Airteagal 20(1)(b) agus Airteagal 25(3) a chur i bhfeidhm i gcás ina sonrasctar na táirgí sin in airgeadra seachas euro, maidir le suimeanna in airgeadraí náisiúnta Stáit san Aigéan Ciúin, Bhallstáit an Chomhphobail Eorpaigh agus tíortha nó críoch eile dá dtagraítear in Airteagal 3 Airteagal 4 atá coibhéiseach leis na suimeanna arna sloinneadh in euro, déanfaidh gach tír lena mbaineann na suimeanna sin a shocrú go bliantúil.

2.    Beidh forálacha Airteagal 20(1)(b) nó Airteagal 25(3) ina sochar ag coinsíneacht trí thagairt don airgeadra ina dtarraingeofar suas an sonrasc, de réir na suime a shocraigh an tír lena mbaineann.

3.    Beidh na suimeanna atá le húsáid in aon airgeadra náisiúnta áirithe coibhéiseach san airgeadra sin leis na suimeanna arna sloinneadh in euro an chéad lá oibre de mhí Dheireadh Fómhair. Cuirfear na suimeanna in iúl don Choimisiún Eorpach faoin 15 Deireadh Fómhair agus beidh feidhm acu ón 1 Eanáir na bliana ina dhiaidh sin. Is é an Coimisiún Eorpach a fhógróidh na suimeanna ábhartha sin do na tíortha uile.

4.    An tsuim a thagann mar thoradh ar chomhshó na suime arna sloinneadh in euro isteach ina hairgeadra náisiúnta, féadfaidh tír an tsuim sin a shlánú suas nó síos. Ní ceadmhach difear níos mó ná 5 % a bheith idir an tsuim arna comhshó agus an tsuim arna slánú. Féadfaidh tír an choibhéis ina airgeadra náisiúnta féin den tsuim atá sloinnte in euro a choinneáil má thagann méadú níos lú ná 15 % ar an gcoibhéis ina airgeadra náisiúnta féin as comhshó na suime sin, sula ndéanfar aon slánú uirthi tráth an choigeartaithe bhliantúil dá bhforáiltear i mír 3. Féadfar gan an choibhéis in airgeadra náisiúnta na tíre a athrú más rud é go dtiocfadh laghdú ar an luach coibhéiseach sin de thoradh a comhshóite.

5.    Déanfaidh an Coiste Speisialta maidir le Comhar Custaim agus Rialacha Tionscnaimh na suimeanna arna sloinneadh in euro a athbhreithniú ar iarraidh ón gComhphobal Eorpach nó ó na Stáit san Aigéan Ciúin. Agus an t‑athbhreithniú sin á dhéanamh aige, cuirfidh an Coiste Speisialta maidir le Comhar Custaim agus Rialacha Tionscnaimh san áireamh a inmhianaithe atá sé éifeachtaí na dteorainneacha lena mbaineann a choimeád i dtéarmaí réadacha. Chun na críche sin, féadfaidh sé cinneadh a dhéanamh na suimeanna atá sloinnte in euro a mhodhnú.

TEIDEAL V

SOCRUITHE MAIDIR LE COMHAR RIARACHÁIN

Airteagal 31

Coinníollacha riaracháin maidir le táirgí a thairbheofar den Chomhaontú

1.    Maidir le táirgí de thionscnamh Stát san Aigéan Ciúin nó de thionscnamh an Chomhphobail Eorpaigh de réir bhrí an Phrótacail seo, tráth a dhéanfar dearbhú allmhairiúcháin, beidh cóir fhabhrach ina socair ag na táirgí sin ar choinníoll gur onnmhairíodh iad ar dháta a chomhlíon an tír onnmhairiúcháin na forálacha arna leagan síos i mír 2 nó tar éis an dáta sin.

2.    Cuirfidh na Páirtithe Conarthacha na nithe seo a leanas i bhfeidhm:

(a)    na socruithe náisiúnta agus réigiúnacha riachtanacha is gá chun na rialacha agus nósanna imeachta a leagtar síos sa Phrótacal seo a chur chun feidhme agus a fhorghníomhú, lena n‑áirítear nuair is iomchuí, na socruithe riachtanacha maidir le cur chun feidhme Airteagal 3 agus Airteagal 4;

(b)    na struchtúir agus córais riaracháin is gá chun bainistiú agus rialú iomchuí ar thionscnaimh táirgí agus comhlíonadh leis na coinníollacha eile a leagtar síos sa Phrótacal seo.

Déanfaidh siad na fógraí dá dtagraítear in Airteagal 32.

Airteagal 32

Fógra le haghaidh faisnéise maidir le húdaráis chustaim

1.    Cuirfidh na Stáit san Aigéan Ciúin agus Ballstáit an Chomhphobail Eorpaigh ar fáil dá chéile, trí Choimisiúin na gComhphobal Eorpach, seoltaí na n‑údarás custaim atá freagrach as deimhnithe gluaiseachta EUR.1, dearbhuithe sonraisc nó dearbhuithe soláthraí a eisiúint agus a fhíorú agus as samplacha de stampaí a úsáidtear ina n‑oifigí custaim le haghaidh eisiúint na ndeimhnithe sin.

Glacfar deimhnithe gluaiseachta EUR.1 agus dearbhuithe tionscnaimh nó dearbhuithe soláthraí chun cóir fhabhrach a chur chun feidhme ón dáta a bhfaighidh Coimisiún na gComhphobal Eorpach an fhaisnéis sin.

2.    Cuirfidh na Stáit san Aigéan Ciúin agus Ballstáit an Chomhphobail Eorpaigh in iúl dá chéile láithreach bonn cibé uair a tharlaíonn aon athruithe ar an bhfaisnéis dá dtagraítear i mír 1.

3.    Is faoi údarás rialtas na tíre lena mbaineann a ghníomhóidh na húdaráis dá dtagraítear i mír 1. Beidh na húdaráis a bheidh i gceannas ar rialú agus fíorú ina gcuid d'údaráis rialtasacha na tíre lena mbaineann.

