—

Saoirse an léirithe ealaíonta agus urraim do luachanna an Aontais a chosaint mar bhunchloch an daonlathais agus mar chearta bunúsacha laistigh den Aontas Eorpach.

—

Ealaíontóirí agus gairmithe cultúrtha a chosaint ar chinsireacht, ar imeaglú agus ar chur isteach míchuí.

—

Neamhspleáchas na n-institiúidí cultúrtha a chosaint.

—

Saibhreas éagsúlachta cultúrtha agus teanga an Aontais Eorpaigh agus a cheannasacht chultúrtha a cheiliúradh agus a chaomhnú, agus tacú leo.

—

Éagsúlacht shaibhir na saothar cultúrtha agus an ábhair chultúrtha a chruthaítear san Eoraip a chur chun cinn, go háirithe ar líne, a n-infheictheacht agus a n-infhionntacht a chothú, i dteangacha oifigiúla uile an Aontais agus lánurraim á tabhairt don éagsúlacht teanga.

—

Rochtain chuimsitheach ar an gcultúr agus ar an oidhreacht chultúrtha a fheabhsú, rannpháirtíocht sa chultúr agus san oidhreacht chultúrtha a fheabhsú, agus feabhas a chur ar an sult agus ar an tairbhe a bhaintear astu, go háirithe na glúnta óga.

—

Aird ar leith a thabhairt ar chearta cultúrtha, ina measc rochtain a bheith ag daoine leochaileacha ar an gcultúr, lena n-áirítear daoine faoi mhíchumas, daoine imeallaithe nó daoine faoi mhíbhuntáiste, agus daoine atá ina gcónaí i gceantair thuaithe, iargúlta nó i gceantair atá i ndíth seirbhísí – lena n-áirítear limistéir atá i mbaol a mbánaithe nó a bhfuil dúshláin shocheacnamaíocha rompu.

—

Barr maise agus feabhas a chur ar an mbonneagar cultúrtha ar fud na hEorpa, agus aird á tabhairt ar aghaidh a thabhairt ar éagothromaíochtaí socheacnamaíocha agus críochacha, agus rannpháirtíocht sa chultúr a chothú ar an leibhéal áitiúil.

—

Luach saothair cothrom, cosaint shóisialta leordhóthanach, rochtain ar fhorbairt scileanna agus soghluaisteacht ealaíontóirí agus gairmithe cultúrtha uile a chur chun cinn, agus urraim á tabhairt do ról agus neamhspleáchas na gcomhpháirtithe sóisialta, chomh maith le tacú lena gcearta cómhargála, agus a sláinte agus a sábháilteacht cheirde a chothú, lena n-áirítear a meabhairshláinte.

—

Comhionannas inscne a chur chun cinn i réimse an chultúir agus na hoidhreachta cultúrtha, agus cearta ealaíontóirí agus gairmithe cultúrtha faoi mhíchumas a chosaint.

—

Ionadaíocht agus rannpháirtíocht daoine óga i múnlú beartas cultúrtha a chur chun cinn chun go n-éistfí leo i bpróisis chinnteoireachta a bhaineann leo.

—

Tacaíocht a thabhairt d’ealaíontóirí óga agus d’ealaíontóirí atá ag teacht chun cinn, daoine imeallaithe nó daoine faoi mhíbhuntáiste ina measc, agus aitheantas á thabhairt don mhéid a chuireann siad le cultúr agus oidhreacht na hEorpa.

—

Comhar agus malartú idirghlúine a spreagadh idir na healaíontóirí lena chinntiú go mbeidh scileanna, eolas agus traidisiúin á dtabhairt ar aghaidh ó ghlúin go glúin.

—

Oideachas sna healaíona a chothú don uile dhuine san fhoghlaim fhoirmiúil, sheachfhoirmiúil agus neamhfhoirmiúil, mar chuid den fhoghlaim ar feadh an tsaoil, rud a chuirfidh le héagsúlacht agus le hathléimneacht an Aontais.

—

Tacú le cur chuige STEAM (Eolaíocht, Teicneolaíocht, Innealtóireacht, Ealaíona agus Matamaitic) agus le sineirgí idirdhisciplíneacha agus trasdisciplíneacha idir an cultúr, na healaíona, an eolaíocht agus an teicneolaíocht.

—

Éifeachtaí dearfacha an chultúir agus na rannpháirtíochta cultúrtha ar an tsláinte agus ar an bhfolláine a chur chun cinn trínár mbeartais.

—

Dea-chleachtais agus cineálacha cur chuige nuálacha a chomhroinnt ar fud na n-earnálacha.

—

Cruthaitheacht an duine agus ceannasacht dhigiteach chultúrtha agus teanga na hEorpa a chur chun cinn, agus aghaidh a thabhairt ar rioscaí eiticiúla a bhaineann le claontachtaí agus homaiginiú cultúrtha.

—

Cearta maoine intleachtúla a chosaint, trí aghaidh a thabhairt ar thionchair IS ar chruthaitheoirí agus ar luach saothair cóir dóibh, agus san am céanna glacadh go fonnmhar leis an nuálaíocht.

—

Trédhearcacht a chothú maidir le hábhar arna ghiniúint ag an intleacht shaorga, ionas gur fusa idirdhealú a dhéanamh idir ábhar arna ghiniúint ag an duine agus ábhar arna ghiniúint ag an intleacht shaorga.

