(1)

Sa Chomhaontú maidir le Soláthar Comhpháirteach inar ghlac an Coimisiún agus na Ballstáit rannpháirteacha páirt agus a rinneadh eatarthu, dá bhforáiltear in Airteagal 26(1) de Rialachán Tarmligthe (AE) 2023/2830 ón gCoimisiún (1), leagtar amach go háirithe na rialacha praiticiúla maidir le meastóireacht a dhéanamh ar na hiarrataí ar rannpháirtíocht nó ar na tairiscintí, maidir le dámhachtain an chonartha, maidir leis an dlí is infheidhme maidir leis an gconradh agus maidir leis an gcúirt inniúil chun díospóidí a éisteacht.

(2)

De bhun Airteagal 29 de Rialachán Tarmligthe (AE) 2023/2830, níor ghlac an Ghearmáin ná an Pholainn páirt sa ghníomhaíocht chomhpháirteach dá bhforáiltear in Airteagal 26(1) den Rialachán Tarmligthe sin agus cheap siad a n-ardán leithleach féin chun méid a lamháltas féin a chur ar ceant i leith gníomhaíochtaí muiriompair, suiteálacha do-aistrithe agus eitlíochta.

(3)

Ní dhéantar foráil i Rialachán Tarmligthe (AE) 2023/2830 maidir leis an bhféidearthacht ardán leithleach a cheapadh chun lamháltais a chur ar ceant faoi Chaibidil IVa de Threoir 2003/87/CE. Dá bhrí sin, ba cheart don ardán ceantála coiteann na lamháltais sin a chur ar ceant.

(4)

Dá bhrí sin, is gá don Ghearmáin agus don Pholainn ardáin cheantála choiteanna a cheapadh chun na lamháltais a chur ar ceant faoi Chaibidil IVa de Threoir 2003/87/CE in éineacht leis na Ballstáit eile de bhun Airteagal 26(1) de Rialachán Tarmligthe (AE) 2023/2830, tar éis nós imeachta um sholáthar comhpháirteach idir na Ballstáit eile sin agus an Coimisiún.

(5)

Dá bhrí sin, ba cheart rannpháirtíocht na Gearmáine agus na Polainne sa ghníomhaíocht chomhpháirteach a shaothraítear trí nós imeachta um sholáthar comhpháirteach agus i gceapadh ardán ceantála coiteann dá bharr sin a éascú trína bheith ina bpáirtithe sa Chomhaontú maidir le Soláthar Comhpháirteach.

(6)

De bhun Airteagal 37(1) den Chomhaontú maidir le Soláthar Comhpháirteach, féadfaidh Ballstát neamh-rannpháirteach páirt a ghlacadh sa ghníomhaíocht chomhpháirteach dá bhforáiltear sa Chomhaontú sin, trí chomhaontú maidir le páirt a ghlacadh a shíniú, comhaontú a d’fhéadfadh a bheith i bhfoirm leasú ar an gComhaontú sin, lena leagtar amach na téarmaí agus na coinníollacha ar faoina réir a fhéadfaidh an Ballstát ar mian leis páirt a ghlacadh sa Chomhaontú sin déanamh amhlaidh. Leagtar amach sa Chomhaontú sin na téarmaí agus na coinníollacha le haghaidh na Gearmáine agus na Polainne chun páirt a ghlacadh sa Chomhaontú maidir le Soláthar Comhpháirteach chun ardáin cheantála choiteanna a cheapadh le haghaidh lamháltais cheantála faoi Chaibidil IVa de Threoir 2003/87/CE.

(7)

De bhun Airteagal 37(2) den Chomhaontú maidir le Soláthar Comhpháirteach, tugann gach Ballstát rannpháirteach an t-údarás don Choimisiún comhaontú ballraíochta a shíniú thar a cheann le Ballstát neamh-rannpháirteach, faoi réir fhormheas an Choiste Stiúrtha um Sholáthar Comhpháirteach i dtogra ón gCoimisiún chuige sin.

(8)

An 10 Deireadh Fómhair 2024, d’fhormheas an Coiste Stiúrtha um Sholáthar Comhpháirteach, de bhun Airteagal 13(1) den Chomhaontú maidir le Soláthar Comhpháirteach, an togra ón gCoimisiún chun go bhféadfadh an Ghearmáin agus don Pholainn páirt a ghlacadh sa Chomhaontú maidir le Soláthar Comhpháirteach.

(9)

Ní dhéanann aon ní sa Chomhaontú seo difear do chearta ná d’oibleagáidí na mBallstát ná an Choimisiúin faoi na Conarthaí. Ní dhéanann aon ní sa Chomhaontú seo difear do chearta ná d’oibleagáidí na Gearmáine agus na Polainne maidir le ceapadh a n-ardán féin chun méid a lamháltas faoi seach a chur ar ceant i leith gníomhaíochtaí muiriompair, suiteálacha do-aistrithe agus eitlíochta de bhun Airteagal 29 de Rialachán Tarmligthe (AE) 2023/2830,