(1)

Tá an Comhaontú Comhlachais idir an tAontas Eorpach agus an Comhphobal Eorpach do Fhuinneamh Adamhach agus a gcuid Ballstát, de pháirt, agus an Úcráin, den pháirt eile (2), (an Comhaontú Comhlachais) ina bhonn leis an gcaidreamh idir an tAontas agus an Úcráin. I gcomhréir le Cinneadh 2014/668/AE ón gComhairle (3), bhí feidhm shealadach ag Teideal IV den Chomhaontú Comhlachais, ar teideal é a bhaineann le trádáil agus le hábhair a bhaineann le trádáil, ón 1 Eanáir 2016 agus tháinig sé i bhfeidhm an 1 Meán Fómhair 2017, tar éis do na Ballstáit uile é a dhaingniú.

(2)

Leis an gComhaontú Comhlachais, déantar caidreamh idir na Páirtithe sa Chomhaontú Comhlachais (‘na Páirtithe’) a neartú agus a leathnú ar bhealach uaillmhianach agus nuálach, d’fhonn comhtháthú eacnamaíoch a éascú agus a bhaint amach de réir a chéile, agus i gcomhréir leis na cearta agus leis na hoibleagáidí is toradh ar bhallraíocht na bPáirtithe san Eagraíocht Dhomhanda Trádála.

(3)

Le Rialachán (AE) 2015/478 ó Pharlaimint na hEorpa agus ón gComhairle (4), leagtar síos comhrialacha d’allmhairiú táirgí ar de thionscnamh formhór na dtríú tíortha iad, lena n-áirítear an Úcráin. Tá forálacha ann freisin maidir le bearta faireachais agus cosanta.

(4)

Ó bhí an 24 Feabhra 2022 ann, tá an cogadh foghach gan chúis gan údar a chuir an Rúis ar an Úcráin tar éis tionchar an-diúltach a imirt ar chumas na hÚcráine trádáil a dhéanamh leis an gcuid eile den domhan. Is amhlaidh a bhí an cás le haghaidh earnáil an iarainn agus na cruach, cuir i gcás, de dheasca forghabháil nó scrios saoráidí táirgthe iarann agus cruach. Is amhlaidh a bhí an cás le haghaidh earnálacha eile de gheilleagar na hÚcráine freisin.

(5)

Faoi na himthosca sin agus chun tionchar eacnamaíoch diúltach chogadh foghach na Rúise ar an Úcráin ar an ngeilleagar a mhaolú, is iomchuí, chun leas na hÚcráine, allmhairiú táirgí de thionscnamh na hÚcráine isteach san Aontas a eisiamh ó bhearta faireachais agus cosanta an Aontais. Chun na críche sin, is gá forálacha áirithe de Rialachán (AE) 2015/478 maidir le allmhairí ón Úcráin a chur ar fionraí.

(6)

Chun coinníollacha aonfhoirmeacha a áirithiú maidir leis an Rialachán seo a chur chun feidhme, ba cheart cumhachtaí cur chun feidhme a thabhairt don Choimisiún chun cur i bhfeidhm an Rialacháin seo a chur ar fionraí go sealadach i ndáil le táirge sonrach de thionscnamh na hÚcráine. Ba cheart na cumhachtaí sin a fheidhmiú i gcomhréir le Rialachán (AE) Uimh. 182/2011 ó Pharlaimint na hEorpa agus ón gComhairle (5). Ba cheart fad na tréimhse fionraíochta sin a bheith sách fada le gur féidir leis an gCoimisiún togra a dhéanamh le haghaidh rialachán lena gcuirtear an Rialachán seo ar fionraí, lena leasaítear é nó lena n-aisghairtear é agus le gur féidir le Parlaimint na hEorpa agus an Comhairle rialachán den sórt sin a ghlacadh.

(7)

Ba cheart feidhm a bheith ag an Rialachán seo ar feadh 3 bliana.

(8)

I bhfianaise go bhfuiltear ag teannadh leis an 5 Meitheamh 2025, is é sin dul in éag Rialachán (AE) 2024/1392 ó Pharlaimint na hEorpa agus ón gComhairle (6), lena ndéantar foráil, inter alia, maidir le héifeachtaí atá coibhéiseach le héifeachtaí an Rialacháin seo, ba cheart an Rialachán seo a theacht i bhfeidhm an 6 Meitheamh 2025,