(1)

Tá an Chomhairle le bearta a ghlacadh maidir le deiseanna iascaireachta a shocrú agus a chionroinnt, lena n-áirítear coinníollacha áirithe atá nasctha go feidhmiúil leis na deiseanna iascaireachta. Faoi Airteagal 16(4) de Rialachán (AE) Uimh. 1380/2013 ó Pharlaimint na hEorpa agus ón gComhairle (1), tá deiseanna iascaireachta le socrú i gcomhréir le cuspóirí an chomhbheartais iascaigh (CBI) a leagtar amach in Airteagal 2(2) den Rialachán sin. Faoi Airteagal 16(1) de Rialachán (AE) Uimh. 1380/2013, tá deiseanna iascaireachta le cionroinnt idir na Ballstáit ar bhealach lena n-áirithítear cobhsaíocht choibhneasta ghníomhaíochtaí iascaireachta gach Ballstáit le haghaidh gach stoic nó iascaigh.

(2)

Ba cheart na gabhálacha iomlána incheadaithe (GIInna) a leagan síos, dá bhrí sin, i gcomhréir le hAirteagal 3 de Rialachán (AE) Uimh. 1380/2013, ar bhonn na comhairle eolaíche is fearr atá ar fáil, agus gnéithe bitheolaíocha agus socheacnamaíocha á gcur san áireamh, agus cóir chothrom idir earnálacha iascaireachta á háirithiú freisin, agus i bhfianaise na dtuairimí a cuireadh in iúl le linn an chomhairliúcháin leis na páirtithe leasmhara.

(3)

Bunaítear le Rialachán (AE) 2016/1139 ó Pharlaimint na hEorpa agus ón gComhairle (2) plean ilbhliantúil do na stoic trosc (Gadus morhua), scadán (Clupea harengus) agus salán (Sprattus sprattus) i Muir Bhailt agus don iascach a shaothraíonn na stoic sin. I gcomhréir le hAirteagal 3(1) den Rialachán sin, is é is aidhm don phlean sin rannchuidiú le cuspóirí CBI a bhaint amach. Is é is aidhm don phlean freisin a áirithiú go ndéanfaidh saothrú acmhainní bitheolaíocha na mara pobail na speiceas atá á saothrú a athbhunú agus a chothabháil os cionn leibhéil ar ar féidir an uastáirgeacht inbhuanaithe (MSY) a tháirgeadh. Tá sé d’aidhm ag an bplean freisin rannchuidiú lena áirithiú go mbeidh gníomhaíochtaí iascaireachta agus dobharshaothraithe inbhuanaithe san fhadtéarma ó thaobh an chomhshaoil de agus go mbainisteofar iad ar bhealach a bheidh comhsheasmhach leis na cuspóirí arb éard atá iontu tairbhí eacnamaíocha, sóisialta agus fostaíochta a bhaint amach, agus go gcuirfidh sé le hinfhaighteacht soláthairtí bia. Áirítear ar na cuspóirí sin, mar a shonraítear a thuilleadh in Airteagal 2(5), pointí (c) agus (f), de Rialachán (AE) Uimh. 1380/2013, coinníollacha a sholáthar le haghaidh tionscal iascaireachta, gabhála agus próiseála agus gníomhaíochtaí a bhaineann le hiascaireacht ar talamh atá inmharthana agus iomaíoch. Thairis sin, tá sé d’aidhm acu caighdeán cóir maireachtála a áirithiú dóibh siúd a bhíonn ag brath ar ghníomhaíochtaí iascaireachta, go háirithe agus iascach cósta agus gnéithe socheacnamaíocha á gcur san áireamh.

(4)

An 28 Bealtaine 2025, d’fhoilsigh an Chomhairle Idirnáisiúnta um Thaiscéalaíocht na Mara (ICES) a comhairle bhliantúil stoic maidir le stoic Mhuir Bhailt le haghaidh 2026. Ní dhearna ICES ach an chomhairle a thug sí roimhe sin a atheisiú le haghaidh 2025 i gcás throisc Mhuir Bhailt Thoir. De réir ICES, bíonn stoic á meascadh go pointe áirithe ar a laghad i gcás fhormhór mór an iascaigh i Muir Bhailt. Baineann an meascadh sin le stoic a bhainistítear le GII, agus le stoic eile nach mbainistítear le GII araon. I measc speicis pheiligeacha agus speicis ghrinnill a tharlaíonn an méid is tábhachtaí den mheascadh.

