52014SC0119

DOICIMÉAD INMHEÁNACH OIBRE DE CHUID AN CHOIMISIÚIN

ACHOIMRE FEIDHMIÚCHÁIN AR AN MEASÚNÚ TIONCHAIR

a ghabhann leis an doiciméad

Togra le haghaidh RIALACHÁIN Ó PHARLAIMINT NA hEORPA AGUS ÓN gCOMHAIRLE

maidir le trealamh cosanta pearsanta

Séanadh: Ní dhéantar a cheangal leis an achoimre feidhmiúcháin seo ach na seirbhísí sin de chuid an Choimisiúin a bhí bainteach le hullmhú na hachoimre agus tá sí gan dochar d'fhoirm dheireanach aon chinnidh a dhéanfaidh an Coimisiún.

1.           Sainiú Faidhbe

In ainneoin go bhfuil ag éirí go maith le feidhmiú Threoir 89/686/CEE, táthar den tuairim go forleathan i measc na mBallstát agus na bpáirtithe leasmhara go bhfuil roinnt feabhsúchán ag teastáil. Níl aon athrú mór i gceist; áfach, mar thoradh ar thaithí maidir le feidhmiú na Treorach, ar ionchur sa Chomhairliúchán Poiblí (2011) agus ar thorthaí an Staidéir um Measúnú Tionchair (2010), caithfear dul i ngleic leis na saincheisteanna a leanas:

– Treoir maidir le TCP a ailíniú leis an gCreat Nua Reachtach;

– Síneadh le cumhdach táirgí de chuid na Treorach maidir le TCP;

– Roinnt cineálacha breise TCP le cur ar liosta na dtáirgí faoi réir an nós imeachta um measúnú comhréireachta is déine;

– Athrú ar thrí cheanglas sláinte agus sábháilteachta;

– Athrú ar na ceanglais don chomhad teicniúil, bailíocht agus inneachar deimhnithe ar scrúdú cineáil an CE, agus Dearbhú Comhréireachta an AE.

Fadhb 1: An Treoir maidir le TCP a ailíniú leis an gCreat Nua Reachtach

Feictear cuid mhór de na fadhbanna ginearálta arna sainaithint ag an gCreat Nua Reachtach i gcomhthéacs cur chun feidhme na Treorach maidir le TCP (TCP atá curtha ar an margadh nach bhfuil go leor leibhéal cosanta aige, fadhbanna a bhaineann le caighdeán na seirbhísí arna soláthar ag roinnt comhlachtaí dá dtugtar fógra, taithí éagsúil sna Ballstáit maidir le measúnú agus le faireachán ar chomhlachtaí dá dtugtar fógra). Ní mór do roinnt monaróirí dul i ngleic le castacht an chreata dhlíthiúil agus lena neamhréireachta in amanna.

Is é atá i gceist leis an Treoir maidir le TCP a ailíniú leis an gCreat Nua Reachtach, gealltanas polaitiiúl atá leagtha síos in Airteagal 2 de Chinneadh Uimh. 768/2008 an Chreata Nua Reachtaigh.

Tá scrúdú déanta cheana sa Tuarascáil Measúnaithe Tionchair ar an bPacáiste Ailínithe maidir leis na roghanna éagsúla a thugann éifeacht do Chinneadh an Chreata Nua Reachtaigh. As siocair nach bhfuil na roghanna go díreach mar an gcéanna, ní scrúdóidh an Tuarascáil Measúnaithe Tionchair na gnéithe sin.

Fadhb 2: Síneadh le cumhdach táirgí de chuid na Treorach maidir le TCP

Tá táirgí ar an margadh a sholáthraíonn feidhmiú cosanta don úsáideoir agus atá oiriúnach do shainmhíniú Threoir TCP ach nach gcumhdaíonn an Treoir seo iad. Dá dheasca sin, níl na táirgí sin faoi réir na gceanglas sábháilteachta agus sláinte ó thaobh TCP de agus, mar thoradh air sin, níl leibhéal cosanta na dtáirgí sin chomh hard is atá leibhéal cosanta TCP. D’fhéadfadh an tomhaltóir a chreidiúint go bhfuil sé á chosaint ar riosca áirithe nuair nach bhfuil sé sin fíor. Ní chuirtear san áireamh sa Treoir táirgí a chosnaíonn ar an teas, ar an tais agus ar uisce arna gceapadh le haghaidh úsáid phríobháidí. Cumhdaítear an cineálacha táirgí sin agus úsáid phroifisiúnta acu, áfach. Tagann fadhbanna sábháilteachta agus sláinte ó tháirgí atá lasmuigh den raon feidhme. Tá sé aitheanta ag na Ballstát amháin go mbíonn 150 000 cás dó sa bhaile sa tír in aghaidh na bliana. Baineann leath de na dónna sin leis na lámha.

