(3)

Is éard atá sa táirge atá faoi réir a chláraithe (‘an táirge lena mbaineann’) aerbhoinn nua, déanta as rubar, de chineál a úsáidtear: ar ghluaisteáin (lena n-áirítear cairr a bhfuil fad breise iontu agus cairr rásaíochta) agus ar bhusanna nó ar leoraithe a bhfuil innéacs ualaigh nach mó ná 121 acu de thionscnamh Dhaon-Phoblacht na Síne, a aicmítear faoi láthair faoi chóid AC 4011 10 00 agus 4011 20 10 .

(4)

Faoi Airteagal 24(5) den bhun-Rialachán, féadfar allmhairí an táirge lena mbaineann a chur faoi réir a gcláraithe.

(5)

Is é is cuspóir don chlárú a áirithiú gur féidir dleachtanna frithchúitimh, más ann dóibh, a thobhach go cúlghabhálach ar na hallmhairí atá faoi réir a gcláraithe i gcomhréir leis na forálacha dlí is infheidhme má chomhlíontar na coinníollacha is gá.

(6)

Chinn an Coimisiún, ar a thionscnamh féin, allmhairí an táirge lena mbaineann a chur faoi réir a gcláraithe faoi Airteagal 24(5) den bhun-Rialachán. Na coinníollacha le haghaidh bhailiú cúlghabhálach na ndleachtanna, más ann dóibh, déanfar measúnú orthu sa Rialachán lena bhforchuirfear dleachtanna cinntitheacha.

(7)

Aon dliteanas a bheadh ann amach anseo, is as torthaí an imscrúdaithe frith-fhóirdheontais a thiocfadh sé.

(8)

Ag an gcéim seo san imscrúdú, ní féidir meastachán cruinn a dhéanamh ar mhéid an fhóirdheonaithe go fóill. Níl meastachán cruinn sa ghearán ar mhéid an fhóirdheonaithe, ar cheart é a úsáid de ghnáth mar bhonn chun na dleachtanna frithchúitimh a shuí. De réir na ríomhanna arna soláthar sa ghearán inar iarradh imscrúdú frith-fhóirdheontais a thionscnamh, meastar leibhéal díothaithe díobhála idir 70 % agus 165 % a bheith ann le haghaidh an táirge lena mbaineann sa tréimhse ón 1 Deireadh Fómhair 2023 go dtí an 30 Meán Fómhair 2024. Dhéanfaí an méid dliteanais a d’fhéadfadh a bheith ann amach anseo a shocrú ar leibhéal mhéid na bhfóirdheontas in-fhrithchúitithe arna shuí le linn an imscrúdaithe. I gcomhréir le hAirteagal 15(1), an ceathrú mír, den bhun-Rialachán, ní bheadh an leibhéal díothaithe díobhála ábhartha ach amháin i gcás ina mbeadh dleacht bunaithe ar mhéid na bhfóirdheontas in-fhrithchúitithe níos airde agus ina gcinnfeadh an Coimisiún go soiléir nach chun leasa an Aontais é an dleacht níos airde a fhorchur. Mar sin féin, ag an gcéim seo ní féidir leis an gCoimisiún an méid dliteanais a d’fhéadfaí a bheith ann amach anseo a mheas. Dá bhrí sin, is ar mhaithe le faisnéis amháin atá na méideanna a luaitear sa ghearán agus ní féidir aon choinne a bheith leis an leibhéal iarbhír dliteanais a shuífear mar thoradh ar an imscrúdú a bheith bunaithe orthu.

(9)

Aon sonraí pearsanta a bhaileofar i gcomhthéacs an chlárúcháin seo, déanfar iad a láimhseáil i gcomhréir le Rialachán (AE) 2018/1725 ó Pharlaimint na hEorpa agus ón gComhairle (3),