Airteagal 33

Cúnamh frithpháirteach

1.    D'fhonn cur i bhfeidhm cuí an Phrótacail seo a áirithiú, tabharfaidh an Comhphobal Eorpach, na Stáit san Aigéan Ciúin agus na críocha eile dá dtagraítear in Airteagal 3 agus Airteagal 4; cúnamh dá chéile, trí na húdaráis chustaim inniúla, maidir le barántúlacht deimhnithe gluaiseachta EUR.1, dearbhuithe sonraisc nó dearbhuithe soláthraithe agus chruinneas na faisnéise atá sna doiciméid sin a sheiceáil. Déanfaidh na Stáit san Aigéan Ciúin:

(a)    gach comhar is gá a sholáthar don Chomhphobal Eorpach agus dá chéile i gcás iarraidh ar fhaireachán faoi bhainistiú agus rialú ceart an Phrótacail seo sa tír lena mbaineann, lena n‑áirítear cuairteanna ar an toirt;

(b)    i gcomhréir le hAirteagal 34, stádas tionscnaimh na dtáirgí a fhíorú agus comhlíonadh leis na coinníollacha eile a leagtar síos sa Phrótacal seo a fhíorú.

2.    Cuirfidh na húdaráis a rachfar i gcomhairle leo an fhaisnéis ábhartha ar fáil maidir leis na coinníollacha faoina ndearnadh an táirge, faisnéis ina luafar go háirithe na coinníollacha inar urramaíodh na rialacha tionscnaimh sna Stáit éagsúla san Aigéan Ciúin, sa Chomhphobal Eorpach agus sa tíortha eile dá dtagraítear in Airteagal 3 agus Airteagal 4 lena mbaineann.

Airteagal 34

Cruthúnas ar thionscnamh a fhíorú

1.    Is ar bhonn anailíse riosca agus go randamach a thabharfar faoi fhíoruithe iarmhartacha ar chruthúnais ar thionscnamh nó i gcásanna ina mbeidh amhras réasúnta ar údaráis chustaim na tíre allmhairiúcháin faoi bharántúlacht na ndoiciméad sin, faoi stádas tionscnaimh na dtáirgí lena mbaineann nó comhlíonadh na gceanglas eile den Phrótacal seo.

2.    Chun críocha chur chun feidhme fhorálacha mhír 1, cuirfidh údaráis chustaim na tíre allmhairiúcháin ar ais an deimhniú gluaiseachta EUR.1 agus an sonrasc, má cuireadh isteach é, agus an dearbhú sonraisc, nó cóipeanna de na doiciméid sin chuig údaráis chustaim na tíre onnmhairiúcháin agus tabharfaidh siad, más iomchuí, na cúiseanna atá leis an bhfiosrúchán a iarraidh. Aon doiciméid agus aon fhaisnéis a fuarthas ina dtabharfar le fios go bhfuil an fhaisnéis a tugadh sa chruthúnas ar thionscnamh míchruinn, seolfar ar aghaidh iad chun tacú leis an iarraidh ar fhíorú.

3.    Is iad údaráis chustaim na tíre onnmhairiúcháin a dhéanfaidh an fíorú. Chun na críche sin, beidh an ceart acu aon fhianaise a iarraidh agus aon imscrúdú a dhéanamh ar chuntais an onnmhaireora nó tabhairt faoi aon seiceáil eile a mheasfar a bheith iomchuí.

4.    Má chinneann údaráis chustaim na tíre allmhairiúcháin an chóir fhabhrach le haghaidh na dtáirgí lena mbaineann a chur ar fionraí go dtí go dtiocfaidh torthaí an fhíoraithe sin isteach, tairgfear scaoileadh na dtáirgí don allmhaireoir faoi réir aon bhearta réamhchúraim a mheastar a bheith riachtanach.

5.    Cuirfear torthaí an fhíoraithe in iúl do na húdaráis chustaim a d'iarr an fíorú sin a luaithe is féidir. Ní mór leis na torthaí sin a léiriú go soiléir cé acu a bhfuil na doiciméid barántúil nó nach bhfuil agus an féidir a mheas gur táirgí de thionscnamh Stáit san Aigéan Ciúin, an Chomhphobal Eorpaigh, nó de thionscnamh ceann de na tíortha eile dá dtagraítear in Airteagal 3 agus in Airteagal 4, iad na táirgí lena mbaineann agus go gcomhlíonann siad na ceanglais eile atá sa Phrótacal seo.

6.    Más rud é, i gcás ina bhfuil amhras réasúnta ann, nach bhfuarthas aon fhreagra faoi cheann deich mí ó dháta na hiarrata ar fhíorú, nó mura leor an fhaisnéis chun barántúlacht an doiciméid i gceist nó fíorthionscnamh na dtáirgí a chinneadh, déanfaidh na húdaráis chustaim a d'iarr an fíorú, ach amháin i gcúinsí eisceachtúla, teidlíocht ar an gcóir fhabhrach a dhiúltú.

7.    Nuair is cosúil, i bhfianaise an phróisis fíoraithe nó aon fhaisnéis eile a bheidh ar fáil, go bhfuiltear ag sárú fhorálacha an Phrótacail seo, déanfaidh an tír onnmhairiúcháin ar a thionscnamh féin, nó arna iarraidh sin don tír allmhairiúcháin, fiosrúchán iomchuí, nó socruithe chun fiosrúchán den sórt sin a dhéanamh go pras, chun na sáruithe sin a shainaithint agus a chosc, agus chun na gcríoch sin féadfaidh an tír onnmhairiúcháin cuireadh a thabhairt don tír allmhairiúcháin a bheith rannpháirteach sna fíorúcháin sin.

Airteagal 35

Na dearbhuithe soláthraí a fhíorú

1.    Is ar bhonn anailíse riosca agus go randamach a thabharfar faoi fhíoruithe ar dhearbhuithe soláthraí nuair atá amhras réasúnta ar údaráis chustaim na tíre, tír inar cuireadh dearbhuithe den sórt sin san áireamh chun deimhniú gluaiseachta EUR.1 a eisiúint nó chun dearbhú sonraisc a tharraingt suas, ar amhras é faoi bharántúlacht an doiciméid nó faoi chruinneas na faisnéise atá sa doiciméad sin.

2.    Féadfaidh na húdaráis chustaim a gcuirtear dearbhú soláthraí faoina mbráid iarraidh ar údaráis chustaim an Stáit ina ndearnadh an dearbhú deimhniú faisnéise a eisiúint a bhfuil sampla de in Iarscríbhinn VI a gabhann leis an bPrótacal seo. De rogha air sin, féadfaidh na húdaráis deimhnithe a gcuirtear dearbhú soláthraí faoina mbráid iarraidh ar an onnmhaireoir deimhniú faisnéise a léiriú arna eisiúint ag údaráis chustaim an Stáit ina ndearnadh an dearbhú.

Coimeádfaidh an oifig a d'eisigh deimhniú faisnéise cóip den deimhniú sin ar feadh trí bliana ar a laghad.

