(1)

Le Rialachán (CE) Uimh. 1831/2003 foráiltear maidir le húdarú breiseán a bhfuiltear lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú nó a dhiúltú. Le hAirteagal 10 den Rialachán sin foráiltear maidir le hathmheastóireacht a dhéanamh ar bhreiseáin a údaraíodh de bhun Threoir 70/524/CEE ón gComhairle (2).

(2)

Rinneadh an tsubstaint eastóscán ginsinge ó Panax ginseng C.A. Meyer a údarú gan teorainn ama, i gcomhréir le Treoir 70/524/CEE, mar bhreiseán beathaithe le haghaidh cat agus madraí. Ina dhiaidh sin cuireadh an tsubstaint sin isteach i gClár na mBreiseán Beathaithe mar tháirge a bhí ann cheana, i gcomhréir le hAirteagal 10(1), pointe (b), de Rialachán (CE) Uimh. 1831/2003.

(3)

I gcomhréir le hAirteagal 10(2) de Rialachán (CE) Uimh. 1831/2003 i gcomhar le hAirteagal 7 de, cuireadh isteach iarratas ar údarú eastóscáin ginsinge ó Panax ginseng C.A. Meyer a údarú mar bhreiseán beathaithe le haghaidh cat agus madraí agus iarradh ann go n-aicmeofaí an breiseán sin i gcatagóir na mbreiseán ‘breiseáin chéadfacha’ agus san fheidhmghrúpa ‘comhdhúile blaistithe’. Bhí na sonraí agus na doiciméid a cheanglaítear faoi Airteagal 7(3) de Rialachán (CE) Uimh. 1831/2003 ag gabháil leis an iarratas.

(4)

De réir mar a fhoráiltear in Airteagal 5(1) de Rialachán (CE) Uimh. 1831/2003, is faoin iarratasóir ar údarú breiseáin bheathaithe atá sé a léiriú go leordhóthanach go ndearnadh na coinníollacha maidir le húdarú a leagtar amach in Airteagal 5(2) agus (3) den Rialachán sin a chomhlíonadh, i gcomhréir leis na rialacha cur chun feidhme dá dtagraítear in Airteagal 7 den Rialachán sin.

(5)

Sa tuairim ón Údarás Eorpach um Shábháilteacht Bia (‘an tÚdarás’) an 17 Márta 2021 (3) ní fhéadfadh sé teacht ar chonclúid maidir le sábháilteacht eastóscáin ginsinge ó Panax ginseng C.A. Meyer le haghaidh an úsáideora agus le haghaidh cat agus madraí ar na leibhéil úsáide atá beartaithe toisc nár sholáthair an t-iarratasóir saintréithriú iomlán an bhreiseáin.

(6)

I litir dar dáta an 12 Deireadh Fómhair 2021, thug an Coimisiún deis don iarratasóir faisnéis fhorlíontach a chur isteach chun aghaidh a thabhairt ar an tuairim neamhchonclúideach ón Údarás. In éagmais freagra, seoladh ríomhphost chuig an iarratasóir an 4 Feabhra 2025 inar cuireadh in iúl go raibh sé beartaithe an t-údarú a dhiúltú. D’ainneoin roinnt meabhrúchán, níor thug an t-iarratasóir freagra maidir leis an tsubstaint.

(7)

Eascraíonn sé as an tuairim ón Údarás an 17 Márta 2021 nach bhfuil sé léirithe ag an iarratasóir go leormhaith ná go leordhóthanach go bhfuil eastóscán ginsinge ó Panax ginseng C.A. Meyer sábháilte faoi na coinníollacha úsáide atá beartaithe, nuair a úsáidtear é mar bhreiseán beathaithe le haghaidh cat agus madraí.

(8)

I bhfianaise an mhéid thuas, ní féidir a mheas, maidir le heastóscán ginsinge ó Panax ginseng C.A. Meyer, go gcomhlíonann sé na coinníollacha maidir le húdarú dá bhforáiltear in Airteagal 5 de Rialachán (CE) Uimh. 1831/2003. Dá réir sin, maidir le húdarú na substainte sin mar bhreiseán beathaithe a bhaineann le catagóir na mbreiseán ‘breiseáin chéadfacha’ agus san fheidhmghrúpa ‘comhdhúile blaistithe’ lena n-úsáid le haghaidh cat agus madraí, ba cheart an t-údarú sin a dhiúltú.

(9)

Dá bhrí sin, ba cheart eastóscán ginsinge ó Panax ginseng C.A. Meyer agus beatha a bhfuil sé inti a tharraingt siar ón margadh a luaithe is féidir, a mhéid a bhaineann lena úsáid le haghaidh cat agus madraí. Ba cheart tréimhse theoranta ama a cheadú, áfach, le haghaidh na stoc atá ann cheana de na táirgí sin a tharraingt siar ón margadh chun gur féidir le hoibreoirí an oibleagáid maidir le tarraingt siar a chomhlíonadh mar is ceart.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,