(1)

Chun infheisteoirí a chosaint agus éifeachtaí seach-iarmharta a shrianadh, ba cheart feidhm a bheith ag fionraí go comhuaineach agus ar feadh na tréimhse céanna maidir le suibscríbhinní, athcheannach agus fuascailtí.

(2)

Chun infheisteoirí atá ann cheana a chosaint agus sreabhadh infheistíochtaí nua isteach in GCUI a bhainistiú, ba cheart GCUI a bheith in ann srian a chur le suibscríbhinní, agus an tráth céanna leanúint de chead a thabhairt d’infheisteoirí atá ann cheana athcheannach agus fuascailtí a dhéanamh (‘dúnadh bog’). Mar sin féin, níor cheart dúnadh bog GCUI den sórt sin a cháiliú mar uirlis bainistithe leachtachta dá dtagraítear in Iarscríbhinn IIA a ghabhann le Treoir 2009/65/CE, toisc nach bhfeidhmíonn sé chun rioscaí leachtachta a bhainistiú ná chun aghaidh a thabhairt ar bhrú fuascailte faoi dhálaí struis sa mhargadh.

(3)

Ag féachaint do chuspóirí infheistíochta agus do bheartais fuascailte GCUI, ba cheart an tairseach chun geata fuascailte a ghníomhachtú a chinneadh ar leibhéal an GCUI. I gcomhréir le treoraíocht na hEagraíochta Idirnáisiúnta um Choimisiúin Urrús le haghaidh bainistiú riosca leachtachta ar chistí neamhiata (2), agus tairseach ghníomhachtúcháin na ngeataí fuascailte á cinneadh, ba cheart na glanorduithe fuascailte comhiomlána nó na hollorduithe fuascailte comhiomlána ar leibhéal an GCUI a mheas do dháta déileála ar leith nó thar thréimhse shonraithe agus ba cheart an tairseach ghníomhachtúcháin a shloinneadh mar chéatadán de ghlanluach sócmhainní an GCUI. I gcás ina sárófar an tairseach ghníomhachtúcháin, ba cheart do GCUI a bheith in ann cinneadh a dhéanamh geataí fuascailte a ghníomhachtú, nó orduithe fuascailte a fhorghníomhú in ainneoin go bhfuil an tairseach ghníomhachtúcháin sáraithe, ag féachaint dá leachtacht, do dhálaí an mhargaidh agus do leas na n-infheisteoirí.

(4)

Chun a áirithiú go gcaithfear go cothrom le hinfheisteoirí, ba cheart do GCUI a dhéanann geataí fuascailte a ghníomhachtú a bheith in ann déileáil leis an gcuid neamh-fhorghníomhaithe de na horduithe fuascailte ar bhonn coinníollacha réamhshocraithe a nochtadh d’infheisteoirí. Féadfar a áireamh ar na coinníollacha sin aistriú uathoibríoch na coda neamh-fhorghníomhaithe d’orduithe fuascailte go dtí an chéad dáta déileála eile, bíodh tosaíocht ag an gcuid neamh-fhorghníomhaithe sin thar orduithe fuascailte a chuirtear isteach ar dháta déileála níos faide anonn nó ná bíodh, nó cealú na n-orduithe fuascailte neamh-fhorghníomhaithe sin.

(5)

Chun infheisteoirí a chosaint agus cobhsaíocht an mhargaidh a chaomhnú le linn tréimhsí struis nó gníomhaíochta fuascailte neamhghnáiche, féadfaidh GCUI síneadh na dtréimhsí fógra a ghníomhachtú. Ag brath ar chuspóir infheistíochta agus ar bheartas fuascailte an GCUI, d’fhéadfadh líon sonrach laethanta, seachtainí nó míonna, nó dáta socraithe a thagann roimh dháta na fuascailte, a bheith i gceist leis an tréimhse fógra fhadaithe. I gcás inarb iomchuí do straitéis infheistíochta agus do bheartas fuascailte an GCUI, féadfaidh an íostréimhse fógra ba cheart d’infheisteoirí a thabhairt do GCUI agus a n-aonaid nó a scaireanna á bhfuascailt acu a bheith cothrom le nialas. Sa chás sin, ba cheart do GCUI a bheith fós in ann síneadh na dtréimhsí fógra a roghnú agus, i gcás inarb iomchuí, a ghníomhachtú trí shíneadh a chur leis an tréimhse fógra thar an tréimhse fógra nialais.