(5)

Molann ICES gabhálacha nialasacha i leith scadáin Mhuir Bhailt Thiar, throisc Mhuir Bhailt Thoir agus Thiar, agus bhradáin Atlantaigh (Salmo salar) i bhforanna 22 go 31 (‘bradáin sa phríomh-imchuach’). Déantar troisc a fhoghabháil i ngach iascach, déantar scadáin Mhuir Bhailt Thiar a fhoghabháil in iascach spriocdhírithe salán, agus déantar bradáin sa phríomh-imchuach a fhoghabháil in iascach éagsúil. ICES le haghaidh 2026. Dá bhrí sin, dá leagfaí na GIInna síos le haghaidh na stoc sin ar na leibhéil a mhol ICES, thiocfadh feiniméan an ‘tachtspeicis’ chun cinn de thoradh na hoibleagáide na gabhálacha uile a thabhairt i dtír, lena n-áirítear foghabhálacha na stoc sin in iascach measctha. Is éard is ‘tachtspeiceas’ ann speiceas lena mbaineann easpa cuóta a d’fhéadfadh tabhairt ar shoitheach iascaireachta amháin nó níos mó scor den iascaireacht fiú más rud é go bhfuil cuótaí fós ag an soitheach nó ag na soithí sin le haghaidh speicis eile. Bheadh tionchar ar leith ag tachtadh iascaigh ar shoithí a dhéanann iascaireacht ar leathóga agus ar speicis pheiligeacha, rud a d’fhéadfadh iallach a chur orthu scor d’oibríochtaí iascaireachta in 2026 agus a d’fhágfadh go ndúnfaí an t-iascach sin roimh am. Ar bhonn sonraí ó Fhaireachlann an Mhargaidh Eorpaigh um Iascach agus um Tháirgí Dobharshaothraithe, meastar gurb é EUR 25 300 000 milliún, EUR 55 700 000 agus EUR 43 400 000 faoi seach luach céad-díola an iascaigh leathóg (Pleuronectes platessa), salán agus scadán ábhartha a cheadaítear a ghabháil laistigh de theorainneacha na GIInna agus a mheastar a ghabhfar sa limistéar iascaireachta ábhartha ar leith. Bheadh ar go leor iascach, go háirithe iascach cósta ar mionscála le haghaidh speicis nach mbainistítear le GII, scor d’oibríochtaí iascaireachta in 2026. Chun an chothromaíocht cheart a bhaint amach idir an t-iascach a choinneáil ar bun, i bhfianaise na n-impleachtaí tromchúiseacha socheacnamaíocha a d’fhéadfadh a bheith ann mura ndéanfar amhlaidh, agus an gá atá le stádas maith bitheolaíoch a bhaint amach le haghaidh na stoc sin, agus aird á tabhairt ar an deacracht a bhaineann le hiascaireacht a dhéanamh ar na stoic uile in iascach measctha ag an uastáirgeacht inbhuanaithe, is iomchuí na GIInna a choinneáil ar bun go heisiach le haghaidh foghabhálacha dosheachanta scadáin Mhuir Bhailt Thiar, throisc throisc Mhuir Bhailt Thoir agus Thiar agus bradáin sa phríomh-imchuach.

(6)

A mhéid a bhaineann le stoc throisc Mhuir Bhailt Thoir, tá gabhálacha nialasacha á moladh ag ICES i leith an stoic sin ó bhí 2019 ann. Ós rud é go bhfuil an stoc fós sa staid chriticiúil chéanna, le haghaidh 2026 d’atheisigh ICES an chomhairle a thug sí roimhe sin le haghaidh 2025, comhairle ina raibh ICES muiníneach as treochtaí bithmhaise an stoic agus go raibh an bhithmhais i bhfad faoi bhun an phointe tagartha um chaomhnú (Blim), ar faoina bhun a d’fhéadfadh acmhainneacht atáirgthe laghdaithe a bheith ann. I gcomhréir le hAirteagal 3(1) de Rialachán (AE) 2016/1139 agus le hAirteagal 16(4) de Rialachán (AE) Uimh. 1380/2013, is iomchuí, dá bhrí sin, an t-iascach spriocdhírithe a chur ar fionraí agus bearta ceartaitheacha atá nasctha go feidhmiúil a ghlacadh. I gcomhréir le hAirteagal 2(1) agus le hAirteagal 2(5), pointí (c) agus (f), de Rialachán (AE) Uimh. 1380/2013, ba cheart na deiseanna iascaireachta le haghaidh foghabhálacha dosheachanta a shocrú ar leibhéal íseal chun na hiarmhairtí socheacnamaíocha a d’fhéadfadh a bheith tromchúiseach a sheachaint, ar iarmhairtí iad a bheadh ann mar thoradh ar na deiseanna iascaireachta a shocrú ag nialas.

