(1)

Le Rialachán Cur Chun Feidhme (AE) 2024/482 ón gCoimisiún (2) sonraítear róil, rialacha agus oibleagáidí mar aon le struchtúr na Scéime Eorpaí um dheimhniú cibearshlándála bunaithe ar Chritéir Choiteanna (SEDC) i gcomhréir leis an gcreat Eorpach um dheimhniú cibearshlándála a leagtar amach i Rialachán (AE) 2019/881.

(2)

Leis an Modheolaíocht Mheastóireachta Choiteann a ghabhann leis na Critéir Choiteanna (CC), ar caighdeán idirnáisiúnta í le haghaidh meastóireacht ar shlándáil faisnéise, is féidir meastóireacht a dhéanamh ar shlándáil táirgí TFC chun críoch deimhniúcháin. Sa chomhthéacs sin, féadfar roinnt táirgí TFC a thógáil ar an mbonn feidhmiúil céanna chun feidhmiúlachtaí slándála comhchosúla a thairiscint ar ardáin nó fearais éagsúla, dá ngairtear sraith táirgí freisin. Mar sin féin, d’fhéadfadh an dearadh, na crua-earraí, na dochtearraí nó na bogearraí a bheith éagsúil ó tháirge TFC amháin go táirge TFC eile. Is faoin gcomhlacht deimhniúcháin atá sé cinneadh a dhéanamh ar bhonn cás ar chás an féidir deimhniú ar shraith táirgí a dhéanamh. D’fhéadfaí na coinníollacha maidir le deimhniú ar shraith táirgí a léiriú a thuilleadh i dtreoirlínte tacaíochta SEDC.

(3)

Chun iontaofacht táirgí deimhnithe a choinneáil ar bun, tá sé fíor-riachtanach a shainiú cad is mórathrú agus mionathrú ann ar sprioc na meastóireachta nó ar a timpeallacht, lena n-áirítear timpeallachtaí oibríochtúla nó forbartha. Dá bhrí sin, is gá na coincheapa sin a shonrú i bhfianaise sonraíochtaí teicniúla atá ann cheana agus a úsáidtear go forleathan ó Ghrúpa na nOifigeach Sinsearach – Slándáil na gCóras Faisnéise (SOG-IS) agus rannpháirtithe na Socruithe maidir le Deimhnithe Critéar Coiteann a Aithint i réimse na Slándála TF (CCRA).

(4)

Is minic a bhíonn tionchar teoranta ag mionathruithe ar an ráiteas dearbhaithe táirge a sholáthraítear leis an deimhniú SEDC a eisítear. Dá bhrí sin, ba cheart mionathruithe a bhainistiú faoi nósanna imeachta cothabhála agus ní gá athmheastóireacht a dhéanamh ar fheidhmiúlachtaí slándála an táirge. Áirítear le samplaí de mhionathruithe ar cheart aghaidh a thabhairt orthu trí chothabháil, ach gan bheith teoranta dóibh, athruithe eagarthóireachta, athruithe ar sprioc na timpeallachta meastóireachta nach modhnaíonn sprioc dheimhnithe na meastóireachta, agus athruithe ar sprioc dheimhnithe na meastóireachta nach ndéanann difear d’fhianaise dearbhaithe. Féadfar a mheas freisin gur mionathruithe iad athruithe ar an timpeallacht forbartha, ar choinníoll nach bhfuil aon tionchar leantach acu ar bhearta dearbhaithe atá ann cheana. D’fhéadfadh sé gur ghá meastóireacht pháirteach a dhéanamh ar na bearta ábhartha i gcásanna áirithe, áfach.

