(1)

I gcomhréir le hAirteagal 5 de Rialachán (AE) 2017/852, toirmeasctar san Aontas onnmhairiú, allmhairiú agus monarú na dtáirgí ar cuireadh mearcair leo a leagtar amach in Iarscríbhinn II a ghabhann leis an Rialachán sin ó na dátaí a leagtar amach san Iarscríbhinn sin. Níl feidhm ag an toirmeasc sin maidir le táirgí atá bunriachtanach le haghaidh úsáidí cosanta shibhialta agus úsáidí míleata ná maidir le táirgí le haghaidh taighde, le haghaidh calabrú ionstraimíochta, nó atá ceaptha lena n-úsáid mar chaighdeán tagartha.

(2)

Thug an tAontas Coinbhinsiún Minamata maidir le Mearcair (‘an Coinbhinsiún’) i gcrích le Cinneadh (AE) 2017/939 ón gComhairle (2) agus tháinig sé i bhfeidhm an 16 Lúnasa 2017. Toirmisctear le hAirteagal 4(1) den Choinbhinsiún onnmhairiú, allmhairiú agus mhonarú a dhéanamh ar tháirgí ar cuireadh mearcair leo a liostaítear i gCuid I d’Iarscríbhinn A a ghabhann leis an gCoinbhinsiún sin tar éis an dáta a shonraítear maidir le deireadh a chur le húsáid na dtáirgí sin de réir a chéile. Le hAirteagal 4(8) den Choinbhinsiún, ceanglaítear ar Chomhdháil na bPáirtithe sa Choinbhinsiún (‘COP’) athbhreithniú a dhéanamh ar Iarscríbhinn A a ghabhann leis an gCoinbhinsiún tráth nach déanaí ná 5 bliana tar éis an dáta a thiocfaidh sé i bhfeidhm.

(3)

Ag an gcúigiú cruinniú de COP, a reáchtáladh ón 30 Deireadh Fómhair go dtí an 3 Samhain 2023, ghlac sé Cinneadh MC-5/4 (3) lena leasaítear Cuid I d’Iarscríbhinn A a ghabhann leis an gCoinbhinsiún trí chúig chatagóir lampa ina bhfuil mearcair a chur san áireamh mar aon le ceallraí, droichid tomhais toillis agus caillteanais, ar droichid an-ardbheachtais iad agus lasca agus athsheachadáin radaimhinicíochta, ar lasca agus athsheachadáin ardmhinicíochta iad, in ionstraimí rialúcháin agus monatóireachta nach mó an cion mearcair iontu ná 20 mg in aghaidh an droichid, na laisce nó an athsheachadáin, seachas na cinn a úsáidtear chun críoch taighde agus forbartha, agus táirgí cosmaideacha a chur san áireamh, agus lena sonraítear na dátaí is infheidhme maidir le deireadh a chur lena n-úsáid de réir a chéile. Thacaigh an tAontas leis an gCinneadh sin trí bhíthin Chinntí (AE) 2022/549 (4) agus (AE) 2023/2417 (5) ón gComhairle.

(4)

Chun Rialachán (AE) 2017/852 a ailíniú le Cinneadh MC-5/4, is gá na táirgí seo a leanas ar cuireadh mearcair leo a áireamh i gCuid A d’Iarscríbhinn II a ghabhann leis an Rialachán sin: droichid tomhais toillis agus caillteanais, ar droichid an-ardbheachtais iad, agus lasca agus athsheachadáin radaimhinicíochta, ar lasca agus athsheachadáin ardmhinicíochta iad, in ionstraimí rialúcháin agus monatóireachta nach mó an cion mearcair iontu ná 20 mg in aghaidh an droichid, na laisce nó an athsheachadáin, seachas na cinn a úsáidtear chun críoch taighde agus forbartha.

(5)

Ba cheart, dá bhrí sin, Rialachán (AE) 2017/852 a leasú dá réir,