(7)

A mhéid a bhaineann le stoc throisc Mhuir Bhailt Thiar, tar éis leibhéal íseal gabhálacha a mholadh ar feadh roinnt blianta, molann ICES gabhálacha nialasacha le haghaidh 2026 toisc go meastar go bhfuil bithmhais an stoic faoi bhun Blim in 2025 agus nach n-athbhunóidh sí os cionn Blim in 2027. I gcomhréir le hAirteagal 3(1) de Rialachán (AE) 2016/1139 agus le hAirteagal 16(4) de Rialachán (AE) Uimh. 1380/2013, is iomchuí, dá bhrí sin, an t-iascach spriocdhírithe a chur ar fionraí agus bearta ceartaitheacha atá nasctha go feidhmiúil a ghlacadh. I gcomhréir le hAirteagal 2(1) agus le hAirteagal 2(5), pointí (c) agus (f), de Rialachán (AE) Uimh. 1380/2013, ba cheart na deiseanna iascaireachta le haghaidh foghabhálacha dosheachanta a shocrú ar leibhéal íseal chun na hiarmhairtí socheacnamaíocha a bheadh ann mar thoradh ar na deiseanna iascaireachta a shocrú ag nialas a sheachaint.

(8)

A mhéid a bhaineann le bradáin sa phríomh-imchuach, choinnigh ICES ar bun a comhairle maidir le gabhálacha nialasacha, agus bhreithnigh sé an fhéidearthacht le haghaidh 2026 leanúint d’iascach spriocdhírithe shamhraidh chósta thráchtála agus áineasa sa limistéar atá lastuaidh de dhomhanleithead 59o 30′ T (foranna 29 Thuaidh go 31 ICES). Laghdaigh ICES a comhairle faoi ghabhálacha a thuilleadh i gcomparáid le 2025 freisin mar gheall ar éiginnteachtaí breise maidir le flúirse na mbradán sa phríomh-imchuach san abhainn bradán sa phríomh-imchuach is tábhachtaí. I gcomhréir le hAirteagal 16(4) de Rialachán (AE) Uimh. 1380/2013, is iomchuí, dá bhrí sin, leibhéal na ndeiseanna iascaireachta agus an limistéar iascaireachta agus an tréimhse iascaireachta a shocrú i gcomhréir le comhairle ICES, agus bearta ceartaitheacha atá nasctha go feidhmiúil a choinneáil ar bun.

(9)

Chun leas iomlán na ndeiseanna iascaireachta cósta le haghaidh bradán i bhforoinn 32 ICES a áirithiú, is iomchuí an tsolúbthacht theoranta idirlimistéir le haghaidh bradán idir foranna 22 go 31 ICES agus foroinn 32 ICES a cheadú.

(10)

Chun laghdú a dhéanamh ar an riosca go ndéanfaí bradáin a mhíthuairisciú mar bhric gheala in iascach bradán, is iomchuí toirmeasc a chur ar iascaireacht a dhéanamh ar bhric gheala thar cheithre mhuirmhíle arna dtomhas ó na bonnlínte agus foghabhálacha breac geal a theorannú go 3 % den chomhghabháil breac geal agus bradán.

(11)

Ba cheart bearta maidir le hiascach áineasa trosc agus bradán sa phríomh-imchuach, agus bearta chun na stoic breac geal agus bradán a chaomhnú, a bheith gan dochar do bhearta náisiúnta níos déine arna nglacadh i gcomhréir le hAirteagail 19 agus 20 de Rialachán (AE) Uimh. 1380/2013.

