(1)

Le Rialachán Cur Chun Feidhme (AE) 2019/1085 ón gCoimisiún (2) rinneadh formheas na substainte gníomhaí 1-meitilcioglapróipéin a athnuachan.

(2)

Tar éis na hathnuachana sin, i bhformheas na substainte gníomhaí 1-meitilcioglapróipéin a leagtar amach i gCuid B den Iarscríbhinn a ghabhann le Rialachán Cur Chun Feidhme (AE) Uimh. 540/2011 ón gCoimisiún (3), déantar úsáid na substainte a shrianadh ionas nach n-úsáidfear í ach amháin mar rialaitheoir fáis plandaí le linn stóráil iarbhuainte i dtrádstórais inséalaithe.

(3)

I gcomhréir le hAirteagal 7(1) de Rialachán (CE) Uimh. 1107/2009, an 4 Márta 2019, chuir AgroFresh Holding France SAS iarratas faoi bhráid an Bhallstáit is rapóirtéir ainmnithe, an Ísiltír, inar iarradh leasú ar choinníollacha formheasa 1-meitilcioglapróipéine chun an srian a chuirtear ar a úsáid seachas mar rialaitheoir fáis plandaí le linn stóráil iarbhuainte i dtrádstórais inséalaithe a bhaint agus chun a úsáid mar rialaitheoir fáis plandaí a cheadú in úsáidí allamuigh réamhbhuainte trí sprae úlloird a thagann ó chóras insteallta dhírigh. Chinn an Ballstát is rapóirtéir an t-iarratas a bheith inghlactha.

(4)

Rinne an Ballstát is rapóirtéir measúnú ar úsáidí nua beartaithe na substainte gníomhaí 1-meitilcioglapróipéin i ndáil leis na héifeachtaí a d’fhéadfadh a bheith ann ar shláinte an duine agus ar shláinte ainmhithe agus ar an gcomhshaol i gcomhréir le hAirteagal 4 de Rialachán (CE) Uimh. 1107/2009, agus d’ullmhaigh sé tuarascáil athbhreithnithe maidir le measúnú ar athnuachan, agus cuireadh an tuarascáil sin faoi bhráid an Údaráis Eorpaigh um Shábháilteacht Bia ('an tÚdarás') agus an Choimisiúin an 12 Deireadh Fómhair 2021.

(5)

I gcomhréir le hAirteagal 12(1) de Rialachán (CE) Uimh. 1107/2009, scaip an tÚdarás an tuarascáil athbhreithnithe maidir le measúnú ar athnuachan ar an iarratasóir agus ar na Ballstáit chun barúlacha a fháil agus chuir sé ar fáil don phobal í. I gcomhréir le hAirteagal 12(3) de Rialachán (CE) Uimh. 1107/2009, iarradh faisnéis bhreise ar an iarratasóir. Rinne an Ballstát is rapóirtéir meastóireacht ar an bhfaisnéis bhreise agus chuir sé an tuarascáil athbhreithnithe maidir le measúnú ar athnuachan faoi bhráid an Choimisiúin agus an Údaráis i mí Dheireadh Fómhair 2023.

(6)

An 19 Iúil 2024, chuir an tÚdarás a chonclúid (4) in iúl don Choimisiún i dtaobh an bhféadfadh coinne a bheith leis go gcomhlíonfaidh úsáidí nua beartaithe na substainte gníomhaí 1-meitilcioglapróipéin na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(7)

Chuir an Coimisiún aguisín a ghabhann leis an tuarascáil athnuachana maidir le 1-meitilcioglapróipéin faoi bhráid an Bhuanchoiste um Plandaí, Ainmhithe, Bia agus Beatha an 4 Nollaig 2024 agus chuir sé dréacht den Rialachán seo faoi bhráid an Bhuanchoiste an 12 Márta 2025.

(8)

D’iarr an Coimisiún ar an iarratasóir a bharúlacha a chur isteach maidir leis an aguisín a ghabhann leis an tuarascáil athnuachana. Chuir an t-iarratasóir barúlacha isteach, agus rinneadh scrúdú cúramach orthu.

(9)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil an tsubstaint ghníomhach 1-meitilcioglapróipéin, tá sé suite go gcomhlíontar na critéir formheasa dá bhforáiltear in Airteagal 4 de Rialachán (CE) Uimh. 1107/2009 le haghaidh na n-úsáidí nua. Dá bhrí sin, is iomchuí an srian sin a bhaint agus úsáidí allamuigh réamhbhuainte a cheadú.

(10)

Ina theannta sin, chun cur leis an muinín as an gcinneadh, ba cheart don iarratasóir faisnéis deimhniúcháin a chur faoi bhráid an Choimisiúin, na mBallstát agus an Údaráis a mhéid a bhaineann le láithreacht alcóil meataillile in urranna ithreach agus uisceacha agus, má fhoirmítear i méideanna ábhartha é, faisnéis maidir lena airíonna tocsaineolaíocha agus maidir leis an riosca a d’fhéadfadh a bheith ann d’orgánaigh uisceacha agus ithreach. Thairis sin, ba cheart don iarratasóir faisnéis a chur isteach a mhéid a bhaineann le héifeacht próiseas cóireáilte uisce ar an gcineál iarmhar atá i láthair in uisce óil. Ba cheart an fhaisnéis deimhniúcháin sin a chur isteach laistigh de 2 bhliain ó dháta theacht i bhfeidhm an Rialacháin seo.

(11)

Dá bhrí sin, ba cheart Rialacháin Cur Chun Feidhme (AE) 2019/1085 agus (AE) Uimh. 540/2011 a leasú dá réir.

(12)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,