(6)

Ós rud é nach rialaíonn GCUI an próiseas socraíochta de ghnáth, níor cheart an próiseas sin a áireamh sa tréimhse fógra fhadaithe.

(7)

Chun infheisteoirí a chosaint agus ar mhaithe le cineál leachtach an GCUI a chur san áireamh, níor cheart aon tionchar a bheith ag síneadh na dtréimhsí fógra ar mhinicíocht fuascailte an GCUI.

(8)

I gcomhréir le treoraíocht na hEagraíochta Idirnáisiúnta um Choimisiúin Urrús le haghaidh bainistiú riosca leachtachta ar chistí neamhiata agus chun a áirithiú nach ndéanfaidh na costais leachtachta arb iad suibscríbhinní agus fuascailtí is cúis leo dochar d’infheisteoirí atá ann cheana nó atá fágtha in GCUI, le huirlisí bainistithe leachtachta frithchaolúcháin, is é sin táillí fuascailte, luascphraghsáil, déphraghsáil agus tobhaigh frithchaolúcháin, ba cheart costas measta na leachtachta a fhorchur ar infheisteoirí a dhéanann suibscríobh agus ar infheisteoirí a dhéanann fuascailt. Is éard atá i gcostais leachtachta costais shainráite agus intuigthe idirbhirt a bhaineann le suibscríbhinní nó fuascailtí, lena n-áirítear aon tionchar mór ar an margadh. Ba cheart do GCUI a dhéanann uirlis bainistithe leachtachta frithchaolúcháin a ghníomhachtú na costais idirbhirt shainráite mheasta a chur san áireamh. I gcás inarb iomchuí dá straitéis infheistíochta, ba cheart don GCUI na costais idirbhirt intuigthe a chur san áireamh freisin, lena n-áirítear aon tionchar mór ar an margadh a bhíonn ag ceannacháin nó díolacháin sócmhainní, chun orduithe fuascailte a íoc. Chun éagsúlacht sócmhainní foluiteacha GCUI a chur san áireamh, i gcás nach bhfuil faisnéis chun costais idirbhirt intuigthe a ríomh, lena n-áirítear tionchar mór ar an margadh, ar fáil nó iontaofa, ba cheart na costais idirbheart sin a mheas ar bhonn na hiarrachta is fearr.

(9)

Chun costas na leachtachta arna giniúint ag infheisteoirí a dhéanann fuascailt a chumhdach, ba cheart do shealbhóirí aonad nó do scairshealbhóirí táillí fuascailte a íoc leis an GCUI agus a n-aonaid nó a scaireanna á bhfuascailt acu. Agus táillí fuascailte á gcur i bhfeidhm, ba cheart do GCUI a bheith in ann na táillí fuascailte sin a asbhaint ón méid airgid a íoctar le hinfheisteoirí a dhéanann fuascailt.

(10)

Mar shaintréith de luascphraghsáil, ba cheart do GCUI luascfhachtóir a chinneadh a bheidh le húsáid chun glanluach sócmhainní a aonad nó a scaireanna a choigeartú. Chun a áirithiú go n-íocfaidh gach infheisteoir a dhéanann suibscríobh agus go bhfaighidh gach infheisteoir a dhéanann fuascailt an praghas céanna agus aonaid nó scaireanna in GCUI á gceannach nó á bhfuascailt acu, ba cheart gurb é glanluach sócmhainní foilsithe aonaid nó scaireanna an GCUI sin an glanluach sócmhainní tar éis an luascfhachtóir a chur i bhfeidhm.

(11)

