Bileog Achoimre Feidhmiúcháin

Measúnú tionchair ar Athbhreithniú an Aontais ar an mBeartas maidir le Rialú ar Onnmhairiú

A. An gá le beart

Cén fáth? Cad í an fhadhb a bhfuiltear ag díriú uirthi?

Níl an córas rialaithe don onnmhairiú atá ag an Aontas Eorpach faoi láthair curtha in oiriúint go hiomlán le coinneáil suas leis na rioscaí slándála, idir cinn nua agus cinn atá ag teacht chun cinn, ná leis na forbairtí teicniúla agus eolaíocha atá ag tarlú go tapa agus na hathruithe móra ar phróisis thrádála agus eacnamaíocha. Ina theannta sin, faoin gcóras atá ann faoi láthair, ní chuirtear san áireamh an trádáil atá ag teacht chun cinn sa teicneolaíocht don chibearfhaireachas agus na rioscaí a bhaineann leis an teicneolaíocht sin don tslándáil idirnáisiúnta agus do chearta an duine. Ón thaobh na heacnamaíochta de, leagann an córas ualach trom riaracháin ar lucht tionscail agus ar na húdaráis araon, agus níl deimhneacht dhlíthiúil ag baint leis uaireanta. Lena chois sin, i ngeall ar éagsúlachtaí sa chaoi a mbaintear léirmhíniú as an gcóras agus sa chaoi a gcuirtear i bhfeidhm sna Ballstáit é, tá sé á chur chun feidhme ar bhealach neamhshiméadrach agus cruthaíonn sé saobhadh iomaíochta laistigh den Mhargadh Aonair. Tá tionchar ag an bhfadhb ar go leor oibreoirí eacnamaíocha éagsúla i roinnt mhaith tionscail, FBManna san áireamh, agus tagann na gnéithe a bhaineann le slándáil agus le cearta an duine i gceist i dtaca le grúpaí sonracha, amhail easaontaigh agus gníomhaithe i dtríú tíortha, agus i dtaca le daonra aon Aontais ina iomláine freisin.

Cad leis a bhfuiltear ag súil ón tionscnamh seo?

Tá sé mar aidhm ag athbhreithniú an Aontais ar an mbeartas maidir le rialú ar onnmhairiú tacú le cuspóirí beartais foriomlána an Aontais, mar a leagtar amach in Airteagal 3 CAE i.e. "rannchuidiú leis an tsíocháin agus leis an tslándáil, chomh maith leis an tsaorthrádáil chóir agus le cearta an duine a chosaint". Is iad seo a leanas na cuspóirí sonracha beartais: dul in oiriúint do rioscaí agus bagairtí slándála atá ag síorathrú; dul in oiriúint do na forbairtí teicniúla agus eolaíocha atá ag tarlú go tapa; onnmhairiú na teicneolaíochta cibearfhaireachais, de shárú ar chearta an duine, a chosc; saobhadh iomaíochta agus costais riaracháin laistigh den Mhargadh Aonair a laghdú; cothrom iomaíochta domhanda a bhaint amach; a áirithiú go gcuirtear rialuithe i bhfeidhm ar bhealach éifeachtach comhsheasmhach san Aontas Eorpach.

Cad é an breisluach atá le beart ar leibhéal an Aontais?

Is cuid den Chomhbheartas Tráchtála iad na rialuithe ar onnmhairiú ítimí déúsáide. Tá an ceart ag an Aontas Eorpach gníomhú dá réir sin, bunaithe ar inniúlacht eisiach faoi Airteagal 207 CFAE. Ní féidir na cuspóirí a bhaint amach ach le gníomhaíocht ón Aontas Eorpach lena ndéantar a áirithiú go mbeidh na húdaráis inniúla ag dul i mbun dlúthchomhar le chéile agus ag cur na rialuithe i bhfeidhm ar bhealach comhsheasmhach. Tá gá le hidirghabháil ón Aontas freisin chun deireadh a chur le haon saobhadh iomaíochta laistigh den Mhargadh Aonair, agus chun idirphlé a chur chun cinn leis na comhpháirtithe trádála is tábhachtaí chun cothrom iomaíochta domhanda a bhaint amach. Tá gá le beart freisin chun na cearta bunúsacha atá cumhdaithe i gCairt um Chearta Bunúsacha an Aontais Eorpaigh a chosaint. Tá na roghanna a aithníodh san athbhreithniú ag teacht le prionsabail na comhréireachta sa mhéid agus go bhfuil siad teoranta don mhéid atá riachtanach chun na cuspóirí a bhaint amach.

B. Réitigh

Cad iad na roghanna beartais reachtacha agus neamhreachtacha a rinneadh a mheas? An bhfuil rogha tosaíochta ann nó nach bhfuil? Cén fáth?

