(1)

Le Treoir 2002/32/CE ó Pharlaimint na hEorpa agus ón gComhairle (1) leagtar síos an t-uasleibhéal le haghaidh substaintí neamh-inmhianaithe áirithe, lena n-áirítear eargót seagail (Claviceps purpurea) i mbeatha.

(2)

Le Moladh 2012/154/AE ón gCoimisiún (2), moladh faireachán a dhéanamh ar láithreacht alcalóideach eargóit i ngránaigh agus táirgí gránach atá ceaptha mar bheatha ainmhithe, i bhféara féaraigh/foráiste le haghaidh beatha ainmhithe agus i mbeatha chumaisc.

(3)

An 28 Meitheamh 2012, ghlac an tÚdarás Eorpach um Shábháilteacht Bia (‘an tÚdarás’) tuairim maidir le halcalóidigh eargóit i mbia agus i mbeatha (3). Is ar phríomh-alcalóidigh eargóit Claviceps purpurea a bhunaigh an tÚdarás a mheasúnú riosca, is é sin eirgimeitrín, eargótaimín, eargóisín, eirgicristín, eirgicriptín, eirgeacoirnín, chomh maith leis na heipimirí ‘-inín’ comhghaolmhara. Ós rud é go bhféadfadh Claviceps africana agus Claviceps fusiformis a bheith ábhartha le haghaidh beatha allmhairithe isteach san Aontas, ba cheart faireachán a dhéanamh ar a n-alcalóidigh eargóit is líonmhaire go háirithe dé-hidreargóisín agus agraclaivín, faoi seach. Tá eargóvailín ar cheann de na halcalóidigh eargóit a fhaightear de ghnáth i speicis féir atá ionfhabhtaithe le hinfít amhail feisciú ard nó seagalach bhuan.

(4)

An 6 Iúil 2017, d’fhoilsigh an tÚdarás tuarascáil eolaíoch faoi nochtadh cothúcháin daoine agus ainmhithe d’alcalóidigh eargóit (4). Moltar sa tuarascáil gur cheart leanúint de shonraí anailíseacha maidir le halcalóidigh eargóit i dtráchtearraí beatha ábhartha a bhailiú. Thairis sin, ba cheart leanúint de shonraí maidir le láithreacht scléaróití eargóit agus maidir le cion na n-alcalóideach eargóit i dtráchtearraí éagsúla beatha a bhailiú go comhuaineach, chun cuidiú le tuiscint níos fearr a fháil ar an gcaidreamh idir an dá athróg sin. Ba cheart modhanna anailíse atá ar fáil agus a bhfuil íogaireacht leormhaith acu a úsáid le haghaidh an fhaireacháin.

(5)

An 30 Samhain 2023, ghlac an tÚdarás tuairim maidir leis na rioscaí do shláinte ainmhithe a bhaineann le láithreacht alcalóideach eargóit i mbeatha (5). Measann an tÚdarás go bhfuil láithreacht alcalóideach eargóit i mbeatha ina cúis imní ó thaobh na sláinte de i mbó-ainmhithe agus i muca (bainbh, muca lena ramhrú agus cránacha). Chuir an tÚdarás i dtábhacht go bhfuil gá le tuilleadh sonraí minicíochta maidir le halcalóidigh eargóit, go háirithe i bhforáiste agus i sorgam agus maidir le heargóvailín/eargóvailinín i bhforáiste. Maidir leis na sonraí minicíochta a chuirfí faoi bhráid an Údaráis, ba cheart faisnéis leormhaith a bheith iontu i dtaobh na samplaí beatha a ndearnadh anailís orthu, lena n-áirítear an cion taise, na spriocainmhithe agus an cineál beatha cumaisc (iomlán/comhlántach) agus ba cheart modhanna íogaire a úsáid le haghaidh na hanailíse.

(6)

Dá bhrí sin, is iomchuí a mholadh go ndéanfaí faireachán ar alcalóidigh eargóit i mbeatha ar fud an Aontais,