Chun a áirithiú go gcaithfear go cothrom le hinfheisteoirí agus chun maolú a dhéanamh ar na héifeachtaí caolúcháin arb iad is cúis leis na héifeachtaí sin costais idirbhirt a eascraíonn as infheisteoirí a dhéanann suibscríobh nó a dhéanann fuascailt, ba cheart an ceart a bheith ag GCUI a bhaineann úsáid as luascphraghsáil glanluach sócmhainní a aonad nó a scaireanna a choigeartú ar gach dáta déileála (dá ngairtear ‘lán-luascadh’ de ghnáth) nó ach amháin i gcás ina bhfuil na glansuibscríbhinní nó na glanfhuascailtí níos mó ná tairseach réamhshocraithe (dá ngairtear ‘páirt-luascadh’ de ghnáth). Faoin dá chineál luascphraghsála, cinntear treo an luasctha (i.e., cé acu a ndéantar an luascfhachtóir a chur le glanluach sócmhainní aonaid nó scaireanna an GCUI nó a asbhaint as) de réir ghlanghníomhaíocht chaipitil an dáta déileála. Dá bhrí sin, i gcás dáta déileála ar leith ar a dtarlaíonn glansuibscríbhinní, ba cheart an luascfhachtóir a chur le glanluach sócmhainní aonaid nó scaireanna an GCUI a ndéanfar é a choigeartú suas. Sa chás contrártha, i gcás dáta déileála ar leith ar a dtarlaíonn glanfhuascailtí, ba cheart luascfhachtóir a asbhaint ó ghlanluach sócmhainní aonaid nó scaireanna an GCUI a ndéanfar é a choigeartú síos. Chun a áirithiú go gcaithfear go cothrom le hinfheisteoirí agus chun úsáid luascphraghsála a éascú faoi ghnáthdhálaí agus faoi dhálaí struis sa mhargadh araon, faoin dá chineál luascphraghsála, ba cheart do GCUI a bheith in ann a chinneadh go mbeidh luascfhachtóir amháin aige nó chun luascfhachtóirí a chur i bhfeidhm ag brath ar mhéid na glanghníomhaíochta caipitil (dá ngairtear ‘cur chuige srathach’ de ghnáth) nó féidearthachtaí eile a chur i bhfeidhm, lena n-áirítear cineálacha cur chuige measctha.

(12)

Le saintréithe déphraghsála ba cheart aghaidh a thabhairt ar a modheolaíocht ríofa. Chun éagsúlacht na straitéisí infheistíochta agus na mbeartas fuascailte a chur san áireamh, agus i gcomhréir le moltaí idirnáisiúnta, ba cheart do GCUI dhá mhodheolaíocht ríofa mhalartacha le haghaidh déphraghsála a mheas trí dhá ghlanluach sócmhainní ar leith lena n-ionchorpraítear praghsanna iarrata agus tairisceana sócmhainní faoi seach a ríomh nó trí raon difríochta inchoigeartaithe a shocrú timpeall ar ghlanluach sócmhainní a aonad nó a scaireanna.

(13)

Chun infheisteoirí atá fágtha sa GCUI a chosaint ar thionchar caolúcháin suibscríbhinní nó fuascailtí a d’fhéadfadh a bheith mór, ba cheart do GCUI a dhéanann an tobhach frithchaolúcháin a ghníomhachtú an tobhach sin a chur i bhfeidhm maidir le hinfheisteoirí a dhéanann fuascailt i gcás glanfhuascailtí agus maidir le hinfheisteoirí a dhéanann suibscríobh i gcás glansuibscríbhinní.

(14)

Ba cheart do GCUI a bheith in ann fuascailt chomhchineáil a ghníomhachtú chun cosc a chur ar dhíol bloc mór urrús mar fhreagairt ar orduithe fuascailte, i gcás inar dócha go mbeadh costais shuntasacha idirbhirt agus tionchair mhóra ar phraghsanna an mhargaidh dá scairshealbhóirí nó dá shealbhóirí aonad mar thoradh ar dhíol den sórt sin.

(15)

Rannpháirtithe údaraithe, agus cruthaitheoirí margaidh mar a shainmhínítear in Airteagal 4(1), pointe (7), de Threoir 2014/65/AE ó Pharlaimint na hEorpa agus ón gComhairle (3), comhlíonann siad feidhmeanna fíor-riachtanacha le haghaidh oibríochtaí laethúla GCUInna arna dtrádáil ar an malartán. Áirítear le ról rannpháirtithe údaraithe agus cruthaitheoirí margaidh aonaid nó scaireanna GCUI arna dtrádáil ar an malartán a fháil nó a dhíol ar an margadh tánaisteach, cúnamh a thabhairt do chuideachta bainistíochta an GCUI arna thrádáil ar an malartán maidir le horduithe a fhorghníomhú, chomh maith le leachtacht leanúnach agus trádáil ar an margadh tánaisteach a áirithiú. Mar chuid de ghníomhaíocht déileála rialta GCUI arna thrádáil ar an malartán, níor cheart a mheas gur gníomhachtú na huirlise bainistithe leachtachta comhchineáil dá dtagraítear i bpointe 8 d’Iarscríbhinn IIA a ghabhann le Treoir 2009/65/CE é seachadadh iomlán nó páirteach d’urrúis fholuiteacha arna sealbhú ag GCUI arna thrádáil ar an malartán, nó thar a cheann, chuig rannpháirtithe údaraithe agus cruthaitheoirí margaidh chun orduithe fuascailte a íoc, toisc nach mbaineann oibríocht den sórt sin le bainistiú leachtachta punainne GCUI arna thrádáil ar an malartán.