Cruthaíonn an staid sin fadhbanna do na húdaráis um fhaireachas margaidh freisin. Níor chóir an t‑idirdhealú idir údaráis phroifisiúnta agus phríobháideach a bheith ábhartha chun táirgí (atá comhionann) a chur ar an margadh. Tarraingíonn údaráis um fhaireachas margaidh anuas go rialta go bhfuil gá ann an staid sin a shárú.

Fadhb 3: Roinnt cineálacha breise TCP le cur ar liosta na dtáirgí faoi réir an nós imeachta um measúnú comhréireachta is déine

Sa Treoir déantar TCP a aicmiú ina thrí chatagóir atá faoi réir nósanna imeachta um measúnú comhréireachta éagsúla. Tá liostaí in éineacht leis na sainmhínithe ar chatagóir I agus ar chatagóir III ina dtugtar tuairisc ar an TCP arna chumhdach ag na catagóirí sin.

Tá sé léirithe sa taithí a fuarthas go bhfuil TCP atá i gcatagóir III de réir sainmhínithe, (i.e. TCP a cheaptar chun rioscaí tromchúiseacha a chosaint), ar iarraidh i liosta an TCP atá faoi réir an nós imeachta um measúnú comhréireachta is déine. Dá dheasca sin, ní bhíonn iniúchtaí rialta ann ar an bpróiseas táirgthe don TCP seo. Dá bhrí sin, ní sheiceáiltear cáilíocht an TCP féin arna táirgeadh i réimsí áirithe agus, go hintuigthe, ní bhíonn an leibhéal céanna sábháilteachta ag an TCP sin.

Seo a leanas na cineálacha TCP atá i gceist: seaicéid tarrthála, TCP atá piléardhíonach agus sá-dhíonach agus TCP ar mhaithe le cosaint ar ghearrtha mar thoradh ar shábha slabhacha láimhe, ar mhaithe le cosaint ar ghearradh ardbhrú agus ar mhaithe le cosaint ar thorann.

Fadhb 4: Athrú ar thrí ceanglas sláinte agus sábháilteachta (BHSR)

Léiríonn taithí ar a bheith ag déileáil leis an BHSR go bhfuil trí cheanglas ann, eilimintí dofheidhmithe agus éiginnte:

BHSR 3.1.3:   ar mhaithe le cosaint ar chreathadh meicniúil;

BHSR 3.5:      ar mhaithe le cosaint ar éifeachtaí dochracha torainn;

BHSR 3.9.1:   ar mhaithe le cosaint ar radaíocht neamhianúcháin.

I gcás na bpointí sin, leagtar amach sa Treoir ceanglais atá dofheidhmithe nó éiginnte don úsáideoir nó léiríodh nárbh fhéidir é a chomhlíonadh. Bíonn aghaidh le tabhairt ag monaróirí ar cheanglais a thuigtear nach bhfuil siad infheidhmithe. Téann sé sin i bhfeidhm ar na húsáideoirí de bhrí nach bhfuil iomlán na faisnéise a bhaineann leis an TCP acu, go bhféadfadh sé bheith neamhábhartha agus go bhféadfadh sé bheith ina fhoinse fhéideartha éiginnteachta.

Fadhb 5: Athrú ar na ceanglais don chomhad teicniúil, bailíocht agus inneachar deimhnithe ar scrúdú cineáil an CE, agus Dearbhú Comhréireachta an AE.

