(1)

Féadfaidh an Chomhairle Rialaithe an luach saothair ar shealúchais cúlchistí uile na n-institiúidí nó ar chuid díobh ag bainc cheannais an Eurochórais a choigeartú. An 11 Nollaig 2025, chinn an Chomhairle Rialaithe luach saothair cúlchistí barrachais a shimpliú faoi Airteagal 1(1) de Chinneadh (AE) 2019/1743 ón mBanc Ceannais Eorpach (BCE/2019/31) (1). Ní bhaineann an cinneadh sin ón gComhairle Rialaithe a rinneadh le déanaí ach le cúlchistí barrachais arna sealbhú ina gcuntais chúlchiste ag an mbanc ceannais náisiúnta ábhartha (BCN) ag institiúidí ar contrapháirtithe incháilithe iad in oibríochtaí beartais airgeadaíochta an Eurochórais i gcomhréir le hAirteagal 55 de Threoirlíne (AE) 2015/510 ón mBanc Ceannais Eorpach (BCE/2014/60) (2) (dá ngairtear ‘contrapháirtithe incháilithe’ anseo feasta) agus a chomhlíonann na coinníollacha rochtana ar shaoráid taisce an Eurochórais i gcomhréir le hAirteagal 22 de Threoirlíne (AE) 2015/510 (BCE/2014/60). I gcomhréir leis an gcinneadh ón gComhairle Rialaithe, ba cheart na cúlchistí barrachais sin a íoc ag an ráta saoráide taisce, ní hamháin nuair a bhíonn an ráta sin diúltach, ach freisin nuair a bhíonn sé nialas faoin gcéad nó deimhneach.

(2)

Tá sé beartaithe leis an mbeart seo éifeachtúlachtaí oibríochtúla agus riosca a fheabhsú don Eurochóras agus do na contrapháirtithe beartais airgeadaíochta incháilithe araon tríd an ualach oibre oibríochtúil agus an riosca a bhaineann le haistrithe laethúla cistí chuig saoráid taisce an Eurochórais a laghdú, tionchar theagmhais TARGET ag deireadh lá gnó TARGET a laghdú, agus aghaidh a thabhairt ar roinnt saincheisteanna a bhaineann le cur i bhfeidhm na n-íoscheanglas cúlchiste (3). Thairis sin, tacóidh an beart le feidhmiú rianúil na gcóras íocaíochta agus le socraíocht íocaíochtaí meandracha i gcomhthéacs an ghá mhéadaithe atá le cistí atá ar fáil le haghaidh socraíochta ar ardán Shocraíocht Íocaíochta Meandraí TARGET (TIPS) chun méideanna méadaitheacha íocaíochtaí meandracha a shocrú tar éis theacht i bhfeidhm Rialachán (AE) 2024/886 ó Pharlaimint na hEorpa agus ón gComhairle (4). Trí luach saothair na gcúlchistí barrachais a ailíniú le ráta luacha saothair na saoráide taisce, meastar go laghdófar aistrithe móra laethúla ó chuntais reatha na gcontrapháirtithe incháilithe chuig saoráid taisce an Eurochórais, arb é is aidhm dóibh tairbhe a bhaint as luach saothair ar an ráta saoráide taisce.

(3)

Ní bhaineann an beart ach le cúlchistí barrachais na gcontrapháirtithe incháilithe a chomhlíonann na coinníollacha rochtana ar an tsaoráid taisce, toisc gurb iad na contrapháirtithe sin amháin a fhéadfaidh cistí a aistriú chuig an tsaoráid taisce. Is iomchuí, dá bhrí sin, idirdhealú a dhéanamh idir luach saothair na gcúlchistí barrachais ar leis na contrapháirtithe sin iad agus luach saothair na n-institiúidí nach contrapháirtithe incháilithe iad nó nach gcomhlíonann na coinníollacha rochtana ar an tsaoráid taisce. Tá oibríochtaí beartais airgeadaíochta an Eurochórais ar fáil do raon leathan contrapháirtithe, ar choinníoll go gcomhlíonann siad na critéir incháilitheachta a leagtar amach in Airteagal 55 de Threoirlíne (AE) 2015/510 (BCE/2014/60). Dá bhrí sin, chun comhsheasmhacht agus sláine chreat contrapháirtí an Eurochórais a áirithiú, níor cheart ach do chontrapháirtithe incháilithe a chomhlíonann na coinníollacha rochtana ar an tsaoráid taisce tairbhe a bhaint as luach saothair cúlchistí barrachais ag an ráta saoráide taisce.

(4)

Ar an gcaoi chéanna, is iomchuí idirdhealú a dhéanamh idir luach saothair cúlchistí barrachais ar le contrapháirtithe incháilithe iad a chomhlíonann na coinníollacha rochtana ar an tsaoráid taisce agus iad siúd ar le contrapháirtithe incháilithe iad a chomhlíonann na coinníollacha sin ach atá faoi réir bearta lánroghnacha i gcomhréir le hAirteagal 158 de Threoirlíne (AE) 2015/510 (BCE/2014/60), nach bhféadfaidh cistí a aistriú gan srian chuig an tsaoráid taisce. I gcás ina ndearnadh rochtain contrapháirtí incháilithe ar oibríochtaí beartais airgeadaíochta an Eurochórais, lena n-áirítear an tsaoráid taisce, a theorannú, a chur ar fionraí nó a eisiamh, ní fhéadfaidh luach saothair sealúchas saoráide taisce tarlú ach amháin suas go dtí an teorainn a leagtar amach sna bearta lánroghnacha, nó ní fhéadfar é a dhéanamh ar chor ar bith i gcás fionraí nó eisiaimh. Chun an creat lánroghnach sin a choinneáil ar bun, níor cheart luach saothair deimhneach ar shealúchais saoráidí taisce agus cúlchistí barrachais a choimeádtar i gcuntais chúlchiste a bheith incheadaithe ach suas go dtí an teorainn sin, nó níor cheart é a bheith incheadaithe ar chor ar bith i gcásanna fionraíochtaí agus eisiaimh.

(5)

Chun dóthain ama a thabhairt chun an beart a oibríochtú agus chun go mbeidh contrapháirtithe incháilithe in ann a bpróisis a choigeartú chun a gcúlchistí arna sealbhú ag BCNanna an Eurochórais a bhainistiú, ba cheart feidhm a bheith ag an gCinneadh seo ó thús na tréimhse cothabhála dar tús an 17 Meitheamh 2026.

(6)

Dá bhrí sin, ba cheart Cinneadh (AE) 2019/1743 (BCE/2019/31) a leasú dá réir sin,

(1)

Leasaítear Airteagal 1 mar a leanas:

(2)

in Airteagal 2(1), cuirtear an méid seo a leanas in ionad na bhfoclaíochta tosaigh: