(1)

Ghlac Painéal an Údaráis Eorpaigh um Shábháilteacht Bia (‘an tÚdarás’) maidir le hÉilleáin sa Bhiashlabhra tuairim in 2019 maidir leis na rioscaí do shláinte ainmhithe agus do shláinte an duine a bhaineann le láithreacht alcalóideach cuineoilisidín i mbeatha agus i mbia, go háirithe i lúipíní agus táirgí a dhíorthaítear ó lúipíní (1).

(2)

Shainaithin an Painéal maidir le hÉilleáin sa Bhiashlabhra dáileog éifeachtach béil aonair is ísle 0,16 mg de spairtéin/kg de mheáchan coirp mar phointe tagartha chun an riosca tar éis géarnochtadh a shaintréithriú agus mheas sé nach féidir pointe tagartha a shainaithin chun an riosca tar éis nochtadh ainsealach a shaintréithriú. Mar gheall ar na sonraí teoranta maidir le halcalóidigh chuineoilisidín a bheith i lúipíní agus bianna a dhíorthaítear ó lúipíní agus maidir le tomhailt na mbianna sin, ríomhadh nochtadh cothúcháin le haghaidh roinnt cásanna sonracha amháin agus ní raibh sé indéanta saintréithriú iomlán riosca do shláinte an duine a dhéanamh. Mar sin féin, mheas an tÚdarás go bhféadfadh riosca do roinnt tomhaltóirí a bheith ann de réir na sonraí. Dá bhrí sin, mhol an Painéal maidir le hÉilleáin sa Bhiashlabhra gur cheart tuilleadh sonraí minicíochta maidir le láithreacht alcalóideach cuineoilisidín i lúipíní agus táirgí a dhíorthaítear ó lúipíní a bhailiú.

(3)

Ina theannta sin, ba cheart tuilleadh faisnéise a bhailiú faoi na tosca as a n-eascraíonn leibhéil sách ard alcalóideach cuineoilisidín i lúipíní agus bia a dhíorthaítear ó lúipíní, chun na bearta atá le glacadh a shainaithin chun láithreacht alcalóideach cuineoilisidín sna bia-ábhair sin a sheachaint nó a laghdú.

(4)

Dá bhrí sin, is iomchuí a mholadh go ndéanfaí faireachán ar alcalóidigh chuineoilisidín i lúipíní agus bia a dhíorthaítear ó lúipíní, na tosca as a n-eascraíonn a leibhéil ard a shainaithint, agus tuilleadh faisnéise faoi éifeachtaí na próiseála ar leibhéal na n-alcalóideach cuineoilisidín a bhailiú.