(1)

Déantar foráil i gCaibidil V de Theideal II de Rialachán (CE) Uimh. 1186/2009 ón gComhairle (1) maidir le faoiseamh ó dhleachtanna allmhairiúcháin ar earraí a sheoltar go díreach ó thríú tír chuig coinsíní san Aontas i gcoinsíneachtaí nach mó ná EUR 150 an luach intreach iomlán atá orthu (‘an faoiseamh bunaithe ar thairseach’).

(2)

Go dtí an 1 Iúil 2021, bhí an CBL ar allmhairí díolmhaithe freisin maidir le hearraí a allmhairiú nár mhó a luach ná EUR 22. Mar gheall ar an méadú ar mhéid na n-allmhairí ar luach íseal tar éis fhás pléascach na ríomhthráchtála agus na n-éascuithe a bhaineann léi, ba dhúshlán do na húdaráis custaim comhlíonadh ceanglas fioscach agus neamhfhioscach a fhorfheidhmiú. Dá bhrí sin, le Treoir (AE) 2017/2455 ón gComhairle (2) cuireadh deireadh leis an díolúine ó CBL ar allmhairí le haghaidh na n-earraí íseal-luacha sin chun ioncam cánach na mBallstát a chosaint, chun cothrom iomaíochta a chruthú do na gnólachtaí lena mbaineann agus chun an t-ualach ar na gnólachtaí sin a íoslaghdú. An tráth céanna, coinníodh an faoiseamh ó dhleacht chustaim le haghaidh earraí faoi bhun EUR 150. Mar sin féin, tá sé cruthaithe go bhfágtar leis sin an doras ar oscailt le haghaidh mhí-úsáid chórasach na tairsí sin trí choinsíneachtaí a thearcluacháil agus a scoilteadh go saorga.

(3)

I dtimpeallacht chustaim dhigitithe ina bhfuil sonraí leictreonacha ar fáil le haghaidh na n-earraí allmhairithe uile gan beann ar a luach, níl údar a thuilleadh le faoiseamh ó dhleacht chustaim a choimeád ar faoiseamh é a tugadh isteach chun an t-ualach riaracháin díréireach ar údaráis chustaim, ar ghnólachtaí ná ar dhaoine príobháideacha a chosc. An tráth céanna, i bhfianaise mhéideanna suntasacha na n-allmhairí íseal-luacha, tá sé riachtanach anois leasanna airgeadais an Aontais agus a Bhallstát a chosaint ar bhealach níos éifeachtúla.

(4)

Is gá, dá bhrí sin, deireadh a chur leis an bhfaoiseamh tairseachbhunaithe agus Caibidil V de Theideal II de Rialachán (CE) Uimh. 1186/2009 a scriosadh.

(5)

I bhfianaise na ndúshlán atá léirithe ag an líon mór beartán beag a thagann isteach san Aontas, do thomhaltóirí agus do ghnólachtaí Eorpacha araon, tá sé tábhachtach leanúint ar aghaidh le deireadh tapa a chur leis an bhfaoiseamh tairseachbhunaithe. Mar sin féin, go dtí go nglacfar Cód Custaim nua an Aontais, a bhfuiltear ag súil leis go mbunófar leis bonneagar TF láraithe nua de chuid an Aontais atá ríthábhachtach chun an fiach custaim a ríomh agus fógra a thabhairt ina leith go héifeachtach, ba cheart beart idirthréimhseach de chineál sealadach a thabhairt isteach maidir leis na méideanna uile dá dtagraítear in Airteagal 1 de Rialachán (CE) Uimh. 1186/2009 chun cur chun feidhme nithiúil dhíothú an fhaoisimh sin a éascú.

(6)

Faoin mbeart idirthréimhseach sin, ní mór na huirlisí digiteacha atá ann cheana ar leibhéal an Aontais agus ar an leibhéal náisiúnta a úsáid chun bainistiú a dhéanamh ar na héifeachtaí praiticiúla a eascraíonn as deireadh a chur leis an bhfaoiseamh tairseachbhunaithe. I bhfianaise theorainneacha teicniúla na n-uirlisí sin i ndáil leis an méadú ollmhór ar oibríochtaí a bheidh ar údaráis chustaim a bhainistiú mar thoradh air sin, ba cheart feidhm a bheith ag cóireáil taraife shealadach shimplithe bunaithe ar mhéid dleachta custaim sonrach aonair in aghaidh an earra, gan tionscnamh na n-earraí a mheas agus lena gcumhdaítear earraí i gcoinsíneachtaí nach mó a luach intreach ná EUR 150 san iomlán, maidir le gach oibreoir eacnamaíoch a chláraigh leis an scéim speisialta a leagtar síos i dTeideal XII, Caibidil 6, Roinn 4 de Threoir 2006/112/CE ón gComhairle (3) (Scéim Ionad Ilfhreastail Allmhairiúcháin, ‘scéim IOSS’) agus a bhaineann úsáid as an scéim sin, agus maidir le hearraí i gcoinsíneacht poist mar a shainmhínítear in Airteagal 1, pointe (24) de Rialachán Tarmligthe (AE) 2015/2446 ón gCoimisiún (4). Os a choinne sin, ba cheart go leanfadh an Chomhtharaif Chustaim, dá bhforáiltear i Rialachán (CEE) Uimh. 2658/87 ón gComhairle (5), d’fheidhm a bheith aici maidir le gach oibreoir eile nach bhfuil cláraithe don scéim IOSS.