I bhfianaise na dtionscnamh atá beartaithe i dTeachtaireacht (2014)244 ón gCoimisiún, aithníodh cúig rogha, idir an cás bonnlíne (gan an beartas a athrú) go athchóiriú ó bhonn agus comhchuibhiú iomlán ar an gcóras rialaithe don onnmhairiú.

Rinneadh anailís chríochnúil chun measúnú a dhéanamh ar thionchar na roghanna éagsúla san athbhreithniú. Cuireadh Rogha 2 (Tacaíocht don Chur Chun Feidhme agus don Fhorfheidhmiú), Rogha 3 (Uasghrádú ar Chóras an Aontais Eorpaigh) agus Rogha 4 (Nuachóiriú ar Chóras an Aontais Eorpaigh) i gcomparáid le Rogha 1 – an bonnlíne. Bhí an measúnú bunaithe ar anailís agus taithí praiticiúil sheirbhísí an Choimisiúin féin, ar shonraí agus ionchur a sholáthair na Ballstáit, ar na torthaí ar staidéar seachtrach bailithe sonraí agus ar na torthaí ar na comhairliúcháin le geallsealbhóirí. Chuir na Ballstáit agus na geallsealbhóirí go mór i gcoinne an cúigiú rogha ann (Athchóiriú iomlán ar Chóras an Aontais Eorpaigh), faoina ndéanfaí athrú ó bhonn ar chur chuige an Aontais Eorpaigh i leith rialuithe ar onnmhairiú, dá bhrí sin ní dhearnadh measúnú breise air.

Is í rogha 3 an rogha is éifeachtúla agus is éifeachtaí i bhfianaise na gcritéar eacnamaíoch agus chritéir an tionchair slándála. Is léir, áfach, go bhfuil rogha 4 riachtanach chun an cuspóir i dtaca le sáruithe ar chearta an duine, ar easpa rialuithe oiriúnacha ar theicneolaíocht chibearfhaireachais is cúis leo, a chosc. Dá bhrí sin is meascán de rogha 3 agus rogha 4 le chéile 'rogha na tosaíochta'.

Cé atá i bhfách le cén rogha?

D'aithin na Ballstáit, Parlaimint na hEorpa, lucht tionscail agus an tsochaí shibhialta an gá le nuachóiriú a dhéanamh ar an gcóras rialaithe ar onnmhairiú mar a mholtar, go leathan, faoi rogha 2 agus rogha 3, cé go bhfuil éagsúlachtaí sna seasaimh atá acu uaireanta i dtaca le saincheisteanna.

Bhí Parlaimint na hEorpa agus an tsochaí shibhialta i bhfabhar gníomhaíocht láidir ón Aontas Eorpach chun onnmhairiú na teicneolaíochta cibearfhaireachais a rialú (Rogha 4). D'aithin an Coimisiúin agus an Chomhairle an gá le gníomhaíocht ón Aontas Eorpach ar an ábhar seo.

C. Tionchair rogha na tosaíochta

Cad iad sochair rogha na tosaíochta (más ann do rogha na tosaíochta, murab ann di cad iad na príomhshochair)?

Toisc nach bhfuil aon staitisticí oifigiúla ann maidir le táirgeadh ítimí déúsáide ná trádáil ítimí déúsáide, agus go mbaineann sonraí cainníochtúla, go bunúsach, le luach agus méid an cheadúnaithe, bhí an measúnú ar na tionchair a bhaineann le gníomhartha sonracha bunaithe, cuid mhór, ar anailís cháilíochtúil.

Díríonn rogha 3 ar an nuachóiriú ar na forálacha rialála atá ann cheana. Cuidíonn an rogha sin leis na cuspóirí is sonraí agus is í is oiriúnaí chun dul chun cinn suntasach a bhaint amach i dtaca leis na cuspóirí ginearálta, seachas an ceann a bhaineann le cearta an duine a chosaint. Bheadh laghdú ar an ualach riaracháin ar onnmhaireoirí agus ar na húdaráis mar thoradh uirthi, agus d'fheabhsódh sí soiléireacht na bpríomhfhorálacha dlí ag an am céanna. Mhéadódh sí éifeachtacht agus comhleanúnachas na rialuithe ar fud an Aontais freisin agus dá bhrí sin d'fheabhsódh sí an tslándáil, agus chuirfí cothrom iomaíochta níos fearr le hiomaitheoirí domhanda chun cinn.

Thabharfadh rogha 4 aghaidh ar scaipeadh na dteicneolaíochtaí cibearfhaireachais sin ar baol don tslándáil idirnáisiúnta agus do chearta an duine é míúsáid a bhaint astu. Dhéanfaí foráil maidir le sásraí láidre solúbtha do rialú na dteicneolaíochtaí sin faoin rogha sin agus is féidir a bheith ag súil leis go mbeadh mórthionchar dearfach ar an tslándáil agus ar chearta an duine.