Ní mór d’údaráis um fhaireachas margaidh dul i ngleic le torthaí neamhleora na gceanglas a bhaineann leis na doiciméid thuasluaite. Cuirtear bac ar gcuid oibre mar thoradh ar cheanglais mhí-éifeachtacha nach bhfuil soiléir atá sa Treoir do na doiciméid sin, is cuma má tá a gcaighdeán nó a n‑iomláine ríthábhachtach do mheasúnú ó thaobh comhlíonadh an TCP de. Chomh maith leis sin, ní thuigeann na monaróirí a gcuid freagrachtaí go soiléir. Ní chuireann cuid de na ceanglais do na doiciméid in iúl an t‑athrú a thagann ar na caighdeáin chomhchuibhithe thar thréimhse ama agus d’fhéadfadh sé leanúint ar aghaidh go dtí nach mbeadh an TCP i gcomhréir leis an Treoir. Thairis sin, maíonn na húdaráis go mbíonn fadhbanna ann na doiciméid ar gá leo a bhailiú chun measúnú a dhéanamh ar an TCP.

Idirghabháil phoiblí is gá

Tá gníomhaíocht an AE sa réimse seo bunaithe ar Airteagal 114 den CFAE. Tá na gnéithe a dtugtar aghaidh orthu sa chomhthéacs seo arna rialú ag an Treoir maidir le TCP cheana. Ní théann an reachtaíocht seo, áfach, i ngleic leis na fadhbanna a aithnítear ar dhóigh éifeachtach. Is léir ón staidéar a rinneadh agus ó chríocha na roghanna a scrúdaíodh go mbeidh na fadhbanna ann fós mura ndéantar athbhreithniú ar an Treoir.

2.           miondealú na coimhdeachta

Is gá rialacha comhchoiteanna maidir le ceapadh TCP agus an dóigh chun TCP a chur ar an margadh sa dóigh go bhfeidhmíonn an margadh inmheánach ar dhóigh éifeachtach agus cheart chun saorghluaiseacht agus cosaint sláinte agus sábháilteachta an úsáideora a áirithiú.

D’fhéadfadh gníomhaíochtaí a dhéantar ar leibhéal náisiúnta chun dul i ngleic leis na fadhbanna constaicí a chur ar shaorghluaiseacht TCP. Ní mór d’aon leasú maidir le raon feidhme, le nósanna imeachta nó le ceanglais a dhéanamh ar leibhéal an AE chun aon saobhadh i margadh an AE a sheachaint.

As siocair go bhfuil idirnáisiúnú trádála ag méadú, tá líon na gcásanna trasteorann ag dul i méad. Is féidir gníomhaíocht comhordaithe ar leibhéal AE na haidhmeanna a bhaint amach ar dhóigh níos fearr, agus cuirfidh sí faireachas margaidh níos éifeachtaí ar fáil go háirithe. Dá bhrí sin, tá sé níos oiriúnaí gníomhaíocht a dhéanamh ar leibhéal AE.

3.           Aidhmeanna

Is iad aidhmeanna iomlána an tionscnaimh seo sláinte agus sábháilteacht úsáideoirí TCP a chosaint níos fearr, cothrom iomaíochta a chur ar fáil d’oibreoirí eacnamaíocha agus timpeallacht rialála na hEorpa maidir le TCP a shimpliú.

Tá na haidhmeanna níos sainiúla agus na haidhmeanna maidir le beartais i bhfeidhm le sonrú i gClár 1 thíos.

Clár 1: Aidhmeanna sainiúla agus aidhmeanna maidir le beartais i bhfeidhm

GINEARÁLTA || SAINIÚIL || I BHFEIDHM

Cosaint níos fearr ar shláinte agus ar shábháilteacht úsáideoirí TCP || Ardchaighdeán de tháirgí a chosnaíonn ar ardrioscaí a áirithiú, ardchaighdeán maidir lena bpróiseas táirgthe san áireamh Iontaofacht agus ardchaighdeán de ghníomhaíochtaí um measúnú comhréireachta arna ndéanamh ag comhlachtaí dá dtugtar fógra a áirithiú Inrianaitheacht táirgí a áirithiú || Neamhréireachtaí i liosta na dtáirgí atá faoi réir an nós imeachta um measúnú comhréireachta is déine a dhíchur Critéir choitianta don mheasúnú a mhionsonrú, faireachán agus rialú NBanna a chur i bhfeidhm go cothrom ar fud an AE

Cothrom iomaíochta a chur ar fáil d’oibreoirí eacnamaíocha TCP || Comhsheasmhacht a áirithiú maidir le seirbhísí um measúnú comhréireachta arna ndéanamh ag comhlachtaí dá dtugtar fógra Sásraí agus bearta maidir le faireachas margaidh a fheabhsú || Ceanglais maidir le deimhnithe ar scrúdú cineáil an CE a shoiléiriú Ceanglais maidir le comhad teicniúil a shimpliú agus a shoiléiriú Dearbhú comhréireachta an AE in éineacht le gach táirge a éileamh

