(1)

Le Rialachán Cur Chun Feidhme (AE) Uimh. 993/2011 ón gCoimisiún (2) cuimsíodh 8-hiodrocsacuineoilín (an gnáthainm ar chuineoilín-8-ól) mar shubstaint ghníomhach i gCuid B den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (3).

(2)

Idir an dá linn, chuir an Coimisiún síneadh le tréimhse formheasa chuineoilín-8-óil ceithre huaire, tréimhse a chuaigh in éag ar dtús an 31 Nollaig 2021, i gcomhréir le hAirteagal 17 de Rialachán (CE) Uimh. 1107/2009.

(3)

Formheas na substainte gníomhaí cuineoilín-8-ól a leagtar amach i gCuid B den Iarscríbhinn a ghabhann le Rialachán Cur Chun Feidhme (AE) Uimh. 540/2011, rachaidh sé in éag an 31 Nollaig 2025.

(4)

Cuireadh iarratas faoi bhráid na Spáinne, an Ballstát is rapóirtéir, agus faoi bhráid na hÍsiltíre, an Ballstát is comhrapóirtéir, chun formheas na substainte gníomhaí cuineoilín-8-ól mar shubstaint atá inbhreithnithe lena hionadú a athnuachan, i gcomhréir le hAirteagal 1 de Rialachán Cur Chun Feidhme (AE) Uimh. 844/2012 ón gCoimisiún (4) agus laistigh den tréimhse ama dá bhforáiltear san Airteagal sin.

(5)

Chuir an t-iarratasóir na sainchomhaid fhorlíontacha is gá faoi bhráid an Bhallstáit is rapóirtéir, an Bhallstáit is comhrapóirtéir, an Choimisiúin agus an Údaráis Eorpaigh um Shábháilteacht Bia (‘an tÚdarás’) i gcomhréir le hAirteagal 6 de Rialachán Cur Chun Feidhme (AE) Uimh. 844/2012. Chinn an Ballstát is rapóirtéir an t-iarratas a bheith inghlactha.

(6)

D’ullmhaigh an Ballstát is rapóirtéir dréacht-tuarascáil maidir le measúnú ar athnuachan i gcomhairle leis an mBallstát is comhrapóirtéir agus chuir sé faoi bhráid an Údaráis agus an Choimisiúin í an 9 Iúil 2021. Ina dhréacht-tuarascáil maidir le measúnú ar athnuachan, mhol an Ballstát is rapóirtéir go ndéanfaí formheas cuineoilín-8-óil a athnuachan.

(7)

Chuir an tÚdarás an sainchomhad achomair forlíontach ar fáil don phobal. Scaip an tÚdarás an dréacht-tuarascáil maidir le measúnú ar athnuachan ar an iarratasóir agus ar na Ballstáit freisin chun barúlacha a fháil uathu agus sheol sé comhairliúchán poiblí ina leith. Chuir an tÚdarás na barúlacha a fuarthas ar aghaidh chuig an gCoimisiún.

(8)

An 28 Feabhra 2024, chuir an tÚdarás an chonclúid uaidh (5) in iúl don Choimisiún inar léiríodh, agus na critéir formheasa a leagtar síos in Iarscríbhinn II a ghabhann le Rialachán (CE) Uimh. 1107/2009 á gcur san áireamh, gur féidir coinne a bheith leis go gcomhlíonfaidh táirgí cosanta plandaí ina bhfuil cuineoilín-8-ól na critéir formheasa dá bhforáiltear in Airteagal 4 de Rialachán (CE) Uimh. 1107/2009. Léirigh an chonclúid ón Údaráis freisin nach meastar go gcomhlíonann cuineoilín-8-ól na critéir maidir le hairíonna suaiteora inchrínigh mar a leagtar síos i bpointí 3.6.5 agus 3.8.2 d’Iarscríbhinn II a ghabhann le Rialachán (CE) Uimh. 1107/2009.

(9)

Le Rialachán (AE) 2017/776 ón gCoimisiún (6) leasaíodh Iarscríbhinn VI a ghabhann le Rialachán (CE) Uimh. 1272/2008 ó Pharlaimint na hEorpa agus ón gComhairle (7) chun cuineoilín-8-ól (mar 8-hiodrocsacuineoilín) a áireamh agus é aicmithe mar shubstaint atá tocsaineach don atáirgeadh de chatagóir 1B.

(10)

Substaintí gníomhacha atá aicmithe mar shubstaint atá tocsaineach don atáirgeadh de chatagóir 1B, ní féidir iad a fhormheas ach amháin má léirítear go bhfuil nochtadh an duine don tsubstaint ghníomhach sin diomaibhseach. Léirigh úsáidí ionadaíocha cuineoilín-8-ól, lena n-áirítear coinníollacha agus srianta, gur féidir, faoi na coinníollacha agus na srianta sin, nochtadh diomaibhseach daoine a léiriú, trí bhealaí nochta cothaitheacha agus neamhchothaitheacha araon.

(11)

An 13 Meitheamh 2024 chuir an Coimisiún tuarascáil athnuachana chuig na Ballstáit agus chuig an iarratasóir agus an 10 Iúil 2024 chuir sé dréacht den Rialachán seo chuig an mBuanchoiste um Plandaí, Ainmhithe, Bia agus Beatha.

(12)

D’iarr an Coimisiún ar an iarratasóir a bharúlacha a chur isteach maidir leis an gconclúid ón Údarás agus, i gcomhréir le hAirteagal 14(1), an tríú fomhír, de Rialachán Cur Chun Feidhme (AE) Uimh. 844/2012, maidir leis an tuarascáil athnuachana. Chuir an t-iarratasóir a bharúlacha isteach, rinneadh scrúdú cúramach orthu agus cuireadh san áireamh iad.