(16)

Chun maolú a dhéanamh ar rioscaí leachtachta i ndáil le sócmhainní an GCUI a bhfuil athrú suntasach tagtha ar ghnéithe eacnamaíocha nó dlíthiúla ina leith nó a bhfuil éiginnteacht ag baint leo de bharr imthosca eisceachtúla, ba cheart do GCUI a bheith in ann taobhphócaí a ghníomhachtú trí dheighilt chuntasaíochta nó trí dheighilt fhisiceach.

(17)

I gcás ina mbíonn sé chun leas an GCUI agus a infheisteoirí an taobhphóca a choinneáil laistigh den struchtúr ciste atá ann cheana, ba cheart do GCUI a bheith in ann taobhphóca a chruthú trí dheighilt chuntasaíochta. Sa chás sin, maidir le sócmhainní a bhfuil athrú suntasach tagtha ar ghnéithe eacnamaíocha nó dlíthiúla ina leith nó a bhfuil éiginnteacht ag baint leo de bharr imthosca eisceachtúla, ba cheart iad a leithdháileadh ar aicme scaireanna thiomnaithe de chuid an GCUI.

(18)

I gcás ina mbíonn sé chun leas an GCUI na sócmhainní a scaradh amach go fisiceach a bhfuil athrú suntasach tagtha ar ghnéithe eacnamaíocha nó dlíthiúla ina leith nó a bhfuil éiginnteacht ag baint leo de bharr imthosca eisceachtúla, ba cheart don GCUI a bheith in ann taobhphóca a chruthú trí dheighilt fhisiceach. Sa chás sin, ba cheart na sócmhainní dá ndéantar difear fanacht sa GCUI bunaidh, agus ba cheart sócmhainní an GCUI nach ndéantar difear dóibh a aistriú chuig ciste nua.

(19)

Chun infheisteoirí a chosaint agus chun an riosca tógálachta don chuid eile de na GCUInna a mhaolú, ba cheart taobhphócaí a dhúnadh do shuibscríbhinní, d’athcheannach agus d’fhuascailtí. Mar sin féin, ar mhaithe le hinfheisteoirí, ba cheart GCUI, gan beann ar cé acu a chruthaítear an taobhphóca trí dheighilt chuntasaíochta nó trí dheighilt fhisiceach, a bheith in ann an taobhphóca a dhiúscairt nó a leachtú agus aon fháltas a dháileadh ar na hinfheisteoirí deiridh i gcomhréir lena rannpháirtíocht sa taobhphóca.

(20)

Chun deimhneacht dhlíthiúil agus comhsheasmhacht le Treoir 2009/65/CE a áirithiú, i gcás GCUInna a bhunaítear tar éis dháta theacht i bhfeidhm an Rialacháin seo, ba cheart feidhm a bheith ag an Rialachán seo ón 16 Aibreán 2026. Chun go gcomhlíonfar an Rialachán seo, cheanglófaí freisin athruithe ar dhoiciméadacht an chiste agus nuashonrú ar phróisis agus ar bhonneagar teicniúil GCUInna agus a gcuideachtaí bainistíochta atá ann cheana chun tacú le gníomhachtú na n-uirlisí bainistithe leachtachta roghnaithe. Is gá, dá bhrí sin, foráil a dhéanamh maidir le hidirthréimhse 1 bhliana do GCUInna a bunaíodh roimh dháta chur i bhfeidhm an Rialacháin seo chun cur ar a gcumas do na GCUInna sin oiriúnú don chóras nua. Mar sin féin, ba cheart an deis a bheith ag na GCUInna sin fós a roghnú a bheith faoi réir an Rialacháin seo ó dháta a chur i bhfeidhm, i.e. ón 16 Aibreán 2026.

(21)

Tá an Rialachán seo bunaithe ar na dréachtchaighdeáin theicniúla rialála a chuir an tÚdarás Eorpach um Urrúis agus Margaí faoi bhráid an Choimisiúin.

(22)

Reáchtáil an tÚdarás Eorpach um Urrúis agus Margaí comhairliúchán poiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus na tairbhí a d’fhéadfadh a bheith ag baint leo agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (4),