(1)

Foráiltear le Rialachán (AE) 2015/2283 nach bhféadfar ach bianna núíosacha a údaraítear agus atá ar liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta an Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

An 17 Nollaig 2022, chuir an chuideachta NutriLeads B.V. (‘an t-iarratasóir’) iarratas ar údarú faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 chun snáithín mealbhacáin arna shaibhriú le ramnagalachtúranan-I (cRG-I) a chur ar mhargadh an Aontais mar bhia núíosach. D’iarr an t-iarratasóir go n-úsáidfí an bia núíosach i roinnt bianna atá beartaithe don phobal i gcoitinne, forbhianna mar a shainmhínítear i dTreoir 2002/46/CE ó Pharlaimint na hEorpa agus ón gComhairle (3), bianna chun críocha speisialta míochaine mar a shainmhínítear i Rialachán (AE) Uimh. 609/2013 ó Pharlaimint na hEorpa agus ón gComhairle (4) agus ionadach ar an aiste bia iomlán chun meáchan a rialú mar a shainmhínítear i Rialachán (AE) Uimh. 609/2013. Ina dhiaidh sin, an 15 Nollaig 2025, mhodhnaigh an t-iarratasóir an iarraidh thosaigh san iarratas maidir le snáithín mealbhacán arna shaibhriú le ramnagalachtúranan-I (cRG-I) a úsáid i bhforbhianna, i mbianna chun críocha speisialta míochaine agus in ionadach ar bhéile chun meáchan a rialú chun naíonáin agus leanaí óga a eisiamh.

(4)

An 17 Nollaig 2022 chuir an t-iarratasóir iarraidh faoi bhráid an Choimisiúin freisin ar chosaint na sonraí dílsithe seo a leanas: céannacht (5), sonraí comhdhéanaimh (6) agus faisnéis thocsaineolaíoch (7).

(5)

An 8 Samhain 2023, d’iarr an Coimisiún ar an Údarás Eorpach um Shábháilteacht Bia (‘an tÚdarás’) tuairim eolaíoch a sholáthar maidir le snáithín mealbhacáin arna shaibhriú le ramnagalachtúranan-I (cRG-I) mar bhia núíosach.

(6)

An 25 Meitheamh 2025, ghlac an tÚdarás an tuairim eolaíoch uaidh dar teideal ‘Sábháilteacht snáithín mealbhacáin arna shaibhriú le ramnagalachtúranan-I (cRG-I) mar bhia núíosach de bhun Rialachán (AE) 2015/2283’ (8) i gcomhréir le hAirteagal 11 de Rialachán (AE) 2015/2283.

(7)

Sa tuairim eolaíoch uaidh, tháinig an tÚdarás ar an gconclúid go bhfuil an bia núíosach cRG-I, codán polaisiúicríde ar mhórán ramnagalachtúranain a dhíorthaítear ó phrabhait mealbhacáin, sábháilte faoi na coinníollacha úsáide atá beartaithe.

(8)

Sa tuairim eolaíoch uaidh, thug an tÚdarás dá aire freisin go raibh an chonclúid uaidh i ndáil le sábháilteacht an bhia núíosaigh bunaithe ar na sonraí dílsithe faoin gcéannacht, sonraí comhdhéanaimh agus faisnéis thocsaineolaíoch, agus nach bhféadfadh sé measúnú a dhéanamh ar an mbia núíosach ná teacht ar a chonclúid dá n-uireasa.

(9)

D’iarr an Coimisiún ar an iarratasóir soiléiriú breise a thabhairt maidir leis an údar a soláthraíodh i dtaca lena éileamh dílseánaigh ar na sonraí agus na staidéir sin, agus soiléiriú a thabhairt maidir lena éileamh ar cheart eisiach tagartha orthu i gcomhréir le hAirteagal 26(2)(b) de Rialachán (AE) 2015/2283.

(10)

Dhearbhaigh an t-iarratasóir go raibh cearta tagartha dílseánaigh agus eisiacha aige ar na staidéir ábhartha, tráth a chuir sé an t-iarratas isteach, agus dhearbhaigh sé nach féidir le tríú páirtithe rochtain dhlíthiúil a fháil ar na sonraí sin ná iad a úsáid ná tagairt a dhéanamh dóibh.

