(1)

Na cuótaí iascaireachta le haghaidh 2023, leagtar síos iad le Rialacháin (AE) 2022/2090 (2), (AE) 2023/194 (3) agus (AE) 2023/195 (4) ón gComhairle.

(2)

Na cuótaí iascaireachta le haghaidh 2024, leagtar síos iad le Rialacháin (AE) 2023/194, (AE) 2023/2638 (5), (AE) 2024/257 (6) agus (AE) 2024/259 (7) ón gComhairle.

(3)

De bhun Airteagal 105(1) de Rialachán (CE) Uimh. 1224/2009, i gcás ina bhfuil sé suite ag an gCoimisiún go bhfuil Ballstát tar éis na cuótaí iascaireachta a cionroinneadh air a shárú, tá an Coimisiún le hasbhaintí a oibriú ó chuótaí iascaireachta a bheidh ag an mBallstát sin amach anseo.

(4)

Le Rialachán Cur Chun Feidhme (AE) 2024/2407 ón gCoimisiún (8) leagtar síos asbhaintí ó chuótaí iascaireachta atá ar fáil le haghaidh stoic áirithe éisc in 2024 de dheasca na ró-iascaireachta sna blianta roimhe sin.

(5)

I gcás Ballstáit áirithe, mar atá, an Danmhairg, an Spáinn, an Ísiltír, an Pholainn agus an Phortaingéil, níor féadadh asbhaintí áirithe a oibriú le Rialachán Cur Chun Feidhme (AE) 2024/2407 ó chuótaí iascaireachta a cionroinneadh le haghaidh na stoc a ndearnadh ró-iascaireacht orthu de bhrí nach bhfuil cuótaí le haghaidh na stoc sin ar fáil do na Ballstáit sin in 2024.

(6)

Mura féidir asbhaintí a oibriú maidir leis an stoc a ndearnadh ró-iascaireacht air sa bhliain i ndiaidh na ró-iascaireachta de bhrí nach bhfuil cuóta ar fáil don Bhallstát lena mbaineann le haghaidh an stoic éisc sin, foráiltear le hAirteagal 105(5) de Rialachán (CE) Uimh. 1224/2009 go bhféadfar asbhaintí a oibriú ó chuótaí le haghaidh stoic eile sa limistéar geografach céanna nó le haghaidh stoic a bhfuil an luach tráchtála céanna orthu tar éis dul i gcomhairle leis an mBallstát lena mbaineann.

(7)

De réir phointe 4 de Theachtaireacht ón gCoimisiún faoi threoirlínte maidir le cuótaí a asbhaint faoi Airteagal 105(1), (2) agus (5) de Rialachán (CE) Uimh. 1224/2009 (9) (‘na Treoirlínte’), b’fhearr asbhaintí den sórt sin a oibriú ó chuótaí a cionroinneadh le haghaidh stoic arb é an cabhlach céanna a rinne iascaireacht orthu agus a rinne ró-iascaireacht ar an gcuóta.

(8)

Chuathas i gcomhairle leis na Ballstáit lena mbaineann a mhéid a bhaineann le hasbhaintí áirithe ó chuótaí iascaireachta a cionroinneadh le haghaidh stoic seachas na stoic sin a ndearnadh ró-iascaireacht orthu. Is iomchuí, dá bhrí sin, asbhaintí a oibriú ó na cuótaí malartacha iascaireachta sin a cionroinneadh ar na Ballstáit sin in 2024.

(9)

I gcásanna áirithe, le malartuithe deiseanna iascaireachta arna dtabhairt i gcrích i gcomhréir le hAirteagal 16(8) de Rialachán (AE) Uimh. 1380/2013 ó Pharlaimint na hEorpa agus ón gComhairle (10), féadadh asbhaintí iomlána nó páirteacha a dhéanamh maidir leis na stoic chéanna faoi chuimsiú Rialachán Cur Chun Feidhme (AE) 2024/2407.

(10)

Thairis sin, sáraíonn asbhaintí áirithe dá bhforáiltear le Rialachán Cur Chun Feidhme (AE) 2024/2407 na cuótaí oiriúnaithe atá ar fáil in 2024 agus, mar thoradh air sin, ní féidir iad a oibriú ina n-iomláine sa bhliain sin. Sna cásanna sin, de réir phointe 2 de na Treoirlínte, oibríodh na hasbhaintí go méid iomlán an chuóta atá ar fáil agus ba cheart na méideanna atá fágtha a asbhaint ón gcuóta oiriúnaithe a bheidh ar fáil sna blianta ina dhiaidh sin go dtí go n-aisíocfar an méid iomlán a ndearnadh ró-iascaireacht air.

(11)

In 2023 rinne an Ghearmáin ró-iascaireacht 1,320 tona ar a cuóta le haghaidh speicis eile in uiscí na hIorua in 1 agus 2 (OTH/1N2AB.). Ina theannta sin, tá asbhaint 19,997 tona fós ann tar éis don Ghearmáin ró-iascaireacht a dhéanamh ar a cuóta le haghaidh OTH/1N2AB. in 2022, i gcomhréir le pointe 2 de na Treoirlínte. Le post leictreonach dar dáta an 1 Iúil 2024, d’iarr an Ghearmáin an asbhaint atá dlite, is é sin 21,317 tona, a roinnt thar 3 bliana. Ós rud é, i gcomhréir le pointe 3(b) de na Treoirlínte, go bhféadfadh aisíoc níos moille a bheith incheadaithe go heisceachtúil i gcás ina ngabhtar an stoc lena mbaineann in iascach measctha agus ina gcuirfeadh caillteanas mór cuóta cosc ar shaothrú na speiceas gaolmhar i ngabháil an iascaigh mheasctha sin, is féidir glacadh leis an iarraidh sin. Dá bhrí sin, 7,106 tona in 2024 agus 2025 agus 7,105 tona in 2026 atá sna hasbhaintí bliantúla is infheidhme maidir le cuóta na Gearmáine le haghaidh OTH/1N2AB., gan dochar d’aon oiriúnú eile ar chuótaí.

