(1)

Le Cinneadh Cur Chun Feidhme (AE) 2015/696 ón gCoimisiún (2) údaraíodh bia agus beatha a chur ar an margadh, ar bia agus beatha iad ina bhfuil pónaire shoighe ghéinmhodhnaithe MON 87705, nó atá comhdhéanta di nó a tháirgtear aisti. Cumhdaíodh le raon feidhme an údaraithe sin freisin táirgí, seachas bia agus beatha, a chur ar an margadh, ar táirgí iad ina bhfuil pónaire shoighe ghéinmhodhnaithe MON 87705 nó atá comhdhéanta di, le haghaidh na n-úsáidí céanna atá ag pónaire shoighe d’aon chineál eile, cé is moite de shaothrú.

(2)

An 8 Márta 2024 rinne Bayer Agriculture BV, atá lonnaithe sa Bheilg,, thar ceann Bayer CropScience LP, atá lonnaithe sna Stáit Aontaithe (‘an t-iarratasóir’) iarratas a chur faoi bhráid an Choimisiúin chun an t-údarú sin a athnuachan.

(3)

An 12 Eanáir 2026 d’eisigh an tÚdarás Eorpach um Shábháilteacht Bia (‘an tÚdarás’) tuairim eolaíoch (3) fhabhrach maidir le pónaire shoighe ghéinmhodhnaithe MON 87705 i gcomhréir le hAirteagail 6 agus 18 de Rialachán (CE) Uimh. 1829/2003. Tháinig sé ar an gconclúid nach raibh fianaise san iarratas ar athnuachan maidir le haon ghuais nua, teagmháil mhodhnaithe nó éiginnteacht eolaíoch nua a d’athródh conclúidí an mheasúnaithe riosca bunaidh ar pónaire shoighe ghéinmhodhnaithe MON 87705, measúnú a ghlac an tÚdarás in 2012 (4) agus 2013 (5).

(4)

Rinne an tÚdarás breithniú, sa tuairim eolaíoch uaidh, ar gach ceist agus ábhar imní a tharraing na Ballstáit anuas i gcomhthéacs an chomhairliúcháin leis na húdaráis inniúla náisiúnta dá bhforáiltear in Airteagal 6(4) agus Airteagal 18(4) de Rialachán (CE) Uimh. 1829/2003.

(5)

An plean faireacháin um éifeachtaí comhshaoil a chuir an t-iarratasóir isteach, arb é atá ann plean faireachais ginearálta, tháinig an tÚdarás ar an gconclúid freisin go bhfuil an plean sin i gcomhréir le húsáidí beartaithe na dtáirgí.

(6)

Ina theannta sin, mhol an tÚdarás sa tuairim eolaíoch uaidh plean faireacháin iarmhargaidh le haghaidh bia agus mheas sé nach bhfuil gá le plean den sórt sin le haghaidh beatha, i gcomhréir leis an tuairim eolaíoch ó EFSA agus leis an ráiteas comhlántach a glacadh, in 2012 agus 2013, faoi seach, rud atá comhsheasmhach le Cinneadh Cur Chun Feidhme (AE) 2015/696.

(7)

Agus na conclúidí sin á gcur san áireamh, maidir leis an údarú chun bia agus beatha a chur ar an margadh, ar bia agus beatha iad ina bhfuil pónaire shoighe ghéinmhodhnaithe MON 87705, atá comhdhéanta di nó a tháirgtear aisti, agus chun táirgí a chur ar an margadh, ar táirgí iad ina bhfuil pónaire shoighe ghéinmhodhnaithe MON 87705 nó atá comhdhéanta di, le haghaidh úsáidí seachas bia nó beatha, cé is moite de shaothrú, ba cheart an t-údarú sin a athnuachan.

(8)

I litir dar dáta an 19 Eanáir 2026, chuir Bayer Agriculture BV, atá lonnaithe sa Bheilg, an Coimisiún ar an eolas gur athraigh Bayer CropScience LP a fhoirm dhlíthiúil agus gur athraigh sé a ainm go Bayer CropScience LLC ón 1 Eanáir 2026 ar aghaidh.

(9)

Tá aitheantóir uathúil sannta do phónaire shoighe ghéinmhodhnaithe MON 87705, i gcomhréir le Rialachán (CE) Uimh. 65/2004 ón gCoimisiún (6), i gcomhthéacs an údaraithe tosaigh le Cinneadh Cur Chun Feidhme (AE) 2015/696. Ba cheart leanúint den aitheantóir uathúil sin a úsáid.

(10)

Bia, comhábhair bhia agus beatha ina bhfuil pónaire shoighe ghéinmhodhnaithe MON 87705, nó atá comhdhéanta di nó a tháirgtear aisti, ba cheart iad a lipéadú i gcomhréir leis na ceanglais dá bhforáiltear in Airteagal 13(1) agus Airteagal 25(2), pointí (a) agus (b), de Rialachán (CE) Uimh. 1829/2003.