Cad iad costais rogha na tosaíochta (más ann do rogha na tosaíochta, murab ann di cad iad na príomhshochair)?

Bheadh costais riaracháin bhreise eatramhacha áirithe i gceist d'údaráis na mBallstát sa ghearrthéarma faoi rogha 3, costais a chúiteofaí, áfach, trí mhéadú ar éifeachtacht agus laghdú ar na costais riaracháin nuair a bheidh na forálacha nua curtha i bhfeidhm. I gás oibreoirí, ba cheart go mbeadh laghdú ar chostais riaracháin mar thoradh ar rogha 3.

Faoi rogha 4, d'fhéadfadh ualach riaracháin níos mó a bheith ann ar oibreoirí agus ar na údaráis, ar an leibhéal náisiúnta agus ar leibhéal an Aontais Eorpaigh araon, toisc go mbeadh leibhéal nua rialaithe ann. D'fhéadfadh sé saobhadh ar iomaíocht a chruthú ar an leibhéal domhanda freisin, toisc nach féidir a áirithiú go ndéanfadh na príomhsholáthraithe teicneolaíochta eile (e.g. an tSín, SAM) rialuithe ar an dul céanna a thabhairt isteach. Sa mhéid agus go mbeadh rogha 4 ag díriú ar theicneolaíochtaí ansonrach, bheadh an tionchar diúltach eacnamaíoch teoranta do thionscal speisialaithe a bhfuil méid beag trádála i gceist leis.

Cén difear a dhéanfar do ghnólachtaí, do FBManna agus do mhicrifhiontair?

Baineann rialuithe ar onnmhairiú ítimí déúsáide le raon leathan gnólachtaí thar earnálacha éagsúla, lena náirítear onnmhairithe agus monaróirí, inter alia, sna hearnálacha fuinnimh, aeraspáis, cosanta agus slándála, iompair agus loingseoireachta, teileachumarsáide, leictreonaice, leathsheoltóirí agus ríomhaireachta. Tá roinnt FMBanna gníomhach san earnáil. Mar léiriú air sin, i dtionscal na cosanta (tionscal a thairgeann ítimí déúsáide freisin), sa bhliain 2012, ba gnóthais a raibh níos lú ná 10 bhfostaí acu 76.7 % de líon iomlán na ngnóthas.

D'aontaigh formhór na bhfreagróirí sa chomhairliúchán poiblí gur "dócha go mbeadh sé níos éasca ag FMBanna ítimí déúsáide a onnmhairiú" faoin athbhreithniú ar an mbeartas rialaithe ar onnmhairiú. Ní bheidh tionchar ar gheallsealbhóirí tionscail ag na hathruithe ar na rialuithe ar onnmhairiú ach sa mhéid agus go mbeadh feidhm acu maidir leis na hítimí déúsáide a bhíonn á dtrádáil acu, rud atá tábhachtach.

An mbeidh tionchar suntasach ar bhuiséid náisiúnta agus ar údaráis riaracháin náisiúnta?

Táthar ag súil leis go mbeidh laghdú ar an ualach riaracháin ar údaráis cheadúnúcháin na mBallstát mar thoradh ar rogha 3. Ar an lámh eile, beidh acmhainní nua riaracháin ag teastáil ó údaráis inniúla na mBallstát chun rialuithe nua ar onnmhairiú na teicneolaíochta cibearfhaireachais a thabhairt isteach.,

An mbeidh tionchair shuntasacha eile ann?

Táthar ag súil le tionchar dearfach i dtéarmaí sáruithe ar chearta na duine a chosc, saobhadh iomaíochta laistigh den Mhargadh Aonair a laghdú, cothrom iomaíochta domhanda a bhaint amach agus i gcúrsaí slándála.

D. Obair leantach

Cathain a dhéanfar athbhreithniú ar an mbeartas?

Déanfar faireachán ar an gcur chun feidhme i gcomhar leis na Ballstáit. Déanfar tuairisciú agus bailiú sonraí ar bhonn bliantúil le go mbeifear in ann faireachán agus meastóireacht a dhéanamh ar chur chun feidhme an tionscnaimh, agus chun an Pharlaimint agus an Chomhairle a chur ar an eolas faoi sin.

Tabharfaidh an Coimisiún faoi mheastóireacht ar an tionscnamh nua seo laistigh de chúig bliana óna theacht i bhfeidhm ar mhaithe le measúnú a dhéanamh ar an bhfíorthionchar atá aige agus chun a éifeachtach agus a éifeachtúlacht a mheas.