(5)

Is éard is mórathrú ann aon athrú ar sprioc dheimhnithe na meastóireachta nó ar a timpeallacht a d’fhéadfadh tionchar díobhálach a imirt ar an dearbhú a chuirtear in iúl sa deimhniú SEDC, agus dá bhrí sin ba cheart athmheastóireacht a dhéanamh uirthi. Áirítear le samplaí de mhórathruithe, ach gan bheith teoranta dóibh, athruithe ar an tacar ceanglas dearbhaithe a mhaítear, seachas ceanglais dearbhaithe fhine CC ALC_FLR (Leigheas fabhtanna); athruithe ar rúndacht nó ar rialuithe sláine na timpeallachta forbartha i gcás ina bhféadfadh modhnuithe den sórt sin difear a dhéanamh d’fhorbairt nó do tháirgeadh slán sprioc na meastóireachta nó athruithe ar sprioc na meastóireachta chun leochaileacht insaothraithe a réiteach. Ina theannta sin, bailiúchán mionathruithe a imríonn tionchar mór ar an tslándáil le chéile, d’fhéadfaí é a cháiliú mar mhórathrú freisin. Cé nach bhféadfadh réiteach fabht difear a dhéanamh ach do ghné shonrach de sprioc na meastóireachta, tá sé tábhachtach a aithint freisin go bhféadfaí mórathrú a bheith i gceist leis mar gheall ar a dhothuarthacht agus an tionchar a d’fhéadfadh a bheith aige ar an dearbhú má chuireann sé na dearbhuithe slándála a sholáthraítear leis an deimhniú i mbaol.

(6)

D’fhéadfadh sé gur ghá athmheasúnú a dhéanamh ar athruithe ar thimpeallacht bhagartha táirge TFC deimhnithe gan athrú. Ba cheart torthaí féideartha an phróisis athmheasúnaithe sin a shuí go soiléir, go háirithe a thionchar ar an deimhniú SEDC. Má chuirtear athmheasúnú i gcrích go rathúil, ba cheart don chomhlacht deimhniúcháin an deimhniú a dhearbhú nó deimhniú nua a eisiúint a bhfuil dáta éaga sínithe aige. Mura n-éiríonn le próiseas athmheasúnaithe, ba cheart don chomhlacht deimhniúcháin an deimhniú a tharraingt siar agus, b’fhéidir, deimhniú nua a eisiúint a bhfuil raon feidhme difriúil aige. Ba cheart feidhm mutatis mutandis a bheith ag na forálacha sin maidir le hathmheasúnú a dhéanamh ar phróifílí cosanta.

(7)

In Iarscríbhinn I a ghabhann le Rialachán Cur Chun Feidhme (AE) 2024/482 liostaítear na doiciméid úrscothacha is infheidhme chun meastóireacht a dhéanamh ar tháirgí TFC agus próifílí cosanta. Ba cheart na doiciméid úrscothacha sin a nuashonrú chun na forbairtí is déanaí a léiriú, amhail na forbairtí sin a bhaineann le forbairtí teicneolaíochta, timpeallacht na gcibearbhagairtí, cleachtais tionscail, nó caighdeáin idirnáisiúnta. Is tráthúil nuashonrú den sórt sin i dtaca leis na doiciméid úrscothacha a bhaineann leis na híoscheanglais maidir le slándáil suímh, cur i bhfeidhm na hacmhainneachta ionsaithe maidir le cártaí cliste, cur i bhfeidhm na hacmhainneachta ionsaithe ar ghairis crua-earraí ag a bhfuil boscaí slándála, critéir choiteanna a chur i bhfeidhm ar chiorcaid iomlánaithe agus meastóireacht táirgí ilchodacha le haghaidh cártaí cliste agus gairis chomhchosúla. Ina theannta sin, ní áirítear doiciméid úrscothacha a bhaineann le meastóireacht agus deimhniú táirgí ilchodacha lena n-úsáidtear an leagan is déanaí de chaighdeáin na gCritéar Coiteann, athúsáid thorthaí meastóireachta na n-iniúchtaí suímh agus soiléirithe maidir le léirmhíniú próifílí cosanta a bhaineann le gléasanna cruthaithe ríomhshínithe cáilithe, tacagraif agus modúil slándála crua-earraí. Chun meastóireacht aonfhoirmeach ar tháirgí TFC faoi SEDC a áirithiú, ba cheart Iarscríbhinn I a leasú chun na doiciméid úrscothacha nuashonraithe agus nua sin a chur san áireamh tar éis don Ghrúpa Eorpach um Dheimhniú Cibearshlándála (ECCG) iad a fhormhuiniú.

