(1)

Le Rialachán (CE) Uimh. 1831/2003 foráiltear maidir le húdarú breiseán lena n-úsáid i gcothú ainmhithe agus maidir leis na forais agus na nósanna imeachta chun údarú den sórt sin a dheonú agus a athnuachan.

(2)

Le Rialachán Cur Chun Feidhme (AE) Uimh. 1006/2013 ón gCoimisiún (2), údaraíodh L-cistín ar feadh tréimhse 10 mbliana mar bhreiseán beathaithe le haghaidh gach speicis ainmhíoch.

(3)

I gcomhréir le hAirteagal 14(1) de Rialachán (CE) Uimh. 1831/2003, cuireadh iarratas isteach chun údarú L-cistín mar bhreiseán beathaithe le haghaidh gach speicis ainmhíoch a athnuachan, iarratas inar iarradh go n-aicmeofaí an breiseán sin i gcatagóir na mbreiseán ‘breiseáin chothaitheacha’ agus san fheidhmghrúpa ‘aimíonaigéid, a salainn agus analóga’. Bhí na sonraí agus na doiciméid a cheanglaítear faoi Airteagal 14(2) den Rialachán sin ag gabháil leis an iarratas sin.

(4)

Tháinig an tÚdarás Eorpach um Shábháilteacht Bia (‘an tÚdarás’) ar an gconclúid sa tuairim uaidh an 18 Aibreán 2024 (3) nach bhfuil aon ábhar imní ó thaobh na sábháilteachta de i gceist le húsáid L-cistín maidir leis na spriocspeicis, na tomhaltóirí agus an comhshaol. A mhéid a bhaineann le sábháilteacht an úsáideora, tháinig sé ar an gconclúid freisin nach meastar go bhfuil L-cistín greannach don chraiceann ná do na súile agus nach meastar gur íogróir craicinn é ach nach féidir a chur as an áireamh go nochtfaí trí ionanálú daoine a láimhseálann an breiseán. Mheas an tÚdarás nach gá measúnú a dhéanamh ar éifeachtúlacht L-cistín, toisc nach n-áirítear san iarratas ar athnuachan an údaraithe moladh maidir le coinníollacha an údaraithe bunaidh a leasú ná a fhorlíonadh i ndáil leis sin.

(5)

Maidir leis na conclúidí agus na moltaí ar ar thángthas le linn an mheasúnaithe a rinneadh i ndáil leis na modhanna a úsáidtear chun anailís a dhéanamh ar L-cistín mar bhreiseán beathaithe i gcomhthéacs an údaraithe roimhe seo, ba é meas na Saotharlainne Tagartha a bunaíodh le Rialachán (CE) Uimh. 1831/2003 go bhfuil na conclúidí agus na moltaí sin bailí agus infheidhme maidir leis an iarratas atá ann faoi láthair. Mar sin féin, an tuarascáil mheastóireachta a cuireadh isteach i gcomhthéacs an údaraithe roimhe sin, thug an tSaotharlann Tagartha cothrom le dáta ina dhiaidh sin í, chun forbairtí eolaíocha agus teicneolaíocha a chur san áireamh agus chun a áirithiú go mbeadh na modhanna anailíse níos oiriúnaí do rialuithe oifigiúla. D’fhíoraigh an tÚdarás an tuarascáil leasaithe maidir leis na modhanna a úsáidtear chun anailís a dhéanamh ar L-cistín mar bhreiseán beathaithe arna cur isteach ag an tSaotharlann Tagartha (4).

(6)

I bhfianaise an mhéid thuas, measann an Coimisiún go gcomhlíonann L-cistín na coinníollacha dá bhforáiltear in Airteagal 5 de Rialachán (CE) Uimh. 1831/2003. Dá réir sin, ba cheart údarú an bhreiseáin sin a athnuachan. A mhéid a bhaineann le modhanna anailíse, ba cheart an tuarascáil mheastóireachta cothrom le dáta ón tSaotharlann Tagartha a chur san áireamh. Is iomchuí foláireamh a thabhairt don úsáideoir nach mór a chur san áireamh go mbeidh an forlíonadh le L-cistín ag brath ar riachtanais na spriocainmhithe maidir le haimíonaigéid ina bhfuil sulfar agus ar an leibhéal aimíonaigéid eile ina bhfuil sulfar sa chandam. Ina theannta sin, measann an Coimisiún gur cheart bearta cosanta iomchuí a dhéanamh chun éifeachtaí díobhálacha ar shláinte úsáideoirí an bhreiseáin a chosc. Ba cheart na bearta cosanta sin a bheith gan dochar do cheanglais eile sábháilteachta oibrithe faoi dhlí an Aontais.

(7)

Mar thoradh ar údarú L-cistín mar bhreiseán beathaithe a athnuachan, ba cheart Rialachán Cur Chun Feidhme (AE) Uimh. 1006/2013 a aisghairm.

(8)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,