(11)

Agus an tuairim ón Údarás lena ndeimhnítear go bhfuil athrú tagtha ar chomhdhéanamh aigéid shailligh na síolta pónaire soighe MON 87705 agus ar chomhdhéanamh aigéid shailligh na hola a dhíorthaítear astu i ndáil leis an macasamhail thraidisiúnta, agus in éagmais faisnéis nua ón iarratasóir chun an measúnú tosaigh a athrú, is dócha go bhfuil gá le lipéadú sonrach, ina luaitear na focail chéanna agus atá i gCinneadh Cur Chun Feidhme (AE) 2015/696, i gcomhréir le hAirteagail 13(2)(a) agus 25(2)(c) de Rialachán (CE) Uimh. 1829/2003.

(12)

Chun a áirithiú go n-úsáidfear na táirgí laistigh de theorainneacha an údaraithe dá bhforáiltear leis an gCinneadh seo, ba cheart a shonrú go soiléir ar lipéadú na dtáirgí ina bhfuil an OGM a n-iarrtar údarú ina leith, nó atá comhdhéanta de, cé is moite de tháirgí bia, nár cheart na táirgí i gceist a úsáid le haghaidh saothrú.

(13)

Le Rialachán (CE) Uimh. 1830/2003 ó Pharlaimint na hEorpa agus ón gComhairle (7) leagtar síos ceanglais lipéadaithe in Airteagal 4(6) le haghaidh táirgí ina bhfuil OGManna nó atá comhdhéanta díobh. Leagtar síos ceanglais inrianaitheachta le haghaidh táirgí ina bhfuil OGManna, nó atá comhdhéanta díobh, i míreanna 1 go 5 d’Airteagal 4 agus leagtar síos ceanglais inrianaitheachta le haghaidh bia agus beatha a tháirgtear as OGManna in Airteagal 5 den Rialachán sin.

(14)

Ba cheart do shealbhóir an údaraithe tuarascálacha bliantúla a chur isteach maidir le cur chun feidhme na ngníomhaíochtaí a leagtar amach sa phlean faireachán um éifeachtaí comhshaoil agus maidir le torthaí na ngníomhaíochtaí sin. Ba cheart na torthaí sin a chur i láthair i gcomhréir leis na ceanglais a leagtar síos i gCinneadh 2009/770/CE ón gCoimisiún (8).

(15)

Ba cheart do shealbhóir an údaraithe tuarascálacha bliantúla a chur isteach freisin maidir le cur chun feidhme agus torthaí na ngníomhaíochtaí a leagtar amach sa phlean faireacháin iarmhargaidh.

(16)

Leis an tuairim ón Údarás ní thugtar údar le coinníollacha nó srianta sonracha eile a fhorchur maidir le pónaire shoighe ghéinmhodhnaithe MON 87705 a chur ar an margadh, a úsáid agus a láimhseáil, ná maidir le héiceachórais/comhshaol agus/nó limistéir gheografacha áirithe a chosaint, dá bhforáiltear in Airteagal 6(5), pointe (e), agus Airteagal 18(5), pointe (e) de Rialachán (CE) Uimh. 1829/2003.

(17)

An fhaisnéis ábhartha uile maidir le húdarú na dtáirgí a chumhdaítear leis an gCinneadh seo, ba cheart í a iontráil sa chlár Comhphobail de bhia géinmhodhnaithe agus beatha ghéinmhodhnaithe dá dtagraítear in Airteagal 28(1) de Rialachán (CE) Uimh. 1829/2003.

(18)

Tá fógra le tabhairt faoin gCinneadh seo trí Theach Imréitigh na Bithshábháilteachta do Pháirtithe Phrótacal Cartagena ar an mBithshábháilteacht a ghabhann leis an gCoinbhinsiún maidir leis an Éagsúlacht Bhitheolaíoch, de bhun Airteagal 9(1) agus Airteagal 15(2), pointe (c) de Rialachán (CE) Uimh. 1946/2003 ó Pharlaimint na hEorpa agus ón gComhairle (9).

(19)

Níor thug an Buanchoiste um Plandaí, Ainmhithe, Bia agus Beatha tuairim uaidh laistigh den teorainn ama a leag Cathaoirleach an Bhuanchoiste síos. Measadh an gníomh cur chun feidhme seo a bheith riachtanach agus chuir an cathaoirleach faoi bhráid an choiste achomhairc é chun go ndéanfaí tuilleadh plé ina leith. Níor thug an coiste achomhairc tuairim uaidh,

(a)

bianna agus comhábhair bhia ina bhfuil pónaire shoighe ghéinmhodhnaithe MON-877Ø5-6, nó atá comhdhéanta di nó a tháirgtear aisti;

(b)

beatha ina bhfuil pónaire shoighe ghéinmhodhnaithe MON-877Ø5-6, nó atá comhdhéanta di nó a tháirgtear aisti;

(c)

táirgí ina bhfuil pónaire shoighe ghéinmhodhnaithe MON-877Ø5-6 nó atá comhdhéanta di le haghaidh úsáidí seachas na húsáidí dá bhforáiltear i bpointí (a) agus (b), cé is moite de shaothrú.