(1)

Déantar gníomhaíochtaí eitlíochta a áireamh sa chóras i ndáil le lamháltais astaíochtaí gás ceaptha teasa a thrádáil laistigh den Aontas (‘CTA AE’) a bunaíodh le Treoir 2003/87/CE.

(2)

Le Treoir (AE) 2023/958 ó Pharlaimint na hEorpa agus ón gComhairle (2) leasaíodh Treoir 2003/87/CE chun an Scéim Fritháirithe agus Laghdaithe Carbóin don Eitlíocht Idirnáisiúnta (‘CORSIA’) de chuid na hEagraíochta Eitlíochta Sibhialta Idirnáisiúnta (‘EESI’) a chur chun feidhme go hiomchuí.

(3)

De bhun Airteagal 25a(3) de Threoir 2003/87/CE, tá an Coimisiún le liosta Stát a ghlacadh a meastar go bhfuil CORSIA á chur i bhfeidhm acu chun críocha Threoir 2003/87/CE, le bonnlíne 85 % d’astaíochtaí 2019 le haghaidh gach bliana ó 2024, cé is moite de thíortha LEE, den Eilvéis agus den Ríocht Aontaithe. Sa Treoir sin, rinneadh tíortha LEE, an Eilvéis agus an Ríocht Aontaithe a eisiamh ó liosta Stát den sórt sin ó tharla go dtagann na bealaí idir na tíortha sin faoi raon feidhme a gcóras trádála astaíochtaí faoi seach.

(4)

I gcás 2025, maidir leis an gcinneadh chun Stát a áireamh ar an liosta de na Stáit a meastar go bhfuil CORSIA á chur i bhfeidhm acu chun críocha Threoir 2003/87/CE, tá sé bunaithe ar fhógra ón Stát ina dtugtar le fios go bhfuil sé beartaithe aige CORSIA a chur i bhfeidhm maidir le hastaíochtaí in 2025, agus ar fhógra den sórt sin a thabhairt do Rúnaíocht EESI. Foilsíonn Rúnaíocht EESI liosta in aghaidh na bliana de na Stáit a thug an fógra sin. Chun na hathruithe ar na liostaí sin a fhoilsítear ar bhonn bliantúil a léiriú, tá an Coimisiún le liosta Stát a ghlacadh gach bliain, ar stáit iad a meastar go bhfuil CORSIA á chur i bhfeidhm acu chun críocha Threoir 2003/87/CE, cé is moite de thíortha LEE, den Eilvéis agus den Ríocht Aontaithe.

(5)

Áirítear San Mairíne agus Monacó ar an liosta de na Stáit a meastar go bhfuil CORSIA á chur i bhfeidhm acu agus a d’fhoilsigh Rúnaíocht EESI le haghaidh 2025. Mar sin féin, níor cheart San Mairíne ná Monacó a áireamh san Iarscríbhinn a ghabhann leis an Rialachán seo ó tharla nach bhfuil aon aerfort acu agus ó tharla nach bhfuil aon eitilt acu lena n-úsáidtear bealaí a bhfuil CORSIA á chur i bhfeidhm orthu chun críocha Threoir 2003/87/CE.

(6)

Tá na bearta dá bhforáiltear sa Rialachán seo i gcomhréir leis an tuairim ón gCoiste um Athrú Aeráide,