(12)

A mhéid a bhaineann le scadáin i Murascaill na Boitnia, measann ICES gur lean an bhithmhais de bheith ag laghdú agus go bhfuil sí leath bealaigh idir Blim agus an pointe tagartha um chaomhnú (MSY Btrigger) anois, ar faoina bhun atá bearta ceartaitheacha iomchuí le déanamh chun a áirithiú go ndéanfar an stoc a athbhunú go tapa ar leibhéil atá os cionn na leibhéal atá in ann an uastáirgeacht inbhuanaithe a tháirgeadh. Luann ICES freisin éiginnteachtaí maidir leis an meastachán ar na haoisghrúpaí óga agus ar an meáchan ag aois ar leith. Thairis sin, tugann ICES dá aire go fóill nach dócha go dtiocfaidh méadú ar chion na n-iasc is sine sa daonra dá socrófaí na deiseanna iascaireachta ag luach phointe FMSY. Thairis sin, tugann ICES dá aire gur dócha go mbeidh an stoc i mbaol éagsúlacht ghéiniteach a chailliúint. I gcomhréir le Rialachán (AE) 2016/1139, is iomchuí, dá bhrí sin, na deiseanna iascaireachta a shocrú dá réir sin agus tréimhse choiscthe 3 mhí le linn an tséasúir sceite a bhunú mar bheart ceartaitheach atá nasctha go feidhmiúil.

(13)

A mhéid a bhaineann le scadáin Mhuir Bhailt Thiar, molann ICES gabhálacha nialasacha i leith an stoic sin don 8ú bliain as a chéile. Mar a tharla in 2024, rinne ICES athbhreithniú anuas ar na meastacháin ar bhithmhais le haghaidh na mblianta roimhe sin agus measann sé nach mbeidh sa bhithmhais ach 52 % de Blim fós in 2025, cé go bhfuil méadú leanúnach tagtha uirthi ó bhí 2021 ann. Thairis sin, tá an earcaíocht ar leibhéil níos ísle ná riamh go fóill agus meastar nach n-athbhunófar an bhithmhais os cionn Blim in 2027. I gcomhréir le hAirteagal 2(1) agus le hAirteagal 2(5), pointí (c) agus (f), de Rialachán (AE) Uimh. 1380/2013, ba cheart na deiseanna iascaireachta le haghaidh foghabhálacha dosheachanta a shocrú ar leibhéal íseal chun na hiarmhairtí socheacnamaíocha a bheadh ann mar thoradh ar na deiseanna iascaireachta a shocrú ag nialas a sheachaint.

(14)

A mhéid a bhaineann le scadáin Mhuir Bhailt Láir, measann ICES go bhfuil an stoc faoi bhun Blim formhór an ama le 30 bliain anuas. Measann ICES, mar gheall ar mheáchan ag aois ar leith méadaithe agus earcaíocht láidir in 2022, go bhfuil an stoc os cionn Blim ó bhí 2024 ann, ach go bhfuil sé i bhfad faoi bhun MSY Btrigger go fóill. Measann ICES go bhféadfadh an earcaíocht in 2024 agus 2025 a bheith láidir, ach cuireann sé i dtábhacht go bhfuil na meastacháin sin éiginnte. Tá an earcaíocht in 2023 faoi bhun an mheáin. Thairis sin, meabhraíonn ICES go bhfuil míthuairisciú leanúnach ar speicis ag cur le héiginnteacht na comhairle. I gcomhréir le Rialachán (AE) 2016/1139, is iomchuí, dá bhrí sin, na deiseanna iascaireachta a shocrú dá réir sin agus tréimhse choiscthe 3 mhí le linn an tséasúir sceite a bhunú mar bheart ceartaitheach atá nasctha go feidhmiúil.

(15)

A mhéid a bhaineann le scadáin i Murascaill Ríge agus leathóga, measann ICES go bhfuil an bhithmhais os cionn MSY Btrigger agus go bhfuil an brú iascaireachta faoi bhun FMSY. I gcomhréir le Rialachán (AE) 2016/1139, is iomchuí, dá bhrí sin, na deiseanna iascaireachta a shocrú dá réir sin.

(16)

A mhéid a bhaineann le saláin, measann ICES, cé go bhfuil an bhithmhais os cionn MSY Btrigger go fóill, gur lean an bhithmhais de bheith ag laghdú mar gheall ar earcaíocht a bhí níos ísle ná riamh ó 2021 go 2023. Meastar go bhfuil an bhithmhais in 2025 ar an leibhéal is ísle ó bhí 1990 ann, agus go bhfuil sí gar do MSY Btrigger. Measann ICES go bhféadfadh an earcaíocht in 2024 a bheith thar a bheith ard, ach cuireann sé i dtábhacht go láidir go bhfuil an meastachán éiginnte agus go bhféadfaí gannmheastachán a dhéanamh ar an dóchúlacht go mbeadh an bhithmhais faoi bhun na bpointí tagartha um chaomhnú. Thairis sin, meabhraíonn ICES go bhfuil míthuairisciú leanúnach ar speicis ag cur le héiginnteacht na comhairle. I gcomhréir le Rialachán (AE) 2016/1139, is iomchuí, dá bhrí sin, na deiseanna iascaireachta a shocrú dá réir sin agus an tréimhse choiscthe 3 mhí atá ann cheana le linn an tséasúir sceite a choinneáil ar bun.

