(1)

An 18 Eanáir 1977, tugadh Comhaontú Comhair idir Comhphobal Eacnamaíochta na hEorpa agus Poblacht Arabach na Siria (1) (an Comhaontú Comhair) i gcrích chun comhar foriomlán a chur chun cinn d’fhonn an caidreamh idir na páirtithe a neartú.

(2)

Le Cinneadh 2011/523/AE ón gComhairle (2), cuireadh cur i bhfeidhm an Chomhaontaithe Comhair ar fionraí go páirteach tar éis an fheachtais bhrúidiúil a rinne Bashar al-Assad agus a réimeas in aghaidh a muintire féin.

(3)

Bhí gá le hAirteagail 12, 14 agus 15 den Chomhaontú Comhair a chur ar fionraí, a mhéid a bhain le hallmhairí amhola agus táirgí peitriliam isteach san Aontas ón tSiria, chun toirmeasc a chur ar allmhairí den sórt sin agus chun Cinneadh 2011/522/CBES ón gComhairle (3) a chur chun feidhme.

(4)

Le Cinneadh 2012/123/CBES ón gComhairle (4), leathnaíodh cur ar fionraí páirteach chur i bhfeidhm an Chomhaontaithe Comhair chun allmhairí óir, miotal lómhar agus diamant isteach san Aontas ón tSiria a chumhdach. Bhí gá le Cinneadh 2012/123/CBES a ghlacadh chun na bearta sriantacha dá bhforáiltear i gCinneadh 2011/782/CBES ón gComhairle (5) a chur chun feidhme.

(5)

Ó mhí na Nollag 2024 i leith, tá athrú ó bhonn tagtha ar thírdhreach polaitiúil na Siria mar gheall ar thitim réimeas Bashar al-Assad, rud a fhágann go bhfuil na forais bhunaidh le cur ar fionraí páirteach an Chomhaontaithe Comhair imithe i léig.

(6)

Sna conclúidí uaithi an 23 Meitheamh 2025, leag an Chomhairle béim ar a thábhachtaí atá aistriú síochánta cuimsitheach sa tSiria, saor ó chur isteach eachtrach díobhálach, agus a thábhachtaí atá sé cearta mhuintir na Siria ó gach cúlra eitneach agus reiligiúnach a chosaint gan idirdhealú. Chuir an Chomhairle i dtreis freisin go dtacaíonn sí leis na hiarrachtaí leanúnacha atá á ndéanamh ag institiúidí idirnáisiúnta airgeadais chun measúnú a dhéanamh ar riachtanais na Siria agus d’iarr sí ar an mBanc Eorpach Infheistíochta dul i mbun gníomhaíochta arís sa tSiria. D’iarr sí ar an gcomhphobal idirnáisiúnta téarnamh eacnamaíoch na Siria a éascú agus obair a dhéanamh chun í a ath-imeascadh sa chóras idirnáisiúnta airgeadais.

(7)

Le Cinntí (CBES) 2025/406 (6) agus (CBES) 2025/1096 (7) ón gComhairle, leasaíodh Cinneadh 2013/255/CBES (8) chun deireadh a chur leis na bearta sriantacha eacnamaíocha uile a bhí á bhforchur ar an tSiria, cé is moite díobh siúd atá bunaithe ar fhorais slándála, chun tacú le téarnamh socheacnamaíoch na tíre.

(8)

I gcomhréir le Cinneadh 2013/255/CBES, agus leis an gcuspóir gnáthchaidreamh trádála leis an tSiria a athbhunú agus tacú le téarnamh socheacnamaíoch na tíre, ba cheart cur ar fionraí páirteach chur i bhfeidhm an Chomhaontaithe Comhair dá bhforáiltear i gCinneadh 2011/523/AE a fhoirceannadh.

(9)

Dá bhrí sin, ba cheart Cinneadh 2011/523/AE a aisghairm,