3.    Cuirfear torthaí an fhíoraithe in iúl do na húdaráis chustaim a d'iarr an fíorú sin a luaithe is féidir. Ní mór a léiriú go soiléir sna torthaí sin cibé an bhfuil an fhaisnéis a thugtar sa dearbhú soláthraí cruinn agus a chur ar chumas na n‑údarás custaim a chinneadh an bhféadfar, agus a mhéid a fhéadfar, an dearbhú sin a chur san áireamh chun deimhniú gluaiseachta EUR.1 a eisiúint nó chun dearbhú sonraisc a tharraingt suas.

4.    Is iad údaráis chustaim na tíre inar tarraingíodh suas an dearbhú soláthraí a dhéanfaidh an fíorú. Chun na críche sin, beidh an ceart acu aon fhianaise a éileamh agus aon imscrúdú a dhéanamh ar chuntais an tsoláthraí nó tabhairt faoi aon seiceáil eile a mheasfaidh siad a bheith iomchuí chun cruinneas an dearbhaithe soláthraí a fhíorú.

5.    Aon deimhniú gluaiseachta EUR.1 nó aon dearbhú sonraisc a eisíodh nó a tarraingíodh suas ar bhonn dearbhú soláthraí a bhí míchruinn, measfar go bhfuil sé ar neamhníar fad.

Airteagal 36

Díospóidí a réiteach

I gcásanna ina n‑éireoidh díospóidí i dtaca leis na nósanna imeachta fíorúcháin a leagtar amach in Airteagal 34 agus in Airteagal 35, ar díospóidí iad nach féidir a shocrú idir na húdaráis chustaim a d’iarr fíorú agus na húdaráis chustaim a bhí freagrach as an bhfíorú sin a chur i gcrích, nó i gcás ina ndéanfaidh siad ceist i dtaobh léiriú an Phrótacail seo a thabhairt ar aird, cuirfear na díospóidí sin faoi bhráid an Choiste Speisialta maidir le Comhar Custaim agus Rialacha Tionscnaimh.

I ngach cás, i dtaca le díospóidí idir an t‑allmhaireoir agus údaráis chustaim na tíre allmhairiúcháin a réiteach, is faoi reachtaíocht na tíre sin a réiteofar na díospóidí sin.

Airteagal 37

Pionóis

Forchuirfear pionóis ar aon duine a tharraingeoidh suas doiciméad, nó a chuirfidh faoi deara doiciméad a tharraingt suas ina bhfaightear faisnéis mhíchruinn chun cóir fhabhrach a fháil do tháirgí.

Airteagal 38

Maoluithe

1.    Féadfaidh an Coiste Speisialta maidir le Comhar Custaim agus Rialacha Tionscnaimh, dá ngairtear "an Coiste" anseo feasta, maoluithe ar an bPrótacal seo a ghlacadh, i gcás ina bhfuil bonn cirt leo de thoradh forbairt tionscal atá ann cheanna nó tionscadal nua sna Stáit san Aigéan Ciúin.

Tabharfaidh na Stáit san Aigéan Ciúin nó na Stáit lena mbaineann, tráth a chuirfidh siad an t‑ábhar faoi bhráid an Choiste nó roimhe sin, fógra don Chomhphobal Eorpach faoina n‑iarraidh ar mhaolú chomh maith leis na cúiseanna leis an iarraidh sin i gcomhréir le mír 2.

Tabharfaidh an Comhphobal Eorpach freagra dearfach ar gach iarraidh ó Stáit san Aigéan Ciúin a bhfuil údar maith léirithe acu i gcomhréir leis an Airteagal seo agus nach féidir mórdhíobháil a dhéanamh do thionscal seanbhunaithe de chuid an Chomhphobail Eorpaigh.

2.    D'fhonn scrúdú na n‑iarrataí ar mhaolú a éascú don Choiste, tabharfaidh an Stát san Aigéan Ciúin nó na Stáit a dhéanfaidh an t‑iarratas, trí bhíthin na foirme arna thabhairt in Iarscríbhinn VII a ghabhann leis an bPrótacal seo, an fhaisnéis ina iomláin is féidir lena gcumhdaítear na pointí a liostaítear thíos:

–    tuairisc ar an táirge críochnaithe,

–    cineál agus cainníocht ábhar de thionscnamh tríú tír,

–    cineál agus cainníocht ábhar de thionscnamh Stát san Aigéan Ciúin nó tíortha nó críoch dá dtagraítear in Airteagal 3 agus Airteagal 4, nó rinneadh na hábhair a phróiseáil ansin,

–    próisis mhonaraíochta,

–    breisluach,

–    an líon fostaithe san fhiontar lena mbaineann,

–    líon ionchasach na n‑onnmhairí chuig an gComhphobal Eorpach,

–    foinsí féideartha soláthair eile le haghaidh amhábhar,

–    na cúiseanna atá leis an ré arna iarraidh i bhfianaise na n‑iarrachtaí a rinneadh chun foinsí nua soláthair,

–    barúlacha eile.

Beidh feidhm ag na rialacha céanna sin i gcás iarrataí ar shíneadh ama.

Féadfaidh an Coiste an fhoirm a mhodhnú.

3.    Leis an scrúdú ar iarrataí, cuirfear an méid seo a leanas san áireamh, go háirithe:

(a)    an leibhéal forbartha nó suíomh geografach an Stáit san Aigéan Ciúin lena mbaineann;

(b)    cásanna ina bhféadfadh cur i bhfeidhm na rialacha tionscnaimh atá ann faoi láthair difear mór a dhéanamh do chumas tionscadail atá ann faoi láthair i Stát san Aigéan Ciúin chun leanúint dá chuid onnmhairí chuig an gComhphobal Eorpach, ag féachaint go sonrach do chásanna ina bhféadfadh scor lena chuid gníomhaíochtaí bheith ann mar thoradh air;

(c)    cásanna sonracha inar féidir a léiriú go soiléir go bhféadfaí infheistíocht shuntasach i dtionscadal a dhíspreagadh leis na rialacha tionscnaimh agus go bhféadfaí na rialacha sin a chomhlíonadh de réir a chéile le maolú lena dtugtar tús áite do chur i gcrích an chláir infheistíochta.

4.    I ngach cás, déanfar scrúdú le fáil amach an bhfuil na rialacha maidir le carnadh tionscnaimh ina réiteach nó nach bhfuil.