—

Faireachán a dhéanamh ar thionchar IS ar phoist agus an tionchar sin a mhaolú, chomh maith le tacú le hearnálacha agus tionscail an chultúir agus na cruthaitheachta chun oiriúnú don athrú teicneolaíoch agus scileanna digiteacha a fháil.

—

Úsáid IS a chothú mar uirlis chun tacú le gairmithe cultúrtha agus cruthaitheacha, agus a chur ar chumas earnálacha agus thionscail an chultúir agus na cruthaitheachta leas a bhaint as na deiseanna a chuirtear ar fáil leis na teicneolaíochtaí sin, agus go dtreiseofar ar an gcaoi sin le hacmhainneacht nuálaíochta na hEorpa agus lena iomaíochas teicneolaíochta ar an leibhéal domhanda.

—

Oidhreacht shaibhir nádúrtha agus chultúrtha na hEorpa a choimirciú, a chosaint agus a chur chun cinn – idir inláimhsithe agus doláimhsithe – agus leas á bhaint san am céanna as teicneolaíochtaí digiteacha chun caomhnú agus nuálaíocht na hoidhreachta sin, agus an rochtain uirthi, a chothú.

—

Feabhas a chur ar fheasacht, ar thaighde agus ar fhothú acmhainneachta, agus ar úsáid agus idir-inoibritheacht bunachar sonraí agus teicneolaíochtaí digiteacha chun aghaidh a thabhairt ar bhagairt na gáinneála ar earraí cultúrtha agus coireanna gaolmhara eile, agus an tráth céanna comhar á chothú i measc na ngairmithe ábhartha, amhail gairmithe oidhreachta, gairmithe fhorfheidhmiú an dlí nó custaim, lena n-áirítear sa chomhthéacs idirnáisiúnta.

—

Malartú idirghlúine a chothú chun tarchur na hoidhreachta cultúrtha agus an eolais ó na glúnta níos sine go dtí na glúnta óga a áirithiú.

—

Leas a bhaint as acmhainneacht an chultúir agus na hoidhreachta cultúrtha, i sineirge le limistéir eile, chun tarraingteacht na gcríoch uile a threisiú agus chun aghaidh a thabhairt ar dhúshláin chríochacha, lena n-áirítear cur i gcoinne meath déimeagrafach, go háirithe i limistéir fhorimeallacha, thuaithe, iargúlta agus i limistéir atá i ndíth seirbhísí, agus sna réigiúin is forimeallaí san Aontas.

—

Turasóireacht chultúrtha inbhuanaithe a chur chun cinn, agus urraim á tabhairt don oidhreacht chultúrtha, do thírdhreacha agus do chleachtais phobail, agus rannchuidiú leis an bhforbairt réigiúnach agus áitiúil.

—

Féachaint ar bhealaí éagsúla chun an cultúr agus an oidhreacht chultúrtha a chomhtháthú sa chomhar maidir le hullmhacht i gcomhair géarchéimeanna, pleanáil slándála agus pleanáil ullmhachta i gcomhair géarchéimeanna, bainistiú géarchéime agus riosca, atógáil iar-ghéarchéime, téarnamh agus próisis cothaithe síochána.

—

Béim a leagan ar a thábhachtaí atá an cultúr sa fhreagairt bheartais ar dhúshláin éiceolaíocha, trí ailtireacht, dearadh, cosaint oidhreachta, bainistiú tírdhreacha a chur chun cinn lena saothraítear cáilíocht, nuálaíocht, cuimsiú agus barr feabhais, agus trí ghlacadh uirlisí agus scileanna praiticiúla glasaithe a spreagadh agus trí ghníomhairí cultúrtha agus oidhreachta a chumasú chun insintí a stiúradh agus a athrú i gcomhchruthú le pobail.

—

Tacú le hinbhuanaitheacht earnálacha agus thionscail an chultúir agus na cruthaitheachta agus an oidhreacht chultúrtha a chosaint, lena n-áirítear trí chineálacha éagsúla cistiúcháin a spreagadh agus trí mhodhanna nuálacha agus malartacha cistiúcháin a mheas ar gach leibhéal rialachais.

—

Féachaint chuige go ndéanfar an cultúr a phríomhshruthú go héifeachtach i straitéisí, beartais agus gníomhaíochtaí ábhartha an Aontais, agus na huirlisí cistiúcháin comhfhreagracha a áirithiú ó chéim luath an deartha go dtí an cur chun feidhme.

—

Feabhas a chur ar chúrsaíocht trasteorann na saothar cultúrtha Eorpach, agus ar chúrsaíocht na héagsúlachta is dual dóibh.

—

Dlúth-idirphlé rialta a choinneáil ar bun leis na páirtithe leasmhara ábhartha.

—

An dearbhú sin a chur chun cinn — laistigh de róil agus cumhachtaí na sínitheoirí faoi seach — i gcaidreamh an Aontais le tíortha comhpháirtíochta agus le heagraíochtaí idirnáisiúnta ábhartha, agus comhar a chothú laistigh d’fhóraim iltaobhacha.

—

Tionscnaimh a chur chun cinn arb é is aidhm dóibh feabhas a chur ar infhaighteacht sonraí fónta inchomparáide maidir leis an gcultúr chun tacú le beartais chultúrtha atá bunaithe ar fhianaise a fhorbairt.

—

Athbhreithniú a dhéanamh ar an dul chun cinn sna réimsí a chumhdaítear sa dearbhú seo.