(1)

De réir Choiste Basel um Maoirseacht ar Bhaincéireacht le haghaidh priacal margaidh, féadfaidh na húdaráis inniúla cead a thabhairt d’institiúidí i gcásanna eisceachtúla gan ceanglais áirithe de chuid chur chuige malartach na samhlacha inmheánacha a chomhlíonadh i ndáil leis na ceanglais chúltástála agus sannta brabúis agus caillteanais. I gcomhréir leis an bprionsabal a bhunaítear leis na caighdeáin sin, níor cheart a mheas go bhfuil imthosca eisceachtúla leitheadach ach amháin i gcás ina bhfuil strus mór ar an margadh airgeadais trasteorann, nó i gcás ina bhfuil athrú mór ar an gcóras, a dhéanann difear ábhartha d’institiúidí ar fud an Aontais.

(2)

Institiúidí gan a bheith in ann na ceanglais chúltástála a leagtar amach in Airteagal 325bf(3) de Rialachán (AE) Uimh. 575/2013, nó an ceanglas sannta brabúis agus caillteanais a leagtar síos in Airteagal 325bg den Rialachán sin, a chomhlíonadh mar gheall ar theagmhais nach bhfuil neart acu orthu agus ar choinníoll nach n-eascraíonn neamhchomhlíonadh na gceanglas sin as easnaimh ar an tsamhail inmheánach, ba cheart é sin a bheith ina choinníoll breise le go measfaí imthosca urghnácha a bheith leitheadach.

(3)

Bunófar an chúltástáil agus an tástáil sannta brabúis agus caillteanais araon ar shonraí le haghaidh na 250 lá gnó roimh an dáta tagartha dá ndéantar an tástáil shonrach. Ba cheart, dá bhrí sin, imthosca urghnácha a shainaithint igcás ina n-áirítear tréimhse ina bhfuil strus mór, go hiomlán nó go páirteach sa tréimhse 250 lá gnó sin, ar an margadh airgeadais trasteorann, nó athrú mór ar an gcóras, ina ndéantar difear ábhartha d’institiúidí ar fud an Aontais agus ina gcruthaítear eisceachtaí nach n-eascraíonn as easnaimh ar an tsamhail inmheánach.

(4)

Na gnéithe de ghéarchéim as a n-eascraíonn strus suntasach ar an margadh airgeadais trasteorann, nó athrú mór ar an gcóras, a dhéanann difear ábhartha d’institiúidí ar fud an Aontais, is gnéithe uathúla iad i ngach géarchéim nó athrú ar an gcóras den sórt sin. Ní bheadh sé iomchuí, dá bhrí sin, tacar uileghabhálach táscairí a leagan síos ar bhealach saintreorach a mheasfaí a bheith leordhóthanach i gcónaí chun cineál agus déine strus an mhargaidh airgeadais nó an aistrithe mhóir ar an gcóras atá ar tí tarlú a léiriú. Maidir le méadú suntasach ar an leibhéal luaineachta, le hathruithe ar leibhéil chomhghaolúcháin, agus leis an tslí go dtagann an strus suntasach ar an margadh airgeadais trasteorann nó an t-athrú mór ar an gcóras airgeadais chun cinn go han-tapa agus go han-tobann, ba cheart a mheas ar bhonn na taithí gur tréithe coitianta de chuid staideanna neamhghnáthacha atá iontu, áfach. Mar sin féin, d’fhéadfadh sé nach leor astu féin méadú tobann ar an leibhéal luaineachta nó athruithe ar na leibhéil luaineachta chun cás a shaintréithriú mar cheann ina bhfuil strus suntasach ar an margadh airgeadais trasteorann nó athrú mór ar an gcóras agus, dá bhrí sin, níor cheart imthosca urghnácha dá dtagraítear in Airteagal 325az(5) agus Airteagal 325bf(6) de Rialachán (AE) Uimh. 575/2013 a shainaithint go huathoibríoch mar thoradh orthu.

(5)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Baincéireachta Eorpach.

(6)

Rinne an tÚdarás Baincéireachta Eorpach comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo agus d’iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (2),