(1)

An 30 Samhain 2018, fuair an Ísiltír iarratas de bhun Airteagal 7(1) de Rialachán (CE) Uimh. 1107/2009 ó Andermatt Biocontrol Suisse AG ar fhormheas na substainte gníomhaí Phthorimaea operculella granulovirus.

(2)

In 2023 d’athraigh an Coiste Idirnáisiúnta um Thacsanomaíocht na Víreas an t-ainm Phthorimaea operculella granulovirus go Betabaculovirus phoperculellae. Dheimhnigh an tÚdarás Eorpach um Shábháilteacht Bia (‘an tÚdarás’) cruinneas eolaíoch an athdháilte thacsanomaíoch sin.

(3)

I gcomhréir le hAirteagal 9(3) den Rialachán sin, an 7 Meitheamh 2019, thug an Ísiltír, ina cáil mar Bhallstát is rapóirtéir, fógra don iarratasóir, do na Ballstáit eile, don Choimisiún agus don Údarás faoi inghlacthacht an iarratais.

(4)

An 25 Márta 2022, chuir an Ballstát is rapóirtéir dréacht-tuarascáil maidir le measúnú faoi bhráid an Choimisiúin agus cóip di faoi bhráid an Údaráis, le féachaint an féidir coinne a bheith leis go gcomhlíonfaidh an tsubstaint ghníomhach sin na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(5)

An dréacht-tuarascáil maidir le measúnú a fuarthas ón mBallstát is rapóirtéir, rinne an tÚdarás í a scaipeadh ar an iarratasóir agus ar na Ballstáit eile. I gcomhréir le hAirteagal 12(3) de Rialachán (CE) Uimh. 1107/2009, d’iarr an tÚdarás ar an iarratasóir faisnéis bhreise a sholáthar do na Ballstáit, don Choimisiún agus don Údarás. An measúnú ar an bhfaisnéis bhreise a rinne an Ballstát rapóirtéir, cuireadh faoi bhráid an Údaráis é an 10 Samhain 2023 i bhformáid dréacht-tuarascála maidir le measúnú nuashonraithe.

(6)

An chonclúid i dtaobh an féidir coinne a bheith leis go gcomhlíonfaidh an tsubstaint ghníomhach (2) atá i gceist na critéir formheasa dá bhforáiltear in Airteagal 4 de Rialachán (CE) Uimh. 1107/2009, chuir an tÚdarás í in iúl don iarratasóir, do na Ballstáit agus don Choimisiún an 22 Iúil 2024. Rinneadh tagairt fós sa chonclúid don ainm Phthorimaea operculella granulovirus. Chuir an tÚdarás a chonclúid ar fáil don phobal.

(7)

Chuir an Coimisiún tuarascáil athbhreithnithe agus dréacht-Rialachán maidir le Betabaculovirus phoperculellae faoi bhráid an Bhuanchoiste um Plandaí, Ainmhithe, Bia agus Beatha an 2 Deireadh Fómhair 2024 agus an 4 Nollaig 2024, faoi seach.

(8)

D’iarr an Coimisiún ar an iarratasóir a bharúlacha féin a chur isteach i leith chonclúid an Údaráis agus, i gcomhréir le hAirteagal 13(1) de Rialachán (CE) Uimh. 1107/2009, i leith na tuarascála athbhreithniúcháin. Chuir an t-iarratasóir a bharúlacha isteach, agus rinneadh scrúdú cúramach orthu.

(9)

Maidir le húsáid ionadaíoch amháin nó níos mó a bhaintear as táirge cosanta plandaí amháin ar a laghad ina bhfuil an tsubstaint ghníomhach, agus go háirithe na húsáidí a scrúdaíodh agus a mionsonraíodh sa tuarascáil athbhreithniúcháin, suíodh go gcomhlíontar na critéir formheasa dá bhforáiltear in Airteagal 4 de Rialachán (CE) Uimh. 1107/2009.

(10)

Ina theannta sin, measann an Coimisiún gur substaint ghníomhach ísealriosca í Betabaculovirus phoperculellae de bhun Airteagal 22 de Rialachán (CE) Uimh. 1107/2009. Ní substaint arb údar imní í Betabaculovirus phoperculellae agus comhlíonann sí na coinníollacha a shocraítear i bpointe 5.2.2 d’Iarscríbhinn II a ghabhann le Rialachán (CE) Uimh. 1107/2009, sa leagan di is infheidhme maidir leis an nós imeachta chun an tsubstaint ghníomhach sin a fhormheas, ós rud é go mbaineann sí leis an bhfine Baculoviridae agus nár léirigh sí éifeachtaí díobhálacha ar aon fheithid nach spriocfheithid í.

(11)

Dá bhrí sin, is iomchuí Betabaculovirus phoperculellae a fhormheas mar shubstaint ghníomhach íseal-riosca.

(12)

I gcomhréir le hAirteagal 13(2) de Rialachán (CE) Uimh. 1107/2009 i gcomhar le hAirteagal 6 de agus i bhfianaise an eolais eolaíoch reatha agus an eolais theicniúil reatha, is gá coinníollacha áirithe a chur san áireamh chun a áirithiú go gcomhlíonfar na teorainneacha ar éilliú miocróbach ábhartha agus go gcosnófar oibreoirí agus oibrithe, agus é á chur san áireamh go meastar gur íogróirí féideartha iad na miocrorgánaigh uile.

(13)

I gcomhréir le hAirteagal 13(4) de Rialachán (CE) Uimh. 1107/2009, i gcomhar le hAirteagal 22(2) de, ba cheart Rialachán Cur Chun Feidhme (AE) Uimh. 540/2011 ón gCoimisiún (3) a leasú dá réir.

(14)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,