Simpliú ar thimpeallacht rialála na hEorpa maidir le TCP || Feidhmiú comhsheasmhach den reachtaíocht a áirithiú Infheidhmitheacht na gceanglas a áirithiú || Raon feidhme na Treorach a shoiléiriú Na nósanna um measúnú comhréireachta infheidhme a shimpliú Na ceanglais atá leagtha amach in IARSCRÍBHINN II a shoiléiriú

4.           Roghanna beartais

Tá trí rogha beartais measta do gach fadhb faoi seach, i.e.

– an rogha “gan aon rud a dhéanamh” mar rogha bonnlíne;

– an rogha do “reachtaíocht bhog” mar chomhrogha neamhreachtach a bhaineann le léirmhíniú lena n‑aontaítear go coitianta maidir le cur chun feidhme na Treorach maidir le TCP; agus

– an rogha “reachtach” a chuir san áireamh athrú sa téacs dleathach.

Rinneadh miondealú ar leith ar gach réimse ina bhfuil feabhsú ag teastáil maidir le tionchair na roghanna beartais thuas.

5.           measúnú tionchair

Léirigh an miondealú cineálach gurb é an rogha reachtach, in ainneoin na bhfadhbanna uile, an rogha is fearr. As siocair gur fadhbanna rialála iad gach fadhb a dtugtar tuairisc di, is é an rogha reachtach an t‑aon rogha a mbeidh soiléiriú agus cinnteacht dhlíthiúil ag baint leis. D’ainneoin go bhfuil níos mó costais ag baint leis an rogha reachtach i gcomparáid leis an rogha na reachtaíochta boige, beidh ardsochair chomh maith le hardchinnteacht dhlíthiúil ag baint leis an rogha reachtach.

Níl an dáta cineálach atá ar fáil faoi TCP agus faoi mhargadh an TCP cruinn agus mionsonrach go leor chun íomhá shoiléir a fháil ar an margadh agus ar an mbaint atá ann idir TCP difriúil agus forálacha reachtacha. Tá dhá staidéar coimisiúnaithe ag seirbhísí an Choimisiúin Eorpaigh agus tá faisnéis bailithe acu chun an fhaisnéis chineálach is cuimsithí a sholáthar.

Tá an measúnú ar gach leasú atá beartaithe bunaithe ar a chuid costas agus ar a chuid sochar – sochair shláinte san áireamh, chomh maith le feabhsúcháin maidir le cinnteacht dhlíthiúil. Cuirtear in iúl sa mhír a leanas torthaí an mhiondealaithe chuimsithigh de rogha reachtach gach faidhbe.

Cumhdach táirgí

Beidh tionchar dearfach ag an leasú ar chothroime san iomaíocht, as siocair go mbeidh féindeimhniú éigeantach.

Tionchar sóisialta: Buntáiste amháin a bhaineann leis an leasú go mbeidh níos mó soiléireachta maidir le húsáid an TCP agus le hinneachar na n‑ábhar in úsáid mar thoradh ar lipéadú na dtáirgí agus ar fhaisnéis an úsáideora. Beidh leibhéal na faisnéise ginearálta arna sholáthar níos fearr. Tá monaróirí chomh maith le húdaráis um fhaireachas margaidh ag súil le laghdú táirgí nach bhfuil leibhéal sásúil cosanta idir 20 % agus 50 % bainte amach acu. Ní raibh aon dáta ar fáil chun an tionchar a bhaineann le miotóga oighinn a chur san áireamh mar TCP a mheas. Tá sé aitheanta ag Ballstát amháin go mbíonn 150 000 cás dó sa bhaile sa tír in aghaidh na bliana. Baineann leath de na dónna sin leis na lámha.