5.    Ina theannta sin, déanfar scrúdú ar bhonn na claontachta fabhraí agus ag féachaint go háirithe do na nithe seo a leanas:

(a)    Tionchar eacnamaíoch agus sóisialta an chinnidh a ghlacfar go háirithe i leith fostaíochta;

(b)    an gá leis an maolú a chur i bhfeidhm ar feadh tréimhse lena gcuirtear san áireamh cás áirithe an Stáit san Aigéan lena mbaineann agus a chuid deacrachtaí.

6.    Agus scrúdú á dhéanamh ar iarrataí, tabharfar aird ar leith, de réir an cháis, ar an bhféidearthacht stádas tionscnaimh a thabhairt ar tháirgí lena n‑áirítear a n‑ábhair chomhchodacha de thionscnamh tíortha comharsanacha i mbéal forbartha, tíortha is lú forbairt nó tíortha i mbéal forbartha a bhfuil caidreamh speisialta acu le Stát nó Stáit san Aigéan Ciúin ar choinníoll gur féidir an comhar riaracháin sásúil a bhunú.

7.    Gan dochar do mhíreanna 1 go 6, deonófar an maolú i gcás inarb ionann an breisluach a chuirtear leis na táirgí neamhthionscnaimh a úsáidtear sa Stát san Aigéan Ciúin lena mbaineann agus 45 % ar a laghad de luach an táirge chríochnaithe, ar choinníoll nach maolú é a dhéanfadh mórdhíobháil d'earnáil eacnamaíoch de chuid an Chomhphobail Eorpaigh nó do cheann amháin nó níos mó dá Bhallstáit.

8.    Déanfaidh an Coiste na bearta is gá chun a áirithiú go ndéanfar cinneadh a luaithe is féidir agus, in aon chás, tráth nach déanaí ná 75 lá oibre tar éis do Chomhchathaoirleach CE an Choiste an iarraidh sin a fháil. Mura gcuireann an Comhphobal Eorpach Stát san Aigéan Ciúin ar an eolas faoina sheasamh maidir leis an iarraidh laistigh den tréimhse sin, measfar gur glacadh leis an iarraidh.

9.    (a)    Beidh an maolú bailí ar feadh tréimhse, a mhairfidh cúig bliana go ginearálta, a bheidh le cinneadh ag an gCoiste.

(b)    Féadfar foráil a dhéanamh sa chinneadh maidir le maolú go ndéanfar athnuachaintí gan ghá le cinneadh nua ón gCoiste, ar choinníoll go dtíolacfaidh an Stát nó na Stáit lena mbaineann san Aigéan Ciúin, trí mhí roimh dheireadh gach tréimhse, cruthúnas nach bhfuil sé nó siad fós in ann coinníollacha an Phrótacail seo a ndearnadh maolú orthu a chomhlíonadh.

Má dhéantar aon agóid i gcoinne an tsínidh ama, scrúdóidh an Coiste é a luaithe is féidir agus cinnfidh sé cé acu an maolú a fhadú nó gan é a fhadú. Rachaidh an Coiste ar aghaidh mar a fhoráiltear i mír 8. Déanfar gach beart is gá chun briseadh i gcur i bhfeidhm an mhaolaithe a sheachaint.

(c)    Le linn na dtréimhsí dá dtagraítear i bhfomhír (a) agus i bhfomhír (b), féadfaidh an Coiste athbhreithniú a dhéanamh ar na téarmaí chun an maolú a chur chun feidhme má fhaightear amach go ndearnadh athrú suntasach ar na tosca substainteacha lena rialaítear an cinneadh an maolú a dheonú. Ar a athbhreithniú a thabhairt i gcrích, féadfaidh an Coiste a chinneadh téarmaí a chinnidh maidir le raon feidhme an mhaolaithe nó aon choinníoll eile a leagadh síos roimhe sin a leasú.

Airteagal 39

Coiste Speisialta maidir le Comhar Custaim agus Rialacha Tionscnaimh

1.    Maidir leis an gCoiste Speisialta maidir le Comhar Custaim agus Rialacha Tionscnaimh arna bhunú de bhun Airteagal 68 den Chomhaontú (dá ngairtear ‘an Coiste’ anseo feasta), beidh sé freagrach as cur chun feidhme éifeachtach agus oibriú éifeachtach an Phrótacail seo.

2.    Chun críche an Phrótacail seo, beidh na feidhmeanna seo a leanas, inter alia, ag an gCoiste:

(a)    cinntí a ghlacadh maidir le maoluithe ar an bPrótacal seo, faoi na coinníollacha a leagtar síos in Airteagal 38;

(b)    athbhreithniú agus moltaí cuí a dhéanamh, de réir mar is gá, chuig an gCoiste um Thrádáil maidir leis an méid seo a leanas:

(i)    cur chun feidhme agus oibriú an Phrótacail seo; agus

(ii)    aon leasuithe ar an bhforáil den Phrótacal seo a mholfaidh Páirtí;

Chun na críche sin, cuirfidh an Coiste san áireamh riachtanais forbartha na Stát san Aigéin Chiúin.

   (c)    aon díospóid a thagann chun cinn a réiteach i gcomhréir le hAirteagal 36; agus

(d)    aird a thabhairt ar aon ábhar eile a bhaineann leis an bPrótacal seo de réir mar a chomhaontóidh ionadaithe na bPáirtithe.

3.    Tiocfaidh an Coiste le chéile aon tráth a chomhaontóidh na Páirtithe.

4.    Oifigigh ón Aontas Eorpach agus oifigigh ó na Stáit san Aigéan Ciúin atá freagrach as ábhair chustaim a bheidh ar an gCoiste. Féadfaidh an Coiste saineolas iomchuí a iarraidh nuair is gá.

TEIDEAL VI

CEUTA AGUS MELILLA

Airteagal 40

Coinníollacha speisialta

1.    Ní bheidh Ceuta agus Melilla faoi chumhdach an téarma “Comhphobal Eorpach” agus é in úsáid sa Phrótacal seo. Ní bheidh táirgí ar de thionscnamh Ceuta agus Melilla iad cumhdaithe leis an téarma "táirgí de thionscnaimh an Chomhphobail Eorpaigh".

2.    Beidh feidhm ag forálacha an Phrótacail seo mutatis mutandis chun a chinneadh an bhféadfar a mheas gur de thionscnamh na Stát san Aigéan Ciúin táirgí atá á n‑allmhairiú isteach in Ceuta agus Melilla.