(17)

Déanfar faireachán ar úsáid na ndeiseanna iascaireachta a leagtar amach sa Rialachán seo agus déanfar iad a rialú i gcomhréir le Rialachán (CE) Uimh. 1224/2009 ón gComhairle (3), go háirithe Airteagail 33 agus 34 de, maidir le gabhálacha agus iarracht iascaireachta a thaifeadadh, agus maidir le fógra a thabhairt don Choimisiún faoi shonraí i ndáil le hídiú deiseanna iascaireachta. Is gá, dá bhrí sin, sonrú a dhéanamh ar na cóid a úsáideann na Ballstáit agus sonraí á gcur chuig an gCoimisiún maidir le stoic éisc a thabhairt i dtír a chumhdaítear leis an Rialachán seo.

(18)

Déantar foráil le hAirteagail 3 agus 4 de Rialachán (CE) Uimh. 847/96 ón gComhairle (4) maidir le solúbthacht ó bhliain go bliain i dtaca le cuótaí le haghaidh stoic atá faoi réir GIInna réamhchúraim agus anailíseacha araon. Faoi Airteagal 2 den Rialachán sin, nuair a bheidh GIInna á socrú aici, tá an Chomhairle le cinneadh a dhéanamh maidir leis na stoic nach mbeidh feidhm ag Airteagail 3 agus 4 maidir leo, go háirithe ar bhonn a stádais bhitheolaíoch. Thairis sin, le hAirteagal 15(9) de Rialachán (AE) Uimh. 1380/2013 rinneadh foráil maidir le solúbthacht bhreise ó bhliain go bliain le haghaidh na stoc uile atá faoi réir na hoibleagáide gabhálacha a thabhairt i dtír. Chun solúbthacht iomarcach a sheachaint a bhainfeadh an bonn de bhaint amach chuspóirí CBI, níor cheart feidhm charnach a bheith ag solúbthacht ó bhliain go bliain le haghaidh cuótaí faoi Airteagail 3 agus 4 de Rialachán (CE) Uimh. 847/96 agus Airteagal 15(9) de Rialachán (AE) Uimh. 1380/2013. Ba cheart solúbthacht ó bhliain-go bliain faoi Airteagal 15(9) de Rialachán (AE) Uimh. 1380/2013 a eisiamh, i gcás inarb ábhartha, ar bhonn stádas bitheolaíoch na stoc.

(19)

Tá bithmhais stoc throisc Mhuir Bhailt Thoir, stoc throisc Mhuir Bhailt Thiar agus stoc scadáin Mhuir Bhailt Thiar faoi bhun Blim. Níor cheart ach iascaigh foghabhála agus iascach eolaíocha a cheadú i gcás na stoc sin uile in 2026. Dá bhrí sin, agus i bhfianaise athléimneacht réasúnta íseal éiceachóras Mhuir Bhailt, tá gealltanas tugtha ag na Ballstáit a bhfuil sciar cuóta de na GIInna lena mbaineann acu gan an tsolúbthacht ó bhliain go bliain faoi Airteagal 15(9) de Rialachán (AE) Uimh. 1380/2013 a chur i bhfeidhm maidir leis na stoic sin in 2026, ionas nach rachaidh gabhálacha in 2026 thar na GIInna lena mbaineann. Thairis sin, laisteas de dhomhanleithead 59o 30′ T, tá an bhithmhais atá ag beagnach gach stoc bradáin sa phríomh-imchuach sna haibhneacha faoi bhun an phointe tagartha teorann do tháirgeadh brainlíní (Rlim) agus ní cheadaítear ach iascach foghabhála agus eolaíocha in 2026. Dá bhrí sin, thug na Ballstáit ábhartha gealltanas comhchosúil maidir le solúbthacht ó bhliain go bliain i ndáil le gabhálacha bradán sa phríomh-imchuach in 2026.