Tionchar eacnamaíoch: Tá an tionchar maidir le comhlíonadh agus le costais riaracháin do gach táirge an‑bheag. Is féidir a mheas go gcosnaíonn sé cúpla céad euro do gach sraith TCP agus beidh tionchar an‑íseal ar chostas gach aonaid. Leis an leibhéal is airde de chaighdeáin táirgthe a bhaint amach, ó thaobh chosaint bhunúsach sláinte agus sábháilteachta de, tá costais táirgthe 10 % nó 20 % níos airde ann le haghaidh cuid de na deighleoga i margadh iomlán na lámhainní. Rachadh an costas méadaitheach sin i bhfeidhm den chuid is mó ar na monaróirí sin nach gcomhlíonann na ceanglais bhunúsacha i láthair na huaire. Is féidir táirgí nach bhfuil caighdeán sásúil cosanta acu a bheith ar an margadh faoi láthair gan faisnéis a bheith ann maidir lena gcaighdeán, agus mar thoradh air sin, tá lagú sa chothrom iomaíochta. De thairbhe an leasaithe, ba cheart go mbeadh faisnéis mar sin inrianaithe sa todhchaí a dhéanfadh na coinníollacha ó thaobh na hiomaíochta córa agus trédhearcaí de a fheabhsú.

Measúnú Comhréireachta

Tionchar sóisialta: D’fhéadfadh an leasú bheith ina chabhair le feabhas a chur ar chomhlíonadh na gcineálacha TCP thuasluaite trí fhaireachán bliantúil a thabhairt isteach. Tugann sé sin tuilleadh cosanta ó thaobh caighdeán táirgí de. Áirithíonn tástáil bhliantúil go bhfuil aonchineálacht maidir le táirgí agus le táirgeacht ann agus go gcomhlíontar buncheanglais TCP agus caighdeáin táirgí ábhartha. Laghdófar cionroinnt na dtáirgí nach bhfuil go leor leibhéal cosanta acu. Braitheann cionroinnt an laghdaithe ar an gcineál TCP agus tá difríocht ó 10 % go 50 % i gceist.

Tionchar eacnamaíoch: Tá bunús na bhfreagróirí sa chomhairliúchán poiblí ag súil le comhlíonadh agus costais riaracháin mheasartha nó nach mbeidh aon chostas riaracháin ann. Tá roinnt freagróirí ag súil le costais níos airde. Is é an tionchar is mó a bheadh i gceist go mbeadh gá le faireachán bliantúil a dhéanamh den phróiseas táirgthe. Dá gcuirfí córas rialaithe cáilíochta chun feidhme cheana, bheadh costas aonuaire ag baint leis an gcóras d’iniúchtaí i gcatagóir III a leasú. Fairis sin, is féidir na costais a bhaineann le TCP ábhartha a roinnt trí líon mór aonad a tháirgeadh, agus mar sin de, ní bheadh mórán méadaithe i gcostais an t‑aonad i gceist. I measc na dtionchar dearfach ar iomaíocht idirnáisiúnta, tá dreasacht ann chun ardchaighdeán seasmhach maidir le cáilíocht táirgí agus aonchineálacht sa phróiseas táirgthe a bhaint amach, a bhfuil monaróirí an AE i seasamh níos fearr faoina coinne.

Buncheanglais sláinte agus sábháilteachta (BHSR)

Is í an aidhm a bhaineann leis na trí athrú ar an BHSR gnéithe a dhíchur ón Treoir nach gcuireann le sláinte agus le sábháilteacht. Ar an iomlán, ba cheart go mbeadh na hathruithe ina dtionchar dearfach de bhrí nach bhfuiltear ag súil le tionchair dhiúltacha ó thaobh sláinte agus sábháilteachta de as siocair nach féidir a chruthú faoi láthair nach gcomhlíontar na ceanglais sin agus, chomh maith leis sin, agus iad bainte amach, beidh costais níos lú ann do tháirgeoirí agus do Chomhlachtaí ar tugadh fógra dóibh a bhfuil sé de dhualgas orthu a chruthú go bhfuil siad á gcomhlíonadh.

Comhad teicniúil, dearbhú ar scrúdú cineáil CE, Dearbhú Comhréireachta CE

Tionchar sóisialta: Tuigeann páirtithe leasmhara go bhfuil an leasú atá beartaithe ina bhuntáiste as siocair go gcabhróidh sé measúnú an TCP seo agus go méadóidh sé éifeachtacht a gcuid oibre nó go laghdóidh sé an líon TCP nach bhfuil leibhéal sásúil cosanta bainte amach aige trí mheasúnú níos minice ar TCP atá níos sine a áirithiú. Ag brath ar an gcineál TCP, tá páirtithe leasmhara ag súil le laghdú idir 1-25 % ar tháirgí nach bhfuil leibhéal sásúil cosanta acu.