3.    I gcás ina ndéanfar oibriú agus próiseáil i Stát san Aigéan Ciúin ar tháirgí a fuarthas go hiomlán in Ceuta, in Melilla nó sa Chomhphobal Eorpach, measfar go bhfuarthas go hiomlán i Stát san Aigéan Ciúin iad.

4.    Measfar gur i Stát san Aigéan Ciúin a rinneadh an t‑oibriú agus an phróiseáil orthu a rinneadh in Ceuta, in Melilla nó sa Chomhphobal Eorpach, i gcas ina ndéantar oibriú nó próiseáil sa bhreis ar ábhair i Stát san Aigéan Ciúin.

5.    Chun críche mír 3 agus mír 4 a chur chun feidhme, ní mheasfar gur oibriú ná próiseáil iad na hoibríochtaí easpacha a liostaítear in Airteagal 7 den Phrótacal seo.

6.    Measfar gur aon chríoch amháin iad Ceuta agus Melilla.

TEIDEAL VII

FORÁLACHA CRÍOCHNAITHEACHA

Airteagal 41

Athbhreithniú agus cur i bhfeidhm na rialacha tionscnaimh

1.    Féadfaidh an Coiste um Thrádáil a chinneadh forálacha an Phrótacail seo a leasú.

2.    D’ainneoin fhorálacha mhír 1 den Airteagal seo, déanfar an Prótacal seo agus a iarscríbhinní a athbhreithniú gach cúig (5) bliana tar éis don Phrótacal seo teacht i bhfeidhm, d’fhonn aon leasuithe nó oiriúnuithe is gá a dhéanamh. In athbhreithniú den sórt sin, cuirfidh na Páirtithe san áireamh freisin riachtanais forbartha na Stát san Aigéan Ciúin, amhail forbairt teicneolaíochtaí, próiseas táirgthe agus gach toisc eile.

3. Cuirfear chun feidhme na cinntí a glacadh a luaithe is féidir.

Airteagal 42

Iarscríbhinní

Is cuid dhílis den Phrótacal seo iad na hIarscríbhinní a ghabhann leis.

Airteagal 43

Cur chun feidhme an Phrótacail

Déanfaidh an Comhphobal Eorpach agus na Stáit san Aigéan Ciúin na bearta ar fad is gá chun an Prótacal seo a chur chun feidhme.

IARSCRÍBHINN I a ghabhann le Prótacal II

Réamhnótaí a ghabhann leis an liosta in Iarscríbhinn II

Nóta 1:

Leagtar amach sa liosta seo na coinníollacha is gá a chomhlíonadh maidir leis na táirgí go léir chun a mheas an bhfuil siad leoroibrithe nó leorphróiseáilte de réir bhrí Airteagal 6 den Phrótacal.

Nóta 2:

1.    Sa chéad dá cholún den liosta tugtar tuairisc ar an táirge a fuarthas. Tugtar sa chéad cholún uimhir an cheannteidil nó uimhir na caibidle a úsáidtear sa Chóras Comhchuibhithe, agus tugtar sa dara colún tuairisc ar na hearraí a úsáidtear sa chóras sin faoin gceannteideal nó faoin gcaibidil sin. I gcás gach iontrála sa chéad dá cholún sonraítear riail i gcolún 3 nó 4. I gcásanna áirithe ina dtagann “ex” roimh an iontráil sa chéad cholún, ciallaíonn sé sin nach bhfuil feidhm ag na rialacha i gcolún 3 nó 4 ach amháin maidir leis an gcuid den cheannteideal ar a dtugtar tuairisc i gcolún 2.

2.    I gcás ina gcuirtear roinnt uimhreacha ceannteidil le chéile i ngrúpaí i gcolún 1 nó ina dtugtar uimhir chaibidle agus an tuairisc ar na táirgí i gcolún 2 i dtéarmaí ginearálta dá bharr, tá feidhm ag na rialacha atá in aice leo i gcolún 3 nó 4 maidir le gach táirge, faoin gCóras Comhchuibhithe, a aicmítear i gceannteidil na caibidle nó in aon cheann de na ceannteidil atá le chéile i ngrúpaí i gcolún 1.

3.    I gcás ina bhfuil rialacha éagsúla sa liosta a bhfuil feidhm acu maidir le táirgí éagsúla laistigh de cheannteideal, i ngach fleasc tá tuairisc ar an gcuid den cheannteideal atá faoi chumhdach na rialacha atá in aice leo i gcolún 3 nó 4.

4.    Maidir le hiontráil sa chéad dá cholún, i gcás ina sonraítear riail i gcolún 3 agus 4 araon, de rogha air sin, féadfaidh an t‑onnmhaireoir an riail a leagtar amach i gcolún 3 nó an riail a leagtar amach i gcolún 4 a chur i bhfeidhm. Mura dtugtar aon riail maidir le tionscnamh i gcolún 4, ní mór an riail a leagtar amach i gcolún 3 a chur i bhfeidhm.

Nóta 3:

1.    Beidh feidhm ag forálacha Airteagal 6 den Phrótacal maidir le táirgí a bhfuil stádas tionscnaimh bainte amach acu a úsáidtear i monarú táirgí eile, cibé acu laistigh den mhonarcha ina n‑úsáidtear na táirgí sin nó i monarcha eile san Comhphobal Eorpach nó sna Stáit ACC ina baineadh an stádas sin amach.

   Sampla:

Inneall atá faoi cheannteideal Uimh. 8407 nach ceadmhach, de réir na rialach maidir leis, luach na n‑ábhar neamhthionscnaimh a fhéadfar a ionchorprú ann a bheith os cionn 40 % den phraghas díreach ón monarcha, déantar é as “cruach cóimhiotail eile atá múnlaithe go garbh le gaibhniú” atá faoi cheannteideal Uimh. ex 7224.

Más rud é gur gaibhníodh an t‑earra gaibhnithe sin sa Chomhphobal Eorpach ó thinne neamhthionscnaimh, tá stádas tionscnaimh bainte amach aige cheana féin de bhua na rialach maidir le ceannteideal Uimh. ex 7224 sa liosta. Féadfar a chur san áireamh ansin gur de thionscnamh ríomh luacha an innill an t‑earra gaibhnithecibé acu sa mhonarcha chéanna é nó a táirgeadh i monarcha eile sa Chomhphobal Eorpach a táirgeadh é. Ní chuirtear luach an tinne neamhthionscnaimh san áireamh nuair a chuirtear le chéile luach na n‑ábhar neamhthionscnaimh a úsáidtear.

