(1)

Is é an riail atá ann gur trí cheant a dhéantar na lamháltais astaíochta ó 2013 ar aghaidh a leithdháileadh ar oibreoirí suiteálacha laistigh de raon feidhme chóras trádála astaíochtaí an Aontais (CTA AE). Leanfaidh oibreoirí incháilithe de lamháltais saor in aisce a fháil sa tréimhse thrádála ó 2026 go 2030. Cinntear an méid lamháltas a fhaigheann gach ceann de na hoibreoirí sin ar bhonn na rialacha atá comhchuibhithe ar fud an Aontais agus a leagtar amach i dTreoir 2003/87/CE agus i Rialachán Tarmligthe (AE) 2019/331 ón gCoimisiún (2).

(2)

Bearta náisiúnta trasuite na mBallstát, ina bhfuil liosta suiteálacha a chumhdaítear le Treoir 2003/87/CE ar a gcríoch agus faisnéis maidir le gníomhaíocht táirgthe, aistrithe teasa agus gás, giniúint leictreachais agus astaíochtaí ar leibhéal foshuiteála le linn na tréimhse 5 bliana ó 2019 go 2023 (‘an tréimhse bhonnlíne’), bhí ceangal ar na Ballstáit iad a chur faoi bhráid an Choimisiúin faoin 30 Meán Fómhair 2024 i gcomhréir le hIarscríbhinn IV a ghabhann le Rialachán Tarmligthe (AE) 2019/331.

(3)

Chun cáilíocht agus inchomparáideacht sonraí a áirithiú, rinne na Ballstáit a mbearta náisiúnta trasuite a thíolacadh trí úsáid a bhaint as an teimpléad leictreonach arna chur ar fáil ag an gCoimisiún i gcomhréir le hAirteagal 14(1) de Rialachán Tarmligthe (AE) 2019/331, ina raibh na sonraí ábhartha le haghaidh gach suiteála. Thíolaic na Ballstáit tuarascáil mhodheolaíochta freisin ina leagtar amach an próiseas bailithe sonraí a rinne a n-údaráis.

(4)

I bhfianaise an réimse leathain faisnéise agus sonraí a tíolacadh, rinne an Coimisiún anailís ar dtús ar chríochnúlacht na mbeart náisiúnta trasuite uile. I gcás inar thug an Coimisiún dá aire go raibh aighneachtaí neamhchríochnúil, d’iarr sé faisnéis bhreise ar na Ballstáit lena mbaineann. Mar fhreagra ar na hiarrataí sin, thíolaic na húdaráis ábhartha faisnéis bhreise ábhartha chun na bearta náisiúnta trasuite a tíolacadh a iomlánú.

(5)

Rinne an Coimisiún measúnú ina dhiaidh sin ar na bearta náisiúnta trasuite i gcomhthéacs na gcritéar atá i dTreoir 2003/87/CE agus i Rialachán Tarmligthe (AE) 2019/331, agus treoirdhoiciméid an Choimisiúin le haghaidh na mBallstát á gcur san áireamh. Is é a bhí sna seiceálacha comhsheasmhachta sin an dara céim den mheasúnú ar na bearta náisiúnta trasuite.

(6)

Rinneadh na seiceálacha comhsheasmhachta ar na bearta náisiúnta trasuite i dtaca le gach Ballstát agus le gach suiteáil ar leithligh agus i gcomparáid le suiteálacha eile san earnáil chéanna. Mar chuid den mheasúnú cuimsitheach sin, rinne an Coimisiún anailís ar chomhsheasmhacht na sonraí féin agus a gcomhsheasmhacht leis na rialacha uile-Aontais maidir le leithdháileadh comhchuibhithe saor in aisce le haghaidh chéim 4 (tréimhse leithdháileacháin 2026-2030) a leagtar amach i Rialachán Tarmligthe (AE) 2019/331. Rinne an Coimisiún scrúdú ar incháilitheacht suiteálacha le haghaidh leithdháileadh saor in aisce, ar shuiteálacha a roinnt ina bhfoshuiteálacha agus ar a dteorainneacha, chun an tagarmharc ceart a chur i bhfeidhm. I bhfianaise go n-úsáidtear na sonraí chun na luachanna tagarmhairc athbhreithnithe a ríomh, rinne an Coimisiún cúram faoi leith de shannadh astaíochtaí do gach foshuiteáil. Thairis sin, agus i bhfianaise an tionchair mhóir ar leithdháiltí, rinne an Coimisiún anailís mhionsonraithe ar na sonraí a bhaineann le leibhéil ghníomhaíochta stairiúla na suiteálacha a ríomh le linn na tréimhse bonnlíne. Rinne an Coimisiún scrúdú freisin ar cé acu a bhí cuimsiú suiteála sna liostaí beart náisiúnta trasuite i gcomhréir le forálacha Iarscríbhinn I a ghabhann le Treoir 2003/87/CE nó nach raibh.

