IARSCRÍBHINN

Doiciméad ar teimpléad é le haghaidh socruithe comhair maidir le faisnéis a mhalartú idir údaráis inniúla na mBallstát agus údaráis mhaoirseachta tríú tíortha agus maidir le forfheidhmiú na n-oibleagáidí a eascraíonn as Rialachán (AE) 2023/1114 i dtríú tíortha

1.   Réamhrá

Tuairisc ar bhunús dlí gach údaráis sínitheora le haghaidh malartú faisnéise chun gur féidir leo a ndualgais a dhéanamh i gcomhréir lena ndlíthe agus lena rialacháin a bhaineann le margaí i gcripteashócmhainní.

Dearbhú, de bhun na ndlíthe agus na rialachán arb iad an bunús dlí iad maidir le faisnéis a mhalartú, go bhfuil na húdaráis shínitheora le cúnamh frithpháirteach cómhalartach a sholáthar dá chéile i gcomhréir leis na socruithe comhair.

Dearbhú nach bhfuil sé i gceist le forálacha na socruithe comhair oibleagáidí atá ceangailteach ó thaobh dlí a chruthú ná nach nglacann siad ionad an dlí náisiúnta.

2.   Sainmhínithe

Liosta iomchuí sainmhínithe lena gcumhdaítear na téarmaí a úsáidtear sna socruithe comhair.

3.   An cineál cúnaimh atá le soláthar

Tuairisc ar an gcineál cúnaimh atá le soláthar i gcomhréir le hAirteagal 94 de Rialachán (AE) 2023/1114 amhail:

(a)	faisnéis atá i gcomhaid an údaráis iarrtha a fháil;

(b)	ráitis nó faisnéis a fháil ó aon duine;

(c)	doiciméid a fháil ó dhaoine nó ó eintitis lena n-áirítear trí chigireachtaí ar an láthair a dhéanamh;

(d)

taifid ar thrácht sonraí a fháil, a mhéid a cheadaítear leis an dlí náisiúnta agus, i gcás inarb infheidhme, le cúnamh ón údarás breithiúnach iomchuí ag brath ar chur chun feidhme Airteagal 94(3), pointe (e), de Rialachán (AE) 2023/1114 nó aon chumhacht choibhéiseach faoi dhlíthe an tríú tír ábhartha;

(e)	reo nó forlámhú sócmhainní a fháil, nó cuidiú lena bhfáil, i gcomhréir le hAirteagal 94(3), pointe (f), de Rialachán (AE) 2023/1114 nó aon chumhacht choibhéiseach faoi dhlíthe an tríú tír ábhartha;

(f)	scor sealadach a fháil d’aon chleachtas nó iompar a mheastar a bheith contrártha do na dlíthe agus na rialacháin a bhaineann le margaí i gcripteashócmhainní i gcomhréir le hAirteagal 94(1), pointe (v), de Rialachán (AE) 2023/1114 nó d’aon chumhacht choibhéiseach faoi dhlíthe an tríú tír ábhartha.

4.   Forálacha ginearálta – diúltú cúnaimh

Áireofar an méid seo a leanas ar liosta na gcásanna ina bhféadfaidh údaráis inniúla iarrataí ar chomhar a dhiúltú:

(a)	nach bhfuil an iarraidh á déanamh i gcomhréir leis na socruithe comhair;

(b)	go gceanglófaí leis an iarraidh ar an údarás iarrtha gníomhú ar bhealach a sháródh an dlí náisiúnta;

(c)	d’fhéadfadh cumarsáid den fhaisnéis ábhartha dochar a dhéanamh do shlándáil na dlínse a ndírítear an iarraidh chuici, go háirithe an comhrac in aghaidh sceimhlitheoireachta nó coireanna tromchúiseacha eile;

(d)	d’fhéadfadh comhlíonadh na hiarrata dochar a dhéanamh don imscrúdú féin, amhail imscrúdú coiriúil, ag an údarás iarrtha nó dá ghníomhaíochtaí forfheidhmiúcháin;

(e)	i gcás ina ndearnadh imeachtaí breithiúnacha a thionscnamh cheana féin i ndáil leis na gníomhaíochtaí céanna agus in aghaidh na ndaoine céanna os comhair údaráis ábhartha na dlínse ar díríodh an iarraidh sin chuici;

(f)

gur tugadh breithiúnas críochnaitheach cheana féin i ndáil leis na daoine céanna i leith na ngníomhaíochtaí céanna sa dlínse ar a ndírítear, ach amháin más féidir leis an údarás iarrthach a léiriú nach mbeadh an faoiseamh nó na smachtbhannaí a lorgaítear in aon imeacht arna dtionscnamh ag an údarás iarrthach den chineál céanna ná dúblálach maidir le haon fhaoiseamh nó smachtbhannaí a fhaightear i ndlínse an údaráis iarrtha.