2.    Is éard atá sa riail sa liosta an t‑íosmhéid oibrithe nó próiseála is gá agus má dhéantar tuilleadh oibrithe nó próiseála tugtar stádas tionscnaimh freisin; os a choinne sin, ní thugtar stádas tionscnaimh má dhéantar níos lú oibrithe nó próiseála. Dá bhrí sin, má fhoráiltear le riail go bhféadfar ábhar neamhthionscnaimh de leibhéal áirithe monaraithe a úsáid, ceadaítear an t‑ábhar sin a úsáid ag céim níos luaithe sa mhonarú agus ní cheadaítear an t‑ábhar sin a úsáid ag céim níos déanaí.

3.    Gan dochar do Nóta 3.2 ina bhfuil riail lena sonraítear go bhféadfar “ábhair atá faoi aon cheannteideal” a úsáid, féadfar ábhair atá faoin gceannteideal céanna leis an táirge a úsáid freisin, faoi réir aon srian sonrach a d'fhéadfadh bheith sa riail freisin, áfach. Mar sin féin, ciallaíonn “monarú as ábhair atá faoi aon cheannteideal, lena n‑áirítear ábhair eile atá faoi cheannteideal Uimh. …” nach bhféadfar ach ábhair atá aicmithe in aon cheannteideal leis an táirge a bhfuil a thuairisc éagsúil le tuairisc an táirge a thugtar i gcolún 2 sa liosta a úsáid.

4.    Nuair a shonraítear i riail sa liosta go bhféadfar táirge a mhonarú as níos mó ná aon ábhar amháin, ciallaíonn sé sin go bhféadfar aon ábhar amháin nó níos mó a úsáid. Ní gá na hábhair sin uile a úsáid de réir na rialach sin.

   Sampla:

   Faoi na rialacha maidir le fabraicí atá faoi cheannteidil Uimhreacha 5208 go 5212 foráiltear go bhféadfar snáithíní nádúrtha a úsáid agus go bhféadfar na hábhair cheimiceacha sin, chomh maith le hábhair eile, a úsáid freisin. Ní chiallaíonn sé sin, áfach, nach mór an dá cheann a úsáid; féadfar ceann amháin nó an ceann eile nó an dá cheann a úsáid.

5.    Nuair a shonraítear i riail sa liosta nach mór táirge a mhonarú as ábhar ar leith, go follasach ní chuireann an coinníoll sin cosc ar ábhair eile a úsáid, ábhair nach féidir leo, mar gheall ar a gcineál féin, an coinníoll a chomhlíonadh. (Féach Nóta 6.3 thíos i dtaca le teicstílí).

   Sampla:

   An riail maidir le bianna ullmhaithe atá faoi cheannteideal Uimh. 1904 nach n‑áirítear go sonrach inti úsáid gránach agus a ndíorthach, faoin riail sin níl cosc ar shalainn mhianracha, ceimiceáin agus breiseáin eile nach táirgí iad a tháirgtear as gránaigh a úsáid.

Mar sin féin, níl feidhm aige sin maidir le táirgí is féidir a tháirgeadh as ábhar den chineál céanna le linn céim níos luaithe sa mhonarú, cé nach féidir na táirgí sin a mhonarú as na hábhair ar leith a shonraítear sa liosta.

   Sampla:

I gcás baill éadaigh ó ex Caibidil 62 atá déanta as ábhair neamhfhite, má cheadaítear snáth neamhthionscnaimh a úsáid le haghaidh earra san aicme sin, ní féidir tosú le héadach neamhfhite – fiú mura féidir éadaigh neamhfhite a dhéanamh as snáth go hiondúil. Sna cásanna sin, bheadh an t‑ábhar tosaigh ag an gcéim a thagann roimh an snáth go hiondúil – is í sin an chéim snáithíní.

6.    I gcás riail sa liosta, ina dtugtar dhá chéatadán le haghaidh uasluach na n‑ábhar neamhthionscnaimh is féidir a úsáid, ní fhéadfar na céatadáin sin a chur le chéile. Is é sin le rá, ní fhéadfaidh uasluach na n‑ábhar neamhthionscnaimh go léir a úsáidtear a bheith níos mó ná an céatadán is airde a tugadh. Anuas air sin, ní mór gan na céatadáin aonair a shárú i dtaca leis na hábhair ar leith a bhfuil feidhm acu maidir leo.

Nóta 4:

1.    Úsáidtear an téarma “snáithíní nádúrtha” sa liosta chun tagairt do na snáithíní nach snáithíní saorga ná sintéiseacha iad. Tá sé teoranta do na céimeanna a thugtar sula ndéantar an sníomh, lena n‑áirítear dramhaíl, agus, mura sonraítear a mhalairt, áirítear leis snáithíní cardáilte, cíortha nó próiseáilte ar shlí eile ach nach bhfuil sníofa.

2.    Áirítear leis an téarma “snáithíní nádúrtha” rón atá faoi cheannteideal Uimh. 0503, síoda atá faoi cheannteidil Uimhreacha 5002 agus 5003 chomh maith leis na snáithíní olla agus fionnadh ainmhíoch mín nó garbh atá faoi cheannteidil Uimhreacha 5101 go ceannteideal 5105, na snáithíní cadáis atá faoi cheannteidil Uimhreacha 5201 go 5203 agus snáithíní plandúla eile atá faoi cheannteidil 5301 go 5305.

3.    Úsáidtear na téarmaí “laíon teicstíle”, “ábhair cheimiceacha” agus “ábhair déanta páipéir” sa liosta chun tuairisc a thabhairt ar na hábhair nach n‑aicmítear i gCaibidlí 50 go 63, ábhair is féidir a úsáid chun snáithíní nó snáth saorga, sintéiseach nó páipéir a mhonarú.

4.    Úsáidtear an téarma “snáithíní stáplacha de dhéantús an duine” sa liosta chun tagairt do bharrach filiméadach, snáithíní stáplacha nó dramhaíl atá sintéiseach nó saorga, atá faoi cheannteidil Uimhreacha 5501 go 5507.

Nóta 5:

1.    I gcás ina ndéanfar tagairt don nóta seo, le haghaidh táirge áirithe sa liosta, ní chuirfear na coinníollacha a leagtar amach i gcolún 3 i bhfeidhm maidir le haon ábhar teicstíle bunúsach a úsáidtear le linn mhonarú an táirge sin, arb ionann iad, nuair a chuirtear le chéile iad, agus 10 % nó níos lú de mheáchan iomlán na n‑ábhar teicstíle bunúsach go léir a úsáidtear. (Féach Nótaí 5.3 agus 5.4 freisin).