(11)

Rinne an Coimisiún measúnú ar an bhfaisnéis uile a sholáthair an t-iarratasóir agus measann sé go bhfuil bunús leordhóthanach tugtha aige gur comhlíonadh na ceanglais a leagtar síos in Airteagal 26(2) de Rialachán (AE) 2015/2283. Dá bhrí sin, na sonraí faoin gcéannacht, na sonraí comhdhéanaimh agus an fhaisnéis thocsaineolaíoch, ba cheart iad a chosaint i gcomhréir le hAirteagal 27(1) de Rialachán (AE) 2015/2283. Dá réir sin, níor cheart ach an t-iarratasóir a údarú chun eastóscán mealbhacháin arna shaibhriú le ramnagalachtúranan-I a chur ar an margadh laistigh den Aontas ar feadh tréimhse 5 bliana ó theacht i bhfeidhm an Rialacháin seo.

(12)

Mar sin féin, maidir leis an údarú agus an tagairt do na sonraí atá i gcomhad an iarratasóra a shrianadh d’úsáid an iarratasóra amháin, ní chuirfidh an srianadh sin cosc ar iarratasóirí eile ina dhiaidh sin cur isteach ar údarú chun an bia núíosach céanna a chur ar an margadh ar choinníoll gur ar fhaisnéis a fuarthas go dlíthiúil agus atá ina taca leis an údarú sin atá a n-iarratas bunaithe.

(13)

Is iomchuí go mbeadh an fhaisnéis dá dtagraítear in Airteagal 9(3) de Rialachán (AE) 2015/2283 san iontráil a bhaineann le heastóscán mealbhacháin arna shaibhriú le ramnagalachtúranan-I (cRG-I) mar bhia núíosach ar liosta an Aontais de bhianna núíosacha. I gcomhréir le coinníollacha úsáide forbhianna ina bhfuil eastóscán mealbhacháin arna shaibhriú le ramnagalachtúranan-I (cRG-I), mar atá molta ag an iarratasóir, is gá na tomhaltóirí a chur ar an eolas ina leith sin trí lipéadú iomchuí ainmniú an bhia núíosaigh agus faoi úsáidí forbhianna ina bhfuil eastóscán mealbhacháin arna shaibhriú le ramnagalachtúranan-I (cRG-I).

(14)

Mhol an t-iarratasóir ar dtús go gcuirfí an bia núíosach ar mhargadh an Aontais faoin ainm snáithín mealbhacháin arna shaibhriú le ramnagalachtúranan-I (cRG-I). Sa tuairim eolaíoch uaidh, shainigh an tÚdarás an bia núíosach mar chodán polaisiúicríde íonaithe ar mhórán ramnagalachtúranain arna aonrú ó phrabhait mealbhacáin trí chéimeanna próiseála einsímeacha agus fisiceacha. Thug an tÚdarás dá aire freisin, cé gur carbaihiodráití neamh-indíleáite atá sa bhia núíosach den chuid is mó, nach ndearna sé measúnú i dtaobh an gcomhlíonann an t-ábhar an sainmhíniú dlíthiúil ar ‘snáithín cothaitheach’ a leagtar síos i Rialachán (AE) Uimh. 1169/2011 ó Pharlaimint na hEorpa agus ón gComhairle (9). Dá bhrí sin, níl sé léirithe go gcomhlíonann an chomhpháirt snáithín an sainmhíniú a leagtar amach in Iarscríbhinn I a ghabhann le Rialachán (AE) Uimh. 1169/2011. Dá bhrí sin, d’fhéadfadh úsáid an téarma ‘snáithín mealbhacháin arna shaibhriú le ramnagalachtúranan-I (cRG-I)’ in ainmniú an bhia núíosaigh tomhaltóirí a chur amú maidir lena airíonna cothaitheacha agus lena chomhdhéanamh. Dá bhrí sin, is iomchuí ‘eastóscán mealbhacháin arna shaibhriú le ramnagalachtúranan-I (cRG-I)’ a chur in ionad an téarma ‘snáithín mealbhacháin arna shaibhriú le ramnagalachtúranan-I (cRG-I)’.

(15)

Ba cheart eastóscán mealbhacháin arna shaibhriú le ramnagalachtúranan-I (cRG-I) a chur ar liosta an Aontais de bhianna núíosacha a leagtar amach i Rialachán Cur Chun Feidhme (AE) 2017/2470. Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir.

(16)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,