(12)

Tar éis athruithe ar an sainmhíniú ar limistéar stoic a bunaíodh le Rialachán (AE) 2024/257, ba cheart an asbhaint is infheidhme maidir leis an Danmhairg as ró-iascaireacht ar chadóg in uiscí an Aontais in 3a (HAD/*03A-C) in 2023 a chur i bhfeidhm anois maidir le cuóta 2024 le haghaidh cadóg i limistéar 3a (HAD/*03A.).

(13)

Dearbhaítear i bpointe 1 de na Treoirlínte go bhfuil an amlíne le haghaidh asbhaintí i gcás ró-iascaireacht ar chuóta maidir le stoic atá á mbainistiú ag eagraíochtaí réigiúnacha iascaigh le cur in oiriúint, i gcás inarb infheidhme, don amlíne le haghaidh asbhaintí a shocraítear sna heagraíochtaí réigiúnacha iascaigh lena mbaineann maidir leis na stoic sin. Le Moladh 22-03 ón gCoimisiún Idirnáisiúnta um Chaomhnú na dTuinníní Atlantacha (ICCAT) maidir le caomhnú cholgáin an Atlantaigh Thuaidh (11), foráiltear go ndéanfar aon bharrachas sa chuóta coigeartaithe bliantúil in 2023 a asbhaint ón gcuóta/teorainn ghabhála le haghaidh 2025. Ar an mbonn sin, asbhaintí de dheasca na ró-iascaireachta, lena n-áirítear na hasbhaintí sin a eascraíonn as na fachtóirí iolraithe is infheidhme, ar an stoc colgán san Aigéan Atlantach in 2023, lastuaidh de 5° T (SWO/AN05N), stoc a ndéanann ICCAT bainistíocht air, ba cheart na hasbhaintí sin a chur i bhfeidhm in 2025. Dá bhrí sin, an asbhaint a leagtar síos le Rialachán Cur Chun Feidhme (AE) 2024/2407 de dheasca na ró-iascaireachta a rinne an Phortaingéil in 2023 ar a cuóta le haghaidh SWO/AN05N, ba cheart í a oibriú óna cuóta le haghaidh 2025. Thairis sin, an asbhaint atá le hoibriú, de dheasca na ró-iascaireachta a rinne an Fhrainc in 2023 ar an gcuóta a cionroinneadh ar ‘Bhallstáit eile’ – lena n-áirítear an Fhrainc – le haghaidh na bhfoghabhálacha colgán san Aigéan Atlantach, lastuaidh de 5° T (SWO/AN05N_AMS), agus le haghaidh na bhfoghabhálacha sin amháin, ba cheart í a oibriú ón gcuóta a cionroinnfear ar an bhFrainc le haghaidh 2025.

(14)

Ar an gcaoi chéanna, foráiltear le Moladh 19-05 ó ICCAT lena mbunaítear clár atógála le haghaidh mairlíní gorma (12) go ndéanfar aon bharrachas sna teorainneacha bliantúla maidir le gabhálacha a thabhairt i dtír arna socrú le haghaidh 2023 a asbhaint ó na teorainneacha maidir le gabhálacha a thabhairt i dtír le linn 2025. Dá bhrí sin, an asbhaint a leagtar síos le Rialachán Cur Chun Feidhme (AE) 2024/2407 mar gheall ar an ró-iascaireacht a rinne an Spáinn in 2023 ar a cuóta le haghaidh an stoic mairlíní gorma san Aigéan Atlantach (BUM/ATLANT), ba cheart í a chur i bhfeidhm maidir lena cuóta le haghaidh 2025.

(15)

I Rialachán Cur Chun Feidhme (AE) 2024/2407, tharla earráid chlóghrafach a mhéid a bhaineann le méid na hasbhainte is infheidhme mar gheall ar ró-iascaireacht na Polainne ar an gcuóta le haghaidh ronnach in uiscí an Aontais in 3a, 3b, 3c agus 3d; uiscí na Ríochta Aontaithe in 2a; uiscí an Aontais agus uiscí na Ríochta Aontaithe in 4; uiscí na hIorua in 2a agus 4a (MAC/2A34-N). 636,225 tona in ionad 636,275 tona ba cheart a bheith sa mhéid atá le hasbhaint.

(16)

Ba cheart, dá bhrí sin, Rialachán Cur Chun Feidhme (AE) 2024/2407 leasú dá réir.

(17)

Féadfar tuilleadh nuashonruithe nó ceartúchán a dhéanamh i ndiaidh earráidí, easnaimh nó míthuairisciú a bhrath, i gcás an ghnímh atá ann faoi láthair nó i gcás gníomhartha a rinneadh roimhe seo, sna figiúirí gabhála arna ndearbhú ag na Ballstáit de bhun Airteagal 33 de Rialachán (CE) Uimh. 1224/2009,