2.    Mar sin féin, ní féidir an lamháltas a luaitear i Nóta 5.1 a chur i bhfeidhm ach amháin maidir le táirgí measctha a rinneadh as dhá cheann nó níos mó d'ábhair theicstíle bhunúsacha.

   Is iad seo a leanas na hábhair theicstíle bhunúsacha:

   –    síoda,

   –    olann,

   –    fionnadh ainmhíoch garbh,

   –    fionnadh ainmhíoch mín,

   –    rón,

   –    cadás,

   –    ábhair déanta páipéir agus páipéar,

   –    líon,

   –    fíorchnáib,

   –    siúit agus snáithíní bealaithe teicstíle eile,

   –    siseal agus snáithíní teicstíle eile den ghéineas Agave,

   –    cnó cócó, abacá, ráimí agus snáithíní teicstíle plandúla eile,

   –    filiméid shintéiseacha de dhéantús an duine,

   –    filiméid de dhéantús an duine,

   –    filiméid seolta srutha,

   –    snáithíní stáplacha sintéiseacha polapróipiléine de dhéantús an duine,

   –    snáithíní stáplacha sintéiseacha poileistir de dhéantús an duine,

   –    snáithíní stáplacha sintéiseacha polaimíde de dhéantús an duine,

   –    snáithíní stáplacha sintéiseacha polaicrilinítríle de dhéantús an duine,

   –    snáithíní stáplacha sintéiseacha poilimíde de dhéantús an duine,

   –    snáithíní stáplacha sintéiseacha polaiteitreafluaireitiléine de dhéantús an duine,

   –    snáithíní stáplacha sintéiseacha suilfíde polaifeiniléine de dhéantús an duine,

   –    snáithíní stáplacha sintéiseacha clóiríde polaivinile de dhéantús an duine,

   –    snáithíní stáplacha sintéiseacha eile de dhéantús an duine,

   –    snáithíní stáplacha saorga vioscóis de dhéantús an duine,

   –    snáithíní stáplacha saorga eile de dhéantús an duine,

   –    snáth atá déanta as polúireatán atá deighilte le deighleoga solúbtha poiléitir, bídís galúnaithe nó ná bídís,

   –    snáth atá déanta as polúireatán atá deighilte le deighleoga solúbtha poileistir, bídís galúnaithe nó ná bídís,

   –    táirgí atá faoi cheannteideal Uimh. 5605 (snáth miotalaithe) ina n‑ionchorpraítear stiall ina bhfuil lár de scragall alúmanaim nó lár de scannán plaisteach, bíodh sé brataithe le púdar alúmanaim nó ná bíodh, nach mó ná 5 mm ar leithead, atá cisealaithe trí bhíthin greamachán trédhearcach nó daite idir dhá shraith de scannán plaisteach,

   –    táirgí eile atá faoi cheannteideal Uimh. 5605.

   Sampla:

   Is snáth measctha snáth atá faoi cheannteideal Uimh. 5205 atá déanta as snáithíní cadáis atá faoi cheannteideal Uimh. 5203 agus snáithíní stáplacha sintéiseacha atá faoi cheannteideal Uimh. 5506. Dá bhrí sin, snáithíní stáplacha sintéiseacha neamhthionscnaimh nach gcomhlíonann na rialacha maidir le tionscnamh (faoi na rialacha sin ní cheadaítear ach monarú as ábhair cheimiceacha nó laíon teicstíle), féadfar iad a úsáid suas le meáchan arb ionann é agus 10 % den snáth.

   Sampla:

   Is fabraic mheasctha fabraic olla atá faoi cheannteideal 5112 atá déanta as snáth olla atá faoi cheannteideal 5107 agus snáth sintéiseach as snáithíní stáplacha atá faoi cheannteideal 5509. Dá bhrí sin, snáth sintéiseach nach gcomhlíonann na rialacha maidir le tionscnamh (faoi na rialacha sin ní mór monarú as ábhair cheimiceacha nó laíon teicstíle) nó snáth olla nach gcomhlíonann na rialacha maidir le tionscnamh (faoi na rialacha sin ní mór monarú as snáithíní nádúrtha, nach bhfuil cardáilte, cíortha ná ullmhaithe ar shlí eile lena sníomh) nó teaglaim den dá cheann, féadfar iad a úsáid ar choinníoll nach mó ná 10 % de mheáchan na fabraice a meáchan iomlán.

   Sampla:

   Fabraic teicstíle dhosach atá faoi cheannteideal Uimh. 5802 atá déanta as snáth cadáis atá faoi cheannteideal Uimh. 5205 agus fabraic chadáis atá faoi cheannteideal Uimh. 5210, ní táirge measctha í ach amháin más fabraic mheasctha an fhabraic chadáis féin agus í déanta as snáth atá aicmithe faoi dhá cheannteideal ar leith nó más meascáin na snáthanna cadáis féin a úsáidtear.

   Sampla:

   Dá mba rud é go ndearnadh an fhabraic teicstíle dhosach as snáth cadáis atá faoi cheannteideal Uimh. 5205 agus fabraic shintéiseach atá faoi cheannteideal Uimh. 5407, is dhá ábhar teicstíle bhunúsacha an tsnátha a úsáidtear dá bhrí sin ar ndóigh agus is táirge measctha an fhabraic teicstíle stothach dá réir.

3.    I gcás na dtáirgí ina n‑ionchorpraítear “snáth atá déanta as polúireatán atá deighilte le deighleoga solúbtha poileistir, bídís galúnaithe nó ná bídís”, is ionann an lamháltas sin agus 20 % i ndáil leis an snáth sin.

4.    I gcás na dtáirgí ina n‑ionchorpraítear “stiall ina bhfuil lár de scragall alúmanaim nó lár de scannán plaisteach, bíodh sé brataithe le púdar alúmanaim nó ná bíodh, nach bhfuil níos mó ná 5 mm ar leithead, atá cisealaithe trí bhíthin greamacháin idir dhá shraith de scannán plaisteach”, is ionann an lamháltas sin agus 30 % i ndáil leis an stiall sin.

Nóta 6:

1.    I gcás na dtáirgí teicstíle sin, atá marcáilte sa liosta le fonóta a thagraíonn don Réamhnóta seo, ciumhsóga agus gabhálais teicstíle nach gcomhlíonann an riail a leagtar amach sa liosta i gcolún 3 maidir leis na táirgí comhdhéanta lena mbaineann, féadfar iad a úsáid ar choinníoll nach mó ná 10 % de mheáchan iomlán na n‑ábhar teicstíle go léir atá ionchorpraithe a meáchan.

