(1)

An 4 Bealtaine 2016, thug an Chomhairle údarú don Choimisiún agus d’Ardionadaí an Aontais do Ghnóthaí Eachtracha agus don Bheartas Slándála tús a chur le caibidlíocht agus nuachóiriú an Chomhaontaithe maidir le Comhpháirtíocht Eacnamaíoch, Comhordú Polaitiúil agus Comhar idir an Comhphobal Eorpach agus a Bhallstáit, de pháirt, agus Stáit Aontaithe Mheicsiceo, den pháirt eile (1) a chaibidliú. Tugadh an chaibidlíocht i gcrích go rathúil an 17 Eanáir 2025.

(2)

Bhí dhá ionstraim dhlíthiúla chomhthreomhara mar thoradh ar an gcaibidlíocht. Is é an chéad ionstraim an Comhaontú maidir le Comhpháirtíocht Straitéiseach Pholaitiúil, Eacnamaíoch agus Comhar idir an tAontas Eorpach agus a Bhallstáit, de pháirt, agus Stáit Aontaithe Mheicsiceo, den pháirt eile, dá ngairtear ‘an Comhaontú Iltíreach Nuachóirithe’ go coitianta, a chuimsíonn colún idirphlé polaitiúil agus comhair agus an colún trádála agus infheistíochta, lena n-áirítear forálacha cosanta infheistíochta. Is é an dara hionstraim an Comhaontú Eatramhach maidir le Trádáil idir an tAontas Eorpach agus Stáit Aontaithe Mheicsiceo (‘an Comhaontú Eatramhach’), lena gcumhdaítear léirscaoileadh trádála agus infheistíochta. Scoirfidh an Comhaontú Eatramhach d’éifeacht a bheith aige agus cuirfear an Comhaontú Iltíreach Nuachóirithe ina ionad ar a theacht i bhfeidhm.

(3)

Is é is cuspóir don Chomhaontú Eatramhach trádáil agus infheistíocht mhéadaithe agus inbhuanaithe a chothú idir na Páirtithe trína gcaidrimh eacnamaíocha agus thrádála a leathnú agus a éagsúlú agus trí dheiseanna nua a chruthú d’oibrithe agus do ghnólachtaí araon, go háirithe fiontair bheaga agus mheánmhéide, agus rannchuidiú á dhéanamh san am céanna le forbairt inbhuanaithe a chur chun cinn ina ghnéithe eacnamaíocha, sóisialta agus comhshaoil.

(4)

Dá bhrí sin, ba cheart an Comhaontú Eatramhach a shíniú,