(7)

Rinneadh grinnanailísí breise ar shonraí suiteálacha sonracha in aghaidh an Bhallstáit a raibh tionchar acu ar ríomh na luachanna tagarmhairc athbhreithnithe. Bhí na measúnaithe sonracha bunaithe ar anailís ar mheasúnuithe riosca a bhain le cáilíocht agus comhsheasmhacht na sonraí, inar cuireadh roinnt critéar san áireamh lena n-áirítear an déine astaíochtaí le haghaidh gach foshuiteála le tagarmharc táirge.

(8)

Ar bhonn thorthaí na seiceálacha sin, rinne an Coimisiún measúnú mionsonraithe ar shuiteálacha inar sainaithníodh neamhrialtachtaí féideartha i gcur i bhfeidhm na rialacha maidir le leithdháileadh comhchuibhithe. Maidir leis na suiteálacha sin, iarradh soiléiriú breise ar údaráis inniúla na mBallstát lena mbaineann.

(9)

I bhfianaise thorthaí an mheasúnaithe comhlíontachta sin, maidir le bearta náisiúnta trasuite na Beilge, na Bulgáire, na Seicia, na Danmhairge, na hEastóine, na hÉireann, na hIodáile, na Gearmáine, na Gréige, na Fraince, na Cróite, na Cipire, na Laitvia, na Liotuáine, Lucsamburg, Málta, na hUngáire, na hÍsiltíre, na hOstaire, na Polainne, na Portaingéile, na Rómáine, na Slóivéine, na Slóvaice agus na Fionlainne, cinneadh go raibh siad ag luí leis na critéir a leagtar amach i dTreoir 2003/87/CE agus i Rialachán Tarmligthe (AE) 2019/331. Dá bhrí sin, na suiteálacha a chuimsigh na Ballstáit sin sna bearta náisiúnta trasuite, cinneadh go bhfuil siad incháilithe le haghaidh leithdháileadh saor in aisce.

(10)

Cinneadh go raibh bearta náisiúnta trasuite na Spáinne agus na Sualainne ag luí leis na critéir a leagtar amach i dTreoir 2003/87/CE agus i Rialachán Tarmligthe (AE) 2019/331, cé is moite de shuiteálacha áirithe a cuireadh san áireamh ar an liosta dá dtagraítear in Airteagal 11(1) de Threoir 2003/87/CE gan na critéir a cheanglaítear faoin Treoir agus faoin Rialachán Tarmligthe sin a chomhlíonadh.

(11)

Mhol an Spáinn agus an tSualainn araon aon suiteáil amháin a chuimsiú ina gcríoch, i gcás, le linn na tréimhse 5 bliana ábhartha roimhe sin dá dtagraítear in Airteagal 11(1), an dara fomhír, de Threoir 2003/87/CE, ina rannchuidíonn astaíochtaí ó dhóchán bithmhaise a chomhlíonann na critéir a leagtar amach de bhun Airteagal 14(1) den Treoir sin le níos mó ná 95 % ar an meán de na meánastaíochtaí gás ceaptha teasa iomlána. Tá suiteálacha den sórt sin le heisiamh ó CTA AE de bhun phointe 1 d’Iarscríbhinn I a ghabhann le Treoir 2003/87/CE. Dá bhrí sin, ní mór diúltú na suiteálacha sin a chur ar an liosta dá dtagraítear in Airteagal 11(1) de Threoir 2003/87/CE le haghaidh na tréimhse bonnlíne.