(7)

Ba cheart feidhm a bheith ag an mbeart idirthréimhseach freisin ós rud é nach bhfuil an t-aicmiú taraife le haghaidh na n-earraí lena mbaineann sa dearbhú custaim ach ar leibhéal fho-cheannteidil an Chórais Chomhchuibhithe agus, dá bhrí sin, nach bhfuil sé sonrach go leor chun an dleacht chustaim bheacht a chinneadh bunaithe ar an aicmiú taraife iomlán faoin Ainmníocht Chomhcheangailte a bunaíodh le Rialachán (CEE) Uimh. 2658/87.

(8)

I bhfianaise líon mór na mbeartán beag a thagann isteach san Aontas lena mbíonn ar na riaracháin chustaim deileáil, i bhfianaise na céime gairide cur chun feidhme agus i bhfianaise an ghá atá leis na huirlisí TF náisiúnta a úsáid chun an chóireáil taraife shealadach shimplithe a bhunú, is gá an dúshlán atá roimh na Ballstáit a aithint agus cur chun feidhme praiticiúil dhíothú an fhaoisimh tairseachbhunaithe á áirithiú acu. Má tharlaíonn sé nach féidir na hacmhainní dílse traidisiúnta atá bunaithe ar chur i bhfeidhm na cóireála taraife sealadaí simplithe a aisghabháil, is gá na himthosca dúshlánacha sin a chur san áireamh agus measúnú á dhéanamh ar cibé acu ba cheart nó nár cheart an Ballstát ábhartha a scaoileadh ón oibleagáid na méideanna a chomhfhreagraíonn do na dleachtanna bunaithe de bhun Airteagal 13(2), pointe (b), de Rialachán (AE, Euratom) Uimh. 609/2014 ón gComhairle (6) a chur ar fáil don Choimisiún.

(9)

Ba cheart dhá chlásal measúnaithe agus athbhreithnithe a áireamh sa Rialachán seo; ceann amháin chun a mheas an bhfuil atreorú sreafaí trádála ann, go háirithe ón scéim IOSS agus isteach i scéim neamh-IOSS, chun a sheachaint go n-íocfadh gníomhaithe an dleacht shealadach ar ráta comhréidh. Chun an measúnú sin a dhéanamh, tá sé tábhachtach go n-úsáidfidh an Coimisiún na sonraí atá ar fáil dó. Ba cheart gurb é cuspóir an mheasúnaithe agus an athbhreithnithe eile faireachán a dhéanamh ar an dul chun cinn maidir le bonneagar TF láraithe nua an Aontais a fhorbairt, rud a mheastar a bheith ríthábhachtach chun an fiach custaim in idirbhearta ríomhthráchtála a ríomh agus fógra a thabhairt ina leith go héifeachtach. Ba cheart an measúnú sin a dhéanamh d’fhonn a chinneadh an gá síneadh a chur leis an mbeart idirthréimhseach a bhunaítear leis an Rialachán seo.

(10)

I gcomhréir le prionsabal na comhréireachta mar a leagtar amach in Airteagal 5 den Chonradh ar an Aontas Eorpach, ní théann an Rialachán seo thar a bhfuil riachtanach chun cuspóirí na gConarthaí a chomhlíonadh, go háirithe feidhmiú rianúil an aontais custaim agus an mhargaidh aonair.

(11)

Dá bhrí sin, ba cheart Rialachán (CE) Uimh. 1186/2009 a leasú dá réir,

(a)

tá allmhairiú na n-earraí díolmhaithe ó CBL i gcomhréir le hAirteagal 143(1), pointe (ca), de Threoir 2006/112/CE; nó

(b)

tá na hearraí i gcoinsíneacht poist mar a shainmhínítear in Airteagal 1, pointe (24), de Rialachán Tarmligthe (AE) 2015/2446.