(8)

Ina theannta sin, ba cheart an doiciméad úrscothach ‘ADV_SPM.1 interpretation for CC:2022 transition’ a chur leis an scéim chun a áirithiú gur féidir le próisis deimhniúcháin atá ag brath ar phróifílí cosanta sonracha leanúint d’úsáid a bhaint as samhaltú foirmiúil (ADV_SPM.1) go dtí go nuashonrófar na próifílí cosanta comhfhreagracha, mar shampla trí chumraíocht próifíle cosanta ildearbhaithe atá i gcomhréir le CC:2022 agus a thacaíonn le ADV_SPM a chur isteach. Chun dóthain ama a thabhairt don mhargadh aistriú i dtreo chaighdeáin nuashonraithe na gCritéar Coiteann, ní mór foráil a dhéanamh maidir le rialacha sonracha aistrithe le haghaidh na bpróifílí cosanta Security IC Platform PP with Augmentation Packages (v1.0), BSI-CC-PP-0084-2014, Java Card System – Closed Configuration (v3.1), BSI-CC-PP-0101-V2-2020, nó Java Card System – Open Configuration (v3.1), BSI-CC-PP-0099-V2-2020. Chun aon mhíshocracht sa mhargadh a sheachaint, is iomchuí a shuí go bhfuil an doiciméad úrscothach maidir le léirmhíniú ADV_SPM.1 le haghaidh aistriú CC:2022 infheidhme maidir le próisis deimhniúcháin a tionscnaíodh sular glacadh an Rialachán seo. Mar sin féin, ba cheart cur i bhfeidhm an doiciméid seo a bheith teoranta go docht don mhéid is gá, i bhfianaise an ama is gá chun nuashonrú na bpróifílí cosanta comhfhreagracha a thabhairt chun críche. Ar bhonn níos cruinne, i gcás próisis deimhniúcháin ina n-úsáidtear na próifílí cosanta Security IC Platform PP with Augmentation Packages (v1.0), BSI-CC-PP-0084-2014, nó Java Card System – Closed Configuration (v3.1), BSI-CC-PP-0101-V2-2020, ba cheart feidhm a bheith ag an doiciméad úrscothach maidir leis na próisis sin a tionscnaíodh roimh an 1 Deireadh Fómhair 2026. Maidir le próisis deimhniúcháin ina n-úsáidtear Java Card System – Open Configuration (v3.1), BSI-CC-PP-0099-V2-2020, níor cheart feidhm a bheith ag an doiciméad úrscothach ach amháin maidir leis na próisis sin a tionscnaíodh roimh dháta theacht i bhfeidhm an Rialacháin seo, ós rud é go bhfuil leagan nua den phróifíl cosanta Java Card System – Open Configuration ar fáil cheana féin.

(9)

D’fhéadfadh athrú ar na doiciméid úrscothacha le linn próiseas deimhniúcháin cur isteach ar mheastóireacht an táirge agus moill a chur ar eisiúint an deimhnithe. Dá bhrí sin, tá gá le rialacha iomchuí aistrithe le haghaidh doiciméid úrscothacha nua nó nuashonraithe, chun é a chur ar a gcumas do dhíoltóirí, ITSEFanna, comhlachtaí deimhniúcháin agus páirtithe leasmhara eile na coigeartuithe is gá a dhéanamh. Ba cheart doiciméid úrscothacha nuashonraithe agus nua is infheidhme a bheith bainteach le hiarratais ar dheimhniú, lena n-áirítear iarratais ar athmheasúnú agus athmheastóireacht, agus ba cheart próisis deimhniúcháin leanúnacha a bheith in ann leanúint d’úsáid a bhaint as leaganacha níos luaithe de na doiciméid úrscothacha.

(10)

Liostaítear in Iarscríbhinní II agus III a ghabhann le Rialachán cur chun feidhme (AE) 2024/482 faoi seach na próifílí cosanta atá deimhnithe ar leibhéal AVA_VAN 4 nó 5 agus na próifílí cosanta a mholtar. Tá roinnt tagairtí atá neamhiomlán nó imithe i léig mar gheall ar nuashonrú ar na próifílí cosanta. Ba cheart na tagairtí sin a chomhlánú agus, ina theannta sin, ba cheart tagairtí nua a chur san áireamh chun cumhdach níos cuimsithí ar chiorcaid iomlánaithe shlána, cártaí cliste agus gairis ghaolmhara, agus ríomhaireacht iontaofa a áirithiú.

