(1)

An 17 Meitheamh 2026 rinneadh iarraidh ar chlárú tionscnaimh Eorpaigh ó na saoránaigh dar teideal ‘Stop Killing The Internet: No Digital ID & No Age Verification’ a chur faoi bhráid an Choimisiúin.

(2)

Is é is cuspóir an tionscnaimh mar a chuir na heagraithe in iúl é, ‘a iarraidh ar an gCoimisiún Eorpach reachtaíocht a mholadh lena gcinnteofar maidir le córais céannachta digití agus dearbhaithe aoise a úsáidtear chun rochtain a fháil ar sheirbhísí ar líne san Aontas, go leanfaidh na córais sin de bheith deonach neamh-idirdhealaitheach, agus den phríobháideachas a chosaint’. Measann na heagraithe ‘nach gá iallach a chur ar shaoránaigh a chur in iúl cé hiad féin chun rochtain a fháil ar ábhar dleathach nó ar sheirbhísí dleathacha ar líne mura bhfuil géarghá leis, mura bhfuil sé comhréireach, agus mura ndearnadh foráil dlí ina thaobh. Leis an reachtaíocht sin, ba cheart na nithe seo a leanas a éileamh - cruthúnas aoise anaithnid nó faoi ainm bréige, íoslaghdú sonraí, nochtadh roghnaitheach, cur chun feidhme foinse oscailte, iniúchtaí slándála neamhspleácha, toirmeasc a bheith ar pháirtithe is úsáideoirí rianú tras-seirbhíse a dhéanamh, agus roghanna malartacha coibhéiseacha le haghaidh saoránaigh nach n-úsáideann tiachóg dhigiteach’. In iarscríbhinn a ghabhann leis an tionscnamh, tá tuilleadh sonraí maidir lena chúlra, leis an ábhar atá ann agus leis na cuspóirí a bhaineann leis.

(3)

Measann an Coimisiún, bunaithe ar Airteagail 16 agus 114 den Chonradh ar Fheidhmiú an Aontais Eorpaigh (CFAE), go bhféadfadh sé reachtaíocht a mholadh lena gcinnteofar maidir le córais céannachta digití agus dearbhaithe aoise a úsáidtear chun rochtain a fháil ar sheirbhísí ar líne san Aontas, go leanfaidh na córais sin de bheith deonach neamh-idirdhealaitheach, agus den phríobháideachas a chosaint, ionas nach mbeadh ar shaoránaigh a chur in iúl cé hiad féin chun rochtain a fháil ar ábhar dleathach nó ar sheirbhísí dleathacha ar líne mura bhfuil géarghá leis, mura bhfuil sé comhréireach, agus mura ndearnadh foráil dlí ina thaobh.

(4)

Ar an gcúis sin, measann an Coimisiún nach bhfuil aon chuid den tionscnamh ann ar follas nach dtagann sí faoi chreat chumhachtaí an Choimisiúin togra a thíolacadh le haghaidh gníomh dlí de chuid an Aontais chun na Conarthaí a chur chun feidhme.

(5)

Is conclúid é sin nach ndéanann difear don mheasúnú ar cé acu a chomhlíonfaí nó nach gcomhlíonfaí, sa chás seo, na coinníollacha coincréiteacha substainteacha ba ghá chun go ngníomhódh an Coimisiún, coinníollacha lena n-áirítear comhlíonadh phrionsabail na comhréireachta agus na coimhdeachta, sin agus comhoiriúnacht do chearta bunúsacha.

(6)

Tá fianaise iomchuí curtha ar fáil ag an ngrúpa d’eagraithe go gcomhlíontar na ceanglais a leagtar síos in Airteagal 5(1) agus (2) de Rialachán (AE) 2019/788, agus go bhfuil na daoine teagmhála ainmnithe aige i gcomhréir le hAirteagal 5(3), an chéad fhomhír, den Rialachán sin.

(7)

Ní tionscnamh é ar follas é a bheith míchuí, suaibhreosach ná cráiteach, ná ní follas go bhfuil sé contrártha do luachanna an Aontais mar a leagtar amach in Airteagal 2 den Chonradh ar an Aontas Eorpach iad ná do na cearta a chumhdaítear i gCairt um Chearta Bunúsacha an Aontais Eorpaigh.

(8)

Dá bhrí sin, ba cheart an tionscnamh dar teideal ‘Stop Killing The Internet: No Digital ID & No Age Verification’ a chlárú.

(9)

An chonclúid go gcomhlíontar na coinníollacha maidir le clárú faoi Airteagal 6(3) de Rialachán (AE) 2019/788, ní thugann sí le tuiscint go ndearbhaíonn an Coimisiún ar bhealach ar bith go bhfuil inneachar an tionscnaimh cruinn fíorasach, agus is iad an grúpa d’eagraithe atá i mbun an tionscnaimh, agus iadsan amháin, atá freagrach as an méid sin. Ní chuireann inneachar an tionscnaimh in iúl ach tuairimí an ghrúpa d’eagraithe, agus ní féidir a dhéanamh amach ar aon bhealach gurb iad tuairimí an Choimisiúin a léiríonn sé.