(20)

Le Rialachán (AE) 2025/202 ón gComhairle (5), socraítear an GII le haghaidh trosc Ioruach (Trisopterus esmarkii) i roinn 3a ICES (Skagerrak-Kattegat), in uiscí na Ríochta Aontaithe agus uiscí an Aontais i bhfolimistéar 4 ICES agus in uiscí na Ríochta Aontaithe i roinn 2a ICES (an Mhuir Thuaidh). Chuaigh an tAontas agus an Ríocht Aontaithe i mbun comhairliúcháin dhéthaobhacha an 20 Deireadh Fómhair 2025 maidir leis an GII le haghaidh trosc Ioruach sna limistéir sin le haghaidh na tréimhse ón 1 Samhain 2025 go dtí an 31 Deireadh Fómhair 2026. Tionóladh na comhairliúcháin sin faoi Airteagal 498(2) den Chomhaontú Trádála agus Comhair idir an tAontas Eorpach agus an Comhphobal Eorpach do Fhuinneamh Adamhach, de pháirt, agus Ríocht Aontaithe na Breataine Móire agus Thuaisceart Éireann, den pháirt eile (6). Ghlac an tAontas páirt sna comhairliúcháin sin ar bhonn sonraíochtaí maidir leis an seasamh ón Aontas a d’fhormhuinigh an Chomhairle an 14 Deireadh Fómhair 2025, faoi Airteagal 2 de Chinneadh (AE) 2021/1875 ón gComhairle (7). Tháinig an tAontas agus an Ríocht Aontaithe ar chomhaontú maidir le GII bunaithe ar an gcomhairle ó ICES le haghaidh trosc Ioruach i bhfolimistéar 4 agus i roinn 3a de chuid ICES le haghaidh na tréimhse sin, comhairle a foilsíodh an 10 Deireadh Fómhair 2025. Rinneadh toradh an chomhairliúcháin a dhoiciméadú sa Taifead i Scríbhinn, a shínigh Cinn Toscaireachta an Aontais agus na Ríochta Aontaithe an 24 Deireadh Fómhair 2025. Ba cheart an GII le haghaidh na tréimhse ón 1 Samhain 2025 go dtí an 31 Deireadh Fómhair 2026 a shocrú ar an leibhéal a leagtar amach sa Taifead sin i Scríbhinn.

(21)

Le Rialachán (AE) 2025/202, socraítear an GII le haghaidh tuinníní colgacha (Thunnus alalunga) sa Mheánmhuir le haghaidh 2025. An 29 Meán Fómhair 2025, chomhaontaigh an Tuirc 50 kg dá cuóta le haghaidh tuinníní colgacha sa Mheánmhuir le haghaidh 2025 a aistriú chuig an Aontas, i gcomhréir leis na rialacha is infheidhme arna nglacadh ag an gCoimisiún Idirnáisiúnta um Chaomhnú na dTuinníní Atlantacha a mhéid a bhaineann le haistrithe. Ba cheart an t-aistriú sin a chur chun feidhme i ndlí an Aontais.

(22)

Ba cheart, dá bhrí sin, Rialachán (AE) 2025/202 a leasú dá réir sin.

(23)

Chun briseadh i ngníomhaíochtaí iascaireachta a sheachaint agus chun slí bheatha iascairí a chosaint, ba cheart feidhm a bheith ag forálacha an Rialacháin seo a bhaineann le Muir Bhailt ón 1 Eanáir 2026. Ba cheart feidhm chúlghabhálach a bheith ag na forálacha lena leasaítear Rialachán (AE) 2025/202 a bhaineann le troisc Ioruacha in Skagerrak-Kattegat agus sa Mhuir Thuaidh ón 1 Samhain 2025 go dtí an 31 Deireadh Fómhair 2026, toisc gurb é sin an séasúr iascaireachta le haghaidh trosc Ioruach. Ba cheart feidhm chúlghabhálach a bheith ag na forálacha Rialachán (AE) 2025/202 a bhaineann le tuinníní colgacha na Meánmhara ón 1 Eanáir 2025, chun an tréimhse thuairiscithe le haghaidh an GII a choinneáil ar bun, tréimhse a raibh feidhm aici ón 1 Eanáir 2025. Ní dhéanann an cur i bhfeidhm cúlghabhálach sin difear do phrionsabal na deimhneachta dlíthiúla ná do phrionsabal an ionchais dhlisteanaigh, os rud é nár ídíodh na cuótaí faoi na GIInna sin go fóill nó gur méadaítear iad. Ar chúiseanna práinne, ba cheart an Rialachán seo a theacht i bhfeidhm láithreach tar éis a fhoilsithe in Iris Oifigiúil an Aontais Eorpaigh,