Ní dhiúltófar cúnamh ar an bhforas nach sárú é an cineál iompair atá faoi imscrúdú ar na dlíthe agus na rialacháin a bhaineann le margaí i gcripteashócmhainní dhlínse an údaráis iarrtha.

5.   Seoladh agus próiseáil iarrataí ar chúnamh

Tuairisc ar an nós imeachta a bhaineann le hiarrataí ar chúnamh a sheoladh agus a phróiseáil.

6.   Úsáidí ceadaithe faisnéise

Tuairisc ar na rialacha maidir le húsáid incheadaithe na faisnéise i gcomhréir le hAirteagal 107(5) de Rialachán (AE) 2023/1114 agus go mbeidh an fhaisnéis a sholáthraítear beartaithe chun cúraimí an údaráis iarrthaigh a chomhlíonadh chun a áirithiú go gcomhlíonfar agus go bhforfheidhmeofar na dlíthe agus na rialacháin a bhaineann le margaí i gcripteashócmhainní. Bainfear úsáid as an bhfaisnéis a mhalartaítear chun críche na gcuspóirí a leagtar amach san iarraidh ar chúnamh.

Má tá sé ar intinn ag údarás iarrthach an fhaisnéis a sholáthraítear faoi na socruithe comhair a úsáid chun aon chríche seachas an chríoch a luaitear sa roinn seo, gheobhaidh sé toiliú roimh ré ón údarás iarrtha.

7.   Próiseáil sonraí pearsanta

Léiriú go ndéanfar sonraí pearsanta a phróiseáil i gcomhréir iomlán le Rialachán (AE) 2016/679.

8.   Srianta rúndachta

Tuairisc ar na rialacha maidir le rúndacht aon fhaisnéise a nochtar, a fhaightear, a mhalartaítear nó a thugtar. Áireofar an méid seo a leanas sa tuairisc:

(a)

gach faisnéis a dhéantar a mhalartú idir na húdaráis sínitheora faoi na socruithe comhair a bhaineann le dálaí gnó nó oibríochtúla nó le gnóthaí eacnamaíocha nó pearsanta eile, measfar gur faisnéis rúnda í agus beidh sí faoi réir cheanglais na rúndachta gairmiúla, ach amháin i gcás ina sonraíonn an t-údarás iarrtha, tráth a tharchuirtear faisnéis, go bhféadfar an fhaisnéis a nochtadh, nó i gcás ina bhfuil nochtadh den sórt sin riachtanach i gcomhair imeachtaí dlíthiúla;

(b)

tá feidhm ag oibleagáid na rúndachta gairmiúla maidir leis na daoine nádúrtha agus dlítheanacha uile a oibríonn nó a d’oibrigh do na húdaráis sínitheora. Ní fhéadfar faisnéis atá cumhdaithe ag rúndacht ghairmiúil a nochtadh d’aon duine nádúrtha nó dlítheanach eile nó d’aon údarás eile seachas de bhua forálacha a leagtar síos le dlí an Aontais nó leis an dlí náisiúnta, nó de bhua forálacha a leagtar síos i ndlíthe an tríú tír ábhartha atá coibhéiseach ar a laghad leis na forálacha sin.

Ní nochtfar an fhaisnéis a mhalartófar d’aon údarás ná d’aon eintiteas eile ach amháin le comhaontú roimh ré ón údarás sínitheora a chuir ar fáil í.

9.   Forálacha ginearálta – sainaithint pointe teagmhála

Chun comhar a éascú faoi na socruithe, ainmniú na bpointí teagmhála arna dhéanamh ag na húdaráis sínitheora.

10.   Forálacha ginearálta – clásal maidir le hathbhreithniú

Athbhreithniú tréimhsiúil ag na húdaráis sínitheora ar fheidhmiú agus ar éifeachtacht na socruithe comhair d’fhonn raon feidhme nó oibriú na socruithe a leathnú nó a athrú, i gcás inar gá.

11.   Forálacha ginearálta – Ilghnéitheach