(11)

Is gá leasuithe a dhéanamh ar Airteagal 19 de Rialachán Cur Chun Feidhme (AE) 2024/482 chun a shoiléiriú go bhfuil feidhm ag Iarscríbhinn IV, agus na hathruithe is gá déanta air, maidir leis an athbhreithniú ar dheimhnithe SEDC le haghaidh próifílí cosanta.

(12)

Ós rud é gur príomhghné í an sprioc slándála chun raon feidhme próisis deimhniúcháin a thuiscint, is gá do ENISA freisin an sprioc slándála a chomhfhreagraíonn do gach deimhniú SEDC a fhoilsiú ar a shuíomh gréasáin.

(13)

Thairis sin, ba cheart do chomhlachtaí deimhniúcháin leagan Béarla den sprioc slándála agus den tuarascáil deimhniúcháin a sholáthar do ENISA chun é a chur ar a chumas don ghníomhaireacht an fhaisnéis sin a chur ar fáil i mBéarla ar an suíomh gréasáin comhfhreagrach, de bhun Airteagal 42(2) de Rialachán cur chun feidhme (AE) 2024/482. Chuige sin, ba cheart d’iarratasóirí ar dheimhniú leagan Béarla den sprioc slándála a sholáthar do chomhlachtaí deimhniúcháin, nuair a iarrtar sin orthu.

(14)

Ní gá an tagairt d’ainm an chomhlachta deimhniúcháin a bheith le feiceáil i sainaithint uathúil an deimhnithe toisc gur leor uimhir aitheantais an chomhlachta deimhniúcháin chun an comhlacht sin a shainaithint ar bhealach uathúil. Ní gá mí na heisiúna a bheith le feiceáil ach oiread ós rud é go ndéantar na deimhnithe a chomhaireamh ar bhonn bliantúil. Dá bhrí sin, ba cheart an ceanglas sin a scriosadh chun críoch simplithe. Ós rud é go gcomhfhreagraíonn bliain eisiúna an deimhnithe d’eisiúint an chéad deimhnithe, ba cheart an dáta céanna sin a bheith sa tsainaithint uathúil ar dheimhnithe arna n-eisiúint tar éis athbhreithniú, chun inrianaitheacht a áirithiú.

(15)

Dá bhrí sin, ba cheart Rialachán Cur Chun Feidhme (AE) 2024/482 a leasú dá réir sin.

(16)

Tá na bearta dá bhforáiltear sa Rialachán seo i gcomhréir leis an tuairim ón gCoiste arna bhunú le hAirteagal 66 de Rialachán (AE) 2019/881,

(1)

in Airteagal 2, cuirtear isteach na pointí (16), (17) agus (18) seo a leanas:

(2)

in Airteagal 5, cuirtear isteach an mhír 3 seo a leanas:

(3)

in Airteagal 9, cuirtear an méid seo a leanas in ionad mhír 2, pointe (a):

(4)

in Airteagal 11, mír 3, cuirtear an méid seo a leanas in ionad phointe (b):

(5)

in Airteagal 19, cuirtear an méid seo a leanas in ionad mhír 1:

(6)

Leasaítear Airteagal 42 mar a leanas:

(7)

in Airteagal 48, cuirtear an méid seo a leanas in ionad mhír 4:

(8)

Cuirtear an téacs atá in Iarscríbhinn I a ghabhann leis an Rialachán seo in ionad Iarscríbhinn I;

(9)

Cuirtear an téacs atá in Iarscríbhinn II a ghabhann leis an Rialachán seo in ionad Iarscríbhinn II;

(10)

Cuirtear an téacs atá in Iarscríbhinn III a ghabhann leis an Rialachán seo in ionad Iarscríbhinn III;

(11)

Leasaítear Iarscríbhinn IV i gcomhréir le hIarscríbhinn IV a ghabhann leis an Rialachán seo;

(12)

Leasaítear Iarscríbhinn V i gcomhréir le hIarscríbhinn V a ghabhann leis an Rialachán seo;

(13)

Cuirtear an téacs atá in Iarscríbhinn VI a ghabhann leis an Rialachán seo in ionad Iarscríbhinn IX.