Tionchar eacnamaíoch: Ní bheidh mórán costas ag baint le leasuithe a chur chun feidhme ar an gcomhad teicniúil as siocair go bhfuil rialú táirgthe inmheánach ag monaróirí cheana agus go bhféadfaidís an doiciméad seo a sholáthar. Tá an leasú maidir leis an Dearbhú Comhréireachta mar an gcéanna. Mar thoradh ar theorannú ama na ndeimhnithe níor tugadh luacha na gcostas lena mbaineann sna hagallaimh. Chun teorainn a chur le hualach breise na monaróirí maidir le hathdheimhniú a gcuid TCP, soláthróidh an togra do nós imeachta “éadrom”. Beidh costas diomaibhseach ar íosinneachar éigeantach an teastais de bhrí gur chóir go mbeadh an t‑inneachar beagnach mar an gcéanna idir lámha ag na Comhlachtaí ar tugadh fógra dóibh.

6.           comparáid idir roghanna

Is é an toradh a bhí ar an gcomparáid idir roghanna a bhí bunaithe ar thorthaí mheasúnú na roghanna go bhfuil an tionchar dearfach is mó, in ainneoin na bhfadhbanna, ag an mbeart reachtach. Chomhlíontar na haidhmeanna ar leith sa rogha reachtach a chuireann feabhas ar shláinte agus sábháilteacht, ar chinnteacht dhlíthiúil, ar chomhsheasmhacht sna ceanglais agus a chuireann an feabhas is fearr ar obair an fhaireachais mhargaidh.

7.           faireachán agus measúnú

Chun faireachán agus measúnú ar éifeachtacht na reachtaíochta ó thaobh TCP de a fheabhsú, beidh gá le tuairisciú córasach laistigh de na sásraí comhair éagsúla atá ann cheana maidir le timpistí lena mbaineann TCP. I ngach grúpa a bhaineann le TCP, bunófar mír ar bhuanchlár cruinnithe, i gcomhar leis an gCoimisiún, chun tuairisc a thabhairt ar TCP nach bhfuil leibhéal sásúil cosanta aige agus ar thimpistí gaolmhara agus iarrfar ar Bhallstáit, ar Chomhlachtaí dá dtugtar fógra agus ar pháirtithe leasmhara eile tuairisc a thabhairt.

Gheofar aischothú breise ón gcomhoibriú nua nó leathnaithe agus ó shásraí malartaithe eolais a sholáthraíonn an Rialachán maidir leis an gCreat Nua Reachtach 765/2008 dóibh.

Beidh neamhchomhlíonadh inbhraite freisin trí ghearáin a sheoladh chuig an gCoimisiún.

8.           rogha don ionstraim dlí

Ar aon dul le beartas an Choimisiúin chun an timpeallacht rialála a shimpliú, tá sé beartaithe an Treoir a athrú ina Rialachán.

Ní thagann úsáid Rialacháin salach ar phrionsabal na coimhdeachta. Tá an reachtaíocht seo bunaithe ar Airteagal 114 den CFAE a bhfuil sé mar aidhm aici feidhmiú ceart an mhargaidh inmheánaigh maidir le TCP a áirithiú. Chun an aidhm sin a bhaint amach, is treoir chomhchuibhithe amach is amach í Treoir 89/686/CEE maidir le TCP. Níl cead ag Ballstáit ceanglais bhreise nó níos déine a chur ina reachtaíocht náisiúnta maidir le TCP a chur ar an margadh.

Is mar geall ar úsáid Rialachán i réimse reachtaíocht an mhargaidh inmheánaigh, i gcomhréir leis na tosaíochtaí atá curtha in iúl ag na páirtithe leasmhara, gur féidir an riosca a bhaineann le ‘rórialáil’ a sheachaint. Ligeann sé do mhonaróirí bheith ag obair go díreach le téacs an Rialacháin in ionad 28 ndlí trasuímh a aithint agus a scrúdú.

Ar an mbonn sin, meastar gurb é an rogha a bhaineann le Rialachán an réiteach is iomchuí do gach páirtí i gceist as siocair go gciallaíonn sé go mbeidh cur chun feidhme níos tapa agus níos soiléire den reachtaíocht bheartaithe ann agus go mbunóidh sé timpeallacht rialála níos soiléire d’oibreoirí eacnamaíocha.