(1)

Le hiontrálacha 28, 29 agus 30 d’Iarscríbhinn XVII a ghabhann le Rialachán (CE) Uimh. 1907/2006, cuirtear toirmeasc ar shubstaintí a aicmítear mar charcanaigin, só-ghineach gaiméite nó tocsain atáirgthe (CMR), catagóirí 1A nó 1B i gCuid 3 d’Iarscríbhinn VI a ghabhann le Rialachán (CE) Uimh. 1272/2008 ó Pharlaimint na hEorpa agus ón gComhairle (2), a chur ar an margadh agus a úsáid lena soláthar don phobal i gcoitinne, agus a liostaítear i bhFoscríbhinní 1 go 6 d’Iarscríbhinn XVII a ghabhann le Rialachán (CE) Uimh. 1907/2006, agus ar mheascáin ina bhfuil na substaintí sin os cionn tiúchan sainithe.

(2)

Maidir le Foscríbhinní 2, 4 agus 6 d’Iarscríbhinn XVII a ghabhann le Rialachán (CE) Uimh. 1907/2006, ba cheart iad a leasú ionas go mbeidh siad ag teacht le haicmiú nua substaintí mar CMR i Rialachán (CE) Uimh. 1272/2008, arna leasú le Rialachán Tarmligthe (AE) 2024/197 ón gCoimisiún (3). Dá bhrí sin, na substaintí nua-aicmithe CMR de chatagóir 1B, is iomchuí iad a áireamh i bhFoscríbhinní 2, 4 agus 6 d’Iarscríbhinn XVII a ghabhann le Rialachán (CE) Uimh. 1907/2006.

(3)

Beidh feidhm ag aicmiú substaintí i Rialachán (CE) Uimh. 1272/2008 arna leasú le Rialachán Tarmligthe (AE) 2024/197 ón 1 Meán Fómhair 2025. An srian a thugtar isteach leis an Rialachán seo a mhéid a bhaineann leis na substaintí a aicmítear le Rialachán Tarmligthe (AE) 2024/197 mar shubstaintí CMR de chatagóir 1B, ba cheart feidhm a bheith aige ón dáta céanna dá bhrí sin. Ní chuireann an dáta cur i bhfeidhm cosc ar oibreoirí na srianta a chur i bhfeidhm níos luaithe, srianta ar shubstaintí CMR de chatagóir 1B a liostaítear san Iarscríbhinn a ghabhann le Rialachán Tarmligthe (AE) 2024/197.

(4)

Le Rialachán (AE) 2023/1132 ón gCoimisiún (4) áiríodh cuiméin i bhFoscríbhinn 2 a ghabhann le hIarscríbhinn XVII a ghabhann le Rialachán (CE) Uimh. 1907/2006 ón 1 Nollaig 2023. Tá cúiméin i mbreoslaí eitlíochta áirithe le haghaidh eitleáin bheaga, lena n-áirítear eitleáin bheaga a eitlíonn píolótaí neamhghairmiúla. Is daoine den phobal i gcoitinne iad na píolótaí neamhghairmiúla sin dá dtagraítear in iontrálacha 28, 29 agus 30 d’Iarscríbhinn XVII a ghabhann le Rialachán (CE) Uimh. 1907/2006. Dá réir sin, ní cheadaítear cuiméin a chur ar an margadh ná a úsáid i mbreoslaí eitlíochta lena soláthar do phíolótaí neamhghairmiúla i dtiúchan 0,1 % w/w nó níos mó ón 1 Nollaig 2023.

(5)

Níl feidhm ag iontrálacha 28, 29 agus 30 d’Iarscríbhinn XVII a ghabhann le Rialachán (CE) Uimh. 1907/2006 maidir le roinnt breoslaí agus táirgí ola, inter alia, lena n-áirítear breoslaí mótair a chumhdaítear le Treoir 98/70/CE ó Pharlaimint na hEorpa agus ón gComhairle (5). Áirítear ar na breoslaí mótair sin breoslaí peitril agus díosail d’fheithiclí bóthair atá feistithe le hinnill adhainte deimhní agus innill adhainte comhbhrú. Dá bhrí sin, níl feidhm ag an srian ar chuiméin maidir le breoslaí mótair a chur ar an margadh ná a úsáid lena soláthar do thiománaithe gluaisteán neamhghairmiúla.

(6)

I bhfianaise na gcosúlachtaí idir an úsáid a bhaineann tiománaithe gluaisteán neamhghairmiúla as breoslaí mótair agus an úsáid a bhaineann píolótaí eitleán beag neamhghairmiúla as breoslaí eitlíochta, agus i bhfianaise go bhfuil i bhfad níos lú píolótaí eitleán beag neamhghairmiúla a úsáideann breoslaí eitlíochta ná tiománaithe gluaisteán neamhghairmiúla a úsáideann breoslaí mótair agus nach gcuireann Treoir 98/70/CE féin srian ar chuiméin sna breoslaí mótair sin, ba cheart cuiméin atá i mbreosla eitlíochta a dhíolmhú ón srian ar iontrálacha 28, 29 agus 30 d’Iarscríbhinn XVII a ghabhann le Rialachán (CE) Uimh. 1907/2006. Dá bhrí sin, ba cheart Foscríbhinn 11 d’Iarscríbhinn XVII a ghabhann le Rialachán (CE) Uimh. 1907/2006 a leasú chun an maolú sin a léiriú.

(7)

Ba cheart, dá bhrí sin, Rialachán (CE) Uimh. 1907/2006 a leasú dá réir sin.

(8)

Na bearta dá bhforáiltear sa Rialachán seo, is bearta iad atá i gcomhréir leis an tuairim ón gCoiste arna bhunú le hAirteagal 133(1) de Rialachán (CE) Uimh. 1907/2006,