(13)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil an tsubstaint ghníomhach cuineoilín-8-ól, suíodh gur comhlíonadh na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(14)

Tá an measúnú riosca maidir le formheas na substainte gníomhaí cuineoilín-8-ól a athnuachan bunaithe ar líon teoranta úsáidí ionadaíocha, ach mar sin féin níl srian ar na húsáidí lena bhféadfar táirgí cosanta plandaí a bhfuil cuineoilín-8-ól iontu a údarú. Dá bhrí sin, is iomchuí gan an srian a choinneáil ar bun maidir leis an tsubstaint ghníomhach sin a úsáid mar fuingicíd agus mar bhaictéiricíd amháin.

(15)

Ós rud é go n-aicmítear cuineoilín-8-ól mar shubstaint atá tocsaineach don atáirgeadh de chatagóir 1B, comhlíonann sé an coinníoll a leagtar amach sa séú fleasc de phointe 4 d’Iarscríbhinn II a ghabhann le Rialachán (CE) Uimh. 1107/2009 chun go bhformheasfar é mar shubstaint atá inbhreithnithe lena hionadú de bhun Airteagal 24 de Rialachán (CE) Uimh. 1107/2009.

(16)

Dá bhrí sin, is iomchuí formheas cuineoilín-8-óil a athnuachan, mar shubstaint atá inbhreithnithe lena hionadú, de bhun Airteagal 24 de Rialachán (CE) Uimh. 1107/2009.

(17)

I gcomhréir le hAirteagal 14(1) de Rialachán (CE) Uimh. 1107/2009, i gcomhar le hAirteagal 6 de, agus i bhfianaise an eolais eolaíoch theicniúil reatha agus i bhfianaise thoradh an mheasúnaithe riosca, is gá, áfach, foráil a dhéanamh maidir le coinníollacha agus srianta áirithe. Go háirithe, níor cheart údarú a thabhairt ach d’úsáidí gairmiúla táirgí cosanta plandaí ina bhfuil cuineoilín-8-ól i dtithe gloine buana lena gceadaítear malartú rialaithe ábhair agus fuinnimh leis an timpeallacht agus lena gcuirtear cosc ar scaoileadh táirgí cosanta plandaí isteach sa chomhshaol, trí uisciú silte, chun a áirithiú nach mbeidh nochtadh oibreoirí, oibrithe, daoine ar an láthair agus cónaitheoirí dó ach diomaibhseach. Ar an gcúis chéanna, níor cheart úsáidí cuineoilín-8-óil a údarú ach amháin i gcás ina bhfuil córas aistrithe iata ar fáil chun an táirge cosanta plandaí a luchtú agus a mheascadh isteach sa trealamh leata. Ina theannta sin, ba cheart eatramh réamhbhuainte a shocrú agus ba cheart srian a chur le hathúsáid ithreach ina bhfástar barra a chóireáiltear le táirgí cosanta plandaí ina bhfuil cuineoilín-8-ól i dtithe gloine buana, ionas go dtabharfaí aghaidh ar an riosca atá ann do mhacra-orgánaigh ithreach arna shainaithint ag EFSA.

(18)

Is gá freisin faisnéis deimhniúcháin bhreise a éileamh ar an iarratasóir a mhéid a bhaineann le nochtadh neamhchothaitheach don tsubstaint ghníomhach, sonraí maidir le meitibileacht barr uainíochta teoranta lena dtugtar aghaidh ar a bhfuil i ndán don mháthairchomhdhúil maidir leis na barra a thagann ina diaidh, chomh maith le staidéir nó faisnéis chun easpa acmhainneacht chlastaigineach agus aineoigineach maidir le cuineoilín-8-ól a dheimhniú.

(19)

Ba cheart Rialachán Cur Chun Feidhme (AE) Uimh. 540/2011 a leasú dá réir.

(20)

Le Rialachán Cur Chun Feidhme (AE) 2015/408 ón gCoimisiún (8) áirítear 8-hiodrocsacuineoilín (cuineoilín-8-ól) i liosta na substaintí atá inbhreithnithe lena n-ionadú. I bhfianaise fhormheas cuineoilín-8-óil mar shubstaint atá inbhreithnithe lena hionadú a athnuachan agus i bhfianaise chuimsiú comhfhreagrach cuineoilín-8 óil i gCuid E den Iarscríbhinn a ghabhann le Rialachán Cur Chun Feidhme (AE) Uimh. 540/2011, ba cheart an iontráil a bhaineann le cuineoilín-8-ól a scriosadh ón Iarscríbhinn a ghabhann le Rialachán Cur Chun Feidhme (AE) 2015/408.

(21)

Le Rialachán Cur Chun Feidhme (AE) 2024/2781 ón gCoimisiún (9) cuireadh síneadh le tréimhse formheasa cuineoilín-8-óil go dtí an 31 Nollaig 2025 chun go bhféadfaí an próiseas athnuachana a chur i gcrích sula rachadh tréimhse formheasa na substainte gníomhaí sin in éag. Mar sin féin, ós rud é go ndearnadh cinneadh chun an formheas a athnuachan roimh an dáta éaga sin ar cuireadh síneadh leis, ba cheart feidhm a bheith ag an Rialachán seo tráth is luaithe ná an dáta sin.

(22)

Leis an Rialachán seo, ní chuirtear cosc ar an iarratasóir faisnéis bhreise a chur isteach chun na coinníollacha formheasa a leasú, dá bhforáiltear in Airteagail 7 agus 14 de Rialachán (CE) Uimh. 1107/2009.

(23)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,