   Tá na ciumhsóga agus gabhálais teicstíle sin aicmithe i gCaibidlí 50 go 63. Níltear le breathnú ar idirlíneálacha agus idirlíneálacha mar chiumhsóga ná gabhálais.

2.    Aon chiumhsóg nó gabhálas neamhtheicstíle nó ábhar eile a úsáidtear ina bhfuil teicstílí, ní cheanglaítear go gcomhlíonfaidh siad na coinníollacha a leagtar amach i gcolún 3 cé nach dtagann siad faoi raon feidhme Nóta 3.5.

3.    I gcomhréir le Nóta 3.5, aon chiumhsóga nó gabhálais neamhtheicstíle neamhthionscnaimh nó táirge eile nach bhfuil aon teicstílí ann, féadfar iad a úsáid gan bhac ar aon chaoi i gcás nach féidir iad a dhéanamh as na hábhair a liostaítear i gcolún 3.

   Mar shampla, 2 i gcás nach mór snáth a úsáid le haghaidh earra teicstíle ar leith, amhail blús, de réir riail sa liosta, ní hionann sin agus cosc a bheith ar úsáid earraí miotail, amhail cnaipí, mar ní féidir iad a dhéanamh as ábhair theicstíle.

4.    I gcás ina bhfuil feidhm ag riail chéatadánach, ní mór luach na gciumhsóg agus na ngabhálas a chur san áireamh agus luach na n‑ábhar neamhthionscnaimh atá ionchorpraithe á ríomh.

Nóta 7:

1.    Chun críocha cheannteidil Uimhreacha ex 2707, 2713 go 2715, ex 2901, ex 2902 agus ex 3403, is iad seo a leanas na “próisis shonracha”:

(a)    driogadh folúis;

(b)    athdhriogadh trí bhíthin próiseas codánúcháin atá an‑chuimsitheach 3 ;

(c)    scoilteadh;

(d)    athfhoirmiú;

(e)    eastóscadh trí bhíthin tuaslagóirí roghnaitheacha;

(f)    an próiseas a chuimsíonn na hoibríochtaí seo a leanas uile: próiseáil le haigéad sulfarach tiubhaithe, oiléam nó ainhidríd shulfarach; neodrú le hoibreáin alcaileacha; tuaradh agus íonú le cré atá gníomhach go nádúrtha, cré ghníomhachtaithe, fioghual gníomhachtaithe nó báicsít;

(g)    polaiméiriú;

(h)    ailciliú;

(i)    isiméiriú.

2.    Chun críocha cheannteidil Uimhreacha 2710, 2711 agus 2712, is iad seo a leanas na “próisis shonracha”:

(a)    driogadh folúis;

(b)    athdhriogadh trí bhíthin próiseas codánúcháin atá an‑chuimsitheach 4 ;

(c)    scoilteadh;

(d)    athfhoirmiú;

(e)    eastóscadh trí bhíthin tuaslagóirí roghnaitheacha;

(f)    an próiseas a chuimsíonn na hoibríochtaí seo a leanas uile: próiseáil le haigéad sulfarach tiubhaithe, oiléam nó ainhidríd shulfarach; neodrú le hoibreáin alcaileacha; tuaradh agus íonú le cré atá gníomhach go nádúrtha, cré ghníomhachtaithe, fioghual gníomhachtaithe nó báicsít;

(g)    polaiméiriú;

(h)    ailciliú;

(i)    isiméiriú;

(j)    maidir le holaí troma a thagann faoi cheannteideal Uimh. ex 2710 agus faoin gceannteideal sin amháin, díshulfarú le hidrigin arb é an toradh atá air laghdú 85 % ar a laghad ar chion sulfair na dtáirgí a próiseáladh (modh ASTM D 1266-59 T);

(k)    maidir leis na táirgí a thagann faoi cheannteideal Uimh. 2710 agus faoin gceannteideal sin amháin, díphairifíniú trí bhíthin próiseas nach scagadh é;

(l)    maidir le holaí troma a thagann faoi cheannteideal Uimh. ex 2710 agus faoin gceannteideal sin amháin, cóireáil le hidrigin faoi bhrú is mó ná 20 bar agus ag teocht is airde ná 250 °C agus catalaíoch in úsáid, seachas chun difear a dhéanamh don díshulfarú, nuair is eilimint ghníomhach an hidrigin in imoibriú ceimiceach. Cóireáil bhreise le hidrigin ar olaí bealaithe atá faoi cheannteideal Uimh. ex 2710 (e.g. hidrea-bhailchríochnú nó tuaradh), go háirithe chun dath nó seasmhacht a fheabhsú, ní mheasfar gur próiseas sonrach an chóireáil sin;

(m)    maidir le holaí breosla a thagann faoi cheannteideal Uimh. ex 2710 agus faoin gceannteideal sin amháin, driogadh atmaisféarach, ar choinníoll go ndriogann níos lú ná 30 % de na táirgí sin, de réir toirte, lena n‑áirítear caillteanais, ag 300 °C de réir mhodh ASTM D 86;

(n)    maidir le holaí troma seachas olaí gáis agus olaí breosla a thagann faoi cheannteideal Uimh. ex 2710 agus faoin gceannteideal sin amháin, cóireáil trí bhíthin scuab-dhíluchtú leictreach ardmhinicíochta.

3.    Chun críocha cheannteidil Uimhreacha ex 2707, 2713 go 2715, ex 2901, ex 2902 agus ex 3403, oibríochtaí simplí amhail glanadh, scinceáil, díshailleadh, deighilt uisce, scagadh, dathú, marcáil, cion sulfair a bhaint amach trí tháirgí nach ionann a gcion sulfair a mheascadh; ní thugtar stádas tionscnaimh de bharr na n‑oibríochtaí sin ná de bharr aon teaglaim díobh nó d’oibríochtaí comhchosúla.

IARSCRÍBHINN II a ghabhann le Prótacal II

Liosta den oibriú nó den phróiseáil is gá a dhéanamh ar ábhair neamhthionscnaimh chun go dtabharfar an stádas ‘táirge tionscnaimh’ don táirge monaraithe

Féadfaidh sé nach bhfuil na táirgí uile a luaitear sa liosta cumhdaithe ag an gComhaontú. Is gá dá bhrí sin na codanna eile den Chomhaontú seo a cheadú.